बेळगावच्या दक्षिण भागातील शहापूर, वडगाव आणि खासबाग परिसरात संस्थानकालीन परंपरेनुसार पाचव्या दिवशी रंगपंचमी मोठ्या उत्साहात साजरी करण्यात आली. रंग, पाणी, डीजेच्या तालावर नृत्य आणि विविध मुखवट्यांनी सजलेल्या मिरवणुकांमुळे परिसरात रंगोत्सवाचा जल्लोष पाहायला मिळाला.

सकाळपासूनच रस्त्यांवर तरुणाईसह लहान मुले, महिलांनी एकमेकांवर रंग उधळत सणाचा आनंद लुटला. रंगांच्या पिशव्या आणि पिचकाऱ्यांसह युवक-युवती दुचाकींवरून परिसरात फिरत होते. समोर येणाऱ्या नागरिकांवर रंगांची उधळण करत त्यांनी होळीच्या शुभेच्छा देत वातावरण रंगमय केले. या उत्सवात नगरसेवक रवी साळुंके यांचाही सहभाग होता.

यंदाच्या रंगपंचमीचे विशेष आकर्षण म्हणजे विविध आकारांचे रंगीबेरंगी मुखवटे परिधान केलेले तरुण-तरुणी. तसेच रेन डान्ससाठी उभारलेल्या मंडपांमध्ये स्प्रिंकलर्स आणि पाण्याच्या कारंजाखाली तरुणाईने मनसोक्त नृत्य केले. डीजेवर वाजणाऱ्या रिमिक्स गाण्यांसह पारंपरिक लोकगीतांच्या तालावर युवक-युवती थिरकताना उत्साह ओसंडून वाहत होता. महिलांनी रंगीत पाण्याच्या घागरी युवकांवर व वाहनधारकांवर ओतून सणाचा आनंद द्विगुणित केला.

रंगोत्सव शांततेत पार पडावा यासाठी पोलिस विभागाने कडक बंदोबस्त ठेवला होता. शहराचे पोलिस आयुक्त भूषण बोरसे यांनी शहापूर व वडगाव परिसरात भेट देऊन सुरक्षा व्यवस्थेची पाहणी केली आणि नागरिकांना सण शांततेत साजरा करण्याचे आवाहन केले.

एकंदरीत डीजेचा दणदणाट, रेनडान्सचा जल्लोष आणि रंगांची उधळण अशा वातावरणात शहापूर, वडगाव व खासबाग परिसरात रंगपंचमी मोठ्या उत्साहात साजरी करण्यात आली.

The post खासबाग, शहापूर, वडगाव भागात जल्लोषी रंगपंचमी appeared first on News 24 Tass Marathi.

बेळगाव / प्रतिनिधी

वडगाव श्रीराम कॉलनी आदर्श नगर येथील रहिवासी संघटनेच्या वतीने आज रविवारी सकाळी सामूहिक रंगपंचमी कार्यक्रम आयोजित करण्यात आला होता. या कार्यक्रमाला बेळगावचे महापौर मंगेश पवार उपस्थित होते. उपस्थित नागरिकांसह महापौर मंगेश पवार यांनी रंगपंचमीचा आनंद लुटला. यावेळी मंगेश पवार यांनी आपले महापौर पदाची कारकीर्द यशस्वीरीत्या पार पाडली आहे. याबद्दल त्यांचा संघटनेच्या वतीने सन्मान करण्यात आला.

यावेळी बोलताना महापौर मंगेश पवार यांनी प्रत्येकाने आपल्या घराप्रमाणेच शहराच्या स्वच्छतेसाठी जागरूकतेने कर्तव्य पार पडावे असा संदेश दिला.

The post रंगपंचमीनिमित्त महापौर मंगेश पवार यांचा स्वच्छता आणि एकात्मतेचा संदेश appeared first on News 24 Tass Marathi.

कै. नारायणराव गुंडोजी जाधव सामाजिक आणि शैक्षणिक प्रतिष्ठान शहापूर यांच्या वतीने गेली आठ वर्षे पर्यावरण पूरक फुलांची रंगपंचमी साजरी करण्याचा स्तुत्य कार्यक्रम राबविला जात आहे.

या कार्यक्रमांतर्गत आज रविवारी दि. ८ मार्च २०२६ रोजी सकाळी खासबाग येथील डॉ . बाबासाहेब आंबेडकर चौक खासबाग (रिक्षा स्टॅण्ड समोर ) येथे फुलांची रंगपंचमी कार्यक्रमाचे आयोजन करण्यात आले होते‌.

माजी नगरसेवक श्री. नेताजी जाधव यांनी कार्यक्रमाचा उद्देश सांगितला‌‌. कार्यक्रमाला शहापूर पोलीस ठाण्याचे सीपीआय सीमानी यांच्यासह महाराष्ट्र एकीकरण युवा समिती अध्यक्ष अंकुश केसरकर, माजी नगरसेवक गरसेवक विजय भोसले,गोपाळ बिर्जे, मालोजी अष्टेकर,पी,जी घाडी,श्रीधर जाधव यांच्यासह परिसरातील ज्येष्ठ तसेच युवा आणि महिला बहुसंख्येने उपस्थित होत्या उपस्थित मान्यवरांनी बेळगावात अशा प्रकारे पर्यावरण पूरक फुलांची रंगपंचमी साजरी केली जाते याचे इतरांनीही अनुकरण करावे असे आवाहन केले.

The post खासबाग येथे पर्यावरण पूरक फुलांची रंगपंचमी उत्साहात साजरी appeared first on News 24 Tass Marathi.

बेळगाव / प्रतिनिधी

होळीच्या उत्सवाला अनोखा आणि पर्यावरणपूरक रंग देण्यासाठी खासबाग येथे ‘फुलांची रंगपंचमी’ साजरी करण्यात येणार आहे. कै. नारायणराव गुंडोजी जाधव सामाजिक आणि शैक्षणिक प्रतिष्ठान, शहापूर यांच्या वतीने रविवार दि. ८ मार्च २०२६ रोजी सकाळी १० वाजता डॉ. बाबासाहेब आंबेडकर चौक, खासबाग (रिक्षा स्टँड समोर) येथे या कार्यक्रमाचे आयोजन करण्यात आले आहे.

या कार्यक्रमाला पोलीस अधिकारी तसेच विविध क्षेत्रांतील मान्यवर नेतेमंडळी उपस्थित राहणार असल्याची माहिती आयोजकांनी दिली आहे. फुलांच्या वर्षावातून रंगपंचमी साजरी करत आनंद आणि सौहार्दाचा संदेश देण्याचा या उपक्रमामागील उद्देश आहे.

या कार्यक्रमास समाजकार्यकर्ते तसेच नागरिकांनी मोठ्या संख्येने उपस्थित राहून कार्यक्रमाची शोभा वाढवावी, असे आवाहन माजी नगरसेवक नेताजी जाधव यांनी केले आहे.

The post खासबाग येथे रविवारी ‘फुलांची रंगपंचमी’ appeared first on News 24 Tass Marathi.

बेळगाव / प्रतिनिधी

रंगपंचमीच्या उत्सवात कोणताही अनुचित प्रकार घडू नये आणि कायदा-सुव्यवस्था अबाधित राहावी यासाठी पोलिस प्रशासनाने शहापूर व वडगाव परिसरात कडेकोट बंदोबस्त ठेवण्याची तयारी केली आहे. रविवार, ८ मार्च रोजी साजऱ्या होणाऱ्या रंगपंचमीच्या पार्श्वभूमीवर संवेदनशील भागांत अतिरिक्त पोलीस पथके तैनात करण्यात येणार आहेत.

उत्सवाच्या पार्श्वभूमीवर शहर व उपनगरांमध्ये सुरक्षेच्या दृष्टीने सोमवारी व मंगळवारी एकूण १९ तपासणी नाके उभारून वाहनांची तपासणी करण्यात आली. त्याच धर्तीवर शहापूर व वडगाव परिसरातही विशेष तपासणी मोहीम राबवली जाणार आहे. प्रमुख चौक, बाजारपेठा आणि शहरात येणाऱ्या मुख्य प्रवेशद्वारांवर पोलिसांकडून कडक नजर ठेवली जाणार आहे.

रंगांची उधळण, मिरवणुका आणि सार्वजनिक ठिकाणी होणारी गर्दी लक्षात घेऊन स्वतंत्र वाहतूक पथके तैनात करण्यात येणार असून, मद्यधुंद अवस्थेत वाहन चालविणाऱ्यांवर कठोर कारवाईचा इशाराही देण्यात आला आहे. सीसीटीव्ही नियंत्रण कक्षातून महत्त्वाच्या ठिकाणांवर लक्ष ठेवले जाणार असून काही गर्दीच्या भागांवर ड्रोनद्वारेही नजर ठेवण्याची तयारी करण्यात आली आहे.

महिला सुरक्षेच्या दृष्टीने महिला पोलीस पथके कार्यरत राहणार असून छेडछाड किंवा जबरदस्तीने रंग लावण्यासारख्या प्रकारांवर तातडीने कारवाई केली जाणार आहे. ध्वनिप्रदूषण, सार्वजनिक मालमत्तेची हानी आणि वाहतूक नियमांचे उल्लंघन करणाऱ्यांवरही पोलिसांचे लक्ष राहणार आहे.

सण आनंदात आणि शांततेत साजरा करण्यासाठी नागरिकांनी नियमांचे पालन करावे, अफवा पसरवू नयेत आणि कोणताही संशयास्पद प्रकार आढळल्यास त्वरित जवळच्या पोलिस ठाण्याशी संपर्क साधावा, असे आवाहन पोलिस प्रशासनाने केले आहे.

The post शहापूर, वडगाव येथे रंगपंचमीची तयारी appeared first on News 24 Tass Marathi.

बेळगाव / प्रतिनिधी

रंगांची उधळण, पाण्याचे स्प्रिंकलर्स, डीजेच्या तालावर थिरकणारी तरुणाई आणि गल्लोगल्ली पिचकाऱ्यांचा वर्षाव—अशा जल्लोषी वातावरणात बेळगाव शहरात मंगळवारी रंगपंचमी साजरी करण्यात आली. शहर, उपनगरे आणि आसपासच्या भागात सकाळपासूनच रंगोत्सवाची धूम पाहायला मिळाली . एकमेकांना रंग लावत नागरिकांनी होळी-रंगपंचमीच्या शुभेच्छांची देवाणघेवाण केली.

टिळकवाडी येथील व्हॅक्सिन डेपो मैदानावर दरवर्षीप्रमाणे ‘होली मिलन’चा सामूहिक रंगोत्सव मोठ्या उत्साहात पार पडला. उन्हातही स्प्रिंकलर्सच्या गारव्यात तरुणाईने ‘रेन डान्स’ करत जल्लोष केला. विविध वेषभूषा आणि आकर्षक मुखवटे परिधान केलेल्या युवकांनी रंगोत्सवात रंगत आणली.

चव्हाट गल्ली, कामत गल्ली, टेंगिनकेरा गल्ली, गोंधळी गल्ली तसेच चन्नम्मानगर, टिळकवाडी, अनगोळ आदी भागांत रस्ते व उद्यानांमध्ये पाण्याचे फवारे उभारण्यात आले होते. बालगोपालांनी पिचकाऱ्यांमधून रंग उधळत सणाचा मनसोक्त आनंद लुटला. बाजारपेठेत रंग, पिचकाऱ्या आणि मुखवट्यांची खरेदी सोमवारीच तेजीत झाली होती.

दरम्यान, पांगुळ गल्लीतील श्री अश्वत्थामा मंदिर येथे होणारा पारंपरिक लोटांगण कार्यक्रम चंद्रग्रहणाच्या पार्श्वभूमीवर सकाळी लवकर पार पाडण्यात आला. शेकडो भाविकांनी भक्तिभावाने सहभाग घेतला. ग्रहणाच्या वेधकाळामुळे नागरिकांनी आवश्यक पथ्य पाळून सण साजरा केला.

होळी व रंगपंचमीदरम्यान कोणताही अनुचित प्रकार घडू नये यासाठी शहर पोलीस आयुक्त भूषण गुलाबराव बोरसे यांच्या मार्गदर्शनाखाली शहर व उपनगरांत कडेकोट बंदोबस्त ठेवण्यात आला होता. पोलिसांच्या सतर्कतेमुळे सण शांततेत पार पडला.

एकंदरीत, जल्लोष आणि शिस्त यांचा समतोल राखत बेळगावकरांनी रंगपंचमीचा आनंद लुटला.

The post ‘रेन डान्स’ आणि ‘रंगांची उधळण’ ; बेळगाव शहरात रंगपंचमी उत्साहात साजरी appeared first on News 24 Tass Marathi.

माहितीनुसार, सोमवार दि. २ मार्च २०२६ रोजी रात्री १० वाजता होळी आणणे व पळवण्याचा कार्यक्रम होणार आहे. त्यानंतर मंगळवारी पहाटे ५.३० वाजता होळी व होळी धनाची पूजा केली जाईल. चंद्रग्रहणाच्या पार्श्वभूमीवर सायंकाळी होणारे काही कार्यक्रम सकाळी घेण्याचा निर्णय घेण्यात आला आहे.

लोटांगणाचा कार्यक्रम श्री गणपती मंदिरापासून सुरू होऊन ठरलेल्या वेळेत पूर्ण केला जाईल. देवालयाची पूजा ग्रहण संपल्यानंतर सायंकाळी ७ वाजता करण्यात येईल. त्यानंतर श्रीफळ वाढविण्याचा कार्यक्रम होणार आहे.

दरम्यान, होळी उत्सवाच्या पार्श्वभूमीवर मार्केट पोलिस ठाण्यात पोलिस प्रशासनाने पंच कमिटी व युवक मंडळाच्या पदाधिकाऱ्यांची बैठक घेऊन आवश्यक मार्गदर्शन केले. बैठकीनंतर पंच कमिटीतर्फे सतीश परशराम अनगोळकर यांनी प्रसारमाध्यमांना माहिती देताना चंद्रग्रहणामुळे वेळेत बदल करण्यात आल्याचे स्पष्ट केले. सर्व भक्त व नागरिकांनी बदललेल्या वेळापत्रकाची नोंद घेऊन सहकार्य करावे, असे आवाहन आयोजकांनी केले आहे.

The post पांगुळ गल्लीत ग्रहणापूर्वी सकाळीच होणार पारंपारिक लोटांगण appeared first on News 24 Tass Marathi.

बेळगाव / प्रतिनिधी

होळी आणि रंगपंचमी उत्सवाच्या पार्श्वभूमीवर बेळगाव शहर पोलिसांनी कडक सतर्कतेचा इशारा दिला असून, नियमांचे उल्लंघन करणाऱ्यांवर कठोर कारवाई करण्यात येणार असल्याचे स्पष्ट करण्यात आले आहे. शहर पोलीस आयुक्त भूषण बोरसे यांनी पत्रकार परिषदेत ही माहिती दिली.

२ मार्च रोजी शहर हद्दीत ३२९ ठिकाणी होलिका दहन, तर ३ मार्च रोजी सुमारे १८० ठिकाणी रंगपंचमी साजरी होणार आहे. या पार्श्वभूमीवर सुरक्षेची व्यापक तयारी करण्यात आली असून, १००० हून अधिक पोलीस कर्मचारी, अग्निशमन दल, एसडीआरएफ आणि होमगार्ड तैनात करण्यात आले आहेत. शहरातील १९ मोक्याच्या ठिकाणी तपासणी नाके उभारण्यात आले असून, मद्यप्राशन करून वाहन चालवणाऱ्यांवर तसेच चाकूसारखी घातक शस्त्रे बाळगणाऱ्यांवर कठोर कायदेशीर कारवाई करण्यात येणार आहे.

सध्या सुरू असलेल्या पीयूसीसह विविध परीक्षा लक्षात घेता विद्यार्थ्यांना त्रास होऊ नये म्हणून लाऊडस्पीकरच्या वापरावर मर्यादा घालण्यात आली आहे. आवाजाची पातळी ७५ डेसिबलपेक्षा अधिक आढळल्यास संबंधित उपकरणे जप्त करण्यात येतील, असा इशाराही आयुक्तांनी दिला.

उत्सवावर लक्ष ठेवण्यासाठी शहरात ५०० हून अधिक सीसीटीव्ही कॅमेरे कार्यान्वित करण्यात आले असून, ८ ड्रोनद्वारे देखरेख ठेवली जाणार आहे. नागरिकांनी केवळ नैसर्गिक रंगांचा वापर करावा, कोणावरही जबरदस्तीने रंग लावू नये आणि वाहतूक कोंडी टाळण्यासाठी पोलिसांना सहकार्य करावे, असे आवाहन करण्यात आले आहे. पोलिस विभागाने नागरिकांच्या सहकार्याने शांततेत व शिस्तबद्ध पद्धतीने होळी साजरी करण्याचे आवाहन केले आहे.

The post बेळगावात होळी – रंगपंचमीच्या पार्श्वभूमीवर कडेकोट बंदोबस्त appeared first on News 24 Tass Marathi.

बेळगाव / प्रतिनिधी

सालाबादप्रमाणे चव्हाट गल्लीमध्ये होळी उत्सव यंदाही मोठ्या उत्साहात साजरा करण्यात येणार असून, कार्यक्रमाची सविस्तर रूपरेषा आयोजकांनी जाहीर केली आहे. चंद्रग्रहणाच्या पार्श्वभूमीवर यावर्षी वेळापत्रकात काही बदल करण्यात आले आहेत.

रविवार, दि. १ मार्च २०२६ रोजी रात्री १० वाजता रथ (गाडा) रंगविण्याचा कार्यक्रम होणार आहे. तसेच होळीसाठी लागणारे साहित्य काढून ते रथावर ठेवून रथ श्री चवाटा मंदिर येथे ठेवण्यात येणार आहे.

सोमवार, दि. २ मार्च रोजी होळी आणण्यासाठी चव्हाट गल्लीतील भक्त व बैलजोडीधारकांनी दुपारी ३ वाजता किल्ला परिसरात एकत्र जमावे, असे आवाहन करण्यात आले आहे. त्याच दिवशी मध्यरात्री १२ वाजता सर्वांनी श्री चवाटा मंदिराजवळ जमून होळी उभी करण्यात येणार आहे, जेणेकरून ग्रहणवेध सुरू होण्यापूर्वी अग्नी देणे शक्य होईल.

मंगळवार, दि. ३ मार्च रोजी सकाळी ९ ते १० या वेळेत होळी प्रज्वलित करण्यात येईल. त्यानंतर इच्छुक भक्तांना लोटांगण घालण्याची संधी मिळणार आहे. चंद्रग्रहणाचे वेध सकाळी ११.३० वाजता सुरू होणार असल्याने वेळेचे काटेकोर नियोजन करण्यात आले आहे.

सायंकाळी ८ वाजता गहाणा घालण्याचा कार्यक्रम होणार असून, त्यानंतर नवसाचा नारळ ठरविलेल्या जागेवरून अर्पण करण्यात येईल. अंधारात दर्शनासाठी येणाऱ्या भक्तांना कोणतीही इजा होऊ नये, यासाठी विशेष खबरदारी घेण्यात येणार असल्याचे आयोजकांनी स्पष्ट केले आहे.

श्री चवाटा हे चव्हाट गल्लीतील जागृत देवस्थान मानले जाते. उत्सव सुरळीत व शिस्तबद्ध पद्धतीने पार पाडण्यासाठी पंचमंडळी, श्री चव्हाटा युवक मंडळ तसेच समस्त युवक मंडळांनी नागरिकांना सहकार्याचे आवाहन केले आहे.

The post चव्हाट गल्लीतील होळी कार्यक्रमाची रूपरेषा जाहीर appeared first on News 24 Tass Marathi.

होळी – रंगपंचमी सणाच्या पार्श्वभूमीवर कायदा व सुव्यवस्था कायम राखण्यासाठी बेळगाव शहर पोलीस आयुक्तालय हद्दीत मद्यविक्रीवर तात्पुरती बंदी लागू करण्यात आली आहे.

अतिरिक्त जिल्हा दंडाधिकारी तथा पोलीस आयुक्त भूषण गुलाबराव बोरसे यांनी जारी केलेल्या आदेशानुसार सोमवार, २ मार्च रोजी दुपारी २ वाजल्यापासून मंगळवार, ३ मार्च २०२६ रोजी रात्री ११.५९ वाजेपर्यंत शहरातील सर्व दारू दुकाने, वाईन शॉप्स, बार, क्लब आणि हॉटेल्समध्ये मद्यविक्री व मद्यपान पूर्णतः बंद राहणार आहे.

सदर आदेशाचे काटेकोर पालन करण्याचे निर्देश देण्यात आले असून, उल्लंघन करणाऱ्यांविरुद्ध अबकारी कायद्यान्वये कठोर कारवाई करण्यात येईल, असा इशाराही आदेशात देण्यात आला आहे.

The post होळी सणाच्या पार्श्वभूमीवर बेळगाव शहरात २, ३ मार्चला मद्यविक्रीवर बंदी appeared first on News 24 Tass Marathi.