नवी दिशा, नवी आशा, नवीन संकल्पासह बेळगावकरांनी सरत्या वर्षाला निरोप देत २०२६ या नवीन वर्षाचे जल्लोषात स्वागत केले. शहरवासीयांनी नवीन वर्षाच्या पूर्वसंध्येला सहकुटुंब थर्टी फर्स्टचा आनंद लुटला. शहरात मध्यरात्री ओल्ड मॅनचे दहन करून नववर्षांच्या शुभेच्छा देण्यात आल्या. नववर्षानिमित्त शहरातील मांसाहार दुकानातही दिवसभर गर्दी पहायला मिळाली. सरत्या वर्षाला निरोप देण्यासाठी आणि नववर्षाच्या स्वागतासाठी सगळीकडचे हॉटेल्स, रिसॉर्ट, ढाबा एवढेच नाही तर अगदी शेतात सुध्दा तरुणांनी पार्टी करून जुन्या वर्षाला निरोप दिला. रात्री १२ वाजता जागोजागी रोषणाई, फटाके आणि हॅप्पी न्यू इयरच्या शुभेच्छा देण्यात आल्या. २०२५ मधील अखेरच्या दिवशी सूर्यास्ताच्या साक्षीने गेल्या वर्षभरातील आठवणी मागे सारत बेळगावकरांनी नवीन वर्षाचे संकल्प केले. तत्पूर्वी, सकाळपासूनच शहरात सर्वत्र थर्टी फर्स्टचा फिव्हर पाहायला मिळाला. मध्यरात्री १२ च्या ठोक्याला आतषबाजी करत तसेच नृत्याच्या तालावर ठेका धरत एकमेकांना नूतन वर्षाच्या शुभेच्छा देण्यात आल्या. इमारती, सोसायटींमध्ये देखील या निमित्ताने विविध सांस्कृतिक कार्यक्रमांची रेलचेल पाहायला मिळाली. रात्री उशिरापर्यंत हॉटेलमध्ये गर्दी पहायला मिळाली, नववर्ष स्वागतासाठी तरुणाई संगीतावर थिरकली.

सरत्या वर्षात कोणताही गैरप्रकार प्रकार घडू नये, कायदा व सुव्यवस्था कायम राहावी यासाठी पोलिसांनीही प्रयत्न केले. यासाठी पोलिस दलाने जिल्ह्यात ठिकठिकाणी चोख बंदोबस्त ठेवला होता. ३१ डिसेंबरला बुधवार होता. त्यामुळे अनेकांनी पाट्यांचे बेत आखले होते. शहरी धांगडधिंगा पासून दूरवर रम्य ठिकाणी जाऊन अनेकांनी नववर्ष साजरे केले. बेळगाव शहरासह ग्रामीण भागात ओल्ड मॅन जाळून नवीन वर्षाचे स्वागत केले जाते. यंदाही कॅम्पसह काळी अमराई, नार्वेकर गल्ली, गवळी गल्ली, शहापूर, वडगाव आदी भागात मोठ्या प्रमाणात ओल्ड मॅन तयार केले होते. ३१ डिसेंबरला मध्यरात्री १२ वाजता ओल्ड मॅन दहन करून नवीन वर्षाचे स्वागत करण्यात आले. नवीन वर्षात अनेकांनी वेगवेगळे संकल्प केले आहेत. तरुणाईने देखिल अनेक संकल्प केले आहेत.

समाज माध्यमातून शुभेच्छा समाज माध्यमामध्येही थर्टी फर्स्टचा फिव्हर पाहायला मिळाला. नेटिझन्सनी व्हॉटस्ॲप, फेसबुक, इन्स्ट्राग्राम यांसह अन्य समाज माध्यमातून एकेमकांवर शुभेच्छांचा वर्षाव केला. २०२६ वर्ष आपणास सुखाचे, समाधानाचे व आरोग्यदायी जावो, अशी मनोकामना व्यक्त करत नागरिकांनी शुभेच्छा दिल्या. काहींनी संदेश देऊन तर काहींनी व्हिडिओच्या माध्यमातून परस्परांना शुभेच्छा दिल्या.

The post सरत्या वर्षाला निरोप ; संगीतावर थिरकली तरुणाई appeared first on News 24 Tass Marathi.

नव्या वर्षाच्या स्वागताच्या पार्श्वभूमीवर बेळगाव शहरात शांतता व सुव्यवस्था राखण्यासाठी पोलीस प्रशासनाने कडक नियमावली जाहीर केली आहे. कायद्याचे उल्लंघन करणाऱ्यांवर कठोर कारवाई केली जाईल, असा इशारा शहर पोलीस आयुक्त भूषण बोरसे यांनी दिला आहे.

नवीन वर्षाच्या सेलिब्रेशनदरम्यान घातक शस्त्रे बाळगणे, मद्यपान करून वाहन चालवणे तसेच अमली पदार्थांचे सेवन यावर पूर्ण बंदी घालण्यात आली आहे. मद्यपान करून वाहन चालवणाऱ्यांवर थेट गुन्हा दाखल करून १० हजार रुपयांचा दंड ठोठावण्यात येणार आहे. महिलांची छेडछाड करणाऱ्यांवर तात्काळ फौजदारी गुन्हे दाखल करण्यात येतील, असेही पोलीस आयुक्तांनी स्पष्ट केले.

शहरात सुमारे १००० पोलीस कर्मचारी, केएसआरपी व होमगार्डच्या तुकड्या तैनात करण्यात आल्या असून नागरिकांच्या मदतीसाठी २० विशेष हेल्प डेस्क सुरू करण्यात आले आहेत. सीसीटीव्ही व ड्रोनद्वारे शहरावर सतत पाळत ठेवली जाणार आहे.

हॉटेल व बार मालकांना अल्पवयीन मुलांना मद्यविक्री न करण्याच्या तसेच बार रात्री १ वाजेपर्यंतच सुरू ठेवण्याच्या सक्त सूचना देण्यात आल्या आहेत. सार्वजनिक ठिकाणी होणाऱ्या ‘ओल्ड मॅन’ दहनासाठी अग्निशमन दलाची पूर्वपरवानगी बंधनकारक करण्यात आली आहे.

दरम्यान, ‘ओल्ड मॅन’ दहनाच्या परंपरेमुळे कॅम्प परिसरात बाजारपेठेत मोठी चैतन्याची लाट दिसून येत आहे. विविध आकारांच्या प्रतिकृतींची खरेदी करण्यासाठी स्थानिकांसह शेजारील गोवा राज्यातूनही नागरिक दाखल झाले आहेत. रात्री ठीक १२ वाजता ‘ओल्ड मॅन’ दहन करून बेळगावकर आगळ्यावेगळ्या पद्धतीने नव्या वर्षात पदार्पण करणार आहेत.

नागरिकांनी नियमांचे पालन करून सुरक्षित आणि आनंदी वातावरणात नवीन वर्षाचे स्वागत करावे, असे आवाहन पोलीस प्रशासनाने केले आहे.

The post नववर्षाच्या स्वागतासाठी बेळगाव पोलीस प्रशासनाकडून कडक नियमावली जाहीर appeared first on News 24 Tass Marathi.

बेळगाव / प्रतिनिधी

जुन्या वर्षाच्या आठवणी मागे टाकत नव्या वर्षाच्या स्वागतासाठी बेळगावकर सज्ज झाले आहेत. ३१ डिसेंबरच्या मध्यरात्री ओल्डमॅनची प्रतिकृती जाळून नवीन वर्षाचे स्वागत केले जाणार आहे.त्यासाठी शहरात ठिकठिकाणी जोरदार तयारी सुरू आहे.

गल्लोगल्ली विविध आकारातील ओल्डमॅन तयार करण्यासाठी तरुणाईसह बच्चे कंपनीची धावपळ दिसून येत आहे. कॅम्प परिसरात मोठ्या व राक्षसी स्वरूपातील ओल्डमॅन उभारण्यात आले असून, विक्रीसाठीही विविध आकारांच्या प्रतिकृती उपलब्ध आहेत. मंगळवारी खरेदीसाठी लहानग्यांची विशेष गर्दी झाली होती.

हॉटेल्स परवडत नसल्याने काहींनी शिवारांमध्ये पार्ट्यांचे आयोजन केले आहे. केक व खाद्यपदार्थांच्या ऑर्डर्स दोन दिवस आधीच देण्यात आल्याने शहरात मंगळवारपासूनच नववर्षाच्या स्वागताची लगबग वाढली आहे.

• हॉटेल्समध्ये खास ऑफर्स : 

नववर्षाच्या स्वागतासाठी हॉटेल्स व रिसॉर्ट्समध्ये विशेष पॅकेजेस जाहीर करण्यात आली आहेत. डीजे नाईटसह विविध कार्यक्रमांचे आयोजन असून, शाकाहारी पदार्थांसह बिर्याणी-थाळीवर सवलती देण्यात आल्या आहेत. शहरासह परिसरातील हॉटेल्समध्ये बुकिंगला चांगला प्रतिसाद मिळत आहे.

The post सरत्या वर्षाला निरोप देण्यासाठी शहर सज्ज appeared first on News 24 Tass Marathi.