बेळगाव : अंमलबजावणी संचालनालय (ईडी) ने अतिरिक्त उत्पादन शुल्क आयुक्त वाय. मंजुनाथ यांच्याशी संबंधित विविध ठिकाणांवर छापेमारीची कारवाई केली आहे. बेळगाव, म्हैसूर, बेंगळुरू आणि हसन जिल्ह्यातील आरसिकेरेसह एकूण सहा ठिकाणी एकाच वेळी ही मोहीम राबविण्यात आल्याची माहिती समोर आली आहे.

मिळालेल्या माहितीनुसार, ईडीच्या पथकाने वाय. मंजुनाथ यांच्याशी संबंधित मालमत्ता आणि व्यवहारांशी निगडित कागदपत्रांची तपासणी सुरू केली आहे. यामध्ये त्यांच्या परिचित आणि निकटवर्तीयांच्या निवासस्थानांचाही समावेश असल्याचे सांगितले जात आहे.

कारवाईदरम्यान म्हैसूरमधील एका मित्राचे घर, बेंगळुरूमधील एक अपार्टमेंट, हसन जिल्ह्यातील आरसिकेरे येथील निकटवर्तीयाचे निवासस्थान तसेच अथणी तालुक्यातील ऐनापूर गावातील एका व्यक्तीच्या घराचीही तपासणी करण्यात आली. विविध ठिकाणांहून कागदपत्रे आणि इतर माहिती संकलित करण्याचे काम सुरू असल्याचे समजते.

वाय. मंजुनाथ यांच्यावर बेनामी व्यवहारांच्या माध्यमातून जमीन, बार आणि रेस्टॉरंट व्यवसायाशी संबंधित मालमत्ता उभारल्याचा आरोप असल्याची चर्चा आहे. या पार्श्वभूमीवर ईडीकडून आर्थिक व्यवहार आणि मालमत्तेच्या कागदपत्रांची पडताळणी केली जात आहे.

दरम्यान, बेंगळुरूमधील त्यांच्या निवासस्थानीही अधिकाऱ्यांकडून तपास सुरू असून, या कारवाईबाबत ईडीकडून अधिकृत माहितीची प्रतीक्षा आहे.

The post बेळगावचे अतिरिक्त उत्पादन शुल्क आयुक्त वाय. मंजुनाथ यांच्यावर ईडीची कारवाई appeared first on News 24 Tass Marathi.

बेळगाव येथील पॅशनेट स्पोर्ट्स अकादमीच्या (पीएसए) जलतरणपटूंनी हासन येथे नुकत्याच पार पडलेल्या जलतरण स्पर्धेत चमकदार कामगिरी करत वर्षाचा दिमाखदार समारोप केला. विविध वयोगटांतील स्पर्धांमध्ये पीएसएच्या खेळाडूंनी एकूण ३९ पदके जिंकत ७५ गुणांसह सांघिक उपविजेतेपद पटकावले.

मिलेनियम स्कूल, हासन येथे झालेल्या या स्पर्धेत पीएसएच्या जलतरणपटूंनी उत्कृष्ट शिस्त, सांघिक समन्वय आणि स्पर्धात्मक वृत्तीचे दर्शन घडवले. किकबोर्ड, फ्रीस्टाइल, बॅकस्ट्रोक, ब्रेस्टस्ट्रोक, बटरफ्लाय तसेच वैयक्तिक मेडले व रिले प्रकारांमध्ये खेळाडूंनी सातत्यपूर्ण कामगिरी करत पदकांची लयलूट केली.

गट ७ मधील आकर्ष कल्लर, अविश के. चौगुले व रिशांत कलखांबकर यांनी किकबोर्ड व रिले प्रकारांत पदके पटकावली. गट ५ मधील रित्वी कंग्राळकर हिने फ्रीस्टाइल, बॅकस्ट्रोक आणि बटरफ्लायमध्ये पदके जिंकली. गट ६ मधील शौर्य एस. कुरुंदवाड याने फ्रीस्टाइल, ब्रेस्टस्ट्रोक आणि बटरफ्लायमध्ये रौप्य पदकांची कमाई केली.

गट १ मधील सिद्धार्थ एस. कुरुंदवाड आणि अथर्व प्रशांत पाटील यांनी वैयक्तिक मेडले व रिले प्रकारांत पदके मिळवली. गट २ मधील मोहम्मद साद ए. खाझी आणि पारस कातंबळे यांनी फ्रीस्टाइल, ब्रेस्टस्ट्रोक, बॅकस्ट्रोक व रिले प्रकारांत यश मिळवले. ओम के. पातुकाळे याने १०० मीटर वैयक्तिक मेडले रौप्य, तर ५० मीटर ब्रेस्टस्ट्रोक व बटरफ्लायमध्ये सुवर्ण पटकावले. यश के. पातुकले आणि सम्राट मलाई यांनीही विविध प्रकारांत सुवर्ण, रौप्य व कांस्य पदकांची कमाई केली.

या यशामागे पीएसएचे प्रशिक्षक प्रशांत पाटील, अमित चव्हाण पाटील आणि सूरज मंगणकर यांचे मार्गदर्शन मोलाचे ठरले. तसेच केएलई सोसायटीचे अध्यक्ष डॉ. प्रभाकर कोरे, केएलई स्कूल, सीबीएएलसी लिंगराज कॉलेज आणि आरएलएस कॉलेजच्या प्राचार्य व व्यवस्थापन मंडळाचे प्रोत्साहन व सहकार्य लाभल्याचे सांगण्यात आले.

The post हासन येथील स्पर्धेत पीएसएच्या जलतरणपटूंची दमदार कामगिरी appeared first on News 24 Tass Marathi.

हासन येथील जिल्हा क्रीडांगणावर मंगळूर पब्लिक स्कूलतर्फे आयोजित ३६ वी विद्याभारती राष्ट्रीय अ‍ॅथलेटिक्स स्पर्धा पार पडली. या स्पर्धेत दक्षिण मध्यक्षेत्राचे प्रतिनिधित्व करताना संतमीरा अनगोळ शाळेची भावना भाऊ बेरडे हिने उत्कृष्ट कामगिरी करत १ रौप्य आणि १ कांस्य पदक जिंकले.

१७ वर्षाखालील मुलींच्या लांबउडी स्पर्धेत भावनाने ४.६९ मीटर उडी मारली आणि कांस्यपदक मिळवले. या स्पर्धेत दक्षिण क्षेत्राच्या लक्षा रेड्डी हिने सुवर्ण, तर रितिका प्रजापतीने रौप्यपदक पटकावले. तिहेरी उडीत भावनाने ९.७८ मीटर उडी मारत रौप्यपदक मिळवले आणि आपली राष्ट्रीय पातळीवरील क्षमता सिद्ध केली.

स्पर्धेनंतर शाळा गेम्स फेडरेशन ऑफ इंडियाचे सदस्य मुखतेश बदेशा, विद्याभारती राज्याध्यक्ष परमेश्वर हेगडे, जिल्हाध्यक्ष माधव पुणेकर आणि मंगळूर पब्लिक संस्थेचे अध्यक्ष चंद्रराज यांच्या हस्ते भावनाला पदके आणि प्रमाणपत्र देऊन गौरविण्यात आले.

भावना बेरडेला क्रीडाशिक्षक चंद्रकांत पाटील, शिवकुमार सुतार आणि अनुराधा पुरी यांचे मार्गदर्शन लाभले. मुख्याध्यापिका सुजाता दप्तरदार, उपमुख्याध्यापिका ऋतुजा जाधव, प्रशासक राघवेंद्र कुलकर्णी तसेच पालकांनी तिचे सतत प्रोत्साहन केले. भावनाच्या या उल्लेखनीय यशामुळे शाळेत आणि बेळगावच्या क्रीडावर्तुळात आनंदाचे वातावरण आहे.

The post राष्ट्रीय अ‍ॅथलेटिक्स स्पर्धेत भावना बेरडेची चमकदार कामगिरी appeared first on News 24 Tass Marathi.