सोलापूर : महाराष्ट्र-कर्नाटक सीमेवरील तडवळ रेल्वे स्थानकावर थांबलेल्या यशवंतपूर- बिकानेर एक्स्प्रेसमध्ये शनिवारी पहाटे पाच ते सहा अज्ञात दरोडेखोरांनी धाडसी दरोडा टाकत महिलांसह प्रवाशांना मारहाण केली. प्रवाशांकडील रोख रक्कम, मोबाईल फोन आणि सोन्याचे दागिने लुटून आरोपी पसार झाले. या घटनेमुळे रेल्वे प्रवाशांच्या सुरक्षेचा प्रश्न पुन्हा एकदा ऐरणीवर आला आहे.

गाडी क्रमांक १६५८७ यशवंतपूर–बिकानेर एक्स्प्रेस पहाटे २.४९ ते ४.०३ या कालावधीत तब्बल ७४ मिनिटे तडवळ रेल्वे स्थानकावर उभी होती. याच संधीचा फायदा घेत पाच ते सहा जणांच्या टोळीने एस-४, एस-६ आणि एस-७ या डब्यांमध्ये प्रवेश केला. काही दरोडेखोरांनी खिडक्यांमधून हात घालून प्रवाशांचे साहित्य हिसकावले, तर काहींनी थेट डब्यात घुसून महिलांच्या गळ्यातील दागिने, रोख रक्कम, मोबाईल आणि इतर मौल्यवान वस्तूंवर हात साफ केला.

दरोडेखोरांना विरोध करणाऱ्या काही प्रवाशांना मारहाण करण्यात आली. तसेच दगडफेक करून त्यांना जखमी केल्याची माहितीही समोर आली आहे. अचानक घडलेल्या या प्रकारामुळे डब्यांमध्ये भीतीचे वातावरण निर्माण झाले आणि प्रवाशांनी आरडाओरडा करून मदतीची याचना केली.

रेल्वेच्या मदत क्रमांकावर माहिती मिळाल्यानंतर गाडी पहाटे ४.५८ वाजता सोलापूर स्थानकात पोहोचताच रेल्वे सुरक्षा बल (आरपीएफ) घटनास्थळी दाखल झाले. महेश गोपाळ पवार यांच्या फिर्यादीवरून सोलापूर लोहमार्ग पोलिसांनी अज्ञात आरोपींविरुद्ध गुन्हा दाखल केला आहे.

पोलीस उपनिरीक्षक तांबोळी यांनी फॉरेन्सिक पथकासह घटनास्थळाची पाहणी केली असून, आरोपींचा शोध घेण्यासाठी तपास सुरू आहे. या घटनेनंतर रेल्वे प्रशासनाच्या सुरक्षा व्यवस्थेवर प्रवाशांकडून तीव्र नाराजी व्यक्त केली जात आहे.

The post यशवंतपूर – बिकानेर एक्स्प्रेसवर दरोडा appeared first on News 24 Tass Marathi.

सोलापूर / प्रतिनिधी

सोलापूरमधील अक्कलकोट एमआयडीसी रोड येथील सेंट्रल इंडस्ट्रीज या कारखान्यात रविवारी पहाटेच्या सुमारास आग लागली. यात तब्बल ८ जणांचा गुदमरून मृत्यू झाला. ज्या लोकांना कारखान्यातून सुखरूप बाहेर काढण्यात आले त्यांचाही मृत्यू झाल्याची माहिती प्राप्त झाली आहे. मृत्यूमुखी पडलेल्यांमध्ये कारखान्याचे मालक, त्यांचा मुलगा, त्याची पत्नी आणि एक वर्षाच्या मुलाचा समावेश आहे.

याबाबत घटनास्थळावरून प्राप्त माहिती अशी की, अक्कलकोट एमआयडीसी रोड येथील सेंट्रल इंडस्ट्रीज कारखान्यात पहाटे ५.३० वा. सुमारास तीन कामगारांचा मृत्यू झाला होता. सेंटर इंडस्ट्रीजचे मालक आगीत अडकल्याने त्यांना शोधण्यासाठीची मोहीम पहाटेपासून सुरु होती. सर्वजण मास्टर बेडरूममध्ये लपून बसले होते. दुर्दैवाने त्यांना बाहेर पडला आले नाही. श्वास गुदमरुन आणि होरपळून त्यांचा जागीच मृत्यू झाला.

आगीत मृत्यूमुखी पडलेल्यांचे मृतदेह शवविच्छेदनासाठी सोलापूरच्या शासकीय रुग्णालयाकडे पाठवण्यात आले. आगीमध्ये ५ पुरुष, २ महिला आणि एका बालकाचा दुर्दैवी अंत झाला आहे. यात कारखान्याचे मालक उस्मान मन्सूरी, मालकाचा मुलगा अनस मन्सूरी (वय २५), त्याची पत्नी शिफा (वय २४) आणि त्याचा एका वर्षाचा मुलगा युसुफ यांचा समावेश आहे.

The post सोलापुरातील टॉवेल कारखान्यात अग्नीतांडव appeared first on News 24 Tass Marathi.