बेळगाव : मॅट्रिमोनी ॲपवर विवाहासाठी स्थळ शोधणाऱ्या बेळगावमधील एका तरुणीची नेदरलँड्समध्ये दंतवैद्य असल्याचे भासवणाऱ्या भामट्याने तब्बल ३.३८ लाख रुपयांची फसवणूक केल्याची धक्कादायक घटना उघडकीस आली आहे. लग्नाचे आमिष दाखवून विश्वास संपादन केल्यानंतर कस्टम शुल्क आणि जीएसटीच्या नावाखाली ही रक्कम उकळण्यात आली. याप्रकरणी बेळगाव सायबर गुन्हे पोलीस ठाण्यात गुन्हा दाखल करण्यात आला आहे.

बेळगावमधील अश्विनी (नाव बदललेले) या तरुणीची मॅट्रिमोनी ॲपवर आर्यनकुमार नावाच्या व्यक्तीशी ओळख झाली होती. त्याने स्वतःला मूळचा हैदराबादचा असून सध्या नेदरलँड्समध्ये दंतवैद्य म्हणून कार्यरत असल्याचे सांगितले. लग्नाचे आश्वासन देत त्याने तरुणीचा विश्वास जिंकला आणि २५ मे रोजी भारतात येत असल्याचे सांगितले.

दुसऱ्याच दिवशी दिल्ली विमानतळावर अडकल्याचे सांगत त्याने मदतीची मागणी केली. त्यानंतर विमानतळ अधिकारी असल्याचे भासवणाऱ्या एका महिलेने तरुणीशी संपर्क साधून परदेशी चलन बदलण्यासाठी ८५,८०० रुपये कस्टम शुल्क भरण्यास सांगितले. त्यानंतर सोने व हिऱ्यांच्या दागिन्यांच्या क्लिअरन्ससाठी २.५३ लाख रुपये जीएसटी भरण्याची मागणी करण्यात आली.

भामट्यांच्या बोलण्यावर विश्वास ठेवून तरुणीने दिलेल्या बँक खात्यावर एकूण ३.३८ लाख रुपये जमा केले. मात्र त्यानंतर संबंधितांचे फोन बंद झाल्याने आपली फसवणूक झाल्याचे तिच्या लक्षात आले. तक्रारीनंतर सायबर पोलिसांनी गुन्हा दाखल करून तपास सुरू केला आहे.

दरम्यान, सोशल मीडिया आणि मॅट्रिमोनी ॲपवरील अनोळखी व्यक्तींवर विश्वास ठेवून आर्थिक व्यवहार करू नयेत, असे आवाहन सायबर पोलिसांनी नागरिकांना केले आहे.

The post मॅट्रिमोनी ॲपवर लग्नाचे आमिष दाखवून बेळगावच्या तरुणीला ३.३८ लाखांचा गंडा appeared first on News 24 Tass Marathi.

बेळगाव : शिवानंद नीलण्णवर यांच्या कार्यालयांवर टाकण्यात आलेल्या छाप्याप्रकरणी तपास अधिक तीव्र झाला असून, प्रशासनाने त्यांच्या अपार्टमेंटमधील तीन कार्यालये तसेच काही भूखंड जप्त केल्याची माहिती समोर आली आहे.

कारवाईदरम्यान अधिकाऱ्यांनी कार्यालयांतून संगणक, लॅपटॉप, महत्त्वाची कागदपत्रे तसेच मोठ्या आर्थिक व्यवहारांशी संबंधित बॉण्ड्स जप्त केले. शिवानंद नीलण्णवर यांचा मोबाईल फोनही तपासासाठी ताब्यात घेण्यात आला असून, डिजिटल व्यवहारांची माहिती तपासण्यासाठी तांत्रिक विश्लेषण सुरू करण्यात आले आहे.

अधिकाऱ्यांनी रात्री उशिरापर्यंत त्यांची चौकशी केली. तसेच आर्थिक व्यवहार आणि संबंधित कागदपत्रांची अधिक माहिती सादर करण्यास सांगत त्यांना पुन्हा चौकशीसाठी हजर राहण्याची नोटीस बजावण्यात आली आहे.

सूत्रांच्या माहितीनुसार, शिवबसव नगर येथील त्यांच्या निवासस्थानी सध्या कडक पोलीस बंदोबस्त ठेवण्यात आला असून हालचालींवर लक्ष ठेवले जात आहे.

चौकशीदरम्यान सुमारे ३५ हजार गुंतवणूकदार सहभागी असल्याची आणि एकूण व्यवहारांची रक्कम जवळपास २५०० कोटी रुपयांपर्यंत पोहोचल्याची माहिती समोर आल्याचे सांगितले जात आहे. त्यामुळे या प्रकरणाचे गांभीर्य वाढले असून, तपास सीआयडी कडे सोपवण्याची शक्यता व्यक्त केली जात आहे.

यासंदर्भात सीआयडीचे विशेष पथक बेळगावात दाखल होण्याची शक्यता वर्तवली जात आहे. तपासात आरबीआय आणि सेबीच्या नियमांचे उल्लंघन करून अधिकृत परवानगीशिवाय जनतेकडून निधी गोळा करण्यात आल्याचा संशय व्यक्त करण्यात आला आहे.

प्रशासनाने गोठवलेल्या चार बँक खात्यांमध्ये सुमारे ४०० कोटी रुपये आढळल्याची माहिती असून, उर्वरित निधी कुठे हस्तांतरित झाला याचाही शोध घेतला जात आहे.

दरम्यान, मोठ्या प्रमाणावर ऑनलाईन आर्थिक व्यवहार होत असतानाही संबंधित यंत्रणांच्या निदर्शनास हे व्यवहार कसे आले नाहीत, याबाबतही विविध स्तरांतून प्रश्न उपस्थित केले जात आहेत. माळमारुती पोलीस ठाणे हद्दीत घडलेल्या या प्रकरणानंतर शिवानंद नीलण्णवर यांच्या निवासस्थान आणि कार्यालय परिसरात पोलीस सुरक्षा वाढवण्यात आली आहे.

The post शिवानंद नीलण्णवर प्रकरणाचा तपास तीव्र appeared first on News 24 Tass Marathi.

बेळगाव : बेळगावमधील एका प्रसिद्ध उद्योजकाला ‘डिजिटल अरेस्ट’ करून तब्बल १५ कोटी ४५ लाख रुपयांची फसवणूक केल्याचा प्रकार उघडकीस आला असून, सायबर क्राईम पोलिसांनी या टोळीचा पर्दाफाश केला आहे. या प्रकरणात दोन आरोपींना अटक करण्यात आली असून पुढील तपास सीबीआयकडे सोपवण्याची प्रक्रिया सुरू आहे.

हैदराबाद येथील श्रीपाद नाईक आणि शरद नाईक अशी अटक करण्यात आलेल्या आरोपींची नावे आहेत. आरोपींनी स्वतःला सीबीआय अधिकारी असल्याचे भासवून उद्योजकाला भीती दाखवली आणि त्यांच्या बँक खात्यातील कोट्यवधी रुपये देशातील सहा राज्यांतील १० वेगवेगळ्या मुख्य खात्यांमध्ये वळवले.

तपासात समोर आले की, लुटलेली रक्कम सुमारे ३९० उप-खात्यांद्वारे फिरवण्यात आली. एका बनावट कंपनीच्या खात्यात २ कोटी रुपये ट्रान्सफर झाल्याचे निष्पन्न झाले असून त्यापैकी १ कोटी रुपये पोलिसांनी तात्काळ गोठवले आहेत.

हैदराबाद, अहमदाबाद आणि कोलकाता यांसारख्या शहरांतील बँक खात्यांचा या मोठ्या फसवणुकीसाठी वापर करण्यात आला असल्याचे तपासात स्पष्ट झाले आहे. गुन्ह्याचे गांभीर्य लक्षात घेऊन हे प्रकरण सीबीआयकडे वर्ग करण्यात येणार असल्याचे समजते.

या टोळीतील इतर आरोपींचा शोध सुरू असून लवकरच त्यांना अटक करण्यात येईल, अशी माहिती पोलीस आयुक्त भूषण बोरसे यांनी दिली आहे. आर्थिक व्यवहारांची सखोल चौकशी सुरू असल्याचेही त्यांनी स्पष्ट केले.

The post ‘डिजिटल अरेस्ट’द्वारे बेळगावातील उद्योजकाची १५ कोटींची फसवणूक appeared first on News 24 Tass Marathi.

पोलिस आयुक्त भूषण बोरसे यांनी बुधवारी पत्रकारांशी बोलताना सांगितले की, फसवणूक झालेली रक्कम अहमदाबाद, कोलकाता, गुवाहाटी, हरियाणा आणि दिल्ली येथील १० बँक खात्यांमध्ये विभागण्यात आली होती. प्राथमिक तपासात हैदराबादमध्ये श्रीपाद नायक आणि शरद नायक यांनी एका खाजगी कंपनीच्या नावावर बनावट खाते तयार करून ही रक्कम वळवली असल्याचे समोर आले आहे. या आरोपींच्या अटकेसाठी विशेष पथक नेमण्यात आले आहे.

पोलीस आयुक्त भूषण बोरसे यांनी स्पष्ट केले की, १० कोटी रुपयांहून अधिक रकमेच्या फसवणुकीच्या प्रकरणात सरकारी नियमांनुसार तपास सीबीआयकडे सोपवण्याची प्रक्रिया सुरू आहे. प्रकरणाची कागदपत्रे सीबीआयकडे हस्तांतरित करण्यासाठी तयारी पूर्ण केली जात आहे.

या प्रकरणामुळे डिजिटल व्यवहारांमध्ये सतर्क राहण्याची गरज अधोरेखित झाली आहे. पोलीस प्रशासन या फसवणुकीच्या आरोपींवर कठोर कारवाई करत असून, उर्वरित रक्कमेचा शोध लवकरच लागेल, असे त्यांनी स्पष्ट केले आहे.

बेळगाव शहरात २९०० म्युल बँक खाती सक्रिय आहेत असेही तपासात उघड झाले आहे. नागरिकांनी कोणत्याही आमिषाला बळी पडून आपली बँक खाती कोणालाही भाड्याने देऊ नयेत, असा आवाहन भूषण बोरसे यांनी केले.

The post बेळगावात १५ कोटींच्या डिजिटल फसवणूक प्रकरणी १ कोटी रुपये गोठवले appeared first on News 24 Tass Marathi.

बेळगावमध्ये एका वृद्ध उद्योजकाला सायबर फसवणूक करणाऱ्यांनी लक्ष्य केले. त्यांनी त्याला मनी लॉंड्रिंग प्रकरणात अडकण्याची भीती दाखवून तब्बल १५ कोटी ४५ लाख रुपये उकळवले. आरोपींनी स्वतःला सीबीआय अधिकारी म्हणून दाखवून व्हिडिओ कॉलवरून ‘डिजिटल अरेस्ट’ची धमकी दिली आणि उद्योजकाकडून रक्कम हप्त्यांमध्ये घेतली.

बेळगाव सायबर क्राईम पोलिसांच्या तपासात समोर आले की, या लुटीची रक्कम देशभरातील सुमारे ३९० बँक खात्यांमध्ये काही मिनिटांतच वळवण्यात आली होती. शेकडो ‘म्युचुअल अकाउंट्स’चा वापर करून चोरट्यांनी आधीच ९५ टक्के रक्कम काढून घेतली होती.

पोलीस आयुक्त भूषण बोरसे यांनी या प्रकरणाचा सखोल तपास करण्यासाठी सीआयडीकडे याची तक्रार केली आहे. आतापर्यंत पोलिसांनी ९० लाख रुपये जप्त करण्यात यश मिळवले असून, उर्वरित रकमेसाठी ३९० खात्यांची माहिती संकलित केली जात आहे. कायद्यात ‘डिजिटल अरेस्ट’ अशी कोणतीही तरतूद नाही. त्यामुळे, अशा प्रकारचे फोन आल्यास नागरिकांनी त्वरित पोलिसांशी संपर्क साधावा, असे भूषण बोरसे यांनी नागरिकांना सुचवले आहे. हायटेक चोरट्यांच्या या फसवणुकीमुळे सध्या सीमावर्ती भागात मोठी खळबळ उडाली आहे.

The post बेळगावात ‘डिजिटल अरेस्ट’च्या नावाखाली उद्योजकाला कोटींचा गंडा appeared first on News 24 Tass Marathi.