आंबोली : गेल्या चार दिवसांपासून सुरू असलेल्या मुसळधार पावसामुळे आंबोलीचा मुख्य धबधबा पूर्ण क्षमतेने प्रवाहित झाला असून, घाटमार्गातील आणि परिसरातील इतर सर्व धबधबेही ओसंडून वाहू लागले आहेत. त्यामुळे आज, ४ जुलैपासून आंबोलीतील वर्षा पर्यटन हंगामाला उत्साहात सुरुवात झाली आहे.

नैसर्गिक सौंदर्य, दाट जंगल आणि समृद्ध जैवविविधतेसाठी प्रसिद्ध असलेल्या आंबोलीत यंदा ६ जून रोजी मान्सूनचे आगमन झाले होते. मात्र, ‘अल निनो’च्या प्रभावामुळे जून महिनाभर पावसाने ओढ दिल्याने धबधबे कोरडेच राहिले होते. त्यामुळे पर्यटनावर अवलंबून असलेल्या स्थानिक व्यावसायिकांमध्ये चिंतेचे वातावरण निर्माण झाले होते.

मात्र, गेल्या चार दिवसांपासून सुरू झालेल्या जोरदार पावसामुळे परिस्थितीत मोठा बदल झाला आहे. मुख्य धबधब्यासह घाटातील सर्व लहान-मोठे धबधबे आता दिमाखात कोसळत असून, संपूर्ण परिसर हिरवाईने नटला आहे.

आजपासून सुरू झालेल्या पहिल्याच सप्ताहअखेर (वीकेंड) मोठ्या संख्येने पर्यटक आंबोलीकडे आकर्षित होण्याची शक्यता व्यक्त केली जात आहे. त्यामुळे स्थानिक पर्यटन व्यवसायालाही मोठी चालना मिळणार असून, हॉटेल, निवास व्यवस्था आणि अन्य व्यावसायिकांमध्ये उत्साहाचे वातावरण आहे.

The post चार दिवसांच्या मुसळधार पावसानंतर आंबोलीचा मुख्य धबधबा पूर्ण क्षमतेने प्रवाहित appeared first on News 24 Tass Marathi.

आंबोली : आंबोली घाटातील मुख्य धबधब्याजवळ रविवारी सकाळी कड्यावरून दोन मोठे दगड कोसळल्याने काही काळ परिसरात भीतीचे वातावरण निर्माण झाले. सुदैवाने या घटनेत कोणतीही जीवितहानी झाली नसून मोठा अनर्थ टळला आहे.

मुख्य धबधब्यापासून सावंतवाडीच्या दिशेने काही अंतरावर असलेल्या सुमारे ५० मीटर उंच कड्यावरून हे दगड अचानक घरंगळत खाली आले. यापैकी एक मोठा दगड रस्त्यालगतचा संरक्षक कठडा आणि लोखंडी रेलिंग तोडत खोल दरीत कोसळला, तर दुसरा दगड रस्त्यावरच अडकून राहिला.

दगड कोसळण्याच्या वेळी त्या ठिकाणी कोणतेही वाहन किंवा पर्यटक नसल्याने संभाव्य दुर्घटना टळली. अद्याप पावसाळी पर्यटन हंगामाला पूर्णपणे सुरुवात झालेली नसल्याने आणि रविवार असूनही पर्यटकांची गर्दी कमी असल्याने मोठी हानी झाली नाही.

घटनेची माहिती मिळताच आंबोली पोलीस ठाण्याचे पोलीस हवालदार संतोष गलोली, लक्ष्मण जाडे, गौरव परब आणि सचिन चव्हाण यांनी तातडीने घटनास्थळी धाव घेतली. तसेच सावंतवाडी येथील पोलीस निरीक्षक अमोल चव्हाण यांनीही घटनास्थळी भेट देऊन परिस्थितीची पाहणी केली.

पावसाळ्याच्या पार्श्वभूमीवर घाट परिसरातील कड्यांवरून दगड कोसळण्याच्या घटना घडू शकतात. त्यामुळे पर्यटक आणि वाहनचालकांनी घाटमार्गावरून प्रवास करताना विशेष दक्षता घ्यावी, असे आवाहन प्रशासनाकडून करण्यात आले आहे.

The post आंबोली घाटात कड्यावरून दोन भलेमोठे दगड कोसळले appeared first on News 24 Tass Marathi.

शिरोडा / वार्ताहर

शिरोडा-वेळागर समुद्रात संध्याकाळी ४.४५ वाजता ८ पर्यटक बुडाले. त्यापैकी ४ जणांना वाचवण्यात आले; मात्र ३ जण मयत झाले आणि १ महिला गंभीर अवस्थेत शिरोडा ग्रामीण रुग्णालयात दाखल आहे. उर्वरित ४ पर्यटकांचा शोध स्थानिक शोध व बचाव पथक मार्फत सुरू आहे.

याबाबत मिळालेल्या माहितीनुसार, कर्नाटक राज्यातील खानापूर, लोंढा आणि अळणावर येथील आठ जण वेळागर समुद्रात पोहण्यासाठी उतरले होते. मात्र, पाण्याचा अंदाज न आल्याने ते बुडाले. दुर्घटनेची माहिती मिळताच स्थानिकांनी आणि प्रशासनाने तातडीने शोधमोहीम सुरू केली. या दुर्घटनेतील आठ जणांपैकी एका पर्यटकाला वाचवण्यात यश आले आहे.

मृत पर्यटकांमध्ये फरहान इरफान कित्तूर (वय ३४), इबाद इरफान कित्तूर (वय १३) आणि नमीरा आफताब अख्तर (वय १६) यांचा समावेश आहे. इसरा इम्रान कित्तूर (वय १७) वाचला आहे. बेपत्ता पर्यटकांमध्ये इरफान मोहम्मद इसाक कित्तूर (वय ३६), इक्वान इमरान कित्तूर (वय १५), फरहान मोहम्मद मणियार (वय २०) आणि जाकीर निसार मणियार (वय २३) यांचा समावेश आहे.

• मृत आणि जखमी पर्यटकांची माहिती पुढीलप्रमाणे :

1. फरहान इरफान कित्तूर (३४) – मयत
2. इबाद इरफान कित्तूर (१३) – मयत
3. नमीरा आफताब अख्तर (१६) – मयत
4. इसरा इम्रान कित्तूर (१७) – वाचले

• बेपत्ता पर्यटक :

1. इरफान मोहम्मद इसाक कित्तूर (३६)
2. इक्वान इमरान कित्तूर (१५)
3. फरहान मोहम्मद मणियार (२०)
4. जाकीर निसार मणियार (२३)

घटनास्थळी पोलीस, महसूल व ग्रामीण विकास विभागाच्या यंत्रणा सक्रिय असून, प्रशासनाने नागरिकांना अफवांवर विश्वास ठेवू नये, असे आवाहन केले आहे.

The post शिरोडा – वेळागर समुद्रात ८ पर्यटक बुडाले appeared first on News 24 Tass Marathi.

आंबोली / वार्ताहर

आंबोली घाटातील चाळीस फूट मोरे परिसरात दरड कोसळून रस्त्यावर आली. गुरुवारी सकाळी ८.३० वाजता ही घटना घडली. त्यामुळे या घाट मार्गावरील दोन्ही बाजूंची वाहतूक ठप्प झाली. राष्ट्रीय महामार्ग प्राधिकरण व सार्वजनिक बांधकाम विभागाच्या अधिकाऱ्यांनी घटनास्थळी दाखल होत ही दरड बाजूला केल्यानंतर दुपारपासून वाहतूक पूर्ववत सुरू झाली.

आंबोली परिसरात सलग तीन दिवस मान्सून पूर्व पाऊस कोसळत आहे. पहिल्याच पावसात घाटातील दरडी खाली आल्या. सुदैवाने यात कोणतीही हानी झाली नाही. दरड कोसळल्याने घाट मार्गात दोन्ही बाजूंनी वाहनांच्या रांगा लागल्या होत्या. महामार्ग प्राधिकरण चे अभियंता रुपेश कांबळी यांनी जेसीबीच्या साह्याने दरड बाजूला करून एका बाजूने वाहतूक पूर्ववत केली त्यानंतर जेसीबीने उर्वरित दरड हटविण्यात आली.

सलग तिसऱ्या वर्षी पावसाळ्यात एकाच ठिकाणी ही तिसरी घटना घडली आहे. दरम्यान आंबोली परिसरात गेले तीन दिवस मुसळधार पाऊस पडत आहे. या पावसामुळे घाटातील छोटे छोटे धबधबे प्रवाहित झाले आहेत. घाट माथ्यावरील ब्रिटिशकालीन संरक्षक गटारांचा मुद्दा पुन्हा ऐरणीवर आला आहे. घाट रस्ता करताना ब्रिटिशांनी घाटात दर्डी कोसळू नये यासाठी डोंगरावरच गटारी बांधली होती. मात्र माती दरड जाऊन ती भुजली आहेत त्यामुळे पाणी जाण्यास वाट नसल्याने ही परिस्थिती उद्भवत असल्याचा दावा ग्रामस्थांनी केला आहे.

The post पहिल्याच पावसात आंबोली घाटात कोसळली दरड appeared first on News 24 Tass Marathi.

स्विमर्स क्लब बेळगाव आणि अ‍ॅक्वेरियस स्विम क्लब बेळगावच्या विहान एस कोरी याने श्री दुर्गामाता कला, क्रीडा आणि संस्कृती मंडळाच्या विजयदुर्गा खुल्या सागरी जलतरण (ओपन वॉटर सी स्विमिंग) स्पर्धेतील आपल्या गटाचे विजेतेपद पटकावले आहे.

सदर स्पर्धा महाराष्ट्र राज्य हौशी जलतरण संघटनेच्या मान्यतेने जेआयएम स्विम अकादमी, रामनामाला, कोल्हापूर यांनी महाराष्ट्रातील विजयदुर्ग बीच येथे गेल्या २० एप्रिल २०२५ रोजी आयोजित केली होती. विहान एस. कोरी याने तिसऱ्या वयोगटातील २ कि.मी. सागरी जलतरण शर्यतीत प्रथम क्रमांक पटकावला. विहान हा ऑलिंपिक आकाराच्या सुविधेने सुसज्ज असलेल्या बेळगाव येथील केएलईच्या सुवर्ण जेएनएमसी जलतरण तलाव येथे प्रशिक्षक उमेश कलघाटगी, अक्षय शेरेगर, अजिंक्य मेंडके, नितीश कुडुचकर, गोवर्धन काकतकर, इम्रान उचगावकर आणि विनायक आंबेवाडीकर यांच्या देखरेखीखाली होण्याचा सराव करतो. त्याला आई-वडिलांसह डॉ. प्रभाकर कोरे (अध्यक्ष केएलई सोसायटी), जयंत हुंबरवाडी (अध्यक्ष जयभारत फाउंडेशन), रो. अविनाश पोतदार, श्रीमती मानेक कपाडिया, श्रीमती लता कित्तूर, सुधीर कुसाणे, प्रसाद तेंडोलकर आणि इतरांचे प्रोत्साहन लाभत आहे.

The post खुल्या सागरी जलतरण स्पर्धेत विहान कोरी याची विजेतेपदाला गवसणी appeared first on News 24 Tass Marathi.

मालवण तालुक्यातील अनधिकृत वाळू उपसा, वाळू वाहतूक करणाऱ्या विरोधात महसूल विभागाने कारवाईचा बडगा उगारला आहे. दरम्यान रस्त्यावरच डंपर मधील वाळू ओतून पळ काढण्याचा प्रयत्न काहींनी केला आहे. तहसीलदार वर्षा झालटे यांनी अनधिकृत वाळू वाहतूक करणाऱ्या विरोधात मोहीम हाती घेतली आहे.

अनधिकृत वाळू वाहतूक डंपर विरोधात ऍक्शन मोडवर आलेल्या मालवणच्या तहसीलदार वर्षा झालटे यांनी धडक कारवाई केली. मालवण कोळंब रेवतळे सागरी महामार्गांवर सायंकाळी एकूण सात डंपर ताब्यात घेण्यात आले तर दोन डंपर रस्त्यावरच वाळू ओतून पळून गेले.

मालवण च्या तहसीलदार वर्षा झालटे यांच्या नेतृत्वाखालील महसूल व पोलीस पथकाने ही कारवाई केली. विना पास वाळू वाहतूक करणारे सहा डंपर ताब्यात घेऊन पुढील कारवाईसाठी मालवण तहसील कार्यालयात नेण्यात आले. तर करवाईच्या भीतीने पळून जाण्याचा प्रयत्न करणारा गोवा पासिंगचा एक डंपर सागरी महामार्गांवर रस्त्याच्या कडेला कलंडला होता. तोही ताब्यात घेण्यात आला आहे. तसेच दोन डंपर चालकांनी महामार्गांवर वाळू ओतली व ते पळून गेले. अशी माहिती तहसीलदार वर्षा झालटे यांनी दिली.

खाडीपात्रात वाळू उपसा टेंडर दिली असतानाही अनधिकृत पणे विनापरवाना वाळू वाहतूक करणारे हे सर्व डंपर असल्याचे तपासणीत स्पष्ट झाले आहे. पुढील कारवाई सुरु आहे. अशी माहितीही तहसीलदार यांनी दिली.

The post मालवण येथे अनधिकृत वाळू वाहतूक करणाऱ्या विरोधात धडक मोहीम appeared first on News 24 Tass Marathi.