बेळगाव : देशभरात गाजत असलेल्या नीट परीक्षा प्रश्नपत्रिका गळती आणि विद्यार्थ्यांच्या आत्महत्यांच्या घटनांचा निषेध करण्यासाठी युथ काँग्रेस आणि विद्यार्थ्यांनी बेळगावात तीव्र आंदोलन छेडले. दिल्लीतील आंदोलनाला पाठिंबा दर्शवत आंदोलकांनी केंद्र सरकारविरोधात जोरदार घोषणाबाजी केली.

बेळगावातील राणी चन्नम्मा चौकात युथ काँग्रेसचे नेते अमान सेठ यांच्या नेतृत्वाखाली शेकडो विद्यार्थी, पालक आणि कार्यकर्ते एकत्र आले होते. मृत विद्यार्थ्यांच्या कुटुंबीयांना न्याय मिळावा तसेच योग्य आर्थिक मदत जाहीर करावी, अशी मागणी यावेळी करण्यात आली.

आंदोलकांनी आरोप केला की, गेल्या दहा वर्षांत विविध स्पर्धा परीक्षांच्या प्रश्नपत्रिका १५० हून अधिक वेळा फुटल्या असून, अलीकडील काळातही ७० पेक्षा अधिक गैरप्रकार समोर आले आहेत. लाखो विद्यार्थ्यांच्या भविष्याशी खेळ करणाऱ्या केंद्रीय शिक्षण मंत्री धर्मेंद्र प्रधान यांनी तात्काळ राजीनामा द्यावा आणि पंतप्रधान नरेंद्र मोदी यांनी देशाची माफी मागावी, अशी मागणीही आंदोलकांनी केली.

मुसळधार पावसातही विद्यार्थी आणि पालक मोठ्या संख्येने आंदोलनात सहभागी झाले. गरीब, शेतकरी आणि कष्टकरी कुटुंबे आपल्या मुलांच्या शिक्षणासाठी मोठे त्याग करत असताना परीक्षांतील गैरप्रकारांमुळे विद्यार्थ्यांचे भविष्य धोक्यात येत असल्याची भावना पालकांनी व्यक्त केली. तसेच शांततेत आंदोलन करणाऱ्या विद्यार्थ्यांवर झालेल्या कथित लाठीचार्जाचाही त्यांनी निषेध नोंदवला.

युथ काँग्रेसचे नेते अमान सेठ यांनी सांगितले की, लाखो विद्यार्थ्यांचे भवितव्य ठरवणाऱ्या नॅशनल टेस्टिंग एजन्सीमध्ये केवळ २२ कायमस्वरूपी सरकारी कर्मचारी असून उर्वरित कर्मचारी कंत्राटी आहेत. त्यामुळे परीक्षेच्या पारदर्शकतेबाबत गंभीर प्रश्न निर्माण झाले आहेत. हे आंदोलन कोणत्याही राजकीय हेतूने नसून विद्यार्थ्यांच्या हक्कांसाठी आणि न्यायासाठी असल्याचे त्यांनी स्पष्ट केले.

The post नीट गैरव्यवहाराच्या निषेधार्थ बेळगावात युथ काँग्रेस व विद्यार्थ्यांची तीव्र निदर्शने appeared first on News 24 Tass Marathi.

बेळगाव : रोटरी क्लब ऑफ बेळगाव दर्पणच्या वतीने शिवबसवनगर येथील श्री सिद्धरामेश्वर विद्यालयात विद्यार्थ्यांसाठी मोफत दंत तपासणी, हिमोग्लोबिन तपासणी आणि रक्तगट निश्चिती शिबिराचे आयोजन करण्यात आले. शिबिरात १७० विद्यार्थ्यांची विविध आरोग्य तपासणी करून त्यांना आवश्यक आरोग्यविषयक मार्गदर्शन करण्यात आले.

शिबिराच्या यशस्वी आयोजनासाठी क्लबच्या अध्यक्षा रोटे. डॉ. स्फूर्ती मस्तीहोळी यांनी कार्यक्रमाच्या अध्यक्षा रोटे. उर्मिला गणी यांच्या नियोजन व समन्वयाचे कौतुक केले. तसेच सचिव रोटे. ज्योती कुलकर्णी यांनी केलेल्या प्रभावी व्यवस्थापनाबद्दलही त्यांचे अभिनंदन करण्यात आले.

या उपक्रमात रोटे. डॉ. स्मिता गुडगणट्टी, रोटे. राजनंदा गार्गी, रोटे. सुरेखा मुम्मिगट्टी आणि रोटे. लक्ष्मी चव्हाण यांनी सक्रिय सहभाग घेत शिबिराच्या यशस्वी आयोजनात मोलाचे योगदान दिले.

शिबिरासाठी कमाख्या डायग्नॉस्टिक्सच्या रोटे. आशा पाटील यांनी तपासणी सेवांचे प्रायोजकत्व स्वीकारले, तर मराठा मंडळ दंत महाविद्यालयाच्या डॉ. रम्या यांनी विद्यार्थ्यांची मोफत दंत तपासणी करून आरोग्य सेवेत महत्त्वपूर्ण योगदान दिले.

विद्यार्थ्यांच्या आरोग्य सेवेसाठी दिलेल्या सहकार्याबद्दल कमाख्या डायग्नॉस्टिक्सचे व्यवस्थापकीय संचालक अनिल पाटील आणि डॉ. रम्या यांचा रोटरी क्लब ऑफ बेळगाव दर्पणतर्फे सत्कार करण्यात आला.

कार्यक्रमाच्या यशस्वी आयोजनासाठी शाळेचे मुख्याध्यापक, शिक्षकवृंद आणि विद्यार्थ्यांचे आभार व्यक्त करण्यात आले. “स्वतःपेक्षा सेवा श्रेष्ठ” या रोटरीच्या ब्रीदवाक्यानुसार आरोग्य, शिक्षण आणि समाजकल्याणासाठी अशा लोकहितकारी उपक्रमांचे आयोजन भविष्यातही सातत्याने सुरू ठेवण्यात येणार असल्याचे यावेळी सांगण्यात आले.

The post रोटरी क्लब ऑफ बेळगाव दर्पणतर्फे विद्यार्थ्यांसाठी मोफत आरोग्य तपासणी शिबिर appeared first on News 24 Tass Marathi.

दि.3 ते 5 जुलै 2026 या कालावधीत येम्मेकेरे स्विमिंग पूल, मंगळुरू येथे झालेल्या या स्पर्धेत राज्यभरातील उत्कृष्ट जलतरणपटूंनी सहभाग घेतला होता. अत्यंत चुरशीच्या स्पर्धेत वेदांतने 2 मिनिटे 21.70 सेकंदांची उत्कृष्ट वेळ नोंदवत द्वितीय क्रमांक मिळवला. त्याच्या या यशामुळे शाळा, शिक्षक, विद्यार्थी व पालकांमध्ये आनंदाचे वातावरण निर्माण झाले आहे.

राष्ट्रीय स्तरावरील उल्लेखनीय कामगिरीनंतर राज्यस्तरावरही वेदांतने सातत्यपूर्ण मेहनत, शिस्त आणि जिद्दीच्या जोरावर हे यश संपादन केले आहे. या दैदिप्यमान यशाबद्दल शाळेचे एस.एम.सी. चेअरमन प्रा. श्री. आर. के. पाटील, व्हाईस चेअरमन प्रो. श्री. आर. एस. पाटील, सेक्रेटरी प्रो. श्री. नितीन घोरपडे यांनी वेदांतचे मनःपूर्वक अभिनंदन करून त्याच्या पुढील वाटचालीस हार्दिक शुभेच्छा दिल्या.

तसेच शाळेचे प्राचार्य श्री. प्रदीप पाटील यांनी वेदांतच्या या अभिमानास्पद यशाबद्दल त्याचे विशेष अभिनंदन करून भविष्यात राष्ट्रीय व आंतरराष्ट्रीय स्तरावरही अशीच उज्ज्वल कामगिरी करण्यासाठी शुभेच्छा दिल्या.

The post राज्यस्तरीय जलतरण स्पर्धेत ज्योती सेंट्रल स्कूलच्या मास्टर वेदांतची रौप्यपदकाला गवसणी appeared first on News 24 Tass Marathi.

बेळगाव : शहरातील शालेय व महाविद्यालयीन विद्यार्थ्यांनी मंगळवारी जिल्हाधिकारी कार्यालयाला भेट देऊन क्रिकेटपटू एम. एस. धोनी यांना त्यांच्या वाढदिवसानिमित्त बेळगावला आमंत्रित करण्याची आगळीवेगळी मागणी केली. याचवेळी विद्यार्थ्यांनी शहरातील वाढत्या मोकाट कुत्र्यांच्या समस्येकडेही जिल्हाधिकाऱ्यांचे लक्ष वेधले.

विद्यार्थ्यांनी जिल्हाधिकारी मोहम्मद रोशन यांची भेट घेऊन धोनीला बेळगावला आमंत्रित करण्यासाठी प्रशासनाने प्रयत्न करावेत, अशी विनंती केली. तसेच गेल्या काही दिवसांपासून संभाव्य पूरस्थिती आणि आपत्ती व्यवस्थापनासाठी जिल्हा प्रशासनाने केलेल्या कामाचे कौतुक करत जिल्हाधिकाऱ्यांचा आंब्याचे रोपटे देऊन सत्कार केला.

यावेळी विद्यार्थ्यांनी शहरात वाढत चाललेल्या मोकाट कुत्र्यांच्या समस्येमुळे नागरिकांना, विशेषतः विद्यार्थ्यांना होत असलेल्या त्रासाची माहिती देत या प्रश्नावर तातडीने उपाययोजना करण्याची मागणी केली.

जिल्हाधिकारी मोहम्मद रोशन यांनी प्रशासनाकडून मोकाट कुत्र्यांचा उपद्रव कमी करण्यासाठी सुरू असलेल्या उपाययोजनांची माहिती दिली. तसेच या विषयावरील पुढील अधिकृत बैठकीस विद्यार्थ्यांनाही सहभागी होण्याचे निमंत्रण दिले. एम. एस. धोनी यांना बेळगावला आणण्यासाठी आपल्या परीने प्रयत्न करू, असे आश्वासनही त्यांनी विद्यार्थ्यांना दिले.

या शिष्टमंडळाचे नेतृत्व देविका खानमुखर यांनी केले. यावेळी शिवतेज खन्नुकर, अहिल्या होसुरकर, अर्जुन होसुरकर, सार्थक सैनेकर, वैभवी सैनेकर, शांतनु खन्नुकर, शर्वरी खन्नुकर, अथर्व संतोष पवार, अदिती साळुंके, अनन्या साळुंके, स्वराज खन्नुकर, रुदिता पवार, स्वयंम पवार यांच्यासह अनेक विद्यार्थी उपस्थित होते. विद्यार्थ्यांच्या सामाजिक जाणीवा आणि प्रशासनाशी थेट संवाद साधण्याच्या पुढाकाराचे जिल्हाधिकाऱ्यांनी कौतुक केले.

The post एम. एस. धोनीला बेळगावला बोलवा appeared first on News 24 Tass Marathi.

विद्यार्थ्यांच्या भाषिक कौशल्यांना वाव देण्यासाठी आयोजित करण्यात आलेल्या या स्पेल बी परीक्षेत अन्शाराहने उत्तम कामगिरी करत आपली गुणवत्ता सिद्ध केली. तिच्या या यशामुळे शाळेतील विद्यार्थ्यांना स्पर्धात्मक परीक्षांसाठी नवी प्रेरणा मिळाली आहे.

शालेय प्राचार्य श्री. प्रदीप पाटील यांच्या मार्गदर्शनाखाली विद्यार्थ्यांना विविध क्षेत्रात प्रगती करण्यासाठी सातत्याने प्रोत्साहन व योग्य दिशा मिळत आहे. विद्यार्थ्यांच्या कलागुणांना वाव देण्यासाठी शाळेमार्फत विविध उपक्रम व स्पर्धांचे आयोजन करण्यात येते. अन्शाराहच्या या यशाबद्दल शालेय प्राचार्य श्री. प्रदीप पाटील, शिक्षकवृंद व पालकांनी तिचे अभिनंदन करून पुढील यशस्वी वाटचालीसाठी शुभेच्छा दिल्या.

The post ज्योती सेंट्रल स्कूलच्या विद्यार्थिनीची राष्ट्रीय स्तरावरील स्पेल बी परीक्षेत दैदिप्यमान कामगिरी appeared first on News 24 Tass Marathi.

बेळगाव : शहापूर येथील गाडेमार्ग परिसरातील होतकरू फुटबॉलपटू अवनीश अनिल माळवी याची बंगळुरू येथील सेंट अलॉयसिस स्कूलमध्ये संपूर्ण फुटबॉल प्रशिक्षण आणि शालेय शिक्षणासाठी निवड झाली आहे. त्याच्या या उल्लेखनीय यशामुळे क्रीडा क्षेत्रात आनंदाचे वातावरण असून विविध स्तरांतून त्याचे अभिनंदन करण्यात येत आहे.

अवनीश यापूर्वी बेळगावातील ओरिएंटल इंग्लिश मीडियम स्कूलमध्ये शिक्षण घेत होता. त्याच्या उत्कृष्ट फुटबॉल कौशल्याची दखल घेत टेक्निको बेळगाव ट्रायल्स क्लबच्या माध्यमातून विविध निवड चाचण्या घेण्यात आल्या. या चाचण्यांमध्ये त्याने प्रभावी कामगिरी करत गुणवत्ता सिद्ध केल्यानंतर त्याची सेंट अलॉयसिस स्कूलमध्ये नववीच्या वर्गासाठी निवड करण्यात आली.

या निवडीमुळे अवनीशला दर्जेदार शालेय शिक्षणासोबतच अनुभवी प्रशिक्षकांच्या मार्गदर्शनाखाली व्यावसायिक फुटबॉल प्रशिक्षण घेण्याची संधी मिळणार आहे. माध्यमिक तसेच पुढील महाविद्यालयीन शिक्षणही तो बंगळुरू येथेच पूर्ण करणार असून, फुटबॉल क्षेत्रात प्रगतीसाठी आवश्यक असलेल्या अत्याधुनिक सुविधा आणि प्रशिक्षण त्याला उपलब्ध होणार आहे.

सातत्यपूर्ण सराव, जिद्द आणि मेहनतीच्या बळावर अवनीशने हे यश मिळविले आहे. त्याच्या या प्रवासात फुटबॉल असोसिएशन, राज्यस्तरीय अधिकारी, प्रशिक्षक तसेच टेक्निको बेळगाव ट्रायल्स क्लब यांचे मोलाचे मार्गदर्शन आणि सहकार्य लाभल्याचे सांगण्यात आले.

अवनीशच्या या यशाबद्दल क्रीडाप्रेमी, प्रशिक्षक आणि नागरिकांकडून त्याच्यावर अभिनंदनाचा वर्षाव होत असून, भविष्यात तो राज्य आणि देशाचे फुटबॉल क्षेत्रात प्रतिनिधित्व करून बेळगावचे नाव उज्ज्वल करेल, असा विश्वास व्यक्त केला जात आहे.

The post बेळगावच्या अवनीश माळवीची बंगळुरूच्या सेंट अलॉयसिस स्कूलमध्ये निवड appeared first on News 24 Tass Marathi.

रविवार, २१ जून २०२६ रोजी झालेल्या या स्पर्धेत बेळगाव परिसरातील सुमारे ४० हायस्कूल विद्यार्थ्यांनी सहभाग घेतला होता. प्रभावी वक्तृत्व, आत्मविश्वासपूर्ण सादरीकरण आणि विषयावरील सखोल अभ्यासाच्या जोरावर पुष्करने परीक्षकांची मने जिंकत द्वितीय क्रमांक मिळवला.

पुष्कर हा सरकारी मॉडेल प्राथमिक मराठी केंद्र शाळा, मच्छेचा माजी विद्यार्थी असून सध्या ठळकवाडी हायस्कूल, टिळकवाडी येथे शिक्षण घेत आहे. या यशाबद्दल प्रा. डॉ. मधुकर जाधव यांच्या हस्ते त्याला सन्मानचिन्ह आणि रोख पारितोषिक देऊन गौरविण्यात आले.

या यशासाठी ठळकवाडी हायस्कूलचे शिक्षक सी. वाय. पाटील तसेच सरकारी मॉडेल प्राथमिक मराठी केंद्र शाळा, मच्छे येथील शिक्षकांचे त्याला मोलाचे मार्गदर्शन लाभले. पुष्करच्या या यशाबद्दल त्याचे पालक, शिक्षक, माजी शिक्षकवृंद आणि परिसरातून त्याच्यावर अभिनंदनाचा वर्षाव होत आहे.

The post बेळगावातील वक्तृत्व स्पर्धेत मच्छेच्या पुष्कर कोलेकरचा द्वितीय क्रमांक appeared first on News 24 Tass Marathi.

या पालक सभेत गावातील दिव्यांग मुलगी आराधना प बडसकर व तिची आजी लक्ष्मी बडसकर यांचा भेट वस्तू देऊन सन्मान करण्यात आला. आराधना ही गेली दहा वर्षे घरातच व्यंगत्व असल्याने बाहेर पडत नव्हती. ही गोष्ट मुख्याध्यापक अविनाश कांबळे यांच्या निदर्शनास आले.त्यांनी तिला शिक्षणाच्या प्रवाहात आणण्यासाठी अथक परिश्रम घेऊन शिक्षण हक्क कायद्यानुसार सरळ चौथी इयत्तेत प्रवेश दिला. विशेष म्हणजे पालकांनी शिक्षकांवर विश्वास ठेवून तिचे भविष्य उज्ज्वल होईल या आशेने शाळेत रुजू केले.

शाळेतील इतर मुलांच्या सहवासातून ती सध्या हसते,बागडते बराचसा फरक जाणवतो आहे.शिक्षक हा शिल्पकार आहे मातीच्या गोळ्याला आकार देतो हे सिद्ध होते शाळा सुधारणा कमिटीच्या पदाधिकाऱ्यांनी शिक्षक व तिच्या पालकांचे कौतुक केले.

समुपदेशकाची भूमिका महत्त्वाची असते. वंचित, दिव्यांग विद्यार्थीनीचा सन्मान करण्यात आल्याबद्दल समाधान व्यक्त केले यावेळी शाळा सुधारणा कमिटीचे उपाध्यक्ष तेजस्वीनी सुतार, सदस्य रघुनाथ मोरे, शशिकांत गावडे, राजाराम मोरे, एन. आर. मोरे, गणपती कणबरकर, राजश्री यळुरकर,भारता कणबरकर, मंदिरा ओऊळकर उज्ज्वला जाधव तसेच शिक्षक ज्ञानेश्वर चिंगळे निल्लवा हुक्केरी आदी मान्यवर उपस्थित होते. सूत्रसंचालन वैशाली किल्लेकर, आभार स्वप्निल सवदी यांनी केले. पालक मेळावा व सत्कार समारंभ उत्साहात संपन्न झाला.

The post कावळेवाडी प्राथमिक शाळेत दिव्यांग विद्यार्थीनीचा सन्मान appeared first on News 24 Tass Marathi.

येथील श्री घुमटमाळ मारुती मंदिर पब्लिक ट्रस्ट आणि कै. बी. के. बांडगी शैक्षणिक ट्रस्टच्या संयुक्त विद्यमाने शुक्रवारी बेळगाव तालुक्यातील मराठी माध्यमिक शाळामधून दहावी परीक्षेत प्रथम आलेल्या विद्यार्थिनींचा सत्कार करण्यात आला. त्याप्रसंगी प्रा. स्वरूपा इनामदार प्रमुख वक्त्या म्हणून उपस्थित होत्या आणि पाहुणे म्हणून प्रकाश कडोलकर हे उपस्थित होते अध्यक्षस्थानी ट्रस्टचे अध्यक्ष कुलदीप भेकणे हे होते तर व्यासपीठावर बांडगी ट्रस्टचे रघुनाथ बांडगी, मंदिराचे उपाध्यक्ष प्रकाश माहेश्वरी व सचिव अनंत लाड हे उपस्थित होते.

बेळगाव तालुक्यातील विविध शाळांमधून प्रथम आलेल्या २५ हून अधिक विद्यार्थिनींना प्रत्येकी पंधराशे रुपये रोख, स्मृतिचिन्ह, प्रशस्तीपत्र, वह्या आणि गुलाबपुष्प देऊन मान्यवरांच्या हस्ते सन्मानित करण्यात आले.

कार्यक्रमाची सुरुवात व उपस्थितांचे स्वागत सौ मनस्वी केदार बांडगी यांनी केले, पाहुणे व ट्रस्टीज यांच्या हस्ते दीपप्रज्वलन झाल्यावर हनुमान फोटोचे पूजन रघुनाथ बांडगी यांच्या हस्ते करण्यात आले तर प्रकाश कडोलकर यांनी स्वर्गीय बी. के. बांडगी यांच्या प्रतिमेचे पूजन केले. पाहुण्यांचा शाल, स्मृतिचिन्ह व पुष्पगुच्छ देऊन अध्यक्षांच्या हस्ते सन्मान करण्यात आला.

यावेळी काकडे फाउंडेशनचे किशोर काकडे यांनी विद्यार्थिनींना मौलिक मार्गदर्शन केले. आपल्या प्रभावशाली भाषनाने सर्वांना मंत्रमुग्ध केलेल्या स्वरूपा इनामदार पुढे म्हणाल्या की, “ज्या मारुती मंदिरात तुमचा सन्मान होतोय तो मारुती हा पराक्रमी योद्धा होता तो संस्कृतचा गाडा अभ्यासक होता त्याच्यापासून प्रेरणा घेऊन जीवन उज्वल करा. त्यासाठी मोठमोठ्या लोकांची चरित्र वाचा, जीवनात जी जी माणसे यशस्वी झाली आहेत त्या पाठीमागे त्यांचा प्रामाणिकपणा, कठोर परिश्रम कारणीभूत आहेत.आज महिला सर्वच क्षेत्रात आघाडीवर आहेत त्यामुळे जीवनात नम्रता, उत्तम चरित्र, प्रामाणिकपणा, विश्वास आणि सतर्कपणा या गोष्टी आत्मसात करा म्हणजे आपले जीवन उज्वल होईल” असे त्या म्हणाल्या.

प्रारंभी सचिव अनंत लाड यांनी पाहुण्यांचा परिचय करून दिला आणि सूत्रसंचालन केले.आभार प्रदर्शन नेताजी जाधव यांनी केले .कार्यक्रमास बाबुराव पाटील, चंद्रकांत बांडगी, संभाजी चव्हाण, सुनील सरनोबत या ट्रस्टीजसह रमेश कुकडोळकर, प्रभाकर पाटील, मनोहर कुकडोळकर व अनेक मान्यवर उपस्थित होते.

The post घुमटमाळ मारुती मंदिर आणि बांडगी शैक्षणिक ट्रस्टतर्फे विद्यार्थिनींचा सत्कार appeared first on News 24 Tass Marathi.

बेळगाव : कर्नाटक सरकारने विद्यार्थ्यांना शैक्षणिक प्रवासासाठी मोफत बससेवा उपलब्ध करून देण्याची घोषणा केली असून, त्यासाठी विद्यार्थ्यांनी सेवा सिंधु या शासकीय संकेतस्थळावर अर्ज करण्याचे आवाहन करण्यात आले आहे. मात्र, सध्या बस पाससाठी अर्ज करण्याचा प्रयत्न केल्यास संबंधित सेवा डिसेबल (बंद) असल्याची सूचना संकेतस्थळावर दिसून येत आहे.

यामुळे हजारो विद्यार्थी मोफत बससेवेचा लाभ घेण्यासाठी अर्ज करू शकत नसल्याने त्यांना मोठ्या अडचणींचा सामना करावा लागत आहे. नवीन शैक्षणिक वर्ष सुरू झाल्यानंतर अनेक विद्यार्थ्यांना दररोज प्रवासासाठी स्वतःच्या खिशातून खर्च करावा लागत असून, त्यामुळे त्यांच्या कुटुंबांवर अतिरिक्त आर्थिक भार पडत आहे.

विशेषतः ग्रामीण भागातील आणि आर्थिकदृष्ट्या दुर्बल कुटुंबांतील विद्यार्थ्यांना याचा मोठा फटका बसत आहे. मोफत बससेवेचा लाभ वेळेत मिळाला नाही तर विद्यार्थ्यांच्या शिक्षणावरही परिणाम होण्याची शक्यता व्यक्त केली जात आहे.

दरम्यान, सेवा सिंधु पोर्टलवरील तांत्रिक अडचणी किंवा सेवा बंद ठेवण्यामागील कारणांबाबत प्रशासनाकडून अद्याप कोणतीही स्पष्ट माहिती देण्यात आलेली नाही. त्यामुळे पालक आणि विद्यार्थ्यांमध्ये चिंतेचे वातावरण निर्माण झाले आहे.

विद्यार्थी व पालकांनी राज्य सरकार आणि संबंधित अधिकाऱ्यांनी तातडीने हस्तक्षेप करून बस पास अर्ज सेवा पूर्ववत सुरू करावी, तसेच पात्र विद्यार्थ्यांना मोफत बससेवेचा लाभ त्वरित उपलब्ध करून द्यावा, अशी मागणी केली आहे.

The post विद्यार्थ्यांच्या मोफत बससेवेसाठी अर्ज प्रक्रिया ठप्प appeared first on News 24 Tass Marathi.