राज्यस्तरीय शरीरसौष्ठव स्पर्धेत दावणगेरेच्या मंजुनाथने उत्कृष्ट सादरीकरण करत ‘मिस्टर कर्नाटक क्लासिक २०२६’ हा मानाचा किताब पटकावला. कडवी स्पर्धा, तगडे प्रतिस्पर्धी आणि रंगतदार पोझिंग यामध्ये मंजुनाथने सरस ठरत विजेतेपदावर नाव कोरले.

या स्पर्धेत प्रशांत खन्नूकर याने प्रथम उपविजेतेपद मिळवले, तर अमन शेख याने द्वितीय उपविजेतेपद पटकावले. उमेश गंगाणे याला आकर्षक सादरीकरणासाठी ‘बेस्ट पोझर’ पुरस्काराने गौरविण्यात आले.

वजनी गटानुसारही विजेत्यांची घोषणा करण्यात आली. ६० किलो गटात उमेश गंगाणे, ८० किलो गटात प्रशांत खन्नूकर, ८५ किलो गटात अमन शेख आणि ७५ किलो गटात इख्लास कुरेशी यांनी प्रथम क्रमांक मिळवला.

याशिवाय ५५ किलो गटात कृष्णप्रसाद, ७० किलो गटात शरणू आणि ६५ किलो गटात इम्तियाज आनेर यांनी उल्लेखनीय यश संपादन केले. स्पर्धेत राज्यभरातील खेळाडूंनी सहभाग नोंदवून शरीरसौष्ठवाचा उत्कृष्ट नमुना सादर केला.

The post दावणगेरेचा मंजुनाथ ‘मिस्टर कर्नाटक क्लासिक २०२६’चा मानकरी appeared first on News 24 Tass Marathi.

बेंगळुरू : दावणगेरे दक्षिण मतदारसंघातील काँग्रेसचे ज्येष्ठ आमदार, माजी मंत्री तसेच अखिल भारत वीरशैव महासभेचे राष्ट्रीय अध्यक्ष शामनूर शिवशंकरप्पा यांचे रविवारी निधन झाले. ते ९४ वर्षांचे होते. वृद्धापकाळातील आजाराने ते काही काळ त्रस्त होते. उपचारासाठी त्यांना बेंगळुरूतील खासगी रुग्णालयात दाखल करण्यात आले होते; मात्र उपचारांना प्रतिसाद न मिळाल्याने रविवारी सायंकाळी त्यांची प्राणज्योत मालवली.

शामनूर शिवशंकरप्पा यांच्या निधनामुळे राज्याच्या राजकीय आणि सामाजिक क्षेत्रात हळहळ व्यक्त केली जात आहे. दावणगेरे येथील प्रभावी नेतृत्व म्हणून त्यांची ओळख होती.

त्यांचे पार्थिव रविवारी पहाटे बेंगळुरूहून दावणगेरे येथे आणण्यात आले. घरी पूजाविधी झाल्यानंतर दुपारी १२ ते ३ वाजेपर्यंत शहरातील हायस्कूल मैदानावर सार्वजनिक अंत्यदर्शनासाठी ठेवण्यात आले आहे. सायंकाळी ४ वाजता हायस्कूल मैदानावरून अंतिम यात्रा निघणार असून, जुने दावणगेरे येथील बंबू बाजार रस्त्यावरील कल्लेश्वर मिलमध्ये सायंकाळी अंत्यसंस्कार करण्यात येणार आहेत.

कल्लेश्वर मिलमध्ये त्यांच्या पत्नी पार्वतीम्मा यांच्या समाधीजवळच अंत्यसंस्कार केले जाणार आहेत. हायस्कूल मैदानावर सार्वजनिक दर्शनाची व्यवस्था करण्यात आली असून, अंत्यदर्शनानंतर सायंकाळी ४.३० वाजता अंतिम विधी पार पडतील, अशी माहिती कुटुंबीयांनी दिली. अंत्यसंस्काराच्या तयारीसाठी कार्यकर्ते आणि समर्थक मोठ्या संख्येने उपस्थित आहेत.

The post काँग्रेसचे ज्येष्ठ आमदार , माजी मंत्री शामनूर शिवशंकरप्पा यांचे निधन appeared first on News 24 Tass Marathi.

दावणगेरे : “बिहार आणि कर्नाटकातील मतदारांचे विचारसरणीचे स्वरूप एकमेकांपेक्षा भिन्न आहे. त्यामुळे कर्नाटकात सध्याचे मुख्यमंत्री सिद्धरामय्या पुढील पाच वर्षे पदावरच राहतील,” असे विधान राज्याचे मंत्री सतीश जारकीहोळी यांनी केले.

वाल्मिकी गुरुपीठाच्या भेटीनंतर ते पत्रकारांशी बोलत होते. “मुख्यमंत्री बदलाबाबत कोणत्याही स्तरावर चर्चा सुरू नाही. पुढील पाच वर्षांची जबाबदारी सिद्धरामय्यांकडेच राहील. मंत्रिमंडळात बदल करायचा की नाही याचा निर्णय पूर्णपणे हायकमांडच्या अखत्यारीत आहे. मंत्री दिल्लीला जातात, परत येतात, पण या विषयावर आमच्यासोबत कोणतेही संवाद होत नाहीत,” असेही त्यांनी नमूद केले. त्यांनी स्पष्ट केले की अंतिम निर्णय शीर्ष नेतृत्वाकडेच आहे.

• बिहार निवडणूक निकाल आणि काँग्रेस :

बिहारमधील निकालांविषयी बोलताना जारकीहोळी म्हणाले, “हे निकाल काँग्रेससाठी शिकवण देणारे आहेत. काय चूक झाली, कुठे उणेपणा राहिला याचे आत्मपरीक्षण करायला हवे. निवडणुका सुरू होताच मतचोरीबाबत आरोप होताना दिसले. या आरोपांवर निवडणूक आयोगाने स्पष्ट भूमिका मांडणे गरजेचे आहे.”

त्यांनी पुढे सांगितले की बिहार आणि कर्नाटकातील मतदारांचे विचार, अपेक्षा व सामाजिक रचना वेगळी असल्याने दोन्ही राज्यांतील राजकीय समीकरणे एकसारखी राहू शकत नाहीत. “कर्नाटकमध्ये हिंदेतर समुदाय प्रभावी असून त्यांना एकत्र आणणे शक्य होते; मात्र बिहारमध्ये तसे झाले नाही,” असे ते म्हणाले.

• आपला पराभव का झाला हे शोधायला हवे :

“निवडणुकीत विजयापेक्षा आपण का हरलो यावर चर्चा होणे महत्त्वाचे आहे. बिहारमध्ये आम्ही हमी कार्यक्रमाचा प्रचार केला नाही; पण विरोधकांनी केलेला प्रचार परिणामकारक ठरला. मतदारांची दिशाभूल झाल्याचा मुद्दा आमचे नेते आपल्या पातळीवर तपासतील. भविष्यातील निर्णयांबाबत प्रतीक्षा करावी लागेल,” असे त्यांनी स्पष्ट केले.

• वाल्मिकी समाजासाठी प्रतिनिधित्व मागणी : 

जर मंत्रिमंडळ फेरबदल झाला, तर वाल्मिकी समाजाला आणखी दोन जागा मिळाव्यात, अशी मागणी त्यांनी केली. “या वेळी आमच्या समाजाला प्रतिनिधित्व मिळालेच पाहिजे. कोणाकडे मागण्यापेक्षा समाजाच्या हितासाठी ते मिळणेच योग्य,” असे ते म्हणाले.

The post मुख्यमंत्रीपदी सिद्धरामय्याचं कायम राहणार : मंत्री सतीश जारकीहोळी appeared first on News 24 Tass Marathi.