श्रावण महोत्सवाची सुरुवात रात्री १२.३० वाजता पहिल्या अभिषेकाने होणार आहे. समस्त बेळगावकर नागरिकांच्या जनकल्याणासाठी दरवर्षी हा अभिषेक करण्यात येतो. पहाटे ४ वाजेपर्यंत पंचामृत अभिषेक सुरू राहणार असून, त्यानंतर विशेष रुद्राभिषेक आणि त्रिकाल पूजेचे आयोजन करण्यात आले आहे.

सायंकाळी ७.३० वाजता मंदिर परिसरातून भव्य पालखी प्रदक्षिणा काढण्यात येणार आहे. त्यानंतर विशेष महाआरतीने दिवसभरातील धार्मिक कार्यक्रमांची सांगता होईल.

दरवर्षीप्रमाणे यंदाही मंदिराच्या वतीने आकर्षक धार्मिक देखावा साकारण्यात आला आहे. यंदाच्या देखाव्यात राजमहालाच्या माध्यमातून हिंदू वैदिक धर्मातील पवित्र सप्तर्षींची माहिती भाविकांना करून देण्यात येणार आहे. त्यामुळे भाविकांना सप्तर्षींच्या धार्मिक व वैदिक परंपरेची माहिती घेण्याची संधी मिळणार आहे.

श्रावण सोमवार आणि नागपंचमीच्या पार्श्वभूमीवर मंदिर परिसरात आकर्षक विद्युत रोषणाई तसेच फुलांची सजावट करण्यात आली आहे. विनायक पालकर व त्यांच्या टीमसह राजू लोहार आणि बसवराज हुंदेकर यांच्या सहकार्याने ही सजावट करण्यात आली असून, गेल्या पाच वर्षांपासून ही टीम मंदिरातील देखावे आणि सजावटीची परंपरा जपत आहे.

श्रावणाच्या पहिल्या सोमवारनिमित्त आयोजित सर्व धार्मिक कार्यक्रमांचा भाविकांनी लाभ घ्यावा, तसेच मंदिरातील सप्तर्षींचा धार्मिक देखावा आवर्जून पाहावा, असे आवाहन मंदिर व्यवस्थापनाच्या वतीने करण्यात आले आहे.

The post पहिला श्रावण सोमवार, नागपंचमीनिमित्त कपिलेश्वर मंदिरात उद्या विविध धार्मिक कार्यक्रम appeared first on News 24 Tass Marathi.

बेळगाव / प्रतिनिधी

उद्या मंगळवार दि. २९ जुलै रोजी साजऱ्या होणाऱ्या नागपंचमी सणाच्या पार्श्वभूमीवर शहरातील बाजारपेठेमध्ये खरेदीला चांगला उत्साह दिसून आला. नागमूर्ती, फुले – फळे, हळद-कुंकू या पूजा साहित्याची नागरिक मोठ्या प्रमाणात खरेदी करत आहेत. विशेषतः महिलावर्ग फराळाच्या खरेदीसाठी लागणाऱ्या वस्तू खरेदी करताना पाहायला मिळाले.

नागपंचमी हा श्रावण महिन्यातील महत्त्वाचा सण आहे. या दिवशी नागदेवतेची पूजा करण्यात येते. ग्रामीण भागात वारुळाची पूजा केली जाते. शहरात नागदेवतेची मूर्ती खरेदी करून त्याची स्थापना करून पूजा केली जाते. या सणानिमित्त लाडू चिवडा व चकल्या आदी फराळ केला जातो. सध्या बाजारात माती पासून तयार करण्यात आलेल्या नागदेवतेच्या मूर्तीची किंमत २० रु. पासून १०० रु. आहे. फराळासाठी वापरले जाणारे चिवडा पोहे ८० रु. किलो, लाडू पोहे ७५ रु. किलो, मका पोहे ७० रु. किलो, लाह्या १० लि. असे दर आहेत.

फराळाला लागणाऱ्या साहित्यामध्ये बेसन साखर सुकामेवा यांची मागणी वाढली आहे. मागील वर्षी प्रमाणे यावर्षीही दर स्थिर असून खरेदीचा जोर कायम आहे. गेल्या काही दिवसांपासून पावसाचा जोर वाढला असला तरीही खरेदीसाठी लोकांची गर्दी मात्र कमी झाली नाही.

The post नागपंचमीनिमित्त बाजारात खरेदीसाठी गर्दी appeared first on News 24 Tass Marathi.