बेळगाव : राज्यात सुरू असलेल्या मतदार नोंदणी प्रक्रियेदरम्यान मतदार यादीत कोणत्याही प्रकारच्या त्रुटी राहू नयेत, तसेच पात्र मतदारांची नावे विनाकारण वगळली जाणार नाहीत, यासाठी सर्व पदाधिकारी आणि कार्यकर्त्यांनी दक्षता घ्यावी, असे आवाहन राज्याचे उपमुख्यमंत्री डॉ. जी. परमेश्वर यांनी केले. पक्षासाठी सातत्याने काम करणाऱ्या कार्यकर्त्यांना लवकरच विविध समित्या आणि महामंडळांवर संधी दिली जाईल, असाही विश्वास त्यांनी व्यक्त केला.

बेळगाव येथे आयोजित बैठकीत ते बोलत होते. देशभर आणि राज्यात सुरू असलेल्या विशेष मतदार नोंदणी (एसआयआर) प्रक्रियेच्या पार्श्वभूमीवर विरोधकांकडून विविध प्रकारच्या रणनीती राबवल्या जात असल्याचा उल्लेख करत त्यांनी यापूर्वी पश्चिम बंगालमधील निवडणुकांतील अनुभवाची आठवण करून दिली. कर्नाटकमध्ये अशा प्रकारच्या त्रुटी होऊ नयेत म्हणून केपीसीसी आणि जिल्हा काँग्रेस समित्यांच्या माध्यमातून आधीच आवश्यक सूचना देण्यात आल्याचे त्यांनी सांगितले.

मतदार नोंदणी आणि मतदार ओळखपत्र वितरणाची प्रक्रिया सुरू असताना प्रत्येक मतदारसंघातील बूथस्तरीय अधिकारी (बीएलओ) यांच्याशी स्थानिक नेते आणि कार्यकर्त्यांनी सातत्याने संपर्क ठेवावा. पात्र मतदारांची नावे कोणत्याही कारणाशिवाय वगळली जाणार नाहीत, याची विशेष काळजी घ्यावी. तसेच सदस्य नोंदणीसाठी निश्चित करण्यात आलेल्या १३ निकषांचे काटेकोर पालन करण्याच्या सूचनाही त्यांनी दिल्या.

यावेळी पक्षातील कार्यकर्त्यांच्या नियुक्त्यांबाबत बोलताना डॉ. परमेश्वर म्हणाले, पक्षासाठी निष्ठेने काम करणाऱ्या कार्यकर्त्यांना विविध समित्या आणि महामंडळांवर संधी देण्यासाठी यापूर्वी समिती स्थापन करण्यात आली होती. त्या समितीने सुमारे ८०० कार्यकर्त्यांची नावे विविध पदांसाठी सुचविली होती. मात्र काही कारणांमुळे त्याची अंमलबजावणी होऊ शकली नाही. आता नवीन मुख्यमंत्री आणि प्रदेशाध्यक्ष पदावर आल्यानंतर या विषयावर पुन्हा चर्चा सुरू झाली असून, पात्र कार्यकर्त्यांना लवकरच जबाबदाऱ्या मिळाव्यात यासाठी आपण आग्रही भूमिका मांडणार असल्याची ग्वाही त्यांनी दिली.

The post मतदार यादीतील त्रुटी रोखण्यासाठी दक्षता घ्या ; उपमुख्यमंत्री डॉ. जी. परमेश्वर appeared first on News 24 Tass Marathi.

बेळगाव : महाराष्ट्र एकीकरण युवा समितीचे अध्यक्ष श्री अंकुश केसरकर यांनी, कर्नाटकच्या मुख्य निवडणूक अधिकाऱ्यांकडे निवेदन सादर करून विशेष मतदार यादी फेरनिरीक्षण (Special Intensive Revision – SIR) प्रक्रियेसाठी मराठी भाषेतील अर्ज (Enumeration) तातडीने उपलब्ध करून देण्याची मागणी केली आहे. तसेच मराठी अर्ज उपलब्ध होईपर्यंत संबंधित विधानसभा मतदारसंघांमधील फेरनिरीक्षण प्रक्रिया स्थगित करण्याचीही मागणी करण्यात आली आहे.

समितीने आपल्या निवेदनात नमूद केले आहे की, सध्या बेळगाव, बिदर आणि उत्तर कन्नड (कारवार) जिल्ह्यातील ज्या विधानसभा मतदारसंघांमध्ये मराठीला निवडणूक आयोगाने मान्यताप्राप्त भाषा म्हणून मान्यता दिली आहे, त्या ठिकाणी मतदार फेरनिरीक्षण प्रक्रियेसाठी केवळ कन्नड भाषेतील फॉर्म उपलब्ध करून दिले जात आहेत. त्यामुळे मराठी भाषिक मतदारांना त्यांच्या भाषेत निवडणूक प्रक्रिया समजून घेण्यास अडचणी येत असून त्यांच्या भाषिक अधिकारांवर गदा येत आहे.

भारतीय निवडणूक आयोगाने १६ सप्टेंबर २००८ रोजी जारी केलेल्या निर्देशांनुसार बेळगाव जिल्ह्यातील निपाणी, चिक्कोडी-सदलगा, बेळगाव उत्तर, बेळगाव दक्षिण, बेळगाव ग्रामीण, खानापूर, बिदर जिल्ह्यातील बसवकल्याण, भालकी, औराद तसेच उत्तर कन्नड जिल्ह्यातील हल्याळ आणि कारवार या विधानसभा मतदारसंघांमध्ये मतदार यादी व निवडणुकीशी संबंधित सर्व साहित्य मराठी भाषेत उपलब्ध करून देणे बंधनकारक आहे.

समितीने याकडेही लक्ष वेधले आहे की, २०२४ मध्येही अशीच परिस्थिती निर्माण झाली होती. त्यावेळी महाराष्ट्र एकीकरण युवा समितीचे अध्यक्ष अंकुश केसरकर यांनी, भारतीय निवडणूक आयोग आणि भाषिक अल्पसंख्याक आयुक्त यांच्याकडे तक्रार केल्यानंतर मुख्य निवडणूक अधिकारी, कर्नाटक यांनी निवडणूक नियमांनुसार संबंधित मतदारसंघांमध्ये मतदार याद्या कन्नडबरोबरच मराठी भाषेत प्रसिद्ध करणे आवश्यक असल्याचे लेखी मान्य केले होते. त्यानंतर जिल्हा निवडणूक अधिकारी, बेळगाव यांनी मराठीतील मतदार याद्या व संबंधित निवडणूक साहित्य उपलब्ध करून दिल्याची पुष्टीही केली होती.

तथापि, यापूर्वी स्पष्ट निर्देश आणि पत्रव्यवहार झालेला असतानाही प्रत्येक वेळी मराठी भाषिक मतदारांना स्वतंत्रपणे पाठपुरावा करावा लागत असल्याची खंत समितीने व्यक्त केली आहे.

• समितीने मुख्य निवडणूक अधिकाऱ्यांकडे पुढील मागण्या केल्या आहेत :

निवडणूक आयोगाने अधिसूचित केलेल्या सर्व विधानसभा मतदारसंघांसाठी मराठीतील एसआयआर गणना फॉर्म तातडीने उपलब्ध करून द्यावेत.मराठी फॉर्म उपलब्ध होईपर्यंत संबंधित मतदारसंघांतील फेरनिरीक्षण प्रक्रिया स्थगित करावी.

सर्व निवडणूक नोंदणी अधिकारी, जिल्हा निवडणूक अधिकारी आणि संबंधित अधिकाऱ्यांना मराठी भाषेत मतदार यादी, अर्ज, सूचना, प्रसिद्धीपत्रके, जनजागृती साहित्य आणि इतर सर्व निवडणूक साहित्य नियमितपणे उपलब्ध करून देण्याबाबत स्पष्ट निर्देश जारी करावेत.

भारतीय निवडणूक आयोगाचे २००८ पासून लागू असलेले निर्देश बंधनकारक असून त्यांची प्रभावी अंमलबजावणी करणे आवश्यक आहे. मराठी भाषेत निवडणूक साहित्य उपलब्ध करून देणे हे केवळ प्रशासकीय कर्तव्य नसून मराठी भाषिक मतदारांच्या भाषिक अधिकारांचे संरक्षण करण्यासाठी आणि सर्वसमावेशक, मुक्त व निष्पक्ष निवडणूक प्रक्रिया सुनिश्चित करण्यासाठी अत्यावश्यक असल्याचे समितीने नमूद केले आहे.

या निवेदनाच्या प्रती भारताचे मुख्य निवडणूक आयुक्त, भाषिक अल्पसंख्याक आयुक्त, तसेच बेळगाव, बिदर आणि उत्तर कन्नड (कारवार) येथील जिल्हा निवडणूक अधिकाऱ्यांनाही पाठविण्यात आल्या आहेत.

The post मतदार फेर निरीक्षण प्रक्रियेसाठी मराठीत अर्ज उपलब्ध करून द्यावेत appeared first on News 24 Tass Marathi.

बेळगाव : जिल्ह्यात राबविण्यात येणारी मतदार यादी पुनरिक्षण मोहीम पारदर्शक आणि प्रभावी पद्धतीने पूर्ण करण्याच्या सूचना विभागीय आढावा बैठकीत देण्यात आल्या. जिल्हा पंचायत सभागृहात आयोजित या बैठकीत विविध सरकारी विभागांच्या कामकाजाचा आणि प्रगतीचा सविस्तर आढावा घेण्यात आला.

बैठकीच्या अध्यक्षस्थानी असलेले सहकार तसेच जिल्हा प्रभारी सचिव संजय शेट्टणवर यांनी ३० जून ते ७ ऑक्टोबर या कालावधीत राबविण्यात येणाऱ्या मतदार यादी पुनरिक्षण मोहिमेत कोणताही पात्र मतदार वंचित राहणार नाही, याची दक्षता घेण्याचे निर्देश संबंधित अधिकाऱ्यांना दिले.

यावेळी जिल्हाधिकारी मोहम्मद रोशन यांनी जिल्ह्यात सुरू असलेल्या पुनरिक्षण मोहिमेची माहिती सादर केली. त्यांनी सांगितले की, मतदार यादीसंदर्भातील मॅपिंगच्या कामात जिल्ह्याने आतापर्यंत ९३ टक्के प्रगती साधली असून उर्वरित कामही निर्धारित वेळेत पूर्ण करण्यासाठी प्रयत्न सुरू आहेत.

बैठकीत मान्सूनच्या पार्श्वभूमीवर ग्रामीण भागातील पिण्याच्या पाण्याच्या उपलब्धतेचाही आढावा घेण्यात आला. तसेच पेरणीच्या हंगामात शेतकऱ्यांना बियाणे आणि खतांचा पुरेसा पुरवठा होईल, याची खात्री करण्यासाठी संबंधित विभागांनी आवश्यक ती खबरदारी घ्यावी, अशा सूचनाही देण्यात आल्या.

या प्रसंगी पोलीस आयुक्त भूषण बोरसे, जिल्हा पंचायत मुख्य कार्यकारी अधिकारी राहुल शिंदे, प्रशिक्षणार्थी आयएएस अधिकारी रोहित सिंग, अतिरिक्त जिल्हाधिकारी विजयकुमार होनकेरी यांच्यासह विविध विभागांचे वरिष्ठ अधिकारी उपस्थित होते.

The post मतदार यादी पुनरिक्षण मोहीम पारदर्शकपणे राबवा appeared first on News 24 Tass Marathi.

बेळगाव : निवडणूक आयोगाच्या आदेशानुसार महापालिका क्षेत्रात मतदार यादीची एसआयआर मोहीम सुरू होत आहे. ही मोहीम यशस्वी करण्यासाठी नगरसेवकांचे सहकार्य आवश्यक असल्याचे आवाहन महापालिका आयुक्त कार्तिक एम. यांनी केले आहे. महापालिका सभागृहात आयोजित माहिती कार्यशाळेत ते बोलत होते.

महापालिका क्षेत्रात ३० जून ते २९ जुलै दरम्यान ही मोहीम राबवली जाणार आहे. दक्षिण विभागासाठी स्वतः आयुक्त आणि उत्तर विभागासाठी उपायुक्त उदयकुमार तळवार निवडणूक अधिकारी म्हणून काम पाहणार आहेत.

एकूण ५१४ मतदान केंद्र अधिकारी घरोघरी भेट देऊन माहिती गोळा करणार असून, कर्मचाऱ्यांना याचे प्रशिक्षण देण्यात आले आहे. लोकशाही बळकटीकरणाच्या या राष्ट्रीय कार्यात नगरसेवकांनी आपल्या प्रभागात जनजागृती करावी, असे आवाहन आयुक्तांनी केले.

कार्यशाळेत दक्षिण विभागाचे साहाय्यक निवडणूक अधिकारी डॉ. सिद्धू हुल्लोळी यांनी प्रात्यक्षिकासह सविस्तर माहिती दिली. या कार्यक्रमाला महापौर प्रीती कामकर, उपमहापौर हनुमंत कोंगाळी, सभागृह नेते संतोष पेडणेकर, विरोधी पक्षनेते मोहम्मद सोहेल संगोळी यांच्यासह विविध विभागांचे उपायुक्त आणि नगरसेवक उपस्थित होते.

The post मतदार यादी पुनरिक्षण मोहिमेसाठी बेळगाव महापालिकेत जनजागृती कार्यशाळा appeared first on News 24 Tass Marathi.

राज्यभर सुरू असलेल्या जनजागृती मोहिमेचा एक भाग म्हणून बेळगावमधील कन्नड साहित्य भवन येथे ही सभा पार पडली. कार्यक्रमाच्या प्रारंभी यरगट्टी येथून आलेल्या जनजागृती पथकाचे स्वागत करण्यात आले. त्यानंतर डॉ. बाबासाहेब आंबेडकर यांच्या पुतळ्याला अभिवादन करून सभेला सुरुवात झाली.

सभेत विविध वक्त्यांनी मतदार यादी प्रक्रियेबाबत चिंता व्यक्त केली. पात्र मतदारांची नावे यादीतून वगळली जात असल्याचा आरोप करत त्यांनी या प्रक्रियेत अधिक पारदर्शकता आणि अचूकता आवश्यक असल्याचे सांगितले. तसेच आधार क्रमांकाशी जोडणी करताना निर्माण झालेल्या अडचणी आणि प्रशासकीय गोंधळामुळे अनेक मतदारांना अडचणींचा सामना करावा लागत असल्याचेही वक्त्यांनी नमूद केले.

या पार्श्वभूमीवर २० जून २०२६ रोजी बंगळुरू येथील फ्रीडम पार्कमध्ये निषेध सभेचे आयोजन करण्यात आले असून, नागरिकांनी मोठ्या संख्येने सहभागी होऊन आपली भूमिका मांडावी, असे आवाहन करण्यात आले.

याप्रसंगी शिवलीला मिसाळे, इसाबेला झेवियर, यल्लाप्पा हिम्मडी, मंदा नेवगी, यासीनखान मकानदार आणि धार्मिक नेते आत्मानंद योग गुरुजी, फादर फॉस्टर अणकलगी, युसूफ खन्नी यांच्यासह अनेक प्रमुख वक्त्यांनी सभेला संबोधित केले. तसेच व्यासपीठावर रवी पाटील, आयना शेख, परप्पा कोटागी, निसार अहमद अवटी यांच्यासह जिल्ह्यातील इतर अनेक प्रमुख कार्यकर्ते उपस्थित होते.

The post मतदार यादीतील त्रुटींविरोधात बेळगावात जनजागृती बैठक appeared first on News 24 Tass Marathi.

बेळगाव / प्रतिनिधी

भारतीय निवडणूक आयोगाच्या मार्गदर्शनानुसार मतदार यादी सुधारण्यासाठी एसआयआर (SIR) प्रक्रिया बेळगावमध्ये सुरू झाली आहे. बेळगाव दक्षिण मतदारसंघाचे नोडल अधिकारी डॉ. सिद्दू हुल्लोळी यांनी नागरिकांना आपली नावे बीएलओ (BLO) ॲपमध्ये नोंदविण्याचे आवाहन केले आहे.

डॉ. हुल्लोळी यांनी पत्रकार परिषदेत सांगितले की, फक्त भारतीय नागरिकच मतदान करू शकतील याची खात्री करण्यासाठी दर २० वर्षांनी एसआयआर सर्वेक्षण केले जाते. यामध्ये प्रत्येक मतदाराने आपापल्या भागातील बीएलओंशी संपर्क साधून नावे नकाशावर नोंदवणे अनिवार्य आहे. विशेषतः जे मतदार २००२ नंतर यादीत सामील झाले आहेत, त्यांना या प्रक्रियेत सक्रिय सहभाग घेणे आवश्यक आहे.

ही प्रक्रिया येत्या महिन्यात अधिकृतपणे सुरू होण्याची शक्यता आहे. मतदारांनी आपल्याकडील मतदान केंद्रावरील अधिकाऱ्यांकडे जाऊन बीएलओ ॲपद्वारे आपले ‘मॅप’, ‘प्रोजेनी’ आणि ‘सेल्स प्रोजेनी’ तपशील अद्ययावत करावेत. २००२ पूर्वीपासून यादीत असलेले मतदार, ज्यांनी एसआयआर प्रक्रिया पूर्ण केली आहे, ते थेट मॅपिंग करू शकतात. डॉ. हुल्लोळी यांनी नागरिकांना सांगितले की, ही तांत्रिक प्रक्रिया व्यवस्थित पूर्ण करून आपला मतदानाचा हक्क सुरक्षित करावा.

The post मतदार यादी सुधारणा प्रक्रियेला सुरुवात appeared first on News 24 Tass Marathi.