बळ्ळारी : पॅराशूट प्रशिक्षण सत्रादरम्यान झालेल्या तांत्रिक बिघाडामुळे दोन सैनिक ५० फूट उंचीवरून जमिनीवर कोसळून गंभीर जखमी झाल्याची घटना बळ्ळारीच्या बाहेरील भागात घडली. जखमी सैनिकांना तातडीने हवाई मार्गाने बेंगळूरुला हलवण्यात आले आहे.

पी. डी. हल्ली परिसरात ४१७ सैनिकांसाठी पॅराशूट प्रशिक्षण शिबिर आयोजित करण्यात आले होते. शनिवारी सकाळी प्रशिक्षणादरम्यान सैनिक ८०० फूट उंचीवरून उडी मारत असताना, जमिनीपासून सुमारे ५० फूट अंतरावर असताना दोन सैनिकांचे पॅराशूट अचानक निकामी झाले.

या घटनेत २५ वर्षीय चिन्नराज यांच्यासह दुसरा एक सैनिक खाली कोसळला. दोघांनाही गंभीर दुखापत झाली असून त्यांच्या पायांना फ्रॅक्चर झाले आहे. अपघातानंतर त्यांना तातडीने स्थानिक रुग्णालयात दाखल करण्यात आले.

परिस्थिती गंभीर असल्याने लष्करी अधिकाऱ्यांनी पुढील उपचारासाठी त्यांना बेंगळूरुला हलवण्याचा निर्णय घेतला. आयटीआय कॉलेज मैदानावर उतरलेल्या लष्करी हेलिकॉप्टरद्वारे दोन्ही सैनिकांना कमांड हॉस्पिटलमध्ये दाखल करण्यात आले.

प्रशिक्षणादरम्यान तांत्रिक बिघाडामुळे हा अपघात झाल्याचे प्राथमिक तपासात समोर आले असून, घटनेची अधिक चौकशी सुरू असल्याची माहिती पोलिसांनी दिली आहे.

The post बळ्ळारीत पॅराशूट प्रशिक्षणादरम्यान भीषण अपघात appeared first on News 24 Tass Marathi.

देशसेवेचे कर्तव्य बजावत असताना वीरमरण आलेले बेळगाव तालुक्यातील कंग्राळी खुर्द येथील जवान जगदीश शिंदे यांच्यावर आज शासकीय इतमामात अंत्यसंस्कार करण्यात आले. अवघ्या दोन महिन्यांत निवृत्त होणार असतानाच आलेल्या या दुःखद घटनेमुळे संपूर्ण गावासह जिल्ह्यात शोककळा पसरली आहे.

भारतीय सैन्यात कार्यरत असलेले जवान जगदीश शिंदे यांचा २ फेब्रुवारी रोजी हरियाणातील अंबाला येथे कर्तव्य बजावत असताना भीषण वाहन अपघातात मृत्यू झाला. आज सकाळी साडेआठ वाजता त्यांचे पार्थिव बेळगावच्या सांबरा विमानतळावर आणण्यात आले. यावेळी लष्करी अधिकाऱ्यांनी त्यांना मानवंदना दिली. त्यानंतर पार्थिव त्यांच्या मूळ गावी कंग्राळी खुर्द येथे आणण्यात आले.

गावातील स्थानिक मराठी शाळेच्या आवारात अंत्यदर्शनासाठी पार्थिव ठेवण्यात आले होते. यावेळी आमदार चन्नराज हट्टीहोळी, माजी आमदार संजय पाटील, लष्करी अधिकारी, ग्रामपंचायत सदस्य तसेच परिसरातील हजारो नागरिकांनी पुष्पचक्र अर्पण करून श्रद्धांजली वाहिली.

यानंतर गावातून अंत्ययात्रा काढण्यात आली. स्मशानभूमीत लष्करी वरिष्ठ अधिकारी राऊत यांच्या उपस्थितीत हवेत तीन फैरी झाडून हुतात्मा जवानाला सलामी देण्यात आली. यानंतर राष्ट्रध्वज अत्यंत भावनिक वातावरणात त्यांच्या पत्नीच्या स्वाधीन करण्यात आला. हा प्रसंग पाहून उपस्थितांच्या डोळ्यांत अश्रू तरळले. कंग्राळी खुर्द येथील स्मशानभूमीत शासकीय इतमामात अंत्यसंस्कार करण्यात आले. हुतात्मा जवानाचे वडील आणि त्यांच्या मुलांनी पार्थिवाला मुखाग्नी दिला.

जगदीश शिंदे हे अत्यंत गरीब कुटुंबातून पुढे आलेले होते. वडिलांनी मजुरी करून मुलांचे शिक्षण पूर्ण केले. विशेष म्हणजे त्यांच्या दोन्ही मुलांनीही सैन्यात भरती होऊन देशसेवेचा मार्ग स्वीकारला आहे. २४ वर्षे निष्ठेने सैन्यदलात सेवा बजावलेल्या जगदीश शिंदे यांना केवळ दोन महिन्यांत निवृत्ती मिळणार होती. मात्र त्याआधीच काळाने त्यांच्यावर झडप घातल्याने संपूर्ण गावात तीव्र हळहळ व्यक्त केली जात आहे.

The post हुतात्मा जवान जगदीश शिंदे यांच्यावर शासकीय इतमामात अंत्यसंस्कार appeared first on News 24 Tass Marathi.

कंग्राळी खुर्द येथील ज्योतीनगरचे सुपुत्र जवान जगदीश शिंदे यांचा भारतीय सैन्यदलात कर्तव्य बजावत असताना हरियाणा राज्यातील अंबाला येथे झालेल्या अपघातात मृत्यू झाला. देशसेवेचे दायित्व पार पाडत असतानाच घडलेल्या या दुर्दैवी घटनेमुळे कंग्राळी खुर्द गावासह संपूर्ण बेळगाव जिल्ह्यात शोककळा पसरली आहे. त्यांच्या अकाली निधनाने सर्वत्र हळहळ व्यक्त होत आहे.

The post कंग्राळी खुर्दचे जवान जगदीश शिंदे यांचा अंबाला येथे अपघाती मृत्यू appeared first on News 24 Tass Marathi.

हिंडलगा / वार्ताहर

आंबेवाडी गावचा सुपुत्र मयूर लक्ष्मण ढोपे (वय २८) हा जवान धिमापूर – नागालँड या ठिकाणी प्रशिक्षणावेळी अपघातात १४ डिसेंबर रोजी सायंकाळी ४ वाजता हुतात्मा झाला. त्यांचे पार्थिव मंगळवारी रात्री १०.१५ वाजता बेळगाव येथील मिलिटरी हॉस्पिटलमध्ये आणण्यात आले. कोलकात्ता येथील कमांडो हॉस्पिटल येथे उपचार करत असताना त्यांची प्राणज्योत मालवली. बुधवार दि. १७ डिसेंबर रोजी सकाळी ११ वाजता आंबेवाडी येथील स्मशानभूमीत त्यांच्या पार्थिवावर अंत्यविधी होणार आहे.

हुतात्मा जवान मयूर ढोपे यांचे प्राथमिक शिक्षण आंबेवाडी येथील सरकारी प्राथमिक मराठी शाळेत झाले असून माध्यमिक शिक्षण भगतसिंग हायस्कूलमध्ये झाले आहे. उत्कृष्ट खेळाडू असल्याने अवघ्या आठ वर्षांपूर्वी ते सैन्यात भरती झाले. 7003EME या युनिटमध्ये सेवेत रुजू झाले होते. त्यांच्या पश्चात आई-वडील, दोन अविवाहित बहिणी आहेत. हुतात्मा जवान अविवाहित होता.

बुधवार सकाळी त्यांचे पार्थिव आंबेवाडी येथील रामदेव गल्लीतील राहत्या घरी अंत्यदर्शनासाठी ठेवले जाणार आहे. आंबेवाडी ग्राम पंचायतमार्फत स्मशानभूमीत स्वच्छ केली असून मंडप उभारण्यात आला आहे. ही वार्ता दोन दिवसांपूर्वी समजल्यापासून गावात शोककळा पसरली आहे. ग्राम पंचायत अध्यक्ष लक्ष्मी यळगुकर, पंचायत विकास अधिकारी व सर्व सदस्यांनी स्मशानभूमी स्वच्छ करून अंत्यसंस्कारासाठी तयारी केली आहे.

प्रत्येक गल्लीतील चौकात हुतात्मा जवानाचे श्रद्धांजलीचे फोटो लावले आहेत. अंत्ययात्रेवेळी गावातील जय जवान सैनिक संघटना गणवेशात अग्रभागी राहणार आहे. आंबेवाडी येथील सरकारी प्राथमिक मराठी, कन्नड शाळांचे विद्यार्थी, तसेच भगतसिंग हायस्कूलचे विद्यार्थी व संपूर्ण- शिक्षकवृंद या ठिकाणी उपस्थित राहणार आहे. तसेच शाळा विकास व्यवस्थापन समिती व माजी विद्यार्थी संघटना, श्री दत्त मंदिर कमिटी, श्री घळगेश्वर मंदिर कमिटी सहभागी होणार आहे.

The post आंबेवाडीचा जवान नागालँडमध्ये हुतात्मा appeared first on News 24 Tass Marathi.