बेळगाव / प्रतिनिधी

मराठी भाषा ही केवळ संस्कृतीची ओळख नसून आधुनिक तंत्रज्ञानाच्या युगात ज्ञान, संशोधन आणि संवादाचे प्रभावी माध्यम ठरू शकते, असे प्रतिपादन ज्येष्ठ निवृत्त मुख्याध्यापक एस. जी. बाळेकुंद्री यांनी केले. बेकिनकेरे येथील सरकारी मराठी उच्च प्राथमिक शाळेत आयोजित मराठी भाषा गौरव दिन व विज्ञान दिन कार्यक्रमात ते बोलत होते.

वैज्ञानिक दृष्टिकोन’ या विषयावर मार्गदर्शन करताना त्यांनी डिजिटल युगात संगणक, मोबाईल अ‍ॅप्स, कृत्रिम बुद्धिमत्ता (AI), ई-लर्निंग आणि ऑनलाईन शिक्षणामध्ये मराठीचा वापर वाढविण्याची गरज अधोरेखित केली. मातृभाषेतून विज्ञान व तंत्रज्ञानाचे शिक्षण दिल्यास विद्यार्थ्यांची समज अधिक भक्कम होते आणि संशोधनवृत्ती विकसित होते, असे त्यांनी सांगितले. विज्ञाननिष्ठ दृष्टीकोन स्वीकारताना श्रद्धा असावी; मात्र अंधश्रद्धेला स्थान नसावे, असा संदेशही त्यांनी विद्यार्थ्यांना दिला.

कार्यक्रमाच्या अध्यक्षस्थानी शाळा सुधारणा समितीचे अध्यक्ष प्रभाकर फडके होते. प्रारंभी विद्यार्थ्यांच्या स्वागतगीत व ईशस्तवनाने कार्यक्रमाची सुरुवात झाली. पर्यावरण संवर्धनाचा संदेश देण्यासाठी प्रांगणातील वृक्षांना पाणी घालून उपक्रमाचे उद्घाटन करण्यात आले. तसेच विज्ञान प्रदर्शनाचे उद्घाटन मान्यवरांच्या हस्ते करण्यात आले.

विविध सामाजिक व शैक्षणिक संस्थांच्या संयुक्त विद्यमाने हा कार्यक्रम आयोजित करण्यात आला होता. स्वागत नारायण पाटील यांनी केले, प्रास्ताविक मुख्याध्यापिका वासंती लोखंडी यांनी मांडले. परिचय जी. डी. पाटील यांनी करून दिला. सूत्रसंचालन श्रेया पाटील यांनी केले तर आभार अपूर्वा भोगण यांनी मानले. कार्यक्रमास पालक, शिक्षक, विद्यार्थी व ग्रामस्थ मोठ्या संख्येने उपस्थित होते.

The post बेकिनकेरे मराठी शाळेत भाषा गौरव दिन व विज्ञान दिन उत्साहात appeared first on News 24 Tass Marathi.

मंडोळी रोड येथील जोशीज पब्लिक सेंट्रल स्कूल शाळेत राष्ट्रीय विज्ञान दिन उत्साहात साजरा करण्यात आला. थोर शास्त्रज्ञ सी. व्ही. रमण यांनी २८ फेब्रुवारी १९२८ रोजी ‘रमन इफेक्ट’ या शोध लावल्याच्या सन्मानार्थ हा दिवस साजरा केला जातो.

सी. व्ही. रमन यांच्या प्रतिमेच्या पूजनाने कार्यक्रमाची सुरुवात झाली. यानिमित्ताने विद्यार्थ्यांनी विविध प्रकारच्या विज्ञान प्रकल्पांची मांडणी केली होती. विद्यार्थ्यांच्या कल्पकतेतून विविध प्रयोग सादर करण्यात आले होते. छोट्या विद्यार्थ्यांनी या प्रकल्पांच्या संदर्भात माहिती देऊन उपस्थितांची मने जिंकली.

मुख्याध्यापिका आर आर जोशी यांच्या मार्गदर्शनाप्रमाणे संपूर्ण कार्यक्रम पार पडला. विद्यार्थी वर्गाला शुभम परालशेट्टर, पुष्पा शेखर, विद्याश्री बुलबुले,श्रुती तुरमुरे यांचे मार्गदर्शन लाभले. कार्यक्रम संयोजनासाठी समस्त शिक्षक वर्गाने परिश्रम घेतले.

The post जोशीज पब्लिक सेंट्रल स्कूल येथे राष्ट्रीय विज्ञान दिवस साजरा appeared first on News 24 Tass Marathi.