बेळगाव : सावगाव येथील मराठी प्राथमिक शाळेत कन्नड माध्यमाची शाळा सुरू करण्याच्या प्रस्तावाला ग्रामस्थ, पालक आणि शाळा सुधारणा समितीने तीव्र विरोध दर्शवल्यानंतर शिक्षण विभागाला अखेर माघार घ्यावी लागली. मराठी शाळेत कन्नड वर्ग सुरू करण्याऐवजी पर्यायी जागेची व्यवस्था करून तेथे कन्नड शाळा भरविण्याचे आश्वासन शिक्षण अधिकाऱ्यांनी दिल्याने ग्रामस्थांच्या आंदोलनाला यश मिळाले आहे.

सावगाव येथील मराठी प्राथमिक शाळेत कन्नड शाळा सुरू करण्याचा घाट घालण्यात येत असल्याची माहिती समोर आल्यानंतर मराठी भाषिकांमध्ये तीव्र नाराजी पसरली होती. या निर्णयाच्या निषेधार्थ जिल्हा शिक्षणाधिकाऱ्यांना मोठ्या संख्येने निवेदन देण्याची तयारी ग्रामस्थांनी केली होती. मात्र परिस्थिती चिघळण्याची शक्यता लक्षात घेऊन क्षेत्र शिक्षणाधिकारी (बीईओ) यांनी थेट सावगाव शाळेत भेट देत ग्रामस्थांशी चर्चा केली.

यावेळी अधिकाऱ्यांनी ग्रामस्थांना एक महिन्याचा कालावधी देण्याची विनंती करत कन्नड माध्यमाच्या शाळेसाठी पर्यायी व्यवस्था करण्यात येईल, असे आश्वासन दिले. त्यावर ग्रामस्थांनी जुनी शाळा स्वच्छ करून तिचा वापर करण्याची सूचना केली. तसेच जुनी इमारत दुरुस्त होईपर्यंत भाडेतत्त्वावर जागा घेऊन शाळा चालविण्याची तयारीही दर्शविली. त्यासाठी लागणारा खर्चही उचलण्याची तयारी ग्रामस्थांनी व्यक्त केली. मात्र कोणत्याही परिस्थितीत मराठी माध्यमाच्या शाळेत कन्नड शाळा सुरू करू नये, अशी ठाम भूमिका त्यांनी मांडली.

ग्रामस्थांच्या भावना आणि मागणीची दखल घेत क्षेत्र शिक्षणाधिकाऱ्यांनी पर्यायी जागा शोधून तेथे कन्नड माध्यमाची शाळा सुरू करण्याचे मान्य केले. त्यामुळे मराठी शाळेचे अस्तित्व कायम राखण्यात यश आल्याची भावना ग्रामस्थांनी व्यक्त केली.

यावेळी शाळा सुधारणा समितीचे अध्यक्ष सागर सांगावकर, बेळगाव क्षेत्र शिक्षणाधिकारी दान्नामा जाळकी, शिक्षण संयोजक बडीगेर, क्लस्टर प्रमुख सतीश पाटील, मुख्याध्यापक एल. एस. चांदीलकर, युवा समिती सीमाभागचे अध्यक्ष शुभम शेळके, तालुका महाराष्ट्र एकीकरण समितीचे कार्याध्यक्ष आर. एम. चौगुले, युवा समिती सीमाभागचे कार्याध्यक्ष धनंजय पाटील, सरचिटणीस मनोहर हुंदरे, मोतेश बारदेसकर, अनिल हेगडे, श्रीकांत कदम, सचिन केळवेकर, बसवंत घाटेगस्ती, निंगाप्पा मोरे, परशराम आकनोजी, यल्लापा पाटील, दर्शन घाटेगस्ती, प्रदीप मोरे, योगेश आकनोजी, महेश कदम, निकिता पाटील, रेखा घाटेगस्ती, अनिता बसरीकट्टी, सुजाता काकतकर आदी उपस्थित होते.

The post सावगाव ग्रामस्थांच्या एकजुटीपुढे शिक्षण विभागाची माघार appeared first on News 24 Tass Marathi.

बेळगाव : कर्नाटक सरकारने कामगारांच्या किमान वेतनात केलेल्या वाढीच्या दुरुस्ती आदेशाविरोधात बेळगावातील उद्योजक आणि व्यापारी रस्त्यावर उतरले. चेंबर ऑफ कॉमर्स अँड इंडस्ट्रीजच्या नेतृत्वाखाली काढण्यात आलेल्या भव्य निषेध मोर्चाद्वारे जिल्हाधिकाऱ्यांमार्फत सरकारला निवेदन सादर करण्यात आले. वेतनवाढीचा निर्णय लघु व मध्यम उद्योगांसाठी घातक असल्याचा दावा करत हा आदेश तातडीने मागे घेण्याची मागणी करण्यात आली.

उद्यमबाग येथील चेंबर ऑफ कॉमर्स अँड इंडस्ट्रीजच्या वतीने राणी चन्नम्मा चौकाजवळील कन्नड साहित्य भवन येथून जिल्हाधिकारी कार्यालयापर्यंत निषेध मोर्चा काढण्यात आला. चेंबर ऑफ कॉमर्सचे अध्यक्ष प्रभाकर नागरमुनोळी, सचिव सतीश कुलकर्णी आणि संचालक एम. के. हेगडे यांच्या नेतृत्वाखाली शेकडो व्यापारी आणि उद्योजकांनी या आंदोलनात सहभाग घेतला.

यावेळी बोलताना प्रभाकर नागरमुनोळी यांनी सरकारच्या निर्णयावर तीव्र नाराजी व्यक्त केली. सरकारने कामगारांचे किमान वेतन १२ हजार रुपयांवरून थेट २० हजार रुपये केल्याने लघु आणि मध्यम उद्योगांवर मोठा आर्थिक बोजा पडणार असल्याचे त्यांनी सांगितले. आधीच आर्थिक अडचणींमुळे अनेक उद्योग संकटात असताना हा निर्णय उद्योग क्षेत्रासाठी धोकादायक ठरणार असल्याचा इशारा त्यांनी दिला. सरकारने या निर्णयाचा तातडीने पुनर्विचार करावा, अन्यथा आंदोलन अधिक तीव्र करण्यात येईल, असेही त्यांनी स्पष्ट केले.

सतीश कुलकर्णी आणि इतर पदाधिकाऱ्यांनी सांगितले की, देशातील इतर कोणत्याही राज्यात इतक्या मोठ्या प्रमाणात वेतनवाढ करण्यात आलेली नाही. विविध करांच्या वाढीमुळे उद्योजक आधीच अडचणीत आले आहेत. अशा परिस्थितीत वेतनवाढीचा अतिरिक्त भार उद्योगांवर टाकणे योग्य नसल्याचे त्यांनी नमूद केले. कामगारांना मदत करायची असल्यास शासनाने स्वतः आर्थिक सहाय्य द्यावे, मात्र त्याचा संपूर्ण बोजा उद्योगांवर टाकू नये, अशी भूमिका त्यांनी मांडली.

या निषेध मोर्चात चेंबर ऑफ कॉमर्सचे सदस्य, व्यापारी आणि स्थानिक उद्योजक मोठ्या संख्येने सहभागी झाले होते.

The post किमान वेतनवाढीचा दुरुस्ती आदेश तातडीने रद्द करा appeared first on News 24 Tass Marathi.

बेळगाव : एलपीजी गॅस तसेच पेट्रोल-डिझेलच्या वाढत्या किमतींच्या निषेधार्थ शहर महिला काँग्रेसच्या वतीने बेळगावात वेगळ्या पद्धतीने आंदोलन करण्यात आले. कार्यकर्त्यांनी भररस्त्यात चूल मांडून स्वयंपाक करत केंद्र सरकारच्या धोरणांविरोधात आवाज उठवला. यावेळी दरवाढ मागे घेण्यासाठी केंद्र सरकारला सात दिवसांची मुदत देण्यात आली.

राणी चन्नम्मा चौकात आयोजित आंदोलनात महिला काँग्रेसच्या कार्यकर्त्यांनी चूल पेटवून चहा आणि जेवण तयार केले. तयार करण्यात आलेले खाद्यपदार्थ नागरिकांना वाटप करत त्यांनी महागाईच्या मुद्द्याकडे लक्ष वेधले आणि केंद्र सरकारच्या धोरणांचा निषेध व्यक्त केला.

आंदोलनादरम्यान आयेशा सनदी यांनी केंद्र सरकारवर टीका करत इंधन आणि स्वयंपाकाच्या गॅसच्या किमती नियंत्रणात ठेवण्यात सरकार अपयशी ठरल्याचा आरोप केला. गॅस दरवाढीच्या विरोधात पूर्वी आंदोलन करणारे भाजपचे नेते आता शांत का आहेत, असा प्रश्नही त्यांनी उपस्थित केला. पुढील सात दिवसांत एलपीजी, पेट्रोल आणि डिझेलच्या किमती कमी न झाल्यास दिल्लीत जाऊन अधिक तीव्र स्वरूपाचे आंदोलन छेडण्यात येईल, असा इशाराही त्यांनी दिला.

महिला काँग्रेसच्या शहराध्यक्षा लता शिवाजीराव माने यांनी महागाईचा सर्वाधिक फटका सर्वसामान्य आणि कष्टकरी कुटुंबांना बसत असल्याचे सांगितले. वाढत्या दरांमुळे घरगुती अर्थसंकल्पावर ताण निर्माण झाला असून महिलांसमोर आर्थिक अडचणी वाढल्या आहेत. त्यामुळे केंद्र सरकारने तातडीने दरवाढीचा निर्णय मागे घ्यावा, अशी मागणी त्यांनी केली.

या आंदोलनात गॅरंटी योजनांचे जिल्हाध्यक्ष विनय नावलगट्टी यांच्यासह काँग्रेसचे अनेक पदाधिकारी आणि कार्यकर्ते सहभागी झाले होते.

The post गॅस – इंधन दरवाढीविरोधात बेळगावात महिला काँग्रेसचे आंदोलन appeared first on News 24 Tass Marathi.

बेळगाव : आगामी बकरी ईद सणाच्या पार्श्वभूमीवर राज्यात अवैध गोहत्या आणि गोवंश वाहतुकीवर कठोर बंदी घालावी, या मागणीसाठी विश्व हिंदू परिषद आणि बजरंग दल यांच्या कार्यकर्त्यांनी जिल्हाधिकाऱ्यांच्या माध्यमातून राज्य सरकारला निवेदन सादर केले. कर्नाटकातील गोहत्या प्रतिबंधक कायद्याची प्रभावी अंमलबजावणी करण्याची मागणीही यावेळी करण्यात आली.

बकरी ईद दरम्यान कुर्बानीच्या नावाखाली होणाऱ्या कथित अवैध गोहत्येला आळा घालण्यासाठी संघटनांच्या वतीने आंदोलन करण्यात आले. यावेळी विविध पदाधिकाऱ्यांनी आपली भूमिका मांडत प्रशासनाने तातडीने कारवाई करावी, अशी मागणी केली.

या आंदोलनात बोलताना मुप्पिन काडसिद्धेश्वर स्वामीजी यांनी बकरी ईदच्या काळात होणारी गोहत्या रोखण्यासाठी सरकारने कठोर उपाययोजना करणे आवश्यक असल्याचे सांगितले. सरकारी आदेश असूनही काही ठिकाणी अवैध जनावर वाहतूक आणि गोहत्या सुरू असल्याचा आरोप त्यांनी केला. हिंदू धर्मात गाईला पूजनीय स्थान असल्यामुळे अशा घटनांमुळे धार्मिक भावना दुखावल्या जात असल्याचे त्यांनी नमूद केले.

याचबरोबर २९ मेपर्यंत जनावरांचे बाजार बंद ठेवावेत तसेच प्रमुख रस्त्यांवर पोलीस तपासणी नाके उभारून विशेष पथके नियुक्त करावीत, अशी मागणीही त्यांनी केली.

आंदोलनातील दुसरे वक्ते कृष्णा भट यांनी भारत हा कृषिप्रधान देश असून गोधनाची संख्या सातत्याने घटत असल्याची चिंता व्यक्त केली. काही राज्यांमध्ये गोवंश संवर्धनासाठी विशेष उपाययोजना सुरू असल्याचे सांगत त्यांनी देशभरात गोहत्या पूर्णपणे थांबवून गाईला राष्ट्रीय प्राण्याचा दर्जा द्यावा, अशी मागणी केली.

या आंदोलनात विजय जाधव, ए. एन. करलिंगण्णावर, डॉ. सुभाष पाटील, श्रीदेवी बुडवी, आनंद करलिंगण्णावर, भावकण्णा लोहार, सुनील, किरण किल्लेकर यांच्यासह अनेक कार्यकर्ते आणि पदाधिकारी सहभागी झाले होते.

The post गोहत्येवर बंदी घालण्याची विश्व हिंदू परिषद – बजरंग दलाची मागणी appeared first on News 24 Tass Marathi.

बेळगाव : शिंदोळी येथील सरकारी शाळा बंद करून ती ‘केपीएस मॅग्नेट’ योजनेअंतर्गत मास्तमर्डी येथील शाळेत विलीन करण्याच्या निर्णयाविरोधात आज शिंदोळी गावात पालक, ग्रामस्थ आणि विद्यार्थ्यांनी जोरदार आंदोलन छेडले. ‘सार्वजनिक शिक्षण वाचवा’ समिती आणि ‘एआयडीएसओ’ संघटनेच्या संयुक्त नेतृत्वाखाली झालेल्या या आंदोलनात सरकारच्या शिक्षण धोरणाचा तीव्र निषेध करण्यात आला.

शाळेच्या मुख्य प्रवेशद्वारासमोर “आमची शाळा, आमच्या गावचे भूषण” असा फलक लावून आंदोलकांनी सरकारविरोधात घोषणाबाजी केली. महात्मा ज्योतिबा फुले, क्रांतीज्योती सावित्रीबाई फुले आणि ईश्वरचंद्र विद्यासागर यांच्या प्रतिमा हातात घेऊन महिलांनी मोठ्या संख्येने आंदोलनात सहभाग घेतला.

“आम्ही रोजंदारीवर काम करणारे गरीब लोक आहोत. गावात शाळा असल्यामुळे आमची मुले सुरक्षित राहतात. शाळा दुसऱ्या गावी हलवली तर मुलांच्या सुरक्षिततेची जबाबदारी कोण घेणार?” असा सवाल पालक रमा नागण्णावर यांनी उपस्थित केला. तर “मुलींवरील अत्याचारांच्या घटना वाढत असताना आम्ही मुलींना दुसऱ्या गावी पाठवणार नाही. खाजगी शाळांचे शुल्क भरण्याची आमची ऐपत नाही,” असे सांगत लक्ष्मी करेगार यांनी सरकारच्या निर्णयावर संताप व्यक्त केला.

एआयडीएसओचे जिल्हा समन्वयक महांतेश बिळूर यांनी सरकारवर जोरदार टीका करत ‘केपीएस मॅग्नेट’ योजनेच्या माध्यमातून शिक्षणाचे खाजगीकरण करण्याचा प्रयत्न सुरू असल्याचा आरोप केला. “महात्मा फुले, सावित्रीबाई फुले आणि विद्यासागर यांनी सर्वसामान्यांसाठी शिक्षणाचे स्वप्न पाहिले होते. मात्र आज त्याच शिक्षणापासून गरीबांना दूर केले जात आहे,” असे ते म्हणाले.

आंदोलनानंतर निलजी ग्रामपंचायतीचे अध्यक्ष सतीश शहापूरकर यांना मागण्यांचे निवेदन देण्यात आले. “सरकारी शाळा बंद करणे म्हणजे गरीब विद्यार्थ्यांवर अन्याय आहे. ग्रामस्थांच्या भावना आणि मागण्या तातडीने सरकारपर्यंत पोहोचवल्या जातील,” असे आश्वासन त्यांनी दिले.

या आंदोलनात शांता शहापूरकर, शांता तिप्पण्णागोळ, भरमव्वा शहापूरकर, लक्ष्मी शहापूरकर, बाळव्वा अगसीमनी, माळिंगराया तिप्पण्णागोळ, भावकण्णा कणबरकर यांच्यासह मोठ्या संख्येने पालक, महिला, ग्रामस्थ आणि विद्यार्थी सहभागी झाले होते.

The post शिंदोळीतील सरकारी शाळा बंद करण्याच्या निर्णयाविरोधात ग्रामस्थ आक्रमक appeared first on News 24 Tass Marathi.

बेळगाव : रेशन दुकानांवरील सततच्या सर्व्हर समस्येमुळे धान्य वितरणावर गंभीर परिणाम होत असून, याविरोधात बेळगाव जिल्ह्यातील रास्त भाव धान्य दुकानदारांनी जिल्हाधिकारी कार्यालयासमोर निदर्शने करत प्रशासनाचा निषेध केला. यावेळी जिल्हाधिकाऱ्यांच्या माध्यमातून सरकारला विविध मागण्यांचे निवेदन सादर करण्यात आले.

जिल्ह्यातील रास्त भाव धान्य दुकानदारांनी आज मोर्चा काढून सर्व्हर डाऊनमुळे निर्माण झालेल्या अडचणी प्रशासनासमोर मांडल्या. चालू महिन्याच्या सुरुवातीपासूनच रेशन दुकानांवरील सर्व्हर समस्या गंभीर बनली असून, सर्व्हर संथ गतीने चालत असल्याने नागरिकांच्या अंगठ्याचा ठसा स्वीकारण्यासाठी मोठा वेळ लागत आहे. त्यामुळे अनेक गरीब नागरिकांना सकाळपासून संध्याकाळपर्यंत रेशन दुकानांसमोर रांगेत थांबावे लागत असल्याचे दुकानदारांनी सांगितले.

जिल्ह्यात आतापर्यंत केवळ ४० टक्के तांदळाचे वाटप झाले असून उर्वरित ६० टक्के वितरण अद्याप बाकी आहे. अशातच अन्न नागरी पुरवठा विभागाने एका व्यक्तीकडून दोनदा अंगठ्याचा ठसा घेण्याचा नियम लागू केल्याने परिस्थिती आणखी गुंतागुंतीची बनल्याचा आरोप करण्यात आला.

“एकदाच अंगठ्याचा ठसा उमटवताना अडचणी येत असताना दोनदा ठसा घेण्याची सक्ती अन्यायकारक आहे. पुढील महिन्यापासून केवळ एकदाच ठसा घेण्याची परवानगी द्यावी आणि सर्व्हरची समस्या कायमची सोडवावी,” अशी मागणी संघटनेचे प्रतिनिधी राजशेखर तळवार यांनी केली.

दरम्यान, जिल्हाधिकाऱ्यांनी दुकानदारांचे निवेदन स्वीकारून या प्रश्नावर सकारात्मक तोडगा काढण्याचे आश्वासन दिले. आंदोलनात बेळगाव जिल्ह्यातील रास्त भाव धान्य दुकानदार संघटनेचे पदाधिकारी आणि मोठ्या संख्येने दुकानदार सहभागी झाले होते.

The post सर्व्हर समस्येविरोधात रेशन दुकानदारांचा जिल्हाधिकारी कार्यालयावर मोर्चा appeared first on News 24 Tass Marathi.

ऑल इंडिया केमिस्ट अँड ड्रगिस्ट ऑर्गनायझेशन यांच्या देशव्यापी आंदोलनाला पाठिंबा देत बेळगावमधील औषध विक्रेत्यांनी काळ्या फिती बांधून आंदोलन केले. असोसिएशनचे अध्यक्ष बंडू सदलगे, सचिव सुधीर नंजन्नावर आणि उपाध्यक्ष पवन देसाई यांच्या नेतृत्वाखाली हे आंदोलन पार पडले.

“ऑनलाईन फार्मसी बंद करा” अशा घोषणा देत आंदोलकांनी सरकारकडे आपली भूमिका मांडली. ऑनलाईन माध्यमातून औषध विक्रीमुळे बनावट औषधांचा धोका वाढत असून त्याचा सार्वजनिक आरोग्यावर परिणाम होत असल्याचा दावा आंदोलकांनी केला. तसेच व्यसनाधीनता वाढवणारी औषधे सहज उपलब्ध होत असल्याने तरुण पिढी धोक्यात येत असल्याची चिंता व्यक्त करण्यात आली.

निवेदनात पारंपरिक किरकोळ औषध विक्रेत्यांवर आर्थिक संकट ओढवण्याची शक्यता व्यक्त करण्यात आली आहे. तसेच डॉक्टरांकडून थेट औषध विक्री होत असल्याने जीएसटी महसुलाचे नुकसान होत असल्याचाही आरोप करण्यात आला.

यावेळी पत्रकारांशी बोलताना महेश अनगोळकर यांनी सांगितले की, ऑनलाईन फार्मसी पद्धतीवर कोणतेही प्रभावी नियंत्रण नसल्याने ग्राहकांना कोणती औषधे दिली जात आहेत, याचीही स्पष्ट माहिती मिळत नाही. त्यामुळे सरकारने तातडीने ऑनलाईन औषध विक्रीवर बंदी घालावी, अशी मागणी त्यांनी केली.

डॉक्टरांना थेट औषध पुरवठा करण्याच्या पद्धतीलाही विरोध असल्याचे त्यांनी स्पष्ट करत, या संदर्भातील नियम रद्द करण्याची मागणी सरकारकडे करण्यात आल्याचे सांगितले.

The post ऑनलाईन फार्मसी बंद करण्याची सरकारकडे मागणी appeared first on News 24 Tass Marathi.

बेळगावमधील खासगी भाजी मार्केट बंद झाल्यानंतर गेल्या आठ महिन्यांपासून तेथील व्यापाऱ्यांना रविवारी भरवण्यात येणाऱ्या शेतकरी बाजारात गाळे देण्यात आले आहेत. यामुळे एपीएमसीच्या हद्दीतच दोन स्वतंत्र बाजारपेठा निर्माण झाल्याने शेतमालाच्या किमतींमध्ये तफावत निर्माण होत असल्याची तक्रार व्यापाऱ्यांनी केली.

एपीएमसीच्या मूळ व्यापाऱ्यांनी आज कार्यालयासमोर निदर्शने करत खासगी व्यापाऱ्यांचे तातडीने मुख्य बाजारात विलीनीकरण करावे, अशी मागणी केली. व्यापारी सदानंद पाटील यांनी सांगितले की, सरकारी एपीएमसीमार्फत खासगी व्यापाऱ्यांना विशेष सुविधा दिल्या जात असून त्यामुळे मूळ व्यापाऱ्यांवर अन्याय होत आहे. शेतकऱ्यांनाही त्यांच्या मालाला योग्य दर मिळत नसल्याचा आरोप त्यांनी केला.

न्यायालयीन प्रक्रिया सुरू असताना खासगी बाजारातील व्यापाऱ्यांना तात्पुरती परवानगी देण्यात आली होती. मात्र खासगी बाजाराची कायदेशीर लढाई संपल्यानंतरही त्यांना सुविधा देणे चुकीचे असल्याचे आंदोलकांचे म्हणणे आहे. व्यापारी सतीश पाटील यांनी, “एपीएमसीमध्ये दुकाने भाड्याने घेऊन व्यवसाय करणाऱ्या व्यापाऱ्यांकडून शुल्क आकारले जाते, मात्र खासगी बाजारातील व्यापाऱ्यांना विनामूल्य सुविधा देणे अन्यायकारक आहे,” अशी प्रतिक्रिया दिली.

दरम्यान, एपीएमसी सचिवांनी सांगितले की, खासगी बाजार बंद झाल्यानंतर जिल्हा प्रशासनाच्या आदेशानुसार त्या व्यापाऱ्यांना रविवारी शेतकरी बाजारात तात्पुरती जागा देण्यात आली होती. आता प्रशासनाच्या सूचनेनुसार त्यांचे मुख्य बाजार परिसरात स्थलांतर करण्याचा प्रयत्न सुरू असून, त्यांच्याकडून वीज व इतर सुविधा शुल्कही आकारले जात आहे.

या आंदोलनात एपीएमसीचे माजी अध्यक्ष, व्यापारी आणि शेतकरी मोठ्या संख्येने सहभागी झाले होते.

The post खासगी बाजारातील व्यापाऱ्यांच्या विलीनीकरणाविरोधात एपीएमसीसमोर आंदोलन appeared first on News 24 Tass Marathi.

बेळगाव : जागतिक कामगार दिनाच्या पार्श्वभूमीवर बेळगावमध्ये केंद्र व राज्य सरकारांच्या कामगारविरोधी धोरणांविरोधात सीआयटीयूच्या नेतृत्वाखाली भव्य मोर्चा काढण्यात आला. या मोर्चात सहभागी होत हजारो कामगारांनी आपल्या हक्कांसाठी आवाज उठवला.

राणी चन्नम्मा सर्कलपासून कन्नड साहित्य भवनपर्यंत काढण्यात आलेल्या या मोर्चात आंदोलकांनी केंद्र सरकारच्या कामगार कायद्यातील बदलांविरोधात तीव्र नाराजी व्यक्त केली. कामगार कायद्यांचे चार कोडमध्ये रूपांतर करून कामगारांचे हक्क कमी करण्यात येत असल्याचा आरोप करण्यात आला.

संघटनेच्या पदाधिकाऱ्यांनी सांगितले की, सरकारच्या आर्थिक धोरणांमुळे महागाईत मोठी वाढ झाली असून कामगार वर्गाची क्रयशक्ती घटली आहे. “समान कामासाठी समान वेतन दिले जात नाही. गेल्या अनेक वर्षांत कामगारांच्या हिताचा ठोस निर्णय घेण्यात आलेला नाही. कायद्यातील बदल कामगारांसाठी अन्यायकारक ठरत आहेत,” असे मत सीआयटीयूच्या अध्यक्षा मंदा नेवगी यांनी व्यक्त केले.

या आंदोलनाद्वारे कामगार कायद्यातील दुरुस्त्या रद्द कराव्यात आणि कामगारांच्या हितासाठी ठोस उपाययोजना कराव्यात, अशी मागणी करण्यात आली. यासंदर्भात जिल्हाधिकाऱ्यांमार्फत केंद्र सरकारला निवेदन सादर करण्यात आले. आंदोलनात सीआयटीयूचे कार्यकर्ते मोठ्या संख्येने उपस्थित होते.

The post कामगार दिनी बेळगावात ‘सीआयटीयू’ चा भव्य मोर्चा appeared first on News 24 Tass Marathi.

बेळगाव : सीईटी परीक्षा केंद्रांवर विद्यार्थ्यांना जानवे काढण्यास भाग पाडल्याच्या प्रकारावरून बेळगावमध्ये वाद निर्माण झाला असून अखिल भारतीय ब्राह्मण महासभेतर्फे तीव्र आंदोलन करण्यात आले.

परीक्षेदरम्यान जानवे, मंगळसूत्र आणि बांगड्या काढण्यास भाग पाडले जात असल्याचा आरोप करत या नियमामुळे धार्मिक भावना दुखावल्याचे आंदोलनकर्त्यांनी सांगितले. विद्यार्थ्यांच्या धार्मिक स्वातंत्र्यावर गदा येत असल्याची भावना यावेळी व्यक्त करण्यात आली.

अखिल भारतीय ब्राह्मण महासभेचे जिल्हाध्यक्ष जयतीर्थ सवदत्ती यांनी सांगितले की, “सीईटी परीक्षेच्या नावाखाली अशा प्रकारचे निर्बंध लादणे हे संविधानाने दिलेल्या धार्मिक अधिकारांचे उल्लंघन आहे. जानवे केवळ ब्राह्मण समाजापुरते मर्यादित नसून इतर समाजातील नागरिकही ते परिधान करतात. त्यामुळे अशा प्रकारे वागणाऱ्या संबंधित अधिकाऱ्यांवर कठोर कारवाई करावी.”

या संदर्भात जिल्हाधिकाऱ्यांमार्फत राज्य सरकारला निवेदन सादर करण्यात आले. आंदोलनात ब्राह्मण समाजातील पदाधिकारी व कार्यकर्ते मोठ्या संख्येने सहभागी झाले होते.

The post सीईटी परीक्षेवेळी जानवे काढायला लावल्याने संताप appeared first on News 24 Tass Marathi.