बेळगाव : शहरातील रामदेव हॉटेल आणि मुजावर कॉम्प्लेक्ससमोर रविवारी (दि. २८ जून) रात्री साडेदहाच्या सुमारास चालत्या कारला अचानक भीषण आग लागल्याने काही काळ परिसरात घबराट पसरली. अग्निशमन दल, पोलीस आणि स्थानिक सामाजिक कार्यकर्त्यांच्या तत्परतेमुळे आगीवर वेळीच नियंत्रण मिळवण्यात यश आले. सुदैवाने या घटनेत कोणतीही जीवितहानी झाली नाही.

मिळालेल्या माहितीनुसार, कारच्या इंजिनमधून दाट धूर येत असल्याचे चालकाच्या लक्षात आल्यानंतर त्याने वाहन रस्त्याच्या कडेला थांबवून बोनेट उघडले. मात्र, त्याचवेळी कारने अचानक पेट घेतला. चालकाने तत्काळ वाहनाबाहेर पडून आग विझवण्याचा प्रयत्न केला; परंतु आगीची तीव्रता वाढत गेल्याने अग्निशमन दल आणि पोलीस विभागाला तातडीने पाचारण करण्यात आले.

घटनेची माहिती मिळताच सामाजिक कार्यकर्ते अवधूत तुडवेकर, पद्मप्रसाद हुली, विक मेहता, डॉ. जगदीश गस्ती, शुभम हुली, शशिकांत आंबेवाडीकर आणि मतीन मकानदार यांनी घटनास्थळी धाव घेत मदतकार्य सुरू केले. त्यानंतर पोलीस व अग्निशमन दलाच्या जवानांनी समन्वयाने कार्य करत आगीवर नियंत्रण मिळवले.

या आगीत कार पूर्णपणे जळून खाक झाली. मात्र, चालक वेळेत बाहेर पडल्यामुळे कोणतीही जीवितहानी किंवा दुखापत झाली नाही. सामाजिक कार्यकर्ते, पोलीस आणि अग्निशमन दलाने दाखवलेल्या तत्परतेचे व धाडसाचे स्थानिक नागरिकांनी कौतुक केले.

The post रामदेव हॉटेलजवळ चालत्या कारला भीषण आग appeared first on News 24 Tass Marathi.

चिक्कोडी : शहरातील गुरुवार पेठ परिसरातील एका कपड्यांच्या दुकानाला अचानक आग लागल्याने मोठे आर्थिक नुकसान झाले आहे. या दुर्घटनेत दुकानातील कपडे आणि इतर साहित्य जळून खाक झाले असून, सुदैवाने कोणतीही जीवितहानी झालेली नाही.

मिळालेल्या माहितीनुसार, गुरुवार पेठ रस्त्यावरील ‘जयश्री गारमेंट्स’ या दुकानात नेहमीप्रमाणे व्यवहार सुरू असताना अचानक आग लागली. सुरुवातीला किरकोळ वाटणारी आग काही क्षणांतच भडकली आणि संपूर्ण दुकानात धुराचे लोट पसरल्याने परिसरात घबराटीचे वातावरण निर्माण झाले.

आग लागल्याचे लक्षात येताच दुकानातील कामगारांनी प्रसंगावधान राखत तातडीने बाहेर पडण्याचा निर्णय घेतला. त्यामुळे सर्व कर्मचारी सुरक्षित बाहेर येऊ शकले आणि मोठी दुर्घटना टळली.

घटनेची माहिती मिळताच अग्निशामक दलाचे जवान तातडीने घटनास्थळी दाखल झाले. दुकानातून मोठ्या प्रमाणात धूर निघत असल्याने आणि आगीने रौद्ररूप धारण केल्याने आग विझवण्यासाठी जवानांना मोठी कसरत करावी लागली. सुमारे तासाभराच्या प्रयत्नांनंतर आग पूर्णपणे नियंत्रणात आणण्यात त्यांना यश आले.

या आगीत दुकानातील लाखो रुपयांचा माल जळून गेल्याचा प्राथमिक अंदाज व्यक्त करण्यात येत आहे. दरम्यान, ही घटना चिक्कोडी पोलीस ठाण्याच्या हद्दीत घडली असून पोलिसांनी घटनास्थळी भेट देऊन पंचनामा केला आहे. आग लागण्यामागील नेमके कारण अद्याप स्पष्ट झाले नसून, याप्रकरणी अधिक तपास सुरू आहे.

The post चिक्कोडीतील कपड्यांच्या दुकानाला आग appeared first on News 24 Tass Marathi.

बेळगाव : शहरातील क्लब रोडवरील नामांकित ईफा हॉटेलमध्ये आज सकाळी अचानक आग लागल्याने परिसरात काही काळ तणावाचे वातावरण निर्माण झाले. शॉर्ट सर्किटमुळे ही आग लागल्याचा प्राथमिक संशय व्यक्त केला जात आहे.

कॅम्प पोलीस स्थानकाच्या हद्दीत घडलेल्या या घटनेत हॉटेलमधून दाट धूर निघत असल्याचे लक्षात येताच सतर्क कर्मचाऱ्यांनी तातडीने ग्राहकांना सुरक्षितपणे बाहेर काढले. त्यामुळे संभाव्य मोठी जीवितहानी टळली.

घटनेची माहिती मिळताच अग्निशमन दलाचे जवान घटनास्थळी दाखल झाले असून आग नियंत्रणात आणण्यासाठी शर्थीचे प्रयत्न सुरू आहेत. दरम्यान, या घटनेचा व्हिडिओ चित्रित करणाऱ्या काही नागरिकांशी हॉटेल कर्मचाऱ्यांचा वाद झाल्याने काही काळ गोंधळाचे वातावरण निर्माण झाले. सध्या परिस्थिती नियंत्रणात आणण्याचे प्रयत्न सुरू असून, आग लागण्याचे नेमके कारण शोधण्यासाठी संबंधित यंत्रणांकडून तपास सुरू आहे.

The post बेळगावातील नामांकित हॉटेलला अचानक आग appeared first on News 24 Tass Marathi.

बेळगाव जिल्ह्यातील गोकाक शहरात शॉर्ट सर्किटमुळे एका घराला अचानक आग लागल्याची घटना घडली. या घटनेत गंगाधर गुडगुडी गंभीररित्या जखमी झाले, परंतु अग्निशमन दलाच्या तात्काळ बचावकार्यामुळे जीवितहानी टळली.

शहरातील लँडमार्कजवळील एका घरात ही घटना घडली. घरात अचानक विद्युत शॉर्ट सर्किट होऊन आग घरभर पसरली. मात्र ज्वाळांमध्ये सापडलेल्या गंगाधर यांची अग्निशमन दलाने तत्काळ सुटका केली.

जखमी गंगाधर यांना स्थानिक रुग्णालयात दाखल केले असून त्यांच्यावर उपचार सुरू आहेत. गोकाक शहर पोलिसांनी घटनास्थळी भेट देऊन प्राथमिक तपास केला आहे. अग्निशमन दलाच्या तत्परतेमुळे आग शेजारच्या घरांपर्यंत पसरण्यापासून रोखली गेली. या प्रकरणाची नोंद गोकाक शहर पोलीस स्थानकात करण्यात आली आहे.

The post गोकाक शहरात शॉर्ट सर्किटमुळे घराला आग ; एक जखमी appeared first on News 24 Tass Marathi.

चलवेनहट्टी : येथील गुड्डादेवी मंदिर परिसरात मध्यरात्रीच्या सुमारास एका शेतकऱ्याच्या झोपडीला लागलेल्या आगीत मोठे नुकसान झाले. शेतकरी चंद्रकांत आलगोंडी यांच्या शेतातील ही झोपडी अज्ञात व्यक्तींनी पेटवून दिल्याचा संशय व्यक्त करण्यात येत आहे. शेतीची अवजारे व इतर साहित्य साठवण्यासाठी वापरल्या जाणाऱ्या या झोपडीसह आत ठेवलेले सर्व साहित्य आगीत पूर्णतः जळून खाक झाले.

झोपडीला लागलेल्या आगीने परिसरातील काजू बागांनाही मोठा फटका बसला. आगीच्या लपटांमुळे शेजारील शेतकऱ्यांच्या काजूच्या झाडांचे मोठ्या प्रमाणात नुकसान झाले असून अनेक लहान रोपेदेखील जळून नष्ट झाली आहेत. त्यामुळे संबंधित शेतकऱ्यांचे आर्थिक नुकसान मोठ्या प्रमाणात झाल्याचे सांगितले जात आहे. या घटनेमुळे परिसरातील शेतकऱ्यांमध्ये भीतीचे वातावरण निर्माण झाले आहे.

दरम्यान, गुड्डादेवी मंदिर परिसरात बाहेरगावाहून येणाऱ्या काही युवकांकडून वारंवार पार्ट्या आयोजित केल्या जात असल्याचे ग्रामस्थांचे म्हणणे आहे. यावेळी मद्यपान, भांडणे, तसेच सिगारेटचे थोटके बेदरकारपणे टाकल्यामुळे अशा प्रकारच्या आगी लागण्याच्या घटना घडत असल्याचा आरोप करण्यात येत आहे. या पार्श्वभूमीवर पोलिसांनी या भागात नियमित गस्त वाढवून अशा प्रकारांना आळा घालावा, अशी मागणी चलवेनहट्टी, अगसगे, अतिवाड व बेकीनकेरी येथील ग्रामस्थांनी केली आहे.

The post चलवेनहट्टीत झोपडीला आग appeared first on News 24 Tass Marathi.

कटक : ओडिशा राज्यातील कटक येथे असलेल्या एससीबी मेडिकल कॉलेज आणि हॉस्पिटलला मध्यरात्री भीषण आग लागून १० रुग्णांचा होरपळून मृत्यू झाल्याची दुर्दैवी घटना घडली. सोमवारी मध्यरात्रीच्या सुमारास आयसीयू विभागात आग लागल्याने रुग्णालयात काही काळ गोंधळाचे वातावरण निर्माण झाले. या दुर्घटनेत पाच रुग्ण गंभीर जखमी झाले असून त्यांच्यावर रुग्णालयाच्या दुसऱ्या इमारतीत उपचार सुरू आहेत.

प्रत्यक्षदर्शींच्या माहितीनुसार, रात्री अडीच ते तीन वाजण्याच्या सुमारास आयसीयू विभागातून धूर आणि ज्वाळा बाहेर येऊ लागल्याने कर्मचारी व रुग्णांमध्ये घबराट पसरली. व्हेंटिलेटरवर उपचार घेत असलेल्या काही रुग्णांचा धूर गुदमरल्याने मृत्यू झाल्याची प्राथमिक माहिती आहे. घटनेची माहिती मिळताच अग्निशमन दलाने घटनास्थळी धाव घेत आग नियंत्रणात आणली. प्राथमिक तपासात शॉर्ट सर्किटमुळे आग लागली असावी, असा अंदाज व्यक्त केला जात आहे.

दरम्यान, घटनेची माहिती मिळताच राज्याचे मुख्यमंत्री मुख्यमंत्री मोहन चरण मांझी यांनी रुग्णालयाला भेट देऊन परिस्थितीचा आढावा घेतला. या दुर्घटनेबद्दल त्यांनी तीव्र दुःख व्यक्त करत न्यायालयीन चौकशीचे आदेश दिले आहेत. मृतांच्या कुटुंबीयांना मुख्यमंत्री सहाय्यता निधीतून प्रत्येकी २५ लाख रुपयांची मदत जाहीर करण्यात आली असून जखमी रुग्णांना सर्वोत्तम वैद्यकीय उपचार देण्याचे निर्देश आरोग्य विभागाला देण्यात आले आहेत.

The post कटकमधील एससीबी मेडिकल कॉलेज हॉस्पिटलला भीषण आग ; १० रुग्णांचा मृत्यू appeared first on News 24 Tass Marathi.

बेळगाव / प्रतिनिधी

भारत-वेस्टइंडिज क्रिकेट सामन्यात भारताच्या विजयाचा आनंद साजरा करताना फटाक्यांच्या आतषबाजीत एका तरुण कार्यकर्त्याचा डोळा निकामी झाल्याची दुर्दैवी घटना भारतनगर परिसरात घडली. गंभीर जखमी झालेल्या या तरुणावर सध्या खासगी रुग्णालयात उपचार सुरू असून दुसरा डोळा वाचवण्यासाठी आणखी शस्त्रक्रियेची आवश्यकता असल्याने त्याच्या मदतीसाठी परिसरातील कार्यकर्ते पुढाकार घेत आहेत.

शिवा नारायण लोहार (वय ३२, रा. नवी गल्ली, शहापूर) असे जखमी कार्यकर्त्याचे नाव आहे. नवी गल्लीचा रहिवासी असला तरी गेल्या चार-पाच वर्षांपासून भारतनगरमधील विविध सामाजिक उपक्रमांमध्ये तो सक्रियपणे सहभागी होत असल्याने परिसरात त्याची ओळख आहे. रविवार दि. १ मार्च रोजी रात्री भारत-वेस्टइंडिज क्रिकेट सामना पाहिल्यानंतर विजयाचा आनंद साजरा करताना काही जणांनी फटाक्यांची आतषबाजी केली. याचवेळी झालेल्या अपघातात शिवाच्या डोळ्याला गंभीर दुखापत झाली.

जखमी अवस्थेत त्याला तातडीने खासगी रुग्णालयात दाखल करण्यात आले. त्याच्यावर तातडीची शस्त्रक्रिया करण्यात आली असली तरी त्याचा उजवा डोळा निकामी झाल्याचे डॉक्टरांनी सांगितले आहे. डावा डोळा वाचवण्यासाठी आणखी एक शस्त्रक्रिया करावी लागणार असून त्यासाठी मोठ्या खर्चाची गरज असल्याचे समजते.

भारतनगरचा लंबोदर श्री सार्वजनिक गणेशोत्सव मंडळाचा शिवा हा कार्यकर्ता आहे. त्याच्या या संकटाच्या वेळी परिसरातील कार्यकर्ते व नागरिक मदतीसाठी पुढे सरसावले आहेत. लहान कौलारू घरात तो आपल्या वृद्ध आईसोबत राहतो. दोन बहिणींचे लग्न झाले असून त्या आपापल्या सासरी आहेत. आईचा उदरनिर्वाह चालवण्यासाठी शिवा दिवसभर चिकन दुकानात काम करतो, तर कधी रिक्षा चालवून कुटुंबाला हातभार लावतो.

आता त्याचा किमान एक डोळा तरी वाचवण्यासाठी उपचारासाठी आर्थिक मदतीची गरज असल्याने नागरिकांनी सहकार्य करावे, असे आवाहन परिसरातील कार्यकर्त्यांकडून करण्यात आले आहे.

The post फटाक्यांच्या आतषबाजीत कार्यकर्त्याने डोळा गमावला appeared first on News 24 Tass Marathi.

बेळगाव / प्रतिनिधी

बेळगावजवळील काकती गावात महामार्गालगत असलेल्या एका दुचाकी गॅरेजला अचानक भीषण आग लागून सुमारे ६ ते ७ लाख रुपयांचे नुकसान झाल्याची घटना घडली. या घटनेमुळे परिसरात खळबळ उडाली असून, वाढत्या काकती गावासाठी स्वतंत्र अग्निशमन केंद्र नसल्यानेच मोठे नुकसान झाल्याचा संताप नागरिकांतून व्यक्त होत आहे.

याबाबत घटनास्थळावरून प्राप्त माहितीनुसार, काकती गावात महामार्गालगत असलेल्या विक्रम आनंदाचे यांच्या दुचाकी गॅरेजला अचानक आग लागली.  विक्रम यांनी कर्ज काढून हे गॅरेज सुरू केले होते आणि त्यांच्या कुटुंबाचा उदरनिर्वाह त्यावरच अवलंबून होता. अचानक लागलेल्या आगीत गॅरेजमधील साहित्य व वाहनांचे मोठ्या प्रमाणात नुकसान झाले.

आगीची माहिती मिळताच सामाजिक कार्यकर्ते गजानन गव्हाणे यांनी तत्काळ अग्निशमन दलाशी संपर्क साधला. घटनास्थळी दाखल झालेल्या अग्निशमन दलाच्या जवानांनी प्रयत्नपूर्वक आग आटोक्यात आणली. या प्रकरणी काकती पोलिस ठाण्यात गुन्हा नोंद करण्यात आला आहे.

दरम्यान, काकती गावात यावर्षी आगीची ही तिसरी घटना असून ग्रामस्थांमध्ये भीतीचे वातावरण निर्माण झाले आहे. औद्योगिक क्षेत्रे व पंचतारांकित हॉटेल्समुळे गावाची झपाट्याने वाढ होत असताना आपत्कालीन सुविधांची कमतरता प्रकर्षाने जाणवत आहे. शहरातून अग्निशमन दल पोहोचेपर्यंत मोठे नुकसान होते, त्यामुळे काकतीमध्ये तातडीने स्वतंत्र अग्निशमन केंद्र स्थापन करावे, तसेच पीडित कुटुंबाला शासनाकडून योग्य भरपाई द्यावी, अशी मागणी नागरिकांकडून करण्यात येत आहे.

The post काकती येथे भीषण आगीत दुचाकी गॅरेज जळून खाक appeared first on News 24 Tass Marathi.

खानापूर / प्रतिनिधी

खानापूर तालुक्यातील जळगा येथील शेतातील ऊस पिकाला सोमवारी दुपारी १२.३० च्या सुमारास ट्रान्स्फॉर्मरमध्ये शॉर्टसर्किट झाल्याने उडालेल्या ठिणगीमुळे आग लागली.काही वेळातच आगीने रौद्ररूप घेतल्याने आसपासच्या उसालाही आग लागल्याने आगीचा भडका मोठ्या प्रमाणात होता. आग लागल्याचे दिसून येताच जळगा ग्रामस्थांनी शेताकडे धाव घेऊन आग विझविण्यासाठी प्रयत्न केले. खानापूर अग्निशमन दलाचा बंब आणि जवान घटनास्थळी दाखल झाले. मात्र उन्हाळी पिकासाठी जमीन भिजविण्यात आल्याने आगीच्या ठिकाणी अग्निशमन दलाचा बंब पोहोचण्यास अडचणी निर्माण झाल्याने आग आटोक्यात आणण्यात अपयश आले. त्यामुळे आसपासचा जवळपास १२०० टन ऊस आगीत भस्मसात झाला. त्यामुळे शेतकऱ्यांचे, अंदाजे ४० लाखाचे आर्थिक नुकसान झाले आहे.

सोमवारी दुपारी १२ च्या सुमारास जळगा येथील लाड बंधूच्या शेतात असलेल्या ट्रॉन्स्फॉर्मरमध्ये शॉर्टसर्किट होऊन आगीच्या ठिणग्या उसाच्या पिकात पडल्याने उसाने पेट घेतला. पाहता पाहता आग मोठ्या प्रमाणात पसरली. आग लागल्याचे शेतात काम करणाऱ्या शेतकऱ्यांना निदर्शनासं आल्याबरोबर आग विझविण्यासाठी प्रयत्न सुरु झाले. मात्र सलग लागून असलेल्या शेतामुळे आणि भर उन्हात वारा असल्याने लागून असलेल्या उसालाही पाहता पाहता आग लागली.

यात नारायण गुरव, परशराम लाड, सुनिल लाड, नामदेव लाड, विठ्ठल लाड, मारुती लाड, सुनिता लाड, भरमाणी लाड, दत्तात्रय गुरव, परशराम गुरव, परशराम शिवाजी गुरव, मारुती पाटील, बाबू गुरव, बाजीराव पाटील, निंगाप्पा पाटील, चंद्रकांत पाटील, नारायण पाटील, मालोजी पाटील, राजाराम पाटील, बबन गुरव, व्यंकाप्पा पाटील, अर्जुन पाटील, नागेश गुरव, महेश पाटील, विठ्ठल पाटील यासह इतर शेतकऱ्यांच्याही उसाला आग लागली. त्यामुळे जवळपास १२०० टन ऊस जळून खाक झाला. उसाला आग लागल्याचे समजताच खानापूर अग्निशमन दलाला माहिती देण्यात आली. अग्निशमन दलाचे जवान बंब घेऊन घटनास्थळी हजर झाले. मात्र उन्हाळी मिरची आणि इतर पिकासाठी जमीन ओली करण्यात आल्याने आग विझविण्यासाठी अडचणीचा सामना करावा लागला. तोपर्यंत आगीने रौद्ररुप धारण केले होते. आगीचे आणि धुराचे लोळ यामुळे आग विझविण्यास पराकाष्ठा करावी लागत होती.

The post जळगा येथे उसाच्या फडाला भीषण आग appeared first on News 24 Tass Marathi.

चित्रदुर्ग / वार्ताहर

चित्रदुर्ग जिल्ह्यातील हिरियूर तालुक्यात गोरलत्तू क्रॉसजवळ खाजगी स्लीपर कोच बस आणि ट्रक यांच्यात भीषण धडक होऊन बसला अचानक आग लागली. या आगीत किमान १७ प्रवाशांचा होरपळून मृत्यू झाला असून मृतांचा आकडा वाढण्याची भीती व्यक्त करण्यात येत आहे.

ट्रकने जोरदार धडक दिल्यानंतर बसने पेट घेतला. अपघाताची तीव्रता इतकी होती की बसमधील अनेक प्रवाशांना बाहेर पडण्याची संधीच मिळाली नाही. आगीमुळे संपूर्ण बस जळून खाक झाली.

अपघाताची माहिती मिळताच पोलिस, अग्निशमन दल आणि स्थानिक नागरिकांनी घटनास्थळी धाव घेतली. गंभीर जखमी प्रवाशांना तातडीने जवळच्या रुग्णालयात दाखल करण्यात आले आहे. या दुर्घटनेने परिसरात हळहळ व्यक्त केली जात असून प्रशासनाकडून बचाव व मदतकार्य सुरू आहे.

The post चित्रदुर्ग महामार्गावर अपघातात खाजगी बसला भीषण आग appeared first on News 24 Tass Marathi.