आज, मंगळवारी (१९ मे) देशभरात पेट्रोल आणि डिझेलच्या दरात सरासरी ९० पैशांची वाढ करण्यात आली आहे. इंधनाच्या दरात चालू आठवड्यात झालेली ही दुसरी दरवाढ असून यामुळे सर्वसामान्यांचे बजेट पूर्णपणे कोलमडण्याची शक्यता निर्माण झाली आहे.

यापूर्वी गेल्या शुक्रवारीच पेट्रोल आणि डिझेलच्या दरात थेट ३ रुपयांची मोठी वाढ करण्यात आली होती. त्यानंतर आता अवघ्या काही दिवसांतच पुन्हा ९० पैशांची वाढ झाल्याने बाजारात महागाईचा भडका उडण्याची शक्यता वर्तवली जात आहे.

The post पेट्रोल – डिझेलच्या दरात ५ दिवसात दुसऱ्यांदा दरवाढ appeared first on News 24 Tass Marathi.

नवी दिल्ली : देशात महागाईचा दबाव वाढत असताना आता पेट्रोल आणि डिझेलच्या दरवाढीमुळे सर्वसामान्य नागरिकांच्या खर्चात आणखी भर पडली आहे. सीएनजी, सोने-चांदी, दूध आणि गॅस सिलिंडरच्या वाढलेल्या दरांनंतर इंधन दरवाढीची भर पडल्याने नागरिकांची चिंता वाढली आहे.

पश्चिम आशियातील तणावपूर्ण परिस्थिती आणि जागतिक स्तरावरील अस्थिरतेमुळे कच्च्या तेलाच्या पुरवठ्यावर परिणाम झाला आहे. त्याचा थेट परिणाम भारतीय बाजारपेठेवर दिसून येत असून, शुक्रवारी सकाळी ६ वाजल्यापासून देशभरात पेट्रोल आणि डिझेलचे नवे दर लागू करण्यात आले आहेत.

तेल कंपन्यांनी पेट्रोलच्या दरात प्रतिलिटर ३ रुपये १४ पैशांची तर डिझेलच्या दरात ३ रुपये ११ पैशांची वाढ जाहीर केली आहे. या वाढीमुळे वाहतूक, मालवाहतूक आणि दैनंदिन वस्तूंच्या किमतींवरही परिणाम होण्याची शक्यता व्यक्त केली जात आहे.

यापूर्वी सीएनजीच्या दरात दोन रुपयांची वाढ करण्यात आली होती. तसेच सोने आणि चांदीवरील आयात शुल्क १५ टक्क्यांपर्यंत वाढवण्यात आल्याने मौल्यवान धातूंचे दरही चढले आहेत. घरगुती वापरातील अनेक वस्तूंच्या किमती वाढल्यामुळे महागाईचा फटका अधिक तीव्र होत असल्याचे चित्र आहे.

दिल्ली पेट्रोल डीलर्स असोसिएशनचे माजी अध्यक्ष निश्चल सिंघानिया यांनी दिलेल्या माहितीनुसार, आंतरराष्ट्रीय बाजारात कच्च्या तेलाच्या किमतीत झालेली वाढ आणि डॉलरच्या तुलनेत रुपयाचे अवमूल्यन ही इंधन दरवाढीमागील प्रमुख कारणे आहेत. तेल कंपन्यांनी गुरुवारी मध्यरात्री पेट्रोल पंप चालकांना ईमेलद्वारे नव्या दरांची माहिती दिली होती.

The post पेट्रोल – डिझेलचे दर वाढले appeared first on News 24 Tass Marathi.

बेळगावात आज प्रसारमाध्यमांशी बोलताना जिल्हाधिकारी म्हणाले की, सध्या शहरात ७ सीएनजी पंपांवर पुरवठा सुरळीत चालू आहे, मात्र ६ एलपीजी पंपांपैकी काही खासगी पंपांवर पुरवठ्याची तात्पुरती अडचण जाणवत आहे. या समस्येवर मार्ग काढण्यासाठी मल्लिकार्जुन कलादगी यांची जिल्हास्तरीय नोडल अधिकारी म्हणून नियुक्ती करण्यात आली असून, ते लवकरच संबंधित घटकांची बैठक घेऊन ही अडचण दूर करतील.

व्यावसायिक वापराच्या एलपीजीबाबत रोज सुमारे ७०० सिलिंडर पुरवठा केला जात आहे. लहान व्यापाऱ्यांना येणाऱ्या अडचणी सोडवण्यासाठी हॉटेल असोसिएशनशी चर्चा झाल्याचेही त्यांनी सांगितले. बहुतांश हॉटेल व्यावसायिकांनी पर्यायी व्यवस्था केली असल्यामुळे सध्या मोठी समस्या उद्भवत नाही, असे जिल्हाधिकारी यांनी स्पष्ट केले. जिल्हा प्रशासनाच्या या तातडीच्या पावलांमुळे रिक्षाचालक आणि लहान व्यवसायिकांना दिलासा मिळणार आहे, अशी अपेक्षा आहे.

The post एलपीजी गॅस टंचाईवर जिल्हा प्रशासनाकडून उपाययोजना appeared first on News 24 Tass Marathi.

इराण-इस्रायल युद्धामुळे सीएनजीचा पुरवठा विस्कळीत झाला असून, त्यामुळे ऑटो रिक्षा चालकांना रस्त्यावरच उतरावे लागत आहे. प्रवासी नसल्याने आधीच आर्थिक अडचणीत असलेल्या चालकांसाठी गॅसची टंचाई आता मोठा डोकेदुखी बनली आहे. शहरातील बहुतेक सीएनजी पंपांवर ‘स्टॉक नाही’ असे फलक दिसत असून, काही ठिकाणी गॅसचे दरही दुप्पट आकारले जात असल्याचा आरोप केला जात आहे.

मोफत बससेवेमुळे आधीच त्रस्त असलेले ऑटोचालक आता या तुटवड्यामुळे अधिक त्रस्त झाले आहेत. शहरातील फक्त एका पंपावर सीएनजी उपलब्ध असल्याने, इतर ठिकाणाहून ऑटो ढकलून आणावे लागते. काही ठिकाणी गॅस न मिळाल्यामुळे वाहन बंद पडले असल्याची तक्रारही केली जात आहे.

भाजीमार्केटमधून भाजीपाला घेऊन जात असताना कोल्हापूर सर्कलजवळ ऑटोमध्ये गॅस संपल्याने चालकांना रिक्षा ओढावी लागली. दिवसभर पुरेशी सीएनजी न मिळाल्यामुळे त्यांच्या जीवनात मोठी अडचण निर्माण झाली आहे.

शहरातील चार सीएनजी पंपांवर गॅस संपलेला असून, फक्त आरटीओ सर्कलजवळील ‘गो गॅस’ पंपावर उपलब्ध आहे. ऑटो रिक्षा बंद पडल्यास चालक आणि त्यांच्या कुटुंबांवर परिणाम होईल, असे त्यांनी म्हटले आहे. ते म्हणतात की, संबंधित मंत्र्यांनी व आमदारांनी ही समस्या शासनासमोर मांडून त्वरित निराकरण करावे.

एकंदरीत मध्यपूर्वेतील युद्धाचा परिणाम बेळगावच्या नागरिकांवरही जाणवत असून, युद्ध लवकर संपावे, शांतता प्रस्थापित होऊन नागरिकांचे जीवन सुरळीत व्हावे, ही सर्वांची अपेक्षा आहे.

The post बेळगावात ‘सीएनजी’ गॅसचा तुटवडा ; ऑटोचालक त्रस्त appeared first on News 24 Tass Marathi.

बेळगाव / प्रतिनिधी

बेळगाव जिल्ह्यात पेट्रोल, डिझेल आणि गॅस सिलिंडरचा पुरवठा सुरळीत चालू असून कोणतीही कमतरता नाही, असे जिल्हाधिकारी मोहम्मद रोशन यांनी स्पष्ट केले.

जिल्हाधिकारी यांनी सांगितले की, सोशल मीडियावर पेट्रोलच्या तुटवड्याबाबत अफवा पसरल्याने काही वेळा लोक पेट्रोल पंपासमोर रांगेत उभे राहत होते, परंतु सध्याची परिस्थिती सामान्य आहे. सिलेंडर गॅसचा पुरवठा अजूनही पुरेसा आहे.

इंधन पुरवठादार कंपन्या आणि पेट्रोल पंप मालकांशी आधीच चर्चा झालेली आहे, त्यामुळे कुठेही पेट्रोल किंवा डिझेलचा तुटवडा नसल्याचे त्यांनी सांगितले. पूर्वी लोक घाबरून इंधनाचा साठा करीत असल्यामुळे गोंधळ निर्माण झाला होता. पेट्रोल पंपांवर बाटल्या किंवा कॅनमध्ये पेट्रोल/डिझेल विकू नये, अशा सूचना देखील यावेळी देण्यात आल्या.

The post बेळगावमध्ये पेट्रोल-एलपीजीचा पुरवठा सुरळीत appeared first on News 24 Tass Marathi.

बेळगाव / प्रतिनिधी

शहरात गेल्या दोन दिवसांपासून पेट्रोल व डिझेलसाठी लागणाऱ्या लांब रांगांच्या पार्श्वभूमीवर, बेळगाव शहर पोलिसांनी पेट्रोल पंप मालकांची बैठक घेऊन परिस्थितीचा आढावा घेतला.

या बैठकीला पोलीस आयुक्त भूषण बोरसे आणि पोलीस उपायुक्त एन. व्ही. बरमनी उपस्थित होते. त्यांनी परिस्थितीचा आढावा घेत पंप मालकांना आवश्यक त्या सूचना दिल्या.

बैठकीत सर्व पेट्रोल पंपांवर “पेट्रोल आणि डिझेलचा पुरेसा साठा उपलब्ध आहे, घाबरून खरेदी करू नका” असे फलक लावण्याचे निर्देश देण्यात आले. तसेच, सार्वजनिक सुरक्षेच्या दृष्टीने बाटल्या किंवा कॅनमध्ये पेट्रोल देण्यास सक्त मनाई करण्यात आली.

पंपांवर गर्दी किंवा गोंधळ झाल्यास तात्काळ ‘११२’ या क्रमांकावर संपर्क साधावा, अशा सूचना देण्यात आल्या. याशिवाय पोलिसांची ‘होयसळा’ व पेट्रोलिंग वाहने २४ तास तैनात राहणार असल्याचे सांगण्यात आले.

नागरिकांनी अफवांवर विश्वास न ठेवता शांतता राखावी आणि केवळ आवश्यकतेनुसारच इंधन खरेदी करावे, असे आवाहन पोलिसांकडून करण्यात आले आहे.

The post बेळगावात पेट्रोल पंप मालकांची बैठक appeared first on News 24 Tass Marathi.