बेळगाव : “आपल्याकडे जे काही आहे ते सद्गुरूंमुळे आहे, ही जाणीव ठेवून सद्गुरूंनी दिलेले ज्ञान आचरणात आणले पाहिजे. कोणत्याही पदाची, पैशाची, कौतुकाची किंवा मानाची अपेक्षा न ठेवता निरपेक्ष भावनेने काम करणारा खरा कार्यकर्ता असतो,” असे प्रतिपादन जीवनविद्या मिशनचे युवा मार्गदर्शक प्रल्हाद वामनराव पै यांनी केले.

जीवनविद्या मिशन, ज्ञानसाधना केंद्र बेळगावच्या वतीने गुरुपौर्णिमा महोत्सव २०२६ ‘कृतज्ञता दिन’ म्हणून मराठा मंदिर सभागृहात उत्साहात साजरा करण्यात आला. यावेळी प्रमुख वक्ते म्हणून प्रल्हाद वामनराव पै उपस्थित होते.

‘कृतज्ञता हीच खरी उपासना’ या विषयावर मार्गदर्शन करताना प्रल्हाद पै म्हणाले की, जीवन कृतज्ञतेच्या अधिष्ठानावर आधारित असले पाहिजे. मनात सातत्याने कृतज्ञतेची भावना ठेवली पाहिजे. “कृतज्ञता मनात, भरभराट जीवनात” हा यशस्वी जीवनाचा मूलमंत्र असल्याचे त्यांनी सांगितले.

पैसा, संपत्ती आणि प्रतिष्ठा मिळाल्यानंतर माणसामध्ये अहंकार वाढण्याची शक्यता असते. हा अहंकारच पुढे माणसाच्या नाशाला कारणीभूत ठरतो. त्यामुळे सद्गुरूंनी दिलेले ज्ञान आणि शहाणपण आत्मसात करून जीवनात आनंद वाटावा, आनंद घ्यावा आणि आनंदी राहावे, असे आवाहन त्यांनी केले.

गुरुपौर्णिमा महोत्सव तीन दिवस विविध उपक्रमांनी साजरा होत आहे. रविवारी सकाळी हरिपाठाने कार्यक्रमाची सुरुवात झाली. त्यानंतर ‘संगीत जीवन विद्या’ कार्यक्रम, तसेच बाल संस्कार केंद्राच्या वतीने नृत्य व गीतांचे सादरीकरण झाले. सद्गुरूंच्या प्रतिमेचे गुरुपूजन ११ जोडप्यांच्या हस्ते करण्यात आले. जीवनविद्या मिशनच्या परंपरेनुसार मानसपूजनही करण्यात आले.

जीवनविद्या मिशनच्या बेळगाव शाखेला सहकार्य करणाऱ्या मान्यवरांचा प्रल्हाद पै यांच्या हस्ते सन्मान करण्यात आला. अवयवदान आणि रक्तदान शिबिरांच्या माध्यमातून केएलईच्या प्रभाकर कोरे रुग्णालयाला जीवनविद्या मिशनकडून सहकार्य केले जाते. याबद्दल प्रीती दोडवाड आणि डॉ. माधव प्रभू यांच्या वतीने प्रल्हाद पै यांचा सत्कार करण्यात आला. अवयवदानासाठी केलेल्या आवाहनाला प्रतिसाद देत सुमारे ३५० नागरिकांनी अर्ज भरले.

• शेकडो साधकांना अनुग्रह

प्रल्हाद पै यांच्या हस्ते शेकडो साधकांना अनुग्रह देण्यात आला. यावेळी त्यांनी चांगल्या संगतीचे महत्त्व सांगत शरीराची काळजी घेण्यासाठी योग्य आहार आणि सकारात्मक विचार आवश्यक असल्याचे मार्गदर्शन केले.

बेळगाव आणि परिसरात जीवनविद्या मिशनची २८ उपकेंद्रे असून, गुरुपौर्णिमा महोत्सवाला सुमारे चार हजार साधक उपस्थित होते. दिवसभर सद्गुरूंनी दिलेली विश्वप्रार्थना तसेच ‘प्रत्येक कृती ही राष्ट्रहिताची, विश्वशांतीची’ ही प्रार्थना सामूहिकरीत्या म्हणण्यात आली.

कार्यक्रम यशस्वी करण्यासाठी प्रवचनकार शंकरराव बांदकर, बेळगाव शाखेचे अध्यक्ष शैलेश शिरोडकर, सचिव सतीश बेकवाडकर, खजिनदार दीपक बिरजे, सल्लागार प्रभाकर देसाई, अंतर्गत हिशेब तपासणीस तानाजी पाटील, मुंबईचे पालक ट्रस्टी विलास परब आदींनी परिश्रम घेतले. सूत्रसंचालन मधुरा शिरोडकर आणि प्रशांत बिरजे यांनी केले.

दरम्यान, सोमवारी मराठा मंडळ पॉलिटेक्निक येथे विद्यार्थ्यांसाठी मार्गदर्शनपर व्याख्यानाचे आयोजन करण्यात आले आहे.

The post ‘कृतज्ञता’ हीच खरी ‘उपासना’ appeared first on News 24 Tass Marathi.

रविवार, ९ ऑगस्ट रोजी सकाळी ८ ते दुपारी १.३० या वेळेत बेळगावातील रेल्वे उड्डाणपुलाजवळील मराठा मंदिर हॉल येथे गुरुपौर्णिमा महोत्सव व कृतज्ञता दिनाचा मुख्य कार्यक्रम होणार आहे. या सोहळ्यात सद्गुरू श्री वामनराव पै यांचे सुपुत्र आणि युवा मार्गदर्शक प्रल्हाद वामनराव पै हे प्रमुख प्रबोधक म्हणून उपस्थित राहणार आहेत.

यावेळी शंकरराव बांदेकर यांनी सांगितले की, बेळगावात जीवनविद्या मिशन गेल्या चार दशकांपासून सामाजिक, शैक्षणिक आणि संस्कारवर्धक उपक्रमांद्वारे कार्यरत आहे. सद्गुरूंप्रती कृतज्ञता व्यक्त करण्यासाठी आणि त्यांच्या विचारांचा प्रसार करण्याच्या उद्देशाने या महोत्सवाचे आयोजन करण्यात आले आहे.

त्यानंतर सोमवार, १० ऑगस्ट रोजी मराठा मंडळ पॉलिटेक्निक कॉलेजच्या छत्रपती शिवाजी महाराज स्टेडियम येथे दोन हजारांहून अधिक विद्यार्थी आणि युवकांसाठी विशेष प्रेरणादायी मार्गदर्शन कार्यक्रम आयोजित करण्यात आला आहे.

सद्गुरू वामनराव पै यांनी दिलेला “तूच आहेस तुझ्या जीवनाचा शिल्पकार” आणि “जगातील सर्व लोक सुखी होवोत” हा जीवनदृष्टीचा संदेश समाजापर्यंत पोहोचविण्याच्या उद्देशाने हे कार्यक्रम आयोजित करण्यात आले असून, बेळगावातील नागरिक, विद्यार्थी आणि युवकांनी मोठ्या संख्येने सहभागी व्हावे, असे आवाहन करण्यात आले.

पत्रकार परिषदेला जीवनविद्या मिशनचे अध्यक्ष शैलेश शिरोडकर, सचिव सतीश बेकवाडकर आणि खजिनदार दीपक बिरजे उपस्थित होते.

The post जीवनविद्या मिशनतर्फे ९ ऑगस्टला गुरुपौर्णिमा व कृतज्ञता दिन सोहळा appeared first on News 24 Tass Marathi.

सदगुरु श्री वामनराव पै यांच्या १०३ व्या जयंती निमित्त ‘प्रत्येक कृती ही राष्ट्रहिताची, विश्वशांतीची’ या घोषवाक्याखाली विविध सामाजिक,शैक्षणिक उपक्रमांचे आयोजन करण्यात येत असते. ‘राष्ट्र हाच देव’ अशी शिकवण देणारी जीवनविद्या आपल्या राष्ट्राप्रती नागरिकांच्या मनात आदर,प्रेम,कर्तव्य भावना निर्माण करते व राष्ट्र हेच सर्वतोपरी असून राष्ट्राची प्रगती व त्याचे रक्षण हाच भारतातील प्रत्येक नागरिकाचा राष्ट्रधर्म असला पाहिजे हे ठासून सांगते.म्हणून हे तत्वज्ञान घराघरात गेलं पाहिजे यासाठी या विश्वप्रार्थना रॅलीचे आयोजन करण्यात आले आहे.

या विश्वप्रार्थना रॅलीचे विविध प्रमुख मान्यवरांच्या हस्ते उदघाटन होऊन विविध सामाजिक संदेश देणारे चित्ररथ हे या रॅलीचे आकर्षण असणार आहे.जीवनविद्या मिशनची अनेक उपकेंद्रे यात विविध जीवंत देखावे सादर करणार आहेत.

समस्त बेळगाव व परिसरातील नागरिकांनी या विश्वप्रार्थना रॅलीमध्ये सहभागी होऊन राष्ट्राप्रति कृतज्ञता व्यक्त करावी असे आवाहन जीवनविद्या मिशन बेळगाव शाखेच्या वतीने करण्यात आले आहे.

The post जीवनविद्या मिशनच्या वतीने उद्या विश्वप्रार्थना रॅलीचे आयोजन appeared first on News 24 Tass Marathi.