प्रा. स्वरूपा इनामदार या शब्दगंध कवी मंडळ संघाच्या ज्येष्ठ सदस्या असून सरस्वती वाचनालयाच्या अध्यक्षा म्हणूनही त्या साहित्य, वाचनसंस्कृती आणि सामाजिक उपक्रमांमध्ये सक्रिय कार्यरत आहेत. त्यांच्या कवितांमध्ये मानवी भावना, सामाजिक भान, स्त्रीजीवन, नातेसंबंध आणि जीवनमूल्यांचे प्रभावी चित्रण आढळते. त्यांच्या निवडक कवितांचे अभिवाचन या कार्यक्रमात होणार असून रसिकांना त्यांच्या काव्यविश्वाचा जवळून परिचय करून घेण्याची संधी मिळणार आहे.

काव्यवाचनानंतर उपस्थित कवींसाठी खुल्या व्यासपीठावरील कवी संमेलन आयोजित करण्यात आले आहे. या संमेलनात स्थानिक कवींना आपल्या स्वरचित कविता सादर करण्याची संधी उपलब्ध करून देण्यात येणार आहे. त्यामुळे हा कार्यक्रम केवळ काव्यश्रवणापुरता मर्यादित न राहता नवोदित आणि प्रस्थापित कवींमधील साहित्यिक संवादाचे व्यासपीठ ठरणार आहे.

शब्दगंध कवी मंडळ संघाचे अध्यक्ष प्रा. अशोक आलगोंडी व सचिव श्री. सुधाकर गावडे यांनी सर्व साहित्यप्रेमी, कवी, विद्यार्थी, वाचक आणि रसिक नागरिकांनी या साहित्यिक मेळाव्यास मोठ्या संख्येने उपस्थित राहून कार्यक्रमाची शोभा वाढवावी, असे आवाहन केले आहे.

The post कवयित्री प्रा. स्वरूपा इनामदार यांचे काव्यवाचन शनिवारी appeared first on News 24 Tass Marathi.

मुंबई : भारतीय संगीतविश्वातील मधुर आणि सुरेल आवाज म्हणून ओळखल्या जाणाऱ्या ज्येष्ठ पार्श्वगायिका सुमन कल्याणपूर यांचे वयाच्या ८९व्या वर्षी निधन झाले. त्यांच्या निधनाने हिंदी आणि मराठी संगीत क्षेत्रातील एका सुवर्णयुगाचा अंत झाल्याची भावना व्यक्त होत असून संपूर्ण कलाविश्वावर शोककळा पसरली आहे.

१९५४ मध्ये पार्श्वगायिका म्हणून कारकिर्दीला सुरुवात करणाऱ्या सुमन कल्याणपूर यांनी ६० आणि ७० च्या दशकात आपल्या अवीट गोड आवाजाने रसिकांच्या मनावर अधिराज्य गाजवले. मोहम्मद रफी, मुकेश, किशोर कुमार आणि मन्ना डे यांच्यासोबत त्यांनी अनेक अजरामर गीते गायली. ‘आजकल तेरे मेरे प्यार के चर्चे’ आणि ‘ना तुम हमें जानो’ यांसारखी त्यांची गाणी आजही तितकीच लोकप्रिय आहेत.

हिंदी चित्रपटसृष्टीसोबतच मराठी भावसंगीतातही त्यांनी स्वतःची वेगळी ओळख निर्माण केली. ‘शब्द शब्द जपून ठेव’, ‘केतकीच्या वनी येथे’, ‘पाखरा जा रे दूर देशी’, ‘मृदुल करांनी छेडित तारा’ यांसारख्या भावगीतांनी मराठी रसिकांच्या हृदयात कायमचे स्थान मिळवले.

गानसम्राज्ञी लता मंगेशकर यांच्या आवाजाशी साधर्म्य असूनही सुमन कल्याणपूर यांनी आपल्या स्वतंत्र शैलीत आणि वैशिष्ट्यपूर्ण गायकीतून भारतीय संगीतविश्वात वेगळे स्थान निर्माण केले. मराठी, हिंदीसह विविध भारतीय भाषांमध्ये त्यांनी शेकडो गाणी गायली.

भारतीय संगीत क्षेत्रातील उल्लेखनीय योगदानाबद्दल केंद्र सरकारने त्यांना पद्मभूषण पुरस्काराने सन्मानित केले होते. तसेच महाराष्ट्र शासनाचा लता मंगेशकर पुरस्कार आणि गदिमा पुरस्कारही त्यांना प्राप्त झाला होता. सुमन कल्याणपूर यांच्या निधनाने भारतीय संगीत क्षेत्रातील एक सुश्राव्य, अजरामर आणि भावस्पर्शी अध्याय कायमचा हरपला आहे.

The post भावगीतांची सम्राज्ञी हरपली ; ज्येष्ठ पार्श्वगायिका सुमन कल्याणपूर यांचे निधन appeared first on News 24 Tass Marathi.

बेळगाव : सुप्रसिद्ध गायिका सौ. संगीता बांदेकर – कुलकर्णी यांनी आशा भोसले यांची अजरामर गाणी सुमधुर आवाजात सादर करुन रविवारची (२४ मे) सायंकाळ सुरिली केली. त्यांच्या प्रत्येक गाण्याला रसिक श्रोत्यांनी टाळ्यांचा गजर करुन दाद दिली.

येथील विवेकानंद मल्टीपर्पज सौहार्द को-ऑप सोसायटी, मराठी भाषाप्रेमी मंड‌ळ व कलाप्रेमी निवृत्त प्राध्यापक दत्ता नाडगौडा यांनी हा कार्यक्रम प्रायोजित केला होता. प्रारंभी ज्येष्ठ स्वातंत्र्यसेनानी विठ्ठलराव याळगी, विवेकानंदचे चेअरमन कुमार पाटील, व्हाईस चेअरमन प्रा. दत्ता नाडगौडा, संचालक अविनाश कुलकर्णी, संचालिका निता कुलकर्णी, सेक्रेटरी पद्मा बाडकर, मराठी भाषाप्रेमी मंडळाचे कार्याध्यक्ष नितीन कपिलेश्वरकर, बृहन्महाराष्ट्र मंडळाचे कर्नाटक राज्य विभागीय कार्याध्यक्ष परशराम माळी, गायिका संगीता बांदेकर, ध्वनी व प्रकाश योजना संयोजक गुरु पेडणेकर, विलास पेडणेकर यांच्या हस्ते दीपप्रज्वलन झाले . त्यानंतर प्रा. दत्ता नाडगौडा यांच्याहस्ते विठ्ठलराव याळगी यांचा तसेच गायिका संगीता बांदेकर व त्यांच्या साथीदारांचा विविध मान्यवरांच्या हस्ते पुष्पगुच्छ देऊन सत्कार करण्यात आला.

जय शारदे वाघेश्वरी या गाण्याने संगीता बांदेकर यांनी मैफिलीची सुरुवात केली. यानंतर सादर केलेल्या प्रत्येक गाण्याने हा कार्यक्रम उत्तरोत्तर रंगत गेला. आशा भोसले यांनी गायलेली एकापेक्षा एक सरस हिंदी, मराठी गाणी सादर करुन त्यांनी रसिकांना मंत्रमुग्ध केले.

प्रारंभी मागे उभा मंगेश, युवती मना दारुण मन, का रे दुरावा, धुंदी कळ्यांना, जीवलगा कधी रे येशील तू, रेशमाच्या धाग्यानी, जांभूळ पिकल्या झाडाखाली, गोमू संगतीने माझ्या तू येशील का, चंद्र आहे साक्षीला ही मराठी गाणी सादर केली. त्यानंतर ये रातें ये मौसम नदीका किनारा (दिल्ली का ठग), ऑंखोके मस्तीके (उमराव जान), जाइये आप कहां जायेंगे (मेरे सनम), ऑंखोसे जो उतरी है दिल में (फिर वही दिलं लाया हूॅं), मांग के साथ तुम्हारा (नया दौरा), दिवाना हुआ बादल (काश्मीर की कली), साथी रे भूल न जाना (कोतवालसाब), मेरा कुछ सामान आपके पास पडा है (इजाजत), पिया तू अब तू आ जा (कारवाॅं), दम मारो दम (हरे राम हरे कृष्ण) ही विविध प्रकारची हिंदी गाणी गायली. देव आनंदच्या हम दोनो चित्रपटातील अभी न जावो छोडकर दिल अभी भरा नही या साहील लुधियानवींच्या गाण्याने कार्यक्रमाची सांगता केली. नितीन देसाई (सहायक गायक), सुनिल गुरव ( की बोर्ड), गणेश साळोखे ( गिटार), उद्धव जाधव (बेस गिटार), स्नेहल जाधव (आक्टोपॅड), भार्गव कांबळे (ढोलक व कांगो), अनिकेत सासणे (तबला), अर्चना नलवडे व कल्याणी चौगुला (कोरस) यांनी साथसंगत केली. निता कुलकर्णी यांनी कार्यक्रमाचे खुमासदार निवेदन केले. कुमार पाटील यांनी आभार मानले. लोकमान्य रंगमंदिर रसिक श्रोत्यांनी तुडुंब भरले होते.

The post संगीत आशा कार्यक्रमाने रसिक श्रोते मंत्रमुग्ध appeared first on News 24 Tass Marathi.

बेळगाव : समाजात वाढत चाललेली धार्मिक, भाषिक आणि सामाजिक फूट लक्षात घेता साहित्यिकांनी निडरपणे वास्तव मांडत जनजागृतीचे कार्य अधिक प्रभावीपणे करणे आवश्यक असल्याचे प्रतिपादन ज्येष्ठ साहित्यिक डॉ. यशवंत पाटणे यांनी केले. मातृभाषा ही समाजाच्या संस्कृतीशी आणि अस्मितेशी घट्ट जोडलेली असल्याचेही त्यांनी स्पष्ट केले.

अखिल भारतीय मराठी साहित्य परिषद, बेळगाव जिल्हा शाखा आणि मराठा मंदिर यांच्या वतीने आयोजित सातव्या अखिल भारतीय बेळगाव मराठी साहित्य संमेलनात अध्यक्षीय भाषण करताना ते बोलत होते. खानापूर रोडवरील छत्रपती शिवाजी महाराज संमेलन नगरी येथे उत्साहात हा साहित्य सोहळा पार पडला.

“मातृभाषेतून घेतलेले शिक्षण माणसाला संस्कृतीची जाणीव करून देते. इतर भाषा व्यावसायिक प्रगतीसाठी महत्त्वाच्या असल्या, तरी संवेदनशील साहित्यिक, कवी आणि कलाकार घडवण्यासाठी मातृभाषेचे संस्कार अत्यावश्यक असतात,” असे डॉ. पाटणे यांनी सांगितले. सध्याच्या मूल्यहरण झालेल्या राजकारणाबरोबरच वाढत्या भोगवादी प्रवृत्ती आणि समाजात पसरत असलेल्या द्वेषपूर्ण वातावरणाबद्दल त्यांनी चिंता व्यक्त केली. शेतकरी, कामगार आणि सामान्य नागरिकांच्या समस्यांकडे साहित्यिकांनी अधिक संवेदनशीलतेने पाहण्याची गरज त्यांनी अधोरेखित केली.

ग्रंथपूजन आणि ग्रंथदिंडीने संमेलनाची सुरुवात झाली. यानंतर विविध मान्यवरांच्या हस्ते छत्रपती शिवाजी महाराज संमेलन नगरी, कै. अजितदादा पवार सभागृह, कविवर्य नारायण सुर्वे ग्रंथदालन आणि पॉलिहाइड्रॉन व्यासपीठाचे उद्घाटन करण्यात आले. संत ज्ञानेश्वर, धर्मवीर छत्रपती संभाजी महाराज, स्वामी विवेकानंद, कुसुमाग्रज आणि संत तुकाराम यांच्या प्रतिमांचे पूजनही करण्यात आले.

संमेलनाचे उद्घाटन उद्योजक आणि मराठा मंदिरचे अध्यक्ष अप्पासाहेब गुरव यांच्या हस्ते झाले. स्वागताध्यक्ष संजय गुरव यांनी उपस्थितांचे स्वागत केले, तर एल. पी. पाटील यांनी प्रास्ताविक मांडले. यावेळी सीमाकवी रवींद्र पाटील, ॲड. सुधीर चव्हाण, महादेव चौगुले, डी. बी. पाटील आणि रणजीत चौगुले यांच्यासह अनेक मान्यवर उपस्थित होते.

दुसऱ्या सत्रात “छत्रपती शिवराय : आजच्या काळाची गरज” या विषयावर शिवव्याख्याते यशवंत गोसावी यांनी मार्गदर्शन केले. तिसऱ्या सत्रात लोककवी प्रशांत मोरे यांच्या “काळजातल्या कविता” या काव्यमैफलीला रसिकांचा भरभरून प्रतिसाद मिळाला.

कार्यक्रमाचे सूत्रसंचालन डी. बी. पाटील आणि स्मिता किल्लेकर यांनी केले. बेळगाव शहरासह जिल्ह्यातील विविध भागांतून साहित्यप्रेमी, कवी आणि लेखक मोठ्या संख्येने सहभागी झाले होते.

The post समाजात जागृतीसाठी साहित्यिकांनी सक्रिय भूमिका घ्यावी appeared first on News 24 Tass Marathi.

बेळगाव : शब्दगंध कवी मंडळ संघ, बेळगाव आणि राज्य मराठी विकास संस्था, मुंबई यांच्या संयुक्त विद्यमाने आयोजित “कवी समजून घेताना” या उपक्रमात कवी परशराम खेमणे यांनी “जगण्याचे पान” या शीर्षकाखाली आपले सहावे पुष्प गुंफत काव्यप्रेमींना समृद्ध अनुभव दिला. या कार्यक्रमात त्यांच्या कवितेची वैशिष्ट्ये, शैली आणि जीवनदृष्टी यांचा वेध घेत कवी म्हणून त्यांना विविध अंगांनी समजून घेण्याचा प्रयत्न करण्यात आला.

प्रास्ताविक व स्वागत करताना शब्दगंध कवी मंडळाचे अध्यक्ष प्रा. अशोक आलगोंडी यांनी संस्थेच्या उपक्रमांची माहिती देत कवी आणि रसिक यांच्यातील नात्याचे महत्त्व अधोरेखित केले. त्यानंतर कवी परशराम खेमणे यांनी आपल्या काव्यप्रवासाविषयी मनोगत व्यक्त करताना सांगितले की, कविता ही केवळ शब्दांची मांडणी नसून ती स्वतःशी साधलेला आत्मसंवाद आहे. कॉलेज जीवनापासून सुरू झालेला त्यांचा हा प्रवास सुरुवातीला छंद म्हणून होता; मात्र शब्दगंध कवी मंडळाच्या सहवासात त्याला दिशा मिळाली.

“कविता म्हणजे भावनांचे चित्र डोळ्यासमोर उभे करणे आणि शब्दांशी खेळ करत अंतर्मन व्यक्त करणे होय,” असे सांगताना त्यांनी कवितेचा उगम अनुभव, वाचन आणि जगण्यातील सूक्ष्म जाणिवांमधून होत असल्याचे स्पष्ट केले. “प्रत्येकाच्या मनात कविता दडलेली असते; मात्र ती व्यक्त करण्याचे कौशल्य महत्त्वाचे आहे,” असेही ते म्हणाले.

त्यांच्या सादरीकरणातील कवितांमधून सामाजिक वास्तव, बदलते जीवनमान आणि मानवी संवेदनांचा सूक्ष्म वेध दिसून आला. त्यांच्या एका कवितेतील ओळी –

“मनाचे ओझे घेतात कागद,
शब्दांना हाका देतात कागद;
सुगंध जात नाही घामाचा तो,
चांदण्यास साद देतात कागद.”

या ओळींमधून कवीने कागद आणि शब्द यांचे भावविश्व जिवंत केले. तर पावसावरील कवितेतून शहर आणि ग्रामीण जीवनातील विरोधाभास अधोरेखित करताना ते म्हणतात

“शहरातील लोकांना नकोच असतो पाऊस,
पण पाऊस खुळाच असतो,
नको तिथे पडतो, पाहिजे तिथे पडत नाही.”

यातून आधुनिक जीवनातील कृत्रिमता आणि निसर्गाशी असलेले तुटलेले नाते उलगडते. तसेच बदलत्या गावजीवनावर भाष्य करताना त्यांच्या ओळी—

“हरेक जण मोबाईलमध्ये डोके खुपसून बसलेला,
आपल्या मधील संवाद हरपला नजरेदेखत…”

या आजच्या वास्तवाचे बोलके चित्र रेखाटतात. एकूणच, “जगण्याचे पान” या कार्यक्रमातून काव्य हे जीवनाशी जोडलेले माध्यम असल्याची जाणीव अधिक दृढ झाली. कवी परशराम खेमणे यांच्या विचारांमधून कविता ही केवळ अभिव्यक्ती नसून ती समाजमनाचा आरसा असल्याचे पुन्हा एकदा अधोरेखित झाले.

पहिल्या सत्रात आयोजित कवी संमेलनात विविध कवींनी आपल्या कवितांद्वारे कार्यक्रमात रंग भरला. स्मिता किल्लेकर, नेहा जोशी, अस्मिता आळतेकर, सीमा कनबरकर, स्नेहल बर्डे, डॉ. प्रेमा मेणशी, शितल पाटील, चंद्रशेखर गायकवाड, जोतिबा नागवडेकर, महादेव खोत, गुरुनाथ किरमटे, सुधाकर गावडे, बसवंत शहापूरकर, कृष्णा पारवाडकर, प्रा. निलेश शिंदे आणि प्रा. अशोक आलगोंडी या कवींच्या कवितांना रसिकांनी उत्स्फूर्त दाद दिली.

शब्दगंध कवी मंडळ संघाचे उपाध्यक्ष बसवंत शहापूरकर यांनी आभार मानले.

The post “जगण्याचे पान” उलगडताना कवी परशराम खेमणे यांचे मनोगत appeared first on News 24 Tass Marathi.

बेळगाव : शहरातील सांस्कृतिक वातावरण समृद्ध करणाऱ्या दहाव्या ‘हसत-खेळत संगीत शिबिरा’ची सांगता मंगळवार (दि. २१) रोजी टिळकवाडी येथील जीजी चिटणीस इंग्लिश मीडियम स्कूल येथे करण्यात आली. अंतिम कार्यक्रमात विद्यार्थ्यांनी सादर केलेल्या सुरेल गायन व सांगीतिक सादरीकरणांनी उपस्थितांची मने जिंकली.

या शिबिरात विविध वयोगटांतील विद्यार्थ्यांनी सहभाग घेत संगीताची प्राथमिक तत्त्वे आत्मसात केली. गायन, ताल-लय, स्वरांची ओळख आणि सादरीकरण कौशल्य यांचे प्रशिक्षण अनुभवी तज्ज्ञांच्या मार्गदर्शनाखाली देण्यात आले. यासोबतच विद्यार्थ्यांमध्ये आत्मविश्वास वाढवणे, मंचावरील भीती दूर करणे आणि समूहात काम करण्याची सवय रुजवण्यावरही भर देण्यात आला.

सांगता समारंभात समूहगायनासह विविध सांगीतिक कार्यक्रमांची मेजवानी रंगली. काही विद्यार्थ्यांनी स्वतंत्र सादरीकरण करत आपली खास कला सादर केली. शिबिराच्या यशस्वी आयोजनाचा आढावा घेत मार्गदर्शकांनी आपले मनोगत व्यक्त केले. संयोजिका चंद्रज्योती देसाई यांच्या मार्गदर्शनाखाली २१ दिवस चाललेल्या या शिबिराला विद्यार्थ्यांचा उत्स्फूर्त प्रतिसाद लाभला.

The post हसत-खेळत संगीत शिबिराची सांगता appeared first on News 24 Tass Marathi.

या कार्यक्रमाचे आणखी एक वैशिष्ट्य म्हणजे उपस्थित कवींचे कवी संमेलनही आयोजित करण्यात आले असून, विविध कवी आपल्या सर्जनशील अभिव्यक्तीने कार्यक्रमाला समृद्ध करणार आहेत.

सदर कार्यक्रम शनिवार, दि. २५ एप्रिल २०२६ रोजी सायंकाळी ५.०० वाजता मराठी विद्यानिकेतन, कॅम्प, बेळगाव येथे होणार आहे. साहित्यप्रेमी, कवी व रसिकांनी मोठ्या संख्येने उपस्थित राहून या काव्यमय सोहळ्याची शोभा वाढवावी, असे आवाहन आयोजकांतर्फे करण्यात आले आहे.

या कार्यक्रमाचे अध्यक्ष प्रा. अशोक आलगोंडी आहेत. आयोजकांनी सर्व साहित्यप्रेमींना सहकुटुंब उपस्थित राहण्याचे आवाहन केले आहे.

The post कवी परशराम खेमणे उद्या गुंफणार कवी समजून घेतानाचे सहावे पुष्प appeared first on News 24 Tass Marathi.

मुंबई : भारतीय संगीत क्षेत्रातील ‘सूरसम्राज्ञी’ ज्येष्ठ गायिका आशा भोसले यांनी आज मुंबईतल्या ब्रीच कँडी रुग्णालयात अखेरचा श्वास घेतला. वयाच्या ९२ व्या वर्षी त्यांची प्राणज्योत मालवली. आशा भोसले यांच्या छातीत संसर्ग झाल्याने त्यांना शनिवारी रात्री उशिरा ब्रीच कँडी रुग्णालयात दाखल करण्यात आले होते. आज आशा भोसले यांचे पुत्र आनंद भोसले यांनी त्यांच्या निधनाची माहिती दिली. उद्या सकाळी ११ ते २ या वेळेत लोअर परळ या ठिकाणी त्यांचे पार्थिव अंत्यदर्शनासाठी ठेवण्यात येणार आहे. दुपारी ४ वाजता शिवाजी पार्क या ठिकाणी त्यांच्या पार्थिवावर अंत्यसंस्कार करण्यात येणार असल्याचेही आनंद भोसले यांनी सांगितले.

• आशाताईंची कारकीर्द :

आशा भोसले, भारतीय चित्रपटसृष्टीतील सर्वात बहुगुणी आणि दिग्गज पार्श्वगायिकांपैकी एक. त्यांनी आपल्या कारकिर्दीत हजारो गाणी गायली असून हिंदीसह मराठी, बंगाली, गुजराती, पंजाबी, तमिळ, तेलुगू अशा अनेक भाषांमध्ये आपला आवाज दिला आहे. १९५० च्या दशकात त्यांनी कारकीर्दीची सुरुवात केली आणि हळूहळू आपल्या वेगळ्या शैलीमुळे त्यांनी स्वतःचे खास स्थान निर्माण केले. ओ. पी. नाय्यर, आर. डी. बर्मन यांच्यासोबतची त्यांची जोडी विशेष गाजली.

त्यांनी क्लासिकलपासून कॅबरे, पॉप, गझल आणि रोमँटिक गाण्यांपर्यंत त्यांनी प्रत्येक प्रकारात आपली छाप पाडली. ‘पिया तू अब तो आजा’, ‘दम मारो दम’, ‘इन आंखों की मस्ती’ यांसारखी त्यांची गाणी आजही तितकीच लोकप्रिय आहेत. आपल्या कारकीर्दीत त्यांनी अनेक राष्ट्रीय पुरस्कार आणि पद्मविभूषण सारखे सन्मान मिळवले आहेत. त्यांच्या आवाजाची जादू आणि संगीत क्षेत्रातील योगदानामुळे त्या भारतीय संगीतविश्वातील एक अजरामर व्यक्तिमत्त्व म्हणून ओळखल्या जातात.

सांगली या ठिकाणी आशा भोसले यांचा जन्म झाला होता. वयाच्या १० व्या वर्षापासून त्यांनी गायनाला सुरुवात केली होती. गिनिज बुकात सर्वाधिक गाणी गाणारी गायिका अशी त्यांची नोंद झाली आहे. आपल्या वेगळ्या आवाजाची भुरळ सगळ्या जगाला पडली होती. त्या जरी आपल्याला सोडून गेल्या असल्या तरीही त्यांचे गाणे कायमच आपल्या सोबत राहणार आहे. तो आवाज कायमच आपल्याला साथ देईल यात शंका नाही.

The post संगीत विश्वातील ‘अविस्मरणीय’ युगाचा अंत appeared first on News 24 Tass Marathi.

दरम्यान, त्यांच्या नात जनाई भोसले हिने सोशल मीडियावर पोस्ट करत आजीला अशक्तपणा आणि छातीचा संसर्ग (चेस्ट इन्फेक्शन) झाल्यामुळे रुग्णालयात दाखल करावे लागल्याचे स्पष्ट केले आहे. तसेच चाहत्यांनी आणि माध्यमांनी अफवांवर विश्वास ठेवू नये, असे आवाहनही तिने केले आहे.

आशा भोसले यांच्या प्रकृतीबाबत बातमी समोर आल्यानंतर विविध तर्कवितर्क सुरू झाले होते. मात्र कुटुंबीयांनी दिलेल्या माहितीनुसार सध्या उपचार सुरू असून प्रकृतीत सुधारणा होईल, अशी अपेक्षा व्यक्त करण्यात आली आहे.

The post ज्येष्ठ गायिका आशा भोसले रुग्णालयात दाखल appeared first on News 24 Tass Marathi.

जागतिक रंगभूमी दिनाच्या दिवशी, म्हणजे दि. २७ मार्च रोजी, वरेरकर नाट्यसंघातर्फे मुलांचे आठ दिवसांचे नाट्य प्रशिक्षण शिबीर सुरू झाले होते. त्याची सांगता ४ एप्रिल रोजी या कार्यक्रमाद्वारे करण्यात आली. प्रसिद्ध नाट्यकर्मी नीता कुलकर्णी यांच्या मार्गदर्शनाखाली मुले शिकलेल्या नाट्यकौशल्याचे सादरीकरण शिबिरार्थींनी केले.

सध्या सुरु असलेल्या अमेरिका-इराण युद्धावर चपखल भाष्य करणारी “आम्हाला शांतपणे जगु द्या” ही नाटिका सादर करत मुलांनी प्रेक्षकांची दाद मिळवली. त्यानंतर त्यांनी साहित्यातील नवरसांचे प्रात्यक्षिकाद्वारे प्रेक्षकांना दर्शन घडवले. या कार्यक्रमात नाट्यकर्मी नीता कुलकर्णींचा यथोचित सत्कार करण्यात आला.

यावेळी ज्येष्ठ नाट्यकर्मी आसावरी भोकरे यांनी “नाटकाची कुळकथा” सांगत पाश्चात्य रंगभूमी, भारतीय पारंपरिक नाट्यकला व नाट्यशास्त्राबाबत थोडक्यात माहिती दिली.

यानंतर चिन्मय शेंडे (लखोबा लोखंडे – नाटक : तो मी नव्हेच), श्रेया सव्वाशेरी (मंजुळा – ती फुलराणी), जगदीश कुंटे (पंपुशेट – कवडी चुंबक), प्रिया काळे (संभाजी – रायगडला जेव्हा जाग येते), आणि आसावरी भोकरे (छत्रपती शिवाजी – रायगडला जेव्हा जाग येते) यांनी विविध नाट्याविष्कार सादर करून उपस्थितांची दाद मिळवली.

स्वागत व प्रास्ताविक जगदीश कुंटे यांनी केले, सुत्रसंचालन विद्या देशपांडे यांनी केले, तर आभार आरती आपटेनी मानले. सुट्टीतील या उपक्रमाचा आनंद उपस्थितांनी भरभरून घेतला आणि आयोजकांचे कौतुक केले.

The post शांतपणे जगु द्या नाटिकेद्वारे मुलांनी मने जिंकली appeared first on News 24 Tass Marathi.