कुद्रेमानी : गणेश चतुर्थीच्या उंबरठ्यावर कुद्रेमानी येथील हनुमान युवक सार्वजनिक गणेशोत्सव मंडळाच्या ‘कुद्रेमानीचा राजा’ या गणेशमूर्तीचे आज दुपारी चंदगड तालुक्यातील माणगाव येथील गणेशमूर्ती कार्यशाळेतून कुद्रेमानीकडे प्रस्थान झाले. सायंकाळी वाजत-गाजत आणि उत्साहपूर्ण वातावरणात गणेशमूर्तीचे हनुमान मंदिरापर्यंत दिमाखात आगमन झाले.

आगमन सोहळ्यात फटाक्यांची आतषबाजी, ढोल-ताशांचा गजर आणि ‘गणपती बाप्पा मोरया’, ‘आला रे आला, गणपती बाप्पा आला’ अशा जयघोषांनी परिसर दुमदुमून गेला. गणेश भक्तांसह ग्रामस्थांनी मोठ्या उत्साहात या आगमन सोहळ्यात सहभाग घेतला. यावर्षीची गणेशमूर्ती कुद्रेमानी गावचे माजी सरपंच विनायक नारायण पाटील यांनी मंडळाला देणगी स्वरूपात दिली आहे.

यावेळी हनुमान युवक सार्वजनिक गणेशोत्सव मंडळाचे पदाधिकारी अरुण देवण, शंकर पाटील, रुक्माणा कागणकर, शशिकांत पाटील व रवळू देवण
तसेच ग्रामस्थ शिवाजी गुरव, महादेव मराठे, रवी पाटील, बाळू कदम, धोडिबा पाटील, सुरेश पाटील, बबन गुरव, निलेश पाटील, लक्ष्मण कांबळे, गोविंद कांबळे, नाईकसमाज यांच्यासह गणेशभक्त व ग्रामस्थ मोठ्या संख्येने उपस्थित होते.

The post ‘कुद्रेमानीचा राजा’चे दिमाखात आगमन appeared first on News 24 Tass Marathi.

बेळगाव : आधुनिकतेच्या धावपळीला बाजूला सारत पारंपरिक संस्कृतीचे दर्शन घडवत खडक गल्लीतील सार्वजनिक गणेशोत्सव मंडळाच्या गणरायाचा आगमन सोहळा उत्साहात पार पडला. कोणताही डीजे किंवा डॉल्बी न वापरता शिवकालीन मर्दानी खेळ, पारंपरिक वाद्ये आणि ढोल-ताशांच्या गजरात गणरायाची भव्य मिरवणूक काढण्यात आली. तरुणांनी सादर केलेल्या या अनोख्या पारंपरिक मिरवणुकीने उपस्थितांचे विशेष लक्ष वेधून घेतले.

खडक गल्लीतील गणरायाचे आगमन छत्रपती धर्मवीर संभाजी महाराज सर्कलपासून सुरू झाले. कोल्हापूर जिल्ह्यातील भुदरगड-केळवडी येथील लेझिम पथकाने सादर केलेल्या लयबद्ध खेळाने मिरवणुकीत रंगत आणली. लेझिमच्या तालावर तरुणांसह ज्येष्ठ नागरिकांनीही उत्स्फूर्त सहभाग घेतला.

साताऱ्याहून आलेल्या मर्दानी साहस क्रीडा संघाने शिवकालीन परंपरेची आठवण करून देणाऱ्या थरारक कसरती आणि मशालींचे प्रदर्शन सादर केले. या साहसी खेळांनी गणेशभक्तांची मने जिंकली.

माजी आमदार अनिल बेनके यांनी मंडळाच्या या उपक्रमाचे कौतुक केले. लोकमान्य बाळ गंगाधर टिळकांनी ज्या उद्देशाने सार्वजनिक गणेशोत्सवाची सुरुवात केली, तो उद्देश अशा उपक्रमांमधून सार्थ ठरत असल्याचे त्यांनी सांगितले. डॉल्बीला बंदी असताना मंडळांनी शिवकालीन वाद्ये आणि मर्दानी खेळांना दिलेले प्राधान्य भारतीय संस्कृतीच्या जतनासाठी उपयुक्त असल्याचे मत त्यांनी व्यक्त केले.

गणेशोत्सवानिमित्त सोमवारनंतर कर्नाटकासह गोवा आणि महाराष्ट्रातून लाखो भाविक बेळगावमध्ये दाखल होण्याची शक्यता आहे. गणेशोत्सव हा परस्पर सामंजस्याने आणि कोणत्याही मतभेदांना व क्षुल्लक तक्रारींना थारा न देता साजरा करावा, असे आवाहन अनिल बेनके यांनी केले. त्यांनी देशातील नागरिकांना गणेशोत्सवाच्या शुभेच्छाही दिल्या.

या आगमन सोहळ्यात श्रीराम सेना हिंदुस्थानचे अध्यक्ष रमाकांतदादा कोंडुसकर, भरत पाटील, भाजप नेते मुरुगेंद्र गौडा पाटील, युवा नेते सुनील जाधव यांच्यासह विविध मान्यवर आणि हजारो गणेशभक्त सहभागी झाले होते.

The post डीजे-डॉल्बीला फाटा ; पारंपरिक वाद्यांच्या गजरात रंगला खडक गल्लीच्या गणरायाचा आगमन सोहळा appeared first on News 24 Tass Marathi.

बेळगाव : ढोल – ताशांचा गजर, आकर्षक रोषणाई आणि ‘गणपती बाप्पा मोरया’च्या जयघोषाने शुक्रवारी बेळगाव शहराचा परिसर भक्तिमय झाला. चव्हाट गल्लीतील ‘बेळगावचा राजा’ गणेशमूर्तीचा यंदा प्रथमच आयोजित करण्यात आलेला भव्य आगमन सोहळा हजारो भाविकांच्या उपस्थितीत उत्साहात पार पडला.

धर्मवीर संभाजी सर्कलपासून सुरू झालेली गणेशमूर्तीची मिरवणूक चव्हाट गल्लीच्या दिशेने मार्गस्थ झाली. मिरवणूक पाहण्यासाठी रस्त्याच्या दुतर्फा भाविकांनी मोठी गर्दी केली होती. भव्य गणेशमूर्ती, आकर्षक सजावट आणि झगमगणारी विद्युत रोषणाईने सर्वांचे लक्ष वेधून घेतले.

• ढोल-ताशांच्या गजरात तरुणाईचा उत्साह

मिरवणुकीत तरुणाईचा उत्साह विशेष पाहायला मिळाला. ढोलासह विविध वाद्यांच्या तालावर तरुणांनी उत्स्फूर्तपणे सहभाग घेतला. लहान मुलांनीही ढोल वाजवत मिरवणुकीत रंग भरला. कुटुंबासह मिरवणुकीत सहभागी झालेल्या भाविकांनी गणेशमूर्तीचे दर्शन घेत हात जोडून बाप्पाला वंदन केले.

रात्रीच्या वेळी मिरवणूक मार्गावर करण्यात आलेल्या आकर्षक रोषणाईमुळे संपूर्ण परिसर उजळून निघाला होता. बाप्पाच्या दर्शनासाठी जमलेला जनसागर, मोबाईलमध्ये मिरवणुकीची छायाचित्रे आणि व्हिडिओ टिपणारे तरुण तसेच सतत सुरू असलेला ‘गणपती बाप्पा मोरया’चा जयघोष यामुळे उत्सवाचे वातावरण अधिकच भारावून गेले.

• पोलिसांचा कडेकोट बंदोबस्त

मिरवणुकीसाठी झालेली मोठी गर्दी लक्षात घेऊन शहर पोलिसांकडून सुरक्षा आणि वाहतूक व्यवस्थेचे नियोजन करण्यात आले होते. प्रमुख चौक तसेच गर्दीच्या ठिकाणी पोलिस कर्मचारी तैनात करण्यात आले होते. मिरवणूक सुरळीत पार पडावी यासाठी वाहतुकीवरही विशेष लक्ष ठेवण्यात आले.

चव्हाट गल्लीतील ‘बेळगावचा राजा’च्या भव्य आगमनाने यंदाच्या सार्वजनिक गणेशोत्सवात आणखी एका आकर्षणाची भर पडली आहे. भक्ती, सांस्कृतिक उत्साह आणि तरुणाईचा जल्लोष यांचा सुंदर संगम घडवून आणणारी ही मिरवणूक बेळगावकरांसाठी विशेष आकर्षण ठरली.

The post ‘बेळगावचा राजा’ चा भव्य आगमन सोहळा उत्साहात appeared first on News 24 Tass Marathi.