बेळगाव : दक्षिण महाराष्ट्र शिक्षण मंडळ संचलित ज्योती सेंट्रल स्कूलच्या विद्यार्थ्यांनी भारत विकास परिषदेतर्फे सिंधनूर येथे आयोजित राज्यस्तरीय गायन स्पर्धेत उल्लेखनीय यश मिळवले. हिंदी गायन, संस्कृत गायन आणि लोकगीत गायन या तिन्ही प्रकारांत प्रथम क्रमांक पटकावत विद्यार्थ्यांनी शाळेच्या शिरपेचात मानाचा तुरा रोवला.

या यशाच्या जोरावर विद्यार्थ्यांची चेन्नई येथे होणाऱ्या दक्षिण भारत प्रादेशिक गायन स्पर्धेसाठी निवड झाली आहे. तिन्ही गायन प्रकारांत मिळवलेल्या या यशामुळे शाळेच्या सांस्कृतिक क्षेत्रातील कामगिरीत आणखी भर पडली आहे.

विद्यार्थ्यांच्या या यशाबद्दल शाळेचे प्राचार्य प्रदीप पाटील यांच्याहस्ते विजेत्या विद्यार्थ्यांचा तसेच त्यांना मार्गदर्शन करणाऱ्या संगीत शिक्षिका अक्षता मोरे यांचा सत्कार करण्यात आला.

या यशाबद्दल संस्थेचे अध्यक्ष प्रा. आर. के. पाटील, उपाध्यक्ष प्रा. आर. एस. पाटील, सचिव प्रा. नितीन घोरपडे, प्राचार्य प्रदीप पाटील आणि उपप्राचार्य मनोहर करडी यांनी विद्यार्थ्यांचे व त्यांच्या मार्गदर्शिकेचे अभिनंदन केले. आगामी दक्षिण भारत प्रादेशिक स्पर्धेसाठी त्यांनी विद्यार्थ्यांना शुभेच्छाही दिल्या.

चेन्नई येथे होणाऱ्या स्पर्धेतही ज्योती सेंट्रल स्कूलचे विद्यार्थी यशाची परंपरा कायम राखतील, असा विश्वास संस्थेच्या पदाधिकाऱ्यांनी व्यक्त केला.

The post ज्योती सेंट्रल स्कूलच्या विद्यार्थ्यांची राज्यस्तरीय गायन स्पर्धेत बाजी appeared first on News 24 Tass Marathi.

आधार शिक्षण संस्थेच्या मंडोळी रोड येथील जोशीज सेंट्रल पब्लिक स्कूलच्या वतीने महात्मा गांधी आणि लालबहादूर शास्त्री जयंती साजरी करण्यात आली. प्रारंभी राष्ट्रपुरुषांच्या प्रतिमेचे पूजन करण्यात आले. शिक्षण संस्थेचे चेअरमन डॉ. डी. टी. बामणे यांच्या मार्गदर्शनानुसार विविध कार्यक्रमांचे आयोजन करण्यात आले होते. विद्यार्थ्यांनी विविध सांस्कृतिक कार्यक्रम सादर करून राष्ट्रपुरुषांना मानवंदना दिली. प्राचार्य डॉ. अरुण जाधव यांनी विद्यार्थ्यांना मार्गदर्शन केले. कार्यक्रम संयोजनासाठी शिक्षक व कर्मचारी वर्गाने परिश्रम घेतले.

The post जोशीज सेंट्रल पब्लिक स्कूल मध्ये गांधी शास्त्री जयंती साजरी appeared first on News 24 Tass Marathi.

शाळेच्या छत्रपती श्री शिवाजी महाराज सभागृहात आयोजित कार्यक्रमाच्या अध्यक्षस्थानी एस.डी.एम.सी.अध्यक्षा सौ.दिव्या संदिप कुंडेकर होत्या. यावेळी
भारतीय सैनिक कु. धिरज बजरंग घाडी, भारतीय सीआरपीएफच्या कु. श्रध्दा सुभाष धुळजी, स.डी.एम.सी उपाध्यक्ष श्री.जोतिबा यल्लाप्पा उडकेकर, सदस्य श्री. चांगदेव शिवाजी मुरकुटे, श्री. मारुती कृष्णा यळगुकर,सदस्या सौ.प्रियका राणोजी सांबरेकर तसेच शाळेचे वरिष्ठ मुख्याध्यापक श्री. राजेंद्र चलवादी उपस्थित होते.

मान्यवरांचे पुष्पगुच्छ देऊन स्वागत करण्यात आले. त्यानंतर कु. श्रध्दा सुभाष धुळजी यांच्याहस्ते महात्मा गांधी यांच्या प्रतिमेचे, तर कु. धीरज बजरंग घाडी यांच्याहस्ते लालबहादूर शास्त्री यांच्या प्रतिमेचे पूजन करण्यात आले. उपस्थित मान्यवरांच्याहस्ते दीपप्रज्वलन करून करून कार्यक्रमाची सुरुवात झाली.

यावेळी ‘जय जवान, जय किसान’ या लाल बहाद्दूर शास्त्री यांच्या विचारांचा संदर्भ देत शाळेतील माजी विद्यार्थी आणि भारतीय सैनिक कु. धिरज बजरंग घाडी तसेच भारतीय सी.आर.पी.एफ पोलीस कु. श्रध्दा सुभाष धुळजी यांचा शाळेच्या वतीने शाल, पुष्पहार व स्मृती चिन्ह देऊन सत्कार करण्यात आला.

विद्यार्थ्यांनी महात्मा गांधी आणि लालबहाद्दूर शास्त्री यांच्या जीवन कार्यावर प्रभावी भाषणे केली. तसेच संगीत सादरीकरणातून कार्यक्रमाची रंगत वाढविली.

सन २०२६ -२७ च्या पहिल्या सत्रातील शैक्षणिक आणि क्रीडा स्पर्धांमध्ये उल्लेखनीय कामगिरी करणाऱ्या विद्यार्थ्यांचा एस.डी.एम.सी.सदस्य श्री चांगदेव शिवाजी मुरकुटे यांच्याहस्ते वह्या देऊन गौरव करण्यात आला. तसेच जयंती निमित्त भाषण करणाऱ्या विद्यार्थ्यांना एस.डी.एम.सी. सदस्य श्री. मारुती कृष्णा यळगुकर यांनी आपल्या आजी कै.गंगुबाई लुमाण्णा यळगुकर यांच्या स्मरणार्थ वह्या देऊन प्रोत्साहन दिले.

श्रध्दा सुभाष धुळजी यांनी आपल्या विचारांतून विद्यार्थ्यांना यशस्वी होण्यासाठी मार्गदर्शन केले. कु. धिरज बजरंग घाडी यांनी आपल्या विचारांतून विद्यार्थी घडविताना आवश्यक असलेल्या कला गुणांवर मार्गदर्शन केले. एस.डी.एम.सी.उपाध्यक्ष श्री. जोतिबा यल्लाप्पा उडकेकर यांनी महात्मा गांधी – लालबहादूर शास्त्री जयंतीच्या शुभेच्छा देत विद्यार्थ्यांचे अभिनंदन केले तसेच मुख्याध्यापक, शिक्षकवृंद आणि विद्यार्थांचे कौतुक केले.

अध्यक्षीय भाषणात सौ.दिव्या संदीप कुंडेकर यांनी विद्यार्थ्यांना प्रोत्साहन देत बक्षीसे देणाऱ्या एस. डी. एम.सी. सदस्यांचे आभार मानले.

कार्यक्रमाचे सूत्रसंचालन संचालक शाळेच्या सहशिक्षिका सौ. मेघा देसाई यांनी केले. स्वागत शाळेच्या सहशिक्षिका सौ.ऐश्वर्या मेणसे यांनी केले, तर मान्यवरांचे आभार शिक्षक श्री. सातेरी पाखरे यांनी मानले. कार्यक्रमास एस.डी.एम.सी.अध्यक्षा, उपाध्यक्ष, सदस्य, वरिष्ठ मुख्याध्यापक, शिक्षकवृंद आणि सर्व विद्यार्थी मोठ्या संख्येने उपस्थित होते.

The post येळ्ळूर के.पी.एस.मराठी मॉडेल शाळेत महात्मा गांधी – लालबहादूर शास्त्री जयंती उत्साहात appeared first on News 24 Tass Marathi.

बेळगुंदी : पश्चिम विभाग शिक्षण मंडळ संचलित बिजगर्णी हायस्कूलच्या विद्यार्थ्यांनी नुकत्याच पार पडलेल्या बेळगुंदी विभागीय माध्यमिक शालेय क्रीडा स्पर्धांसह तालुकास्तरीय स्पर्धांमध्ये उल्लेखनीय कामगिरी केली आहे. विविध क्रीडा प्रकारांत यश मिळवत विद्यार्थ्यांनी शाळेचा नावलौकिक वाढविला आहे.

गोळाफेक स्पर्धेतील कामगिरीच्या जोरावर श्रीनाथ निलजकर याची जिल्हास्तरीय स्पर्धेसाठी निवड झाली आहे. त्याने थाळीफेक आणि भालाफेक स्पर्धेतही द्वितीय क्रमांक पटकावला. शाळेच्या मुला-मुलींच्या खो-खो संघांनी तृतीय क्रमांक मिळविला.

• विविध क्रीडा प्रकारांत विद्यार्थ्यांचे यश :

१४ वर्षांखालील मुलांच्या २०० मीटर रिले स्पर्धेत शाळेच्या संघाने प्रथम क्रमांक मिळविला. १७ वर्षांखालील मुलींच्या ४०० मीटर रिले स्पर्धेत तृतीय, तर मुलांच्या १०० मीटर रिले स्पर्धेत द्वितीय क्रमांक पटकावला.

वैयक्तिक क्रीडा प्रकारांतही विद्यार्थ्यांनी यश संपादन केले. १४ वर्षांखालील बुद्धिबळ स्पर्धेत कार्तिकी भास्कर हिने द्वितीय क्रमांक मिळविला. लांब उडी स्पर्धेत मिताली मोरे हिने द्वितीय क्रमांक पटकावला, तर १०० मीटर धावण्याच्या स्पर्धेत दिशा सुतार हिने द्वितीय क्रमांक मिळविला. १७ वर्षांखालील मुलींच्या धावण्याच्या स्पर्धेत ऐश्वर्या अष्टेकर हिने द्वितीय क्रमांक मिळवून यशाची नोंद केली.

या सर्व विद्यार्थ्यांना क्रीडाशिक्षक अरुण दरेकर आणि मुख्याध्यापक रमेश कांबळे यांचे मार्गदर्शन लाभले. विद्यार्थ्यांच्या या यशाबद्दल शिक्षक, पालक आणि संस्थेच्या पदाधिकाऱ्यांनी समाधान व्यक्त करून यशस्वी खेळाडूंचे अभिनंदन केले.

The post बिजगर्णी हायस्कूलच्या विद्यार्थ्यांची विविध क्रीडा स्पर्धांत उल्लेखनीय कामगिरी appeared first on News 24 Tass Marathi.

बेळगाव : बेळगाव येथील ‘सत् संस्कार इंटरनॅशनल स्कूल’मधील बालवाटिका – १ (नर्सरी) वर्गात शिकणाऱ्या तीन वर्षीय कुमार नवतेज भूषण पालकर याने जागतिक विक्रमाची नोंद करत शाळेसह कुटुंबाचे नाव उज्ज्वल केले आहे.

कोणत्याही चित्रांचा आधार न घेता केवळ लिखित मजकूर वाचून ३० सेकंदांत १५ फळे आणि प्राण्यांची नावे वाचण्याची कामगिरी नवतेजने केली. त्याच्या या कामगिरीची ‘वर्ल्डवाईड बुक ऑफ रेकॉर्ड्स’ने अधिकृत दखल घेतली आहे.

या उल्लेखनीय कामगिरीबद्दल बेळगावचे जिल्हाधिकारी मोहम्मद रोशन (IAS) यांनी नवतेजचा सत्कार करून त्याचे कौतुक केले. सत्संस्कार इंटरनॅशनल स्कूलचे व्यवस्थापन, मुख्याध्यापक आणि कर्मचारीवर्गाने नवतेजचे अभिनंदन करत त्याच्या पुढील वाटचालीस शुभेच्छा दिल्या.

The post सत् संस्कार इंटरनॅशनल स्कूलच्या नवतेज पालकरची जागतिक विक्रमाला गवसणी appeared first on News 24 Tass Marathi.

बेळगाव : हॅपी हार्ट फाऊंडेशन आणि रोटरी क्लब ऑफ बेळगाव दर्पण यांच्या संयुक्त विद्यमाने भरतेश कन्नड माध्यम शाळेत ‘ॲनिमिया मुक्त बेळगाव’ अभियान राबविण्यात आले. या उपक्रमात एकूण ४२३ विद्यार्थी व कर्मचाऱ्यांची हिमोग्लोबिन तपासणी करण्यात आली.

आरोग्यविषयक या उपक्रमासाठी शाळेचे व्यवस्थापन, मुख्याध्यापक, शिक्षकवृंद आणि विद्यार्थ्यांनी उत्स्फूर्त सहभाग नोंदवत सहकार्य केले. त्यांच्या सहकार्याबद्दल आयोजकांकडून आभार व्यक्त करण्यात आले.

या उपक्रमात सहभागी होऊन सहकार्य केल्याबद्दल पाही वाईब्स यांचे तसेच निरोगी समाज निर्माण करण्याच्या कार्यात योगदान दिल्याबद्दल रोटे. रक्षायांचे विशेष आभार मानण्यात आले.

रोटरी क्लब ऑफ बेळगाव दर्पणच्या अध्यक्षा रोटे. डॉ. स्फूर्ती एस. मास्तीहोळी आणि सचिव रोटे. ज्योती कुलकर्णी यांच्या मार्गदर्शनाखाली हा उपक्रम पार पडला.

The post भरतेश कन्नड माध्यम शाळेत ‘ॲनिमिया मुक्त बेळगाव’ अभियान appeared first on News 24 Tass Marathi.

पहिल्या उपांत्य सामन्यात संत मीरा शाळेने भरतेश इंग्लिश मीडियम स्कूलचा ३-० असा पराभव केला. संचित धामणेकर, श्रेयस चंदन आणि हरीष पिरजादे यांनी प्रत्येकी एक गोल केला. दुसऱ्या उपांत्य सामन्यात सेंट पॉल्स शाळेने कनक मेमोरियल स्कूलचा ४-० असा पराभव केला. आराध्या नाकाडी आणि सकलेन मुल्ला यांनी प्रत्येकी दोन गोल केले.

अंतिम सामन्यात पहिल्या सत्रात दोन्ही संघांना गोल करण्यात यश आले नाही. दुसऱ्या सत्रात सेंट पॉल्सला पेनल्टी शूटआउटची संधी मिळाली आणि त्यावर गोल करत त्यांनी १-० अशी आघाडी घेतली. मात्र, सामना संपण्यास अवघे दोन मिनिटे शिल्लक असताना संत मीराच्या रत्नाकर गौतमने गोल करत सामना १-१ असा बरोबरीत आणला.

निर्धारित वेळेत सामना बरोबरीत राहिल्याने पंच कौशिक पाटील यांनी पेनल्टी शूटआउटचा निर्णय घेतला. त्यात दोन्ही संघांनी प्रत्येकी तीन गोल केले. त्यामुळे सडनडेथचा अवलंब करण्यात आला. यात संत मीरा शाळेने सेंट पॉल्सचा ६-५ असा पराभव करत विजेतेपदावर नाव कोरले.

संत मीरा संघाकडून समर्थ पानारी, रक्षित रामगोंडा, रेहान अख्तर, रत्नाकर गौतम आणि अनिरुद्ध हलगेकर यांनी पेनल्टी शूटआउटमध्ये गोल केले. सेंट पॉल्सकडून अब्दुल मतीन सय्यद, नवीन पत्की, सुमित गंगेकर आणि आराध्या नाकाडी यांनी गोल केले. तर सकलेन मुल्ला आणि हर्षित रेवणकर यांना गोल करण्यात यश आले नाही.

या विजयानंतर संत मीरा शाळेचा संघ आगामी जिल्हास्तरीय फुटबॉल स्पर्धेसाठी पात्र ठरला आहे. बक्षीस वितरण समारंभात नागराज भगवण्णावर, अँथोनी डिसोझा, जयसिंग धनाजी आणि बापू देसाई यांच्या हस्ते विजेत्या संघाला चषक व प्रमाणपत्र देऊन गौरविण्यात आले.

• सेंट पॉल्सचा सलग तिसरा पराभव

संत मीरा शाळेने गेल्या दोन वर्षांत सार्वजनिक शिक्षण खात्याच्या तालुकास्तरीय फुटबॉल स्पर्धेत सेंट पॉल्स शाळेला सलग दोन वेळा पराभूत केले आहे. तसेच फादर एड फुटबॉल स्पर्धेतही संत मीरा संघाने सेंट पॉल्सला पराभवाचा धक्का दिला होता. यंदाच्या विजयानंतर संत मीरा संघातील खेळाडूंचे सर्वत्र कौतुक होत आहे.

The post बेळगाव शहर तालुकास्तरीय फुटबॉल स्पर्धेत संत मीरा शाळेला विजेतेपद appeared first on News 24 Tass Marathi.

बेंगळुरू : राज्यातील लाखो शालेय विद्यार्थी आणि पालकांसाठी आनंदाची बातमी आहे. २०२६-२७ या शैक्षणिक वर्षातील दसरा सुटीची घोषणा शिक्षण विभागाने केली असून यंदा विद्यार्थ्यांना सलग १९ दिवसांची सुटी मिळणार आहे.

राज्यातील सर्व सरकारी, अनुदानित आणि खासगी प्राथमिक व माध्यमिक शाळांना ही सुटी लागू असणार आहे. शिक्षण विभागाच्या वार्षिक शैक्षणिक वेळापत्रकानुसार, दसरा सुटीला ३ ऑक्टोबर २०२६ रोजी सुरुवात होणार आहे. २१ ऑक्टोबर रोजी (बुधवारी) विजयादशमीच्या दिवशी सुटीचा शेवट होईल. त्यानंतर २२ ऑक्टोबरपासून शाळा पुन्हा सुरू होतील.

दोन ऑक्टोबर रोजी महात्मा गांधी जयंतीची सार्वजनिक सुटी असल्याने विद्यार्थ्यांना सलग सुट्यांचा लाभ मिळणार आहे. त्यामुळे दसरा सण साजरा करण्यासह सहलीचे नियोजन करण्याची संधी विद्यार्थ्यांना मिळणार आहे.

शैक्षणिक वेळापत्रकानुसार, दुसरे सत्र २२ ऑक्टोबर २०२६ ते १० एप्रिल २०२७ या कालावधीत असेल. त्यानंतर ११ एप्रिल २०२७ पासून उन्हाळी सुटी सुरू होणार आहे. दरम्यान स्थानिक हवामान परिस्थिती किंवा अन्य आवश्यकतेनुसार सुटीच्या वेळापत्रकात किरकोळ बदल करण्याचा अधिकार संबंधित जिल्ह्यांच्या उपसंचालकांना देण्यात आला आहे. शिक्षण विभागाच्या या घोषणेमुळे दसरा सण आणि पर्यटनाचे नियोजन करणाऱ्या विद्यार्थी व पालकांना दिलासा मिळाला आहे.

The post कर्नाटकातील शाळांना दसऱ्याची १९ दिवसांची सुटी जाहीर appeared first on News 24 Tass Marathi.

नेहरू क्रीडा मैदानावर ग्रामीण तालुका पातळीवर स्पर्धा शिक्षण खात्यातर्फे आयोजित करण्यात आलेल्या शालेय स्पर्धा उत्साहात संपन्न झाल्या पश्चिम विभाग शिक्षण मंडळ संचलित बिजगर्णी हायस्कूलचा खेळाडू श्रीनाथ चंद्रकांत निलजकर यांने गोळा फेक स्पर्धेत प्रथम क्रमांक पटकावून, जिल्हा स्तरावर जिद्द चिकाटीने मजल मारली आहे.ग्रामीण क्रीडाधिकारी साधना भद्री यांच्या हस्ते गौरव पत्र व‌ पदक देऊन सन्मानित करण्यात आले. क्रीडा शिक्षक ए. एम. दरेकर व मुख्याध्यापक रमेश कांबळे यांचे मार्गदर्शन लाभले. या यशाबद्दल शिक्षकवृंद, संस्था पदाधिकारी यांनी अभिनंदन केले आहे.

The post बिजगर्णी हायस्कूलच्या श्रीनाथ निलजकरची जिल्हास्तरावर निवड appeared first on News 24 Tass Marathi.

आधार एज्युकेशन सोसायटी संचालित मंडोळी रोड येथील जोशीज सेंट्रल पब्लिक स्कूलचे प्राचार्य डॉ. अरुण जाधव यांना राष्ट्रीय प्रतिभा सन्मान जाहीर झाला आहे. या पुरस्काराबद्दल त्यांचे सर्वत्र अभिनंदन होत आहे. नीती आयोग पुरस्कृत नवी दिल्ली येथील वर्दी वेलनेस फाउंडेशन ट्रस्ट यांच्या वतीने त्यांना हा सन्मान जाहीर करण्यात आला आहे. शैक्षणिक क्षेत्रात दिलेल्या मौलिक योगदानाबद्दल त्यांना या पुरस्काराने सन्मानित करण्यात आले आहे. या पुरस्काराबद्दल आधार एज्युकेशन सोसायटीचे चेअरमन डॉक्टर डी. टी.बामणे आणि संचालक मंडळाने त्यांचे विशेष अभिनंदन केले आहे.

The post डॉ. अरुण जाधव यांना राष्ट्रीय प्रतिभा सन्मान appeared first on News 24 Tass Marathi.