सुळगा (हिं.) : आषाढी वारीच्या निमित्ताने पंढरपूरकडे पायी निघालेल्या गोव्यातील उस्ते-सत्तरी, वाळपई येथील श्रीराम माऊली वारकरी मंडळाच्या दिंडीचे बुधवारी सुळगा (हिं.) येथे ग्रामस्थांनी उत्साहपूर्ण वातावरणात स्वागत केले. यावेळी वारकऱ्यांसाठी अल्पोपहाराची व्यवस्था करून, दिवंगत सामाजिक कार्यकर्ते शट्टूप्पा (बाळू) पाटील यांनी सुरू केलेली सेवाभावाची परंपरा त्यांच्या कुटुंबीयांनी यंदाही कायम ठेवली.

बेळगाव-वेंगुर्ला मार्गावरील हनुमान मंदिर परिसरात आयोजित स्वागत कार्यक्रमासाठी स्व. शट्टूप्पा पाटील यांचे सुपुत्र रोहन पाटील, समाजसेविका माधुरी जाधव आणि त्यांच्या सहकाऱ्यांनी पुढाकार घेतला. दिंडीचे स्वागत करून सर्व वारकऱ्यांना अल्पोपहाराचे वितरण करण्यात आले. पावसाने उघडीप दिल्यामुळे वारकऱ्यांनी मोकळ्या वातावरणात अल्पोपहाराचा आनंद घेतला.

यावेळी वारकरी विदेश माडकर यांनी श्रीराम माऊली वारकरी मंडळाच्या पायी वारीची माहिती देत सांगितले की, यंदाची ही मंडळाची पाचवी पायी वारी असून उस्ते येथून खांद्यावर पालखी घेऊन पंढरपूरपर्यंत पायी प्रवास करणे हे या दिंडीचे वैशिष्ट्य आहे. यंदाच्या वारीत १५३ वारकरी सहभागी झाले असून दररोज नामस्मरणावर विशेष भर दिला जातो. वारीचे प्रमुख बारकेलो राणे (बुवा), उपप्रमुख सर्वेश राणे, संचालक रामकृष्ण इब्रामपूरकर आणि सचिव मोहन वांतेकर यांच्या मार्गदर्शनाखाली वारीचे आयोजन करण्यात आले आहे. तसेच सुळगा ग्रामस्थांनी केलेल्या स्वागताबद्दल तसेच रोहन पाटील, माधुरी जाधव आणि सहकाऱ्यांनी केलेल्या सेवाभावी उपक्रमाबद्दल त्यांनी कृतज्ञता व्यक्त केली.

प्रास्ताविकात शेखर मनोहर पाटील यांनी स्व. शट्टूप्पा पाटील यांच्या सामाजिक कार्याचा आढावा घेतला. वारकऱ्यांची सेवा म्हणजेच ईश्वरसेवा या भावनेतून त्यांनी चार वर्षांपूर्वी या दिंडीच्या अल्पोपहाराची जबाबदारी स्वीकारली होती. त्यांच्या निधनानंतरही त्यांचा सुपुत्र रोहन पाटील, भगिनी माधुरी जाधव आणि सहकाऱ्यांनी ही सेवा अखंडपणे सुरू ठेवत त्यांच्या कार्याचा वारसा जपला असल्याचे त्यांनी सांगितले. तसेच दिंडीच्या पुढील प्रवासासाठी शुभेच्छाही दिल्या.

माधुरी जाधव यांनी मनोगतात स्व. शट्टूप्पा पाटील यांनी रुजविलेल्या सेवाभावाच्या संस्कारांना पुढे नेण्याचा निर्धार व्यक्त केला. वारकऱ्यांची सेवा हीच विठ्ठलाची सेवा मानून ही परंपरा भविष्यातही अविरत सुरू राहील, असे त्यांनी सांगितले. या उपक्रमासाठी सुळगा ग्रामस्थांसह भरत पाटील, वीर पाटील, राजश्री कदम, मनीषा देसाई आणि अन्य सहकाऱ्यांचे मोलाचे सहकार्य लाभत असल्याचे त्यांनी स्पष्ट केले. दिंडीचा उर्वरित प्रवास निर्विघ्न आणि मंगलमय व्हावा, अशी प्रार्थनाही त्यांनी व्यक्त केली.

श्रीराम सेना हिंदुस्थानचे ग्रामीण अध्यक्ष तथा सामाजिक कार्यकर्ते भरत पाटील यांनीही दिंडीच्या पुढील वाटचालीस शुभेच्छा देत वारकरी परंपरेतील सेवाभावाचे महत्त्व अधोरेखित केले.

दरवर्षीप्रमाणे केलेल्या स्वागत व अल्पोपहार व्यवस्थेबद्दल कृतज्ञता व्यक्त करत दिंडीच्या वतीने रोहन पाटील, माधुरी जाधव आणि त्यांच्या सहकाऱ्यांचा स्मृतिचिन्ह देऊन सन्मान करण्यात आला.

यावेळी निवृत्त पोलीस उपनिरीक्षक राजश्री कदम, वासंती पाटील, श्वेता खांडेकर, स्मिता पाटील, नेहा मोरे, वीर पाटील, भरत पाटील, साईनाथ पाटील, माजी सैनिक ऑन. कॅप्टन धनाजी मोरे, परशराम सांगावकर, मोन्नापा पाटील, शिवा पुजारी, दिलीप कोंडुसकोप, रमेश कुडचीकर, योगेश कुडचीकर, ओमकार पाटील, भरत कुडचीकर, गोपाळ कलखांबकर, बाबुराव कोकीतकर, प्रथमेश कोचेरी, नागेश निलजकर, शंकर अष्टेकर, पार्थ खांडेकर, रोहित चौगुले, सूरज चौगुले, रमेश कलखांबकर, खेमानी कलखांबकर, धनंजय मोहिते आदी उपस्थित होते.

The post सुळगा (हिं.) येथे उस्ते – सत्तरी गोवा येथील वारकरी दिंडीचे उत्साहात स्वागत appeared first on News 24 Tass Marathi.

खानापूर : गोव्यातील सत्तरी तालुक्यातील सुरल (सुर्ल) धबधब्यात बुडालेल्या बेळगावच्या २० वर्षीय तरुणाचा मृतदेह सोमवारी अखेर शोधून बाहेर काढण्यात आला. मुसळधार पाऊस, वेगवान पाण्याचा प्रवाह आणि दुर्गम परिसरामुळे बचावकार्याला मोठ्या अडचणींचा सामना करावा लागला. मात्र बेळगावच्या रेस्क्यू पथकाने स्थानिक यंत्रणांच्या मदतीने राबविलेल्या अथक शोधमोहीमेला अखेर यश मिळाले.

मृत तरुणाची ओळख आदित्य दीपककुमार सत्पती (वय २०) अशी झाली आहे. तो मित्रांसमवेत सहलीसाठी सुरल धबधब्यावर गेला होता. म्हादई अभयारण्य परिसरातील धबधब्यात पाण्यात उतरल्यावर खोली आणि पाण्याच्या वेगाचा अंदाज न आल्याने तो बुडाला. त्याच्या मित्रांनी त्याला वाचविण्याचा प्रयत्न केला, मात्र त्यांना यश आले नाही.

घटनेची माहिती मिळताच वाळपई पोलीस, म्हादई अभयारण्याचे कर्मचारी तसेच अग्निशमन दलाचे जवान घटनास्थळी दाखल झाले. रविवारी सायंकाळपर्यंत शोधमोहीम सुरू होती. मात्र मुसळधार पाऊस, वाढलेला पाण्याचा प्रवाह आणि प्रतिकूल परिस्थितीमुळे रात्री शोधकार्य स्थगित करण्यात आले.

सोमवारी सकाळी पुन्हा शोधमोहीम सुरू करण्यात आली. बेळगावचे सामाजिक कार्यकर्ते आणि रेस्क्यू पथकातील अवधूत तुडवेकर, पदमप्रसाद हुली, विक्की मेहता, शुभम हुली, मायकल पिंटो, रोशन तनावडे आणि आकाश यांनी स्थानिक यंत्रणांच्या सहकार्याने अथक प्रयत्न करत अखेर आदित्यचा मृतदेह बाहेर काढला. अनेक तास पाण्यात राहिल्यामुळे तसेच माशांमुळे मृतदेहाचा चेहरा विद्रूप झाल्याची माहिती मिळाली आहे.

पोलिसांनी घटनास्थळी पंचनामा करून आवश्यक कायदेशीर प्रक्रिया पूर्ण केली असून मृतदेह नातेवाईकांच्या ताब्यात देण्यात आला. या दुर्दैवी घटनेमुळे बेळगावसह परिसरात हळहळ व्यक्त होत आहे.

आदित्य हा मूळचा ओडिशा राज्यातील रहिवासी असून त्याचे कुटुंब सध्या बेळगावात वास्तव्यास आहे. त्याचे वडील दीपककुमार सत्पती हे भारतीय नौदलाचे निवृत्त अधिकारी आहेत. आदित्यच्या अकाली निधनाने कुटुंबीयांवर दुःखाचा डोंगर कोसळला असून मित्रपरिवारातही शोककळा पसरली आहे.

The post सुरल (सुर्ल) धबधब्यात बुडालेल्या बेळगावच्या तरुणाचा मृतदेह सापडला appeared first on News 24 Tass Marathi.

खानापूर : गोव्यातील सत्तरी तालुक्यातील ठाणे ग्रामपंचायत हद्दीतील सुरल (सुर्ल) येथील, खानापूर तालुक्याच्या सीमेलगत असलेल्या धबधब्यात बेळगावातील २० वर्षीय तरुण बुडाल्याची दुर्दैवी घटना रविवारी (दि. २८ जून) घडली. आदित्य दीपककुमार सत्पती (वय २०) असे मृत्यू झालेल्या तरुणाचे नाव असून तो मित्रांसमवेत सहलीसाठी गेला होता.

मिळालेल्या माहितीनुसार, म्हादई अभयारण्य परिसरातील धबधब्यावर फिरण्यासाठी गेलेल्या आदित्यला पाण्याच्या खोलीचा अंदाज न आल्याने तो पाण्यात बुडाला. त्याच्या मित्रांनी त्याला वाचविण्याचा प्रयत्न केला, मात्र त्यांना यश आले नाही.

घटनेची माहिती मिळताच वाळपई पोलिस, म्हादई अभयारण्याचे कर्मचारी तसेच अग्निशमन दलाचे जवान घटनास्थळी दाखल झाले. रविवारी सायंकाळपर्यंत धबधब्याच्या कोंडीत शोधमोहीम राबविण्यात आली. मात्र घाट परिसरात सुरू असलेल्या संततधार पावसामुळे आणि पाण्याच्या तीव्र प्रवाहामुळे शोधकार्यात वारंवार अडथळे निर्माण झाल्याने रात्री शोधमोहीम स्थगित करण्यात आली.

आज, सोमवार (दि. २९ जून) सकाळी पुन्हा शोधकार्य सुरू करण्यात आले असून बचाव पथके तरुणाचा शोध घेत आहेत. आदित्य हा मूळचा ओडिशा राज्यातील असून त्याचे कुटुंब सध्या बेळगावात वास्तव्यास आहे. त्याचे वडील दीपककुमार सत्पती हे निवृत्त नौदल अधिकारी आहेत. घटनेची माहिती मिळताच कुटुंबीयांनी घटनास्थळी धाव घेतली.

दरम्यान, पावसाळ्यात म्हादई अभयारण्य परिसरातील धबधब्यांवर बेळगाव, खानापूर आणि गोवा परिसरातील पर्यटकांची मोठी गर्दी होत आहे. वन विभागाने वारंवार इशारे देऊनही काही पर्यटक धोकादायक ठिकाणी प्रवेश करत असल्याचे निदर्शनास आले आहे. त्यामुळे अशा प्रकारे नियमांचे उल्लंघन करणाऱ्या पर्यटकांवर यापुढे कठोर कारवाई करण्यात येणार असल्याचे वन विभागाने स्पष्ट केले आहे.

The post सुरल धबधब्यात बेळगावातील तरुण बुडाला appeared first on News 24 Tass Marathi.

बेळगाव : गोव्यात प्रवेश करणाऱ्या बेळगावसह अन्य राज्यांतील वाहनचालकांना आकारण्यात येणाऱ्या अवाजवी वाहतूक दंडाबाबत अखेर दिलासादायक हालचाल सुरू झाली आहे. बेळगावचे माजी आमदार अनिल बेनके यांनी केलेल्या पाठपुराव्यानंतर गोव्याचे मुख्यमंत्री प्रमोद सावंत यांनी प्रथमच किरकोळ नियमभंग करणाऱ्यांसाठी दंड कमी करण्यासह ताकीद देणारी नवी व्यवस्था लागू करण्याचे आश्वासन दिले आहे.

अलीकडच्या काळात प्रदूषण नियंत्रण प्रमाणपत्र (पीयूसी) आणि इतर किरकोळ कारणांवरून गोव्यात प्रवेश करणाऱ्या वाहनांवर १० हजार रुपयांपर्यंत दंड आकारला जात असल्याने वाहनचालकांमध्ये तीव्र नाराजी निर्माण झाली होती. याबाबत सादर करण्यात आलेल्या निवेदनात सदोष ई-चलन प्रणाली, वाहतूक चिन्हांचा अभाव, पर्यटक वाहनांवरील वाढता दंड आणि सर्वसामान्यांवर होणारा आर्थिक बोजा याकडे सरकारचे लक्ष वेधण्यात आले होते.

या पार्श्वभूमीवर मुख्यमंत्री प्रमोद सावंत यांनी सकारात्मक भूमिका घेत, जीवघेण्या स्वरूपाचे नसलेल्या आणि प्रथमच झालेल्या नियमभंगाच्या प्रकरणांमध्ये मोठा दंड आकारण्याऐवजी इशारा देण्याची आणि दंडाची रक्कम कमी करण्याची नवी नियामक प्रणाली लवकरच लागू केली जाईल, असे आश्वासन दिले आहे. या निर्णयामुळे बेळगावसह गोव्यात नियमित ये-जा करणारे प्रवासी, पर्यटक आणि कामगार वर्गाला मोठा दिलासा मिळण्याची अपेक्षा व्यक्त केली जात आहे.

The post बेळगावकरांना दिलासा ; गोव्यातील अवाजवी वाहतूक दंड कमी होणार appeared first on News 24 Tass Marathi.

बेळगाव : गोव्याला निघालेल्या सुवर्ण कारागिरांचे अपहरण करून पिस्तूल आणि चाकूचा धाक दाखवत रोख रक्कम व सोने लुटणाऱ्या टोळीचा खानापूर पोलिसांनी पर्दाफाश केला असून या प्रकरणी आठ आरोपींना अटक करण्यात आली आहे. आरोपींकडून वाहने, शस्त्रे, रोकड आणि इतर साहित्यांसह ४०.५० लाख रुपयांचा मुद्देमाल जप्त करण्यात आला आहे.

पोलीस अधीक्षक के. रामराजन यांनी पत्रकार परिषदेत दिलेल्या माहितीनुसार, शहापूर येथे वास्तव्यास असलेले आणि मूळचे पश्चिम बंगालचे एस. के. इबादुल यांनी तक्रार दाखल केली होती. इबादुल हे त्यांचे सहकारी रबीयतल गाझी आणि अली हुसेन मंडल यांच्यासह कारने गोव्याकडे निघाले होते. खानापूर तालुक्यातील उचवडे गावाजवळील बैलूर क्रॉस परिसरात राष्ट्रीय महामार्ग ७४८ वर काही अज्ञातांनी त्यांची कार अडवली. त्यानंतर तिघांना जवळच्या शेतात नेऊन पिस्तूल व चाकूचा धाक दाखवत त्यांच्याकडील रोकड आणि सोन्याचे दागिने लुटण्यात आले.

दरोडेखोरांनी इबादुल यांच्याकडील १ लाख २०० रुपये रोख रक्कम तसेच रबीयतल गाझी यांच्याकडील सुमारे २२५ ग्रॅम सोने घेऊन पलायन केले होते. या घटनेचा तपास सुरू असताना पोलिसांसमोर धक्कादायक माहिती आली. तपासात तक्रारदारासोबत प्रवास करणारे रबीयतल गाझी आणि अली हुसेन मंडल यांनीच दरोड्याचा संपूर्ण कट आखल्याचे निष्पन्न झाले.

पोलिसांच्या माहितीनुसार, दोघांनी शहापूरमधील सादीक तोरगल याच्या मदतीने विवेक चंद्रकांत पाटील याला तीन लाख रुपयांची सुपारी दिली होती. त्यानंतर विवेक पाटीलने आपल्या साथीदारांच्या साहाय्याने हा दरोडा घडवून आणल्याचे तपासात स्पष्ट झाले.

या प्रकरणात रबीयतल रुहुल अमीन गाझी, अली हुसेन कविरुद्दीन मंडल, सादीक अब्दुल रहमान तोरगल, विवेक चंद्रकांत पाटील, प्रशांत महादेव चव्हाण, नितीन राजाराम चव्हाण, दिगंबर नागेश पाटील आणि मयूर राजू घाडी यांना अटक करण्यात आली आहे. हे सर्व आरोपी बेळगाव परिसरातील विविध भागांतील रहिवासी असल्याचे पोलिसांनी सांगितले.

अटक केलेल्या आरोपींकडून पोलिसांनी सुझुकी ब्रेझा, एर्टिगा व अन्य एक कार, १ लाख २०० रुपयांची रोकड, देशी बनावटीचे पिस्तूल, चाकू, आठ मोबाईल फोन, मोटारसायकल तसेच २०५ ग्रॅम वजनाचे बनावट सोन्याचे बिस्कीट असा एकूण ४० लाख ५० हजार २०० रुपयांचा मुद्देमाल जप्त केला आहे. सर्व आरोपींना न्यायालयात हजर करण्यात आले असून पुढील तपास सुरू असल्याचे पोलीस अधीक्षक के. रामराजन यांनी सांगितले.

The post गोव्याला जाणाऱ्या सुवर्ण कारागिरांचे अपहरण करून दरोडा appeared first on News 24 Tass Marathi.

खानापूर : प्रसिद्ध फिजिओथेरपिस्ट आणि काँग्रेसचे सक्रिय नेते डॉ. केतन भाटीकर यांचे सर्पदंशामुळे दुर्दैवी निधन झाले. या घटनेमुळे फोंडा आणि परिसरात शोककळा पसरली असून राजकीय तसेच सामाजिक क्षेत्रातून हळहळ व्यक्त केली जात आहे.

मिळालेल्या माहितीनुसार, डॉ. भाटीकर हे दिल्लीला जाण्याच्या तयारीत होते. मात्र त्यांनी प्रवास रद्द करून बेळगावला भेट दिली होती. त्यानंतर बेळगावहून फोंडा (गोवा) येथे परतत असताना अनमोड घाट परिसरात ते लघुशंकेसाठी थांबले. यावेळी त्यांच्या हातातील मोबाईल खाली पडला. मोबाईल उचलण्यासाठी त्यांनी झुडपात हात घातला असता विषारी सापाने त्यांच्या हाताला दंश केला.

घटनेनंतर वाहनचालकाने त्यांना तातडीने धारबांदोरा येथील प्राथमिक आरोग्य केंद्रात दाखल केले. मात्र वैद्यकीय तपासणीनंतर डॉक्टरांनी त्यांना मृत घोषित केले.

डॉ. भाटीकर हे गोव्यातील नामांकित फिजिओथेरपिस्ट म्हणून परिचित होते. त्यांनी अलीकडेच महाराष्ट्रवादी गोमंतक पक्ष सोडून भारतीय राष्ट्रीय काँग्रेस पक्षात प्रवेश केला होता.

भाजप नेते रवी नाईक यांच्या निधनानंतर रिक्त झालेल्या जागेसाठी होणाऱ्या पोटनिवडणुकीत काँग्रेसकडून त्यांची उमेदवारी निश्चित करण्यात आली होती. त्यांच्या विजयाबाबत राजकीय वर्तुळात सकारात्मक चर्चा सुरू असतानाच उच्च न्यायालयाच्या स्थगितीनंतर ती निवडणूक रद्द करण्यात आली होती.

डॉ. केतन भाटीकर यांच्या निधनामुळे काँग्रेस पक्षाने एक सक्रिय आणि लोकप्रिय नेतृत्व गमावल्याची भावना व्यक्त होत असून, विविध स्तरांतून त्यांना श्रद्धांजली वाहण्यात येत आहे. डॉ. भाटीकर यांच्या निधनाने काँग्रेस पक्षाने एक सक्रिय आणि लोकप्रिय नेता गमावला असून त्यांच्या अकाली जाण्यामुळे सर्वत्र शोक व्यक्त केला जात आहे.

The post प्रसिद्ध फिजिओथेरपिस्ट डॉ. केतन भाटीकर यांचे सर्पदंशाने निधन appeared first on News 24 Tass Marathi.

खानापूर : खानापूर-जांबोटी रस्त्यावरील सुरू असलेली कामे वेळेत पूर्ण व्हावीत यासाठी ३० एप्रिल ते ५ मे या कालावधीत सहा दिवस या मार्गावरील वाहतूक पूर्णतः बंद ठेवण्याचा आदेश जिल्हाधिकारी मोहम्मद रोशन यांनी दिला आहे.

या कालावधीत खानापूरहून येणारी वाहने पिरनवाडी, कुसमळी आणि जांबोटी या पर्यायी मार्गावर वळवण्यात येणार असल्याचे आदेशात स्पष्ट करण्यात आले आहे. नागरिकांनी या मार्गांचा वापर करून प्रशासनास सहकार्य करावे, असे आवाहन करण्यात आले आहे.

सदर रस्त्याचे रुंदीकरण आणि दुरुस्तीची कामे सुरू असून, रस्त्याच्या दोन्ही बाजूंना आवश्यक शोल्डर नसल्यामुळे वाहतूक सुरू असताना कामात अडथळे निर्माण होत होते. त्यामुळे कामे वेळेत पूर्ण व्हावीत यासाठी सहा दिवस वाहतूक बंद ठेवण्याची विनंती राष्ट्रीय महामार्ग उपविभागाच्या साहाय्यक कार्यकारी अभियंत्यांनी जिल्हाधिकाऱ्यांकडे केली होती.

त्यावर निर्णय घेत जिल्हाधिकाऱ्यांनी संबंधित कालावधीत वाहतूक बंद ठेवण्याचे निर्देश दिले आहेत. तसेच या आदेशाची काटेकोर अंमलबजावणी करण्यासाठी जिल्हा पोलीसप्रमुख आणि पोलीस आयुक्तांना चेकपोस्ट उभारण्याच्या सूचनाही देण्यात आल्या आहेत.

The post खानापूर-जांबोटी मार्ग आजपासून बंद appeared first on News 24 Tass Marathi.

जोयडा : बेळगाव – गोवा राष्ट्रीय महामार्गावरील अनमोड घाटात मंगळवारी सायंकाळी सुमारे सहा वाजता भीषण अपघात घडला. आरटीओ तपासणी नाक्याजवळ राजस्थान क्रमांकाच्या पिकअपने दुचाकीला मागून जोरदार धडक दिल्याने दुचाकीस्वार गंभीर जखमी झाला. धडकेची तीव्रता इतकी होती की पिकअप वाहन रस्त्यावर पलटी झाले, तर दुचाकी पूर्णपणे चुराड्यात बदलली.

या अपघातात कारलगा (ता. खानापूर) येथील संतोष पाटील (वय ३२) जखमी झाले आहेत. ते गोव्यातील मायक्रो लॅब कंपनीत कामावर जात असताना घाटातील तीव्र वळणावर हा प्रकार घडला. अपघातानंतर पिकअप चालकाने घटनास्थळावरून निघून जाण्याचा प्रयत्न केला; मात्र सतर्क नागरिकांनी त्याला पकडून पोलिसांच्या स्वाधीन केले. माहिती मिळताच रामनगर पोलीस घटनास्थळी दाखल झाले.

दरम्यान, रुग्णवाहिका सुमारे तासभर उशिराने पोहोचल्याने नागरिकांनी नाराजी व्यक्त केली. जखमी संतोष पाटील यांना प्रथम रामनगर रुग्णालयात दाखल करून पुढील उपचारासाठी बेळगावला हलविण्यात आले. अपघातामुळे काही काळ घाटातील वाहतूक ठप्प झाली होती. वाहतूक पोलिसांनी परिस्थिती नियंत्रणात आणत वाहनांची रांग सुरळीत केली. प्रकरणाचा पुढील तपास रामनगर पोलीस करत आहेत.

The post अनमोड घाटात भरधाव पिकअपची दुचाकीला धडक appeared first on News 24 Tass Marathi.

आधार शिक्षण संस्था संचालित बामणे इन्स्टिट्यूट ऑफ फार्मसी कॉलेजच्या विद्यार्थ्यांनी गोवा येथील डिसीआय फार्मा कंपनीला भेट दिली. या उपक्रमासाठी संस्थेचे प्राचार्य डॉ. सुहास पाटील यांच्या मार्गदर्शनाखाली आणि प्रा. उदय पाटील यांच्या नियोजनाखाली प्रा.दीपक हरदगट्टी आणि प्रा. सुशांत यांनी पुढाकार घेतला . तसेच ही फार्मा भेट यशस्वी करण्यासाठी प्रा. प्रीतम पाटील, प्रा.श्रद्धा पाटील, प्रा. सोनाली पोवार आणि समिना यांनी परिश्रम घेतले.

The post बामणे इन्स्टिट्यूट ऑफ फार्मसी कॉलेजची गोव्याच्या डिसीआय फार्मा कंपनीला भेट appeared first on News 24 Tass Marathi.

गोव्यातील फोंडा येथे दि. ४ जानेवारी २०२५ रोजी आयोजित करण्यात आलेल्या संकुकाई कप कराटे स्पर्धेत बेळगावच्या ए.व्ही. कराटे ॲकॅडमीच्या खेळाडूंनी उत्कृष्ट कामगिरी करत घवघवीत यश संपादन केले. प्रशिक्षक अमित वेसणे यांच्या मार्गदर्शनाखाली खेळाडूंनी काता व कुमिते प्रकारात अनेक पदकांची कमाई केली.

या स्पर्धेत अनन्या एन. मिठारे, श्रीनिवास आर. कुलकर्णी आणि साची व्ही. अथणीमठ यांनी काता प्रकारात तिसरे स्थान पटकावले. नीरजा व्ही. बडगी हिने काता प्रकारात दुसरे स्थान मिळवून ॲकॅडमीचे नाव उज्वल केले.

स्पर्धेतील सर्वोत्तम कामगिरी करणाऱ्या खेळाडूंमध्ये शौर्य एस. गोडसे याने काता प्रकारात पहिले तर कुमितेमध्ये दुसरे स्थान पटकावले. सृष्टी एस. जाधव हिने काता आणि कुमिते या दोन्ही प्रकारांत पहिले स्थान मिळवून दुहेरी सुवर्णपदकाची कमाई केली. तसेच ईशान ए. करगुप्पिकर यानेही काता व कुमिते या दोन्ही प्रकारांत प्रथम क्रमांक पटकावत शानदार यश मिळवले.

ए.व्ही.कराटे ॲकॅडमीच्या या यशाबद्दल खेळाडू, प्रशिक्षक अमित वेसणे तसेच पालकांचे सर्वत्र अभिनंदन होत असून, भविष्यातही खेळाडू राष्ट्रीय व आंतरराष्ट्रीय स्तरावर चमकदार कामगिरी करतील, असा विश्वास व्यक्त करण्यात येत आहे.

The post संकुकाई कपमध्ये ए.व्ही.कराटे ॲकॅडमीच्या खेळाडूंचे घवघवीत यश appeared first on News 24 Tass Marathi.