बेळगाव : शहरातील वाढत्या अनधिकृत वस्त्या आणि बेकायदेशीर बांधकामांना आळा घालण्यासाठी बेळगाव शहरी विकास प्राधिकरणाने (बुडा) विशेष दक्षता पथक स्थापन करण्याचा निर्णय घेतला आहे. बुडा अध्यक्ष आणि आमदार आसिफ सेठ यांच्या निर्देशानुसार हे पथक एक वर्षाच्या कालावधीसाठी कंत्राटी तत्त्वावर नियुक्त करण्यात येणार आहे.

शहरात अनधिकृत वस्त्या आणि बेकायदेशीर बांधकामांवर सातत्याने लक्ष ठेवण्यासाठी आवश्यक असलेल्या मनुष्यबळाची कमतरता दूर करणे, हा या निर्णयामागील प्रमुख उद्देश आहे. विशेष पथकाच्या माध्यमातून अशा बांधकामांवर देखरेख ठेवून नियमांचे उल्लंघन करणाऱ्यांविरोधात कायदेशीर कारवाई करण्यावर भर दिला जाणार आहे.

• ई-निविदा प्रक्रिया सुरू

विशेष दक्षता पथकाच्या नियुक्तीसाठी बुडा प्रशासनाने ई-निविदा मागवली आहे. या कामासाठी अंदाजित खर्च २२ लाख रुपये असून, निविदेचे मूल्य १८.६ लाख रुपये निश्चित करण्यात आले आहे.

आमदार आसिफ सेठ यांच्या नेतृत्वाखाली शहरातील अनधिकृत बांधकामांचे वाढते प्रमाण रोखण्यासाठी आणि नियोजनबद्ध शहरी विकासाला चालना देण्यासाठी हे पाऊल उचलण्यात आले आहे. विशेष पथकाच्या माध्यमातून अनधिकृत बांधकामांवर नियमित देखरेख ठेवणे आणि संबंधित प्रकरणांत कठोर कायदेशीर कारवाई करणे अपेक्षित आहे.

The post बेळगावातील अनधिकृत वस्त्यांवर नजर ठेवण्यासाठी बुडा विशेष पथक नेमणार appeared first on News 24 Tass Marathi.

बेळगाव : उत्तर मतदारसंघाचे आमदार आसिफ सेठ यांनी बेळगाव शहरी विकास प्राधिकरणाच्या (बुडा) नूतन अध्यक्षपदाचा पदभार गुरुवारी स्वीकारला. यावेळी समर्थकांनी फटाके फोडून त्यांचे उत्साहात स्वागत केले. मावळते अध्यक्ष लक्ष्मणराव चिंगळे यांनी आसिफ सेठ यांच्याकडे अध्यक्षपदाची सूत्रे सोपविली.

याप्रसंगी माजी मंत्री लक्ष्मी हेब्बाळकर, माजी आमदार फिरोज सेठ यांच्यासह विविध मान्यवर उपस्थित होते. उपस्थितांनी नवनियुक्त अध्यक्षांचे अभिनंदन करून त्यांना पुढील कार्यासाठी शुभेच्छा दिल्या.

पदभार स्वीकारल्यानंतर बोलताना आसिफ सेठ यांनी बेळगाव शहराचा सर्वांगीण विकास करण्याला आपले प्राधान्य राहणार असल्याचे सांगितले. सर्व घटकांना सोबत घेऊन एकजुटीने काम करण्याचा प्रयत्न केला जाईल, असे त्यांनी स्पष्ट केले. तसेच शहरातील अनधिकृत लेआउट्सवर आवश्यक ती कारवाई करण्याचे आश्वासनही त्यांनी दिले.

दरम्यान, मंत्रिपदाच्या चर्चेबाबत स्पष्टीकरण देताना आसिफ सेठ यांनी आपण स्वतःहून कोणत्याही पदाची मागणी केलेली नसल्याचे सांगितले. पक्षाच्या हायकमांडने सर्व बाबींचा विचार करून सरकार स्थापन केले असून, योग्य वेळी योग्य निर्णय घेतला जाईल, असा विश्वास त्यांनी व्यक्त केला.

कोणत्याही नेत्याने नाराज होण्याची गरज नसून पक्षाच्या नेतृत्वावर आपला पूर्ण विश्वास असल्याचेही त्यांनी यावेळी सांगितले.

The post आमदार आसिफ सेठ यांनी स्वीकारला बुडा अध्यक्षपदाचा पदभार appeared first on News 24 Tass Marathi.