बेळगाव : गोव्यात प्रवेश करणाऱ्या बेळगावसह अन्य राज्यांतील वाहनचालकांना आकारण्यात येणाऱ्या अवाजवी वाहतूक दंडाबाबत अखेर दिलासादायक हालचाल सुरू झाली आहे. बेळगावचे माजी आमदार अनिल बेनके यांनी केलेल्या पाठपुराव्यानंतर गोव्याचे मुख्यमंत्री प्रमोद सावंत यांनी प्रथमच किरकोळ नियमभंग करणाऱ्यांसाठी दंड कमी करण्यासह ताकीद देणारी नवी व्यवस्था लागू करण्याचे आश्वासन दिले आहे.

अलीकडच्या काळात प्रदूषण नियंत्रण प्रमाणपत्र (पीयूसी) आणि इतर किरकोळ कारणांवरून गोव्यात प्रवेश करणाऱ्या वाहनांवर १० हजार रुपयांपर्यंत दंड आकारला जात असल्याने वाहनचालकांमध्ये तीव्र नाराजी निर्माण झाली होती. याबाबत सादर करण्यात आलेल्या निवेदनात सदोष ई-चलन प्रणाली, वाहतूक चिन्हांचा अभाव, पर्यटक वाहनांवरील वाढता दंड आणि सर्वसामान्यांवर होणारा आर्थिक बोजा याकडे सरकारचे लक्ष वेधण्यात आले होते.

या पार्श्वभूमीवर मुख्यमंत्री प्रमोद सावंत यांनी सकारात्मक भूमिका घेत, जीवघेण्या स्वरूपाचे नसलेल्या आणि प्रथमच झालेल्या नियमभंगाच्या प्रकरणांमध्ये मोठा दंड आकारण्याऐवजी इशारा देण्याची आणि दंडाची रक्कम कमी करण्याची नवी नियामक प्रणाली लवकरच लागू केली जाईल, असे आश्वासन दिले आहे. या निर्णयामुळे बेळगावसह गोव्यात नियमित ये-जा करणारे प्रवासी, पर्यटक आणि कामगार वर्गाला मोठा दिलासा मिळण्याची अपेक्षा व्यक्त केली जात आहे.

The post बेळगावकरांना दिलासा ; गोव्यातील अवाजवी वाहतूक दंड कमी होणार appeared first on News 24 Tass Marathi.

बेळगाव : टाटा आयपीएल २०२६ स्पर्धेच्या अंतिम फेरीत रॉयल चॅलेंजर्स बंगळुरू (आरसीबी) संघाने स्थान मिळवल्यानंतर संभाव्य जल्लोषाच्या पार्श्वभूमीवर बेळगाव शहर पोलिसांनी विशेष खबरदारीचे उपाय जाहीर केले आहेत. शहरातील कायदा व सुव्यवस्था कायम राखण्यासाठी पोलीस आयुक्त भूषण बोरसे यांनी नागरिकांसाठी विविध मार्गदर्शक सूचना जारी केल्या आहेत.

पोलिसांनी प्रसिद्ध केलेल्या निवेदनानुसार, ३१ मे रोजी अंतिम सामना संपल्यानंतर कोणत्याही प्रकारच्या सार्वजनिक मिरवणुका, विजय उत्सव किंवा रस्त्यावर होणाऱ्या जल्लोषाला परवानगी दिली जाणार नाही. तसेच सार्वजनिक ठिकाणी सामना दाखविण्यासाठी एलईडी स्क्रीन किंवा वॉल उभारायची असल्यास संबंधित स्थानिक स्वराज्य संस्था अथवा महापालिकेची पूर्वपरवानगी घेणे बंधनकारक राहणार आहे. याशिवाय आधीपासून उभारलेल्या बाह्य एलईडी स्क्रीनवर सामना प्रसारित करण्यासही मनाई करण्यात आली आहे.

फटाके फोडणे, धोकादायक वस्तूंचा वापर करणे, वाहतुकीस अडथळा निर्माण करणे, दुचाकी किंवा वाहनांच्या रॅली काढणे, बेफाम वेगाने वाहन चालविणे, स्टंट करणे, विनाकारण हॉर्न वाजविणे अथवा रस्त्यांवर गर्दी करून गोंधळ घालणे यासारख्या प्रकारांवर कठोर कारवाई केली जाणार असल्याचे पोलिसांनी स्पष्ट केले आहे.

याशिवाय सार्वजनिक ठिकाणी मद्यपान करणे, भांडणे, असभ्य वर्तन करणे किंवा कोणत्याही प्रकारे शांतता भंग करणाऱ्या कृतींवर लक्ष ठेवण्यात येणार आहे. सोशल मीडियावर अफवा, द्वेषपूर्ण संदेश किंवा चिथावणीखोर पोस्ट प्रसारित करणाऱ्यांविरोधातही कायदेशीर कारवाईचा इशारा देण्यात आला आहे. तसेच प्रतिस्पर्धी संघांच्या समर्थकांना उद्देशून वादग्रस्त वक्तव्ये किंवा चिथावणीखोर वर्तन टाळण्याचे आवाहन करण्यात आले आहे.

सामन्यानंतर शहरात मद्यधुंद वाहनचालकांविरोधात विशेष तपासणी मोहीम राबविण्यात येणार असून १५ अल्कोमीटरच्या साहाय्याने वाहनचालकांची तपासणी केली जाईल. तसेच धारदार शस्त्रे बाळगणाऱ्या व्यक्तींवर लक्ष ठेवण्यासाठी विशेष ‘अँटी-स्टॅबिंग स्क्वॉड’ तैनात राहणार आहे. कारवाईदरम्यान पोलिसांकडून बॉडी-वॉर्न कॅमेऱ्यांचाही वापर केला जाणार आहे.

मद्यप्राशन करून वाहन चालवताना आढळल्यास मोटार वाहन कायद्यानुसार पहिल्या गुन्ह्यासाठी १० हजार रुपयांपर्यंत दंड आणि सहा महिन्यांपर्यंत कारावासाची तरतूद आहे. पुन्हा त्याच प्रकारचा गुन्हा केल्यास १५ हजार रुपयांचा दंड, दोन वर्षांपर्यंत कारावास तसेच वाहन परवाना रद्द करण्याची कारवाई होऊ शकते, असेही पोलिसांनी नमूद केले आहे.

शहरातील शांतता, सुरक्षितता आणि कायदा-सुव्यवस्था अबाधित राखण्यासाठी नागरिकांनी नियमांचे पालन करून पोलिसांना सहकार्य करावे, असे आवाहन पोलीस आयुक्त भूषण बोरसे यांनी केले आहे.

The post आयपीएल फायनलनंतर सार्वजनिक जल्लोषावर बंदी appeared first on News 24 Tass Marathi.

बेळगाव : वरिष्ठ पोलीस अधिकारी संदीप पाटील यांनी उत्तर विभागाच्या आयजीपीपदाची अधिकृत सूत्रे हाती घेतली. बेळगाव येथे मुख्यालय असलेल्या उत्तर विभागाचे नवे आयजीपी म्हणून त्यांनी पदभार स्वीकारल्यानंतर पोलीस दलातील अधिकारी आणि कर्मचाऱ्यांकडून त्यांचे स्वागत करण्यात आले.

यापूर्वी उत्तर विभागाचे आयजीपी म्हणून कार्यरत असलेले चेतन सिंग राठोड यांनी संदीप पाटील यांच्याकडे अधिकृतपणे पदभार सुपूर्द केला. त्यानंतर राठोड यांना पोलीस विभागाकडून सन्मानपूर्वक निरोप देण्यात आला.

संदीप पाटील हे बेळगावसाठी नवीन चेहरा नसून, २०१० ते २०१३ या कालावधीत त्यांनी जिल्हा पोलीस प्रमुख म्हणून उल्लेखनीय कामगिरी बजावली होती. त्यांच्या कार्यकाळात गुन्हेगारीवर प्रभावी नियंत्रण, कडक शिस्त आणि जलद निर्णयक्षमतेची छाप उमटली होती. त्यामुळे त्यांच्या पुनरागमनाकडे पोलीस प्रशासनासह नागरिकांचे लक्ष लागले आहे.

विशेष म्हणजे, त्यांच्या नेतृत्वाखाली सुरू करण्यात आलेला ‘जनता दर्शन’ उपक्रम त्या काळात मोठ्या प्रमाणात गाजला होता. सामान्य नागरिकांच्या तक्रारी थेट ऐकून तत्काळ निराकरण करण्याच्या त्यांच्या कार्यपद्धतीला मोठा प्रतिसाद मिळाला होता.

उत्तर विभागाची सूत्रे हाती घेतल्यानंतर कायदा व सुव्यवस्था अधिक सक्षम करण्यासाठी संदीप पाटील यांच्या अनुभवाचा मोठा फायदा होईल, अशी अपेक्षा व्यक्त होत आहे.

The post वरिष्ठ पोलीस अधिकारी संदीप पाटील यांनी स्वीकारला पदभार appeared first on News 24 Tass Marathi.

दरवाढ तात्काळ लागू करण्यात आल्याने वाहनचालक, परिवहन क्षेत्र तसेच सर्वसामान्य नागरिकांच्या खर्चात आणखी वाढ होणार आहे. चार वर्षांनंतर प्रथमच इतक्या मोठ्या प्रमाणात इंधन दरवाढ करण्यात आल्याने नागरिकांमध्ये नाराजी व्यक्त होत आहे.

पश्चिम आशियातील वाढता संघर्ष, होर्मूज सामुद्रधुनी परिसरातील तणाव आणि जागतिक बाजारपेठेत कच्च्या तेलाच्या वाढलेल्या किमती यामुळे सरकारी तेल कंपन्यांवर आर्थिक ताण निर्माण झाला आहे. या नुकसानीची भरपाई करण्यासाठी इंधन दरवाढीचा निर्णय घेण्यात आल्याचे सांगितले जात आहे.

सतत वाढणाऱ्या इंधन दरांमुळे वाहतूक खर्च वाढण्याची शक्यता असून त्याचा परिणाम भाजीपाला, अन्नधान्य आणि दैनंदिन वस्तूंच्या किमतींवरही होण्याची भीती व्यक्त केली जात आहे.

The post इंधन दरवाढीचा फटका ; बेळगावात पेट्रोल ११०.७४ तर डिझेल ९८.६९ रुपयांवर appeared first on News 24 Tass Marathi.

बेळगाव : शहरातील मध्यवर्ती बसस्थानक परिसरात बांगलादेशी घुसखोर असल्याच्या संशयावरून पोलिसांनी राबवलेल्या विशेष शोधमोहीमेत ताब्यात घेण्यात आलेल्या २० हून अधिक जणांची सखोल चौकशीनंतर सुटका करण्यात आली. संबंधित सर्वजण पश्चिम बंगालचे भारतीय नागरिक असल्याचे प्राथमिक तपासात स्पष्ट झाले आहे.

हुबळीहून तीन बसमधून काही संशयित व्यक्ती बेळगावात आल्याची माहिती मिळाल्यानंतर पोलिस यंत्रणा सतर्क झाली. श्रीराम सेनेच्या कार्यकर्त्यांनीही बांगलादेशी घुसखोर शहरात आल्याचा संशय व्यक्त केल्यानंतर पोलीस उपायुक्त नारायण बरमणी यांच्या नेतृत्वाखाली मध्यवर्ती बसस्थानक परिसरात मोठी तपासणी मोहीम राबवण्यात आली.

या कारवाईदरम्यान संशयास्पद हालचाली करणाऱ्या २० हून अधिक जणांना ताब्यात घेऊन माळमारुती पोलीस ठाण्यात आणण्यात आले. पोलिसांनी संबंधितांची आधार कार्ड, मतदान ओळखपत्र तसेच मोबाईल माहितीची कसून पडताळणी केली.

चौकशीदरम्यान संबंधितांनी आपण पश्चिम बंगालचे रहिवासी असून बेळगावातील शहापूर भागात सुवर्ण व्यवसायाशी संबंधित काम करत असल्याचे सांगितले. नुकत्याच झालेल्या निवडणुकीसाठी गावी गेल्यानंतर पुन्हा कामानिमित्त बेळगावात परतल्याची माहिती त्यांनी पोलिसांना दिली.

पोलिस तपासात सादर करण्यात आलेली सर्व कागदपत्रे वैध असल्याचे आढळून आले. अतिरिक्त खबरदारीचा उपाय म्हणून सर्वांचे अंगठ्याचे ठसे घेण्यात आले. प्राथमिक तपासात कोणतीही संशयास्पद बाब आढळून न आल्याने सर्वांची सुटका करण्यात आली असून ते आपापल्या कामावर आणि निवासस्थानी परतले आहेत.

The post बांगलादेशी घुसखोरांच्या संशयावरून ताब्यात घेतलेल्यांची तपासणीनंतर सुटका appeared first on News 24 Tass Marathi.

बेळगाव : पोलीस आयुक्तालय येथे दहशतवाद विरोधी दिनानिमित्त आज विशेष कार्यक्रम आयोजित करण्यात आला होता. यावेळी पोलीस अधिकारी व कर्मचाऱ्यांनी समाजात शांतता, सलोखा आणि राष्ट्रीय एकात्मता कायम राखण्याची तसेच दहशतवाद आणि हिंसाचाराविरुद्ध एकजुटीने लढण्याची शपथ घेतली. देशासाठी बलिदान देणाऱ्या हुतात्म्यांना यावेळी आदरांजलीही वाहण्यात आली.

दरवर्षी २१ मे रोजी साजरा केला जाणारा दहशतवाद विरोधी दिन समाजात दहशतवादाच्या दुष्परिणामांविषयी जनजागृती निर्माण करण्यासाठी पाळला जातो. दहशतवाद कोणत्याही धर्म, जाती किंवा विचारसरणीचा प्रतिनिधी नसून तो केवळ भीती, हिंसा आणि अशांतता पसरवणारी अमानवी प्रवृत्ती असल्याचे यावेळी नमूद करण्यात आले.

देशाच्या प्रगतीसाठी सामाजिक सौहार्द आणि शांतता आवश्यक असून प्रत्येक नागरिकाने सतर्क राहून देशविघातक शक्तींविरोधात एकजुटीने उभे राहण्याचे आवाहन करण्यात आले. शिक्षण, जागरूकता, संवाद आणि परस्पर विश्वास यांच्या माध्यमातून समाजात शांततेचा संदेश अधिक प्रभावीपणे रुजवण्याचा निर्धार यावेळी व्यक्त करण्यात आला.

The post दहशतवाद विरोधी दिनानिमित्त शांतता आणि एकात्मतेची शपथ appeared first on News 24 Tass Marathi.

नवी दिल्ली : देशात महागाईचा दबाव वाढत असताना आता पेट्रोल आणि डिझेलच्या दरवाढीमुळे सर्वसामान्य नागरिकांच्या खर्चात आणखी भर पडली आहे. सीएनजी, सोने-चांदी, दूध आणि गॅस सिलिंडरच्या वाढलेल्या दरांनंतर इंधन दरवाढीची भर पडल्याने नागरिकांची चिंता वाढली आहे.

पश्चिम आशियातील तणावपूर्ण परिस्थिती आणि जागतिक स्तरावरील अस्थिरतेमुळे कच्च्या तेलाच्या पुरवठ्यावर परिणाम झाला आहे. त्याचा थेट परिणाम भारतीय बाजारपेठेवर दिसून येत असून, शुक्रवारी सकाळी ६ वाजल्यापासून देशभरात पेट्रोल आणि डिझेलचे नवे दर लागू करण्यात आले आहेत.

तेल कंपन्यांनी पेट्रोलच्या दरात प्रतिलिटर ३ रुपये १४ पैशांची तर डिझेलच्या दरात ३ रुपये ११ पैशांची वाढ जाहीर केली आहे. या वाढीमुळे वाहतूक, मालवाहतूक आणि दैनंदिन वस्तूंच्या किमतींवरही परिणाम होण्याची शक्यता व्यक्त केली जात आहे.

यापूर्वी सीएनजीच्या दरात दोन रुपयांची वाढ करण्यात आली होती. तसेच सोने आणि चांदीवरील आयात शुल्क १५ टक्क्यांपर्यंत वाढवण्यात आल्याने मौल्यवान धातूंचे दरही चढले आहेत. घरगुती वापरातील अनेक वस्तूंच्या किमती वाढल्यामुळे महागाईचा फटका अधिक तीव्र होत असल्याचे चित्र आहे.

दिल्ली पेट्रोल डीलर्स असोसिएशनचे माजी अध्यक्ष निश्चल सिंघानिया यांनी दिलेल्या माहितीनुसार, आंतरराष्ट्रीय बाजारात कच्च्या तेलाच्या किमतीत झालेली वाढ आणि डॉलरच्या तुलनेत रुपयाचे अवमूल्यन ही इंधन दरवाढीमागील प्रमुख कारणे आहेत. तेल कंपन्यांनी गुरुवारी मध्यरात्री पेट्रोल पंप चालकांना ईमेलद्वारे नव्या दरांची माहिती दिली होती.

The post पेट्रोल – डिझेलचे दर वाढले appeared first on News 24 Tass Marathi.

शिवम असोसिएट्स यांच्या वतीने सरदार मैदानावर स्वच्छता अभियानाच्या निमित्ताने मोठ्या प्रमाणावर कार्यक्रम आयोजित करण्यात आला होता. या कार्यक्रमासाठी सुमारे २५ हजार नागरिक उपस्थित राहण्याची अपेक्षा व्यक्त करण्यात आली होती.

मात्र, आवश्यक प्रशासकीय परवानग्या आणि सुरक्षाविषयक नियमांचे पालन न झाल्याने जिल्हा प्रशासनाने कार्यक्रमास मंजुरी दिली नाही. त्यानंतर मनपाने शहरभर लावण्यात आलेले अनधिकृत फ्लेक्स, बॅनर आणि जाहिरात फलक हटवून जप्त केले.

शहराच्या सौंदर्यावर परिणाम करणारे आणि नियमांचे उल्लंघन करून उभारण्यात आलेले फलक सहन केले जाणार नाहीत, असा इशारा मनपा आयुक्त कार्तिक एम. यांनी दिला. तसेच पुढील काळातही अशा प्रकारच्या अनधिकृत जाहिरातींवर कारवाई सुरू ठेवण्यात येणार असल्याचे त्यांनी स्पष्ट केले.

The post मनपाने हटवले शहरातील अनधिकृत बॅनर appeared first on News 24 Tass Marathi.

दिल्ली आणि उत्तर प्रदेशमधून कार्यरत असलेल्या या टोळीचा माग काढण्यासाठी पोलिसांनी तांत्रिक तपासासोबतच घटनास्थळी मिळालेल्या बोटांच्या ठशांचा आधार घेतला. त्यानंतर दिल्ली आणि उत्तर प्रदेश पोलिसांच्या सहकार्याने विशेष मोहीम राबवून आरोपीला ताब्यात घेण्यात आले.

या कारवाईदरम्यान पोलिसांनी सुमारे ४४ लाख ८६ हजार रुपये किमतीचे २९४ ग्रॅम सोन्याचे बिस्किट तसेच गुन्ह्यात वापरण्यात आलेली दुचाकी जप्त केली आहे.

तपासादरम्यान ही टोळी कर्नाटकासह गोवा, महाराष्ट्र आणि मध्य प्रदेशातही सक्रिय असल्याचे उघड झाले आहे. पोलीस आयुक्त भूषण बोरसे यांच्या मार्गदर्शनाखाली स्थापन करण्यात आलेल्या विशेष पथकाने नियोजनबद्ध पद्धतीने ही कारवाई केली.

या यशस्वी मोहिमेबद्दल आयुक्तांनी शहापूर पोलिसांचे कौतुक केले असून, या अटकेमुळे विविध भागांतील जुन्या घरफोडीच्या गुन्ह्यांचाही तपास पुढे सरकण्याची शक्यता व्यक्त करण्यात येत आहे.

The post बेळगावात आंतरराज्य घरफोड्या करणाऱ्या टोळीचा मुख्य सूत्रधार अटकेत appeared first on News 24 Tass Marathi.

बेळगाव : राज्य गृह विभागाकडून शनिवारी राज्यभरातील २९३ पोलीस निरीक्षकांच्या बदल्यांचे आदेश जारी करण्यात आले. या फेरबदलामध्ये बेळगाव जिल्हा तसेच शहर पोलीस आयुक्तालयातील काही अधिकाऱ्यांचाही समावेश असून टिळकवाडी आणि शहापूर पोलीस ठाण्यांमध्ये नव्या निरीक्षकांची नियुक्ती करण्यात आली आहे.

शहापूर पोलीस ठाण्याचे निरीक्षक सिद्धाप्पा सिमानी यांची गुप्तचर विभागात बदली करण्यात आली असून त्यांच्या जागी कारवार येथील हेस्कॉम जागृत पथकात कार्यरत असलेले निरीक्षक गोपाळ आर. यांची नियुक्ती करण्यात आली आहे.

तसेच टिळकवाडी पोलीस ठाण्याचे निरीक्षक परशुराम पुजारी यांची खानापूर येथील पोलीस प्रशिक्षण केंद्रात बदली करण्यात आली आहे. त्यांच्या जागी उत्तर कन्नड जिल्ह्यातील शिरशी पोलीस ठाण्यात कार्यरत असलेले निरीक्षक शशिकांत वर्मा यांची नियुक्ती करण्यात आली आहे.

शहापूर आणि टिळकवाडी ही संवेदनशील पोलीस ठाणी मानली जात असल्याने अनुभवी अधिकाऱ्यांच्या नियुक्तीमुळे कायदा व सुव्यवस्था अधिक बळकट होईल, अशी अपेक्षा व्यक्त केली जात आहे.

दरम्यान, संकेश्वर पोलीस ठाण्याचे निरीक्षक शिवशरण अवजी यांची मंगळूर येथे बदली करण्यात आली असून खानापूर पीटीएसमधील निरीक्षक राजू रावसाहेब पाटील यांची बनहट्टी पोलीस ठाण्यात नियुक्ती करण्यात आली आहे.

The post टिळकवाडी आणि शहापूर पोलीस निरीक्षकांची बदली appeared first on News 24 Tass Marathi.