सुळगा (हिं.) : आषाढी वारीच्या निमित्ताने पंढरपूरकडे पायी निघालेल्या गोव्यातील उस्ते-सत्तरी, वाळपई येथील श्रीराम माऊली वारकरी मंडळाच्या दिंडीचे बुधवारी सुळगा (हिं.) येथे ग्रामस्थांनी उत्साहपूर्ण वातावरणात स्वागत केले. यावेळी वारकऱ्यांसाठी अल्पोपहाराची व्यवस्था करून, दिवंगत सामाजिक कार्यकर्ते शट्टूप्पा (बाळू) पाटील यांनी सुरू केलेली सेवाभावाची परंपरा त्यांच्या कुटुंबीयांनी यंदाही कायम ठेवली.

बेळगाव-वेंगुर्ला मार्गावरील हनुमान मंदिर परिसरात आयोजित स्वागत कार्यक्रमासाठी स्व. शट्टूप्पा पाटील यांचे सुपुत्र रोहन पाटील, समाजसेविका माधुरी जाधव आणि त्यांच्या सहकाऱ्यांनी पुढाकार घेतला. दिंडीचे स्वागत करून सर्व वारकऱ्यांना अल्पोपहाराचे वितरण करण्यात आले. पावसाने उघडीप दिल्यामुळे वारकऱ्यांनी मोकळ्या वातावरणात अल्पोपहाराचा आनंद घेतला.

यावेळी वारकरी विदेश माडकर यांनी श्रीराम माऊली वारकरी मंडळाच्या पायी वारीची माहिती देत सांगितले की, यंदाची ही मंडळाची पाचवी पायी वारी असून उस्ते येथून खांद्यावर पालखी घेऊन पंढरपूरपर्यंत पायी प्रवास करणे हे या दिंडीचे वैशिष्ट्य आहे. यंदाच्या वारीत १५३ वारकरी सहभागी झाले असून दररोज नामस्मरणावर विशेष भर दिला जातो. वारीचे प्रमुख बारकेलो राणे (बुवा), उपप्रमुख सर्वेश राणे, संचालक रामकृष्ण इब्रामपूरकर आणि सचिव मोहन वांतेकर यांच्या मार्गदर्शनाखाली वारीचे आयोजन करण्यात आले आहे. तसेच सुळगा ग्रामस्थांनी केलेल्या स्वागताबद्दल तसेच रोहन पाटील, माधुरी जाधव आणि सहकाऱ्यांनी केलेल्या सेवाभावी उपक्रमाबद्दल त्यांनी कृतज्ञता व्यक्त केली.

प्रास्ताविकात शेखर मनोहर पाटील यांनी स्व. शट्टूप्पा पाटील यांच्या सामाजिक कार्याचा आढावा घेतला. वारकऱ्यांची सेवा म्हणजेच ईश्वरसेवा या भावनेतून त्यांनी चार वर्षांपूर्वी या दिंडीच्या अल्पोपहाराची जबाबदारी स्वीकारली होती. त्यांच्या निधनानंतरही त्यांचा सुपुत्र रोहन पाटील, भगिनी माधुरी जाधव आणि सहकाऱ्यांनी ही सेवा अखंडपणे सुरू ठेवत त्यांच्या कार्याचा वारसा जपला असल्याचे त्यांनी सांगितले. तसेच दिंडीच्या पुढील प्रवासासाठी शुभेच्छाही दिल्या.

माधुरी जाधव यांनी मनोगतात स्व. शट्टूप्पा पाटील यांनी रुजविलेल्या सेवाभावाच्या संस्कारांना पुढे नेण्याचा निर्धार व्यक्त केला. वारकऱ्यांची सेवा हीच विठ्ठलाची सेवा मानून ही परंपरा भविष्यातही अविरत सुरू राहील, असे त्यांनी सांगितले. या उपक्रमासाठी सुळगा ग्रामस्थांसह भरत पाटील, वीर पाटील, राजश्री कदम, मनीषा देसाई आणि अन्य सहकाऱ्यांचे मोलाचे सहकार्य लाभत असल्याचे त्यांनी स्पष्ट केले. दिंडीचा उर्वरित प्रवास निर्विघ्न आणि मंगलमय व्हावा, अशी प्रार्थनाही त्यांनी व्यक्त केली.

श्रीराम सेना हिंदुस्थानचे ग्रामीण अध्यक्ष तथा सामाजिक कार्यकर्ते भरत पाटील यांनीही दिंडीच्या पुढील वाटचालीस शुभेच्छा देत वारकरी परंपरेतील सेवाभावाचे महत्त्व अधोरेखित केले.

दरवर्षीप्रमाणे केलेल्या स्वागत व अल्पोपहार व्यवस्थेबद्दल कृतज्ञता व्यक्त करत दिंडीच्या वतीने रोहन पाटील, माधुरी जाधव आणि त्यांच्या सहकाऱ्यांचा स्मृतिचिन्ह देऊन सन्मान करण्यात आला.

यावेळी निवृत्त पोलीस उपनिरीक्षक राजश्री कदम, वासंती पाटील, श्वेता खांडेकर, स्मिता पाटील, नेहा मोरे, वीर पाटील, भरत पाटील, साईनाथ पाटील, माजी सैनिक ऑन. कॅप्टन धनाजी मोरे, परशराम सांगावकर, मोन्नापा पाटील, शिवा पुजारी, दिलीप कोंडुसकोप, रमेश कुडचीकर, योगेश कुडचीकर, ओमकार पाटील, भरत कुडचीकर, गोपाळ कलखांबकर, बाबुराव कोकीतकर, प्रथमेश कोचेरी, नागेश निलजकर, शंकर अष्टेकर, पार्थ खांडेकर, रोहित चौगुले, सूरज चौगुले, रमेश कलखांबकर, खेमानी कलखांबकर, धनंजय मोहिते आदी उपस्थित होते.

The post सुळगा (हिं.) येथे उस्ते – सत्तरी गोवा येथील वारकरी दिंडीचे उत्साहात स्वागत appeared first on News 24 Tass Marathi.

खानापूर : गोव्यातील सत्तरी तालुक्यातील सुरल (सुर्ल) धबधब्यात बुडालेल्या बेळगावच्या २० वर्षीय तरुणाचा मृतदेह सोमवारी अखेर शोधून बाहेर काढण्यात आला. मुसळधार पाऊस, वेगवान पाण्याचा प्रवाह आणि दुर्गम परिसरामुळे बचावकार्याला मोठ्या अडचणींचा सामना करावा लागला. मात्र बेळगावच्या रेस्क्यू पथकाने स्थानिक यंत्रणांच्या मदतीने राबविलेल्या अथक शोधमोहीमेला अखेर यश मिळाले.

मृत तरुणाची ओळख आदित्य दीपककुमार सत्पती (वय २०) अशी झाली आहे. तो मित्रांसमवेत सहलीसाठी सुरल धबधब्यावर गेला होता. म्हादई अभयारण्य परिसरातील धबधब्यात पाण्यात उतरल्यावर खोली आणि पाण्याच्या वेगाचा अंदाज न आल्याने तो बुडाला. त्याच्या मित्रांनी त्याला वाचविण्याचा प्रयत्न केला, मात्र त्यांना यश आले नाही.

घटनेची माहिती मिळताच वाळपई पोलीस, म्हादई अभयारण्याचे कर्मचारी तसेच अग्निशमन दलाचे जवान घटनास्थळी दाखल झाले. रविवारी सायंकाळपर्यंत शोधमोहीम सुरू होती. मात्र मुसळधार पाऊस, वाढलेला पाण्याचा प्रवाह आणि प्रतिकूल परिस्थितीमुळे रात्री शोधकार्य स्थगित करण्यात आले.

सोमवारी सकाळी पुन्हा शोधमोहीम सुरू करण्यात आली. बेळगावचे सामाजिक कार्यकर्ते आणि रेस्क्यू पथकातील अवधूत तुडवेकर, पदमप्रसाद हुली, विक्की मेहता, शुभम हुली, मायकल पिंटो, रोशन तनावडे आणि आकाश यांनी स्थानिक यंत्रणांच्या सहकार्याने अथक प्रयत्न करत अखेर आदित्यचा मृतदेह बाहेर काढला. अनेक तास पाण्यात राहिल्यामुळे तसेच माशांमुळे मृतदेहाचा चेहरा विद्रूप झाल्याची माहिती मिळाली आहे.

पोलिसांनी घटनास्थळी पंचनामा करून आवश्यक कायदेशीर प्रक्रिया पूर्ण केली असून मृतदेह नातेवाईकांच्या ताब्यात देण्यात आला. या दुर्दैवी घटनेमुळे बेळगावसह परिसरात हळहळ व्यक्त होत आहे.

आदित्य हा मूळचा ओडिशा राज्यातील रहिवासी असून त्याचे कुटुंब सध्या बेळगावात वास्तव्यास आहे. त्याचे वडील दीपककुमार सत्पती हे भारतीय नौदलाचे निवृत्त अधिकारी आहेत. आदित्यच्या अकाली निधनाने कुटुंबीयांवर दुःखाचा डोंगर कोसळला असून मित्रपरिवारातही शोककळा पसरली आहे.

The post सुरल (सुर्ल) धबधब्यात बुडालेल्या बेळगावच्या तरुणाचा मृतदेह सापडला appeared first on News 24 Tass Marathi.

खानापूर : गोव्यातील सत्तरी तालुक्यातील ठाणे ग्रामपंचायत हद्दीतील सुरल (सुर्ल) येथील, खानापूर तालुक्याच्या सीमेलगत असलेल्या धबधब्यात बेळगावातील २० वर्षीय तरुण बुडाल्याची दुर्दैवी घटना रविवारी (दि. २८ जून) घडली. आदित्य दीपककुमार सत्पती (वय २०) असे मृत्यू झालेल्या तरुणाचे नाव असून तो मित्रांसमवेत सहलीसाठी गेला होता.

मिळालेल्या माहितीनुसार, म्हादई अभयारण्य परिसरातील धबधब्यावर फिरण्यासाठी गेलेल्या आदित्यला पाण्याच्या खोलीचा अंदाज न आल्याने तो पाण्यात बुडाला. त्याच्या मित्रांनी त्याला वाचविण्याचा प्रयत्न केला, मात्र त्यांना यश आले नाही.

घटनेची माहिती मिळताच वाळपई पोलिस, म्हादई अभयारण्याचे कर्मचारी तसेच अग्निशमन दलाचे जवान घटनास्थळी दाखल झाले. रविवारी सायंकाळपर्यंत धबधब्याच्या कोंडीत शोधमोहीम राबविण्यात आली. मात्र घाट परिसरात सुरू असलेल्या संततधार पावसामुळे आणि पाण्याच्या तीव्र प्रवाहामुळे शोधकार्यात वारंवार अडथळे निर्माण झाल्याने रात्री शोधमोहीम स्थगित करण्यात आली.

आज, सोमवार (दि. २९ जून) सकाळी पुन्हा शोधकार्य सुरू करण्यात आले असून बचाव पथके तरुणाचा शोध घेत आहेत. आदित्य हा मूळचा ओडिशा राज्यातील असून त्याचे कुटुंब सध्या बेळगावात वास्तव्यास आहे. त्याचे वडील दीपककुमार सत्पती हे निवृत्त नौदल अधिकारी आहेत. घटनेची माहिती मिळताच कुटुंबीयांनी घटनास्थळी धाव घेतली.

दरम्यान, पावसाळ्यात म्हादई अभयारण्य परिसरातील धबधब्यांवर बेळगाव, खानापूर आणि गोवा परिसरातील पर्यटकांची मोठी गर्दी होत आहे. वन विभागाने वारंवार इशारे देऊनही काही पर्यटक धोकादायक ठिकाणी प्रवेश करत असल्याचे निदर्शनास आले आहे. त्यामुळे अशा प्रकारे नियमांचे उल्लंघन करणाऱ्या पर्यटकांवर यापुढे कठोर कारवाई करण्यात येणार असल्याचे वन विभागाने स्पष्ट केले आहे.

The post सुरल धबधब्यात बेळगावातील तरुण बुडाला appeared first on News 24 Tass Marathi.

गोव्यातील फोंडा येथे दि. ४ जानेवारी २०२५ रोजी आयोजित करण्यात आलेल्या संकुकाई कप कराटे स्पर्धेत बेळगावच्या ए.व्ही. कराटे ॲकॅडमीच्या खेळाडूंनी उत्कृष्ट कामगिरी करत घवघवीत यश संपादन केले. प्रशिक्षक अमित वेसणे यांच्या मार्गदर्शनाखाली खेळाडूंनी काता व कुमिते प्रकारात अनेक पदकांची कमाई केली.

या स्पर्धेत अनन्या एन. मिठारे, श्रीनिवास आर. कुलकर्णी आणि साची व्ही. अथणीमठ यांनी काता प्रकारात तिसरे स्थान पटकावले. नीरजा व्ही. बडगी हिने काता प्रकारात दुसरे स्थान मिळवून ॲकॅडमीचे नाव उज्वल केले.

स्पर्धेतील सर्वोत्तम कामगिरी करणाऱ्या खेळाडूंमध्ये शौर्य एस. गोडसे याने काता प्रकारात पहिले तर कुमितेमध्ये दुसरे स्थान पटकावले. सृष्टी एस. जाधव हिने काता आणि कुमिते या दोन्ही प्रकारांत पहिले स्थान मिळवून दुहेरी सुवर्णपदकाची कमाई केली. तसेच ईशान ए. करगुप्पिकर यानेही काता व कुमिते या दोन्ही प्रकारांत प्रथम क्रमांक पटकावत शानदार यश मिळवले.

ए.व्ही.कराटे ॲकॅडमीच्या या यशाबद्दल खेळाडू, प्रशिक्षक अमित वेसणे तसेच पालकांचे सर्वत्र अभिनंदन होत असून, भविष्यातही खेळाडू राष्ट्रीय व आंतरराष्ट्रीय स्तरावर चमकदार कामगिरी करतील, असा विश्वास व्यक्त करण्यात येत आहे.

The post संकुकाई कपमध्ये ए.व्ही.कराटे ॲकॅडमीच्या खेळाडूंचे घवघवीत यश appeared first on News 24 Tass Marathi.

बेळगाव / प्रतिनिधी

ए.व्ही.कराटे ॲकॅडमीची उदयोन्मुख खेळाडू व समाजसेविका सौ. माधुरी जाधव (पाटील) यांची कन्या कु. सृष्टी स्वप्नील जाधव हिने राष्ट्रीय व आंतरराज्यीय कराटे स्पर्धांमध्ये उल्लेखनीय कामगिरी करत बेळगावचे नाव उज्ज्वल केले आहे. दि. २१ डिसेंबर रोजी बेळगाव येथे आयोजित ६व्या राष्ट्रीय निमंत्रित स्तरावरील कराटे स्पर्धेत सृष्टीने कुमिते प्रकारात प्रथम क्रमांक पटकावला, तर काता प्रकारात द्वितीय स्थान मिळवले.

यशाची ही घोडदौड सुरू ठेवत सृष्टीने ४ जानेवारी रोजी फोंडा (गोवा) येथे झालेल्या प्रतिष्ठित ‘संकुकाई कप’ कराटे स्पर्धेत काता आणि कुमिते या दोन्ही प्रकारांत सुवर्णपदकांची कमाई केली. तिच्या या दमदार कामगिरीमुळे क्रीडाप्रेमींमध्ये उत्साहाचे वातावरण निर्माण झाले आहे. तिला प्रशिक्षक श्री.अमित वेसणे यांचे मार्गदर्शन लाभत आहे.

सृष्टीच्या या यशाबद्दल राज्याच्या महिला बालविकास मंत्री तथा बेळगाव ग्रामीण मतदार संघाच्या आमदार सौ. लक्ष्मी हेब्बाळकर यांच्यासह काँग्रेसचे युवा नेते श्री. मृणाल हेब्बाळकर यांनी तिचे कौतुक केले असून भावी वाटचालीत सदैव सहकार्य करण्याची ग्वाही दिली आहे. तसेच ए.व्ही.कराटे ॲकॅडमीचे प्रशिक्षक, पालकवर्ग आणि क्रीडाप्रेमींनी तिचे अभिनंदन करून पुढील वाटचालीस शुभेच्छा दिल्या आहेत.

The post ए. व्ही. कराटे ॲकॅडमीच्या सृष्टी जाधवची राष्ट्रीय स्तरावर सुवर्ण कामगिरी appeared first on News 24 Tass Marathi.

पणजी / प्रतिनिधी

गोवा राज्यात रविवारी मध्यरात्री मोठी दुर्घटना घडली. हडफडे (अर्पोरा) येथील ‘बर्च बाय रोमिओ लेन’ या प्रसिद्ध रेस्टॉरंट-कम-नाईटक्लबमध्ये लागलेल्या भीषण आगीत तब्बल २५ जणांचा दुर्दैवी मृत्यू झाला. ही घटना मध्यरात्री साधारण १ वाजण्याच्या सुमारास घडली.

आग लागल्याची माहिती मिळताच अग्निशमन दल, पोलीस अधिकारी आणि बचाव पथकांनी तातडीने घटनास्थळी धाव घेतली. मृतांमध्ये २३ जणांचा गुदमरून, तर दोघांचा होरपळून मृत्यू झाला आहे. एकूण २५ मृतांमध्ये तीन महिलांसह बहुतेक क्लब कर्मचारी होते, ज्यात किचनमधील कामगारांची संख्या अधिक आहे. तसेच, मृतांमध्ये चार पर्यटकांचा देखील समावेश असल्याची प्राथमिक माहिती आहे.

मुख्यमंत्री डॉ. प्रमोद सावंत, आमदार मायकल लोबो आणि पोलीस महासंचालक आलोक कुमार यांनी घटनास्थळी भेट देऊन परिस्थितीचा आढावा घेतला. प्राथमिक तपासानुसार क्लबच्या किचनजवळ गॅस सिलिंडरचा स्फोट होऊन आग भडकण्याची शक्यता व्यक्त केली जात आहे.

घटनेची उच्चस्तरीय चौकशी करण्याचे आदेश मुख्यमंत्री सावंत यांनी दिले आहेत. पंतप्रधान नरेंद्र मोदी यांनीही दुख: व्यक्त करत मृतांच्या कुटुंबियांना २ लाख रुपये आणि जखमींना ५० हजार रुपयांच्या मदतीची घोषणा केली आहे.

या दुर्घटनेत जखमी झालेल्या सहा जणांवर गोमेकॉ रुग्णालयात उपचार सुरू असून, त्यांची प्रकृती स्थिर असल्याचे सांगण्यात आले आहे. मृतदेह शवविच्छेदनासाठी बांबोळी येथील गोमेकॉमध्ये हलवण्यात आले आहेत.

पोलीस महासंचालक आलोक कुमार यांनीही, क्लबची संरचना, अग्निसुरक्षा नियमांचे पालन आणि आपत्कालीन बाहेर पडण्याच्या मार्गांची तपासणी करण्याचे निर्देश दिले असून, पोलिसांनी क्लब सील करून पुढील तपास सुरू केला आहे.

The post गोव्यातील हडफडेत नाईटक्लबला भीषण आग appeared first on News 24 Tass Marathi.

पणजी : गोव्याच्या राजकारणातील ज्येष्ठ नेते, माजी मुख्यमंत्री आणि विद्यमान कृषी मंत्री रवी नाईक (वय ७९) यांचे मंगळवारी रात्री हृदयविकाराच्या तीव्र धक्क्याने निधन झाले. त्यांच्या अचानक जाण्याने गोव्याच्या राजकीय आणि सामाजिक वर्तुळात मोठी पोकळी निर्माण झाली असून, मुख्यमंत्री डॉ. प्रमोद सावंत यांच्यासह अनेक नेत्यांनी शोक व्यक्त केला आहे.

रवी नाईक यांना मंगळवारी रात्री हृदयविकाराचा झटका आल्याने त्यांना तातडीने फोंड्यातील सावईकर नर्सिंग होममध्ये उपचारासाठी दाखल करण्यात आले, मात्र डॉक्टरांनी त्यांना मृत घोषित केले. त्यांचे पार्थिव आमचे दर्शनासाठी खडपाबांध – फोंडा येथील त्यांच्या निवासस्थानी ठेवण्यात आले आहे.

आज बुधवार दि. १५ ऑक्टोबर रोजी त्यांच्या मूळ गावी फोंडा येथील खडपाबांध येथे सायंकाळी चार वाजता शासकीय इतमामात त्यांच्यावर अंत्यसंस्कार होणार आहे.

• राजकीय प्रतिक्रिया :  डॉ. प्रमोद सावंत (मुख्यमंत्री गोवा) 

आमचे ज्येष्ठ नेते आणि मंत्रिमंडळातील सहकारी रवी नाईक यांच्या निधनाने खूप दुःख झाले. गोव्याच्या राजकारणातील एक दिग्गज व्यक्तीमत्व म्हणून त्यांची सेवा राज्याच्या प्रशासनावर आणि लोकांवर एक अमिट छाप सोडून गेली आहे. त्यांचे नेतृत्व आणि लोककल्याणासाठीचे योगदान नेहमीच स्मरणात राहील.

• भंडारी समाजाचा आधारवड हरपला :

भंडारी समाजाचे मार्गदर्शक आणि संघटक म्हणून समाजाच्या विकासासाठी अमूल्य योगदान दिलेले रवी नाईक हे गोव्यातील भंडारी समाजाचे प्रमुख नेते म्हणून ओळखले जात होते. समाजात त्यांचा मोठा दबदबा होता आणि प्रत्येक सामाजिक कार्याचे सक्रियपणे सहभागी होत असत. निधनापूर्वी गेल्या रविवारी हरवळे – साखळी येथे झालेल्या भंडारी समाजातील लोकप्रतिनिधींच्या सत्कार सोहळ्यालाही त्यांनी उपस्थिती लावली होती.

• राजकीय कारकीर्द :

तीन दशकांहून अधिक काळ गोव्याच्या राजकारणात सक्रिय भूमिका असलेले मंत्री रवी नाईक १९९१-९३ आणि १९९४ मध्ये गोव्याचे मुख्यमंत्री होते. यानंतर १९९८-९९ मध्ये उत्तर गोवा मतदार संघातून लोकसभा सदस्य (खासदार) तर २०२२ मध्ये फोंडा मतदारसंघातून भाजपमधून ते निवडून आले होते.

The post गोव्याचे माजी मुख्यमंत्री रवी नाईक यांचे निधन appeared first on News 24 Tass Marathi.

गोव्यातील फोंडा येथे दोन दुचाकींची समोरासमोर धडक होऊन दोघांचा मृत्यू झाल्याची धक्कादायक घटना घडली आहे, तर अन्य दोघे गंभीर जखमी झाले आहेत. मृतांमध्ये खानापूर तालुक्यातील तरुणाचा समावेश आहे. एका गुरुवारी दुपारी फोंडा बेतोडा परिसरात हा भीषण अपघात झाला. या घटनेत खानापूर तालुक्यातील २२ वर्षीय आदित्य देसाई याचा जागीच मृत्यू झाला. त्याच्यासोबत असलेला योगेश पाटील गंभीर जखमी झाला आहे.  दुचाकीवर असलेल्या ईशा गावस (रा. केरी सत्तरी) यांचाही मृत्यू झाला आहे.

The post गोव्यातील अपघातात खानापुरच्या युवकाचा मृत्यू appeared first on News 24 Tass Marathi.

सुळगा (हिं.) / वार्ताहर

“टाळ वाजे… मृदंग वाजे… वाजे हरीची वीणा”… “माऊली – तुकोबा” निघाले पंढरपुरा मुखाने विठ्ठल विठ्ठल म्हणा”…

आषाढी एकादशीच्या निमित्ताने ज्ञानेश्वर माऊली आणि संत तुकोबांच्या पालख्यांनी पंढरपूरकडे प्रस्थान केले आहे. त्याचप्रमाणे देशाच्या विविध राज्यातील कानाकोपऱ्यातून वारकरी दिंड्या पंढरपूरकडे मार्गस्थ होत आहेत. याच पार्श्वभूमीवर प्रतिवर्षीप्रमाणे पांडुरंगाच्या दर्शनासाठी निघालेल्या उस्ते सत्तरी, वाळपई गोवा येथील श्रीराम माऊली वारकरी मंडळाच्या पायी दिंडीचे आज गुरुवार दि. २६ जून रोजी सुळगा (हिं.) येथे आगमन होताच उत्साहात स्वागत करण्यात आले.

स्वागतासाठी दिवंगत ग्रा. पं. सदस्य तथा सामाजिक कार्यकर्ते शट्टुप्पा उर्फ शेंदूर बाळू पाटील यांचे कुटुंब तसेच समाजसेविका माधुरी जाधव पाटील आणि सहकाऱ्यांनी पुढाकार घेतला होता. यानिमित्ताने बेळगाव – वेंगुर्ला मार्गावरील हनुमान मंदिर परिसरात वारकऱ्यांच्या अल्पोपहाराची सोय करण्यात आली होती.

प्रारंभी दिवंगत शट्टूप्पा उर्फ शेंदूर बाळू पाटील यांचे सुपुत्र रोहन आणि समाजसेविका माधुरी जाधव यांनी दिंडीचे स्वागत केले. यावेळी वारकऱ्यांच्या वतीने दिवंगत शट्टूप्पा उर्फ शेंदूर बाळू यांना मौन बाळगून श्रद्धांजली वाहण्यात आली.

यानंतर वारकऱ्यांना अल्पोपहाराचे वितरण करण्यात आले. दरम्यान गेल्या दोन दिवसांपासून संततधार सुरू असलेल्या पावसाने काहीशी उसंत घेतल्याने मोकळ्या वातावरणात वारकऱ्यांनी अल्पोपहाराचा आस्वाद घेतला.

यावेळी वारकरी रामकृष्ण पांडुरंग इब्राहमपूरकर यांनी मंडळाच्या पायी वारीबद्दल माहिती देऊन वारीचे अध्यात्मिक महत्त्व स्पष्ट केले. तसेच वारीचे स्वागत करून दाखवलेल्या आपुलकीबद्दल त्यांनी आभार मानले. तर समाजसेविका माधुरी जाधव यांनी वारीच्या पुढील वाटचालीसाठी शुभेच्छा देताना वारकऱ्यांची सेवा करण्याची संधी लाभल्याने समाधान व्यक्त केले. तसेच दिंडीतील वारकऱ्यांच्या रूपात साक्षात पांडुरंगाचे दर्शन झाल्याचे त्यांनी सांगितले.

याप्रसंगी दरवर्षीप्रमाणे दिंडीचे स्वागत करून अल्पोपहाराची व्यवस्था केल्याबद्दल दिंडीच्यावतीने रोहन शट्टूप्पा पाटील यांचा तसेच उल्लेखनीय सामाजिक कार्याबद्दल समाजसेविका माधुरी जाधव यांचा शाल, श्रीफळ देऊन सत्कार करण्यात आला.

यावेळी श्वेता खांडेकर, रोहन निलजकर, रोहित निलजकर, साईनाथ पाटील, मंथन बोकडे, प्रज्वल पाटील, प्रकाश पाटील, ओंकार पाटील, चेतन पाटील, सतीश चौगुले, सूरज चौगुले, मयूर बोकडे, रमेश अधिकारी, बाबू कोकीतकर, रमेश कलखांबकर, खेमानी कलखांबकर आदी उपस्थित होते. यानंतर दिंडी पंढरपूरच्या दिशेने पुढे रवाना झाली.

The post उस्ते गोवा येथील वारकरी दिंडीचे सुळगा (हिं.) येथे स्वागत appeared first on News 24 Tass Marathi.

गोवा पर्यटन खात्याने राज्यातील आध्यात्मिक पर्यटनाला नवसंजीवनी देण्यासाठी ‘एकादशा तीर्थयात्रा’ हा महत्त्वाकांक्षी उपक्रम हाती घेतला आहे. राज्यातील अकरा प्रमुख मंदिरांना एका सुसंगत प्रवास मार्गात एकत्रित करणाऱ्या या यात्रेला आकार देण्यासाठी पर्यटन संचालक केदार नाईक यांच्या नेतृत्वाखाली महत्त्वपूर्ण बैठक पार पडली.

या बैठकील जीटीडीसीचे विपणन व हॉटेल विभागाचे उपमहाव्यवस्थापक दीपक नार्वेकर, साहाय्यक पर्यटन संचालक जयेश काणकोणकर तसेच संबंधित अकरा मंदिर समित्यांचे प्रतिनिधी उपस्थित होते.

बैठकीची सुरूवात एकादशी तीर्थयात्रेची संकल्पना आणि नियोजन स्पष्ट करणाऱ्या सविस्तर सादरीकरणाने झाली. यात दररोज चार मंदिरांना भेट देत एकूण तीन दिवसांच्या आध्यात्मिक अनुभवाचा आराखडा मांडण्यात आला. यामध्ये पुढील अकरा मंदिरांच्या संदर्भात निर्णय घेण्यात आला. श्री मंगेश मंदिर, मंगेशी, श्री महालसा नारायणी मंदिर, म्हार्दोळ, श्री महादेव मंदिर, तांबडी-सुर्ला, श्री सप्तकोटेश्वर मंदिर, नार्वे ,श्री ब्रह्मा मंदिर, सत्तरी, श्री शांतादुर्गा मंदिर, फातर्पा श्री हरी मंदिर, मडगाव, श्री दामोदर मंदिर, जांबावली, श्री परशुराम मंदिर, पैंगीणश्री महागणपती मंदिर, खांडोळा, श्री दत्तात्रेय मंदिर, साखळी अशी ही मंदिरे आहेत.

The post गोव्याला तीर्थक्षेत्राचे स्थान लाभणार appeared first on News 24 Tass Marathi.