खानापूर : कणकुंबी सीमाभागात उत्पादन शुल्क विभागाने केलेल्या धडक कारवाईत गोवा बनावटीची अवैध दारू वाहतूक करणारी कार पकडून लाखो रुपयांचा मुद्देमाल जप्त केला आहे. या कारवाईमुळे अवैध दारू तस्करी करणाऱ्यांमध्ये खळबळ उडाली आहे.

उत्पादन शुल्क अधिकाऱ्यांना मिळालेल्या गुप्त माहितीनुसार कणकुंबी चेकपोस्टवर वाहन तपासणी मोहीम राबवण्यात आली. यावेळी संशयावरून थांबविण्यात आलेल्या मारुती सुझुकी रिट्झ कारची तपासणी केली असता मोठ्या प्रमाणात गोवा बनावटीची दारू आढळून आली.कारमधून सुमारे ५१.८४ लिटर व्हिस्की व रम तसेच ३६ लिटर बिअर जप्त करण्यात आली. ही दारू केवळ गोवा राज्यात विक्रीसाठी अधिकृत असल्याचे अधिकाऱ्यांनी सांगितले.

या प्रकरणी बेळगाव तालुक्यातील हलगा गावचा रहिवासी प्रसाद शंकर पुनाजी याला अटक करण्यात आली आहे. पोलिसांनी वाहनासह दारू असा एकूण ३ लाख ७३ हजार ४४० रुपयांचा मुद्देमाल जप्त केला आहे.

कर्नाटक अबकारी कायद्यांतर्गत उत्पादन गुन्हा दाखल करण्यात आला असून संबंधित वाहन मालकाचा शोध सुरू असल्याची माहिती अधिकाऱ्यांनी दिली.

The post कणकुंबी तपासणी नाक्यावर गोवा बनावटीची दारू जप्त appeared first on News 24 Tass Marathi.

बेळगाव : शहरातील कॅम्प आणि खडेबाजार पोलीस ठाण्यांच्या हद्दीत पोलिसांनी अवैध दारू व मावा विक्रीवर धडक कारवाई करत दोघा आरोपींना अटक केली आहे.

कॅम्प परिसरात पीएसआय रुक्मिणी ए. आणि त्यांच्या पथकाने असदखान दर्ग्याजवळ छापा टाकून गणेशपुर येथील पप्पू राजाराम कुदळे याला अटक केली. त्याच्याकडून सुमारे १० लिटर अवैध दारू व रोख रक्कम जप्त करण्यात आली.

दरम्यान, खडेबाजार पोलीस ठाण्याचे पीएसआय आनंद अडगोंडा यांच्या पथकाने रेल्वे स्टेशन क्रॉसजवळ कारवाई करत कोनवाळ गल्लीतील पांडू मंजप्पा पुजारी याला ताब्यात घेतले. त्याच्याकडून माव्याची २० पाकिटे जप्त करण्यात आली.

या दोन्ही प्रकरणांमध्ये स्वतंत्र गुन्हे दाखल करण्यात आले असून पुढील तपास सुरू आहे. पोलिसांच्या या कारवाईचे पोलीस आयुक्त व उपायुक्तांनी कौतुक केले आहे.

The post बेळगावात अवैध दारू – मावा विक्रीवर पोलिसांची धडक कारवाई appeared first on News 24 Tass Marathi.

बेळगाव / प्रतिनिधी

सीमावर्ती जिल्हा असलेल्या बेळगावात पोलिसांनी मोठी आणि धक्कादायक कारवाई केली आहे. गोव्याहून महाराष्ट्रातील निवडणुकीसाठी नेली जात असलेली तब्बल ४० लाख रुपये किमतीची अवैध दारू माळमारुती पोलिसांनी थरारक पाठलागानंतर जप्त केली.

महाराष्ट्रातील आगामी स्थानिक स्वराज्य संस्थांच्या निवडणुकीच्या पार्श्वभूमीवर मतदारांना वाटप करण्यासाठी मोठ्या प्रमाणावर अवैध दारूची तस्करी सुरू असल्याची माहिती पोलिसांना मिळाली होती. त्यानुसार आज पहाटे माळमारुती पोलीस ठाण्याच्या हद्दीत गुप्त माहितीच्या आधारे सापळा रचण्यात आला. KA-27-C-5419 क्रमांकाचा कँटर अडवून झडती घेतली असता, सुरुवातीला वाहनात जुन्या प्लास्टिकच्या बाटल्या व काचेच्या भंगाराने भरलेल्या गोण्या दिसून आल्या.

मात्र संशय बळावल्याने पोलिसांनी सखोल तपासणी केली असता, त्या गोण्यांच्या खाली अत्यंत चतुराईने लपवलेला दारूच्या बॉक्सचा मोठा साठा आढळून आला. या कारवाईत ८०० हून अधिक दारूचे बॉक्स जप्त करण्यात आले असून, वाहनासह एकूण मुद्देमालाची किंमत सुमारे ४० लाख रुपये असल्याचे पोलिसांकडून सांगण्यात आले.

डीसीपी बरमनी, एसीपी संतोष सत्यनायक आणि सीपीआय बी. आर. गडेकर यांच्या मार्गदर्शनाखाली ही कारवाई करण्यात आली. अटक करण्यात आलेल्या चालकाच्या चौकशीत ही दारू महाराष्ट्रातील जिल्हा परिषद व तालुका पंचायत निवडणुकांच्या प्रचारासाठी नेली जात असल्याचे उघड झाले आहे. या तस्करीमागील मुख्य सूत्रधारांचा शोध घेण्यासाठी पोलिसांनी तपास अधिक तीव्र केला आहे.

The post बेळगावात ४० लाखांचा अवैध दारूसाठा जप्त appeared first on News 24 Tass Marathi.