बेळगाव : महापालिकेच्या बैठकीत विरोधी पक्षाच्या मुद्द्यांकडे सातत्याने दुर्लक्ष केले जात असल्याचा आरोप करत विरोधी पक्षाच्या सदस्यांनी शनिवारी झालेल्या बैठकीवर बहिष्कार टाकत तीव्र आंदोलन केले. या घटनेमुळे महापालिकेत काही काळ तणावाचे वातावरण निर्माण झाले.

बैठक सुरू होण्यापूर्वीच सभागृहात तणावपूर्ण परिस्थिती निर्माण झाली. विरोधी पक्षाच्या सदस्यांनी सत्ताधारी भाजप गटावर जोरदार टीका करत महत्त्वाचे मुद्दे, नागरिकांच्या समस्या आणि विकासाशी संबंधित विषय जाणूनबुजून दुर्लक्षित केले जात असल्याचा आरोप केला.

विरोधी पक्षाच्या सदस्यांनी सांगितले की, ते लोकांनी निवडून दिलेले प्रतिनिधी असून लोकांच्या समस्या मांडण्याचा त्यांना अधिकार आहे. मात्र त्यांच्या सूचना आणि आक्षेपांना कोणतीही संधी दिली जात नसल्याने अशा बैठकीत सहभागी होण्यात अर्थ नाही, अशी भूमिका त्यांनी घेतली.

याच पार्श्वभूमीवर विरोधी पक्षाने बैठकीवर बहिष्कार टाकत सभागृहाबाहेर घोषणाबाजी केली. सत्ताधारी पक्षाने विरोधी पक्षाच्या मतांचा आदर करावा आणि लोकशाही प्रक्रियेचा सन्मान राखावा, अशी मागणी यावेळी करण्यात आली.

या घटनेनंतर काही काळ गोंधळाचे वातावरण निर्माण झाले असून सत्ताधारी सदस्यांनी बैठक पुढे सुरू ठेवली.

The post बेळगाव महापालिका बैठकीवर विरोधी पक्षाचा बहिष्कार appeared first on News 24 Tass Marathi.

बेळगाव : केंद्र सरकारच्या महिला आरक्षण आणि नारी शक्ती धोरणाला काँग्रेसकडून होत असलेल्या विरोधाच्या पार्श्वभूमीवर बेळगाव महापालिकेच्या सर्वसाधारण सभेत महिला सक्षमीकरण कायदा मंजूर करण्यात आला. महापौर प्रीती कामकर यांच्या पुढाकाराने हा ठराव सभागृहात मंजूर झाला असून या निर्णयामुळे राजकीय वातावरण तापले आहे.

शनिवारी झालेल्या सभेत केंद्र सरकारच्या महिलांसाठीच्या ३३ टक्के आरक्षण विधेयकाला काँग्रेसकडून विरोध झाल्याबद्दल सत्ताधारी गटाने तीव्र नाराजी व्यक्त केली. या विरोधाचा निषेध करत महापालिकेत महिला सक्षमीकरण कायदा मंजूर करण्यात आला.

उपमहापौर हनुमंत कोंगाळी यांनी काँग्रेसच्या भूमिकेवर टीका करताना सांगितले की, केंद्र सरकारच्या नारी शक्ती योजनेला विरोध करणारे धोरण देशातील जनता कधीही स्वीकारणार नाही. चर्चेच्या भीतीने विरोधी पक्षाच्या सदस्यांनी बैठकीवर बहिष्कार टाकल्याचा आरोपही त्यांनी केला.

भाजप सदस्य राजशेखर डोणी यांनी काँग्रेसवर टीका करताना सांगितले की, महिला सक्षमीकरणाच्या विरोधातील भूमिका ही स्त्रीशक्तीचा अपमान करणारी आहे. अशा भूमिकांचा महापालिकेत ठाम निषेध होणे आवश्यक असल्याचे त्यांनी स्पष्ट केले.

या निर्णयामुळे महापालिकेतील सत्ताधारी आणि विरोधक यांच्यातील संघर्ष अधिक तीव्र होण्याची शक्यता असून पुढील काळात सत्ताधारी आणि विरोधकांमध्ये या मुद्द्यावरून संघर्ष अधिक वाढण्याची शक्यता व्यक्त केली जात आहे.

The post बेळगाव महापालिकेत महिला सक्षमीकरण कायदा मंजूर appeared first on News 24 Tass Marathi.

या चर्चेत सौंदत्ती तालुक्यातील शेतकऱ्यांच्या हितासाठी राष्ट्रीय महामार्ग ७४८ए वर आवश्यक सुरक्षा उपाययोजना करण्यावर भर देण्यात आला. तसेच बेळगाव जिल्ह्यातील राष्ट्रीय महामार्ग ५४८बी च्या कामाला गती देण्याची मागणी करण्यात आली.

एनएच-७४८ए संदर्भात नवीन महामार्गाच्या संरेखनामुळे पारंपरिक बैलगाडी मार्गांना आणि कृषी वाहतुकीला होणारा अडथळा टाळण्यासाठी सौंदत्ती तालुक्यातील मुरकुंबी आणि हिरेकोप्प गावांजवळ नवीन वाहन भुयारी मार्ग (व्हीयूपी) उभारण्याची विनंती डॉ. कोरे यांनी केली.

तसेच अथणी तालुक्यातील मुरगुंडी ते हुक्केरी तालुक्यातील गोतुर दरम्यान असलेल्या एनएच-५४८बी रस्त्याचे बांधकाम लवकरात लवकर पूर्ण करण्याचे आवाहनही त्यांनी मंत्र्यांना केले.

हा रस्ता प्रादेशिक आर्थिक विकासासाठी तसेच कर्नाटक आणि महाराष्ट्र राज्यांतील संपर्क अधिक मजबूत करण्यासाठी अत्यंत महत्त्वाचा असल्याचे त्यांनी अधोरेखित केले. या मुद्द्यांवर सकारात्मक विचार करून आवश्यक ती मदत केली जाईल, असे आश्वासन केंद्रीय मंत्री नितीन गडकरी यांनी दिल्याचे सांगण्यात आले.

The post बेळगाव जिल्ह्यातील महामार्ग विकासासाठी प्रभाकर कोरे यांचे मंत्री नितीन गडकरींना आवाहन appeared first on News 24 Tass Marathi.

बेळगाव : वडगाव परिसरातील श्री शिवजयंती उत्सव मंडळाच्या वतीने सोमवार दिनांक 20 एप्रिल 2026 रोजी भव्य पारंपरिक मिरवणुकीचे आयोजन करण्यात आले आहे. या मिरवणुकीत एकूण ७ जिवंत चित्ररथ (लाईव्ह देखावे) सादर करण्यात येणार असून, मिरवणूक रात्री ८ वाजल्यानंतर सुरू होऊन वडगावमधील सर्व गल्ली बोळांमधून फिरणार आहे.

या संदर्भात मंडळाच्या पदाधिकाऱ्यांनी बुधवारी (दि. १५) सायंकाळी ६ वाजता पोलीस आयुक्त कार्यालयात पोलीस आयुक्त भूषण बोरसे यांची भेट घेऊन मिरवणुकीबाबत सविस्तर माहिती दिली.

यावेळी पोलीस आयुक्तांनी मिरवणुकीच्या उद्घाटन पूजेसाठी उपस्थित राहण्यास सहमती दर्शवली आहे. यावेळी उपायुक्त नारायण बरमणी यांचीही भेट घेण्यात आली. या भव्य मिरवणुकीमुळे वडगाव परिसरात उत्साहाचे वातावरण निर्माण झाले असून, नागरिकांनी मोठ्या संख्येने सहभागी व्हावे असे आवाहन मंडळाच्या वतीने करण्यात आले आहे.

बैठकी दरम्यान वडगाव -जुने बेळगाव शिवजयंती उत्सव मंडळाचे पदाधिकारी श्री. मनोहर हलगेकर, श्री. महेश जुवेकर, श्री. अमोल देसाई, श्री. ज्ञानेश्वर मन्नूरकर, श्री. विजय हलगेकर, श्री. भाऊराव पाटील, श्री. मंगेश नागोजीचे, श्री. निलेश कुंदेकर, श्री. सुशांत यल्लुपाचे, श्री. सचिन आजरेकर, श्री. हरी यलजी तसेच मध्यवर्ती सार्वजनिक श्री शिवजयंती उत्सव मंडळचे जनसंपर्क प्रमुख श्री. विकास कलघटगी, त्याचबरोबर पाटील गल्ली, कारभार गल्ली, विष्णू गल्ली, वझे गल्ली, सोनार गल्ली, दत्ता गल्ली मंडळाचे पदाधिकारी उपस्थित होते.

The post वडगाव विभागातील पारंपरिक श्री शिवजयंती भव्य मिरवणूक सोमवारी appeared first on News 24 Tass Marathi.

बेळगाव : दरवर्षीप्रमाणे यंदाही २१ एप्रिल रोजी सायंकाळी ६ वाजता शिवजयंती चित्ररथ उत्सव मोठ्या उत्साहात साजरा करण्यात येणार असून, या पार्श्वभूमीवर शिवजयंती चित्ररथ महामंडळाने नियोजनाला गती दिली आहे. रविवारी धर्मवीर संभाजीराजे चौक येथील जत्तीमठ येथे झालेल्या बैठकीत चित्ररथ मंडळांच्या समस्या सोडवण्याचा ठाम निर्धार व्यक्त करण्यात आला.

महामंडळाचे अध्यक्ष सुनील जाधव यांच्या अध्यक्षतेखाली झालेल्या या बैठकीत यंदाचा उत्सव अधिक भव्य, शिस्तबद्ध आणि अभूतपूर्व पद्धतीने साजरा करण्यावर सविस्तर चर्चा करण्यात आली. प्रशासनाने दिलेल्या सूचनांचे पालन करत छत्रपती शिवाजी महाराजांच्या लौकिकाला साजेसा उत्सव घडविण्यासाठी विविध मंडळांच्या सूचना आणि अडचणींवर विचारविनिमय करण्यात आला.

मिरवणूक वेळेत सुरू करून वेळेतच पूर्ण करण्यावर विशेष भर देण्यात आला. कोणताही वाद निर्माण होणार नाही याची दक्षता घेण्याचे आवाहन करत शिस्तबद्ध वातावरणात मिरवणूक पार पाडण्याचे निर्देश देण्यात आले. तसेच मंडळांच्या अडचणी सोडवण्यासाठी महामंडळ कटिबद्ध असल्याचे अध्यक्षांनी स्पष्ट केले.

यंदापासून उत्कृष्ट चित्ररथ स्पर्धा आयोजित करण्यात येणार असून, प्रसाद मोरे यांच्या मार्गदर्शनाखाली ही स्पर्धा होणार आहे. विजेत्यांना रोख पारितोषिक, मानचिन्ह आणि मानपत्र देण्यात येणार असून, भव्य समारंभात मान्यवरांच्या हस्ते बक्षीस वितरण केले जाणार आहे.

प्रत्येक मंडळाने आपला चित्ररथ वेळेत मिरवणूक मार्गावर आणावा, व्यसनांपासून दूर राहावे आणि परस्पर सन्मान राखत कोणताही संघर्ष टाळावा, असे आवाहन करण्यात आले. प्रशासनाकडून मदत कक्ष उभारण्यात येणार असून, त्याद्वारे मंडळांच्या समस्या सोडवण्यात येतील.

बेळगावची शिवजयंती ही देशभरात विशेष ओळख असलेली परंपरा असून, येथे सादर होणारे चित्ररथ छत्रपती शिवाजी महाराजांच्या जीवनदर्शनाचे दर्शन घडवतात. त्यामुळे सर्व मंडळांनी सहकार्याची भावना ठेवून उत्सव यशस्वी करावा, असे मत साहित्यिक गुणवंत पाटील यांनी व्यक्त केले. तसेच शिवप्रेमींनी पोशाख आणि वर्तनात सभ्यता राखावी, असेही त्यांनी स्पष्ट केले.

या बैठकीस अध्यक्ष सुनील जाधव, सरचिटणीस जे. बी. शहापूरकर, साहित्यिक गुणवंत पाटील, प्रसाद मोरे, रंजीत हवळणाचे, चेतन किल्लेकर, शिवम गंधवाले, अरुण पाटील, चंद्रकांत माळी, अनंत बामणे, बसवंत मुतकेकर यांच्यासह अनेक शिवभक्त उपस्थित होते.

The post शिवजयंती चित्ररथ मिरवणुकीच्या नियोजनासाठी महामंडळाची बैठक appeared first on News 24 Tass Marathi.

बेळगाव : बेळगाव शहर व उपनगरात दरवर्षी सार्वजनिक शिवजयंती उत्सवात शिवरायांच्या जीवनातील विविध प्रसंगांवर आधारित आकर्षक सजीव देखावे सादर केले जातात, ज्यामुळे बेळगावकरांचे लक्ष वेधले जाते.

याच पार्श्वभूमीवर श्री शिवजयंती चित्ररथ महामंडळातर्फे शिवजयंती उत्सवाच्या नियोजनासाठी उद्या रविवारी, दिनांक १२ एप्रिल रोजी महत्त्वपूर्ण बैठक आयोजित करण्यात आली आहे. ही बैठक धर्मवीर संभाजीराजे चौकातील दुर्गादेवी मंदिर, जत्तीमठ येथे सकाळी ११ वाजता होणार आहे.

या बैठकीत शिवजयंती चित्ररथ स्पर्धेचे आयोजन, मिरवणूक मार्गावरील विविध समस्या तसेच उत्सव मंडळांना भेडसावणाऱ्या अडचणींवर सविस्तर चर्चा केली जाणार आहे. पोलीस आयुक्तांनी दिलेल्या सूचनांच्या अंमलबजावणीबाबतही विचारमंथन होणार आहे.

या बैठकीस शहर व उपनगरातील सर्व शिवजयंती उत्सव मंडळांचे पदाधिकारी व कार्यकर्त्यांनी उपस्थित राहावे, असे आवाहन शिवजयंती चित्ररथ महामंडळाचे अध्यक्ष सुनील जाधव, साहित्यिक गुणवंत पाटील, सरचिटणीस जे. बी. शहापूरकर, उपाध्यक्ष प्रसाद मोरे, संतोष कणेरी, रवींद्र जाधव, विनायक बावडेकर, अरुण पाटील, निहाल शहापूरकर, आदित्य पाटील व आकाश हांडे यांनी केले आहे.

The post शिवजयंती चित्ररथ महामंडळाची उद्या महत्त्वपूर्ण बैठक appeared first on News 24 Tass Marathi.

बेळगाव : बेळगावची ऐतिहासिक शिवजयंती मिरवणूक यंदा अधिक शिस्तबद्ध आणि पारंपरिक पद्धतीने पार पाडण्यासाठी पोलीस प्रशासन सज्ज झाले असून, नियमांचे उल्लंघन करणाऱ्यांवर कडक कारवाई केली जाणार असल्याचा इशारा शहर पोलीस आयुक्त भूषण बोरसे यांनी दिला आहे.

शिवजयंतीच्या अनुषंगाने पोलीस आयुक्त कार्यालयात झालेल्या बैठकीत शिवजन्मोत्सव ते राज्याभिषेक दिनापर्यंत विविध कार्यक्रमांच्या आयोजनाबाबत सविस्तर चर्चा करण्यात आली. पोलीस प्रशासनाने घातलेल्या अटी मान्य करून कोणताही गोंधळ न करता यंदाची शिवजयंती साजरी करण्याचा निर्णय सर्वानुमते घेण्यात आल्याचे सुनील जाधव यांनी सांगितले.

शिवजयंती चित्ररथ महामंडळाचे अध्यक्ष सुनील जाधव यांनी मिरवणुकीदरम्यान पोलीस, इस्कॉन, अग्निशमन दल, जिल्हा प्रशासन आणि रुग्णवाहिका सेवा यांचा समावेश असलेला एकच ‘मदत कक्ष’ स्थापन करण्याची मागणी केली. कोणतीही आपत्कालीन परिस्थिती उद्भवल्यास शिवभक्तांना एकाच ठिकाणी सर्व मदत मिळावी, ही मागणी प्रशासनाने तात्काळ मान्य केली आहे.

मिरवणुकीत यंदा ऐतिहासिक देखावे आणि मर्दानी खेळांना विशेष प्राधान्य दिले जाणार आहे. डीजे लावून हिडीस नृत्य करणाऱ्या तसेच इतर मंडळांच्या सादरीकरणात अडथळा निर्माण करणाऱ्या मंडळांना मुख्य मिरवणुकीत प्रवेश दिला जाणार नाही. अशा मंडळांचे चित्ररथ मिरवणुकीच्या शेवटी पाठवले जातील आणि मर्यादेपेक्षा जास्त आवाज करणारी डॉल्बी सिस्टीम जप्त केली जाईल.

तसेच सादरीकरणावेळी कोणत्याही जाती-धर्माच्या भावना दुखावल्या जाणार नाहीत, याची दक्षता घेण्याचे स्पष्ट निर्देश पोलीस आयुक्त भूषण बोरसे यांनी दिले आहेत.

या बैठकीला शहर पोलीस आयुक्त भूषण बोरसे, उपायुक्त नारायण बरमणी, रमाकांत कोंडुसकर, रणजीत चव्हाण – पाटील, प्रकाश मरगाळे, विकास कलघटगी, मध्यवर्ती सार्वजनिक शिवजयंती उत्सव मंडळाचे पदाधिकारी, सार्वजनिक शिवजयंती उत्सव मंडळाचे पदाधिकारी, कार्यकर्ते, शिवसैनिक मोठ्या संख्येने उपस्थित होते.

The post बेळगावच्या शिवजयंती मिरवणुकीत डॉल्बी वापरावर बंदी appeared first on News 24 Tass Marathi.

बेळगाव : शहरातील प्रलंबित नागरी कामे, ड्रेनेज समस्या आणि मूलभूत सुविधांतील त्रुटींवरून महापालिकेच्या प्रशासकीय बैठकीत नगरसेवकांनी अधिकाऱ्यांना धारेवर धरत जाब विचारला. संतप्त सदस्यांच्या भूमिकेनंतर महापौर प्रीती कामकर यांनी अधिकाऱ्यांची कानउघडणी करत तातडीने कार्यवाहीचे आदेश दिले.

बेळगाव महानगरपालिकेच्या परिषद सभागृहात महापौर प्रीती कामकर यांच्या अध्यक्षतेखाली पार पडलेल्या बैठकीत शहरातील विविध प्रलंबित नागरी कामांचा आढावा घेण्यात आला. यावेळी अनेक समस्यांवरून वातावरण चांगलेच तापले.

ड्रेनेजच्या प्रश्नावरून नगरसेविका रेश्मा भैरकदार यांनी आक्रमक भूमिका घेतली. त्यांच्या प्रभागात पावसाळ्यात सांडपाणी रस्त्यावर येत असून नागरिकांना मोठ्या अडचणींना सामोरे जावे लागत आहे. वारंवार तक्रारी करूनही अधिकारी दुर्लक्ष करत असल्याची खंत त्यांनी व्यक्त केली. मन्नत कॉलनीतील घरांमध्ये पावसाचे पाणी शिरत असल्याची बाब नगरसेवक रियाज किल्लेदार यांनी मांडली. या पार्श्वभूमीवर महापौरांनी संबंधित अधिकाऱ्यांनी प्रत्यक्ष स्थळी भेट देऊन समस्या त्वरित सोडवण्याचे निर्देश दिले.

राष्ट्रीय महामार्गालगतच्या खड्ड्यांच्या दुरुस्तीबाबतही अधिकाऱ्यांच्या निष्क्रियतेवर नाराजी व्यक्त करण्यात आली. नामनिर्देशित सदस्य दिनेश नाशिपुडी यांनी जबाबदारी स्वीकारूनही कामात गती नसल्याचा मुद्दा उपस्थित केला. एल अँड टी कंपनीच्या कामामुळे सिडी वर्कचे नुकसान होऊन पावसाचे पाणी दुकानांत शिरल्याने व्यापाऱ्यांचे नुकसान झाल्याचा प्रश्न नगरसेवक जयतीर्थ सवदत्ती यांनी उपस्थित केला. कलमठ रोड परिसरातील परिस्थितीमुळे जनजीवन विस्कळीत झाल्याची माहितीही त्यांनी दिली.

शहरातील नागरी तक्रारींचे वाढते प्रमाण लक्षात घेऊन रस्ते व ड्रेनेजची कामे प्राधान्याने पूर्ण करावीत, अशी सूचना स्थायी समिती अध्यक्षा लक्ष्मी राठोड यांनी केली.

दरम्यान, २०१६ मध्ये टाकण्यात आलेल्या भूमिगत केबल्सचा मुद्दाही बैठकीत गाजला. जवळपास ८० टक्के काम पूर्ण असूनही उर्वरित काम रखडल्याने नागरिकांना त्रास होत असल्याची नाराजी रेश्मा भैरकदार यांनी व्यक्त केली. यावर समाधानकारक उत्तर न मिळाल्याने नगरसेवक रवी धोत्रे आणि संदीप जिरग्याळ यांनी अधिकाऱ्यांना चांगलेच धारेवर धरले.

महापालिकेची हेल्पलाइन कार्यरत नसल्याने तक्रारी नोंदवताना अडचणी येत असल्याचा मुद्दा नगरसेविका वीणा विजापूरे यांनी उपस्थित केला. या मुद्द्याला नगरसेवक राजशेखर ढोणी यांनी पाठिंबा देत नागरिकांना उत्तर द्यायचे कसे, असा सवाल उपस्थित केला.

अखेर महापौर प्रीती कामकर यांनी सर्व संबंधित अधिकाऱ्यांची कानउघडणी करत प्रलंबित कामे आणि तक्रारींचे तातडीने निराकरण करण्याचे स्पष्ट निर्देश दिले.

The post महापालिका बैठकीत प्रलंबित समस्यांवरून अधिकारी धारेवर appeared first on News 24 Tass Marathi.

बेळगाव : मध्यवर्ती सार्वजनिक श्री शिवजयंती उत्सव मंडळ, बेळगावच्या पदाधिकाऱ्यांच्या शिष्टमंडळाने शहराचे पोलीस आयुक्त श्री भुषण गुलाबराव बोरसे (IPS) यांची पोलीस आयुक्त कार्यालयात भेट घेऊन येऊ घातलेल्या श्री शिवजयंती उत्सवाच्या तयारीसंदर्भात सविस्तर चर्चा केली.

यावेळी अध्यक्ष अंकुश केसकर यांनी पोलीस आयुक्तांना छत्रपती शिवाजी महाराजांवरील पुस्तक भेट दिले. बैठकीत तीन दिवस चालणाऱ्या पारंपारिक शिवजयंती उत्सवाच्या विविध बाबींवर तसेच मंगळवार, २१ तारखेला सायंकाळी होणाऱ्या मिरवणुकीच्या नियोजनावर सखोल चर्चा करण्यात आली.

पोलिस आयुक्त बोरसे यांनी मिरवणूक वेळेत सुरू करून वेळेत संपवावी, दोन चित्ररथात अंतर असू नये, आवाजाची मर्यादा पाळावी अशा सूचना केल्या तसेच शुक्रवार दि. १० एप्रिल रोजी सायंकाळी ४.३० वाजता शहर व उपनगरातील उत्सव मंडळांच्या प्रतिनिधींची बैठक पोलीस आयुक्त कार्यालयात आयोजित करण्यात आली असून, त्यामध्ये उत्सवाच्या तयारीचा आढावा घेतला जाणार असल्याचे सांगितले.

या बैठकीस अध्यक्ष अंकुश केसरकर, खजिनदार प्रकाश मरगाळे, सल्लागार माजी महापौर मालोजी आष्टेकर, जनसंपर्क प्रमुख विकास कलघटगी, कार्यवाह मदन बामणे व शिवराज पाटील उपस्थित होते.

The post सुरक्षित, शिस्तबद्ध आणि भव्य उत्सवासाठी पोलिस आयुक्तांचे सर्वोतोपरी सहकार्याचे आश्वासन appeared first on News 24 Tass Marathi.

बेळगाव : मध्यवर्ती सार्वजनिक श्री शिवजयंती उत्सव महामंडळ, शहापूर यांनी ७ एप्रिल मंगळवार सायं. ५.०० वाजता साईगणेश सोसायटीच्या सभागृहात भव्य बैठक आयोजित केली. अध्यक्षस्थानी शहापूर महामंडळाचे अध्यक्ष नेताजी जाधव होते. यंदाचा पारंपारिक शिवजयंती उत्सव १९ एप्रिल रोजी पार पडणार असून, चित्ररथ मिरवणूक २१ एप्रिलला होणार आहे.

बैठकीत शिवजयंती उत्सवाच्या पारंपारिक थाटामाटात आयोजन करण्यासाठी विचारविनिमय करण्यात आला. अध्यक्ष नेताजी जाधव म्हणाले, “बेळगावच्या शिवजयंतीला १०७ वर्षांचा इतिहास असून, कर्नाटक, महाराष्ट्र आणि गोवा राज्यातून हजारो शिवभक्त या सोहळ्याचा अनुभव घेण्यासाठी येतात. यावर्षीही उत्सव भव्यरित्या पार पडावा, यासाठी योग्य तयारी केली जाईल.”

यंदाचा कार्यक्रम १९ एप्रिल रोजी सकाळी १० वाजता छत्रपती शिवाजी उद्यान, शहापूर येथे पूजन, तर २१ एप्रिल रोजी बॅ.नाथ पै चौक येथे पहिल्या चित्ररथाचे मान्यवरांच्या हस्ते पूजन करण्यात येईल. शहापूर, अनगोळ आणि वडगाव भागातून येणाऱ्या चित्ररथांचे स्वागत महामंडळाकडून केले जाईल.

बैठकीत प्रशांत भातकांडे, श्रीकांत कदम, महादेव पाटील, पी.जी. घाडी, माजी उपमहापौर संजय शिंदे, माजी नगरसेवक राजू बिरजे, रणजीत हावळान यांसह इतरांनी आपले विचार मांडले.

यावेळी शहापूर महामंडळाच्या वतीने श्री. प्रकाश मरगाळे आणि श्री. अंकुश केसरकर यांचा सत्कार करण्यात आला. दीपक दळवी यांच्या निधनानंतर मध्यवर्ती महाराष्ट्र एकीकरण समितीच्या अध्यक्षपदाची धुरा श्री. प्रकाश मरगाळे यांच्याकडे सोपवण्यात आली आहे, तर मध्यवर्ती श्री शिवजयंती उत्सव मंडळाच्या अध्यक्षपदावर अंकुश केसरकर यांची नियुक्ती झाली.

श्री. प्रकाश मरगाळे म्हणाले, “माझ्यावर दाखवलेल्या विश्वासाला न्याय देण्याचा प्रयत्न करेन. सीमाप्रश्नासंदर्भातील घडामोडींवर लक्ष केंद्रित केले असून, शिवजयंतीनंतर मध्यवर्ती बैठकीत पुढील लढ्याची दिशा ठरवणार आहोत.”

अंकुश केसरकर म्हणाले, “माझ्यासारख्या तरुण कार्यकर्त्यावर दाखवलेल्या विश्वासाला तडा जाऊ देणार नाही. १०७ वर्षांची परंपरा लाभलेली शिवजयंती आपण सर्व मिळून भव्यदिव्य साजरी करूया. अध्यक्षपद सांभाळताना सर्वांचे सहकार्य अपेक्षित आहे.”

यावेळी बैठकीला माजी उपमहापौर संजय शिंदे, माजी नगरसेवक राजू बिर्जे, अशोक चिंडक, महादेव पाटील,पी.जी. घाडी, हिरालाल चव्हाण, श्रीकांत प्रभू, श्रीधर जाधव, सचिन केळवेकर, रणजीत हवळणाचे,अभिजीत मजुकर,सुरज चव्हाण,मंगेश नागोजीचे, राजाराम सूर्यवंशी, अनिल आंबरोळे, बाबू कोले,शशिकांत सडेकर, एस.आर.चौगुले,शिवकुमार मनवाडकर जोतिबा मासेकर ,आदी उपस्थित होते प्रशांत भातकांडे यांनी आभार मानले.

The post शिवजयंती उत्सव मोठ्या उत्साहात साजरा करूया appeared first on News 24 Tass Marathi.