बेळगाव : अनगोळ परिसरात विवाह कार्यक्रमादरम्यान परवानगीशिवाय डॉल्बी साउंड सिस्टम लावून ध्वनीप्रदूषण केल्याप्रकरणी टिळकवाडी पोलिसांनी नवरदेव आणि साऊंड सिस्टम मालकाविरोधात गुन्हा दाखल केला आहे.

मिळालेल्या माहितीनुसार, ६ मे २०२६ रोजी रात्री सुमारे ११ वाजण्याच्या सुमारास सार्वजनिक रस्त्यावर मोठ्या आवाजात डॉल्बी साउंड सुरू असल्याची माहिती पोलिसांना मिळाली. त्यानंतर टिळकवाडी पोलीस अधिकारी आणि कर्मचाऱ्यांनी घटनास्थळी भेट देऊन पाहणी केली.

तपासादरम्यान संबंधितांकडून डॉल्बी वापरण्यासाठी परवानगी मागण्यात आली होती. मात्र परिसरात ज्येष्ठ नागरिक आणि आजारी व्यक्तींना त्रास होण्याची शक्यता लक्षात घेऊन प्रशासनाने परवानगी नाकारली होती. तरीदेखील नियमांचे उल्लंघन करून मोठ्या आवाजात साउंड सिस्टम सुरू ठेवण्यात आल्याचे पोलिस तपासात उघड झाले.

या प्रकरणी टिळकवाडी पोलीस ठाण्यात भारतीय न्याय संहिता (BNS) २०२३ अंतर्गत कलम २९२, १२५ सह कलम ३(५) तसेच कर्नाटक पोलीस कायदा १९६३ अंतर्गत कलम ३७ सह कलम १० अन्वये गुन्हा दाखल करण्यात आला आहे.

सार्वजनिक किंवा खासगी कार्यक्रम आयोजित करताना आवश्यक परवानग्या घेणे आणि ध्वनीप्रदूषण नियमांचे पालन करणे बंधनकारक असल्याचे आवाहन पोलिसांनी केले आहे.

The post अनगोळमध्ये परवानगीशिवाय डॉल्बी लावल्याप्रकरणी गुन्हा दाखल appeared first on News 24 Tass Marathi.

माहितीनुसार, ३ एप्रिल रोजी मध्यरात्री १ वाजण्याच्या सुमारास सुळेभावी गावातील होसकेरी गल्लीत एका लग्न समारंभाच्या निमित्ताने साऊंड सिस्टीम लावण्यात आली होती. संबंधित विभागाची कोणतीही पूर्वपरवानगी घेण्यात आलेली नव्हती. या सिस्टीममुळे सार्वजनिक रस्त्यावर वाहतुकीस अडथळा निर्माण झाला तसेच आवाजाची मर्यादा ओलांडल्याने नागरिकांच्या शांततेचा भंग झाला, अशी तक्रार पोलिसांकडे नोंदवण्यात आली.

या प्रकरणी सुरेश रामप्पा बंगन्नवर (रा. सुळेभावी), वीरभद्र नागप्पा यरगुद्दी (रा. सोमनट्टी, ता. बैलहोंगल) आणि रोहित देवप्पा लक्कनगौडर (रा. सुळेभावी) यांच्यावर गुन्हा दाखल करण्यात आला आहे. संशयितांवर सार्वजनिक उपद्रव आणि ध्वनी प्रदूषणाच्या नियमांचे उल्लंघन केल्याचा आरोप ठेवण्यात आला आहे.

पोलिसांनी अंदाजे ३२,००० रुपये किमतीचे साऊंड साहित्य जप्त केले आहे. यात साऊंड बेस (किंमत १२,००० रु.), साऊंड टॉप (किंमत १०,००० रु.), कंट्रोलर मिक्सर (किंमत १०,००० रु.) आणि साऊंडसाठी वापरलेला होंडा जनरेटर यांचा समावेश आहे. तसेच या साहित्याचे वाहतुकीसाठी वापरलेला ट्रॅक्टर (क्र. KA-22 T-3566) देखील पोलिसांनी ताब्यात घेतला आहे.

मारीहाळ पोलिसांचे कर्मचारी आय. एम. शीलवंतर यांनी याप्रकरणी फिर्याद दिली असून, पुढील तपास सुरू असल्याचे पोलीस प्रशासनाने स्पष्ट केले आहे. सार्वजनिक कार्यक्रमांदरम्यान ध्वनी प्रदूषणाचे नियम पाळणे अनिवार्य असून, विनापरवाना ध्वनिक्षेपकांचा वापर करणाऱ्यांवर यापुढेही कायद्यानुसार कारवाई केली जाईल, असे प्रशासनाने अधोरेखित केले.

The post सुळेभावीत विनापरवाना साऊंड सिस्टीम लावल्याप्रकरणी तिघांविरुद्ध पोलीस कारवाई appeared first on News 24 Tass Marathi.