बेंगळुरू : मुख्यमंत्रीपदाची सूत्रे हाती घेतल्यानंतर डी. के. शिवकुमार यांनी प्रशासनाला गती देण्यास सुरुवात केली असून, सर्व विभागांतील प्रलंबित कामे २५ दिवसांत पूर्ण करण्याचे आदेश देत भ्रष्टाचाराविरोधात कठोर भूमिका जाहीर केली आहे. विधानसौध येथे झालेल्या वरिष्ठ अधिकाऱ्यांच्या बैठकीत त्यांनी पारदर्शक, लोकाभिमुख आणि उत्तरदायी प्रशासनावर भर देत जनतेच्या समस्या तत्काळ सोडविण्याच्या सूचना दिल्या.

मुख्यमंत्री डी. के. शिवकुमार यांनी आज विधानसौध येथे सर्व विभागांच्या सचिव आणि वरिष्ठ अधिकाऱ्यांची महत्त्वपूर्ण बैठक घेतली. यावेळी त्यांनी विविध विभागांमध्ये अनेक वर्षांपासून प्रलंबित असलेल्या कामांचा आढावा घेत, त्यांची यादी तयार करून पुढील २५ दिवसांत ती पूर्ण करण्याचे स्पष्ट निर्देश दिले. कोणत्याही परिस्थितीत भ्रष्टाचाराला प्रोत्साहन दिले जाणार नाही, असा इशाराही त्यांनी अधिकाऱ्यांना दिला.

राज्य प्रशासनाने जात, धर्म किंवा कोणत्याही प्रभावशाली व्यक्तीच्या दबावाखाली न येता सर्व कामे पारदर्शकपणे आणि नियमांनुसार करावीत, असे सांगताना मुख्यमंत्री म्हणाले की, सामान्य नागरिकांना दिलासा देणारे प्रशासन हेच सरकारचे प्रमुख उद्दिष्ट आहे. त्यामुळे अधिकाऱ्यांनी लोकांच्या अडचणी समजून घेऊन त्यावर तातडीने उपाययोजना कराव्यात.

बैठकीत त्यांनी सर्व विभागांना पुढील १५ दिवसांत ठोस कृती आराखडा तयार करण्याचे निर्देश दिले. तसेच राज्यातील कायदा व सुव्यवस्था अधिक सक्षम करण्यासाठी गुंडगिरी, अमली पदार्थांची तस्करी, माफिया कारवाया आणि जुगार यांच्याविरोधात कठोर कारवाई करण्याचे आदेश वरिष्ठ पोलीस अधिकाऱ्यांना देण्यात आले.

राज्य सरकारने नुकत्याच जाहीर केलेल्या सहा प्रमुख कल्याणकारी योजनांची प्रभावी आणि तात्काळ अंमलबजावणी करण्यावरही मुख्यमंत्र्यांनी भर दिला. यावेळी बोलताना त्यांनी, “मला इतिहास वाचण्यापेक्षा नवे बदल घडवून इतिहास निर्माण करायचा आहे,” असे सांगत प्रशासनाने परिणामकारक कामगिरीद्वारे जनतेचा विश्वास संपादन करावा, असे आवाहन केले.

आर्थिक शिस्त राखत विकासकामांना गती द्या, सर्वसामान्यांच्या प्रश्नांना संवेदनशीलतेने प्रतिसाद द्या आणि नव्या विकास आराखड्यानुसार कामकाज करा, अशा सूचनाही त्यांनी अधिकाऱ्यांना दिल्या. मुख्यमंत्री म्हणून पहिल्याच बैठकीत शिवकुमार यांनी घेतलेल्या या कडक भूमिकेमुळे प्रशासनात कार्यक्षमतेला प्राधान्य मिळणार असल्याची चर्चा सुरू झाली आहे.

The post प्रशासकीय यंत्रणेला गती द्या ; प्रलंबित कामे २५ दिवसांत पूर्ण करा ! appeared first on News 24 Tass Marathi.

बेळगाव : महाराष्ट्र एकीकरण युवा समिती सीमाभागतर्फे १ जून रोजी पाळल्या जाणाऱ्या हुतात्मा दिनात सीमाभागातील नागरिकांनी मोठ्या संख्येने सहभागी व्हावे, असे आवाहन करण्यात आले आहे.

समितीचे अध्यक्ष शुभम शेळके यांच्या निवासस्थानी आयोजित बैठकीत विविध विषयांवर चर्चा करण्यात आली. यावेळी कार्याध्यक्ष धनंजय पाटील यांनी बैठकीचा उद्देश स्पष्ट करताना सांगितले की, कन्नड सक्तीविरोधी लढ्यात बलिदान दिलेल्या हुतात्म्यांना हिंडलगा येथील हुतात्मा स्मारकावर अभिवादन करण्यात येणार आहे. तसेच कन्नड सक्तीच्या मुद्द्यावर सुरू असलेल्या दडपशाहीविरोधात मध्यवर्ती महाराष्ट्र एकीकरण समितीच्या नेतृत्वाखाली मोर्चा काढण्याचा निर्णय घेण्यात आला असून त्यास व्यापक पाठिंबा देण्याची गरज असल्याचे त्यांनी नमूद केले.

यावेळी उपस्थित पदाधिकाऱ्यांनी कन्नड सक्तीविरोधी आंदोलनातील हुतात्म्यांना श्रद्धांजली अर्पण करण्याबरोबरच सीमाप्रश्नाच्या तातडीच्या सोडवणुकीसाठी राबविण्यात येणाऱ्या एक लाख सह्यांच्या मोहिमेत सक्रिय सहभाग नोंदविण्याचे आवाहन केले. या मोहिमेसंदर्भात घटक समित्यांच्या बैठका घेऊन आपला निर्णय कळवावा, असेही सांगण्यात आले.

तसेच १ जून रोजी हिंडलगा येथील कार्यक्रमास सीमावासीयांनी मोठ्या प्रमाणात उपस्थित राहावे आणि मध्यवर्ती महाराष्ट्र एकीकरण समिती ज्या दिवशी मोर्चाचे आयोजन करेल, त्या मोर्चातही उत्स्फूर्त सहभाग नोंदवावा, असे आवाहन युवा समिती सीमाभागतर्फे करण्यात आले.

बैठकीस सरचिटणीस मनोहर हुंदरे, पिराजी मुंचडीकर, इंद्रजित धामणेकर, नारायण मुंचडीकर, मोतेश बारदेसकर, सुधीर शिरोळे, सचिन दळवी, रमेश माळवी, सुरज जाधव, श्रीकांत नांदुरकर, निलेश काकतकर, राजू पाटील यांच्यासह अनेक कार्यकर्ते उपस्थित होते.

The post हुतात्मा दिन गांभिर्याने पाळा appeared first on News 24 Tass Marathi.

बेळगाव : महाराष्ट्र एकीकरण युवा समितीची बैठक युवा समिती कार्यालय कावळे संकुल टिळकवाडी बेळगाव येथे अध्यक्ष अंकुश केसरकर यांच्या अध्यक्षतेखाली संपन्न झाली.

बैठकीच्या सुरवातीला मध्यवर्ती समितीचे अध्यक्ष दीपक दळवी, ज्येष्ठ नेते अर्जुन गोरल तसेच इतर समिती कार्यकर्त्यांना श्रद्धांजली वाहण्यात आली. अध्यक्ष अंकुश केसरकर म्हणाले कर्नाटक शासनाने डॉ. गोकाक अहवाल मान्य केल्यानंतर सर्व ठिकाणी कन्नड भाषा सक्ती करण्यास सुरवात केली. त्याला विरोध करण्यासाठी समितीच्या वतीने सत्याग्रहाच्या माध्यमातून आंदोलन करण्याचे जाहीर करण्यात आले. १ जून १९८६ रोजी मा. शरद पवार गनिमी काव्याने कित्तूर राणी चन्नमा चौकात दाखल झाले आणि त्यांनी सत्याग्रह केला. महाराष्ट्राच्या नेत्यांना बेळगाव बंदी असून देखील सत्याग्रह यशस्वी झाल्याने प्रशासनाने शरद पवाराना अटक केली, ही बातमी सर्वदूर सीमाभागात पसरली लोक रस्त्यावर उतरून निदर्शने करू लागली बेळगावात हरताळ पाळला गेला, परिस्थिती स्पोटक बनली, आंदोलकांवर गोळीबार झाला या गोळीबारात नऊ निष्पाप मराठी भाषिकांना हौतात्म्य आले. शिवाय कित्येक कार्यकर्त्यांना अटक करून वेगवेगळ्या तुरुंगात डांबण्यात आले. हुतात्म्यांच्या बलिदानाची आठवण ठेवून सीमाप्रश्नाची सोडवणूक करण्यासाठी सर्वांनी कटिबद्ध रहाणे गरजेचे आहे.

यावर्षी सोमवार दिनांक १ जून रोजी सकाळी ८.३० वाजता हुतात्मा स्मारक हिंडलगा हुतात्म्यांना अभिवादन करण्यात येणार आहे तरी सर्व मराठी भाषिकांनी मोठ्या संख्येने उपस्थित रहावे असे आवाहन केले.

• शैक्षणिक उपक्रम राबविण्याचा निर्णय :

दरवर्षी प्रमाणे युवा समितीच्या वतीने मातृभाषेतून शिक्षण घेणाऱ्या विद्यार्थ्यांना प्रोत्साहन म्हणून शैक्षणिक साहित्याचे वितरण करण्यात येते. यावर्षी उपक्रमाचे हे नववे वर्ष असून यावर्षी ३०० शाळांना ही साहित्य वितरण करण्याचा निर्णय घेण्यात आला.

• दहावीच्या गुणवंतांचा होणार सत्कार :

युवा समितीच्या वतीने येणाऱ्या जुलै महिन्यात मराठी माध्यमातील १० वी मध्ये बेळगाव शहर, बेळगाव तालुका आणि खानापूर विभागातील पहिला दुसरा आणि तिसरा क्रमांक आलेल्या विद्यार्थांचा सत्कार करण्याचा निर्णय घेण्यात आला.

सरचिटणीस श्रीकांत कदम यांनी प्रास्ताविक केले. यावेळी सुरज कुडूचकर, किरण हुद्दार, संतोष कृष्णाचे, अक्षय बांबरकर, सुरज चव्हाण, महांतेश अलगोंडी, अश्वजीत चौधरी, रोहन कुंडेकर, आनंद पाटील, आकाश भेकणे, आशिष कोचेरी, प्रकाश हेब्बाजी आदी उपस्थित होते. चिटणीस प्रतीक पाटील यांनी आभार मानले.

The post कन्नडसक्ती आंदोलनातील हुतात्म्यांना अभिवादन करण्यासाठी मोठ्या संख्येने उपस्थित रहावे appeared first on News 24 Tass Marathi.

बेळगाव : नवीन शैक्षणिक वर्ष सुरू होण्याच्या पार्श्वभूमीवर जिल्ह्यातील शाळा आणि अंगणवाड्यांमधील सुविधा, स्वच्छता आणि सुरक्षेची तातडीने तपासणी करून आवश्यक उपाययोजना कराव्यात, असे निर्देश जिल्हा पंचायत सीईओ राहुल शिंदे यांनी दिले.

मंगळवारी जिल्हा पंचायत सभागृहात आयोजित बैठकीत त्यांनी शिक्षण विभाग आणि संबंधित अधिकाऱ्यांना विविध सूचना केल्या. येत्या दोन दिवसांत शाळा व अंगणवाड्या सुरू होणार असल्याने परिसरातील स्वच्छतेवर विशेष भर द्यावा, अन्न साठवण कक्ष स्वच्छ ठेवावेत तसेच अन्नाच्या गुणवत्तेची तपासणी करावी, असे त्यांनी सांगितले. याशिवाय पिण्याचे पाणी, वीज आणि इतर मूलभूत सुविधा वेळेत उपलब्ध करून देण्याचे निर्देशही देण्यात आले.

पावसाळ्यापूर्वी शाळा आणि अंगणवाडी इमारतींची तपासणी करून धोकादायक किंवा कमकुवत झालेल्या इमारतींमधील वर्ग तात्पुरत्या इतर सुरक्षित ठिकाणी स्थलांतरित करावेत, अशी सूचनाही बैठकीत करण्यात आली. विद्यार्थ्यांच्या सुरक्षेला सर्वोच्च प्राधान्य द्यावे, असे स्पष्ट करण्यात आले.

शाळा आणि अंगणवाड्यांना पुरविण्यात येणाऱ्या पाण्याची एफटीके किटद्वारे तपासणी करण्यासोबतच परिसरातील धोकादायक वीजतारा आणि विद्युत उपकरणे सुरक्षित ठिकाणी हलवावीत, असेही सांगण्यात आले.

१ जून रोजी शाळा प्रवेशोत्सव उत्साहात साजरा करावा तसेच एकही मूल शिक्षणापासून वंचित राहू नये याची काळजी घ्यावी, असे आवाहन करण्यात आले. शिक्षण सोडलेल्या विद्यार्थ्यांना पुन्हा शाळेत आणण्यासाठी विशेष प्रयत्न करण्याच्या सूचनाही अधिकाऱ्यांना देण्यात आल्या.

दरम्यान, प्रत्येक महिन्याच्या तिसऱ्या शनिवारी अंगणवाड्यांमध्ये आणि चौथ्या शनिवारी शाळांमध्ये पालक सभा घेण्याचे निर्देश देण्यात आले. वसतिगृहांमध्ये आवश्यक सुविधा उपलब्ध करून देऊन सुरक्षा रक्षक आणि सीसीटीव्ही कॅमेरे बसविण्याबाबतही सूचना करण्यात आल्या.

या बैठकीस जिल्हा पंचायत नियोजन संचालक रवी बंगारप्पन्नावर, बसवराज अडवीमठ, मल्लिकार्जुन कलादगी तसेच शिक्षण विभागातील अधिकारी उपस्थित होते.

The post शाळा आणि अंगणवाड्यांच्या सुरक्षेला प्राधान्य द्या appeared first on News 24 Tass Marathi.

बेळगाव : मराठा लाईट इन्फंट्री रेजिमेंटल सेंटरचे कमांडंट तसेच कॅन्टोन्मेंट बोर्डाचे नूतन अध्यक्ष ब्रिगेडियर गिरीष उपाध्याय यांच्या उपस्थितीत सोमवारी कॅन्टोन्मेंट बोर्डाची पहिली बैठक पार पडली. बैठकीस सीईओ सुदाम मंचलवार, आमदार आसिफ सेठ तसेच सरकारनियुक्त सदस्य सुधीर तुपेकर उपस्थित होते. प्रारंभी ब्रिगेडियर उपाध्याय यांना शपथ देण्यात आली आणि विविध मान्यवरांकडून त्यांचे स्वागत करण्यात आले.

बैठकीत बेळगाव रेल्वे स्थानक कॅन्टोन्मेंट हद्दीत येत असल्याने विविध कर आणि दंडापोटी रेल्वेकडून सुमारे १६ कोटी रुपये थकीत असल्याचा मुद्दा चर्चिला गेला. ही रक्कम वसूल करण्यासाठी नैऋत्य रेल्वेच्या वरिष्ठ अधिकाऱ्यांना पत्र पाठविण्यात आले असून पुढील पाठपुरावा केला जाणार असल्याचे सांगण्यात आले.

यावेळी लाच स्वीकार प्रकरणात निलंबित करण्यात आलेल्या एका महिला अधिकाऱ्याबाबतही चर्चा झाली. संबंधित कर्मचाऱ्याचे ५० टक्के वेतन कपात करून उर्वरित वेतन देण्याचा निर्णय बैठकीत घेण्यात आला.

रामकृष्ण मिशन यांच्याकडून हॉस्पिटल उभारणीसाठी परवानगी मागण्यात आली असून आवश्यक नियमांची पूर्तता झाल्यानंतर बांधकाम परवाना देण्याबाबत विचार करण्यात येणार आहे. तसेच सातवा वेतन आयोग लागू झाल्यानंतर उर्वरित वेतन फरकाची रक्कम कर्मचाऱ्यांना देण्याचाही निर्णय घेण्यात आला.

इंडिपेंडिंग रोड आणि हावलॉक रोड जंक्शनचे सुशोभीकरण करण्याबरोबरच एल अँड टी कंपनीने जलवाहिन्यांसाठी केलेल्या खोदाईनंतर रस्त्यांची दुरुस्ती न केल्याने नागरिकांमध्ये नाराजी असल्याचा मुद्दाही बैठकीत उपस्थित करण्यात आला.

बकरी ईदच्या पार्श्वभूमीवर कॅन्टोन्मेंट परिसरातील कत्तलखान्यासह इतर कोणत्याही ठिकाणी गोहत्या होऊ नये यासाठी प्रशासनाने दक्षता घ्यावी, अशी सूचना सरकारनियुक्त सदस्य सुधीर तुपेकर यांनी केली.

दरम्यान, एसएफसी निधीत यावर्षी केवळ पाच लाख रुपयांचे अनुदान मिळाल्याने विकासकामांवर मर्यादा येत असल्याचे सांगण्यात आले. त्यामुळे राज्य सरकारकडे वाढीव निधीची मागणी केली जाणार आहे.

केंद्र सरकारकडून कॅन्टोन्मेंट बोर्डाला सुमारे १४ कोटी रुपयांचा निधी मिळणार असून, त्यातून कायमस्वरूपी महसूल निर्माण करणारे प्रकल्प राबविण्याची योजना आहे. बी. के. मॉडेलसमोरील मोकळ्या जागेत बेंगळुरू विमानतळाच्या धर्तीवर फूड स्टॉल उभारण्याचा प्रस्ताव सीईओ सुदाम मंचलवार यांनी मांडला. तसेच रेल्वे स्थानक परिसरात स्टॉल्स आणि इनडोअर स्टेडियम उभारणीबाबतही प्राथमिक चर्चा करण्यात आली.

The post रेल्वेकडून कॅन्टोन्मेंट बोर्डाचे १६ कोटी रुपये थकीत appeared first on News 24 Tass Marathi.

The post महाराष्ट्र एकीकरण युवा समितीची आज महत्त्वपूर्ण बैठक appeared first on News 24 Tass Marathi.

बेळगाव : बेळगाव कॅन्टोन्मेंट बोर्डाच्या अध्यक्षपदाची जबाबदारी स्वीकारल्यानंतर ब्रिगेडियर गिरीश उपाध्ये यांनी तातडीने प्रशासकीय बैठकीचे आयोजन करत विविध नागरी समस्यांचा आढावा घेतला. यावेळी शहरातील स्वच्छता, रस्त्यांची दुरवस्था आणि प्लास्टिकमुक्ती मोहिमेबाबत अधिकाऱ्यांना स्पष्ट सूचना देण्यात आल्या.

सोमवारी कॅन्टोन्मेंट सभागृहात झालेल्या प्रगती आढावा बैठकीत मुख्य कार्यकारी अधिकारी मंचलवार हरीविजय यांनी शहरातील खराब रस्त्यांचा प्रश्न उपस्थित केला. एल अँड टी कंपनीकडून अनेक भागांत रस्ते खोदून कामे अर्धवट ठेवण्यात आल्याने नागरिकांना मोठ्या अडचणींना सामोरे जावे लागत असल्याचे त्यांनी सांगितले.

या प्रकाराची गंभीर दखल घेत ब्रिगेडियर उपाध्ये यांनी संबंधित कंपनीच्या निष्काळजीपणामुळे अपघातांची शक्यता वाढत असल्याचे नमूद करत खोदकाम झालेल्या सर्व रस्त्यांची तातडीने दुरुस्ती करण्याचे आदेश अधिकाऱ्यांना दिले.

बैठकीत कॅन्टोन्मेंट परिसर प्लास्टिकमुक्त करण्यावर विशेष भर देण्यात आला. असद खान दर्ग्यासह अनेक ऐतिहासिक आणि पर्यटनस्थळे या भागात असल्यामुळे सुट्टीच्या दिवशी मोठ्या प्रमाणात पर्यटक येथे भेट देतात. पर्यटकांकडून वापरण्यात येणारे प्लास्टिक परिसरात टाकले जात असल्याने स्वच्छतेची समस्या गंभीर होत असल्याचे ब्रिगेडियर उपाध्ये यांनी निदर्शनास आणून दिले.

यासाठी “प्लास्टिकमुक्त कॅन्टोन्मेंट” अशा संदेशांचे जनजागृती फलक असद खान दर्ग्यासह विविध सार्वजनिक ठिकाणी उभारण्याच्या सूचना त्यांनी अधिकाऱ्यांना दिल्या. तसेच घनकचरा व्यवस्थापन अधिक प्रभावी करण्यासाठी कचरा संकलन आणि विल्हेवाट प्रक्रियेवर नियमित देखरेख ठेवण्याचे निर्देशही बैठकीत देण्यात आले. परिसर स्वच्छ आणि सुस्थितीत ठेवण्यासाठी संबंधित अधिकाऱ्यांनी आपल्या विभागात विशेष लक्ष घालावे, असेही त्यांनी स्पष्ट केले.

The post कॅन्टोन्मेंट परिसर प्लास्टिकमुक्त करण्यासाठी उपाययोजना राबवा appeared first on News 24 Tass Marathi.

खानापूर : मराठी भाषा, संस्कृती आणि मराठी शाळांचे अस्तित्व टिकवण्यासाठी युवकांनी संघटित होऊन पुढाकार घ्यावा, असा निर्धार खानापूर महाराष्ट्र एकीकरण समितीच्या युवा कार्यकर्त्यांच्या बैठकीत व्यक्त करण्यात आला.

रविवार दि. २४ मे रोजी श्री शिवस्मारक येथे आयोजित या बैठकीत युवा कार्यकर्त्यांनी समितीच्या ध्येय-धोरणाशी बांधील राहून मराठी अस्मितेसाठी कार्य करण्याचा निर्धार केला.

यावेळी रावसाहेब वागळे कॉलेजचे शिक्षक शंकर गावडा आणि महाराष्ट्र एकीकरण युवा समिती बेळगावचे चिटणीस प्रतीक पाटील यांनी युवकांना मार्गदर्शन केले. शंकर गावडा यांनी सीमाप्रश्नाचा इतिहास सांगताना मराठी भाषा, संस्कृती आणि शाळा टिकवण्याची जबाबदारी युवकांनी समर्थपणे पार पाडली पाहिजे, असे सांगितले.

प्रतीक पाटील यांनी सीमालढ्याचा इतिहास मांडताना मराठी शाळा या मराठी भाषेचा कणा असल्याचे स्पष्ट केले. शासनाकडून मराठी शाळा बंद पडाव्यात यासाठी अप्रत्यक्ष प्रयत्न सुरू असल्याचा आरोप करत त्यांनी विद्यार्थ्यांची पटसंख्या वाढवण्यासाठी युवकांनी गावोगावी जागृती करावी, असे आवाहन केले. यावर्षापासून खानापूर तालुक्यातील मराठी शाळांतील विद्यार्थ्यांना शैक्षणिक साहित्य वाटपाची जबाबदारी युवा कार्यकर्त्यांनी स्वीकारावी, असेही त्यांनी सांगितले.

युवा समितीचे पदाधिकारी साईनाथ शिरोडकर यांनी सोशल मीडियाचा प्रभावी वापर, स्पर्धा परीक्षांचे महत्त्व आणि महाराष्ट्र शासनाच्या आरोग्य योजनांविषयी मार्गदर्शन केले.

बैठकीला सुनील पाटील, शुभम कांबळे, बाळकृष्ण पाटील, प्रसन्न पाटील, लक्ष्मण भातकांडे, वैभव कारेकर, संदेश कोडचवाडकर, प्रसाद देसाई, यतीन पाटील, मुकेश गुरव, आर्यन पाटील, लक्ष्मण शास्त्री, राम चिखलकर, यश गावडे, प्रथमेश मेलगे, चेतन हंगीरगेकर, विकास पाटील, सोमनाथ गोरे, पृथ्वीराज गुरव, राहुल चापगावकर, आदित्य देसाई, ओंकार पाटील, राघोबा, कपिल, दत्तराज, बापू, निखिल, हर्ष, सिमानी, परशुराम मुतगेकर आदी युवा कार्यकर्ते उपस्थित होते.

The post मराठी भाषा आणि संस्कृती संवर्धनासाठी युवकांनी पुढाकार घ्यावा appeared first on News 24 Tass Marathi.

बेळगाव : व्यावसायिक नामफलकांवर कन्नड भाषेची सक्ती केली जात असल्याच्या निषेधार्थ येत्या १५ जून रोजी जिल्हाधिकारी कार्यालयावर भव्य मोर्चा काढून निवेदन सादर करण्याचा निर्णय बेळगाव तालुका महाराष्ट्र एकीकरण समितीच्या बैठकीत घेण्यात आला.

खानापूर रोडवरील मराठा मंदिर येथे शनिवारी दुपारी झालेल्या बैठकीच्या अध्यक्षस्थानी समितीचे कार्याध्यक्ष तथा माजी आमदार मनोहर किणेकर होते. बैठकीत कन्नड सक्ती विरोधी आंदोलनातील हुतात्म्यांना अभिवादन, मराठी नामफलकांचा प्रश्न आणि सीमाभागातील मराठी भाषिकांवरील वाढत्या दबावाच्या मुद्द्यांवर सखोल चर्चा करण्यात आली.

मध्यवर्ती महाराष्ट्र एकीकरण समितीच्या आदेशानुसार ही बैठक आयोजित करण्यात आल्याची माहिती मनोहर किनेकर यांनी दिली. येत्या १ जून २०२६ रोजी सकाळी ८.३० वाजता हिंडलगा येथे एकत्र येऊन कन्नड सक्ती विरोधी आंदोलनातील हुतात्म्यांना अभिवादन करण्यात येणार असून, महाराष्ट्र-कर्नाटक सीमा प्रश्नाच्या सोडवणुकीसाठी कटिबद्ध राहण्याची शपथ घेतली जाणार असल्याचे त्यांनी स्पष्ट केले.

नामफलकांवर ६० टक्के कन्नड आणि ४० टक्के मराठी अथवा इतर भाषा असाव्यात असा कायदा असताना त्याची अंमलबजावणी सरकारी कार्यालयांमध्ये होत नसल्याचा आरोप यावेळी करण्यात आला. तसेच बेळगाव शहरात कन्नड रक्षण वेदिकेच्या कार्यकर्त्यांकडून मराठी नामफलक हटविण्याचे प्रकार सुरू असल्याचा निषेध व्यक्त करण्यात आला.

या सर्व घटनांच्या निषेधार्थ १५ जून रोजी जिल्हाधिकारी कार्यालयावर भव्य मोर्चा काढून निवेदन सादर करण्यात येणार असल्याची माहिती मनोहर किणेकर यांनी दिली. या मोर्चामध्ये मराठी भाषिकांनी मोठ्या संख्येने सहभागी व्हावे, असे आवाहनही समितीच्या वतीने करण्यात आले.

The post कन्नड सक्तीविरोधात १५ जूनला जिल्हाधिकारी कार्यालयावर भव्य मोर्चा appeared first on News 24 Tass Marathi.

The post बेळगाव तालुका महाराष्ट्र एकीकरण समितीची उद्या बैठक appeared first on News 24 Tass Marathi.