ही मिरवणूक मेन रोड – संभाजी गल्ली – राजदीप कार्यालय पासून सुरू होऊन गणपती मंदिर येथे सांगता करण्यात आली. मिरवणुकीत कुद्रेमानी, वडगाव, येळ्ळूर, पिरणवाडी, सांबरा, बामणवाडी, धामणे, खानापूर, नंदगड, आणि मजगाव सेवा केंद्र यांचे भक्तगण विशेष रूपात देखावे सादर करत सहभागी झाले.

यावेळी संप्रदायाच्या वतीने देहदान, अवयव दान आणि इतर सामाजिक सेवा यांचा संदेशही मिरवणुकीतून दिला गेला. शेकडो संप्रदायिक भक्त उपस्थित होते. कोणत्याही गोंधळाशिवाय मिरवणूक यशस्वीरीत्या पार पडली. यासाठी संप्रदायातील संग्राम सैनिक आणि पोलीस प्रशासनाने योग्य ती खबरदारी घेऊन सहकार्य केले. ही माहिती रोहित पाटील यांनी दिली.

The post गुढीपाडव्या निमित्त भव्य शोभायात्रेतून सेवाभावाचा संदेश appeared first on News 24 Tass Marathi.

वर्षभरातील अत्यंत शुभ अशा साडेतीन मुहूर्तापैकी एक शुभ मुहूर्त असणाऱ्या गुढीपाडवा सणाचा प्रचंड उत्साह आहे. हिंदू नववर्षाचा शुभारंभाचा दिवस असलेल्या या सोहळ्याचे स्वागत करण्यासाठी सर्वत्र उत्साहाचे वातावरण निर्माण झाले आहे शहरभरात विविध ठिकाणी धार्मिक कार्यक्रमांच्या बरोबरीने उद्घाटन सोहळे आणि नवकार्यारंभाचे पडघम वाजत आहेत. ढोल ताशांच्या गजरात, लेझीमच्या तालावर नटूनथटून पारंपरिक वेषामध्ये नववर्षाचे स्वागत करण्यासाठी बेळगाव नगरी सज्ज झाली आहे. शहराच्या मध्यवर्ती आणि उपनगरी भागांमध्ये पाडव्याचा आनंद ओसंडून वाहत असल्याचे चित्र आहे. बेळगाव दक्षिणचे आमदार अभय पाटील यांच्या पुढाकाराने गुढीपाडव्याच्या भव्य शोभा यात्रेचे आयोजन देखील करण्यात आले आहे.

• उद्या सकाळी ६ वाजून ५४ मिनिटांनंतर उभारा गुढी

या हिंदू नववर्षाच्या सुरुवातीच्या दिनी उद्या गुरुवार दि. १९ सकाळी ६ वाजून ५४ मिनिटांनंतर गुढी उभारावी. सूर्यास्ताच्या सुमारास नमस्कार करून गुढी उतरवून ठेवावी, अशी माहिती पंचांगकर्ते मोहन दाते यांनी दिली. गुरुवारी गुढीपाडव्याचा सण उत्साहात साजरा केला जाणार असून, सणानिमित्त घरोघरी तयारीला सुरुवात झाली आहे. नवीन शके १९४८ या संवत्सराचे नाव पराभव संवत्सर असे आहे. गुढीपाडव्याच्या दिवशी आपल्या नवीन वर्षाची सुरुवात होते. या दिवशी सकाळी घरोघरी गुढी उभारून, कालगणना तोरण लावून नवीन वर्षाचे स्वागत केले जाते. आपली कालगणना हजारो वर्षे जुनी आहे. ती ग्रहांवर आधारित पंचांगाच्या माध्यमातून आपल्याला कळते. म्हणून संवत्सर आरंभाच्या दिवशी गुढीबरोबर पंचांगावरील गणपतीचे पूजन करावयास सांगितले आहे. हा उत्सव घरोघरी करावयाचा असल्यामुळे आपण स्वतंत्रपणे राहत असल्यास आपल्या घरीही पूजा करून गुढी उभी करावी, गुढीपूजनाकरिता वेगळा असा विधी नाही. गुढी उभी करणे, हे मांगल्याचे प्रतीक आहे, असे दाते यांनी सांगितले.

The post गुढीपाडव्याच्या स्वागतासाठी अवघे शहर सज्ज appeared first on News 24 Tass Marathi.

बेळगाव / प्रतिनिधी

साडेतीन मुहूतपैिकी एक असलेला गुढीपाडवा दोन दिवसांवर येऊन ठेपल्याने ग्राहकांची बेळगाव बाजारात गर्दी उसळत असून खरेदीची लगबग सुरु झाली आहे. विविध वस्तूंचे स्टॉल बाजारपेठेत लक्ष वेधून घेत आहेत.

हिंदू नववर्षाचा प्रारंभ गुढी पाडव्याच्या सणाने होतो. चैत्र शुद्ध प्रतिपदेला गुढी उभारून नवीन वर्षाचे स्वागत होते. त्यामुळे गुढीसाठी लागणाऱ्या बांबूच्या काठ्या,साखरेच्या माळा, फुलांची माळ, कलश, तोरण, मिनी गुढीसह इतर साहित्य विक्रीसाठी दाखल झाले आहे. शहरातील बुरुड गल्ली, मारुती गल्ली, गणपत गल्ली परिसरात बांबूच्या काठ्यांची विक्री केली जात आहे. यावर्षी १०० रुपयांपासून २०० रुपयांपर्यंत बांबू उपलब्ध आहेत. घरासमोर अथवा फ्लॅटमध्ये गुढी उभारता येत नाही, अशा ग्राहकांना पर्याय म्हणून आकर्षक मिनी गुढी बाजारपेठेत विक्रीसाठी दाखल झाल्या आहेत. बाजारपेठेत अगदी चार फुटांपर्यंत तयार गुढ्या उपलब्ध आहेत. याला ग्राहकवर्गाची अधिक पसंती मिळत आहे. चार फुटांपासून तयार असलेली गुढी १५० ते ३०० रुपयांपर्यंत विकली जात आहे. सजवलेल्या रेडिमेड गुढी दर्जा व आकारानुसार १५० ते ८०० रुपयांपर्यंत उपलब्ध आहेत. गुढीच्या काठीवर साखरगाठीचा हार घालण्यात येत असल्याने त्यांना अधिक महत्त्व असते. बाजारात केसरी, पांढऱ्या, पिवळ्या, लाल, हिरव्या रंगाच्या गाठ्या उपलब्ध आहेत. यंदा रंगीबेरंगी साखरमाळा २० रुपयाला एक याप्रमाणे उपलब्ध आहेत. रेडिमेड गुढी उभी करताना साडी, भरजरी ब्लाऊज पीसचा वापर करतात. साडीचा वापर करताना तिची व्यवस्थित घडी घालणे आवश्यक असते. गडबडीच्या वेळी वेळ वाचवणारी तसेच गुढीला शोभणारी डिझायनर गुढीची साडी सध्या बाजारात उपलब्ध आहे. त्यामुळे नोकरदारवर्गाची रेडिमेड गुढीला अधिक पसंती मिळत आहे.

बाजारपेठेत पांगुळ गल्ली, गणपत गल्ली, मारुती गल्ली, खडेबाजार, काकतीवेस आदी ठिकाणी गुढीपाडव्यासाठी लागणाऱ्या साहित्याच्या खरेदीसाठी सकाळ आणि सायंकाळच्या सत्रात गर्दी होत आहे.शुभ मुहूर्त असल्याने सोने इलेक्ट्रॉनिक – इलेक्ट्रिक, वस्तू वाहने, घर खरेदी केले जाते. गुढीपाडव्या दिवशी होणारी गर्दी पाहता आधीच ॲडव्हान्स बुकिंग करून त्या दिवशी फक्त घरी नेऊन पूजा करण्याची तयारी सुरू आहे. त्यामुळे ॲडव्हान्स बुकिंग साठी शोरूम्स मध्ये गर्दी होत आहे.

यावर्षी सोन्याचा दर प्रचंड वाढला असला तरी गुंतवणूक करणाऱ्यांची संख्या मात्र कमी नाही. गुढीपाडव्याला चांगला व्यवसाय व्हावा यासाठी व्यावसायिकांनी ही विविध ऑफर्स ग्राहकांना देऊ केल्या आहेत.

• वाहन खरेदीसाठी झुंबड

वाहनांच्या किमती मोठ्या प्रमाणात वाढल्या असल्या तरी खरेदीसाठी झुंबड उडाली आहे. काही शोरूम मध्ये वाहने उपलब्ध नसल्याने काही दिवस थांबण्याचा सल्ला देण्यात आला आहे. आवडता रंग आणि मॉडेल उपलब्ध होण्यासाठी महिन्याभरापूर्वीपासून बुकिंग करण्यात आले होते.

दुचाकी सह चार चाकी व कमर्शियल वाहने खरेदीकडे नागरिकांचा कल आहे. इलेक्ट्रिक वाहने खरेदी करण्यासाठी ॲडव्हान्स बुकिंग करण्यात आल्याने यावर्षी त्यांची संख्या वाढण्याची शक्यता आहे.

The post बेळगावात गुढीपाडव्यासाठी सजली बाजारपेठ appeared first on News 24 Tass Marathi.