अथणी : मुसळधार पावसामुळे अथणी शहरातील हल्याळ रस्त्यावरील एक जुनी इमारत अचानक कोसळून जमीनदोस्त झाली. सुदैवाने दुर्घटनेच्या वेळी इमारतीत किंवा परिसरात कोणीही नसल्याने मोठी जीवितहानी टळली.

अथणी शहरात शुक्रवारी रात्री झालेल्या जोरदार पावसाचा फटका अनेक भागांना बसला. हल्याळ रस्त्यावरील रावसाब ऐहोळे यांच्या मालकीची जुनी इमारत पावसामुळे कमकुवत झाल्यानंतर अचानक कोसळली. सततच्या पावसामुळे इमारतीच्या भिंती खचल्याने ही दुर्घटना घडल्याचे प्राथमिक तपासात समोर आले आहे.

इमारत कोसळल्याचा मोठा आवाज होताच परिसरातील नागरिकांमध्ये काही काळ भीतीचे वातावरण निर्माण झाले. अनेकांनी घटनास्थळी धाव घेतली. मात्र, दुर्घटनेच्या वेळी इमारतीत कोणतीही व्यक्ती नसल्याने तसेच आसपासही वर्दळ नसल्याने कोणतीही जीवितहानी किंवा दुखापत झाली नाही.

घटनेची माहिती मिळताच संबंधित अधिकाऱ्यांनी घटनास्थळी भेट देऊन पाहणी केली. पावसाळ्याच्या पार्श्वभूमीवर धोकादायक आणि जीर्ण इमारतींची तपासणी करून आवश्यक ती खबरदारी घेण्याची गरज यानिमित्ताने पुन्हा अधोरेखित झाली आहे.

The post मुसळधार पावसामुळे अथणीत जुनी इमारत कोसळली appeared first on News 24 Tass Marathi.

बेळगाव : हलगा येथील सुवर्ण विधानसौधमध्ये यंदापासून हिवाळी ऐवजी पावसाळी अधिवेशन भरविण्याच्या हालचाली सुरू झाल्या असून, जुलै महिन्याच्या दुसऱ्या आठवड्यापासून कर्नाटक विधिमंडळाचे अधिवेशन सुरू होण्याची दाट शक्यता व्यक्त केली जात आहे. या पार्श्वभूमीवर जिल्हा आणि पोलीस प्रशासनाने स्थानिक पातळीवर तयारी सुरू केली आहे.

गेल्या अनेक वर्षांपासून सुवर्ण विधानसौधमध्ये हिवाळी अधिवेशन भरविले जात होते. मात्र, अधिवेशन काळात विविध मागण्यांसाठी मोठ्या प्रमाणात आंदोलने होत असल्याने प्रशासनावर अतिरिक्त ताण निर्माण होत होता. त्याचा परिणाम कामकाजावरही होत असल्याचे दिसून आले होते.

गतवर्षी ८ डिसेंबरपासून दहा दिवसांचे हिवाळी अधिवेशन आयोजित करण्यात आले होते. या कालावधीत विविध संघटना आणि आंदोलकांनी मोठ्या प्रमाणात आंदोलन छेडले होते. त्यामुळे भविष्यात पावसाळ्यात अधिवेशन भरविल्यास आंदोलनांवर काही प्रमाणात मर्यादा येतील, असा सरकारचा विचार असल्याची चर्चा आहे.

या पार्श्वभूमीवर हलगा येथील सुवर्ण विधानसौधमध्ये १३ जुलैपासून पावसाळी अधिवेशन सुरू होण्याची शक्यता वर्तविली जात आहे. त्यानुसार जिल्हा प्रशासन आणि पोलीस विभागाने प्राथमिक तयारीला सुरुवात केली आहे.

शुक्रवारी दुपारी पोलीस उपायुक्त नारायण बरमणी, बेळगाव ग्रामीणचे साहाय्यक पोलीस आयुक्त गंगाधर बी. एम. आणि हिरेबागेवाडीचे पोलीस निरीक्षक सुंदरेश होळेण्णावर यांनी हलगा बायपास परिसरात पार्किंगसाठी पर्यायी जागांची पाहणी केली.

दरम्यान, याबाबत जिल्हा प्रशासनाकडून अद्याप कोणतेही अधिकृत स्पष्टीकरण देण्यात आले नसले तरी बेळगावात यंदापासून पावसाळी अधिवेशन सुरू होण्याची शक्यता अधिक बळकट झाली आहे.

The post बेळगावात प्रथमच पावसाळी अधिवेशनाची शक्यता appeared first on News 24 Tass Marathi.

याच पार्श्वभूमीवर केरळ किनारपट्टीवर १ जूनच्या सुमारास मान्सून दाखल होण्याची शक्यता अधिक दृढ झाली आहे. ऑस्ट्रेलियातील हवामान विभागाने २०२५-२६ मधील उत्तर भागातील पावसाळी हंगाम समाप्त झाल्याचे जाहीर केल्यानंतर वातावरणीय प्रणालीत बदल दिसून येऊ लागले आहेत. या बदलांचा प्रभाव उत्तर गोलार्धातील हवामानावर होत असून भारतीय महासागर क्षेत्रात कमी दाबाची परिस्थिती तयार होत असल्याने मान्सूनसाठी पोषक वातावरण निर्माण होत आहे.

सध्या आंतरउष्ण कटिबंधीय अभिसरण पट्टा उत्तरेकडे सरकत असून तो मालदीवच्या उत्तरेकडून दक्षिण श्रीलंका आणि अंदमान-निकोबार बेटांपर्यंत विस्तारलेला आहे. मान्सून केरळ किनारपट्टीवर पोहोचण्यापूर्वी या पट्ट्यातील हालचाली महत्त्वपूर्ण मानल्या जातात. त्यामुळे येत्या काही दिवसांत मान्सूनच्या पुढील प्रवासाचे चित्र अधिक स्पष्ट होण्याची शक्यता हवामान तज्ज्ञांनी व्यक्त केली आहे.

• दक्षिण भारतात मुसळधार पावसाचा अंदाज

दरम्यान, हवामान विभागाने पुढील सात दिवस दक्षिण भारतातील विविध भागांत जोरदार पावसाचा इशारा दिला आहे. तामिळनाडू, केरळ, पुदुचेरी आणि दक्षिण कर्नाटकात मुसळधार पावसाची शक्यता व्यक्त करण्यात आली आहे. तसेच किनारी आंध्र प्रदेश आणि रायलसीमा भागात मेघगर्जनेसह वादळी पावसाचा अंदाज वर्तविण्यात आला आहे. लक्षद्वीप परिसरातही पावसाची तीव्रता वाढण्याची शक्यता हवामान खात्याने व्यक्त केली आहे.

दुसरीकडे, उत्तर-पश्चिम आणि पूर्व भारतातील काही भागांत उष्णतेची लाट कायम राहण्याचा अंदाज असून काही ठिकाणी अचानक वादळी वारे, विजांचा कडकडाट आणि गारपीट होण्याचाही इशारा देण्यात आला आहे. हवामानातील या बदलत्या परिस्थितीमुळे नागरिकांनी आवश्यक ती खबरदारी घ्यावी, असे आवाहन प्रशासनाकडून करण्यात आले आहे.

The post केरळमध्ये १ जूनला मान्सून दाखल होण्याची शक्यता appeared first on News 24 Tass Marathi.

बेंगळुरू : राज्य सरकारकडून दरवर्षी हिवाळी अधिवेशन बेळगावात घेण्यात येते. उत्तर कर्नाटकच्या विकासासाठी विधिमंडळाचे अधिवेशन आयोजित केले जाते, असा दावा सरकारकडून सातत्याने केला जात असला तरी आतापर्यंत झालेल्या अधिवेशनांतून या भागाला अपेक्षित विकास मिळालेला नाही, अशी भावना व्यक्त होत आहे. उलट हिवाळी अधिवेशन काळात विविध संघटनांकडून मोठ्या प्रमाणात आंदोलने होत असल्याने अधिवेशन नेहमीच चर्चेत राहिले आहे. आता पावसाळ्यात अधिवेशन घेऊन आंदोलनांचा दबाव टाळण्याचा प्रयत्न सरकारकडून केला जात असल्याची चर्चा सुरू झाली आहे.

विधान परिषद सभापती बसवराज होरट्टी यांनी शुक्रवारी (दि. ८) बेंगळुरू येथे बोलताना यावर्षी पहिल्यांदाच बेळगावातील सुवर्णसौध येथे पावसाळी विधिमंडळ अधिवेशन घेण्यात येणार असल्याची माहिती दिली. अधिवेशनाची तारीख लवकरच निश्चित केली जाणार असून त्यापूर्वी आवश्यक तयारी आणि पाहणी केली जाणार असल्याचे त्यांनी सांगितले.

दरम्यान, महाराष्ट्र-कर्नाटक सीमावादावरील सुनावणी लवकरच होणार असल्याने या पार्श्वभूमीवर पावसाळी अधिवेशन घेऊन महाराष्ट्र सरकारवर दबाव निर्माण करण्याचाही प्रयत्न असल्याचा आरोप केला जात आहे. तसेच अधिवेशन काळात सीमाभागातील मराठी जनतेकडून होणारी आंदोलने टाळण्यासाठीच सरकारने हा निर्णय घेतल्याची टीकाही विरोधकांकडून करण्यात येत आहे.

The post बेळगावात पावसाळी अधिवेशनाचा घाट appeared first on News 24 Tass Marathi.

बेळगाव : उकाड्याने त्रस्त झालेल्या बेळगावकरांना अचानक झालेल्या वळिवाच्या पावसाने मोठा दिलासा मिळाला असला, तरी या पावसामुळे शहरातील जनजीवन विस्कळीत झाले.

सायंकाळी शहरासह तालुक्यात विजांच्या कडकडाटासह मुसळधार पाऊस कोसळला. या पावसामुळे वातावरणात गारवा निर्माण झाला आणि नागरिकांना उष्णतेपासून काहीसा दिलासा मिळाला.

मात्र, जोरदार पावसामुळे शहरातील मुख्य रस्त्यांवर मोठ्या प्रमाणात पाणी साचले. गटारे तुडुंब भरून वाहू लागल्याने पावसाचे पाणी बाजारपेठ परिसरात शिरले. यामुळे व्यापारी आणि ग्राहकांची तारांबळ उडाली.

रस्त्यांवर साचलेल्या पाण्यामुळे वाहतुकीवर मोठा परिणाम झाला असून अनेक ठिकाणी वाहतूक कोंडी निर्माण झाली. वाहनचालक आणि पादचाऱ्यांना मोठ्या अडचणींचा सामना करावा लागला.

पावसामुळे हवामानात गारवा आला असला, तरी शहरातील सखल भागांमध्ये पाणी साचल्याने नागरिकांमध्ये चिंता व्यक्त होत आहे.

The post उकाड्याने हैराण झालेल्या बेळगावकरांना ‘वळिवाचा’ दिलासा appeared first on News 24 Tass Marathi.

बेळगाव : गेल्या काही दिवसांपासून दडी मारल्यानंतर आज गुरुवारी दुपारी बेळगाव शहर परिसरात वळीव पावसाने हजेरी लावली. त्यामुळे उकाड्याने त्रस्त असलेल्या नागरिकांना दिलासा मिळाला. मात्र अचानक आलेल्या या पावसामुळे शहरातील जनजीवन पूर्णपणे विस्कळीत झाले आहे.

हवामान खात्याच्या अंदाजानुसार, गुरुवारी दुपारी बेळगाव शहर नजीकच्या परिसरात मुसळधार पाऊस कोसळला. दुपारपर्यंत अचानक काळे ढग दाटून आले आणि गडगडाटासह झालेल्या पावसामुळे शहरातील मुख्य रस्त्यांवर मोठ्या प्रमाणात पाणी साचले होते. परिणामी वाहनचालकांसह पादचाऱ्यांना ये-जा करणे अवघड झाले. उन्हाळ्याच्या उकाड्याने हैराण झालेल्या लोकांना पावसामुळे थंडावा मिळाला असला तरी, सखल भागात पाणी शिरल्याने लोकांना तेथून स्थलांतर करण्यास भाग पडले.

The post बेळगाव शहर परिसरात वळीव पावसाचा शिडकावा appeared first on News 24 Tass Marathi.

बेळगाव / प्रतिनिधी

बेळगाव शहरातील गांधीनगर, लक्ष्मी गल्ली क्रॉस येथे राहणारे प्रकाश संपगावी यांच्या कुटुंबाला वादळाचा मोठा फटका बसला आहे. सोसाट्याचा वारा आणि पावसामुळे त्यांच्या घराचे आणि गोठ्याचे छप्पर पूर्णपणे उडून गेले आहे. गेल्यावेळी आगीमुळे नुकसान सहन केलेल्या या कुटुंबावर आता जणू जखमेवर मीठ चोळल्याप्रमाणे नैसर्गिक संकट ओढवले आहे.

प्रकाश संपगावी यांच्या घरात पाच जण राहतात आणि आठ जनावरे आहेत. दुग्धव्यवसाय हाच त्यांच्या उपजीविकेचा एकमेव स्रोत आहे. पावसाच्या सुरुवातीस गोठ्याचे छप्पर म्हशींवर पडले, मात्र स्थानिक तरुणांनी तत्काळ हस्तक्षेप करून जनावरे सुरक्षित बाहेर काढली, त्यामुळे मोठी जीवितहानी टळली. मात्र घरातील सुके गवत आणि चारा पूर्णपणे खराब झाले असून, निवारा आणि अन्नाशिवाय कुटुंब मोठ्या संकटात सापडले आहे.

घराचे मालक, प्रकाश संपगावी, वृद्ध असून काम करण्यास असमर्थ आहेत. “मुले काही काम करत नाहीत, आम्ही म्हातारे झालो आहोत. गुढीपाडवा साजरा करण्याऐवजी आम्ही रस्त्यावर आलो आहोत,” अशी खंत त्यांनी व्यक्त केली. घरातील पाच सदस्यांसह आठ गुरे असून, गोठा आणि घराचे छप्परही उडून गेले. वाळलेले गवत पावसामुळे खराब झाले, त्यामुळे दुग्धव्यवसायावर अवलंबून असलेले हे कुटुंब आता गंभीर संकटात आहे.

पीडितांनी मागणी केली आहे की स्थानिक आमदार आणि जिल्हा प्रशासन या गरीब कुटुंबासाठी तातडीने धाव घ्यावी, योग्य नुकसान भरपाई द्यावी आणि त्यांच्या जीवन व उपजीविकेची योग्य सोय करावी.

The post बेळगाव गांधीनगरमध्ये वृद्ध जोडपे रस्त्यावर appeared first on News 24 Tass Marathi.

बेळगाव / प्रतिनिधी

बेळगाव शहरासह परिसरात गेल्या दोन दिवसांपासून वळीव पावसाने जोरदार हजेरी लावत वातावरणात लक्षणीय बदल घडवून आणला आहे. विजांच्या कडकडाटासह सोसाट्याच्या वाऱ्यामुळे उकाड्याने हैराण झालेल्या नागरिकांना मोठा दिलासा मिळाला असून शहरात सुखद गारवा निर्माण झाला आहे. काही ठिकाणी गारपीठ झाली असून पावसाचा जोर अनेक भागांत जाणवला.

दरम्यान, गुढीपाडवा आणि लग्नसराईच्या पार्श्वभूमीवर बाजारपेठेत खरेदीसाठी मोठी गर्दी असतानाच दुपारच्या सुमारास अचानक कोसळलेल्या मुसळधार पावसामुळे ग्राहक आणि व्यापाऱ्यांची चांगलीच तारांबळ उडाली. पावसासोबत पडलेल्या गारांमुळे रस्त्यांवर पांढऱ्या थरांचे दृश्य पाहायला मिळाले. या अनोख्या दृश्याचा आनंद घेण्यासाठी लहान मुलांनी मोठ्या उत्साहात गारा वेचत गर्दी केली.

या वळीव पावसामुळे खरीप हंगामाच्या पूर्वतयारीला चालना मिळणार असल्याने शेतकरी वर्ग समाधान व्यक्त करत आहे. जमिनीच्या मशागतीसाठी हा पाऊस उपयुक्त ठरणार असल्याचे मत व्यक्त होत आहे. मात्र, गारपिटीमुळे आंबा आणि इतर फळबागांचे संभाव्य नुकसान लक्षात घेता बागायतदारांमध्ये चिंतेचे वातावरण आहे. सकाळी उन्हाळी कडक वातावरणानंतर दुपारी अचानक बदललेल्या हवामानामुळे काही काळ जनजीवन विस्कळीत झाले असले तरी एकूणच बेळगावकरांनी या पावसाचे स्वागतच केले आहे.

The post बेळगावात वळीव पावसाचा जोरदार तडाखा appeared first on News 24 Tass Marathi.

बेळगाव / प्रतिनिधी

बेळगाव शहर व परिसरात सलग दुसऱ्या दिवशी वळीव पावसाने जोरदार हजेरी लावली. रविवारी दिवसभर कडक उन्हामुळे हैराण झालेल्या नागरिकांना संध्याकाळी झालेल्या पावसामुळे काहीसा दिलासा मिळाला. मात्र अचानक आलेल्या पावसामुळे शहरातील दैनंदिन कामकाजावर काही प्रमाणात परिणाम झाल्याचे चित्र पाहायला मिळाले.

दिवसभर उष्णतेचा तडाखा सहन केल्यानंतर संध्याकाळच्या सुमारास वातावरणात अचानक बदल झाला आणि पावसाने जोरदार सुरुवात केली. या पावसामुळे अनेक ठिकाणी नागरिकांना आडोशाला थांबावे लागले. काही भागात लोक दुकाने व इमारतींच्या आवारात उभे राहून पाऊस थांबण्याची वाट पाहताना दिसून आले.

दरम्यान, या पावसाचा परिणाम शहरातील एपीएमसी बाजारावरही झाला. अचानक सुरू झालेल्या पावसामुळे बाजारातील व्यवहार काही काळ विस्कळीत झाले. विक्रीसाठी आणलेली पिके पावसापासून वाचवण्यासाठी शेतकरी व व्यापाऱ्यांना धावपळ करावी लागली. तसेच पावसामुळे काही प्रमुख रस्त्यांवर वाहतुकीची कोंडी निर्माण झाल्याने शहरातील जनजीवन काही काळासाठी विस्कळीत झाले.

The post बेळगावात सलग दुसऱ्या दिवशी वळीव पावसाची हजेरी appeared first on News 24 Tass Marathi.

बेळगाव / प्रतिनिधी

बेळगाव तालुक्यातील विविध भागांत झालेल्या अवकाळी पावसामुळे रब्बी हंगामातील पिकांचे मोठ्या प्रमाणात नुकसान झाले असून, शेतकरी आर्थिक संकटात सापडले आहेत. तालुक्याच्या उत्तर आणि पूर्व भागातील शेतकऱ्यांना या पावसाचा सर्वाधिक फटका बसला आहे.

या परिसरात रब्बी हंगामात मोठ्या प्रमाणावर ज्वारीची लागवड केली जाते. मात्र अगसगे, हंदिगनूर, चलवेनट्टी, केदनूर, मण्णिकेरी आदी गावांमध्ये बहरात असलेले ज्वारीचे पीक अवकाळी पावसामुळे भुईसपाट झाले आहे. ऐन काढणीच्या तोंडावर पीक कोसळल्याने शेतकऱ्यांचे मोठे नुकसान झाले असून अपेक्षित उत्पादन हातचे गेले आहे.

यंदा खरीप हंगामात समाधानकारक पाऊस झाल्याने ज्वारीचे पीक चांगले उभे राहिले होते. त्यामुळे उत्पादन वाढेल आणि काही आर्थिक दिलासा मिळेल, अशी आशा शेतकऱ्यांनी बाळगली होती. मात्र अनपेक्षित पावसामुळे ही सर्व स्वप्ने उद्ध्वस्त झाली असून, शेतकऱ्यांच्या आशांवर पाणी फेरले आहे.

अवकाळी पावसामुळे झालेल्या नुकसानीचे तातडीने पंचनामे करून सरकारने मदत जाहीर करावी, अशी मागणी बाधित शेतकऱ्यांकडून होत आहे.

The post अवकाळी पावसाचा रब्बी पिकांना फटका appeared first on News 24 Tass Marathi.