बेळगाव : जिल्हाधिकारी मोहम्मद रोशन यांनी पदभार स्वीकारून जवळपास अडीच वर्षांचा कालावधी पूर्ण केला आहे. त्यामुळे त्यांच्या संभाव्य बदलीबाबत प्रशासकीय वर्तुळात चर्चा सुरू झाली आहे. नुकत्याच झालेल्या पोलिस हुतात्मा दिन कार्यक्रमात बोलताना त्यांनी आपल्या अडीच वर्षाच्या कार्यकाळाचा उल्लेख केला. त्यांच्या वक्तव्यामुळे बदलीच्या शक्यतेबाबत तर्कवितर्काना सुरुवात झाली आहे.

कार्यक्रमात ते म्हणाले की, जिल्हाधिकारी पदाची सूत्रे स्वीकारल्यानंतरच्या अडीच वर्षांचा कालावधी पूर्ण झाला आहे.आता पुरे झाले आहे. अनेक व्यक्तींशी कामानिमित्त जवळचे संबंध निर्माण झाले. या काळात अनेकांच्या कामांशी संबंधित जबाबदाऱ्याही पार पाडाव्या लागल्या. मात्र, या काळात निर्माण झालेले ऋणानुबंध कायम स्मरणात राहतील, असे त्यांनी स्पष्ट केले प्रशासकीय सेवेत अधिकाऱ्यांची बदली होणे ही स्वाभाविक प्रक्रिया आहे. कोणत्याही ठिकाणी बदली झाली, तरी प्रामाणिकपणे सेवा करून देशाचे नाव उज्वल करण्याचे आपले ध्येय कायम राहील,असेही त्यांनी सांगितले. रोशन यांच्या या वक्तव्यामुळे त्यांच्या बदलीची शक्यता व्यक्त केली जात आहे. विशेषतः बेळगाव येथे होणारे विधिमंडळाचे हिवाळी अधिवेशन संपल्यानंतर प्रशासकीय बदल होऊ शकतात.

The post हिवाळी अधिवेशनानंतर जिल्हाधिकारी रोशन यांच्या बदलीची शक्यता appeared first on News 24 Tass Marathi.

हुदली गावातील सर्व्हे क्रमांक ७०/५ मधील शेतात बसवलेला टेक्समो कंपनीचा ५ एचपी क्षमतेचा मोटार पंप १५ ऑक्टोबर रोजी चोरीला गेला होता. या पंपाची किंमत २० हजार रुपये होती. याशिवाय हुदली परिसरातील इतर गावांमधील शेतकऱ्यांचेही मोटार पंप चोरीला गेल्याच्या घटना घडल्या होत्या. याप्रकरणी मारिहाळ पोलीस ठाण्यात गुन्हा दाखल करून तपास सुरू करण्यात आला होता. मोटार पंप आणि केबल घोरीच्या घटनांचा छडा लावण्यासाठी वरिष्ठ पोलीस अधिकाऱ्याच्या मार्गदर्शनाखाली विशेष पथक तयार करण्यात आले होते. या पथकाने २२ ऑक्टोबर रोजी रस्त्यावर दुचाकीवरून पोत्यात मोटार पंप घेऊन जाणाऱ्या दोघांना ताब्यात घेतले.

चौकशीदरम्यान त्यांनी हुदली, तुम्मरगुड्डी, मारिहाळ, मारिहाळ-तुम्मरगुड्डी, खानगाव, रंगदोळी आणि परिसरातील इतर गावांमध्ये मोटार पंप व केवल वायर चोरी केल्याची कबुली दिल्याचे पोलिसांनी सांगितले. अटक करण्यात आलेल्या आरोपींची नावे गुडदप्पा निंगाप्पा तळवार (वय ३६, रा. तुम्मरगुड्डी) आणि कल्लाप्पा लक्काप्पा नायक (वय ४२, रा. करिकट्टी) अशी आहेत. आरोपींकडून चोरीचे १२ मोटार पंप, ३०० मीटर केबल वायर आणि गुन्ह्यासाठी वापरलेली दुचाकी जप्त करण्यात आली आहे. या प्रकरणाचा पुढील तपास मारिहाळ पोलीस करत आहेत. या कारवाईत पोलीस निरीक्षक आय. आर. पट्टणशेट्टी, पीएसआय चंद्रशेखर सी. आणि पोलीस कर्मचाऱ्यांनी महत्त्वाची भूमिका बजावली. त्यांच्या कामगिरीचे वरिष्ठ पोलीस अधिकाऱ्यांनी कौतुक केले आहे.

The post मोटार पंप चोरटे गजाआड ; ३.६० लाखांचा मुद्देमाल जप्त appeared first on News 24 Tass Marathi.

खानापूर : खानापूर-लोंढा महामार्गावर वाटरे आणि जोमतळे गावांदरम्यान गुरुवारी (२२ ऑक्टोबर) रात्री झालेल्या अपघातात गुंजी येथील विनोद संभाजी गुरव (३९) यांचा मृत्यू झाला. एका धोकादायक वळणावर चालकाचे कारवरील नियंत्रण सुटल्याने वाहन दोन वेळा पलटी होऊन उलटले. या दुर्घटनेत गंभीर जखमी झालेल्या विनोद यांचा मृत्यू झाल्याने गुंजी गावासह परिसरात शोककळा पसरली आहे.

विनोद गुरव हे मूळचे गुंजी गावचे रहिवासी होते. नोकरीनिमित्त ते गोव्यात राहत होते. गुंजी येथे श्री माऊलीदेवीचा यात्रोत्सव सुरू असल्याने ते चार दिवसांपूर्वी गावी आले होते. मात्र, कामानिमित्त गुरुवारी सकाळी ते पुन्हा गोव्याला गेले. दिवसभरातील काम आटोपून सायंकाळी ते गुंजीला परतण्यासाठी निघाले होते.

गुरुवारी रात्री सुमारे नऊच्या सुमारास कुटुंबीयांनी त्यांच्याशी दूरध्वनीवर संपर्क साधला असता, आपण रामनगर येथे असल्याचे त्यांनी सांगितले होते. त्यामुळे कुटुंबीय त्यांच्या घरी परतण्याची प्रतीक्षा करत होते. मात्र, रात्री अकरा वाजेपर्यंत ते घरी न पोहोचल्याने नातेवाईकांनी पुन्हा त्यांच्या मोबाईलवर संपर्क साधण्याचा प्रयत्न केला. त्यावेळी दुसऱ्या व्यक्तीने फोन उचलून विनोद यांचा अपघात झाल्याची माहिती दिली. ही बातमी कळताच कुटुंबीयांना मोठा धक्का बसला.

अपघातानंतर विनोद यांना खानापूर येथील प्राथमिक आरोग्य केंद्रात नेण्यात आले. शुक्रवारी (२३ ऑक्टोबर) उत्तरीय तपासणीची प्रक्रिया पूर्ण झाल्यानंतर त्यांचा मृतदेह नातेवाईकांच्या ताब्यात देण्यात आला.

विनोद गुरव यांच्या पश्चात पत्नी, चार आणि दोन वर्षांच्या दोन लहान मुली, आई-वडील, विवाहित मोठा भाऊ आणि दोन विवाहित बहिणी असा परिवार आहे. यात्रोत्सवाच्या काळात गावातील तरुणाचा अपघाती मृत्यू झाल्याने गुंजी गावावर दुःखाचा डोंगर कोसळला आहे. अवघ्या दोन आणि चार वर्षांच्या मुलींनी वडिलांचे छत्र गमावल्याने परिसरातून हळहळ व्यक्त होत आहे.

The post खानापूर-लोंढा महामार्गावर भीषण अपघातात विनोद गुरव यांचा मृत्यू appeared first on News 24 Tass Marathi.

१ नोव्हेंबर १९५६ रोजी वादग्रस्त सीमाभाग त्यावेळच्या म्हैसूर व आताच्या कर्नाटक राज्यात डांबल्यामुळे हा दिन सीमा भागामध्ये काळा दिन पाळून मूक सायकल फेरी काढण्यात येते. या काळादिनाबाबत तसेच कर्नाटक सरकारने जाहीर केलेल्या तालुका पंचायत व जिल्हा पंचायत निवडणुकी संदर्भात कार्यकर्त्यांचे विचार व्यक्त करण्यासाठी या बैठकीचे आयोजन करण्यात आले आहे.

या बैठकीला बेळगाव तालुका महाराष्ट्र एकीकरण समितीचे पदाधिकारी,नियंत्रण या घटक समितीचे सदस, युवा व महिला आघाडीचे पदाधिकारी, आजी-माजी लोकप्रतिनिधी व कार्यकर्त्यांनी वेळेवर उपस्थित रहावे, असे आवाहन बेळगाव तालुका महाराष्ट्र एकिकरण समितीचे अध्यक्ष माजी आमदार मनोहर किणेकर, सरचिटणीस अँड. एम. जी. पाटील,कार्याध्यक्ष आर. एम. चौगुले, उपाध्यक्ष रामचंद्र मोदगेकर,लक्ष्मण होनगेकर,मोनाप्पा पाटील,विठ्ठल पाटील यांनी केले आहे.

The post बेळगाव तालुका महाराष्ट्र एकीकरण समितीची रविवारी बैठक appeared first on News 24 Tass Marathi.

कित्तूर : ब्रिटिश सत्तेविरुद्ध शौर्याने लढा देत विजय मिळवणाऱ्या वीरराणी कित्तूर चन्नम्मा यांच्या ऐतिहासिक विजयाच्या २०२ व्या वर्षपूर्तीनिमित्त आयोजित कित्तूर महोत्सव २०२६ ला उत्साहात सुरुवात झाली. पारंपरिक कार्यक्रम, लोककलेची सादरीकरणे आणि मान्यवरांच्या उपस्थितीमुळे महोत्सवाला विशेष रंगत आली.

महोत्सवाच्या निमित्ताने राज्यभरातून आणण्यात आलेल्या वीरज्योतीचे कित्तूरमधील चन्नम्मा सर्कल येथे आमदार बाबासाहेब पाटील यांनी स्वागत केले. यावेळी राज्यध्वज फडकवण्यात आला. त्यानंतर फुलांनी सजवलेल्या वीरराणी चन्नम्मा यांच्या अश्वारूढ पुतळ्याला पुष्पहार अर्पण करून अभिवादन करण्यात आले.

महोत्सवांतर्गत आयोजित लोककला प्रदर्शनाचे उद्घाटन राजगुरू संस्थान कलमठचे माडीवाल राजयोगिंद्र स्वामीजी, आमदार बाबासाहेब पाटील, बैलहोंगलचे आमदार महांतेश कौजलागी, जिल्हाधिकारी मोहम्मद रोशन, जिल्हा पोलीस अधीक्षक के. रामराजन यांच्यासह अन्य मान्यवरांच्या हस्ते करण्यात आले.

महोत्सवाच्या मिरवणुकीत विविध लोककला पथकांनी पारंपरिक कला सादर करून उपस्थितांचे लक्ष वेधून घेतले. कन्नड आणि सांस्कृतिक विभागाच्या उपसंचालक विद्यावती भजंत्री यांनी कोलता वाजवून मिरवणुकीत विशेष रंग भरला. चंडीमेळा, महिला वीरगासे, ईश्वर वेष, गारुडी गोंबे, मीनू नृत्य, महिला डोल्लू कुणिता, चेंदे वादन, कुद्रे कुणिता, कंसाळे, नंदीध्वज आणि पूजा कुणिता यांसह विविध कलापथकांनी सहभाग घेतला.

याशिवाय विविध शासकीय विभागांच्या चित्ररथांनीही मिरवणुकीत सहभाग घेतला. या चित्ररथांच्या माध्यमातून सरकारच्या विविध योजना आणि जनहिताच्या सेवांची माहिती नागरिकांपर्यंत पोहोचवण्यात आली. ऐतिहासिक परंपरा आणि सांस्कृतिक वारसा जपणाऱ्या या महोत्सवाच्या प्रारंभामुळे कित्तूरमध्ये उत्सवी वातावरण निर्माण झाले.

The post कित्तूर महोत्सव २०२६ चा उत्साहात प्रारंभ appeared first on News 24 Tass Marathi.

चिक्कोडी : बेळगाव जिल्ह्यातील चिक्कोडी तालुक्यातील सिद्धापूरवाडी गावाजवळ चिक्कोडी-मिरज मार्गावर महिंद्रा थार आणि दुचाकी यांच्यात झालेल्या भीषण अपघातात सुधाकर रोकडे (वय ४०) यांचा मृत्यू झाला. अपघातात गंभीर जखमी झालेल्या त्यांच्या पत्नी स्वप्ना यांच्यावर सध्या उपचार सुरू आहेत.

मिळालेल्या माहितीनुसार, सिद्धापूरवाडी गावाजवळ भरधाव वेगाने आलेल्या महिंद्रा थारची दुचाकीला धडक बसली. या धडकेमुळे दुचाकीवरील सुधाकर आणि त्यांची पत्नी स्वप्ना रस्त्यावर पडले. दोघांनाही गंभीर दुखापत झाली.

अपघातानंतर जखमी दाम्पत्याला तातडीने चिक्कोडी येथील केएलई रुग्णालयात दाखल करण्यात आले. प्राथमिक उपचारांनंतर त्यांना पुढील उपचारांसाठी बेळगाव येथील केएलई रुग्णालयात हलवण्यात आले. मात्र, उपचार सुरू असताना सुधाकर रोकडे यांचा मृत्यू झाला. त्यांच्या पत्नी स्वप्ना यांची प्रकृती गंभीर असून त्यांच्यावर वैद्यकीय उपचार सुरू आहेत.

सुधाकर यांच्या निधनामुळे कुटुंबीय आणि नातेवाईकांवर दुःखाचा डोंगर कोसळला आहे. या घटनेने परिसरात हळहळ व्यक्त केली जात आहे. या अपघातप्रकरणी महिंद्रा थारचे मालक शिवराज बसवराज भास्कर यांच्याविरोधात अंकली पोलीस ठाण्यात गुन्हा नोंदवण्यात आला आहे. पोलिसांकडून या प्रकरणाचा पुढील तपास सुरू आहे.

The post महिंद्रा थारच्या धडकेत दुचाकीस्वाराचा मृत्यू appeared first on News 24 Tass Marathi.

बेळगाव : हुबळी येथे मांजाच्या धाग्यात अडकून एका महिलेचा मृत्यू झाल्याच्या घटनेनंतर बेळगाव पोलीस विभागाने सतर्कता वाढवली आहे. प्रतिबंधित आणि जीवघेण्या मांजाच्या धाग्याची विक्री किंवा वापर करणाऱ्यांवर कठोर कारवाई करण्यात येईल, असा इशारा जिल्हा पोलीस अधीक्षक के. रामराजन यांनी दिला आहे.

पतंग उडवण्यासाठी वापरल्या जाणाऱ्या मांजामुळे दुचाकीस्वार, सायकलस्वार तसेच पादचाऱ्यांच्या सुरक्षिततेला धोका निर्माण होत आहे. हा धागा गळ्यात अडकल्यास गंभीर दुखापत होऊ शकते, तर काही वेळा जीवही गमवावा लागू शकतो. अलीकडेच एका १९ वर्षीय तरुणाला मांजाच्या धाग्यामुळे झालेल्या अपघातातून या धोक्याची गंभीरता पुन्हा समोर आली आहे, असे रामराजन यांनी नमूद केले.

उत्तर कर्नाटकात दसरा आणि अन्य सणांच्या काळात पतंग उडवण्याची परंपरा आहे. मात्र, या उत्सवाच्या आनंदात इतरांच्या जीविताला धोका निर्माण होणार नाही, याची काळजी घेणे आवश्यक आहे. नागरिकांनी प्रतिबंधित मांजाची खरेदी आणि वापर टाळावा, असे आवाहन पोलिसांकडून करण्यात आले आहे.

बंदी असलेल्या मांजाच्या धाग्याची विक्री करताना कोणी आढळल्यास संबंधित विक्रेत्यांविरुद्ध कायदेशीर कारवाई केली जाईल, असेही पोलीस अधीक्षकांनी स्पष्ट केले. पतंग उडवण्यासाठी सुरक्षित आणि साध्या धाग्याचा वापर करावा. पोलिसांच्या सूचनांचे पालन करून संभाव्य अपघात आणि जीवितहानी टाळण्यासाठी नागरिकांनी सहकार्य करावे, असे आवाहन के. रामराजन यांनी केले आहे.

The post मांजाच्या धाग्याचा वापर केल्यास कठोर कारवाई appeared first on News 24 Tass Marathi.

बेंगळुरू : कर्नाटकातील २४० पैकी २२६ तालुके दुष्काळग्रस्त आहेत. पावसाअभावी ८२ टक्के पीक वाया गेले असून, यामुळे सुमारे ६० हजार ते ७० हजार कोटी रुपयांच्या पीक नुकसानीचा अंदाज राज्य सरकारने व्यक्त केला आहे. (एनडीआरएफ) निकषांनुसार केंद्राकडे ७,१४२.६४ कोटी रुपयांच्या आर्थिक मदतीची मागणी केली. तर त्याआधी सुरुवातीला त्यांनी ३७०५.३० कोटी रुपयांची दुष्काळी मदत देण्याची मागणी केली होती. त्यानंतर आणखी तालुके दुष्काळी जाहीर करण्यात आले आहेत. यामुळे अतिरिक्त मदतीची मागणी करणारे निवेदन आता कर्नाटक सरकार केंद्राला सादर करणार आहे. केंद्र सरकारने मदत निधी वितरित करावा, अशी मागणी राज्य सरकारने केली आहे. या निधीमुळे दुष्काळग्रस्त शेतकऱ्यांना आणि इतरांना दिलासा मिळेल. कर्नाटकात दुष्काळामुळे धान्य उत्पादनावर मोठा परिणाम झाला आहे. चारा आणि पिण्याच्या पाण्याची टंचाई निर्माण झाली असल्याची माहिती उपमुख्यमंत्री जी. परमेश्वर यांनी दिली होती.

The post कर्नाटकात ७० हजार कोटी रुपयांचे पीक नुकसान appeared first on News 24 Tass Marathi.

मिळालेल्या माहितीनुसार, गुरुवारी सकाळी पोलिसांनी शुभम शेळके यांच्या निवासस्थानी जाऊन त्यांना पोलीस ठाण्यात उपस्थित राहण्यास सांगितले. त्यानंतर दुपारी सुमारे दीड वाजण्याच्या सुमारास शुभम शेळके आणि मनोहर हुंदरे हे खडेबाजार पोलीस ठाण्यात हजर झाले. पोलिसांनी आवश्यक कायदेशीर प्रक्रिया पूर्ण केल्यानंतर दोघांची जिल्हा रुग्णालयात वैद्यकीय तपासणी करण्यात आली.

वैद्यकीय तपासणीनंतर गुरुवारी रात्री सुमारे आठ वाजता दोघांना न्यायमूर्ती एच. एस. मंजुनाथ यांच्यासमोर हजर करण्यात आले. यावेळी न्यायालयाने त्यांना १४ दिवसांची न्यायालयीन कोठडी सुनावली.

या कारवाईनंतर बेळगावातील महाराष्ट्र एकीकरण समितीच्या कार्यकर्त्यांमध्ये चर्चेला उधाण आले आहे. या घटनेची राजकीय वर्तुळातही चर्चा सुरू असून, प्रकरणाच्या पुढील घडामोडींकडे लक्ष लागले आहे.

The post शुभम शेळके आणि मनोहर हुंदरे यांना १४ दिवसांची न्यायालयीन कोठडी appeared first on News 24 Tass Marathi.

बेळगाव : बेळगाव तालुक्यातील मुतगा गावचा पॅरा जलतरणपटू स्वातिक पाटील याने जपानमध्ये आयोजित ‘आयची-नागोया २०२६ आशियाई पॅरा गेम्स’मध्ये कांस्यपदक पटकावून उल्लेखनीय यश संपादन केले आहे. ब्रेस्टस्ट्रोक जलतरण प्रकारातील त्याच्या या कामगिरीमुळे बेळगाव जिल्ह्यासह कर्नाटक आणि भारताच्या शिरपेचात मानाचा तुरा रोवला गेला आहे.

स्वातिकने आंतरराष्ट्रीय स्तरावर मिळवलेले हे यश त्याची मेहनत, जिद्द आणि खेळाप्रती असलेली निष्ठा अधोरेखित करणारे आहे. प्रतिकूल परिस्थितीवर मात करत त्याने मिळवलेल्या या यशामुळे मुतगा गावातील नागरिकांसह बेळगाव जिल्ह्यात आनंदाचे वातावरण निर्माण झाले आहे. त्याच्या कामगिरीचे सर्व स्तरांतून कौतुक होत आहे.

स्वातिकच्या या यशामुळे ग्रामीण भागातील दिव्यांग खेळाडूंमध्ये असलेल्या सुप्त क्रीडागुणांना आंतरराष्ट्रीय स्तरावर संधी मिळू शकते, हे पुन्हा एकदा अधोरेखित झाले आहे. त्याची कामगिरी नवोदित खेळाडूंसाठी, विशेषतः दिव्यांग युवक-युवतींसाठी प्रेरणादायी ठरणार आहे. जिद्द, सातत्य आणि कठोर परिश्रम यांच्या बळावर आंतरराष्ट्रीय स्तरावर यश मिळवता येते, हा संदेश त्याने आपल्या कामगिरीतून दिला आहे.

बेळगावच्या या खेळाडूने मिळवलेल्या पदकामुळे जिल्ह्याच्या क्रीडा क्षेत्राची मान उंचावली आहे. पॅरा जलतरण प्रकारात त्याने केलेली प्रगती भविष्यात आणखी मोठी कामगिरी करण्यासाठी महत्त्वाची ठरू शकते. त्याच्या यशामुळे अधिकाधिक खेळाडूंना पॅरा क्रीडा प्रकारात सहभागी होण्याची आणि देशाचे प्रतिनिधित्व करण्याची प्रेरणा मिळेल, अशी अपेक्षा व्यक्त होत आहे.

स्वातिक पाटील याच्या या यशाबद्दल बेळगाव जिल्ह्यातून त्याच्यावर अभिनंदनाचा वर्षाव होत असून, त्याच्या पुढील क्रीडा कारकिर्दीसाठी शुभेच्छा दिल्या जात आहेत.

The post बेळगावच्या स्वातिक पाटीलची आशियाई पॅरा गेम्समध्ये कांस्यपदकाला गवसणी appeared first on News 24 Tass Marathi.