बेळगाव : सार्वजनिक शिक्षण खात्यातर्फे आयोजित आणि कॅन्टोन्मेंट बोर्ड उर्दू शाळेच्या वतीने घेण्यात आलेल्या कॅम्प विभागीय माध्यमिक आंतरशालेय मुला-मुलींच्या फुटबॉल स्पर्धेत सेंट झेवियर्स आणि सेंट पॉल्स हायस्कूल संघांनी विजेतेपद पटकावले.

मुलींच्या गटातील अंतिम सामन्यात सेंट झेवियर्स हायस्कूलने गतविजेत्या सेंट जोसेफ हायस्कूलवर चुरशीच्या लढतीत सडन डेथमध्ये ८-७ अशी मात करत विजेतेपद मिळविले. निर्धारित वेळेत सामना गोलशून्य बरोबरीत राहिल्यानंतर पेनल्टी शूटआउटचा आधार घेण्यात आला. त्यात दोन्ही संघांनी प्रत्येकी चार गोल करत ४-४ अशी बरोबरी साधली. त्यानंतर सडन डेथमध्ये सेंट झेवियर्सने ४-२ असा विजय मिळवत जेतेपदावर नाव कोरले.

कॅम्प येथील सेंट पॉल्सच्या मैदानावर झालेल्या या सामन्यात दोन्ही संघांनी सुरुवातीपासून आक्रमक खेळ केला. मध्यंतरापर्यंत एकही गोल झाला नाही. दुसऱ्या सत्रातही दोन्ही संघांच्या आघाडीच्या खेळाडूंनी गोल करण्यासाठी प्रयत्न केले, मात्र निर्धारित वेळेत गोल न झाल्याने सामना पेनल्टी शूटआउटपर्यंत रंगला.

मुलांच्या गटातील अंतिम सामन्यात सेंट पॉल्स हायस्कूलने सेंट झेवियर्स हायस्कूलवर २-० असा विजय मिळवत अजिंक्यपद पटकावले. सेंट पॉल्सकडून अब्दुल मतीन आणि नेवीन पत्की यांनी प्रत्येकी एक गोल नोंदवत संघाच्या विजयात मोलाची भूमिका बजावली.

स्पर्धेच्या बक्षीस वितरण समारंभात शहर पीईओ जे. बी. पटेल आणि मुख्याध्यापिका फरिदा बिस्ती यांच्या हस्ते विजेत्या व उपविजेत्या संघांना आकर्षक चषक आणि प्रशस्तीपत्र देऊन गौरविण्यात आले.

यावेळी कॅम्प विभाग शारीरिक क्रीडा संघटनेचे अध्यक्ष नागराज भगवंतन्नवर, प्रशांत देवदानम, अँथोनी डिसोजा, स्पर्धा सचिव साकीब बेपारी, प्रकाश बजंत्री, इम्रान बेपारी, रविशंकर मालशेट आणि मानस नायक आदी उपस्थित होते.

The post आंतरशालेय फुटबॉल स्पर्धेत सेंट झेवियर्स, सेंट पॉल्स हायस्कूलचे वर्चस्व appeared first on News 24 Tass Marathi.

बेळगाव : विद्याभारती कर्नाटक पुरस्कृत जिल्हास्तरीय फुटबॉल स्पर्धेत अणगोळ येथील सेंट मीरा इंग्लिश स्कूलने चारही गटांत विजेतेपद पटकावत ऐतिहासिक कामगिरी केली आहे. या दैदिप्यमान यशामुळे शाळेच्या सर्व संघांनी राज्यस्तरीय स्पर्धेसाठी पात्रता मिळवली आहे.

टिळकवाडी येथील लेले मैदानावर सेंट मीरा शाळेच्या वतीने आयोजित या स्पर्धेत प्राथमिक आणि हायस्कूल अशा मुला-मुलींच्या चारही गटांमध्ये सेंट मीरा संघांनी वर्चस्व गाजवले.

प्राथमिक मुलींच्या अंतिम सामन्यात सेंट मीरा संघाने भातकांडे शाळेचा पेनल्टी शूटआऊटमध्ये २-१ असा पराभव केला. प्राथमिक मुलांच्या गटातही सेंट मीरा संघाने विजेतेपदावर नाव कोरले.

हायस्कूल मुलांच्या अंतिम सामन्यात खानापूरच्या शांतिनिकेतन संघाचा २-० असा पराभव करत सेंट मीराने अजिंक्यपद पटकावले. तर हायस्कूल मुलींच्या गटात भातकांडे शाळेवर २-० अशी मात करत चौथे विजेतेपदही आपल्या नावावर केले.

The post विद्याभारती फुटबॉल स्पर्धेत सेंट मीरा हायस्कूलला चारही गटांत विजेतेपद appeared first on News 24 Tass Marathi.

सकाळी स्पर्धेच्या उद्घाटनाला प्रमुख पाहुणे म्हणून माजी उपमहापौर आनंद चव्हाण, विद्याभारती राज्याध्यक्ष परमेश्वर हेगडे, संत मीरा शाळेच्या उपमुख्याध्यापिका ऋतुजा जाधव, विद्याभारती शारीरिक शिक्षण प्रमुख चंद्रकांत पाटील, बापूसाहेब देसाई,जयसिंग धनाजी,हर्ष रेडेकर,ओमकार गावडे, मंजुळा,शिवकुमार सुतार, बसवंत पाटील या मान्यवरांच्या हस्ते श्रीफळ वाढवून मैदानाचे पूजन खेळाडूंची ओळख व फुटबॉल चेंडूला ठीक मारून विद्याभारती जिल्हास्तरीय फुटबॉल स्पर्धेचे उद्घाटन करण्यात आले.

याप्रसंगी पाहुण्यांनी खेळाडूंना जीवनात यशस्वी होण्यासाठी कठोर परिश्रम व क्रीडा शिक्षकांचे मार्गदर्शन आत्मसात केल्यास यश नक्की संपादन करता येते असे त्यांनी विद्यार्थ्यांना मार्गदर्शन पर भाषण केले, याप्रसंगी पंच मानस नायक, आदित्य सानी स्वयम काकतकर प्रणव देसाई श्रीकांत कांबळे स्वरूप हलगेकर आदी मान्यवर उपस्थित होते.

The post फुटबॉल स्पर्धेत संत मीरा, भातकांडे, शांतिनिकेतनचा अंतिम फेरीत प्रवेश appeared first on News 24 Tass Marathi.

बेळगाव : शहापूर येथील गाडेमार्ग परिसरातील होतकरू फुटबॉलपटू अवनीश अनिल माळवी याची बंगळुरू येथील सेंट अलॉयसिस स्कूलमध्ये संपूर्ण फुटबॉल प्रशिक्षण आणि शालेय शिक्षणासाठी निवड झाली आहे. त्याच्या या उल्लेखनीय यशामुळे क्रीडा क्षेत्रात आनंदाचे वातावरण असून विविध स्तरांतून त्याचे अभिनंदन करण्यात येत आहे.

अवनीश यापूर्वी बेळगावातील ओरिएंटल इंग्लिश मीडियम स्कूलमध्ये शिक्षण घेत होता. त्याच्या उत्कृष्ट फुटबॉल कौशल्याची दखल घेत टेक्निको बेळगाव ट्रायल्स क्लबच्या माध्यमातून विविध निवड चाचण्या घेण्यात आल्या. या चाचण्यांमध्ये त्याने प्रभावी कामगिरी करत गुणवत्ता सिद्ध केल्यानंतर त्याची सेंट अलॉयसिस स्कूलमध्ये नववीच्या वर्गासाठी निवड करण्यात आली.

या निवडीमुळे अवनीशला दर्जेदार शालेय शिक्षणासोबतच अनुभवी प्रशिक्षकांच्या मार्गदर्शनाखाली व्यावसायिक फुटबॉल प्रशिक्षण घेण्याची संधी मिळणार आहे. माध्यमिक तसेच पुढील महाविद्यालयीन शिक्षणही तो बंगळुरू येथेच पूर्ण करणार असून, फुटबॉल क्षेत्रात प्रगतीसाठी आवश्यक असलेल्या अत्याधुनिक सुविधा आणि प्रशिक्षण त्याला उपलब्ध होणार आहे.

सातत्यपूर्ण सराव, जिद्द आणि मेहनतीच्या बळावर अवनीशने हे यश मिळविले आहे. त्याच्या या प्रवासात फुटबॉल असोसिएशन, राज्यस्तरीय अधिकारी, प्रशिक्षक तसेच टेक्निको बेळगाव ट्रायल्स क्लब यांचे मोलाचे मार्गदर्शन आणि सहकार्य लाभल्याचे सांगण्यात आले.

अवनीशच्या या यशाबद्दल क्रीडाप्रेमी, प्रशिक्षक आणि नागरिकांकडून त्याच्यावर अभिनंदनाचा वर्षाव होत असून, भविष्यात तो राज्य आणि देशाचे फुटबॉल क्षेत्रात प्रतिनिधित्व करून बेळगावचे नाव उज्ज्वल करेल, असा विश्वास व्यक्त केला जात आहे.

The post बेळगावच्या अवनीश माळवीची बंगळुरूच्या सेंट अलॉयसिस स्कूलमध्ये निवड appeared first on News 24 Tass Marathi.