चेन्नईतील जवाहरलाल नेहरू स्टेडियममध्ये पार पडलेल्या शपथविधी सोहळ्यात राज्यपाल ए. आर. व्ही. अर्लेकर यांनी विजय यांच्यासह नऊ सदस्यीय मंत्रिमंडळाला पद आणि गोपनीयतेची शपथ दिली. नव्या मंत्रिमंडळात अनुभवी आणि युवा नेतृत्वाचा समतोल साधण्यात आल्याचे दिसून आले. विशेष म्हणजे, मागील सरकारच्या परंपरेपेक्षा वेगळा मार्ग स्वीकारत मुख्यमंत्री विजय आणि मंत्र्यांनी देवाच्या नावाने शपथ घेतली. या सोहळ्याला काँग्रेस नेते राहुल गांधी तसेच अभिनेत्री त्रिशा कृष्णन यांच्यासह अनेक मान्यवर उपस्थित होते.

मुख्यमंत्रीपद स्वीकारल्यानंतर विजय यांनी जनतेला संबोधित करताना, “मी कोणत्याही राजकीय घराण्यातून आलेलो नाही, मात्र जनतेने माझ्यावर विश्वास दाखवला आहे. खोटी आश्वासने देऊन लोकांची दिशाभूल करणार नाही,” असे सांगितले.

यावेळी त्यांनी मागील डीएमके सरकारवर टीका करत राज्याच्या आर्थिक स्थितीवर श्वेतपत्रिका जाहीर करण्याची घोषणा केली. तसेच अमली पदार्थांविरोधात कठोर मोहीम राबवणे, पारदर्शक प्रशासन देणे आणि सामाजिक न्यायावर आधारित शासन व्यवस्था उभी करणे हे आपल्या सरकारचे प्रमुख उद्दिष्ट असल्याचे त्यांनी स्पष्ट केले.

The post जोसेफ विजय तामिळनाडूच्या मुख्यमंत्रीपदी विराजमान appeared first on News 24 Tass Marathi.

बेळगाव : चेन्नई येथे आंतरराष्ट्रीय एशिया पॅसिफिक डाऊन सिंड्रोम फेडरेशनच्या वतीने आयोजित जलतरण स्पर्धेत भारतासह दहा देशांतील जलतरणपटूंनी सहभाग नोंदवला होता. या प्रतिष्ठित स्पर्धेत बेळगावचा मयांक हलदर याने भारताचे प्रतिनिधित्व करत उल्लेखनीय कामगिरी केली. ५० मीटर फ्रीस्टाईल आणि २५ मीटर बॅकस्ट्रोक या दोन प्रकारांत सुवर्णपदकांची कमाई करून त्याने देशासह आंतरराष्ट्रीय पातळीवर बेळगावचे नाव उज्ज्वल केले.

या यशाबद्दल आबा स्पोर्ट्स क्लब, हिंदी स्पोर्ट्स क्लब आणि क्रीडा भारती बेळगाव यांच्या संयुक्त विद्यमाने मयांकच्या बेळगाव रेल्वे स्थानकावर आगमनावेळी त्याचा सत्कार करण्यात आला.

या सत्कारप्रसंगी मयांकचे आई-वडील उपस्थित होते. तसेच आबा स्पोर्ट्स क्लबचे जलतरण प्रशिक्षक विश्वास पवार यांच्यासह विशाल वेसने, शुभांगी मंगळूरकर, ज्योती पवार, सुधीर धामणकर, मोहन पत्तार, सूर्यकांत हिंडलगेकर, पद्मप्रसाद हुली, गणेश दड्डीकर, हर्षाली पाटील, अनंत पाटील आदि मान्यवर क्रीडाप्रेमी मोठ्या संख्येने उपस्थित होते.

The post आंतरराष्ट्रीय जलतरण स्पर्धेत मयांक हलदरची उल्लेखनीय कामगिरी appeared first on News 24 Tass Marathi.

कोयंबतूरमध्ये 1998 साली झालेल्या स्फोटासह विविध दहशतवादी घटनांमध्ये सामील असलेला मुख्य आरोपीस तमिळनाडू पोलिसांनी, दहशतवादविरोधी पथक (ATS) व गुप्तचर विभागाच्या सहकार्याने विजयपूर शहरात अटक केली आहे.

सादिक राजा उर्फ टेलर राजा उर्फ शहजाहान अब्दुल मजीद मकानदार उर्फ शहजाहान शेख (वय 50) असे अटकेतील आरोपीचे नाव आहे. तो मूळचा चामराजनगर जिल्ह्यातील गुंडलुपेट येथील रहिवासी असून, कोयंबतूर स्फोट प्रकरणानंतर कर्नाटकमधील हुबळी व विजयपूर शहरांमध्ये मागील 29 वर्षांपासून लपून राहत होता, अशी माहिती पोलिसांनी दिली.

हुबळीतील एका महिलेशी विवाह केलेल्या आरोपीने मागील 12 वर्षांपासून विजयपूर शहरात भाजीपाला विक्रीचा व्यवसाय सुरू केला होता, असे समजते. प्रकरणाच्या तपासासाठी तमिळनाडू पोलिसांनी त्याला कोयंबतूरला नेले असून, न्यायालयात हजर केले आहे. 1998 साली भाजपचे वरिष्ठ नेते एल. के. अडवाणी यांना लक्ष्य करून करण्यात आलेल्या स्फोटामध्ये 58 लोकांचा मृत्यू झाला आणि 250 लोक जखमी झाले होते.

1996 मध्ये कोयंबतूर जेलमध्ये त्याने केलेल्या पेट्रोल बॉम्ब हल्ल्यात एक जेल वॉर्डन ठार झाला होता. “दहशतवादाशी संबंधित प्रकरणांव्यतिरिक्त, 1996 मध्ये नागूरमध्ये झालेल्या सयिता खून प्रकरण आणि 1997 मध्ये मदुरैमधील जेलर जयप्रकाश यांच्या खून प्रकरणातही टेलर राजाला आरोपी म्हणून नाव देण्यात आले आहे,” असे एका पोलिस अधिकाऱ्याने सांगितले.

The post कोयंबतूर स्फोट प्रकरणातील मुख्य आरोपीला विजयपुरमध्ये अटक appeared first on News 24 Tass Marathi.