बेळगाव : बलात्कार प्रकरणात दोषी ठरलेले माजी खासदार प्रज्वल रेवण्णा यांना बेंगळुरूमधील परप्पन अग्रहारा मध्यवर्ती कारागृहातून बेळगावच्या हिंडलगा मध्यवर्ती कारागृहात हलवण्याच्या निर्णयाला राज्य कारागृह आणि सुधार सेवा विभागाने तात्पुरती स्थगिती दिली आहे. मात्र, अन्य सात कैद्यांच्या कारागृह बदलीचा मार्ग मोकळा झाला आहे.

परप्पन अग्रहारा कारागृहात मोबाईल फोनचा बेकायदेशीर वापर झाल्याचे प्रकरण समोर आल्यानंतर बेंगळुरू पोलिसांनी या घटनेची गंभीर दखल घेतली होती. यानंतर प्रज्वल रेवण्णा यांच्यासह सात जणांना वेगवेगळ्या कारागृहांत हलवण्याची शिफारस पोलिसांकडून करण्यात आली होती. त्यानुसार, कारागृह प्रशासनाने प्रज्वल रेवण्णा यांना हिंडलगा कारागृहात हलवण्याचा आदेश जारी केला होता.

सुमारे दोन महिन्यांपूर्वी केंद्रीय गुन्हे शाखेच्या (सीसीबी) पोलिसांनी परप्पन अग्रहारा कारागृहात छापा टाकला होता. या कारवाईदरम्यान प्रज्वल रेवण्णा यांच्या कोठडीत मोबाईल फोन आणि पेन ड्राइव्ह आढळून आले होते. या प्रकरणाच्या तपासादरम्यान प्रज्वल रेवण्णा, कारागृह अधीक्षक प्रकाश गायवे यांच्यासह सात जणांना अटक करण्यात आली होती.

दरम्यान, सर्वोच्च न्यायालयाच्या नावाने बनावट जामीनपत्र तयार केल्याच्या प्रकरणात सहभागी असल्याचा आरोप असलेल्या शंकर आणि अरमुगम या कैद्यांसह कारागृहातील प्रथम श्रेणी सहाय्यक श्रीकांत यांचीही अन्य कारागृहात बदली करण्याचा निर्णय घेण्यात आला आहे. या प्रकरणात वरिष्ठ कारागृह अधिकारी सोमशेखर यांनाही अटक झाली आहे.

प्रज्वल रेवण्णा यांच्या कारागृह बदलीवर देखरेख ठेवण्याची जबाबदारी सोमशेखर यांच्याकडे होती. मात्र, त्यांनाच अटक झाल्यानंतर पोलीस महासंचालक (कारागृह) आलोक कुमार यांनी बदलीच्या आदेशाचा फेरआढावा घेतला. सुरक्षा व्यवस्था आणि देखरेखीशी संबंधित बाबी विचारात घेऊन प्रज्वल रेवण्णा यांना हिंडलगा कारागृहात हलवण्याची प्रक्रिया तूर्तास स्थगित ठेवण्यात आली आहे.

The post प्रज्वल रेवण्णा यांच्या हिंडलगा कारागृहातील स्थलांतराला तात्पुरती स्थगिती appeared first on News 24 Tass Marathi.

दरम्यान, कारागृहातील कैद्यांकडून विविध गृहोपयोगी वस्तू तयार केल्या जातात. या वस्तूंना बाजारपेठ उपलब्ध करून देण्यासाठी शासकीय कार्यालयांमध्ये वापर त्यांचा करण्याबरोबरच विविध मेळावे व प्रदर्शनांमध्ये विक्रीची संधी उपलब्ध करून देण्यासाठी प्रयत्न केले जातील, असे जिल्हाधिकारी रोशन यांनी सांगितले. सुटकेनंतर कैद्यांना स्वावलंबी जीवन जगता यावे, यासाठी कौशल्य विकासाच्या उपक्रमांशी जोडण्याची व्यवस्थाही करण्यात येणार असल्याचे त्यांनी स्पष्ट केले.

The post सदाचारी कैद्यांच्या सुटकेसाठी चाचपणी appeared first on News 24 Tass Marathi.

बेळगाव : महिला पीएसआयशी संबंधित अश्लील व्हिडिओ प्रकरणामुळे हिंडलगा मध्यवर्ती कारागृहाचे नाव सोशल मीडियावर चर्चेत आले असून, कारागृह प्रशासनाने याची गंभीर दखल घेतली आहे. कारागृहाची बदनामी करणारी माहिती सोशल मीडियावर प्रसारित केल्याचा आरोप करत सहाय्यक अधीक्षकांनी बेळगावच्या द्वितीय जेएमएफसी न्यायालयात खासगी तक्रार दाखल केली आहे.

सामाजिक कार्यकर्त्या संध्या नागराज यांच्यासह काही व्यक्तींविरुद्ध ही तक्रार करण्यात आली आहे. कारागृह प्रशासनाच्या वतीने सरकारी वकील महंतेश यांनी न्यायालयात तक्रार सादर केली आहे.

अलीकडे एका महिला पीएसआयने खासगी व्यक्तीला नग्न अवस्थेत व्हिडिओ कॉल केल्याचा कथित व्हिडिओ सोशल मीडियावर प्रसारित झाला होता. हा व्हिडिओ ‘Sandhya777nagraj’ या इन्स्टाग्राम अकाऊंटवरून प्रसारित करण्यात आल्याचा आरोप तक्रारीत करण्यात आला आहे.

या व्हिडिओशी संबंधित पोस्टमध्ये महिला पीएसआयचा हिंडलगा मध्यवर्ती कारागृहाशी संबंध असल्याचे भासविण्यात आल्याचा दावा कारागृह प्रशासनाने केला आहे. तसेच संबंधित पोस्टमध्ये गृहमंत्री प्रियांक खर्गे आणि कारागृह सुधारणा विभागाच्या एडीजीपींचे फोटो वापरण्यात आल्याचेही तक्रारीत नमूद करण्यात आले आहे.

मात्र, संबंधित महिला पीएसआयचा हिंडलगा मध्यवर्ती कारागृहाशी कोणताही संबंध नसल्याचे कारागृह अधिकाऱ्यांनी स्पष्ट केले आहे. कारागृहाचे नाव अशा प्रकारे वापरून कथित अश्लील व्हिडिओ प्रसारित केल्याने कारागृहाची प्रतिष्ठा मलिन झाल्याचा आरोप प्रशासनाने केला आहे.

या प्रकरणाशी संबंधित आणखी एका कारवाईत हिंडलगा कारागृहात कैद असलेल्या तुमकूर येथील साईकुमारविरुद्ध यापूर्वी तक्रार दाखल करण्यात आल्याची माहिती समोर आली आहे.

कारागृहाबाबत खोटी आणि बदनामीकारक माहिती प्रसारित केल्याप्रकरणी संबंधितांविरुद्ध भारतीय न्याय संहितेतील कलम 356(2) आणि 356(3) अंतर्गत कायदेशीर कारवाई करण्याची मागणी न्यायालयाकडे करण्यात आली आहे. आता या तक्रारीवर न्यायालयात पुढील सुनावणी होणार आहे.

The post महिला पीएसआयच्या अश्लील व्हिडिओवरून हिंडलगा कारागृहाची बदनामी appeared first on News 24 Tass Marathi.

बेळगाव : जातीधर्माच्या बंधनांना झुगारून प्रेमविवाह केलेल्या एका महिलेच्या आयुष्यातील संघर्षाला आता नवे वळण मिळाले आहे. पहिल्या मुलीची हत्या केल्याप्रकरणी पती सध्या हिंडलगा कारागृहात शिक्षा भोगत असताना, दुसऱ्या मुलीच्या शाळा प्रवेशासाठी आणि एसआयआर नोंदणीसाठी आवश्यक असलेले पतीचे आधार कार्ड मिळविण्यासाठी ही आई गदग ते बेळगाव अशी वारंवार धावपळ करत आहे.

संपूर्ण समाजाचा विरोध पत्करून गदग येथील एका मुस्लिम महिलेने हिंदू तरुणाशी प्रेमविवाह केला होता. त्यांच्या संसारात दोन मुलींचा जन्म झाला. मात्र, मुलगी झाल्याच्या कारणावरून पतीने पहिल्या मुलीची हत्या केल्याचा धक्कादायक प्रकार घडला. या प्रकरणात तो सध्या बेळगावच्या हिंडलगा कारागृहात आहे.

दरम्यान, दुसऱ्या मुलीच्या शिक्षणासाठी आवश्यक कागदपत्रांमध्ये वडिलांच्या आधार कार्डची गरज भासत आहे. त्यासाठी संबंधित महिला हिंडलगा कारागृहात वारंवार फेऱ्या मारत असली, तरी तिला अपेक्षित सहकार्य मिळत नसल्याची खंत तिने व्यक्त केली आहे. गुन्हेगार पतीची साथ नव्हे, तर केवळ मुलीचे भविष्य घडविण्यासाठी त्याच्या आधार कार्डाची आवश्यकता असल्याचे तिने सांगितले.

या प्रकरणात कारागृह प्रशासनासह संबंधित वरिष्ठ अधिकारी आणि जिल्हा प्रशासनाने तातडीने हस्तक्षेप करून मुलीच्या शिक्षणातील अडथळा दूर करावा, अशी मागणी होत आहे.

The post कारागृहातील पतीचे आधारकार्ड मिळवण्यासाठी महिलेची धावपळ appeared first on News 24 Tass Marathi.

मिळालेल्या माहितीनुसार, बेळगावच्या माळमारुती पोलिसांनी १५ मे रोजी शिवानंद नीलण्णावर याला आर्थिक गैरव्यवहाराच्या प्रकरणात अटक केली होती. त्यानंतर तो न्यायालयीन कोठडीत होता. या प्रकरणाची सुनावणी बेंगळुरू येथील सिटी सिव्हिल आणि सत्र न्यायालयात झाली.

न्यायालयाने १२ जून रोजी आरोपीचा जामीन अर्ज मंजूर करत काही कठोर अटी घातल्या आहेत. त्यानुसार, नीलण्णावर याने तीन लाख रुपयांचे हमीपत्र सादर करणे, देशाबाहेर न जाणे आणि तपास यंत्रणेला सहकार्य करणे बंधनकारक करण्यात आले आहे. तसेच २७ जून रोजी चौकशीसाठी हजर राहण्याचे निर्देशही न्यायालयाने दिले आहेत.

जामीन मंजूर झाल्यानंतर शिवानंद नीलण्णावरची काल रात्री हिंडलगा कारागृहातून सुटका करण्यात आली. कारागृहाबाहेर उपस्थित असलेल्या माध्यम प्रतिनिधींनी प्रतिक्रिया विचारली असता, त्यांनी कोणतीही सविस्तर माहिती न देता केवळ “ओम नमः शिवाय” असा उल्लेख करून तेथून प्रस्थान केले.

दरम्यान, या प्रकरणातील तपास सुरू असून आर्थिक व्यवहार, गुंतवणूकदारांचे दावे आणि संबंधित कागदपत्रांची पडताळणी सुरू असल्याची माहिती पोलिसांकडून देण्यात आली आहे.

The post ‘शिवम असोसिएट्स’ प्रकरणातील मुख्य आरोपी शिवानंद नीलण्णावरला जामीन मंजूर appeared first on News 24 Tass Marathi.

बेळगाव : हिंडलगा कारागृहात मोबाईल फोनच्या अवैध वापराच्या वाढत्या घटनांमुळे पोलीस सतर्क झाले असून या प्रकरणांचा तपास अधिक तीव्र करण्यात आला आहे. या पार्श्वभूमीवर पोलिसांनी विशेष पथकाची स्थापना केली आहे.

गेल्या दीड वर्षात तुरुंगात मोबाईल वापराशी संबंधित १२ गुन्हे नोंदवण्यात आले आहेत. या प्रकरणांचा सखोल तपास करण्यासाठी पोलीस तांत्रिक पुरावे गोळा करत असून कारागृहातील बेकायदेशीर हालचालींवर लक्ष ठेवले जात आहे. पोलीस आयुक्त भूषण बोरसे यांच्या मार्गदर्शनाखाली बेळगाव ग्रामीण पोलिसांकडून तपास सुरू आहे.

तपासादरम्यान कुख्यात आरोपी जयेश पुजारी याचे नाव समोर आले असून राष्ट्रीय तपास यंत्रणेच्या (एनआयए) चौकशीत त्याने तब्बल २८ मोबाईल फोन वापरल्याचे उघड झाले आहे. तसेच त्याचे दहशतवादी संघटनांशी संबंध असल्याचा संशयही व्यक्त केला जात आहे.

दरम्यान, तुरुंगातूनच केंद्रीय मंत्री नितीन गडकरी यांना धमकी दिल्याच्या प्रकरणामुळे या तपासाला आणखी एक वळण लागले आहे. एनआयएकडून मिळालेल्या माहितीनुसार तुरुंग प्रशासनाने तक्रार दाखल केली असून बेळगाव ग्रामीण पोलीस ठाण्यात गुन्हे नोंदवण्यात आले आहेत.

कारागृहातील बेकायदेशीर कारवायांवर नियंत्रण ठेवण्यासाठी पोलिसांकडून कडक पावले उचलली जात असून पुढील तपास सुरू आहे.

The post हिंडलगा कारागृहातील ‘मोबाईल’ प्रकरणांचा तपास तीव्र appeared first on News 24 Tass Marathi.

बेळगाव : हिंडलगा येथील मध्यवर्ती कारागृहात सुरू असलेल्या गैरप्रकारांवर आळा घालण्यासाठी कारागृह विभागाचे अतिरिक्त पोलीस महासंचालक आलोक कुमार यांच्या नेतृत्वाखाली अचानक धाड टाकण्यात आली. या कारवाईमुळे कारागृह प्रशासनात मोठी खळबळ उडाली आहे.

हिंडलगा कारागृहात वाढत चाललेल्या अवैध प्रकारांच्या पार्श्वभूमीवर पोलीस विभागाने ही मोठी कारवाई हाती घेतली. आलोक कुमार यांच्या नेतृत्वाखाली तब्बल ५२ पोलीस कर्मचाऱ्यांसह बेळगाव शहरातील पोलीस अधिकारी व कर्मचारी या धाडीत सहभागी झाले होते.

या कारवाईदरम्यान कारागृहात सखोल तपासणी करण्यात आली. सुमारे दोन तासांहून अधिक काळ चाललेल्या सर्च ऑपरेशनमध्ये कैद्यांच्या सेलची तपासणी करण्यात आली. यावेळी दोन श्वान पथकांचीही मदत घेण्यात आली. तपासणीदरम्यान एक सिगारेट पाकीट तसेच जिमसाठी वापरले जाणारे डंबेल्स आढळून आले.

धाडीदरम्यान आढळलेल्या काही त्रुटींवरून आलोक कुमार यांनी संबंधित कर्मचाऱ्यांना चांगलेच धारेवर धरले. तसेच भविष्यात अशा प्रकारांना आळा न घातल्यास संबंधित अधिकाऱ्यांवर किरकोळ शिस्तभंग कारवाई करण्यात येईल, असा इशाराही त्यांनी दिला.

गेल्या काही वर्षांपासून हिंडलगा कारागृहात धमकीचे फोन, गुटखा व अमली पदार्थांचा वापर, तसेच मोबाईलचा गैरवापर यांसारख्या गंभीर तक्रारी समोर येत होत्या. या पार्श्वभूमीवर ही धाड टाकण्यात आल्याची माहिती मिळत आहे. कारागृहातील शिस्त प्रस्थापित करून गैरप्रकारांना आळा घालण्यासाठी ही कारवाई महत्त्वाची मानली जात आहे.

The post एडीजीपी आलोक कुमार यांच्या नेतृत्वाखाली हिंडलगा कारागृहावर अचानक धाड appeared first on News 24 Tass Marathi.

हिंडलगा येथील मध्यवर्ती कारागृह परिसरात पुन्हा मोबाईल फोन आणि सीमकार्ड आढळून आल्याने कारागृह प्रशासनाची धावपळ उडाली आहे. कारागृहातील दोन वेगवेगळ्या ठिकाणी तपासणी दरम्यान दोन मोबाईल फोन आणि एक सीमकार्ड सापडले असून याप्रकरणी बेळगाव ग्रामीण पोलीस स्थानकात फिर्याद दाखल करण्यात आली आहे.

अलीकडेच कारागृह प्रशासनाचे अतिरिक्त पोलीस महासंचालक अलोक कुमार यांनी कारागृहाला भेट देत गैरप्रकार रोखण्यासाठी कठोर उपाययोजना करण्याच्या सूचना दिल्या होत्या. त्यानुसार वरिष्ठ अधिकाऱ्यांच्या मार्गदर्शनाखाली मंगळवार, दि. १० रोजी सकाळी कारागृह प्रशासनाने सर्कल क्रमांक दोनमधील बराक क्रमांक चार येथे तपासणी मोहीम राबवली.

यावेळी शौचालयाच्या खिडकीत एक सीमकार्ड आणि कीपॅड मोबाईल आढळून आला. तसेच भिंतीत लपवून ठेवलेल्या प्लास्टिक पिशवीत आणखी एक मोबाईल फोन सापडला. संबंधित मोबाईल आणि सीमकार्ड अधिकाऱ्यांनी ताब्यात घेतले आहेत.

या प्रकरणी कारागृह प्रशासनाच्या वतीने जेलर रमेश कांबळे यांनी बेळगाव ग्रामीण पोलीस स्थानकात फिर्याद दिली असून पोलिसांनी गुन्हा नोंदवून पुढील तपास सुरू केला आहे.

The post हिंडलगा कारागृहात पुन्हा सापडले दोन मोबाईल आणि सीमकार्ड appeared first on News 24 Tass Marathi.

बेळगाव / प्रतिनिधी

बेळगावमधील ऐतिहासिक हिंडलगा मध्यवर्ती कारागृह येथे कारागृह आणि सुधार सेवा विभागाचे राज्य पोलीस महासंचालक आलोक कुमार यांनी मंगळवारी अचानक भेट देत सुरक्षा व्यवस्थेचा व्यापक आढावा घेतला. या अनपेक्षित पाहणीमुळे कारागृह प्रशासनात खळबळ उडाली.

कारागृहाच्या अंतर्गत तसेच बाह्य सुरक्षेची त्यांनी बारकाईने तपासणी केली. कैद्यांवरील देखरेख, कर्मचारी वर्गाची कामकाज पद्धती आणि शिस्त याबाबत त्यांनी स्पष्ट शब्दांत नाराजी व्यक्त केली. हलगर्जीपणा किंवा निष्काळजीपणा आढळल्यास संबंधित अधिकाऱ्यांवर थेट जबाबदारी निश्चित केली जाईल, असा कडक इशाराही त्यांनी दिला.

तपासणीदरम्यान तांत्रिक सुरक्षेवर विशेष भर देण्यात आला. कारागृहात ५जी जॅमर यंत्रणा बसवूनही काही भागात मोबाईल नेटवर्क उपलब्ध होत असल्याच्या तक्रारींची त्यांनी गंभीर दखल घेतली. तसेच कारागृहाच्या भिंतीबाहेरून मोबाईल फोन व अंमली पदार्थ आत फेकले जात असल्याच्या आरोपांवरही चर्चा झाली. अशा प्रकारांना आळा घालण्यासाठी तातडीने कठोर उपाययोजना करण्याचे निर्देश देण्यात आले.

सुरक्षा व्यवस्थेत कोणतीही ढिलाई सहन केली जाणार नसल्याचे बजावत निगराणी यंत्रणा अधिक मजबूत करण्याचे आदेश त्यांनी दिले. या बैठकीस उत्तर विभागाचे आयजीपी टी. पी. शेषा, आयजीपी चेतन सिंग राठोड, पोलीस आयुक्त भूषण बोरसे, एसपी के. रामराजन तसेच कारागृह अधीक्षक कृष्णमूर्ती आणि अन्य वरिष्ठ अधिकारी उपस्थित होते.

The post अतिरिक्त पोलीस महासंचालक आलोक कुमार यांची हिंडलगा कारागृहाला अचानक भेट appeared first on News 24 Tass Marathi.

बेळगाव / प्रतिनिधी

बेळगावमध्ये सध्या चर्चेत असलेल्या हिंडलगा कारागृहातील सीसीटीव्ही व्हिडिओबाबत उत्तर कारागृह विभागाचे डीआयजी टी.पी. शेष यांनी खुलासा केला आहे. सोशल मीडियावर व्हायरल होत असलेले हे फुटेज सुमारे महिनाभर जुने असून, त्या घटनेप्रकरणी यापूर्वीच गुन्हा दाखल करण्यात आला असल्याची माहिती त्यांनी दिली.

गुरुवारी बेळगाव येथे पत्रकारांशी संवाद साधताना डीआयजी शेष म्हणाले की, या घटनेचा तपास सध्या बेळगाव ग्रामीण पोलीस स्थानकाकडून सुरू आहे. संबंधित सीसीटीव्ही फुटेज पोलिसांनाच प्राप्त झाले असून, तपास पूर्ण करून सविस्तर अहवाल सादर करण्याचे आदेश महासंचालकांनी दिले आहेत.

या प्रकरणात काही सीआयएसएफ कर्मचाऱ्यांचे वर्तन प्राथमिकदृष्ट्या निष्काळजीपणाचे असल्याचेही निदर्शनास आले असल्याचे त्यांनी सांगितले. महासंचालकांच्या सूचनेनुसार, पुढील दिवशी कारागृहात तपासणी करण्यात आली. या कारवाईदरम्यान १२ मोबाईल फोन, एक चार्जर तसेच चार सीमकार्ड जप्त करण्यात आले. उत्तर विभागातील विविध कारागृहांमध्ये आतापर्यंत एकूण ३४ मोबाईल फोन आढळून आल्याची माहिती डीआयजी शेष यांनी दिली.

The post हिंडलगा तुरुंगात मोबाईल फेकल्याचा व्हिडिओ जुना appeared first on News 24 Tass Marathi.