येळ्ळूर : येळ्ळूर रस्त्यावरील केएलई रुग्णालयाजवळ मोठ्या प्रमाणात कचरा टाकून त्याचे वर्गीकरण केले जात असल्याने परिसरात दुर्गंधी आणि भटक्या कुत्र्यांचा उपद्रव वाढला आहे. या कचऱ्यामुळे वाहनचालक, शेतकरी तसेच रुग्णालयात येणाऱ्या नागरिकांना त्रास सहन करावा लागत असून, कचरा टाकण्याचे व वर्गीकरणाचे काम तातडीने बंद करावे, अशी मागणी समाज सारथी संघटनेच्या वतीने करण्यात आली.

यासंदर्भात संघटनेच्या पदाधिकाऱ्यांनी सोमवारी (दि. २४) महापालिका आयुक्त कार्तिक एम. यांची भेट घेऊन निवेदन दिले. येळ्ळूर रस्त्याच्या कडेला मोठ्या प्रमाणात कचरा साचल्याने वाहतुकीस अडथळा निर्माण होत आहे. परिसरात शेती असल्याने शेतकरी या मार्गावरून ये-जा करतात. कचऱ्यामुळे भटक्या कुत्र्यांची संख्या वाढली असून, ही कुत्री अचानक दुचाकीस्वार व नागरिकांच्या अंगावर धावून जात असल्याने अपघाताचा धोका निर्माण झाला आहे.मुख्य रस्त्यालगतच कचऱ्याचे वर्गीकरण केले जात असल्याने दुर्गंधीचा त्रास होत आहे. परिसरात केएलई रुग्णालय असल्याने रुग्ण, त्यांचे नातेवाईक तसेच रुग्णालयातील कर्मचाऱ्यांनाही याचा त्रास सहन करावा लागत आहे. त्यामुळे नागरिकांच्या आरोग्याच्या दृष्टीनेही या ठिकाणी कचरा टाकणे तातडीने बंद करून परिसराची स्वच्छता करावी, अशी मागणी निवेदनातून करण्यात आली.

आयुक्त कार्तिक एम. यांनी निवेदन स्वीकारून येळ्ळूर रस्त्यालगत कचरा टाकण्याचे काम तातडीने बंद करण्याचे आश्वासन दिले. तसेच संबंधित अधिकारी हणमंत कलादगी यांना समस्या सोडविण्याच्या सूचना केल्या. उपमहापौर हणमंत कोंगाली यांनाही यावेळी निवेदन देण्यात आले.

यावेळी समाज सारथी संघटनेचे अध्यक्ष प्रा. सी. एम. गोरल, सचिव बी. एन. मजुकर, गोविंद काळसेकर, शिवाजी सायनेकर, अनिल हुंदरे, डॉ. तानाजी पावले, सतीश पाटील, दत्ता उघाडे, प्रकाश पाटील, सूरज गोरल, हणमंत पाटील, गंगाधर पाटील, बाळकृष्ण पाटील, यल्लुप्पा पाटील, आनंद कुंडेकर, रमेश मोनापा धामणेकर, कृष्णा बिजगरकर, रमेश धामणेकर, आदी उपस्थित होते.

The post येळ्ळूर रस्त्यावरील कचरा तातडीने हटवा appeared first on News 24 Tass Marathi.

रेल्वे स्टेशन, डेक्कन हॉस्पिटल आणि बसवेश्वर रेल्वे ओव्हरपासच्या हद्दीत असलेला हा रस्ता एल अँटीच्या कामामुळे तसेच पावसाच्या पाण्यामुळे पूर्णपणे खराब झाला आहे. खड्ड्यांमुळे नागरिकांना जीव मुठीत धरून प्रवास करावा लागत असून, या समस्येकडे तातडीने लक्ष देण्याची मागणी करण्यात आली आहे.

यापूर्वी महापालिका आयुक्त आणि जिल्हाधिकाऱ्यांकडेही रस्त्याच्या दुरुस्तीसाठी निवेदन देण्यात आले होते. जिल्हाधिकाऱ्यांनी प्रत्यक्ष पाहणी करून संबंधित अधिकाऱ्यांना कडक सूचना दिल्या होत्या. मात्र, त्यानंतरही रस्त्याच्या दुरुस्तीबाबत ठोस कार्यवाही झालेली नसल्याचे नागरिकांचे म्हणणे आहे.

दरवर्षी या रस्त्याची केवळ तात्पुरती डागडुजी केली जाते. त्यामुळे काही दिवसांतच रस्त्याची पुन्हा दुरवस्था होते. याचा सर्वाधिक त्रास ज्येष्ठ नागरिक, विद्यार्थी तसेच रुग्णवाहिकांना होत आहे. रस्त्यावर पावसाचे पाणी साचत असल्याने वाहतुकीची समस्याही निर्माण होत आहे.

आगामी गणेश विसर्जनाच्या पार्श्वभूमीवर रामतीर्थ तलावाकडे जाणाऱ्या वाहनांसाठी हा मार्ग महत्त्वाचा ठरणार आहे. त्यामुळे गणेशोत्सवापूर्वी खासदारांनी संबंधित ठिकाणी तातडीने पाहणी करून रस्त्याचे कायमस्वरूपी डांबरीकरण करावे तसेच दोन्ही बाजूंना नाल्यांचे बांधकाम करावे, अशी मागणी नागरिकांनी केली आहे.

The post गुड्स शेड रोडच्या कायमस्वरूपी दुरुस्तीसाठी खासदार जगदीश शेट्टर यांना निवेदन appeared first on News 24 Tass Marathi.

येळळूर : नागरिकांच्या दैनंदिन जीवनाशी निगडित विविध समस्या सोडविण्यासाठी समाज सारथी संघ सक्रिय झाला आहे. व्यक्तीच्या मृत्यूनंतर नोंदणी करताना येणाऱ्या अडचणी, शिवाजी रोडवरील खाली आलेल्या विद्युत तारांमुळे निर्माण झालेला धोका तसेच येळ्ळूर रस्त्यावर केएलई रुग्णालयालगत टाकण्यात येणाऱ्या कचऱ्यामुळे निर्माण झालेली दुर्गंधी, या प्रश्नांवर संघाच्या बैठकीत सविस्तर चर्चा करण्यात आली. संबंधित प्रशासकीय अधिकाऱ्यांना निवेदने देऊन या समस्या तातडीने सोडविण्याची मागणी करण्याचा निर्णय बैठकीत घेण्यात आला. अध्यक्षस्थानी प्रा. सी. एम. गोरल होते.

येळ्ळूर रस्त्यावर केएलई रुग्णालयाच्या बाजूला मोठ्या प्रमाणात कचरा टाकला जातो. याच ठिकाणी कचऱ्याचे वर्गीकरण केले जात असल्याने परिसरात दुर्गंधी पसरत असून, रुग्णालयात येणाऱ्या नागरिकांसह परिसरातील रहिवाशांना त्रास सहन करावा लागत आहे. हा प्रश्न संबंधित विभागाच्या निदर्शनास आणून देऊन कायमस्वरूपी उपाययोजना करण्याची मागणी करण्याचे बैठकीत ठरले. तसेच शिवाजी रोडवरील विद्युत तारा खाली आल्याने त्यांची उंची वाढविण्यासाठी संबंधित विभागाकडे पाठपुरावा करण्याचे निश्चित करण्यात आले.

प्रारंभी निवृत्त शिक्षक अनिल हुंदरे यांनी उपस्थितांचे स्वागत केले. संघाला नोंदणीकृत प्रमाणपत्र मिळाल्याची माहिती त्यांनी दिली. शिवाजी सायनेकर यांनी संघाचे पुढील कामकाज कोणत्या पद्धतीने करायचे, याबाबत चर्चा करून नियोजन करण्याची सूचना केली.डॉ. तानाजी पावले यांनी एखाद्या व्यक्तीचा मृत्यू झाल्यानंतर त्याची नोंद करताना नागरिकांना येणाऱ्या अडचणींची माहिती दिली. या समस्येवर तातडीने निर्णय घेऊन नागरिकांना दिलासा देणे आवश्यक असल्याचे त्यांनी सांगितले. प्रकाश अष्टेकर यांनी संघाच्या आगामी कार्यक्रमांचे नियोजन करण्याबाबत मौलिक सूचना केल्या.

संघाचे सचिव बी. एन. मजुकर यांनी संघाला नोंदणीकृत प्रमाणपत्र मिळाल्याची माहिती दिली. अध्यक्ष प्रा. सी. एम. गोरल यांनी प्रमाणपत्र मिळविण्यासाठी सहकार्य करणाऱ्या सर्वांचे आभार मानले. यापुढे नोंदणीकृत संघाच्या माध्यमातून विविध सामाजिक प्रश्न सोडविण्यासाठी कार्य करण्याचा मानस त्यांनी व्यक्त केला.दुद्दाप्पा बागेवाडी यांनी संघाचे काम पक्षभेद बाजूला ठेवून एकजुटीने आणि स्वतंत्रपणे करण्याचे आवाहन केले. संघटनेत कोणतेही राजकारण न करता केवळ समाजहिताची कामे केली जातील, असे त्यांनी स्पष्ट केले.

बैठकीला निवृत्त शिक्षक गोविंद मासेकर, रमेश धामणेकर, सूरज गोरल, रमेश मोनाप्पा धामणेकर, प्रकाश पाटील, संजय गोरल, संजय मजुकर, अभियंते हणमंत कुगजी, यल्लुप्पा पाटील, राजू पावले, हणमंत पाटील, गंगाधर पाटील आदी उपस्थित होते.

Unlock with Yoast SEO Premium

The post समाज हिताच्या प्रश्नासाठी समाज सारथी संघ राहणार अग्रेसर appeared first on News 24 Tass Marathi.

बेळगाव : शहरातील बसवेश्वर रेल्वे उड्डाणपुलालगत आणि डेक्कन हॉस्पिटलसमोरील न्यू गुड्स शेड रस्त्याची अवस्था दिवसेंदिवस अधिकच बिकट होत असून, या मार्गावरील मोठमोठ्या खड्ड्यांमुळे नागरिकांना जीव मुठीत धरून प्रवास करावा लागत आहे. पावसामुळे खड्ड्यांत पाणी साचत असल्याने अपघातांचा धोका वाढला असून, महापालिका प्रशासनाने तातडीने कायमस्वरूपी उपाययोजना कराव्यात, अशी मागणी परिसरातील नागरिकांकडून होत आहे.

न्यू गुड्स शेड मार्ग हा शहरातील महत्त्वाचा दळणवळणाचा रस्ता असून, दररोज हजारो नागरिक, शालेय विद्यार्थी, रुग्ण, ज्येष्ठ नागरिक तसेच रुग्णवाहिका आणि शालेय वाहने या मार्गाचा वापर करतात. मात्र, एल अँड टी कंपनीच्या कामानंतर रस्त्याची झालेली दुरवस्था अद्यापही कायम असून, अनेक ठिकाणी मोठमोठे खड्डे पडले आहेत.

पावसामुळे या खड्ड्यांमध्ये पाणी साचत असल्याने वाहनचालकांना खड्ड्यांचा अंदाज येत नाही. रस्त्याच्या कडेला चिखल साचल्यामुळे पादचारी आणि दुचाकीस्वारांची मोठी गैरसोय होत आहे. यापूर्वी उन्हाळ्यात धुळीचा त्रास सहन करणाऱ्या नागरिकांना आता पावसाळ्यात चिखल आणि पाण्याच्या समस्येला सामोरे जावे लागत आहे.

रस्त्याच्या दुरुस्तीसाठी स्थानिक नागरिकांनी अनेकवेळा महापालिका प्रशासनाकडे निवेदने दिली आहेत. अलीकडेच समाजसेवक गणेश दड्डीकर आणि परिसरातील नागरिकांनी निवेदन सादर केल्यानंतर महापालिका आयुक्तांच्या निर्देशानुसार १५ जून रोजी विभाग अधिकारी शिल्पा जयराम यांनी प्रत्यक्ष स्थळाची पाहणी केली होती. त्या वेळी रस्त्याची दयनीय अवस्था लक्षात घेऊन तातडीने दुरुस्तीचे आश्वासनही देण्यात आले होते.

मात्र, पाहणी होऊन अनेक दिवस उलटल्यानंतरही प्रत्यक्ष कामाला सुरुवात झालेली नसल्याने नागरिकांमध्ये तीव्र नाराजी व्यक्त होत आहे. केवळ पाहणी आणि आश्वासनांपुरते प्रशासनाचे काम मर्यादित न ठेवता या प्रश्नाकडे गंभीरतेने पाहून रस्त्याची कायमस्वरूपी दुरुस्ती करावी, तसेच पावसाच्या पाण्याचा योग्य निचरा होण्यासाठी दोन्ही बाजूंना पक्क्या गटारी उभाराव्यात, अशी ठाम मागणी स्थानिक नागरिकांनी केली आहे.

The post न्यू गुड्स शेड रोडवर खड्ड्यांचे साम्राज्य appeared first on News 24 Tass Marathi.

बेळगाव : शहरातील प्रमुख व्यापारी केंद्र असलेल्या पांगुळ गल्ली आणि गणपत गल्ली परिसरात मुसळधार पावसानंतर पाण्याचा निचरा न झाल्याने संपूर्ण बाजारपेठ जलमय झाली. विविध विकासकामांसाठी करण्यात आलेल्या खोदाईनंतर योग्य निचरा व्यवस्था न केल्याने पावसाचे पाणी थेट रस्ते, दुकाने आणि व्यापारी आस्थापनांमध्ये शिरले असून, व्यापाऱ्यांचे मोठ्या प्रमाणात आर्थिक नुकसान झाले आहे. या प्रकारामुळे महापालिकेच्या नियोजनशून्य कारभाराविरोधात व्यापारी आणि नागरिकांनी तीव्र नाराजी व्यक्त केली आहे.

पांगुळ गल्ली ही शहरातील सर्वाधिक वर्दळीच्या बाजारपेठांपैकी एक मानली जाते. मात्र, पावसाच्या प्रत्येक सरीत येथे पाणी साचण्याची समस्या गंभीर बनत आहे. यावेळीही निचऱ्याचे मार्ग बंद झाल्याने पावसाचे पाणी दुकानांमध्ये घुसले. त्यामुळे व्यापाऱ्यांचा माल भिजून नुकसान झाले, तर रस्त्यावरील विक्रेते आणि फेरीवाल्यांची मोठी गैरसोय झाली.

रस्त्यावर मोठ्या प्रमाणात पाणी साचल्याने वाहतुकीवरही परिणाम झाला असून, पादचाऱ्यांना पाण्यातून वाट काढत प्रवास करावा लागला. पावसाच्या पाण्यासोबत तुंबलेल्या गटारातील पाणीही रस्त्यावर आल्याने परिसरात दुर्गंधी पसरली असून, खरेदीसाठी आलेल्या नागरिकांनाही मोठा मनस्ताप सहन करावा लागत आहे.

मुख्य बाजारपेठ असूनही या कायमस्वरूपी समस्येकडे महापालिका प्रशासनाचे दुर्लक्ष होत असल्याचा आरोप व्यापाऱ्यांनी केला आहे. विकासकामांच्या नावाखाली करण्यात आलेल्या खोदाईचे योग्य नियोजन आणि जलनिस्सारणाची व्यवस्था न केल्यामुळे ही परिस्थिती निर्माण झाल्याचे त्यांनी सांगितले.

दरम्यान, आरपीडी सर्कल परिसरातही प्रत्येक पावसाळ्यात गटाराचे पाणी रस्त्यावर येण्याची समस्या कायम असल्याचे नागरिकांनी निदर्शनास आणून दिले. लोकप्रतिनिधींकडून वारंवार आश्वासने दिली जात असली तरी कायमस्वरूपी उपाययोजना होत नसल्याने नागरिक आणि व्यापाऱ्यांमध्ये तीव्र नाराजीचे वातावरण आहे.

The post पांगुळ गल्लीत पावसाच्या पाण्याने मुख्य बाजारपेठ जलमय appeared first on News 24 Tass Marathi.

बेळगाव : शहरातील खडे बाजार परिसरातील मोनप्पा पान शॉपसमोरील उघडा खड्डा आणि त्यामध्ये असलेल्या उघड्या विद्युत तारांमुळे नागरिकांच्या सुरक्षिततेचा प्रश्न ऐरणीवर आला आहे. याच ठिकाणी एका महिलेला विजेचा धक्का बसल्याची घटना घडल्याने स्थानिकांमध्ये संतापाची लाट उसळली आहे.

स्थानिकांच्या माहितीनुसार, संबंधित ठिकाणी सुरू असलेल्या कामाच्या जबाबदारीवरून हेस्कॉम आणि एल अँड टी यांच्यात परस्पर दोषारोप सुरू आहेत. हेस्कॉमकडून कामाची जबाबदारी एलअँडटी कडे असल्याचे सांगितले जात असून, दुसरीकडे एल अँड टीकडूनही जबाबदारी झटकली जात असल्याचा आरोप नागरिकांनी केला आहे.

दरम्यान, संबंधित विभागांमध्ये जबाबदारीवरून सुरू असलेल्या वादामुळे उघडा खड्डा आणि उघड्या विद्युत तारा अद्यापही सुरक्षित करण्यात आलेल्या नाहीत. त्यामुळे पादचारी, दुचाकीस्वार, व्यापारी तसेच परिसरातील नागरिकांच्या जीविताला गंभीर धोका निर्माण झाला असल्याची भावना व्यक्त होत आहे.

या ठिकाणी तातडीने संरक्षणात्मक उपाययोजना करून उघड्या विद्युत तारा सुरक्षित कराव्यात, खड्डा बंद करावा आणि संबंधित विभागांची जबाबदारी निश्चित करून अशा प्रकारच्या निष्काळजीपणावर कारवाई करावी, अशी मागणी स्थानिक नागरिकांकडून करण्यात येत आहे.

The post खडे बाजारातील उघडा खड्डा ठरतोय धोकादायक appeared first on News 24 Tass Marathi.

बेळगाव : शहरातील चव्हाट गल्ली परिसरात पिण्याच्या पाण्याची पाईपलाईन गेल्या आठ दिवसांपासून नादुरुस्त असल्याने नागरिकांना तीव्र पाणीटंचाईचा सामना करावा लागत आहे. प्रशासन आणि संबंधित कंत्राटदारांकडून होत असलेल्या दिरंगाईमुळे संतप्त झालेल्या रहिवाशांनी तातडीने नियमित पाणीपुरवठा सुरू न झाल्यास जिल्हाधिकारी कार्यालयासमोर तीव्र आंदोलन छेडण्याचा इशारा दिला आहे.

स्थानिकांच्या म्हणण्यानुसार, राकसकोप जलाशयात पुरेसा पाणीसाठा उपलब्ध असतानाही परिसरात नियमित पाणीपुरवठा होत नाही. महापालिकेकडून टँकरद्वारे पाणी पुरवले जात असले तरी वृद्ध, महिला आणि नोकरीसाठी बाहेर जाणाऱ्या कुटुंबीयांसाठी ही व्यवस्था अपुरी आणि गैरसोयीची ठरत असल्याची तक्रार नागरिकांनी केली आहे.

स्थानिक महिलांनी प्रशासनाने केवळ आश्वासने न देता तातडीने पाईपलाईनची दुरुस्ती करून नियमित पाणीपुरवठा सुरू करावा, अशी मागणी केली आहे. अन्यथा येत्या काही दिवसांत तीव्र आंदोलन करण्यात येईल, असा इशाराही त्यांनी दिला.

दरम्यान, स्थानिक नागरिकांनी सहाय्यक कार्यकारी अभियंता, कार्यकारी अभियंता तसेच महापालिकेच्या अधिकाऱ्यांकडे वारंवार तक्रारी करूनही कोणतीही ठोस कारवाई झालेली नसल्याचा आरोप केला आहे. महापालिकेचा कंत्राटदारांवर प्रभावी नियंत्रण नसल्यामुळे काम रखडले असून, खासगी कंपनी आणि केयूडब्ल्यूएस संस्थेकडून एकमेकांवर जबाबदारी ढकलली जात असल्याने परिस्थिती अधिकच बिकट झाली आहे, असे नागरिकांचे म्हणणे आहे.

पाणीपुरवठा मंडळाने दोन दिवसांपूर्वीच पाईपलाईन दुरुस्तीचे आदेश दिल्याचे सांगितले जात असले, तरी संबंधित कंत्राटदारांनी अद्याप काम सुरू केले नसल्याचा आरोपही करण्यात आला आहे.

कंत्राटदारांची जबाबदारी निश्चित करणारी प्रभावी अट करारामध्ये नसल्याने त्यांच्यावर कोणताही अंकुश राहिलेला नाही. यामुळे नागरिकांच्या तक्रारींकडे दुर्लक्ष होत असून संबंधित यंत्रणांमध्ये समन्वयाचा अभाव स्पष्टपणे दिसून येत आहे, अशी नाराजी स्थानिकांनी व्यक्त केली.

उद्यापर्यंत पाईपलाईनची दुरुस्ती करून नियमित पाणीपुरवठा सुरू न झाल्यास पुढील दोन दिवसांत जिल्हाधिकारी कार्यालयावर मोठा मोर्चा काढून तीव्र आंदोलन करण्यात येईल, असा इशारा नागरिकांनी प्रशासनाला दिला आहे.

The post चव्हाट गल्लीत आठ दिवसांपासून पाणीटंचाई ; नागरिकांचा संताप अनावर appeared first on News 24 Tass Marathi.

बाळेकुंद्री : बेळगाव शहरापासून अवघ्या १० किलोमीटरवर आणि सांबरा विमानतळालगत असलेल्या बाळेकुंद्री खुर्द गावात गेल्या दहा वर्षांपासून विकासकामे रखडल्याचा आरोप ग्रामस्थांनी केला आहे. मूलभूत सुविधांचा अभाव, सांडपाण्याची समस्या आणि खराब रस्त्यांमुळे नागरिकांचे जनजीवन त्रस्त झाले असून ग्रामपंचायत प्रशासनाविरोधात तीव्र नाराजी व्यक्त केली जात आहे.

फुलबाग गल्ली, कसाई गल्ली, टिपू सुलतान गल्ली, मुल्ला गल्लीसह गावातील अनेक भागांमध्ये सांडपाण्याच्या निचऱ्याची व्यवस्था नसल्याने घरातील सांडपाणी थेट रस्त्यावरून वाहत आहे. त्यामुळे रस्त्यांवर चिखल साचून दुर्गंधी पसरली असून डासांचा प्रादुर्भाव वाढल्याने संसर्गजन्य रोगांचा धोका निर्माण झाला आहे.

विशेषतः मशिदीकडे जाणाऱ्या रस्त्यावरून दूषित पाणी वाहत असल्याने नमाजासाठी जाणाऱ्या नागरिकांना मोठा त्रास सहन करावा लागत आहे. दूषित पाणी अंगावर उडत असल्याने धार्मिक कार्यातही अडथळे निर्माण होत असल्याची खंत स्थानिकांनी व्यक्त केली.

गेल्या दशकभरात या समस्यांकडे ग्रामपंचायत प्रशासनाने दुर्लक्ष केल्याचा आरोप करत ग्रामस्थांनी संताप व्यक्त केला आहे. संबंधित अधिकारी व लोकप्रतिनिधींनी तातडीने रस्ते आणि सांडपाणी निचऱ्याची समस्या सोडवावी, अन्यथा येत्या काही दिवसांत तीव्र आंदोलन छेडण्यात येईल, असा इशारा ग्रामस्थांनी दिला आहे.

The post बाळेकुंद्री खुर्द विकासापासून वंचित appeared first on News 24 Tass Marathi.

बेळगाव : शहरातील चव्हाट गल्लीत गेल्या अनेक महिन्यांपासून सुरू असलेल्या दूषित पाणीपुरवठ्यामुळे नागरिकांच्या आरोग्याचा प्रश्न गंभीर बनला आहे. वारंवार तक्रारी करूनही प्रशासनाने ठोस उपाययोजना न केल्याचा आरोप करत, येत्या शुक्रवारपर्यंत समस्या निकाली काढावी, अन्यथा जिल्हाधिकारी कार्यालयासमोर तीव्र आंदोलन छेडण्यात येईल, असा इशारा स्थानिक रहिवाशांनी दिला आहे.

स्थानिकांच्या म्हणण्यानुसार, गेल्या सहा महिन्यांपासून परिसरातील मुख्य गटार वाहिनी फुटल्याने सांडपाणी पिण्याच्या पाणीपुरवठा वाहिनीत मिसळत आहे. त्यामुळे विष्ठामिश्रित दूषित पाणी नळांद्वारे घरांपर्यंत पोहोचत असून, नागरिकांना आरोग्याचा गंभीर धोका निर्माण झाला आहे. विशेषतः लहान मुले आणि ज्येष्ठ नागरिक आजारी पडत असून, अनेकांना उपचारासाठी रुग्णालयात दाखल करावे लागत असल्याचा दावा रहिवाशांनी केला.

यापूर्वी महानगरपालिकेकडून नियमित व स्वच्छ पाणीपुरवठा होत होता. मात्र, पाणीपुरवठ्याची जबाबदारी खासगी कंपनीकडे गेल्यानंतर ही समस्या निर्माण झाल्याचा आरोप नागरिकांनी केला आहे. दूषित पाण्याचे व्हिडिओ पुरावे तसेच लेखी तक्रारी संबंधित अधिकारी आणि लोकप्रतिनिधींना देऊनही अद्याप कोणतीही प्रभावी कारवाई झालेली नसल्याने नागरिकांमध्ये संतापाचे वातावरण आहे.

दरम्यान, परिसरातील भूमिगत गटार (यूजीडी) प्रकल्पाचे कामही रखडले असून, त्यामागे भ्रष्टाचार आणि कमिशनखोरी असल्याचा गंभीर आरोप स्थानिकांनी केला आहे. या कामासाठीचा निधी चार महिन्यांपूर्वी मंजूर झाला असतानाही अधिकारी आणि कंत्राटदार एकमेकांवर जबाबदारी ढकलत असल्याने कामाला गती मिळत नसल्याचे त्यांनी सांगितले. सध्या महिन्यातून केवळ दोन ते तीन वेळाच पाणीपुरवठा केला जात असून तेही दूषित असल्याने नागरिकांना मोठा त्रास सहन करावा लागत आहे.

नागरिकांच्या तीव्र संतापाची दखल घेत जिल्हाधिकाऱ्यांच्या अध्यक्षतेखाली शुक्रवारी सकाळी ११ वाजता विशेष बैठक आयोजित करण्यात आली आहे. या बैठकीत कायमस्वरूपी तोडगा न निघाल्यास महिला आणि नागरिक जिल्हाधिकारी कार्यालयासमोर आंदोलन छेडतील, असा इशारा स्थानिकांनी दिला आहे.

The post चव्हाट गल्लीतील दूषित पाणीपुरवठ्याचा प्रश्न शुक्रवारपर्यंत सोडवा appeared first on News 24 Tass Marathi.

बेळगाव : तालुक्यातील मुतगा गावातील विविध वसाहतींमधील मूलभूत सुविधांच्या समस्यांबाबत नागरिकांनी जिल्हाधिकाऱ्यांकडे निवेदन सादर करून तातडीने उपाययोजना करण्याची मागणी केली आहे. अनेक वर्षांपासून रस्ते, सांडपाणी व्यवस्थापन आणि कचरा विल्हेवाटीचे प्रश्न प्रलंबित असल्याचा आरोप करत, १५ दिवसांत तोडगा न निघाल्यास आंदोलन तीव्र करण्याचा इशारा ग्रामस्थांनी दिला आहे.

श्रीराम कॉलनी, साईनगर, गोकुळनगर आणि विनायक नगर परिसरातील नागरिकांनी बुधवारी एकत्र येत आपल्या मागण्यांकडे प्रशासनाचे लक्ष वेधले. या भागांतील अनेक रस्त्यांची अवस्था अत्यंत खराब झाली असून ठिकठिकाणी मोठे खड्डे पडल्याने वाहनचालक, पादचारी, विद्यार्थी आणि ज्येष्ठ नागरिकांना मोठ्या अडचणींचा सामना करावा लागत असल्याचे निवेदनात नमूद करण्यात आले आहे.

तसेच, प्रभावी गटार व्यवस्थेअभावी पावसाळ्यात सांडपाणी रस्त्यावर आणि घरांसमोर साचत असल्याने आरोग्यविषयक समस्या निर्माण होण्याची भीती व्यक्त करण्यात आली. कचरा संकलन आणि विल्हेवाटीची व्यवस्था नियमित नसल्याने काही भागांत कचऱ्याचे ढिग साचत असून दुर्गंधी आणि अस्वच्छतेची समस्या वाढत असल्याचेही नागरिकांनी सांगितले.

ग्रामस्थांच्या म्हणण्यानुसार, या प्रश्नांबाबत ग्रामपंचायत आणि संबंधित विभागांकडे वारंवार पाठपुरावा करण्यात आला; मात्र अपेक्षित सुधारणा झालेली नाही. कर भरूनही मूलभूत सुविधा उपलब्ध होत नसल्याने नागरिकांमध्ये नाराजीचे वातावरण आहे.

निवेदनाद्वारे प्रशासनाने विशेष निधी उपलब्ध करून रस्त्यांची दुरुस्ती, गटार व्यवस्थेची उभारणी आणि नियमित कचरा व्यवस्थापनासाठी तातडीने कार्यवाही करावी, अशी मागणी करण्यात आली. अन्यथा पुढील १५ दिवसांत प्रश्न न सुटल्यास जिल्हा प्रशासन आणि संबंधित यंत्रणांविरोधात काळे झेंडे दाखवून आंदोलन छेडण्यात येईल, असा इशारा ग्रामस्थांनी दिला.

यावेळी ग्रामपंचायत सदस्य रवी कोटबागी, आकाश शेट्टी, शिवू पाटील, विनोद कुलकर्णी, मडिवळप्पा कलबावी, शांतीनाथ बलीगार, सी. बी. यारगंबळीमठ, धनपाल ओकळी यांच्यासह अनेक नागरिक उपस्थित होते.

The post मुतगा गावातील रस्ते, गटार आणि कचरा व्यवस्थेचा प्रश्न ऐरणीवर appeared first on News 24 Tass Marathi.