शुक्रवारी दुपारी गोविंदपूर येथील शेत परिसरात हा रक्तरंजित प्रकार घडला. या घटनेत दुंडप्पा निराळे, शिवपुत्र निराळे, चंद्रकांत निराळे, राहुल निराळे, समर्थ निराळे आणि शब्बीर अत्तार यांचा मृत्यू झाला आहे. तर अरविंद कटगे आणि जेसीबी चालक संदीप माने हे गंभीर जखमी झाले असून त्यांच्यावर रुग्णालयात उपचार सुरू आहेत.

घटनेची माहिती मिळताच आयजीपी संदीप पाटील यांनी वरिष्ठ पोलीस अधिकाऱ्यांसह घटनास्थळी भेट देऊन संपूर्ण घटनेचा आढावा घेतला. त्यांनी तपासाच्या प्रगतीची माहिती घेत संबंधित अधिकाऱ्यांना आरोपींचा शोध घेऊन प्रकरणाचा लवकरात लवकर छडा लावण्याच्या सूचना दिल्या. तसेच परिसरातील कायदा व सुव्यवस्था कायम राखण्यासाठी आवश्यक त्या उपाययोजना करण्याचे निर्देशही दिले.

या घटनेमागे जुन्या जमिनीच्या वादाचे कारण असल्याचा प्राथमिक संशय व्यक्त केला जात आहे. प्रकरणाची संवेदनशीलता लक्षात घेऊन चडचण परिसरात अतिरिक्त पोलीस बंदोबस्त तैनात करण्यात आला असून डीएआर आणि केएसआरपीच्या तुकड्याही तैनात करण्यात आल्या आहेत.

दरम्यान, शवविच्छेदनानंतर मृतदेह नातेवाईकांच्या ताब्यात देण्यात आले असून या सामूहिक हत्याकांडामुळे विजापूर जिल्ह्यात खळबळ उडाली आहे. पोलिसांकडून पुढील तपास सुरू असून आरोपींच्या अटकेनंतर या घटनेमागील नेमके कारण स्पष्ट होणार आहे.

The post विजापूर हत्याकांडानंतर आयजीपी संदीप पाटील यांची घटनास्थळी पाहणी appeared first on News 24 Tass Marathi.

विजयपूर : चडचण तालुक्यातील गोविंदपूर गावात शुक्रवारी सायंकाळी घडलेल्या थरारक गोळीबारात सहाजणांची निर्घृण हत्या करण्यात आल्याने संपूर्ण भिमातीर परिसरात भीती आणि तणावाचे वातावरण निर्माण झाले आहे. जमिनीच्या जुन्या वादातून हा सामूहिक हल्ला झाल्याचा प्राथमिक अंदाज पोलिसांकडून व्यक्त करण्यात येत आहे.

मिळालेल्या माहितीनुसार, गोविंदपूर गावातील निराळे आणि गुळगी (गोलगी) कुटुंबांमध्ये अनेक दिवसांपासून जमिनीच्या कारणावरून वाद सुरू होता. या वैमनस्यातूनच अज्ञात हल्लेखोरांनी गावात येऊन थेट गोळीबार केला. या भीषण हल्ल्यात सहाजणांचा जागीच मृत्यू झाला.

मृतांमध्ये रेवणसिद्धप्पा निराळे, दुंडप्पा रेवणसिद्धप्पा निराळे, शिवपुत्र रेवणसिद्धप्पा निराळे, चंद्रशेखर निराळे, शब्बीर अत्तार यांच्यासह आणखी एका व्यक्तीचा समावेश असल्याची प्राथमिक माहिती समोर आली आहे.

घटनेनंतर गावात तणावपूर्ण शांतता पसरली असून सीमाभागातील नागरिकांमध्ये मोठी भीती निर्माण झाली आहे. माहिती मिळताच पोलिसांचा मोठा फौजफाटा घटनास्थळी दाखल झाला असून परिसरात कडेकोट बंदोबस्त ठेवण्यात आला आहे. वरिष्ठ पोलीस अधिकाऱ्यांनी घटनास्थळी भेट देऊन तपास सुरू केला असून हल्लेखोरांचा शोध घेण्यासाठी विशेष पथके तयार करण्यात आली आहेत.

या सामूहिक हत्याकांडामुळे विजयपूर जिल्हा हादरला असून भिमातीर परिसरात पुन्हा एकदा रक्तपाताची पुनरावृत्ती झाल्याची चर्चा सुरू आहे.

The post विजयपूर तालुक्यात जमिनीच्या वादातून सहा जणांची गोळ्या झाडून हत्या appeared first on News 24 Tass Marathi.

बेळगाव : कार खरेदी-विक्रीच्या पैशांच्या व्यवहारातून बेळगाव तालुक्यातील हुंचेनहट्टी गावाजवळ एका २२ वर्षीय तरुणाची तलवारीने सपासप वार करून निर्घृण हत्या करण्यात आल्याची धक्कादायक घटना उघडकीस आली आहे. या हत्याकांडाचा छडा लावत बेळगाव ग्रामीण पोलिसांनी अवघ्या २४ तासांच्या आत पाच संशयित आरोपींना ताब्यात घेत मोठी कारवाई केली आहे.

मजगाव येथील राहुल तळवार (वय २२) असे हा या हल्ल्यात मृत्यू झालेल्या तरुणाचे नाव असून, जुनी कार खरेदी करून परत करण्याच्या व्यवहारावरून काही जणांशी त्याचा वाद सुरू होता. याच वादातून सात ते आठ जणांच्या टोळीने राहुलला पैसे देण्याच्या बहाण्याने बुधवारी २७ मे रोजी हुंचेनहट्टी गावाबाहेरील निर्जन ठिकाणी बोलावले. तिथे आरोपींनी तलवारीसह इतर धारदार शस्त्रांनी राहुलवर जीवघेणा हल्ला चढवला. डोक्यावर आणि हातांवर गंभीर जखमा झालेल्या राहुलला तातडीने बीम्स रुग्णालयात दाखल करण्यात आले. मात्र उपचारापूर्वीच त्याचा मृत्यू झाला.

घटनेनंतर ग्रामीण पोलिसांनी वेगाने तपासाची चक्रे फिरवत तांत्रिक पुरावे आणि संशयितांच्या हालचालींच्या आधारे अवघ्या २४ तासांत पाच आरोपींना अटक केली. या प्रकरणाचा पुढील तपास सुरू असल्याची माहिती पोलिसांनी दिली.

दरम्यान, मृत राहुलच्या कुटुंबीयांनी आरोपींना कठोर शिक्षा देण्याची मागणी केली आहे. “माझा मुलगा कोणत्याही भांडणात नव्हता, मारेकऱ्यांना फाशीची शिक्षा द्या,” असा आक्रोश राहुलच्या आईने केला.

शहर पोलीस आयुक्त भूषण बोरसे यांनी सांगितले की, जुन्या कारच्या व्यवहारातून निर्माण झालेल्या पैशांच्या वादातून ही हत्या घडली असून, प्रकरणातील इतर आरोपींचाही शोध सुरू आहे.

The post राहुल तळवार खून प्रकरणाचा २४ तासांत तपास ; पाच संशयित ताब्यात appeared first on News 24 Tass Marathi.

कागवाड : तालुक्यातील ऐनापूर येथे तरुणाचा दगडाने ठेचून खून केल्याप्रकरणी कागवाड पोलिसांनी अवघ्या काही तासांत दोन आरोपींना अटक केली आहे. क्षुल्लक कारणावरून झालेल्या वादाचे पर्यवसान थेट खुनात झाल्याचे तपासात उघड झाले आहे.

याबाबत ऐनापूर येथील ललिता सिद्धप्पा कमते यांनी कागवाड पोलीस ठाण्यात फिर्याद दिल्यानंतर पोलिसांनी तत्काळ तपास सुरू केला. मंगळवारी दुपारी दीड ते सायंकाळी सव्वापाचच्या दरम्यान गोविंद शंकर देवल यांच्या शेताच्या बांधावर ही घटना घडली होती. शेतातील नारळ विक्रीच्या कारणावरून झालेल्या वादातून आरोपींनी संतोष सिद्धप्पा कमते यांच्या डोक्यात दगड घालून निर्घृण खून केल्याची माहिती समोर आली आहे.

घटनेनंतर आरोपी फरार झाले होते. मात्र बेळगाव जिल्हा पोलीस प्रमुख के. रामराजन, अतिरिक्त पोलीस अधीक्षक आर. बी. बसरगी आणि अथणीचे डीएसपी प्रशांत मुन्नोळी यांच्या मार्गदर्शनाखाली पोलिसांनी वेगाने तपासाची सूत्रे हलवली. अथणी वर्तुळाचे सीपीआय संतोष हल्लार आणि कागवाडचे पीएसआय राघवेंद्र खोत यांच्या पथकाने संशयितांचा माग काढत ऐनापूर येथील बाहुबली बाळासाहेब भोसगे आणि श्रीशैल कल्लाप्पा मडीवाळर या दोघांना अटक केली. या प्रकरणी पुढील तपास आणि कायदेशीर कारवाई सुरू असल्याची माहिती पोलिसांनी दिली.

The post ऐनापूरमधील तरुणाच्या खुनाचा अवघ्या काही तासांत छडा appeared first on News 24 Tass Marathi.

बेळगाव : जिल्ह्यातील मुडलगी शहरातील वड्डर गल्ली परिसरात एका २२ वर्षीय तरुणाची चाकूने भोसकून निर्घृण हत्या करण्यात आल्याची धक्कादायक घटना उघडकीस आली आहे. लक्ष्मण बंडीवड्डर असे मृत तरुणाचे नाव असून प्रेमप्रकरणातून हा खून झाल्याचा संशय व्यक्त केला जात आहे.

मिळालेल्या माहितीनुसार, लक्ष्मण बंडीवड्डर हा कामानिमित्त विजयपूर जिल्ह्यातील टक्कळकी गावात गेला होता. तो १८ मे रोजी आपल्या मूळ गावी परतला होता. शनिवारी मध्यरात्री अज्ञात तरुणांनी त्याच्यावर चाकूने हल्ला केला. या हल्ल्यात तो गंभीर जखमी झाला होता.

हल्ल्यानंतर रक्ताच्या थारोळ्यात पडलेल्या लक्ष्मणने आपल्या नातेवाईकांना फोन करून, “माझ्यावर चाकूने हल्ला झाला आहे,” अशी माहिती दिली. त्यानंतर नातेवाईकांनी घटनास्थळी धाव घेत त्याला तातडीने स्थानिक रुग्णालयात दाखल केले. मात्र, अतिरक्तस्रावामुळे उपचारादरम्यान त्याचा मृत्यू झाला.

घटनेमागे प्रेमप्रकरण कारणीभूत असल्याची चर्चा परिसरात सुरू असून, चार तरुणांवर संशय व्यक्त करण्यात येत आहे. पोलिसांनी आरोपींच्या शोधासाठी विशेष पथके स्थापन करून तपासाला गती दिली आहे.

The post मुडलगीत चाकूने भोसकून तरुणाची हत्या appeared first on News 24 Tass Marathi.

बेळगाव : कौटुंबिक वादातून नातवानेच आजीवर धारदार चाकूने हल्ला करून तिचा निर्घृण खून केल्याची धक्कादायक घटना शनिवारी (दि. १६) रात्री अगसगे (ता. बेळगाव) येथे घडली. या घटनेमुळे परिसरात खळबळ उडाली असून संशयित फरार झाला आहे. याप्रकरणी काकती पोलिस स्थानकात नातवाविरुद्ध खुनाचा गुन्हा दाखल करण्यात आला आहे. बाळव्वा कलगौडा पाटील (वय ७०; रा. अगसगे) असे खून झालेल्या वृद्धेचे नाव तर कलगौडा अप्पय्यागौडा पाटील (वय २४) असे संशयिताचे नाव आहे.

याबाबत घटनास्थळावरून प्राप्त प्राथमिक माहितीनुसार, शनिवारी रात्री साडेनऊच्या सुमारास कौटुंबिक कारणातून आजी आणि नातवामध्ये वाद झाला. काही वेळातच वाद विकोपाला गेल्याने रागाच्या भरात संशयिताने घरातील धारदार चाकूने बाळव्वा पाटील यांच्यावर वार केले. यात गंभीर जखमीझालेल्या वृद्धेला तातडीने उपचारासाठी रुग्णालयात हलविण्यात आले. मात्र, उपचारापूर्वीच त्यांचा मृत्यू झाल्याचे डॉक्टरांनी घोषित केले.

दरम्यान, घटनेची माहिती मिळताच काकती पोलिसांनी तातडीने घटनास्थळी भेट देत पंचनामा केला व मृतदेह शवविच्छेदनासाठी जिल्हा रुग्णालयात पाठविण्यात आला. या घटनेनंतर येथे पोलिस उपायुक्त एन.व्ही.बरमनी, एसीपी गंगाधर आणि पोलिस निरीक्षक सुरेश शिंगी यांनी येथे भेट दिली आहे. पोलिसांकडून अधिक तपास सुरू आहे.

• पोलिसांकडे गेल्याच्या रागातून ?

बाळव्वा या मागील काही दिवसांपासून नातू कलगौडा याच्या स्वभावामुळे त्रस्त होत्या. तो सतत बाळव्वा यांच्याशी भांडण काढत होता. यामुळे त्यांनी ११२ या मदत क्रमांकावर संपर्क साधला होता. तसेच काकती पोलिसांचीही भेट घेतली होती. त्यानंतर पोलिसांनी शनिवारी रात्री येऊन त्याला समजही दिली होती. मात्र, या घटनेनंतर काही वेळात पुन्हा पोलिसांकडे गेल्याचा राग मनात धरून चाकूने हल्ला केल्याची माहिती स्थानिकांनी दिली.

The post अगसगे येथे नातवाकडून आजीचा खून appeared first on News 24 Tass Marathi.

बेळगाव : कित्तूर पोलीस ठाण्याच्या हद्दीतील देवगाव येथे घरासमोर झोपण्याच्या कारणावरून झालेल्या किरकोळ वादाचे पर्यवसान थेट हत्येत झाले.
बुधवारी पहाटे घडलेल्या या घटनेमुळे परिसरात खळबळ उडाली. या प्रकरणी कित्तूर पोलिसांनी तातडीने कारवाई करत आरोपीला काही तासांत अटक केली असल्याची माहिती जिल्हा पोलीस अधीक्षक के.रामराजन यांनी दिली.

बेळगावात येथे झालेल्या पत्रकार परिषदेत जिल्हा पोलीस अधीक्षक के.रामराजन यांनी दिलेल्या माहितीनुसार, ६ मे २०२६ रोजी पहाटे सुमारे २.३० वाजण्याच्या सुमारास ही घटना घडली. महांतेश निंगाप्पा हुच्चन्नावर (वय ५२) हे आरोपी प्रकाश कल्लप्पा कलार यांच्या घरासमोर झोपले होते. “माझ्या घरासमोर का झोपला?” या कारणावरून दोघांमध्ये वाद झाला.

वाद वाढल्यानंतर आरोपी प्रकाश कलार याने महांतेश यांना खाली पाडून दगडाने त्यांच्या डोक्यावर वार केले. त्यानंतर त्यांचा मृतदेह रस्त्यावर ओढत नेल्याची धक्कादायक माहिती पोलिस तपासात समोर आली आहे. या घटनेनंतर मृताचे नातेवाईक राजू पुंडलिक हुच्चन्नावर यांनी कित्तूर पोलीस ठाण्यात तक्रार दाखल केली. पोलिसांनी तातडीने तपास सुरू करून आरोपी प्रकाश कलार याला अटक केली.

या कारवाईत बैलहोंगलचे डीएसपी डॉ. वीरय्या हिरेमठ, सीपीआय शिवानंद गुडेगनट्टी, पीएसआय प्रवीण गंगोळ आणि कित्तूर पोलीस ठाण्याच्या पथकाने महत्त्वाची भूमिका बजावली. जिल्हा पोलीस अधीक्षक के. रामराजन आणि अतिरिक्त पोलीस अधीक्षक आर. बी. बसरगी यांनी पथकाच्या जलद कारवाईचे कौतुक केले आहे.

The post कित्तूर देवगाव येथे क्षुल्लक वादातून एकाची निर्घृण हत्या appeared first on News 24 Tass Marathi.

अथणी : बेळगाव जिल्ह्यातील अथणी शहरात गुरुवारी एका विवाहितेचा संशयास्पद मृत्यू झाल्याची घटना समोर आली असून, सासरच्या मंडळींकडून हुंड्यासाठी छळ करून तिचा खून केल्याचा आरोप नातेवाईकांनी केला आहे.

संगीता गाडीवड्डर असे मृत महिलेचे नाव असून तिचा विवाह व्यंकटेश गाडीवड्डर याच्याशी झाला होता. विवाहानंतर काही काळापासून पती व सासरच्या मंडळींकडून हुंड्यासाठी तिचा छळ केला जात असल्याचा आरोप कुटुंबीयांनी केला आहे.

घर बांधण्यासाठी माहेरून २ लाख रुपये आणावेत, असा दबाव पती व्यंकटेश सतत टाकत होता. मात्र पैसे देणे शक्य नसल्याने घरात वारंवार वाद होत होते. या कारणावरून पती आणि नणंद तिचा छळ करत असल्याचेही सांगण्यात आले आहे.

मृत महिलेची आई कस्तूरी यांनी, “केवळ दीड महिन्यातच माझ्या मुलीचा जीव घेतला. दोषींना कठोर शिक्षा मिळावी,” अशी मागणी केली आहे. तसेच तिच्या बहिणींनीही पतीवर गंभीर आरोप करत मारहाणीच्या खुणा शरीरावर असल्याचे सांगितले असून, हा खून करून आत्महत्येचा बनाव असल्याचा दावा केला आहे.

दरम्यान, घटनेची माहिती मिळताच अथणी पोलिसांनी घटनास्थळी भेट देऊन पाहणी केली आहे. हा प्रकार आत्महत्या आहे की खून, याचा तपास सुरू असून शवविच्छेदन अहवालानंतरच नेमके कारण स्पष्ट होईल, अशी माहिती पोलिसांनी दिली आहे.

The post अथणीत विवाहितेचा संशयास्पद मृत्यू appeared first on News 24 Tass Marathi.

कागवाड : बेळगाव जिल्ह्यातील कागवाड तालुक्यात मंगसुळी गावात रिक्षा स्टँडवर नंबर लावण्याच्या किरकोळ वादातून रिक्षाचालक अशोक वड्डर यांची निर्घृण हत्या करण्यात आली. या प्रकरणी पोलिसांनी वेगवान कारवाई करत अवघ्या काही तासांत तीन संशयित आरोपींना अटक करून त्यांना हिंडलगा कारागृहात रवानगी केली.

मंगसुळी गावात रिक्षा उभी करण्याच्या कारणावरून भाऊबंदकीतील जुना वाद पुन्हा उफाळून आला होता. सागर संभाजी वड्डर, शिवा संभाजी वड्डर आणि विनोद संभाजी वड्डर यांनी अशोक वड्डर यांच्यावर जीवघेणा हल्ला करून त्यांची हत्या केली. गुन्हा लपवण्यासाठी आरोपींनीच पोलीस ठाण्यात जाऊन ‘भांडण सुरू आहे’ अशी खोटी माहिती दिल्याचे उघड झाले.

मृताच्या नातेवाईकांपूर्वीच आरोपी तक्रार देण्यासाठी पोहोचल्याने पोलिसांना संशय आला. जिल्हा पोलीस अधीक्षक के. रामराजन यांच्या मार्गदर्शनाखाली सखोल चौकशी करण्यात आली असता आरोपींनी गुन्ह्याची कबुली दिली. न्यायालयाने तिघांना न्यायालयीन कोठडी सुनावली आहे.

रिक्षा नंबर लावण्यासारख्या शुल्लक कारणावरून तरुणाचा बळी गेल्याने कागवाड परिसरात हळहळ व्यक्त होत आहे. पोलिसांनी जलद गतीने तपास पूर्ण करत आरोपींना जेरबंद केल्याबद्दल पोलीस पथकाचे विशेष कौतुक करण्यात आले आहे. या प्रकरणात आणखी कोणाचा सहभाग आहे का, याचा तपास सुरू असल्याची माहिती पोलीस अधीक्षकांनी दिली.

The post कागवाडमधील रिक्षाचालकाच्या हत्येचा छडा appeared first on News 24 Tass Marathi.

कागवाड : बेळगाव जिल्ह्याच्या कागवाड तालुक्यातील मंगसूळी येथे रिक्षा उभ्या करण्याच्या रांगेवरून झालेल्या वादातून एका तरुण रिक्षाचालकाची हत्या झाल्याची घटना समोर आली आहे. पोलिसांनी या प्रकरणी तात्काळ कारवाई करत तीन संशयितांना अटक केली असून पुढील तपास सुरू आहे.

मृत तरुणाचे नाव अशोक वडर (वय २७, रा. मंगसूळी) असे आहे. रिक्षा थांब्यावर गाड्या लावण्याच्या क्रमावरून अशोक आणि इतर चालकांमध्ये काही दिवसांपासून वाद सुरू होते. या वादातूनच परस्परांमध्ये वैर निर्माण झाले होते.

या पार्श्वभूमीवर आरोपी शिवा वडर, सागर वडर आणि विनोद वडर यांनी अशोकवर डोक्यात प्राणघातक हल्ला करून त्याचा खून केल्याचे समोर आले आहे. दोन दिवसांपूर्वी घडलेली ही घटना उशिरा उघडकीस आली. माहिती मिळताच कागवाड पोलिसांनी घटनास्थळी भेट देत पंचनामा केला.

या प्रकरणी तिन्ही आरोपींना ताब्यात घेऊन त्यांच्याविरोधात गुन्हा नोंद करण्यात आला आहे. किरकोळ कारणावरून झालेल्या या घटनेमुळे मंगसूळी परिसरात भीतीचे वातावरण निर्माण झाले आहे.

The post मंगसुळीत रिक्षा रांगेच्या वादात रिक्षाचालकाची हत्या appeared first on News 24 Tass Marathi.