बेळगाव : सांगली जिल्ह्यातील कुपवाड येथे झालेल्या बेळगाव जिल्ह्यातील मराठी दांपत्याच्या निर्घृण हत्येचा निषेध करण्यासाठी आणि आरोपीला तात्काळ फाशीची शिक्षा देण्याच्या मागणीसाठी बेळगावात येत्या शुक्रवार, २१ ऑगस्ट रोजी सकाळी ११:०० वाजता एका भव्य मूक मोर्चाचे (शांतता रॅली) आयोजन करण्यात आले आहे. बेळगावचा मराठी समुदाय आणि मराठा समाजातर्फे या मोर्चाचे आयोजन करण्यात येत असून, आज या संदर्भात बेळगावचे पोलीस आयुक्त भूषण गुलाबराव बोरासे (IPS) यांना परवानगीसाठी अधिकृत निवेदन देण्यात आले.

मूळचे बेळगाव जिल्ह्यातील खानापूर तालुक्याचे रहिवासी असलेले श्री. मोहन नागप्पा केसरेकर (वय ४५) आणि त्यांच्या पत्नी श्रीमती निशा मोहन केसरेकर (वय ३५) हे कामाच्या निमित्ताने सांगली जिल्ह्यातील कुपवाड येथील विघ्नहर्ता शांती कॉलनी, एमआयडीसी परिसरात राहत होते. तिथे आरोपी फरिद अब्दुल शेख (वय ५०) याने या दांपत्याची धारदार शस्त्राने वार करून अत्यंत निर्घृण हत्या केली. या घटनेमुळे संपूर्ण बेळगाव आणि सीमाभागात तीव्र संताप व्यक्त होत आहे.
असा असेल मोर्चाचा मार्ग आणि वेळ:

* दिनांक: शुक्रवार, २१ ऑगस्ट २०२६
* वेळ: सकाळी ११:०० वाजता
* प्रारंभ: सरदार हायस्कूल मैदान, बेळगाव
* समापन: जिल्हाधिकारी (DC) कार्यालय, बेळगाव

हा मोर्चा सरदार हायस्कूल मैदानावरून सुरू होऊन जिल्हाधिकारी कार्यालयावर पोहोचेल. तिथे जिल्हाधिकाऱ्यांना मागण्यांचे औपचारिक निवेदन सादर केले जाईल. हा खटला जलदगती न्यायालयात (फास्ट ट्रॅक कोर्ट) चालवून नराधम आरोपीला मृत्युदंडाची (फाशीची) शिक्षा व्हावी, ही या मोर्चाची प्रमुख मागणी आहे. हा मोर्चा पूर्णपणे शांततेत, कायदेशीर आणि शिस्तबद्ध पद्धतीने पार पाडला जाईल आणि पोलीस प्रशासनाला वाहतूक व शांतता सुव्यवस्थेसाठी पूर्ण सहकार्य केले जाईल, अशी ग्वाही संयोजकांनी दिली आहे.

पोलीस आयुक्तांना निवेदन देताना आणि या नियोजनात श्री रमाकांत कोंडुसकर, हरी शानबाग, सागर पाटील, कपिल भोसले, प्राचार्य आनंद आपटेकर, संदीप कामुले, राजेंद्र बैलूर, सातेरी नाईक, शुभम पाटील, नंदू इंदलकर यांच्यासह मराठा0 समाजातील आणि मराठी समुदायातील प्रमुख पदाधिकारी, कार्यकर्ते आणि नागरिक मोठ्या संख्येने उपस्थित होते.

The post केसरेकर दांपत्य हत्याकांड ; आरोपीला फाशीच्या मागणीसाठी २१ ऑगस्टला बेळगावात भव्य मूक मोर्चा appeared first on News 24 Tass Marathi.

श्रीराम सेना हिंदुस्थानचे अध्यक्ष रमाकांत कोंडुसकर यांच्या हस्ते प्रशांत खन्नूकर यांचा शाल, पुष्पगुच्छ व सन्मानचिन्ह देऊन गौरव करण्यात आला. भूतानमध्ये झालेल्या या स्पर्धेत रौप्यपदक मिळवत प्रशांत खन्नूकर यांनी भारताचा तिरंगा अभिमानाने फडकावला असून त्यांच्या या उल्लेखनीय कामगिरीबद्दल त्यांचे सर्व स्तरांतून कौतुक होत आहे.

यावेळी रमाकांत कोंडुसकर म्हणाले, बेळगावच्या मातीने देशाला अनेक कर्तृत्ववान खेळाडू दिले आहेत. प्रशांत खन्नूकर यांनी कठोर परिश्रम, जिद्द आणि खेळाप्रती असलेले समर्पण यांच्या जोरावर आंतरराष्ट्रीय स्तरावर यश मिळवले आहे. त्यांचा हा सन्मान म्हणजे त्यांच्या संघर्षाची आणि मेहनतीची योग्य दखल असून त्यांच्या यशामुळे जिल्ह्यातील अनेक युवा खेळाडूंना प्रेरणा मिळेल.

सत्काराला उपस्थित मान्यवरांनी प्रशांत खन्नूकर यांचे मनःपूर्वक अभिनंदन करून आगामी राष्ट्रीय व आंतरराष्ट्रीय स्पर्धांमध्ये सुवर्णपदक जिंकण्यासाठी त्यांना शुभेच्छा दिल्या.

The post भूतानमध्ये रौप्यपदक जिंकणाऱ्या प्रशांत खन्नूकर यांचा श्रीराम सेना हिंदुस्थानकडून सत्कार appeared first on News 24 Tass Marathi.

श्रीराम सेना हिंदुस्थान, अनगोळ (बेळगाव) यांच्या वतीने हनुमान जन्मोत्सवाच्या निमित्ताने ५ व्या वर्षातील ‘श्री हनुमान चित्ररथ स्पर्धा – २०२६’ तसेच ‘आकर्षक बैलजोडी स्पर्धा – २०२६’ आयोजित करण्यात आल्या आहेत.

चित्ररथ स्पर्धेत प्रथम तीन विजेत्यांना अनुक्रमे रुपये ५००१, ३००१ आणि २००१ अशी रोख पारितोषिके तसेच आकर्षक चषक प्रदान करण्यात येणार आहेत. स्पर्धकांची निवड श्री हनुमानाची मूर्ती, बैलजोडीची मांडणी, रथाची सजावट, चाकांचे डिझाइन, जूची रचना, विद्युत रोषणाई, हिंदुत्व दर्शवणारी केसरी पताका आणि ध्वनी व्यवस्था अशा विविध निकषांवर गुणांकन करून केली जाणार आहे.

बैलजोडी स्पर्धेत पहिल्या पाच क्रमांकांसाठी अनुक्रमे रुपये ५००१, ३००१, २००१, १५०१ आणि १००० अशी रोख बक्षिसे व चषक देण्यात येतील. यामध्ये बैलांची उंची, रंगसाम्य, शिंगे, कान, पाय, शेपटी, चालण्याची ढब, थाट, तसेच देशी जातीची वैशिष्ट्ये, सजावट आणि अलंकार या बाबींवर आधारित निवड केली जाईल.

या दोन्ही स्पर्धांमध्ये सहभागी होण्यासाठी पूर्वनोंदणी अनिवार्य असून, इच्छुकांनी अधिक माहितीसाठी व नोंदणीसाठी ८४९७८५१९१३ किंवा ९६६५४५५२७९ या क्रमांकांवर संपर्क साधावा, असे आवाहन आयोजकांकडून करण्यात आले आहे.

The post श्रीराम सेना हिंदुस्थान अनगोळतर्फे हनुमान जयंतीनिमित्त विविध स्पर्धांचे आयोजन appeared first on News 24 Tass Marathi.

बेळगाव / प्रतिनिधी

देशात महिला व तरुणांच्या सुरक्षिततेला धोका निर्माण करणाऱ्या लैंगिक गुन्हे, अंमली पदार्थांची तस्करी आणि सामाजिक शोषणाच्या वाढत्या घटनांवर तातडीने आळा घालण्यासाठी संबंधित कायद्यांची कठोर अंमलबजावणी करावी, अशी मागणी श्रीराम सेना हिंदुस्तान, बेळगाव जिल्हा शाखेने केली आहे. यासंदर्भातील निवेदन केंद्रीय व राज्य गृहमंत्र्यांसह बेळगाव जिल्हाधिकाऱ्यांना सादर करण्यात आले.

बेळगुंदी (ता. जि. बेळगाव) येथील एका शाळेत शिक्षकाने अल्पवयीन विद्यार्थिनीशी गैरवर्तन केल्याची घटना अलीकडेच उघडकीस आली. या घटनेच्या पार्श्वभूमीवर श्रीराम सेना  हिंदुस्थानचे अध्यक्ष रमाकांत कोंडुसकर यांच्या नेतृत्वाखाली सोमवारी जिल्हाधिकाऱ्यांना निवेदन देण्यात आले.

निवेदनात म्हटले आहे की, लैंगिक गुन्हे, अंमली पदार्थांची तस्करी आणि सामाजिक शोषण या घटना केवळ स्थानिक स्वरूपाच्या राहिलेल्या नसून, त्या राष्ट्रीय स्तरावर कायदा व सुव्यवस्थेचा गंभीर प्रश्न बनल्या आहेत. त्यामुळे भारतीय न्याय संहिता (BNS), लैंगिक गुन्ह्यांपासून मुलांचे संरक्षण (पॉक्सो) कायदा २०१२ आणि कामाच्या ठिकाणी महिलांचा लैंगिक छळ प्रतिबंधक (पॉश) कायदा २०१३ यांची कठोर व प्रभावी अंमलबजावणी करावी, अशी मागणी करण्यात आली आहे.

तसेच सर्व शाळा, महाविद्यालये व विद्यापीठांमध्ये कार्यरत अंतर्गत तक्रार समित्या (ICC) अनिवार्य करण्यात याव्यात. पीडितांसाठी गोपनीय आणि सुरक्षित तक्रार यंत्रणा उभारावी. प्राथमिक पुरावे उपलब्ध असलेल्या प्रकरणांत आरोपींना तात्काळ निलंबित करून अटक करावी आणि अशा गुन्ह्यांसाठी जलदगती न्यायालयांची स्थापना करावी, अशीही मागणी करण्यात आली आहे.

शाळा, महाविद्यालये आणि वसतिगृहांच्या परिसरात अंमली पदार्थांची बेकायदेशीर विक्री वाढत असल्याने, शैक्षणिक संस्थांचे नियमित ऑडिट करावे व एनडीपीएस कायदा १९८५ ची कठोर अंमलबजावणी करावी, अशी मागणी निवेदनात करण्यात आली आहे. यासोबतच जिल्हा व राज्य पातळीवर विशेष अंमली पदार्थविरोधी पथके स्थापन करून सतत देखरेख ठेवावी, असेही नमूद करण्यात आले आहे.

नाईट पब्समध्ये नियमबाह्य वेळेपर्यंत मद्यपान सुरू राहणे आणि अपुरी देखरेख यामुळे तरुणींच्या सुरक्षिततेला धोका निर्माण होत असल्याचे सांगत, नियमांचे उल्लंघन करणाऱ्या आस्थापनांचे परवाने निलंबित किंवा रद्द करावेत. सीसीटीव्ही देखरेख, महिला सुरक्षा कर्मचारी आणि पोलिस पडताळणी सक्तीची करावी, अशी मागणीही करण्यात आली आहे.

निवेदन सादर केल्यानंतर प्रसारमाध्यमांशी बोलताना रमाकांत कोंडुसकर आणि बेळगाव तालुकाप्रमुख भरत पाटील यांनी प्रशासनाने या मागण्यांची तातडीने पूर्तता करून कठोर कारवाई करावी, अशी अपेक्षा व्यक्त केली. यावेळी श्रीराम सेना हिंदुस्थानचे पदाधिकारी आणि कार्यकर्ते मोठ्या संख्येने उपस्थित होते.

The post लैंगिक गुन्हे रोखण्यासाठी कायद्याच्या कठोर अंमलबजावणीची मागणी appeared first on News 24 Tass Marathi.