बेळगाव : घटप्रभा पोलीस ठाण्याच्या हद्दीतील कल्लोळी गावात झालेल्या रमेश बांदोली यांच्या हत्येचा पोलिसांनी छडा लावला असून, या प्रकरणी दोन आरोपींना अटक करण्यात आली आहे. लक्ष्मी वडेयार आणि बनप्पा वडेयार अशी अटक केलेल्या आरोपींची नावे आहेत. जिल्हा पोलीस अधीक्षक के. रामराजन यांनी आज बेळगाव येथे झालेल्या पत्रकार परिषदेत ही माहिती दिली.

कल्लोळी येथे रमेश बांदोली यांच्या हत्येप्रकरणी गुन्हा दाखल करण्यात आला होता. काही दिवसांपूर्वी रमेश यांनी आपल्या मोबाईल स्टेटसवर स्वतःचा आणि लक्ष्मी वडेयार यांचा फोटो पोस्ट केला होता. या कारणावरून निर्माण झालेला वाद तसेच पूर्वीच्या वैमनस्यातून दोन्ही आरोपींनी रमेश यांना कल्लोळी येथील घरामागील परिसरात बोलावून त्यांची हत्या केल्याचे पोलिसांच्या प्राथमिक तपासात समोर आले आहे.

घटनेची माहिती मिळताच घटप्रभा पोलिसांनी तपासाला सुरुवात केली. पोलिसांच्या रॅपिड ॲक्शन टीमने कारवाई करत लक्ष्मी वडेयार आणि बनप्पा वडेयार या दोन्ही संशयितांना अटक केली.

अटक केलेल्या आरोपींना न्यायालयात हजर करण्यात आले असून, न्यायालयाने त्यांची न्यायालयीन कोठडीत रवानगी केली आहे. हत्येप्रकरणी पुढील तपास आणि कायदेशीर कारवाई सुरू असल्याचे जिल्हा पोलीस अधीक्षक के. रामराजन यांनी सांगितले.

The post कल्लोळी हत्याकांडाचा पोलिसांनी लावला छडा appeared first on News 24 Tass Marathi.

चिक्कोडी : तालुक्यातील खडकलाट येथे अनैतिक संबंधांत अडथळा ठरणाऱ्या पतीची पत्नीने प्रियकराच्या मदतीने हत्या केल्याची धक्कादायक घटना सहा महिन्यांनंतर उघडकीस आली आहे. याप्रकरणी खडकलाट पोलिसांनी मृताची पत्नी बंगारी गावडे आणि तिचा प्रियकर रामा रानगे यांना ताब्यात घेऊन चौकशी सुरू केली आहे. मृताची ओळख रघु गावडे (वय ४०) अशी झाली आहे.

पोलिसांनी दिलेल्या माहितीनुसार, रघु गावडे यांची पत्नी बंगारी ही रोजंदारीचे काम तसेच मेंढपाळ म्हणून काम करत होती. तिचे रामा रानगे याच्यासोबत संबंध होते. या संबंधांना रघुचा विरोध असल्याने दोघांनी मिळून त्याचा काटा काढण्याचा कट रचल्याचा आरोप आहे.

कटानुसार रघु याला शेतात बोलावून बंगारी आणि रामा यांनी मिळून त्याची हत्या केल्याचे समोर आले आहे. त्यानंतर मृतदेहाची विल्हेवाट लावून रघु मेंढ्या चारण्यासाठी दुसऱ्या जिल्ह्यात गेल्याचे भासवण्यात आले. कुटुंबीय आणि ग्रामस्थांनीही बंगारीच्या सांगण्यावर विश्वास ठेवला.

दरम्यान, रघु सहा महिन्यांपासून बेपत्ता असतानाही त्याचा शोध लागला नाही. मात्र, रघुचा भाऊ लगमान्ना याला बंगारीच्या सांगण्यावर संशय निर्माण झाला. त्याने ही बाब गावातील जेष्ठ व्यक्तींच्या निदर्शनास आणून दिली.

गावातील वडीलधाऱ्यांनी बंगारीची चौकशी केल्यानंतर तिने अखेर रघुच्या हत्येची माहिती दिल्याचे सांगण्यात येत आहे. त्यानंतर लगमन्नाने खडकलाट पोलीस ठाण्यात तक्रार दाखल केली.

तक्रारीच्या आधारे पोलिसांनी गुन्हा दाखल केला असून, बंगारी गावडे आणि रामा रानगे यांच्याकडे चौकशी सुरू आहे. या प्रकरणाचा पुढील तपास खडकलाट पोलीस करत आहेत.

The post अनैतिक संबंधांत अडथळा ठरणाऱ्या पतीचा प्रियकराच्या मदतीने खून appeared first on News 24 Tass Marathi.

बेळगाव : बेळगाव तालुक्यातील होन्निहाळ गावात २०१९ मध्ये पूर्ववैमनस्यातून झालेल्या खून प्रकरणात तिसऱ्या अतिरिक्त जिल्हा व सत्र न्यायालयाने सात आरोपींना दोषी ठरवले आहे. मात्र, खटल्यादरम्यान एका आरोपीचा मृत्यू झाल्याने उर्वरित सहा दोषींना ६ ऑगस्ट २०२६ रोजी शिक्षा सुनावण्यात येणार असल्याचे न्यायालयाने स्पष्ट केले.

पोलीसांनी दिलेल्या माहितीनुसार, १ जानेवारी २०१९ रोजी होन्निहाळ येथील मनियार लेआउट परिसरात पूर्ववैमनस्यातून वाद झाला होता. या वादानंतर सात आरोपींनी नागेंद्र बसाप्पा मेकलगोल (रा. सुळेभावी) यांच्यावर जीवघेणा हल्ला केला.

हल्लेखोरांपासून बचाव करण्यासाठी नागेंद्र यांनी जवळील एका शेडमध्ये आश्रय घेत आतून दरवाजा बंद केला. मात्र, आरोपींनी दरवाजा तोडून आत प्रवेश केला आणि तलवार तसेच इतर धारदार शस्त्रांनी त्यांच्यावर सपासप वार केले. या भीषण हल्ल्यात नागेंद्र यांचा जागीच मृत्यू झाला.

घटनेनंतर मारीहाळ पोलीस ठाण्यात गुन्हा दाखल करण्यात आला. तपास पूर्ण झाल्यानंतर पोलिसांनी न्यायालयात दोषारोपपत्र सादर केले. सुनावणीनंतर न्यायालयाने यल्लेशी महादेव तानुगोल, राघवेंद्र तुकाराम कम्मार, विशाल विठ्ठल हुदली, किरण मल्लेशी मिसाळे, चेतन विजय कवडी, राघवेंद्र अदृश्यप्पा दानप्पा आणि महेश रणधीर रामचंद्र मुरारी यांना दोषी ठरवले. सर्व आरोपी बेळगाव तालुक्यातील सुळेभावी गावचे रहिवासी आहेत.

दरम्यान, आरोपी महेश रणधीर रामचंद्र मुरारी यांचा खटल्याच्या सुनावणीदरम्यान मृत्यू झाल्याने त्यांच्यावरील कार्यवाही थांबविण्यात आली आहे. त्यामुळे उर्वरित सहा दोषींना ६ ऑगस्ट रोजी शिक्षा सुनावली जाणार आहे. या प्रकरणात सरकार पक्षातर्फे ॲड. आर. जी. देवरेड्डी यांनी बाजू मांडली.

The post होनिहाळ खून प्रकरणात सात आरोपी दोषी appeared first on News 24 Tass Marathi.

बेळगाव : बेळगाव जिल्ह्यातील सौंदत्ती तालुक्यातील चिकबुदनूर गावात मोबाईल फोनवरून झालेल्या किरकोळ वादाचे पर्यवसान एका मित्राच्या निर्घृण हत्येत झाले. या प्रकरणी मुरगोड पोलिसांनी तात्काळ कारवाई करत आरोपीला अटक केली असून पुढील तपास सुरू असल्याची माहिती जिल्हा पोलीस अधीक्षक के. रामराजन यांनी दिली.

मृताची ओळख फकीरप्पा मल्लप्पा हिडकन्णावर (वय ४०) अशी झाली असून ते मजुरीचे काम करत होते. तर अटक करण्यात आलेल्या आरोपीचे नाव मल्लिकार्जुन सिध्दप्पा पुजारी (वय २५) असे आहे. दोघेही मित्र असल्याची माहिती पोलिसांनी दिली.

चिकबुदनूर गावातील लक्ष्मीदेवी मंदिराच्या आवारात सायंकाळी सात ते आठ वाजण्याच्या सुमारास ही घटना घडली. फकीरप्पा यांनी मल्लिकार्जुन यांचा मोबाईल फोन घेतला होता. तो परत देण्याच्या कारणावरून दोघांमध्ये वाद सुरू झाला.

फकीरप्पा मंदिराच्या ओसरीवर झोपले असताना मल्लिकार्जुन तेथे आला आणि मोबाईल परत देण्याची मागणी केली. मात्र, फकीरप्पा यांनी मोबाईल रात्री देईन, असे सांगत तत्काळ परत देण्यास नकार दिल्याने दोघांतील वाद चिघळला.

वादाच्या भरात संतापलेल्या मल्लिकार्जुनने मंदिराच्या आवारात पडलेला मोठा दगड उचलून फकीरप्पा यांच्या डोक्यावर जोरदार प्रहार केला. गंभीर दुखापत झाल्याने फकीरप्पा यांचा घटनास्थळीच मृत्यू झाला.

या प्रकरणी मृताच्या पत्नी भारती हिडकन्णावर यांनी दिलेल्या फिर्यादीवरून मुरगोड पोलीस ठाण्यात गुन्हा दाखल करण्यात आला आहे. आरोपीला अटक करण्यात आली असून कायद्यानुसार पुढील कारवाई सुरू असल्याची माहिती जिल्हा पोलीस अधीक्षक के. रामराजन यांनी दिली.

The post मोबाईलच्या वादातून मित्राची हत्या appeared first on News 24 Tass Marathi.

बेळगाव : बेळगाव जिल्ह्यातील सौंदत्ती (यरगट्टी) तालुक्यातील नुग्गानट्टी गावात मालमत्तेची विभागणी आणि जमिनीच्या भूमापनाच्या वादातून भीषण दुहेरी हत्याकांड घडले आहे. घरात घुसून दगड, काठ्या, लोखंडी सळ्या आणि धारदार शस्त्रांनी हल्ला करून दोन सख्ख्या भावांची निर्घृण हत्या करण्यात आली. या प्रकरणी पोलिसांनी आठ आरोपींना अटक केली असून, गुन्ह्याचा सर्व बाजूंनी तपास सुरू असल्याची माहिती जिल्हा पोलीस अधीक्षक के. रामराजन यांनी दिली.

मुरगोड पोलीस ठाण्याच्या हद्दीतील नुग्गानट्टी गावात जमिनीची विभागणी आणि मालमत्तेच्या हक्कावरून संबंधित कुटुंबामध्ये गेल्या काही दिवसांपासून वाद सुरू होता. नुकतेच जमिनीच्या सर्वेक्षणाचे काम पूर्ण झाल्यानंतर हा वाद अधिकच चिघळला. मध्यरात्री अण्णव्वा आणि तिचे पती यल्लाप्पा यांच्यात मालमत्तेच्या वाटणीवरून जोरदार वाद झाला. या वादाचे पर्यवसान हिंसक हल्ल्यात झाले.

पोलिसांच्या माहितीनुसार, वाद सुरू असतानाच आरोपी काठ्या, लोखंडी सळ्या, दगड आणि धारदार शस्त्रे घेऊन घरात घुसले. त्यांनी घरातील सदस्यांवर बेछूट हल्ला चढवला. या हल्ल्यात लगमप्पा रामण्णवर (वय ३२) आणि बसप्पा रामण्णवर (वय ३८) या दोन्ही भावांचा गंभीर दुखापतीमुळे घटनास्थळीच मृत्यू झाला. तसेच फकिरप्पा नीलप्पा रामण्णवर आणि घरातील दोन मुले जखमी झाली असून त्यांच्यावर उपचार सुरू असल्याची माहिती मिळाली आहे.

घटनेची माहिती मिळताच मुरगोड पोलिसांनी तातडीने घटनास्थळी धाव घेत पंचनामा करून तपासाला सुरुवात केली. प्राथमिक तपासाच्या आधारे या गुन्ह्यात सहभागी असलेल्या आठ मुख्य आरोपींना अटक केली आहे.

या दुहेरी हत्येची गंभीर दखल घेत जिल्हा पोलीस अधीक्षक के. रामराजन आणि पोलीस उपअधीक्षक यांनी स्वतः घटनास्थळी भेट देऊन पाहणी केली. वरिष्ठ अधिकाऱ्यांच्या मार्गदर्शनाखाली तपास पथकाने पुरावे संकलित करून आरोपींविरुद्ध कारवाईला गती दिली आहे.

या गुन्ह्यामागे केवळ मालमत्तेचा वाद होता की इतर काही कारणेही आहेत, याचा तपास सुरू असून, या हल्ल्यात आणखी कोणाचा प्रत्यक्ष किंवा अप्रत्यक्ष सहभाग आहे का, आरोपींना बाहेरील गुन्हेगारी प्रवृत्तीच्या व्यक्तींची मदत मिळाली होती का, याचाही सर्वंकष तपास मुरगोड पोलीस करत आहेत, अशी माहिती जिल्हा पोलीस अधीक्षक के. रामराजन यांनी दिली.

The post जमिनीच्या वादातून नुग्गानट्टीत दुहेरी हत्याकांड ; आठ आरोपी अटकेत appeared first on News 24 Tass Marathi.

बेळगाव : किरकोळ कारणावरून उद्भवलेल्या कौटुंबिक वादाचे पर्यवसान दोन सख्ख्या भावांच्या निर्घृण हत्येत झाल्याची धक्कादायक घटना यरगट्टी तालुक्यातील नुग्गानट्टी गावात घडली. या घटनेमुळे परिसरात खळबळ उडाली असून गावात भीतीचे वातावरण निर्माण झाले आहे.

मृतांची ओळख लगमप्पा रामण्णवर (वय ३२) आणि बसप्पा रामण्णवर (वय ३८) अशी झाली आहे. दोघांवर त्यांच्या नातेवाईकांनी धारदार शस्त्रांनी हल्ला केल्याचा प्राथमिक आरोप असून, हल्ल्यात त्यांचा जागीच मृत्यू झाल्याचे सांगण्यात येत आहे.

घटनेची माहिती मिळताच मुरगोड पोलिसांनी तातडीने घटनास्थळी धाव घेत पंचनामा केला. त्यानंतर दोन्ही मृतदेह शवविच्छेदनासाठी रुग्णालयात पाठविण्यात आले. या प्रकरणाचा अधिक तपास मुरगोड पोलीस करत असून, हत्येमागील नेमके कारण आणि संबंधितांची भूमिका तपासातून स्पष्ट होणार आहे.

The post नुग्गानट्टीत कौटुंबिक वादातून दोन सख्ख्या भावांची निर्घृण हत्या appeared first on News 24 Tass Marathi.

खानापूर : कामानिमित्त नेपाळमध्ये गेलेल्या खानापूर येथील एका तरुणाची त्याच्याच रूममेटने चाकूने भोसकून हत्या केल्याची धक्कादायक घटना घडली आहे. या प्रकरणी नेपाळ पोलिसांनी गुन्हा दाखल केला असून, बेळगाव पोलिसांच्या समन्वयाने आरोपीचा शोध सुरू आहे.

मृत तरुणाचे नाव साहिल रियाजअहमद मोमिन (वय २५, रा. निंगापूर गल्ली, खानापूर) असे आहे. अवघ्या २५ दिवसांपूर्वी तो नेपाळमधील झापा जिल्ह्यातील दमक येथील एका हॉटेलमध्ये नोकरीस लागला होता.

पोलिसांनी दिलेल्या माहितीनुसार, साहिल आणि त्याचा उत्तर प्रदेशातील रूममेट सद्दाम हुसेन यांच्यात घटनेच्या आदल्या रात्री वाद झाला होता. त्यानंतर शुक्रवारी पहाटे साहिल झोपेत असताना आरोपीने त्याच्या पोटात चाकूने वार करून घटनास्थळावरून पलायन केले.

गंभीर जखमी झालेल्या साहिलला तातडीने रुग्णालयात नेण्यात येत असताना वाटेतच त्याचा मृत्यू झाला. घटनेनंतर आरोपी फरार झाला असून तो उत्तर प्रदेशात पळून गेल्याचा संशय व्यक्त करण्यात येत आहे.

घटनेची माहिती मिळताच मृताच्या कुटुंबीयांनी सामाजिक कार्यकर्त्यांच्या मदतीने नेपाळकडे धाव घेतली आहे. साहिलचा मृतदेह सोमवारपर्यंत खानापूर येथे आणला जाण्याची शक्यता व्यक्त करण्यात आली आहे.

या हत्येप्रकरणी नेपाळ पोलिसांनी गुन्हा दाखल केला असून, बेळगाव पोलिसांनीही संबंधित राज्यातील पोलिसांशी संपर्क साधत आरोपीच्या शोधासाठी तपासाची चक्रे वेगाने फिरवली आहेत. शांत व मनमिळावू स्वभावामुळे परिचित असलेल्या साहिलच्या अकाली निधनाने खानापूर परिसरात हळहळ व्यक्त होत आहे.

The post खानापूरच्या तरुणाची नेपाळमध्ये हत्या appeared first on News 24 Tass Marathi.

बेळगाव : जिल्ह्यातील हुक्केरी तालुक्यात मालमत्ता विक्रीच्या वादातून सख्ख्या मोठ्या भावाने लहान भावाची दगडाने ठेचून आणि गळा आवळून हत्या केल्याची धक्कादायक घटना उघडकीस आली आहे. या प्रकरणातील मुख्य आरोपी मोठ्या भावाला पोलिसांनी ताब्यात घेतल्याची माहिती जिल्हा पोलीस अधीक्षक के. रामराजन यांनी पत्रकार परिषदेत दिली.

मृताचे नाव राजू सिद्धप्पा रुद्रप्पगोळ (वय ४५) असे असून, त्याचा मोठा भाऊ संजू रुद्रप्पगोळ (वय ४९) हा या प्रकरणातील मुख्य आरोपी आहे. पोलिसांनी दिलेल्या माहितीनुसार, घोडगेरी गावातील तीन एकर जमीन विक्रीच्या कारणावरून दोन्ही भावांमध्ये वाद सुरू होता. या वादाचे पर्यवसान तीव्र भांडणात झाले. संतापाच्या भरात आरोपी संजूने लहान भाऊ राजूच्या डोक्यात दगडाने जोरदार प्रहार केला. त्यानंतर गळा आवळून त्याची हत्या केल्याचा आरोप आहे.

हे दोन्ही भाऊ मूळचे हुक्केरी तालुक्यातील घोडगेरी गावचे असले तरी गोकाक तालुक्यातील अंकलगी गावातील एका पडक्या इमारतीत वास्तव्यास होते. मोलमजुरी करून ते उदरनिर्वाह करत होते. दररोज रात्री अंकलगी मठात जेवण करून ते मुक्कामासाठी त्या इमारतीत परतत असत.

या घटनेप्रकरणी सुरुवातीला दोन्ही कुटुंबीयांकडून कोणतीही तक्रार दाखल करण्यात आली नव्हती. मात्र, पोलिसांनी घटनेची माहिती मिळाल्यानंतर तपास सुरू करून पुढील कायदेशीर कारवाई हाती घेतली असल्याची माहिती जिल्हा पोलीस अधीक्षक के. रामराजन यांनी दिली.

The post जमीन विक्रीचा वाद जीवावर बेतला appeared first on News 24 Tass Marathi.

बेळगाव : जिल्ह्यातील बैलहोंगल तालुक्यातील वण्णूर गावात मुलगा झाल्याच्या आनंदात पार्टी मागितल्याच्या कारणावरून झालेल्या वादातून एका तरुणाने आपल्या मित्राची दगडाने ठेचून हत्या केल्याची धक्कादायक घटना उघडकीस आली आहे. या प्रकरणातील फरार आरोपीला नेसरगी पोलिसांनी अवघ्या ४८ तासांत अटक केली असल्याची माहिती जिल्हा पोलीस अधीक्षक के. रामराजन यांनी पत्रकार परिषदेत दिली.

पोलिसांनी दिलेल्या माहितीनुसार, २६ जून २०२६ रोजी वण्णूर गावातील हनुमंतप्पा यमनप्पा इतापी याने त्याचा मित्र विश्वनाथ सिद्धय्या पूजेरी (वय २९) याच्याकडे मुलगा झाल्याच्या आनंदात पार्टीची मागणी केली होती. यावरून दोघांमध्ये वाद झाला. वादाचे रूपांतर हाणामारीत झाल्यानंतर संतापलेल्या विश्वनाथने हनुमंतप्पाच्या डोक्यावर दगडाने वार केला. या हल्ल्यात हनुमंतप्पाचा घटनास्थळीच मृत्यू झाला. त्यानंतर आरोपी घटनास्थळावरून फरार झाला.

या घटनेप्रकरणी मृताच्या वडिलांनी दिलेल्या फिर्यादीवरून नेसरगी पोलीस ठाण्यात खुनाचा गुन्हा दाखल करण्यात आला. प्रकरणाचे गांभीर्य लक्षात घेऊन जिल्हा पोलीस अधीक्षक के. रामराजन, अप्पर पोलीस अधीक्षक रामुगोंडा बसरगी आणि बैलहोंगलचे उपविभागीय पोलीस अधिकारी डॉ. वीरय्या हिरेमठ यांच्या मार्गदर्शनाखाली नेसरगीचे पोलीस निरीक्षक गजानन नाईक यांच्या नेतृत्वाखाली विशेष तपास पथकाची स्थापना करण्यात आली.

तपास पथकाने वेगाने तपासाची चक्रे फिरवत तांत्रिक आणि गोपनीय माहितीच्या आधारे २८ जून २०२६ रोजी आरोपी विश्वनाथ पूजेरी याला अटक केली. त्याची न्यायालयीन कोठडीत रवानगी करण्यात आली असून, अवघ्या ४८ तासांत आरोपीला जेरबंद करणाऱ्या पोलीस पथकाचे जिल्हा पोलीस अधीक्षकांनी विशेष कौतुक केले आहे.

The post मुलगा झाल्याची पार्टी मागितल्याच्या वादातून मित्राची दगडाने ठेचून हत्या appeared first on News 24 Tass Marathi.

बेळगाव : जिल्ह्यातील अथणी तालुक्यात पत्नीच्या चारित्र्यावर संशय घेत पतीने तिच्यावर कुऱ्हाडीने सपासप वार करून निर्घृण हत्या केल्याची धक्कादायक घटना उघडकीस आली आहे. या प्रकरणी अथणी पोलिसांनी आरोपी पतीला तातडीने अटक केली आहे.

ही घटना अथणी तालुक्यातील नंदगाव येथील श्री अवजीकर मठ परिसरात घडली. शोभा परगोंडा सारवाड (वय ३५) असे मृत महिलेचे नाव असून, परगोंडा संगप्पा सारवाड असे अटक करण्यात आलेल्या आरोपी पतीचे नाव आहे.

पोलिसांनी दिलेल्या माहितीनुसार, आरोपी गेल्या चार वर्षांपासून पत्नीच्या चारित्र्यावर विनाकारण संशय घेत होता. यावरून दोघांमध्ये वारंवार वाद होत होते. कुटुंबातील ज्येष्ठांनी अनेकदा त्याची समजूत काढण्याचा प्रयत्न केला, मात्र त्याच्या वर्तनात कोणताही बदल झाला नाही.

अखेर २८ जून २०२६ रोजी पहाटे सुमारे पाच वाजण्याच्या सुमारास घरात झोपलेल्या पत्नीच्या गळ्यावर आणि हातावर आरोपीने कुऱ्हाडीने बेछूट वार केले. गंभीर जखमी झालेल्या शोभा यांचा घटनास्थळीच मृत्यू झाला.

या प्रकरणी मृत महिलेचे भाऊ महांतेश गुरप्पा पाटील यांनी अथणी पोलीस ठाण्यात फिर्याद दिली. त्यांच्या तक्रारीवरून पोलिसांनी खुनाचा गुन्हा दाखल करून आरोपी पतीला तातडीने अटक केली.

या घटनेची माहिती देताना जिल्हा पोलीस अधीक्षक के. रामराजन यांनी आरोपीविरुद्ध पुढील कायदेशीर कारवाई सुरू असून, या प्रकरणाचा अधिक तपास अथणी पोलीस करत असल्याचे सांगितले.

The post चारित्र्याच्या संशयावरून पत्नीची निर्घृण हत्या appeared first on News 24 Tass Marathi.