बागलकोट जिल्ह्यात पोटनिवडणुकीच्या पार्श्वभूमीवर आचारसंहिता लागू असून, दोन वेगवेगळ्या कारवायांमध्ये निवडणू अधिकाऱ्यांनी ३ लाख १५ हजार रुपयांची विनापरवाना रोकड जप्त केली आहे.

जिल्ह्यात ठिकठिकाणी चेकपोस्ट उभारून अवैध पैशांच्या व्यवहारांवर कडक नजर ठेवली जात आहे. पहिली कारवाई बदामी तालुक्यातील कुळगेरी क्रॉस चेकपोस्टवर करण्यात आली. येथे तपासणी दरम्यान चन्नबसप्पा सज्जन नावाच्या व्यक्तीकडे २ लाख ५० हजार रुपयांची रोकड सापडली. या मोठ्या रकमेबाबत कोणतीही अधिकृत कागदपत्रे सादर न केल्यामुळे अधिकाऱ्यांनी ही रक्कम जप्त केली.

दुसऱ्या कारवाईत, बीळगी आणि कोलार दरम्यानच्या चेकपोस्टवर एका महिंद्रा एसयुव्ही (SUV) कारची झडती घेण्यात आली. यावेळी डॉ. रामकृष्ण इंडी यांच्याकडे ६५ हजार रुपये आढळून आले. या रकमेचाही कोणताही ठोस पुरावा नसल्याने निवडणूक विभागाने ही रक्कम ताब्यात घेतली आहे. निवडणूक नियमांनुसार ५० हजार रुपयांपेक्षा जास्त रक्कम सोबत ठेवण्यासाठी वैध कागदपत्रे असणे अनिवार्य आहे. पोटनिवडणुकीच्या रणधुमाळीत पैशांचा गैरवापर रोखण्यासाठी जिल्हा प्रशासनाने आणि पोलिसांनी सुरक्षा व्यवस्था अधिक कडक केली आहे.

The post बागलकोट पोटनिवडणुकीच्या पार्श्वभूमीवर चेकपोस्टवरून ३.१५ लाखांची रोकड जप्त appeared first on News 24 Tass Marathi.

बेळगाव / प्रतिनिधी

भारतीय निवडणूक आयोगाच्या मार्गदर्शनानुसार मतदार यादी सुधारण्यासाठी एसआयआर (SIR) प्रक्रिया बेळगावमध्ये सुरू झाली आहे. बेळगाव दक्षिण मतदारसंघाचे नोडल अधिकारी डॉ. सिद्दू हुल्लोळी यांनी नागरिकांना आपली नावे बीएलओ (BLO) ॲपमध्ये नोंदविण्याचे आवाहन केले आहे.

डॉ. हुल्लोळी यांनी पत्रकार परिषदेत सांगितले की, फक्त भारतीय नागरिकच मतदान करू शकतील याची खात्री करण्यासाठी दर २० वर्षांनी एसआयआर सर्वेक्षण केले जाते. यामध्ये प्रत्येक मतदाराने आपापल्या भागातील बीएलओंशी संपर्क साधून नावे नकाशावर नोंदवणे अनिवार्य आहे. विशेषतः जे मतदार २००२ नंतर यादीत सामील झाले आहेत, त्यांना या प्रक्रियेत सक्रिय सहभाग घेणे आवश्यक आहे.

ही प्रक्रिया येत्या महिन्यात अधिकृतपणे सुरू होण्याची शक्यता आहे. मतदारांनी आपल्याकडील मतदान केंद्रावरील अधिकाऱ्यांकडे जाऊन बीएलओ ॲपद्वारे आपले ‘मॅप’, ‘प्रोजेनी’ आणि ‘सेल्स प्रोजेनी’ तपशील अद्ययावत करावेत. २००२ पूर्वीपासून यादीत असलेले मतदार, ज्यांनी एसआयआर प्रक्रिया पूर्ण केली आहे, ते थेट मॅपिंग करू शकतात. डॉ. हुल्लोळी यांनी नागरिकांना सांगितले की, ही तांत्रिक प्रक्रिया व्यवस्थित पूर्ण करून आपला मतदानाचा हक्क सुरक्षित करावा.

The post मतदार यादी सुधारणा प्रक्रियेला सुरुवात appeared first on News 24 Tass Marathi.

बेळगाव / प्रतिनिधी

बेळगाव महानगरपालिकेच्या महापौरपदी प्रीती कामकर तर उपमहापौरपदी हनुमंत कोंगाळी यांची आज झालेल्या निवडणुकीत निवड झाली. महापालिकेत स्पष्ट बहुमत असलेल्या भाजपने दोन्ही पदांवर विजय मिळवत आपले वर्चस्व कायम राखले. या निवडणुकीकडे शहरातील राजकीय वर्तुळाचे विशेष लक्ष लागले होते.

भाजपने यावेळी सामाजिक समतोल राखत महापौरपद नेकार समाजाला आणि उपमहापौरपद लिंगायत समाजाला देण्याचा निर्णय घेतला. प्रीती कामकर आणि हनुमंत कोंगाळी यांनी पक्षाकडून उमेदवारी अर्ज दाखल करून बहुमताच्या जोरावर विजय मिळवला. काँग्रेसकडून महापौरपदासाठी खर्शीद मुल्ला आणि उपमहापौरपदासाठी मोदिनसाब मतवाले यांनी उमेदवारी दिली होती; मात्र त्यांना यश मिळू शकले नाही.

निवड जाहीर होताच महानगरपालिकेत भाजप कार्यकर्त्यांनी जल्लोष साजरा केला. नव्याने निवडून आलेल्या पदाधिकाऱ्यांकडून शहराच्या विकासासाठी गती मिळेल, अशी अपेक्षा नागरिकांकडून व्यक्त होत आहे.

The post बेळगावच्या महापौरपदी प्रीती कामकर ; उपमहापौरपदी हनुमंत कोंगाळी appeared first on News 24 Tass Marathi.

बेळगाव महापालिकेतील महापौर आणि उपमहापौर पदासाठी आज, बुधवार रोजी निवडणूक होत असून शहराचे नवे नेतृत्व निश्चित होणार आहे. विद्यमान महापौर मंगेश पवार आणि उपमहापौर वाणी जोशी यांचा कार्यकाळ नुकताच संपल्याने या निवडणुकीकडे राजकीय वर्तुळाचे लक्ष लागले आहे. निवडणुकीसाठी आवश्यक सर्व तयारी पूर्ण करण्यात आली असून प्रादेशिक आयुक्त जानकी के. एम. यांच्या अध्यक्षतेखाली ही प्रक्रिया पार पडणार आहे.

या निवडणुकीत एकूण ६५ मतदारांना मतदानाचा अधिकार आहे. यामध्ये ५८ लोकनियुक्त नगरसेवक, ४ आमदार, ४ खासदार आणि १ विधानपरिषद सदस्य यांचा समावेश आहे. महापालिकेत स्पष्ट बहुमत भाजपकडे असल्याने महापौर आणि उपमहापौर ही दोन्ही पदे भाजपच्या वाट्याला जाण्याची शक्यता व्यक्त केली जात आहे. मात्र, पक्षांतर्गत समीकरणांमुळे नेमकी कोणाला संधी मिळणार याबाबत उत्सुकता कायम आहे.

यंदा महापौरपद सामान्य महिला प्रवर्गासाठी तर उपमहापौरपद सामान्य प्रवर्गासाठी राखीव आहे. त्यामुळे इच्छुकांमध्ये चुरस वाढली असून राजकीय हालचालींनाही वेग आला आहे. निवडणुकीनंतर महापालिकेच्या सत्तेचे नवे समीकरण स्पष्ट होणार असून शहराच्या विकासाच्या दृष्टीने पुढील वाटचाल कशी असेल, याकडेही नागरिकांचे लक्ष लागले आहे.

The post बेळगाव महापालिकेच्या महापौर – उपमहापौर पदाची आज निवडणूक appeared first on News 24 Tass Marathi.

नवी दिल्ली : केंद्रीय निवडणूक आयोगाने देशातील पाच राज्यांच्या विधानसभा निवडणुकांचा कार्यक्रम जाहीर करताच राजकीय वातावरण तापले आहे. आयोगाचे मुख्य निवडणूक आयुक्त ज्ञानेश कुमार यांनी रविवारी सायंकाळी पत्रकार परिषदेत पश्चिम बंगाल, आसाम, तामिळनाडू, पुद्दुचेरी आणि केरळ या राज्यांतील निवडणुकांचा सविस्तर कार्यक्रम जाहीर केला. या पाच राज्यांतील विधानसभा निवडणुकांचा निकाल ४ मे रोजी घोषित करण्यात येणार आहे.

घोषित कार्यक्रमानुसार, पश्चिम बंगालमधील २९४ विधानसभा मतदारसंघांसाठी दोन टप्प्यांत २३ आणि २९ एप्रिल रोजी मतदान होणार आहे. या राज्यात सुमारे ६.४४ कोटी मतदार मतदानाचा हक्क बजावणार आहेत. तर तामिळनाडूतील २३४ मतदारसंघांसाठी २३ एप्रिल रोजी मतदान होणार असून सुमारे ४.६७ कोटी मतदार मतदान प्रक्रियेत सहभागी होणार आहेत.

आसाममधील १२६, केरळमधील १४० आणि पुद्दुचेरीतील ३० विधानसभा मतदारसंघांसाठी ९ एप्रिल रोजी एकाच टप्प्यात मतदान पार पडणार आहे. या तीन राज्यांमध्ये अनुक्रमे सुमारे २.५ कोटी, २.७ कोटी आणि ४.४४ लाख मतदार मतदानाचा हक्क बजावणार आहेत. पाचही राज्यांतील एकूण ८२४ विधानसभा मतदारसंघांसाठी सुमारे १७.४ कोटी मतदार मतदान करणार आहेत.

मतदान प्रक्रिया सुरळीत पार पाडण्यासाठी पाच राज्यांमध्ये सुमारे २.१९ लाख मतदान केंद्रे उभारण्यात येणार आहेत. यासाठी जवळपास २५ लाख निवडणूक अधिकारी आणि कर्मचारी कार्यरत राहणार असून सुमारे ८.५ लाख सुरक्षा कर्मचारी तैनात करण्यात येणार आहेत. निवडणूक प्रक्रियेवर लक्ष ठेवण्यासाठी १,४४४ निरीक्षकांची नियुक्ती करण्यात आल्याची माहिती निवडणूक आयोगाने दिली आहे.

The post पाच राज्यांच्या विधानसभा निवडणुकांचे बिगुल वाजले appeared first on News 24 Tass Marathi.

महापालिकेच्या महापौर आणि उपमहापौरपदाच्या निवडणुकीची प्रक्रिया अंतिम टप्प्यात पोहोचली असून, ही निवडणूक १८ मार्च रोजी होण्याची शक्यता व्यक्त केली जात आहे. या पार्श्वभूमीवर प्रादेशिक आयुक्त कार्यालय आणि महापालिकेच्या कौन्सिल विभागाकडून हालचाली सुरू झाल्या आहेत. निवडणुकीचे अधिकृत वेळापत्रक पुढील आठवड्यात जाहीर होण्याची शक्यता असून, त्यानंतर निवडणूक प्रक्रिया सुरू होणार आहे.

सध्याचे महापौर मंगेश पवार आणि उपमहापौर वाणी जोशी यांचा कार्यकाळ १४ मार्च रोजी संपणार आहे. मात्र १४ मार्च हा दुसरा शनिवार असल्यामुळे त्या दिवशी महापालिकेचे कार्यालय बंद राहणार आहे. त्यामुळे प्रत्यक्षात या दोघांच्या कामकाजाचा अखेरचा कार्यदिवस १३ मार्च ठरणार आहे. परिणामी विद्यमान महापौर व उपमहापौर यांचा कार्यकाळ आता अवघ्या आठवडाभरावर येऊन ठेपला आहे. महापालिकेच्या कौन्सिल विभागाने महापौर आणि उपमहापौर निवडणूक घेण्याबाबतचा प्रस्ताव फेब्रुवारीतच प्रादेशिक आयुक्तांकडे पाठविला आहे. तसेच निवडणुकीसाठी आवश्यक असलेली मतदारांची यादीही प्रादेशिक आयुक्त कार्यालयाकडे केली आहे. मात्र, अद्याप प्रादेशिक आयुक्तांकडून निवडणुकीचे अधिकृत वेळापत्रक जाहीर केलेले नाही. बेळगाव महापालिकेत सध्या ५८ लोकनियुक्त नगरसेवक आहेत, तर पाच पदसिद्ध सदस्य आहेत. त्यामुळे महापौर व उपमहापौर निवडणुकीसाठी ६५ मतदार मतदान करणार आहेत. या सर्व मतदारांना निवडणुकीच्या आठ दिवस आधी अधिकृत नोटीस बजावली जाणार असल्याची माहिती महापालिकेच्या सूत्रांकडून मिळत आहे.

दरम्यान, विद्यमान सभागृहात महापौर आणि उपमहापौर निवडणुका दरवर्षी विलंबाने होत असल्याचे चित्र दिसून येत आहे. या सभागृहातील पहिल्या महापौरांची निवडणूक फेब्रुवारीत झाली होती. त्यानंतर दुसऱ्या आणि तिसऱ्या महापौरांच्या निवडणुका देखील विलंबाने झाल्या. त्यामुळे आता चौथ्या महापौरांची निवडणूक मार्च महिन्यात होणार असल्याचे स्पष्ट झाले आहे. म्हणजेच पहिल्या महापौरांच्या निवडीच्या तारखेच्या तुलनेत सव्वा ते दीड महिन्यांच्या विलंबाने चौथ्या महापौरांची निवड होणार आहे. सामान्यतः विद्यमान महापौरांचा कार्यकाळ संपण्यापूर्वीच निवडणुकीचे वेळापत्रक जाहीर करून निवडणूक प्रक्रिया पूर्ण केली जाते. मात्र, सध्याच्या सभागृहात हा संकेत पाळला गेला नसल्याचे दिसून येत आहे. प्रादेशिक आयुक्त कार्यालयाकडून निवडणुकीचे वेळापत्रक जाहीर करण्यात होत असलेल्या विलंबामुळे ही परिस्थिती निर्माण झाल्याचे मानले जात आहे.

The post महापौर-उपमहापौर निवडणूक १८ मार्चला appeared first on News 24 Tass Marathi.

बेळगाव महापालिकेतील महापौर व उपमहापौर पदांची मुदत संपत आल्याने नव्या निवडणुकीची तयारी सुरू झाली आहे. निवडणूक प्रक्रिया राबविण्यासंदर्भात आयुक्त कार्तिक एम. यांनी विभागीय आयुक्तांकडे अधिकृत पत्र पाठविले असल्याची माहिती समोर आली आहे.

बुधवारी आयुक्तांच्या कार्यालयात आयोजित पत्रकार परिषदेत त्यांनी याबाबत सविस्तर माहिती दिली. सध्याच्या महापौर व उपमहापौरांचा कार्यकाळ १४ मार्च रोजी संपुष्टात येणार आहे.

आगामी निवडणुकीत महापौरपद ‘सर्वसाधारण महिला’ प्रवर्गासाठी, तर उपमहापौरपद ‘सर्वसाधारण’ प्रवर्गासाठी राखीव ठेवण्यात आले आहे. या निवडणुकीत ५८ नगरसेवकांसह ७ आमदार, खासदार व मंत्री असे एकूण ६५ सदस्यांना मतदानाचा अधिकार असणार असल्याचे आयुक्तांनी स्पष्ट केले.

The post बेळगाव महापालिकेत महापौर – उपमहापौर निवडीसाठी हालचाली गतिमान appeared first on News 24 Tass Marathi.

महापालिकेचे विद्यमान महापौर मंगेश पवार व उपमहापौर वाणी जोशी यांचा एक वर्षांचा कार्यकाळ येत्या १४ मार्चला पूर्ण होणार आहे. मात्र, १४ मार्चला दुसरा शनिवार असून, त्या दिवशी शासकीय सुटी असल्याने त्यांचा कार्यकाळ प्रत्यक्षात १३ मार्चलाच संपणार आहे. ही बाब लक्षात घेऊन नव्या महापौर व उपमहापौर निवडणुकीचा प्रस्ताव महापालिकेच्या कौन्सिल विभागामार्फत लवकरच प्रादेशिक आयुक्त कार्यालयाकडे पाठवण्यात येणार आहे. महापालिकेकडून प्रस्ताव पाठविण्याआधी प्रादेशिक आयुक्त कार्यालयाशी प्राथमिक चर्चा करण्यात येणार आहे. त्यानंतर पुढील निर्णय घेतला जाणार आहे. प्रस्ताव प्राप्त झाल्यानंतर प्रादेशिक आयुक्तांकडून महापौर व उपमहापौर निवडणुकीचे अधिकृत वेळापत्रक जाहीर केले जाणार असून, त्यानुसार प्रादेशिक आयुक्तांच्या अध्यक्षतेखाली महापालिकेच्या सभागृहात निवडणूक प्रक्रिया होणार आहे.

दरम्यान, विद्यमान महापौर मंगेश पवार यांच्याविरोधात धारवाड खंडपीठात प्रलंबित असलेल्या याचिकेची सुनावणी येत्या ९ फेब्रुवारी रोजी होणार आहे. मिळकत लपविल्याचा आरोप करत दाखल करण्यात आलेल्या या याचिकेवर न्यायालय कोणता निर्णय देते, याकडे राजकीय वर्तुळासह शहराचे लक्ष लागले आहे. या निर्णयाचा महापौर निवडणूक प्रक्रियेवर अप्रत्यक्ष परिणाम होण्याची शक्यता नाकारता येत नाही.

मागील वर्षी १५ मार्चला झालेल्या महापौर व उपमहापौर निवडणुकीत मंगेश पवार यांची महापौरपदी तर वाणी जोशी यांची उपमहापौरपदी निवड झाली होती. महापालिकेत महापौर व उपमहापौर पदाचा कार्यकाळ केवळ एक वर्षाचा असल्याने दरवर्षी नवीन निवडणूक घेणे बंधनकारक आहे. त्यामुळे कार्यकाळ संपण्यापूर्वीच नव्या निवडणुकीसाठीचा प्रस्ताव महापालिकेकडून प्रादेशिक आयुक्तांकडे पाठवला जातो. सध्या विद्यमान महापौर व उपमहापौरांचा कार्यकाळ दीड महिन्यांपेक्षा कमी राहिल्याने शहराच्या राजकारणात हालचालींना वेग आला आहे. आगामी महापौर पद सामान्य महिला प्रवर्गासाठी, तर उपमहापौर पद सामान्य प्रवर्गासाठी राखीव आहे. विद्यमान कार्यकाळात दोन्ही पदे शहराच्या दक्षिण विभागाला मिळाल्याने, पुढील वेळी महापौर व उपमहापौर पदे शहराच्या उत्तर विभागाला मिळण्याची दाट शक्यता आहे. या पार्श्वभूमीवर उत्तर विभागातील नगरसेवकांकडून मोर्चेबांधणीला सुरुवात झाली असून, संभाव्य उमेदवारांची नावे चर्चेत येऊ लागली आहेत. महापालिकेत भाजपची सत्ता असल्यामुळे दोन्ही पदे भाजपलाच मिळणार आहेत.

The post महापौर – उपमहापौर निवडणुकीचा प्रस्ताव लवकरच appeared first on News 24 Tass Marathi.

चंदगड / लक्ष्मण यादव

चंदगड विधानसभा मतदारसंघात काँग्रेस पक्षाला मोठा राजकीय धक्का बसला असून, अथर्व दौलत साखर कारखान्याचे विश्वस्त मा. श्री. गोपाळराव पाटील, दौलत सहकारी साखर कारखान्याचे माजी चेअरमन मा. श्री.अशोक पाटील, हलकर्णी महाविद्यालयाचे उपाध्यक्ष मा. श्री. संजय पाटील, तसेच मा. श्री. विशाल पाटील, मा. श्री. गोविंदराव पाटील आणि मा. श्री. शरद मटकर यांनी आपल्या समर्थक व कार्यकर्त्यांसह भारतीय जनता पार्टीत जाहीर प्रवेश केला. हा प्रवेश चंदगडचे आमदार शिवाजीराव पाटील (भाऊ) यांच्या प्रमुख उपस्थितीत पार पडला. यावेळी मा. श्री. नामदेव पाटील, मा. श्री. रवींद्र बंदिवडेकर यांच्यासह अनेक मान्यवर उपस्थित होते.

या जाहीर प्रवेशामुळे चंदगड तालुक्यात भाजपची संघटनात्मक ताकद वाढली असून, आगामी राजकीय घडामोडींच्या पार्श्वभूमीवर या प्रवेशाकडे महत्त्वाच्या घडामोडी म्हणून पाहिले जात आहे.

The post गोपाळराव पाटील यांचा भाजपमध्ये जाहीर प्रवेश appeared first on News 24 Tass Marathi.

सामान्य मतदारांपासून ते राजकीय विश्लेषक, तसेच विविध विरोधी पक्षांकडून ईव्हीएमच्या पारदर्शकतेवर प्रश्नचिन्ह उपस्थित केले जात आहे. मतदार याद्यांचे अद्ययावतीकरण, मतचोरीचे आरोप आणि निवडणूक आयोगाच्या कारभारावरही शंका व्यक्त होत आहेत. या पार्श्वभूमीवर मतदान प्रक्रियेत मतपत्रिकांचा वापर करण्याची मागणी जोर धरू लागली आहे.

याच पार्श्वभूमीवर काँग्रेसच्या नेतृत्वाखालील कर्नाटक सरकारने राज्यातील बृहन बंगळूर प्राधिकरण (GBA), जिल्हा पंचायत, तालुका पंचायत तसेच ग्रामपंचायत निवडणुका मतपत्रिकांवरच घेण्याचा निर्णय घेतला आहे.

राज्य निवडणूक आयुक्त जी. एस. संग्रेश यांनी बृहन बंगळूर प्राधिकरणाची प्रारूप मतदार यादी जाहीर केल्यानंतर घेतलेल्या पत्रकार परिषदेत ही माहिती दिली. आगामी निवडणुकांमध्ये पारदर्शकता आणि जनतेचा विश्वास वाढवण्यासाठी हा निर्णय घेण्यात आल्याचे त्यांनी स्पष्ट केले.

या निर्णयामुळे कर्नाटकातील निवडणूक प्रक्रियेला नवे वळण मिळाले असून, देशपातळीवर सुरू असलेल्या ईव्हीएमविरोधी चर्चेला आणखी चालना मिळण्याची शक्यता व्यक्त केली जात आहे.

The post कर्नाटकात स्थानिक स्वराज्य संस्थांच्या निवडणुका मतपत्रिकांवर घेण्याचा निर्णय appeared first on News 24 Tass Marathi.