दक्षिण काशी म्हणून प्रसिद्ध असलेल्या श्री कपिलेश्वर मंदिराच्या मागील बाजूस असलेल्या तलावात पोहण्यासाठी गेलेल्या दोन मुलांचा दुर्घटनेत मृत्यू झाल्याने शहरभर हळहळ व्यक्त होत आहे. या घटनेनंतर आयुक्त कार्तिक एम. , नगरसेवक राजू भातकांडे तसेच अभियंत्यांच्या पथकाने तलाव परिसराची पाहणी केली. यावेळी तलावाच्या भिंतींची स्थिती आणि संभाव्य धोका याबाबत तपासणी करण्यात आली.

पाहणीनंतर आयुक्तांनी सांगितले की, तलावाची जागा खासगी मालकीची असून अलीकडील पावसामुळे आणखी एका बाजूची भिंत धोकादायक स्थितीत आली आहे. त्यामुळे परिसरातील नागरिकांनी खबरदारीचा उपाय म्हणून सुरक्षित स्थळी स्थलांतर करावे, अशा सूचना देण्यात आल्या आहेत. महसूल विभाग आणि अभियंत्यांनी संयुक्त सर्वेक्षण पूर्ण केले असून पुढील दुर्घटना टाळण्यासाठी आवश्यक उपाययोजना राबविण्यात येत आहेत.

नगरसेवक राजू भातकांडे यांनी सांगितले की, तलाव मालकांसोबत बैठक घेऊन सार्वजनिक सुरक्षेला प्राधान्य देण्याबाबत सूचना करण्यात आल्या आहेत. भविष्यात तलावाचे पुनरुज्जीवन आणि विकासकामे हाती घेऊन अशा घटना पुन्हा घडू नयेत यासाठी प्रयत्न केले जातील. तसेच परिसरात संरक्षक भिंत उभारण्याचे काम लवकरच सुरू होणार असल्याची माहिती त्यांनी दिली.

या दुर्घटनेमुळे शहरातील खासगी आणि सार्वजनिक जलस्रोतांच्या सुरक्षेचा मुद्दा पुन्हा ऐरणीवर आला आहे. मनपा प्रशासनाने धोकादायक ठिकाणांची पाहणी करण्याचे आदेश दिले असून पावसाळ्यापूर्वी जुन्या विहिरी आणि असुरक्षित वास्तूंचे सर्वेक्षण करण्यात येणार आहे. सध्या तलाव परिसरात बॅरिकेड्स उभारून नागरिकांचा प्रवेश बंद करण्यात आला आहे.

The post मनपा आयुक्तांकडून कपिलेश्वर तलाव परिसराची पाहणी appeared first on News 24 Tass Marathi.

बेळगाव : कपिलेश्वर मंदिरालगत असलेल्या कपिलनाथ विहिरीजवळ वारंवार घडणाऱ्या दुर्घटनांची गंभीर दखल घेत पोलीस प्रशासनाने या परिसरात सर्वसामान्यांच्या प्रवेशावर बंदी घातली आहे. ३ मे रोजी विहिरीच्या संरक्षक भिंतीचा भाग कोसळून दोन मुलांचा मृत्यू झाल्यानंतर प्रशासनाने ही कठोर कारवाई केली आहे.

अतिरिक्त जिल्हा दंडाधिकारी तथा पोलीस आयुक्त भूषण बोरसे यांनी भारतीय नागरिक सुरक्षा संहिता (BNSS) २०२३ च्या कलम १६३ अंतर्गत मनाई आदेश जारी केले आहेत. हा आदेश ८ मे २०२६ पासून लागू झाला असून पुढील आदेश येईपर्यंत कायम राहणार आहे.

कपिलनाथ विहीर ही शेकडो वर्षे जुनी असून तिच्या संरक्षक भिंती अत्यंत जीर्ण झाल्या आहेत. परिसरात पुरेशा सुरक्षाव्यवस्थेचा अभाव असल्याने येथे गंभीर धोका निर्माण झाला आहे. तरीदेखील अनेक नागरिक आणि मुले पोहण्यासाठी व विरंगुळ्यासाठी या ठिकाणी येत असल्याचे समोर आले आहे.

खडेबाजार पोलीस ठाण्याच्या नोंदीनुसार, २०१३ ते २०२६ या कालावधीत या विहिरीत पडून १६ जणांचा मृत्यू झाला असून किमान १४ दुर्घटनांची नोंद झाली आहे.

या पार्श्वभूमीवर कपिलनाथ विहिरीचा परिसर ‘प्रतिबंधित क्षेत्र’ म्हणून घोषित करण्यात आला आहे. मंदिर व्यवस्थापनाशी संबंधित अधिकृत कर्मचारी वगळता इतर सर्व नागरिकांना परिसरात प्रवेश करण्यास मनाई करण्यात आली आहे. तसेच पोहणे, जलक्रीडा किंवा इतर मनोरंजनात्मक उपक्रमांवरही बंदी घालण्यात आली आहे.

या आदेशाचे उल्लंघन करणाऱ्यांवर भारतीय न्याय संहिता (BNS) २०२३ च्या कलम २२३ अंतर्गत कायदेशीर कारवाई करण्यात येणार असल्याचे प्रशासनाने स्पष्ट केले आहे.

दरम्यान, कपिलेश्वर मंदिरातील धार्मिक विधींना या आदेशातून सूट देण्यात आली असून नागरिकांना सतर्क करण्यासाठी परिसरात धोक्याचे सूचना फलक तातडीने लावण्याचे निर्देश खडेबाजार पोलिसांना देण्यात आले आहेत.

The post कपिलेश्वर तलाव परिसरात प्रवेश बंदी appeared first on News 24 Tass Marathi.