बेळगाव : शहरातील एक लाख रुपयांहून अधिक घरपट्टी थकीत असलेल्या मिळकतधारकांची यादी महानगरपालिकेच्या महसूल विभागाने तयार केली आहे. संबंधित थकबाकीदारांना नोटिसा बजावून कर वसुलीची प्रक्रिया सुरू करण्यात आली आहे. या थकबाकीदारांकडून सुमारे २० कोटी रुपयांची घरपट्टी वसूल होणे बाकी असल्याची माहिती महसूल विभागाकडून देण्यात आली.

गतवर्षी महानगरपालिकेला महसूल वसुलीचे निर्धारित उद्दिष्ट पूर्ण करता आले नव्हते. त्यामुळे चालू आर्थिक वर्षासाठी १०३ कोटी रुपयांचे महसूल वसुलीचे उद्दिष्ट निश्चित करण्यात आले आहे. आतापर्यंत ५४ कोटी रुपयांहून अधिक महसूल महापालिकेच्या तिजोरीत जमा झाला आहे.

मध्यंतरी एसआयआरच्या कामामुळे घरपट्टी वसुलीच्या प्रक्रियेकडे काही प्रमाणात दुर्लक्ष झाले होते. मात्र, आता मनपा आयुक्त कार्तिक एम. यांनी महसूल विभागाला घरपट्टी वसुलीवर विशेष लक्ष केंद्रित करण्याच्या सूचना दिल्या आहेत. त्यानुसार महसूल विभागाने थकबाकीदारांकडून कर वसुलीसाठी मोहीम हाती घेतली आहे.

पहिल्या टप्प्यात एक लाख रुपयांपेक्षा अधिक कर थकीत असलेल्या मिळकतधारकांना नोटिसा पाठविण्यात येत आहेत. त्यानंतर ५० हजार रुपयांपर्यंत कर थकीत असलेल्या मिळकतधारकांकडूनही नोटिसा बजावून थकबाकी वसूल केली जाणार आहे.

एक लाख रुपयांहून अधिक कर थकीत असलेल्या मिळकतधारकांनी आपली थकबाकी भरल्यास महापालिकेच्या तिजोरीत सुमारे २० कोटी रुपयांचा महसूल जमा होऊ शकतो, अशी माहिती महसूल उपायुक्त डॉ. सिद्धू हुल्लोळी यांनी दिली.

The post वीस कोटींची घरपट्टी थकीत ; थकबाकीदारांना नोटिसा पाठविण्यास सुरुवात appeared first on News 24 Tass Marathi.

बेळगाव महापालिकेने मालमत्ता करात वाढ आणि कचरा संकलन शुल्काबाबत निर्णय घेतल्यानंतर, अनगोळमधील नागरिकांनी माजी नगरसेवक विनायक गुंजटकर यांच्या नेतृत्वाखाली महापालिका आयुक्तांना निवेदन सादर करून आपली नाराजी व्यक्त केली.

महापालिकेने सन २०२६-२७ साठी मालमत्ता करात ३ टक्के वाढ करण्याचा निर्णय घेतला आहे. या निर्णयाचा निषेध करण्यासाठी नागरिक आणि व्यापारी एकत्र आले होते. निवेदन महापालिका आयुक्त कार्तिक एम. यांना दिले गेले.

विनायक गुंजटकर म्हणाले, “गेल्या वेळी कचरा संकलन शुल्कासाठी व्यापाऱ्यांकडून अतिरिक्त कर आकारण्यात आला होता आणि आता पुन्हा कर वाढवण्यात आली आहे. वाढत्या महागाईत ही करवाढ म्हणजे जखमेवर मीठ चोळण्यासारखी आहे. कर न भरणाऱ्या व्यापाऱ्यांचे व्यवसाय बंद करण्याची धमकी दिली जात आहे. त्यामुळे ही वाढ तातडीने रद्द करावी, अन्यथा उग्र आंदोलन छेडले जाईल.”

स्थानिक नागरिकांनी महापालिका सदस्यांवर आरोप केला की, लोकांच्या समस्या सोडवण्याऐवजी दरवर्षी कर वाढवून जनतेवर आर्थिक बोजा टाकला जात आहे. तसेच, चौथ्या रेल्वे गेटचे काम सुरू असल्याने या भागातील वाहतूक कमी झाली असून त्याचा थेट परिणाम व्यापारावर झाला आहे, असे राजू पवार यांनी नमूद केले. महापालिकेच्या या धोरणाचा निषेध करत, ही करवाढ सामान्य जनता आणि व्यापाऱ्यांसाठी अन्यायकारक आहे, असे शिवानंद मलगान यांनी सांगितले.

The post बेळगाव महापालिकेच्या मालमत्ता करवाढीला नागरिकांचा तीव्र विरोध appeared first on News 24 Tass Marathi.