बेळगाव : ग्रामीण भागातील तुरमुरी गावाजवळ उभारण्यात आलेल्या कचरा डेपोमुळे स्थानिक नागरिकांना विविध समस्यांना सामोरे जावे लागत असल्याचा आरोप करत ग्रामस्थांनी आज जिल्हाधिकारी कार्यालयात धाव घेत निवेदन सादर केले. कचरा डेपोची समस्या दिवसागणिक वाढत असल्याने त्यावर तातडीने कायमस्वरूपी तोडगा काढण्याची मागणी यावेळी करण्यात आली.

ग्रामस्थांनी दिलेल्या माहितीनुसार, प्रशासनाने यापूर्वी हा कचरा डेपो अन्यत्र स्थलांतरित करण्याचे आश्वासन दिले होते. मात्र अद्याप त्याबाबत कोणतीही ठोस कार्यवाही झालेली नसल्याने नागरिकांमध्ये नाराजीचे वातावरण आहे. तसेच ओला आणि सुका कचरा वेगळा करण्याची प्रक्रिया प्रभावीपणे राबवली जाईल, असे सांगण्यात आले होते; परंतु प्रत्यक्षात त्याची अंमलबजावणी झालेली दिसून येत नसल्याचा आरोपही ग्रामस्थांनी केला.

गेल्या दोन दशकांपासून या डेपोमुळे परिसरात दुर्गंधी पसरत असून, आरोग्याच्या समस्या निर्माण होण्याची भीती वाढत असल्याचे नागरिकांचे म्हणणे आहे. या प्रश्नासंदर्भात यापूर्वी अनेक वेळा चौकशी करून अहवालही सादर करण्यात आले आहेत. मात्र संबंधित विभागाकडून अपेक्षित कारवाई झाली नसल्याची खंत ग्रामस्थांनी व्यक्त केली.

यावेळी गावचे नेते नागराज जाधव यांनी, “तुरमुरीतील हा कचरा डेपो तातडीने हटवण्यात यावा. अन्यथा गावातील सर्व नागरिक एकत्र येऊन जिल्हा प्रशासनाविरोधात तीव्र आंदोलन उभारतील,” असा इशारा दिला. निवेदन सादर करताना तुरमुरी गावातील अनेक नागरिक उपस्थित होते.

The post तुरमुरीतील कचरा डेपो हटवा appeared first on News 24 Tass Marathi.

बेळगाव : तुरमुरी गावातील कचरा डेपोमुळे वाढत्या प्रदूषणाचा प्रश्न गंभीर बनत असून त्यावर शाश्वत आणि पर्यावरणपूरक उपाययोजना राबवाव्यात, अशी मागणी सोशल जस्टिस फोरमने जिल्हा प्रशासनाकडे केली आहे. तसेच शहराच्या औद्योगिक प्रगतीसाठी सेमीकंडक्टर उत्पादन प्रकल्प उभारण्याचीही महत्त्वपूर्ण मागणी करण्यात आली आहे.

यासंदर्भात फोरमच्यावतीने जिल्हाधिकारी – पोलीस आयुक्तांची भेट घेऊन त्यांना निवेदन सादर करण्यात आले. तुरमुरी येथील कचरा डेपोमध्ये अनियंत्रित व अस्वच्छ पद्धतीने कचरा टाकला जात असल्याने परिसरात तीव्र दुर्गंधी पसरली असून कीटकांचा प्रादुर्भाव वाढला आहे. यामुळे माती व पाण्याचे प्रदूषण होऊन नागरिकांच्या आरोग्यावर गंभीर परिणाम होत असल्याचे निवेदनात नमूद करण्यात आले आहे.

पर्यावरणपूरक उपाय म्हणून ओल्या कचऱ्यापासून सेंद्रिय खत निर्मिती, वीजनिर्मिती तसेच गांडूळ खत प्रकल्प राबविण्याचा प्रस्ताव फोरमने मांडला आहे. या उपाययोजनांमुळे कचऱ्याचे प्रभावी व्यवस्थापन होऊन ‘वेस्ट टू वेल्थ’ संकल्पना प्रत्यक्षात आणता येईल आणि स्थानिक स्तरावर रोजगारनिर्मितीलाही चालना मिळेल, असा विश्वास व्यक्त करण्यात आला आहे.

दरम्यान, एअर फोर्स गुरुप्रसाद कॉलनी येथे सुमारे ४० एकर जागेवर सेमीकंडक्टर उत्पादन प्रकल्प उभारण्याची मागणीही करण्यात आली आहे. हा प्रकल्प उभारल्यास बेळगावला औद्योगिक व तांत्रिक क्षेत्रात नवी ओळख मिळेल तसेच मोठ्या प्रमाणावर रोजगार निर्माण होईल, असे फोरमने स्पष्ट केले आहे. यासाठी केंद्र सरकार व भारतीय हवाई दलाशी समन्वय साधून आवश्यक परवानग्या मिळवण्याची प्रक्रिया सुरू करावी, अशी विनंती करण्यात आली आहे.

या दोन्ही मुद्द्यांवर प्रशासनाने तातडीने सकारात्मक निर्णय घ्यावा, अशी अपेक्षा व्यक्त करण्यात आली. यावेळी संगम कुलकर्णी, शिरीष तेंडुलकर, अनिल देशपांडे, नकुल लेले, विकास कलघटगी, संतोष कामत आदी सदस्य उपस्थित होते.

The post कचऱ्यापासून ‘वेस्ट टू वेल्थ’ संकल्पना राबवा appeared first on News 24 Tass Marathi.

बेळगाव : शहरातील तुरमुरी कचरा डेपो आणि हलगा येथील सांडपाणी प्रक्रिया प्रकल्प (एसटीपी) संदर्भात राज्याच्या महिला व बालविकास मंत्री लक्ष्मी हेब्बाळकर यांनी महत्त्वपूर्ण भूमिका स्पष्ट करत, संबंधित प्रश्न दोन महिन्यांत मार्गी लागतील अशी ग्वाही दिली. शेतकऱ्यांना विश्वासात घेऊनच सर्व विकासकामे पूर्ण केली जातील, असे त्यांनी ठामपणे सांगितले.

बेळगाव येथे आयोजित पत्रकार परिषदेत बोलताना त्यांनी सांगितले की, तुरमुरी येथील कचरा व्यवस्थापन समस्येवर कायमस्वरूपी तोडगा काढण्यासाठी प्रशासन आणि महापालिकेने नियोजनबद्ध पावले उचलली आहेत. शहराच्या उत्तर, दक्षिण तसेच यमकनमर्डी भागात कचरा डेपो उभारण्यासाठी आवश्यक जमिनीची खरेदी प्रक्रिया पूर्ण झाली असून, येत्या दोन महिन्यांत तुरमुरीतील सुमारे ७० टक्के कचरा अन्य ठिकाणी स्थलांतरित केला जाईल. हलगा येथील एसटीपी प्रकल्पाबाबत माहिती देताना त्यांनी सांगितले की, मागील सरकारकडून शेतकऱ्यांना प्रति एकर ३ लाख रुपयांची भरपाई जाहीर करण्यात आली होती. मात्र, सध्याच्या सरकारने शेतकऱ्यांच्या हिताचा विचार करून ही भरपाई तब्बल ५० लाख रुपये प्रति एकर इतकी वाढवली आहे. लवकरच या प्रकल्पाचे कामही वेगाने सुरू होईल, असे त्यांनी स्पष्ट केले.

यावेळी बेळगुंदी परिसरातील अवैध खाणकामाच्या मुद्द्यावर त्यांनी तीव्र नाराजी व्यक्त केली. या प्रकरणात संबंधित अधिकाऱ्यांना कडक सूचना देण्यात आल्या असून, अवैध खाणकामात गुंतलेल्या कोणत्याही व्यक्तीला वाचवले जाणार नाही. कायद्याच्या चौकटीत राहून सर्वांवर कठोर कारवाई केली जाईल, असा इशाराही त्यांनी दिला.

The post तुरमुरी कचरा डेपोच्या समस्येवर तोडगा appeared first on News 24 Tass Marathi.

बेळगाव : तुरमुरी येथील बेळगाव महापालिकेचा कचरा डेपो त्वरित बंद करून स्थलांतरित करावा, या मागणीसाठी आज तुरमुरी ग्रामस्थांनी बेळगावमध्ये टाळ-मृदंगाच्या गजरात अनोखा मोर्चा काढला. हजारो ग्रामस्थांनी सहभाग घेत प्रशासनाविरोधात तीव्र संताप व्यक्त केला.

गेल्या दहा वर्षांपासून शहरातील कचरा गावात टाकला जात असल्याने ग्रामस्थ हैराण झाले आहेत. कचऱ्यामुळे परिसरात दुर्गंधी पसरली असून श्वास घेणेही कठीण झाले आहे. तसेच कुत्र्यांचा उपद्रव वाढून हल्ल्यांच्या घटना घडत आहेत. सांडपाणी शेतात शिरल्याने पिकांचे नुकसान होत असून भूजलही दूषित झाले आहे. यामुळे लहान मुले आणि वृद्धांच्या आरोग्याचा प्रश्न गंभीर बनल्याचा आरोप ग्रामस्थांनी केला.

शेतकऱ्यांनी संताप व्यक्त करताना, कचरा डेपोमुळे त्वचारोगांसारखे आजार वाढत असल्याचे सांगितले. जनवस्तीत डेपो उभारून प्रशासनाने अन्याय केल्याचा आरोप करत, डेपो तात्काळ बंद न केल्यास लोकप्रतिनिधींनी राजीनामा द्यावा, असा इशारा देण्यात आला.

दरम्यान, जिल्हाधिकारी मोहम्मद रोशन यांनी आंदोलकांची भेट घेऊन निवेदन स्वीकारले. कचरा डेपो स्थलांतरासाठी पर्यायी जागेचा शोध घेणे आवश्यक असून त्यासाठी काही कालावधी लागेल, असे त्यांनी स्पष्ट केले. तोपर्यंत तेथील काम तात्काळ थांबवण्याचे आश्वासन त्यांनी दिले.

या आंदोलनात तुरमुरी गावातील महिला, वृद्ध आणि तरुण मोठ्या संख्येने सहभागी झाले होते. जिल्हाधिकाऱ्यांनी कामाला स्थगिती दिल्यानंतर आंदोलकांनी सध्या समाधान व्यक्त केले आहे.

The post कचरा डेपोविरोधात तुरमुरी ग्रामस्थांचा बेळगावात मोर्चा appeared first on News 24 Tass Marathi.

बेळगाव / प्रतिनिधी

बेळगावमधील तुरमुरी कचरा डेपो रद्द करण्यासाठी हिंडलगा, आंबेवाडी, मण्णूर, गोजगा, बाची, बसुर्ते, उचगाव आणि कोनेवाडी येथील ग्रामस्थांनी आज मंत्री लक्ष्मी हेब्बाळकर यांच्या निवासस्थानावर मोर्चा काढला.

मंत्री लक्ष्मी हेब्बाळकर यांनी बेळगावमधील तुरमुरी कचरा डेपो विरोधात आवाज उठवला आहे. “शहरातील कचरा ग्रामीण भागात नको आहे,” असे म्हणत एक नागरिक म्हणून आपणही आंदोलनात सहभागी होणार असल्याची घोषणा त्यांनी केली. या समस्येला जबाबदार असलेल्या खासदार, आमदार आणि महापौरांच्या घरासमोर गावकऱ्यांनी आपला कचरा घेऊन आंदोलन करावे, असे आवाहन करून त्यांनी या संघर्षाला नवीन स्वरूप दिले.

बेळगाव तालुक्याच्या तुरमुरी गावातील कचरा डेपो रद्द करण्याच्या मागणीसाठी श्री कलमेश्वर मंदिरापासून महिला व बालविकास मंत्री आणि बेळगाव ग्रामीण आमदार लक्ष्मी हेब्बाळकर यांच्या निवासस्थानापर्यंत मोर्चा काढण्यात आला.

गावकऱ्यांनी मंत्री लक्ष्मी हेब्बाळकर यांना सांगितले की, २००६ पासून गावकरी तुरमुरी येथील कचरा डेपोला करत आहेत. यामुळे आजूबाजूच्या गावांना त्रास होत आहे. लोकांना इतका त्रास होत आहे की ते नीट जेवणही करू शकत नाहीत. रोगराई पसरण्याची भीती आहे. त्यामुळे सदर कचरा डेपो तात्काळ रद्द करावा अशी विनंती गावकऱ्यांनी केली.

काडाचे अध्यक्ष युवराज कदम यांनी मंत्र्यांची समजूत घातली. कचरा डेपोमुळे आधीच विविध समस्या निर्माण झाल्या असून येत्या काही दिवसांत पाईपलाईन देखील दूषित होतील, अशी चिंता त्यांनी व्यक्त केली.

यानंतर मंत्री लक्ष्मी हेब्बाळकर यांनी तात्काळ नगरविकास मंत्री भैरती सुरेश यांना व्हिडिओ कॉल करून जमलेल्या नागरिकांच्या गर्दीकडे लक्ष वेधले आणि हा मुद्दा त्यांच्या निदर्शनास आणून दिला. नगरविकास मंत्री भैरती सुरेश यांनी चौकशी करून मंत्रिमंडळात चर्चा करून कारवाई करण्याचे आश्वासन दिले.

मंत्री लक्ष्मी हेब्बाळकर म्हणाल्या की, ही केवळ माझीच जबाबदारी नाही, तर महापौर, शहरातील आमदार आणि महापालिकेच्या खासदारांचीही जबाबदारी आहे. शहरातील कचरा ग्रामीण भागात का जातो? शहरातील कचरा ग्रामीण भागात जाता कामा नये. महापौर, शहर आमदार आसिफ सेठ, दक्षिण आमदार अभय पाटील आणि खासदार जगदीश शेट्टर यांच्या निवासस्थानासमोर कचरा घेऊन आंदोलन करावे. ग्रामीण भागातील जनतेची कन्या म्हणून मी सुद्धा या आंदोलनात सहभागी होईन. त्यांनी आपली जबाबदारी पार पाडावी आणि लोकांच्या समस्या सोडवाव्यात, असे त्या म्हणाल्या.

मंत्री पुढे म्हणाल्या, “ग्रामीण भागात कचरा टाकणाऱ्यांनी जनतेला काय दिले आहे? ९ एप्रिलपर्यंत गावकऱ्यांनी दोन्ही आमदार, खासदार, महापौर आणि उपमहापौर यांच्या घरासमोर कचरा घेऊन कचरा डेपो विरोधात आंदोलन करावे आणि त्यांना त्यांच्या जबाबदारीची आठवण करून द्यावी. त्यानंतर, महापालिका आणि जिल्हाधिकारी कार्यालयात एक मोठी सभा होईल. गावपातळीवरील कचऱ्याची विल्हेवाट तिथेच लावली पाहिजे, तो तुरमुरीला पाठवू नये,” असे मंत्री हेब्बाळकर यांनी सांगितले.

यावेळी चंद्रकांत जाधव, पुंडलिक खांडेकर, नागराज जाधव, सोमनाथ बेळगावकर, पुंडलिक बेळगावकर, सुनील बेळगावकर, सिद्धाप्पा कांबळे, अनिल खनगावकर, आनंद बंगे, शिवाजीराव खांडेकर, नारायण शहापूरकर यांच्यासह हिंडलगा, आंबेवाडी, मण्णूर, गोजगा, बाची, बसुर्ते, उचगाव, कोनेवाडी येथील हजारो ग्रामस्थ सहभागी झाले होते.

The post तुरमुरी येथील कचरा डेपो रद्द करा appeared first on News 24 Tass Marathi.