बेळगाव / प्रतिनिधी

बेळगाव जिल्ह्यात घरगुती गॅस सिलिंडर तसेच पेट्रोल-डिझेलचा कोणताही तुटवडा नसल्याची माहिती जिल्हाधिकारी मोहम्मद रोशन यांनी दिली आहे. नागरिकांनी अफवांवर विश्वास ठेवून घाबरून जाऊ नये, असे आवाहन त्यांनी केले.

मंगळवारी जिल्हाधिकारी कार्यालयात झालेल्या पत्रकार परिषदेत ते बोलत होते. शहरासह संपूर्ण जिल्ह्यात इंधनाचा पुरेसा साठा उपलब्ध असून, एखाद्या पेट्रोल पंपावरील साठा संपल्यास पाच तासांच्या आत पुनर्पुरवठा करण्याची व्यवस्था कार्यरत असल्याचे त्यांनी स्पष्ट केले. इंधन कंपन्या आणि पंप मालकांशी चर्चा करून कुठेही टंचाई नसल्याची खात्री करण्यात आली आहे. नागरिकांनी साठवणुकीसाठी गर्दी केल्यामुळेच संभ्रम निर्माण होत असल्याचेही त्यांनी नमूद केले. पंपांवर बाटल्या किंवा कॅनमध्ये इंधन देण्यास मनाई करण्यात आली असून, सोशल मीडियावर चुकीची माहिती पसरवणाऱ्यांवर कडक कारवाई केली जाईल, असा इशारा त्यांनी दिला.

यावेळी पोलीस आयुक्त भूषण गुलाबराव बोरसे यांनीही स्पष्ट केले की, पेट्रोल पंपांवर कॅन किंवा बाटल्यांमध्ये इंधन विक्रीस परवानगी दिली जाणार नाही. अवैध साठवणूक किंवा चढ्या दराने विक्री करणाऱ्यांवर पोलिसांकडून कडक कारवाई केली जाईल. कोणत्याही तक्रारीसाठी नागरिकांनी ‘११२’ या हेल्पलाइनवर संपर्क साधावा आणि शांतता राखावी, असे आवाहन त्यांनी केले.

या पत्रकार परिषदेला अन्न व नागरी पुरवठा विभागाचे उपसंचालक मल्लिकार्जुन तसेच हॉटेल मालक संघाचे अध्यक्ष अजय पै उपस्थित होते.

The post बेळगाव जिल्ह्यात इंधन आणि गॅसची टंचाई नाही appeared first on News 24 Tass Marathi.

बेळगाव / प्रतिनिधी

बेळगाव शहरात व्यावसायिक गॅस सिलिंडरच्या तुटवड्यामुळे शहरातील मेस आणि रेस्टॉरंट मालकांमध्ये चिंता निर्माण झाली आहे. गॅसच्या अभावामुळे लाकडी चुलीवर स्वयंपाक करण्यास भाग पडलेल्या मालकांना आता आर्थिक आणि वेळेच्या अडचणींचा सामना करावा लागत आहे.

गेल्या काही दिवसांपासून बेळगाव शहरात व्यावसायिक गॅस सिलिंडरचा पुरवठ्यात व्यत्यय निर्माण झाला आहे. यामुळे शहरातील प्रसिद्ध रेस्टॉरंट्स आणि स्टुडंट मेसना स्वयंपाक करताना मोठा ताण येत आहे. भडकल गल्लीतील दुर्गादेवी रेस्टॉरंटमध्ये सध्या लाकडी चुलीवर स्वयंपाक सुरू आहे. रोजच्या ग्राहकांची आणि विद्यार्थ्यांची भूक भागवण्यासाठी मालक लाकडाचा अवलंब करीत आहेत.

लाकडी चुलीच्या वापरामुळे रेस्टॉरंट मालकांवरील आर्थिक भार दुप्पट झाला आहे. सध्या एक किलो लाकडाची किंमत ९ रुपये असून, दिवसाला २५ किलोपेक्षा जास्त लाकूड लागते. यामुळे नफ्यापेक्षा खर्च जास्त होत असला तरी ग्राहकांच्या हितासाठी जेवणाच्या किमतीत बदल न करता जुन्या दरातच सेवा देत आहेत, असे मालकांनी सांगितले. मात्र, लाकडी चुलीवर गरमागरम पोळ्या बनवणे हे खूप आव्हानात्मक काम असल्याने पोळ्यांचे वाटप सध्या थांबवण्यात आले आहे.

गॅस पुरवठ्याच्या विलंबामुळे लहान हॉटेल्स आणि रेस्टॉरंट्स बंद होण्याच्या मार्गावर आहेत. व्यावसायिक सिलिंडर्सचा तुटवडा कायम राहिल्यास बाहेरच्या जेवणावर अवलंबून असलेल्या हजारो विद्यार्थ्यांना आणि कामगारांना अडचणींना सामोरे जावे लागेल.

या पार्श्वभूमीवर रेस्टॉरंट मालकांनी जिल्हा प्रशासन आणि संबंधित विभागाच्या अधिकाऱ्यांना तात्काळ हस्तक्षेप करून गॅस पुरवठा सुरळीत करण्याची मागणी केली आहे.

The post बेळगावमध्ये व्यावसायिक गॅसचा तुटवडा appeared first on News 24 Tass Marathi.