कोल्हापूर शहरासह जिल्ह्यात दुपारनंतर अचानक वातावरणात बदल होत वादळी वाऱ्यासह पावसाने जोरदार हजेरी लावली. अनेक ठिकाणी झाडे पडल्याच्या घटना घडल्या असून पन्हाळा परिसरात मुसळधार पाऊस झाला. चैत्र यात्रेदरम्यान जोतिबा डोंगरावर उपस्थित असलेले भाविकही या पावसात भिजले.

दिवसभर कडक उन्हानंतर सायंकाळी अचानक सुरू झालेल्या पावसादरम्यान जोतिबा डोंगरावर वीज कोसळण्याची घटना घडली. दक्षिण दरवाजाजवळील एका झाडावर वीज पडली असता, त्याच्या जवळ उभ्या असलेल्या पाच जणांना किरकोळ दुखापत झाली.

घटनेनंतर जखमींना तातडीने उपचारासाठी सीपीआर रुग्णालयात दाखल करण्यात आले. संबंधित व्यक्ती ज्या ठिकाणी उभ्या होत्या, त्या ठिकाणापासून सुमारे सात ते आठ फूट अंतरावर वीज कोसळल्याचे सांगितले जात आहे. विद्युत चुंबकीय परिणामामुळे त्यांना किरकोळ इजा झाल्याची माहिती मिळाली आहे.

The post जोतिबा डोंगरावर वादळी पावसात वीज कोसळून ५ जण जखमी appeared first on News 24 Tass Marathi.

कोल्हापूर : चैत्र यात्रेचा मुख्य दिवस १ एप्रिल असल्याने श्री जोतिबा मंदिर भाविकांसाठी विशेष वेळापत्रकानुसार खुले ठेवण्यात आले आहे. मंगळवार, ३१ मार्चच्या पहाटे मंदिराचे दरवाजे उघडल्यानंतर ते शुक्रवार, ३ एप्रिल रात्री ११ वाजेपर्यंत अखंड खुले राहणार असून, भाविकांना तब्बल ७९ तास सतत दर्शनाची संधी मिळणार आहे.

यात्रेच्या पार्श्वभूमीवर डोंगर परिसरात भाविकांची गर्दी वाढू लागली असून उत्साहपूर्ण वातावरण निर्माण झाले आहे. यंदा यात्रेत भाविकांच्या सुरक्षेला प्राधान्य देतानाच प्लास्टिकमुक्त यात्रा करण्याचा संकल्प प्रशासनाने केला आहे. याशिवाय भेसळयुक्त गुलाल, पेढे व अन्य खाद्यपदार्थांवर नियंत्रण ठेवण्यासाठी तपासणी मोहीम सुरू आहे.

पार्किंग व्यवस्था, अन्नछत्र, दर्शन रांगेचे नियोजन, सीसीटीव्ही यंत्रणा, पोलीस बंदोबस्त, पाणीपुरवठा, आरोग्य सेवा, स्वच्छता, शौचालये, वीज व लाईव्ह दर्शन यांसारख्या सुविधा युद्धपातळीवर उभारण्यात येत आहेत. संवेदनशील भागांवर ड्रोनच्या माध्यमातून देखरेख ठेवण्याचे निर्देश देण्यात आले आहेत. सर्वांनी सहकार्य करून यात्रा सुरळीत पार पाडावी, असे आवाहन जिल्हाधिकारी अमोल येडगे यांनी केले आहे.

मंदिर परिसरात सर्वत्र सीसीटीव्ही कॅमेरे बसवण्यात आले असून यात्रेदिवशी स्क्रीनवरून थेट दर्शनाची सुविधाही उपलब्ध करून देण्यात आली आहे. दर्शन रांगेतील भाविक, सासनकाठीधारक, स्वयंसेवी संस्था व अन्नछत्रांना देवस्थान समितीकडून आवश्यक ते सहकार्य दिले जाणार असल्याची माहिती प्रभारी अधिकारी धैर्यशील तिवले यांनी दिली.

दरम्यान, बुधवारपासून धार्मिक कार्यक्रमांची रेलचेल सुरू होणार आहे. पहाटे चार वाजता पाद्यपूजा, काकड आरती व मुखमार्जन होईल. त्यानंतर पहाटे पाच ते सहा या वेळेत शासकीय महाभिषेक पार पडेल. सकाळी सात वाजता महापोशाख व महापूजा होऊन सात ते दहा या वेळेत मंदिर दर्शनासाठी खुले राहील. दुपारी धुपारती व अंगारा वाटप, तर दुपारी एक वाजता सासनकाठ्यांची मिरवणूक निघेल.

सायंकाळी साडेपाच वाजता तोफेच्या सलामीने पालखी सोहळ्याची सुरुवात होऊन मिरवणूक काढली जाईल. रात्री आठ वाजता यमाई मंदिरात धार्मिक विधी व आतषबाजी होईल. त्यानंतर पालखी पुन्हा जोतिबा मंदिराकडे परत येऊन प्रदक्षिणा, मानपान व पारंपरिक कार्यक्रम पार पडतील.

यात्रेच्या सुरक्षेसाठी पोलीस अधीक्षक योगेशकुमार गुप्ता यांच्या मार्गदर्शनाखाली मोठ्या प्रमाणात पोलीस बंदोबस्त तैनात करण्यात आला आहे. यात वरिष्ठ अधिकारी, निरीक्षक, उपनिरीक्षक, महिला पोलीस, वाहतूक शाखा, शीघ्र कृती दल, एसआरपी, होमगार्ड तसेच इतर यंत्रणांचा समावेश आहे.

The post श्री जोतिबा मंदिर सलग ७९ तासांसाठी भाविकांकरिता खुले appeared first on News 24 Tass Marathi.

बेळगावमधील प्रसिद्ध रांगोळी कलाकार अजित औरवाडकर यांनी दख्खनचा राजा श्री जोतिबा यांच्या चैत्री यात्रेनिमित्त एक भव्य रांगोळी साकारली आहे. ही रांगोळी सुमारे दोन फूट रुंदी आणि तीन फूट लांबीची आहे. तिच्या तयारीसाठी अंदाजे चौदा तास वेळ लागला असून, लेक कलरचा वापर करून तिचे रंगोळीत सादरीकरण केले आहे.

आधीही या कलाकाराने विठ्ठल-रखुमाई, श्री राम, छत्रपती शिवाजी महाराज, राम मंदिर आणि इतर अनेक प्रसिद्ध व्यक्तिमत्त्वांच्या रांगोळ्या रेखाटल्या आहेत. ही खास रांगोळी ज्योती फोटो स्टुडिओ, वडगाव येथे सकाळी नऊ ते रात्री नऊ वाजेपर्यंत नागरिकांना पाहता येईल.

The post चैत्र यात्रेनिमित्त अजित औरवाडकर यांनी रेखाटली श्री जोतिबाची रांगोळी appeared first on News 24 Tass Marathi.

कोल्हापूर : महाराष्ट्राचे कुलदैवत दख्खनचा राजा श्री क्षेत्र बाडी रत्नागिरी जोतिबा डोंगरावर बुधवारी, १ एप्रिल रोजी चैत्र पौर्णिमेनिमित्त भव्य यात्रा पार पडली. बेळगावसह महाराष्ट्रभरातून सासन काठ्या, नगारा आणि बैलगाड्या वाजत-गाजत जोतिबा डोंगरावर दाखल झाल्या.

बेळगाव येथील चव्हाट गल्ली आणि नार्वेकर गल्लीतील सासनकाठ्यानंदी, निगवे दुमाला मार्गे श्रीशैल्य मल्लिकार्जुन मंदिरात दर्शन घेऊन, दक्षिण दरवाजा मार्गाने जोतिबा मंदिराच्या आवारात दाखल झाल्या. परंपरेनुसार ग्रामस्थांनी भाविकांचे स्वागत केले आणि भक्तांनी पाच प्रदक्षिणा काढून देवाचे दर्शन घेतले. यावेळी भक्तांनी चांगभलंचा गजर करत, गुलाल खोबऱ्याची उधळण करून मंदिर परिसरातील वातावरण भक्तिमय केले.

The post जोतिबा डोंगरावर सासनकाठ्यांचे आगमन appeared first on News 24 Tass Marathi.

श्री क्षेत्र जोतिबा येथे ३० मार्च ते १ एप्रिलदरम्यान होणाऱ्या चैत्र यात्रेच्या पार्श्वभूमीवर आज (सोमवार, ३० मार्च) पासून डोंगरावर अवजड वाहनांच्या प्रवेशावर निर्बंध लागू करण्यात आले आहेत. मालवाहू ट्रक, मोठी वाहने, तीनचाकी प्रवासी व मालवाहतूक रिक्षा तसेच दोन ट्रेलर असलेले ट्रॅक्टर यांना केर्ली, कुशिरे, वाघबीळ आणि गिरोली या नाकाबंदी ठिकाणांपुढे जाण्यास मज्जाव करण्यात आला आहे.

ही वाहतूक व्यवस्था पोलीस अधीक्षक योगेशकुमार गुप्ता यांच्या आदेशानुसार लागू करण्यात आली असून, एकेरी वाहतूक आणि प्रवेशबंदीचे नियम १ एप्रिल रोजी रात्री ११ वाजेपर्यंत लागू राहणार आहेत.

१ एप्रिल रोजी मुख्य यात्रेनिमित्त सकाळी ५ वाजल्यापासून दुचाकी वाहनांनाही डोंगरावर प्रवेश दिला जाणार नाही. दानेवाडी क्रॉसिंग, जुने आंब्याचे झाड आणि गिरोली फाटा येथून दुचाकींना प्रवेश बंद असेल. भाविकांनी पार्किंग ठिकाणांहून मोफत एसटी किंवा केएमटी बससेवेचा वापर करावा. दरम्यान, डोंगर ते जुने आंब्याचे झाड या मार्गावर दोन्ही बाजूंनी वाहतूक सुरू राहील.

दर्शन करून परतणाऱ्या भाविकांनी गिरोली मार्ग, तसेच जुने आंब्याचे झाड–गायमुख–केर्ली किंवा दानेवाडी–वाघबीळ मार्गाचा वापर करावा, असे आवाहन करण्यात आले आहे. १ एप्रिल रोजी दुपारी ४ नंतर केर्ली फाटा, गिरोली टी-पॉइंट आणि इतर सर्व मार्गांवरून डोंगराकडे सर्व प्रकारच्या वाहनांना पूर्णतः बंदी राहणार आहे.

पालखी सोहळ्यासाठी येणाऱ्या भाविकांनी दुपारी ४ वाजण्यापूर्वी डोंगरावर पोहोचावे. केली ते जुने आंब्याचे झाड, दानेवाडी क्रॉसिंग, रेस्ट हाऊस, सेंट्रल प्लाझा, यमाई टोल नाका, गिरोली फाटा ते निलगिरी बाग या मार्गांवर रस्त्याच्या दोन्ही बाजूंना वाहन उभे करण्यास किंवा पार्किंग करण्यास मनाई करण्यात आली आहे.

वाहन पार्किंगसाठी प्रशासनाने विविध ठिकाणी व्यवस्था केली आहे. सेंट्रल प्लाझा येथे ट्रक, ट्रॅव्हल्स, ट्रॅक्टर आणि इतर मोठ्या वाहनांसाठी जागा राखीव आहे. गिरोली फाटा मार्गे येणाऱ्या वाहनांसाठी यमाई वळण, बुने कॉर्नर, श्रावणी हॉटेल परिसर, केएमटी थांबा, निलगिरी बाग, दोनवाडी फाटा आणि बुने येथे सुविधा उपलब्ध आहे.

तसेच केर्ली फाटा मार्गे येणाऱ्या वाहनांसाठी जुने एसटी स्टँडसमोर, पिराचा कडा, तोरणाई कडा, नवीन एसटी स्टँडमागील जागा, जुने आंब्याचे झाड आणि गायमुख इनाम पार्किंग येथे व्यवस्था करण्यात आली आहे.

The post जोतिबा डोंगरावर आजपासून अवजड वाहनांना प्रवेशबंदी appeared first on News 24 Tass Marathi.

कोल्हापूर : वाडीरत्नागिरी (ता. पन्हाळा) येथे होणाऱ्या श्रीक्षेत्र जोतिबा यात्रेसाठी सुमारे १५०० पोलिस तैनात केले जात आहेत. यात्रेच्या पार्श्वभूमीवर पोलिस प्रशासनाने संपूर्ण बंदोबस्ताचे नियोजन पूर्ण केले असून, तयारी अंतिम टप्प्यावर आहे.

चैत्र यात्रेच्या दरम्यान महाराष्ट्रासह कर्नाटक, गुजरात आणि मध्य प्रदेशातून लाखो भाविक वाडीरत्नागिरी येथे येतात. अंदाजे ४ ते ५ लाख भाविक यात्रेदरम्यान डोंगरावर पोहोचतात. भाविकांच्या सुरक्षेसाठी पोलिस प्रशासनाने जोतिबा डोंगरावर कडेकोट बंदोबस्त ठेवला आहे. सोमवारी (दि. ३०) सकाळी पोलिसांचे वाटप केले जाईल आणि बुधवारी (दि. १) यात्रा संपेपर्यंत हा बंदोबस्त कायम राहील.

यात्रेसाठी जिल्ह्यातील ८८५ पोलिस अधिकारी व कर्मचारी तैनात आहेत, तसेच परिक्षेत्रातून ४३६ पोलिस अधिकारी आणि कर्मचारी अतिरिक्तपणे सहभागी आहेत.

सुरक्षेच्या दृष्टीने बॉम्बशोध पथक आणि सीसीटीव्हींचीही कडेकोट तपासणी होणार आहे. दोन बॉम्ब शोध व नाशक पथक परिसरातील आणि पार्किंगच्या ठिकाणांची नियमितपणे, प्रत्येक तीन ते चार तासांनी, तपासणी करतील. देवस्थान समितीने यात्रेच्या सुरक्षेसाठी १०० हून अधिक सीसीटीव्ही बसविले आहेत.

The post श्री जोतिबा यात्रेच्या बंदोबस्तासाठी १५०० पोलिस तैनात appeared first on News 24 Tass Marathi.

कोल्हापूर : “कन्नड संघटनांच्या दबावाखाली येऊन जर बेळगाव महापालिकेत मराठी विरोधी ठराव मंजूर झाला, तर आम्ही तीव्र आंदोलन छेडू. बेळगावातील मराठी भाषिकांच्या भावनांशी खेळ सहन केला जाणार नाही.” असा स्पष्ट इशारा कोल्हापूर येथील शिवसेना ठाकरे गटाचे नेते विजय देवणे यांनी दिला आहे.

बेळगाव शहरातील सीमावाद पुन्हा चिघळण्याची चिन्हे दिसू लागली आहेत. २००५ साली बेळगाव महापालिकेत मंजूर झालेल्या मराठी ठरावाविरोधात नवीन ठराव आणण्याच्या हालचालींना गती मिळाल्याचे संकेत आहेत. विशेषतः कन्नड संघटनांकडून वाढलेल्या दबावामुळे हा ठराव मांडला जाऊ शकतो, अशी शक्यता व्यक्त केली जात आहे. ठाकरे गटाच्या शिवसेनेने संभाव्य ठरावाला तीव्र विरोध दर्शवला आहे.

सध्या बेळगाव महानगरपालिकेत भाजपची सत्ता असून महापौर व उपमहापौर कन्नड भाषिक आहेत. त्यामुळे महापौरांची भूमिका काय असेल, याकडे सर्वांचे लक्ष लागले आहे. कन्नड संघटनांनी महाजन आयोगाची अंमलबजावणी करून सीमाप्रश्न संपल्याचा ठराव मंजूर करावा, अशी मागणी जोरदारपणे केली आहे.

२००५ साली मंजूर झालेला ऐतिहासिक ठराव “सीमाभाग महाराष्ट्रात विलीन करण्यात यावा” असा होता. त्याला विरोध म्हणून सध्या कन्नड संघटना आक्रमक झाल्या असून ठराव रद्द करण्याच्या दिशेने पावले उचलत असल्याचे संकेत आहेत.

महाराष्ट्र एकीकरण समितीनेही या घडामोडींवर तीव्र प्रतिक्रिया व्यक्त केली आहे. समितीच्या मते, मराठी भाषिकांच्या अस्तित्वाचा प्रश्न निर्माण होत असून आंदोलनाचा इशारा दिला आहे. ठाकरे गटाच्या शिवसेनेने देखील महापौरांना सावधान केले आहे की असा ठराव मंजूर केला तर शहरात मोठा उद्रेक होऊ शकतो.

एकंदरीत, या सर्व घडामोडींमुळे बेळगावचे राजकीय वातावरण चांगलेच तापले असून आगामी काळात मोठ्या आंदोलनांची शक्यता व्यक्त केली जात आहे. महापालिकेच्या बैठकीत निर्णय काय होतो आणि प्रशासन कशी भूमिका घेते, याकडे संपूर्ण शहराचे लक्ष लागलेले आहे.

The post बेळगाव महापालिकेत मराठी विरोधी ठराव मंजूर झाल्यास तीव्र आंदोलन appeared first on News 24 Tass Marathi.

श्री क्षेत्र जोतिबा देवाच्या चैत्र पौर्णिमा यात्रेनिमित्त ३० मार्च ते १ एप्रिल या कालावधीत होणाऱ्या यात्रेसाठी प्रशासनाने व्यापक नियोजन केले आहे. यात्रेदरम्यान लाखो भाविकांची गर्दी लक्षात घेऊन वाहतूक सुरळीत ठेवण्यासाठी ३३ ठिकाणी पार्किंगची व्यवस्था करण्यात आली आहे.

वाहतूक नियंत्रणासाठी सुमारे ४०० पोलीस आणि ४०० होमगार्ड तैनात करण्यात आले असून शहर वाहतूक नियंत्रण शाखा आणि स्थानिक पोलीस यंत्रणा सतर्क राहणार आहे.

वाहतूक नियंत्रण शाखेचे पोलीस निरीक्षक नंदकुमार मोरे यांनी दिलेल्या माहितीनुसार, नवीन व जुने एस.टी. स्टँड परिसर, तोरणाई कडा, पिराचा कडा, एमटीडीसी परिसर, सेंट्रल प्लाझा, ग्रामपंचायत परिसर, यमाई मंदिर परिसर, निलगिरी बाग, दानेवाडी फाटा आदी ठिकाणी पार्किंगची सुविधा उपलब्ध करण्यात आली आहे.

यात्रेदरम्यान वाहतुकीवर काही निर्बंधही घालण्यात आले आहेत. ३० मार्च रोजी रात्री ८ वाजेपर्यंत अवजड वाहने, मालवाहतूक ट्रक, रिक्षा आणि ट्रॅक्टर यांना जोतिबा डोंगरावर जाण्यास बंदी असेल. तसेच मुख्य यात्रेच्या दिवशी १ एप्रिल रोजी पहाटे ५ वाजल्यापासून दुचाकी वाहनांनाही काही मार्गांवर प्रवेश नाकारण्यात येणार आहे.

भाविकांनी वाहतूक नियमांचे पालन करून प्रशासनाला सहकार्य करावे, असे आवाहन पोलिसांकडून करण्यात आले आहे.

The post जोतिबा चैत्र पौर्णिमा यात्रेसाठी ३३ ठिकाणी पार्किंगची सोय appeared first on News 24 Tass Marathi.

कोल्हापूर / प्रतिनिधी

महाराष्ट्र – कर्नाटक सीमा भागातील मराठी भाषकांच्या हक्कांसाठी दीर्घकाळ लढा देणारे महाराष्ट्र एकीकरण समितीचे नेते दीपक दळवी यांच्या निधनामुळे सीमा आंदोलनात मोठी पोकळी निर्माण झाली आहे. ही पोकळी भरून काढण्यासाठी आंदोलन अधिक जोमाने पुढे नेणे आवश्यक असून, कोल्हापुरातून ही चळवळ नव्याने बळकट करण्यासाठी सर्वांचा सहभाग गरजेचा असल्याचे मत शिवसेना (उद्धव ठाकरे गट) चे सहसंपर्क प्रमुख विजय देवणे यांनी व्यक्त केले.

बेळगाव येथील निधनानिमित्त शेतकरी कामगार पक्ष कार्यालयात सर्वपक्षीय शोकसभेचे आयोजन करण्यात आले होते. या वेळी बोलताना देवणे म्हणाले, “ज्येष्ठ नेते डॉ. प्रा. एन. डी. पाटील यांच्या नेतृत्वाखाली सुरू असलेल्या सीमा लढ्यात दळवी सुरुवातीपासून सक्रिय होते. आंदोलने-मोर्चांमध्ये सहभागी होणे गंभीर गुन्ह्यांचा धोका असतानाही दळवी यांनी सातत्याने अन्यायाविरोधात आवाज उठवला.”

मराठा महासंघाचे नेते वसंत मुळीक यांनी सांगितले, “सीमा प्रश्नासाठी दळवी यांनी संपूर्ण आयुष्य खर्चले. ‘रहेंगे तो महाराष्ट्र में, नहीं तो जेल में’ ही त्यांची भूमिका होती. सलग ७० वर्षे सुरू असलेला हा लढा जगात अनोखा असून, सीमा भागातील अनेक गावे या चळवळीत सहभागी झाली आहेत.”

दिलीप पोवार यांनी राज्य सरकारने न्यायालयात भक्कम बाजू मांडून मराठी भाषिकांना न्याय मिळवून देणे हीच दळवी यांना खरी श्रद्धांजली ठरेल, असे सांगितले. व्यंक्काप्पा भोसले यांनी दळवी हे सर्व मराठी भाषिकांचे ठाम आवाज होते, तर महेश मछले यांनी सीमा लढ्याच्या इतिहासात त्यांचे नाव सुवर्णाक्षरांनी लिहावे लागेल असे नमूद केले.

यावेळी शाहीर दिलीप सावंत, रिपब्लिकन पक्षाचे भाऊसाहेब काळे, विठ्ठल कोतेकर, प्रा. मधुकर पाटील, प्रभाकर शिंदे यांनी मनोगते व्यक्त केले. तसेच वाय. ए. पाटील, पी. एन. हिरगुडे, तय्यब मोमीन, संपत्ती पाटील, रोहिणी मुळीक, पद्मजा पाटील, महेश जाधव, बबनराव शिंदे, आकाश शेलार, गोपाळ पाटील व अवधूत पाटील उपस्थित होते.

The post दीपक दळवी यांच्या निधनाने सीमा आंदोलनात मोठी पोकळी appeared first on News 24 Tass Marathi.

चैत्र पौर्णिमेच्या निमित्ताने बेळगावमधून कोल्हापूरकडे मार्गस्थ होणाऱ्या सासनकाठी पदयात्री आणि बैलजोड्यांसाठी श्री क्षेत्र कपिलेश्वर मंदिर ट्रस्टने विशेष सोयी-सुविधा उपलब्ध करून दिल्या आहेत.

दरवर्षीप्रमाणे यंदाही चव्हाट गल्लीतील देवदादा सासनकाठी, नार्वेकर गल्लीतील जोतिर्लिंग मंदिर आणि कोंडुसकोप येथील सासनकाठ्या बैलगाड्यांसह कोल्हापूरकडे रवाना झाल्या आहेत. ट्रस्टने प्रवासादरम्यान बैलांचे आरोग्य टिकवण्यासाठी पौष्टिक आहार दिला, तर पदयात्री भाविकांसाठी आवश्यक किराणा साहित्याचे वाटप करण्यात आले.

पदयात्रेच्या पहिल्या मुक्कामावर महाप्रसादाची व्यवस्था केली गेली, तसेच ट्रस्टच्या पदाधिकाऱ्यांनी मुक्कामस्थळी भेट देऊन सासनकाठ्यांचे विधीवत पूजन केले आणि सामूहिक महाआरती संपन्न झाली.

या धार्मिक कार्यक्रमात मंदिर ट्रस्टचे अध्यक्ष राहुल कुरणे, अभिजित चव्हाण, अजित जाधव, प्रसाद बाचुलकर, राजू भातकांडे, तानाजी मुतकेकर यांच्यासह अभय लगाडे, जोतिबा कावळे आणि इतर विश्वस्त तसेच महिला सेवक मोठ्या संख्येने उपस्थित होते.

The post चैत्र पौर्णिमेनिमित्त कपिलेश्वर मंदिरातून सासनकाठ्या कोल्हापूरकडे मार्गस्थ appeared first on News 24 Tass Marathi.