बेळगाव / प्रतिनिधी

बेळगाव शहरातील मध्यवर्ती भागात असलेल्या लिंगराज कॉलेज जवळ बिबट्या दिसल्याची चर्चा रंगताच परिसरात काही काळ घबराट पसरली. माहिती मिळताच वनविभागाने तातडीने हालचाली सुरू करून परिसरात शोधमोहीम राबवली.

या संदर्भात विभागीय वन अधिकारी एन. ई. क्रांती यांनी पत्रकारांशी संवाद साधताना सांगितले की, जनतेच्या सुरक्षेला प्राधान्य देत कॉलेज परिसर आणि आसपासच्या झुडपांची कसून तपासणी करण्यात आली आहे. संशयास्पद ठिकाणी कर्मचारी तैनात करून परिस्थितीवर करडी नजर ठेवण्यात येत आहे.
प्राथमिक तपासणीत बिबट्या किंवा इतर कोणत्याही वन्यप्राण्याच्या उपस्थितीची ठोस चिन्हे आढळून आलेली नाहीत, असेही त्यांनी स्पष्ट केले. “कोणालाही इजा झालेली नाही. नागरिकांनी घाबरून जाऊ नये. मात्र कोणत्याही वन्यप्राण्याचे दर्शन झाल्यास तत्काळ वनविभागाशी संपर्क साधावा,” असे आवाहन त्यांनी केले. दरम्यान, वनविभागाने खबरदारीच्या उपाययोजना सुरू ठेवल्या असून, अफवांवर विश्वास न ठेवण्याचे आवाहन प्रशासनाकडून करण्यात आले आहे.

The post लिंगराज कॉलेज परिसरात बिबट्याचे दर्शन? ; वनविभाग सतर्क appeared first on News 24 Tass Marathi.

बेळगाव / प्रतिनिधी

बेळगाव तालुक्यातील बडाल अंकलगी येथील कौरी गुड्ड परिसरात मोठ्या प्रमाणात झालेल्या विनापरवाना वृक्षतोडीप्रकरणी वनविभागाच्या निष्क्रियतेविरोधात भाजप व शेतकरी संघटनांनी तीव्र संताप व्यक्त केला आहे. या पार्श्वभूमीवर शुक्रवारी वनविभागाच्या कार्यालयासमोर जोरदार निदर्शने करण्यात आली.

बडाल अंकलगी परिसरात एका खासगी कंपनीच्या सौर ऊर्जा प्रकल्पासाठी मोठ्या प्रमाणात झाडांची कत्तल करण्यात आली असून, याबाबत वनविभागाने केवळ औपचारिक चौकशी करून प्रकरणावर पडदा टाकल्याचा आरोप आंदोलकांनी केला. अद्याप संबंधित विकासकावर कोणतीही ठोस कारवाई न झाल्याने संशय अधिक बळावला आहे.

कौरी गुड्ड हा परिसर हजारो मोरांसह विविध वन्यजीवांचा अधिवास असून, येथील जैवविविधतेला मोठा धोका निर्माण झाला आहे. माणसांप्रमाणेच पशु-पक्ष्यांनाही जगण्याचा अधिकार आहे, मग हिरवागार वनक्षेत्र नष्ट करून सौर प्रकल्प उभारण्याची घाई का, असा सवाल आंदोलकांनी उपस्थित केला.

ऐतिहासिक वारसा लाभलेल्या या वनक्षेत्रातील ५० एकरपेक्षा अधिक क्षेत्रावरील झाडे तोडण्यात आल्याचे निदर्शनास आले असून, यासाठी महसूल व संबंधित विभागातील काही अधिकारी जबाबदार असल्याचा आरोपही करण्यात आला.

यावेळी भाजप नेते धनंजय जाधव यांनी दोषींवर तातडीने कठोर कारवाई न झाल्यास आंदोलन अधिक तीव्र करण्याचा स्पष्ट इशारा दिला. आंदोलनात प्रेम चौगुला, वाजीद हिरेकुडी, बसनगौडा पाटील यांच्यासह भाजपचे पदाधिकारी व शेतकरी मोठ्या संख्येने सहभागी झाले होते.

The post बडाल अंकलगीत विनापरवाना वृक्षतोड appeared first on News 24 Tass Marathi.

• दोषींवर कारवाईसाठी प्रशासनाला अल्टिमेटम

बेळगाव / प्रतिनिधी

बेळगाव तालुक्यातील बडाल अंकलगी येथे सौर प्रकल्पाच्या नावाखाली वन विभागाची परवानगी न घेता मोठ्या प्रमाणावर वृक्षतोड करण्यात आल्याचा गंभीर प्रकार उघडकीस आला आहे. श्री कौरीगुडा रेणुका देवी मंदिर परिसरातील वनक्षेत्रात झालेल्या या बेकायदेशीर वृक्षतोडीमुळे परिसरात तीव्र संताप व्यक्त होत आहे.

सौर प्रकल्पासाठी अवघ्या एक किलोमीटर अंतरावर ५५ एकर ओसाड जमीन उपलब्ध असतानाही घनदाट जंगल क्षेत्राची निवड करण्यात आल्याने संशय निर्माण झाला आहे. ग्रामस्थांच्या माहितीनुसार, या परिसरात १०,००० हून अधिक झाडे तोडण्यात आली असून त्यामध्ये चंदनासह इतर मौल्यवान वृक्षांचा समावेश आहे. ही झाडे उपटून नेण्यात आल्याने कोट्यवधी रुपयांचे नुकसान झाल्याचा आरोप करण्यात येत आहे.

हा प्रकार उघडकीस येताच भाजप बेळगाव ग्रामीण माजी मंडळ अध्यक्ष धनंजय जाधव यांनी ग्रामस्थांसह घटनास्थळी भेट देत संबंधित अधिकाऱ्यांना जाब विचारला. पर्यावरणाचा ऱ्हास करणाऱ्या कंत्राटदारांवर आणि संबंधित कंपनीवर तात्काळ गुन्हे दाखल करून अटक करण्याची मागणी त्यांनी केली.

दोषींना बुधवारपर्यंत अटक करण्यात आली नाही, तर गुरुवारी सकाळी डीएफओ कार्यालयाला घेराव घालण्यात येईल, असा इशारा धनंजय जाधव आणि ग्रामस्थांनी प्रशासनाला दिला आहे. विकासाच्या नावाखाली होणाऱ्या या विनापरवाना वृक्षतोडीविरोधात कडक कारवाई करावी, अशी जोरदार मागणी करण्यात येत आहे.

The post बडाल अंकलगीतील अवैध वृक्षतोडप्रकरणी धनंजय जाधव आक्रमक appeared first on News 24 Tass Marathi.

नऊ हत्तींच्या कळपाने निलावडे परिसरात अक्षरशः उच्छाद मांडला आहे. हातातोंडाला आलेल्या भात, कस पिकासह केळी व नारळाच्या झाडांचे आणि पाईपलाईनचे अतोनात नुकसान सुरू असून या संकटातून कसे सावरावे, याची चिंता शेतकऱ्यांना लागून आहे. मंगळवारी रात्री आंबोळी येथील विष्णू पाटील, पांडुरंग गवाळकर या शेतकऱ्यांच्या उसाच्या शेतात हत्तींनी रात्रभर मुक्काम केला. या दोन्ही शेतकऱ्यांचा एक टनही ऊस शिल्लक राहिलेला नाही. बांदेकरवाडा येथील शेतकरी नारायण दळवी यांनी मळणी करून वाहतुकीसाठी ट्रॅक्टरची सोय न झाल्याने २० पोती भात शेतातच ठेवले होते. या आयत्या खाद्यावर हत्तींनी रात्रभर ताव मारला. दळवी यांना काहीच पीक शिल्लक राहिले नाही. त्यांच्या नुकसानीची दखल घेऊन तातडीने २० हजारांचा धनादेश सुपूर्द करण्यात आला.

हत्तींचा कळप ज्या शिवारातून जात आहे तेथील पाईपलाईन उध्वस्त करत आहे. केळी आणि नारळाची झाडे तर जमीनदोस्त केली जात असून निलावडे, बांदेकरवाडा, आंबोळी, मुधवडे, कोकणवाडा, कबनाळी, कांजळे आणि मळव या भागातील शेतकरी नुकसानी बरोबरच भीतीच्या सावटाखाली जगत आहे. वनक्षेत्रपाल श्रीकांत पाटील यांच्या नेतृत्वाखाली वनविभागाचे पथक रात्रभर गस्त घालत असून हत्तींचा कळप आवरत नसल्याने सारेच हतबल झाले आहेत. भरपाईचे अर्ज ग्रा. पं. मध्ये उपलब्ध ठेवा हत्तींकडून मोठ्या प्रमाणात पिकांचे नुकसान सुरू आहे. वनखात्याकडून भरपाई मिळवण्यासाठी अर्ज करताना शेतकऱ्यांना हेलपाटे मारावे लागतात. शेतकऱ्यांचे त्रास रोखण्यासाठी निलावडे ग्रामपंचायत कार्यालयात नुकसानभरपाईचे अर्ज उपलब्ध ठेवावेत. वनविभागाने तेथे कर्मचारी नेमून आवश्यक कार्यवाही पूर्ण करावी, अशी मागणी निलावडे ग्रा. पं. सदस्य विनायक मुतगेकर यांनी केली आहे.

The post हत्तींकडून नुकसानीचे सत्र सुरूच appeared first on News 24 Tass Marathi.

खानापूर / प्रतिनिधी

खानापूर–नंदगड मार्गावरील हेब्बाळ (ता. खानापूर) परिसरात गेल्या दोन दिवसांपासून हत्तींच्या कळपाने प्रचंड उच्छाद मांडला आहे. यामुळे स्थानिक शेतकऱ्यांच्या उस पिकाचे मोठे नुकसान झाले असून ग्रामीण भागात भीतीचे वातावरण निर्माण झाले आहे.

हेब्बाळ येथील शेतकरी गोपाळ शिनाप्पा गुरव, मल्लारी गुरव आणि यल्लाप्पा गुरव यांच्या मिळून सुमारे दोन एकर ऊस पिकाची हत्तींच्या कळपाने नासधूस केली आहे. या नुकसानीबाबत तात्काळ आणि योग्य भरपाई देण्याची मागणी शेतकऱ्यांकडून जोर धरू लागली आहे.

हत्तींच्या सतत वाढलेल्या वावरामुळे ग्रामस्थ स्वतः रात्री शेतात पहारा देण्यास भाग पडत आहेत. तरीही वन खात्याकडून कोणतीही ठोस कारवाई न झाल्याने संताप व्यक्त केला जात आहे. नुकसानीचा पंचनामा होतो, पण प्रत्यक्ष भरपाई मिळत नाही किंवा मिळली तरी ती तुटपुंजी असते, अशी शेतकऱ्यांची नाराजी आहे.

गेल्या महिन्यात तालुक्यातील अनेक गावांत हत्तींच्या कळपाने भात व ऊस पिकाचे मोठे नुकसान केले असून शेतकरी पूर्णपणे हतबल झाले आहेत. सोशल मीडियावर आणि वृत्तपत्रांत या घटना सतत प्रसिद्ध होत असल्या, तरी तालुक्यातील नेते व लोकप्रतिनिधी दुर्लक्ष करत असल्याचा आरोप शेतकऱ्यांकडून केला जात आहे.

• शेतकऱ्यांचा सवाल स्पष्ट आहे :

“निवडणुकांवेळी घरोघरी फिरणारे नेते, आता आमच्या प्रश्नांकडे का बघत नाहीत? बेळगाव अधिवेशनात आमदार विठ्ठल हलगेकर आवाज उठवणार की नाही?”

हत्तींचा कळप हातातोंडाशी आलेले भात आणि ऊस पिक मोठ्या प्रमाणात फस्त करत असल्याने परिस्थिती अधिकच बिकट झाली आहे. सर्वच पक्षातील नेत्यांनी मौन धारण केल्याने शेतकऱ्यांचा रोष अधिक वाढत चालला आहे. सध्याच्या परिस्थितीत वन विभागाने तातडीने उपाययोजना करून हत्तींचा बंदोबस्त करणे आणि नुकसानग्रस्तांना त्वरित व योग्य भरपाई देणे अत्यावश्यक झाले आहे.

The post हेब्बाळ परिसरात हत्तींचा धुडगूस appeared first on News 24 Tass Marathi.

खानापूर तालुक्यातील सावरगाळी मार्गे हत्तींचा एक कळप नंदगडच्या वाडीमाळ-गवळीवाडा परिसरात दाखल झाला आहे. सुमारे चार ते सहा हत्तींच्या या कळपातील एक-दोन हत्ती समूहापासून वेगळे झाल्याची माहिती समोर आली आहे.

काही दिवसांपूर्वी हे हत्ती नावगा वनक्षेत्रात दिसले होते. आता नंदगड परिसरात दाखल झाल्याने येथील शेतकऱ्यांमध्ये चिंता वाढली आहे. विशेषतः भात पिकांच्या पेंढ्यांचे नुकसान होण्याची दाट शक्यता आहे.

हत्ती मानवी वस्तीजवळ येऊ नयेत यासाठी वन विभागाने सतर्कता वाढविली आहे. वनविभाग अधिकारी माधुरी दळवाई आणि गस्ती कर्मचारी प्रशांत शंकर तारीहाळ, गुरु कुंभार यांच्यासह अन्य कर्मचाऱ्यांनी गावकऱ्यांमध्ये जनजागृती केली. तसेच परिस्थितीवर लक्ष ठेवण्यासाठी परिसराची सतत पाहणी सुरू ठेवण्यात आली आहे.

The post नंदगड परिसरात हत्तींचा कळप दाखल appeared first on News 24 Tass Marathi.

बेळगाव / प्रतिनिधी

भूतरामहट्टी (ता. बेळगाव) येथील राणी चन्नम्मा प्राणीसंग्रहालयात एचएस बॅक्टेरियाच्या संसर्गामुळे ३१ काळवीटांचा मृत्यू झाला आहे. बनरघट्टा राष्ट्रीय उद्यानाचे विषाणूशास्त्रज्ञ डॉ. चंद्रशेखर यांनी माहिती दिली आहे तसेच इतर प्राण्यांसाठी आपत्कालीन नियम लागू केले पाहिजेत असे ही त्यांनी सांगितले आहे.
राणी चन्नम्मा प्राणीसंग्रहालयातील ३१ काळवीटांच्या मृत्यूचे कारण रक्तस्रावी सेप्टिसीमिया असल्याचे पुष्टी झाले आहे. त्यामुळे ३१ काळवीटांचा मृत्यू झाला आहे. काळवीटांच्या मृत्यूनंतर, बंगळुरूतील बनरघट्टा येथील तज्ज्ञ डॉक्टरांनी शवविच्छेदन तपासणी केली. बनरघट्टा राष्ट्रीय उद्यानाचे विषाणूशास्त्रज्ञ डॉ. चंद्रशेखर यांनी प्राणीसंग्रहालयाच्या अधिकाऱ्यांना माहिती दिली आहे.

काळवीटांचा मृत्यू एचएस बॅक्टेरियामुळे झाला आहे. काळवीटांच्या शवविच्छेदन अहवालात एचएस बॅक्टेरिया हे काळवीटांच्या मृत्यूचे कारण असल्याचे नमूद केले आहे. दुसरीकडे, तापमानात अचानक घट आणि ताण हे देखील काळवीटांच्या मृत्यूचे कारण असल्याचे नोंदवले गेले आहे.

उर्वरित काळवीटांचीही प्रकृती सुधारली आहे,आणि जिवंत राहिलेल्या सात काळवीटांवर अतिदक्षता विभागात उपचार सुरू आहेत. संसर्गजन्य रोग पसरण्याची शक्यता आधीच जास्त आहे आणि या प्राणीसंग्रहालयात वाघ, सिंह, बिबटे, तरस, अस्वल आणि विविध हरणांच्या प्रजाती आहेत.त्यामुळे आपत्कालीन प्रोटोकॉल लागू करण्याचा सल्ला देणाऱ्या तज्ज्ञ डॉक्टरांनी सल्ला दिला आहे.

The post भूतरामहट्टी प्राणी संग्रहालयातील ३१ काळविटांचा एचएस बॅक्टेरिया संसर्गाने मृत्यू appeared first on News 24 Tass Marathi.

बेळगाव / प्रतिनिधी

बेळगाव जिल्हा पालकमंत्री व सार्वजनिक बांधकाम मंत्री सतीश जारकीहोळी यांनी मंगळवारी राणी चन्नम्मा प्राणीसंग्रहालयाला अचानक भेट देत प्राणीसंग्रहालयातील परिस्थितीचा सविस्तर आढावा घेतला. अलीकडेच मोठ्या संख्येने काळविटांचे मृत्यू झाल्यानंतर नागरिकांमध्ये निर्माण झालेल्या चिंतेच्या पार्श्वभूमीवर ही पाहणी करण्यात आली.

यावेळी मंत्र्यांनी प्राणीसंग्रहालयातील आरएफओ, पशुवैद्यकीय अधिकारी आणि संबंधित कर्मचाऱ्यांसोबत बैठक घेऊन काळवीटांच्या मृत्यूकडे नेणाऱ्या कारणांचा आढावा घेतला.

अधिकाऱ्यांनी दिलेल्या माहितीनुसार , काळविटांचा मृत्यू विशिष्ट संसर्गजन्य आजारामुळे झाला असण्याची शक्यता प्रयोगशाळा अहवालातून स्पष्ट झाली आहे. हा आजार इतर प्राण्यांपर्यंत पसरण्याची अत्यल्प शक्यता असल्याचे तज्ज्ञांकडून सांगण्यात आले. बेंगळुरू येथून बोलावण्यात आलेल्या विशेष तज्ज्ञ पथकाने संसर्ग झालेल्या काळविटांवर उपचार करण्यासोबत प्राणीसंग्रहालयातील संपूर्ण परिसराची तपासणी केली आहे.

मंत्र्यांनी अधिकाऱ्यांना प्राण्यांची देखभाल, स्वच्छता, रोगप्रतिबंधक उपाय, पाण्याची गुणवत्ता आणि खाद्य व्यवस्थापन या सर्व बाबींवर काटेकोर लक्ष ठेवण्याचे स्पष्ट निर्देश दिले. उर्वरित प्राणी विशेषतः वाघ, सिंह व इतर वन्यप्राणी पूर्णपणे सुरक्षित राहतील यासाठी सतत वैद्यकीय निरीक्षण ठेवण्याचे आदेशही देण्यात आले.

प्राणीसंग्रहालयातील पशुवैद्यकीय विभागाने सांगितले की संसर्गजन्य आजारावर नियंत्रण मिळवण्यासाठी तातडीने औषधोपचार सुरू केले आहेत. सर्व पिंजरे, परिसर व खाद्यपदार्थ निर्जंतुक करण्यात येत आहेत. परिस्थिती नियंत्रणाच्या टप्प्यात आली असून उर्वरित प्राणी स्थिर स्थितीत आहेत. मंत्री जारकीहोळी यांनी मृत काळविटांबाबत सखोल चौकशी करून आवश्यक ती सुधारणा करण्याचे आश्वासन दिले.

या पाहणीदरम्यान एसीपी नागराज बळेहोसुर, कर्नाटक प्राणीसंग्रहालय प्राधिकरणाचे सदस्य सचिव सुनील पनवार, मंजुनाथ चव्हाण, डीपीओ क्रांती एन. ई., डॉ. प्रयाग यांसह प्राणीसंग्रहालयाचे अधिकारी व कर्मचारी उपस्थित होते.

The post पालकमंत्री सतीश जारकीहोळी यांची राणी चन्नम्मा प्राणीसंग्रहालयाला भेट appeared first on News 24 Tass Marathi.

बेळगाव / प्रतिनिधी

राणी चन्नम्मा लघु प्राणिसंग्रहालयात तब्बल ३१ काळविटांचा संशयास्पद मृत्यू झाल्याने उद्भवलेल्या गंभीर परिस्थितीची तातडीने दखल घेत सार्वजनिक बांधकाम मंत्री तथा पालकमंत्री सतीश जारकीहोळी यांनी वनविभागाच्या अधिकाऱ्यांना सखोल चौकशीचे स्पष्ट निर्देश दिले आहेत. या मृत्यूंच्या मागचे नेमके कारण शोधण्यासाठी कठोर तपास आवश्यक असल्याचे त्यांनी स्पष्ट केले.

कुवेंपुनगर येथे प्राणीसंग्रहालय विकास प्राधिकरणाचे अध्यक्ष रंगस्वामी यांच्या अध्यक्षतेखाली आयोजित बैठकीत मंत्री जारकीहोळी यांनी या प्रकरणाबाबत विस्तृत चर्चा केली. बैठकीदरम्यान त्यांनी वन विभागाच्या डीएफओ आणि आरएफओ यांच्याकडून काळविटांच्या मृत्यूशी संबंधित सर्व अहवाल आणि प्राथमिक निष्कर्षांची माहिती मागवली.

मंत्री जारकीहोळी म्हणाले, “३१ काळविटांचा मृत्यू होणे ही अत्यंत वेदनादायक घटना आहे. या गूढ मृत्यूंच्या कारणांचा शोध घेण्यासाठी सखोल, पारदर्शक आणि तातडीने तपासणी करण्यात यावी.” प्राथमिक तपासणीनुसार, मृत्यू संसर्गजन्य आजारामुळे झाल्याची शक्यता व्यक्त होत असली तरी, त्यामागे मानवी निष्काळजीपणा अथवा गैरव्यवस्थापनासंबंधी काही आरोप देखील समोर येत आहेत. या सर्व मुद्द्यांची चौकशी अत्यंत गांभीर्याने केली जाईल, असे त्यांनी स्पष्ट केले.

मंत्री जारकीहोळी यांनी पुढे सांगितले “काळविटांच्या मृत्यूला जबाबदार ठरणाऱ्या कोणत्याही अधिकाऱ्यावर किंवा कर्मचाऱ्यावर कठोर कारवाई करण्यात येईल. तसेच प्राणीसंग्रहालयातील उर्वरित काळविटांचे आरोग्य सुरक्षित ठेवण्यासाठी आवश्यक ते सर्व प्रतिबंधात्मक उपाय तात्काळ करण्यात यावेत.”

या बैठकीत प्राणीसंग्रहालयाच्या व्यवस्थापनातील त्रुटी, प्राण्यांच्या देखरेखीची पद्धत, औषधोपचार, तसेच स्वच्छतेच्या बाबींचाही आढावा घेण्यात आला. भविष्यात अशा प्रकारच्या घटना टाळण्यासाठी स्वतंत्र निरीक्षण समिती गठित करण्याबाबतही चर्चा झाली.

बैठकीच्या वेळी प्राणीसंग्रहालय विकास प्राधिकरणाचे अध्यक्ष रंगस्वामी, वन विभागाचे डीएफओ, आरएफओ आणि इतर अधिकारी उपस्थित होते.

The post काळविटांच्या मृत्यू प्रकरणी चौकशी सखोल चौकशी करा appeared first on News 24 Tass Marathi.

खानापूर – लोंढा राष्ट्रीय महामार्गावर तिओलीवाडा क्रॉस परिसरात रविवारी सायंकाळी साडेपाचच्या सुमारास रस्ता ओलांडण्याचा प्रयत्न करीत असताना अज्ञात वाहनाने दिलेल्या जोरदार धडकेत एक हरण जागीच ठार झाले.

स्थानिकांनी दिलेल्या माहितीनुसार, हरण अचानक रस्त्यावर धावत आले असता वेगात येणाऱ्या वाहनाला त्याला चुकवता आले नाही. ही धडक इतकी जोराची होती की हरणाचा तत्काळ मृत्यू झाला. घटनेची माहिती मिळताच वन विभागाचे अधिकारी तातडीने घटनास्थळी दाखल झाले. गुंजी विभागाचे सहायक वनपाल राजू पवार यांनी तातडीने घटनास्थळी दाखल होत शहानिशा केली आणि प्राथमिक तपास करून वरिष्ठांना अहवाल सादर केला. त्यानंतर उपवनसंरक्षक सुनिता निंबरगी, तसेच लोंढा वनविभागाचे वनक्षेत्रपाल वाय.पी.तेज यांनी पंचनामा करून सर्व कायदेशीर प्रक्रिया पूर्ण केली. कायदेशीर कारवाईनंतर वन विभागाच्या देखरेखीखाली मृत हरणावर अंत्यसंस्काराची प्रक्रिया करण्यात आली. या अपघातामुळे वन्यजीवांच्या सुरक्षेबाबत पुन्हा एकदा प्रश्नचिन्ह निर्माण झाले आहे.

राष्ट्रीय महामार्गावर प्राण्यांच्या सुरक्षिततेसाठी अनेक ठिकाणी भुयारी मार्ग (अंडरपास) उपलब्ध करून देण्यात आले आहेत. मात्र तरीही अनेक प्राणी महामार्गावर येत असल्याने अशा अपघातांची संख्या वाढत असल्याची वन विभागाची चिंता वाढत आहे. वनविभागाने वाहनचालकांना विशेष आवाहन केले आहे की जंगल परिसरातून जाणाऱ्या महामार्गाच्या पट्ट्यात वाहनांचा वेग नियंत्रित ठेवावा, सावधगिरीने वाहन चालवावे आणि रस्ता ओलांडणाऱ्या प्राण्यांची शक्यता लक्षात घेऊन अतिरिक्त दक्षता घ्यावी.

The post खानापूर – लोंढा राष्ट्रीय महामार्गावर अज्ञात वाहनाच्या धडकेत हरण ठार appeared first on News 24 Tass Marathi.