शहरासह परिसरात बुधवारी खंडेनवमी भक्तिभावाने साजरी करण्यात आली. परंपरेनुसार या दिवशी शस्त्रपूजन करून देवीची आराधना करण्यात आली. दरम्यान बाजारपेठेत ऊस, फुले, फळे आणि पूजेसाठी लागणाऱ्या साहित्याची मोठ्या प्रमाणात खरेदी होत असल्याने गजबजलेले दृश्य दिसून आले.

नवरात्रोत्सवातील नववा दिवस हा शस्त्रपूजनाचा मानला जातो. यानिमित्ताने शेतकरी शेतीची साधने व हत्यारे, व्यावसायिक आपले व्यवसायिक साहित्य तर वाहनधारक आपल्या वाहनांचे पूजन करून सुरक्षिततेसाठी प्रार्थना करतात.

सणाच्या तयारीमुळे शहरातील गणपत गल्ली, समादेवी गल्ली, पांगुळ गल्ली, नरगुंदकर भावे चौक, काकतीवेस यांसह विविध भागातील बाजारपेठा ग्राहकांनी फुलून गेल्या होत्या. ऊस मोठ्या प्रमाणात दाखल झाल्यामुळे खरेदीसाठी नागरिकांची विशेष गर्दी दिसली. झेंडूच्या हाराची ७० ते ६० रुपये, तर उसाची १०० रुपयाला पाच अशा दराने विक्री होत आहे. बाजारात ऊस मोठ्या प्रमाणात दाखल झाला असून त्याच्या खरेदीसाठी काही ठिकाणी ग्राहकांची झुंबड उडाली होती.

दरम्यान उद्या दसरा सण साजरा होणार असून, त्यासाठी शहरात सणासुदीचे वातावरण निर्माण झाले आहे.

The post ‘खंडेनवमी’ उत्साहात साजरी…आता ‘दसऱ्याची’ तयारी appeared first on News 24 Tass Marathi.

बेळगावचे पोलीस आयुक्त भूषण गुलाबराव बोरसे यांनी मराठी विद्यानिकेतन येथे असलेल्या सीमोल्लंघन मैदानाची पाहणी करून आगामी २ ऑक्टोबर २०२५ रोजी होणाऱ्या विजयादशमी उत्सवाच्या तयारीचा आढावा घेतला. त्यांनी या वेळी उपस्थित पोलीस अधिकाऱ्यांना शिस्तबद्ध नियोजन करण्याचे निर्देश दिले.

या पाहणीवेळी दसरा महामंडळाचे मानद अध्यक्ष रमाकांत कोंडुसकर, अध्यक्ष प्राचार्य आनंद आपटेकर, जनसंपर्क प्रमुख विकास कलघटगी, तसेच मल्लेश चौगुले, अंकुश केसरकर, बळवंत शिंदोळकर, किरण, विविध देवस्थानचे पदाधिकारी लक्ष्मण किल्लेकर, श्रीनाथ पवार, मुर्गेश अंगडी, उमेश कंबरकर, मनोज काकतकर आदी मान्यवर उपस्थित होते.

The post सीमोल्लंघन मैदानाची पोलीस आयुक्तांकडून पाहणी appeared first on News 24 Tass Marathi.

सुळगा (उ) / वार्ताहर

सुळगा (उ) येथील श्री सिमेदेव युवक मंडळामार्फत सामाजिक कार्यकर्ते सुनील शंकर आवडण यांच्या प्रयत्नाने गावातील मंदिरांचे तसेच स्मारकांचे सुशोभिकरण करण्यासाठी पाच लाख रुपयांची आर्थिक मदत देण्यात आली आहे. सोमवार, दि. २९ रोजी ब्रह्मलिंग मंदिरात ही रक्कम औपचारिकरित्या देवस्की पंच कमिटीकडे सुपूर्द करण्यात आली. यावेळी कमिटीने सुनील आवडण यांचा सत्कार करून कृतज्ञता व्यक्त केली.

सत्कारानंतर आपले विचार व्यक्त करताना सुनील आवडण म्हणाले की, “मंदिरे ही केवळ उपासनेची केंद्रे नसून आपल्या परंपरा, संस्कृती आणि सामाजिक एकतेचे प्रतीक आहेत. गावातील सण-उत्सव व सांस्कृतिक कार्यक्रम मंदिरांमुळे एकत्रित साजरे होतात. त्यामुळे एकोपा निर्माण होतो.” या विचारातूनच गावातील मंदिरांच्या सुशोभिकरणासाठी आर्थिक मदत करण्याचा संकल्प केल्याचे त्यांनी स्पष्ट केले.

• मदतीचा तपशील :

सुनील आवडण हे सतत सामाजिक कार्यात पुढाकार घेत असून, युवा पिढीवर चांगले संस्कार व्हावेत यासाठी ते सक्रियपणे प्रयत्नशील आहेत. श्री सिमेदेव युवक मंडळाच्या स्थापनेपासून त्यांनी मंडळाच्या कार्यात मोठे योगदान दिले आहे. नवरात्रोत्सवासारख्या सांस्कृतिक सोहळ्यांबरोबरच सामाजिक उपक्रमांमध्येही मंडळ अग्रेसर आहे. भाविकांकडून मंडळाला मिळणाऱ्या देणग्यांपैकी आवश्यक तेवढा निधी मंडळासाठी वापरून उर्वरित रक्कम समाजोपयोगी कार्यासाठी वापरण्याचा त्यांचा दृष्टिकोन युवा पिढी आणि इतर युवक मंडळांसाठी प्रेरणादायी ठरत आहे. याबद्दल गावात सर्वत्र त्यांचे कौतुक होत आहे.

The post श्री सिमेदेव युवक मंडळाकडून मंदिर आणि स्मारकांच्या सुशोभिकरणासाठी आर्थिक मदत appeared first on News 24 Tass Marathi.

ऐतिहासिक परंपरा असलेला बेळगावचा दसरा उत्सव यावर्षी २ ऑक्टोबर २०२५ रोजी साजरा होणार आहे. या निमित्ताने शहर पोलीस आयुक्त भूषण गुलाबराव बोरसे यांना प्रमुख पाहुणे म्हणून आमंत्रित करण्यात आले.

शेकडो वर्षांची परंपरा असलेला हा सोहळा यंदाही मध्यवर्ती नवरात्र दसरा महोत्सव महामंडळाच्या माध्यमातून व शासनाच्या सहकार्याने नियोजनबद्ध पद्धतीने पार पाडला जाणार आहे.

आमंत्रणप्रसंगी महामंडळाचे मानद अध्यक्ष रमाकांत कोंडुसकर, अध्यक्ष प्राचार्य आनंद आपटेकर, जनसंपर्क प्रमुख विकास कलघटगी, अंकुश केसरकर, लक्ष्मण किल्लेकर, बाळू जोशी, आनंद पाटील, श्रीकांत कदम, सुरज कडूचकर, सचिन केळवेकर व शेखर तलवार उपस्थित होते.

The post दसरा महोत्सवासाठी पोलीस आयुक्तांना आमंत्रण ! appeared first on News 24 Tass Marathi.

गुरुवार दि. २ ऑक्टोबर २०२५ रोजी विजयादशमी “सीमोल्लंघन’ कार्यक्रमासाठी मध्यवर्ती नवरात्र दसरा महोत्सव महामंडळाच्या पदाधिकाऱ्यांनी हेस्कॉमचे बेळगाव शहर कार्यकारी अभियंता श्री. मनोहर सुतार यांची नेहरूनगर कार्यालयात भेट घेतली व येणाऱ्या दसरा उत्सवासंदर्भात चर्चा करण्यात आली.

सर्वप्रथम नुकताच पार पडलेल्या गणेशोत्सवादरम्यान हेस्कॉम अधिकारी व कर्मचारी यांनी चांगल्या पध्दतीने नियोजन करून कुठेही अडथळा न करता सुरळीत उत्सव पार पडण्यासाठी सहकार्य केल्याबद्दल मध्यवर्ती सार्वजनिक श्री गणेशोत्सव महामंडळाच्या वतीने अभिनंदन करण्यात आले. गुरुवार दिनांक २ ऑक्टोबर २०२५ विजयादशमी दिवशी सायंकाळी ४ वाजता शेकडो वर्षाचा इतिहास असलेला बेळगावचा ऐतिहासिक दसरा सीमोल्लंघन मैदानात (मराठी विद्यानिकेतन मैदान) पार पडतो. बेळगावातील विविध देवस्थानाच्या शासनकाठी व पालख्या या दिवशी विजयादशमीचा दिवस संपन्न करण्यासाठी एकत्र मैदानात जमतात. मागील काही वर्षापासून श्री. रमाकांत कोंडुसकर यांच्या नेतृत्वाखाली हा दसरा उत्सव शिस्तबद्ध नियोजन करण्यात आला. काही वर्षांपासून दसरा उत्सवात सुद्धा हेस्कॉम विभाग सतर्क राहून सर्व रीतीने तयारी करून सहकार्य करतात. मागील काही तीन-चार वर्षापासून कुठेही अनुचित घटना घडल्या नाहीत. यंदाच्या वर्षी सुद्धा असेच सहकार्य करण्यासाठी आणि अजून काही अडथळे असतील ते मोकळे करण्यासाठी मध्यवर्ती नवरात्र दसरा महोत्सव महामंडळाच्यावतीने निवेदन देण्यात आले.

याप्रसंगी दसरा महामंडळाचे अध्यक्ष प्राचार्य आनंद आपटेकर, जनसंपर्क प्रमुख विकास कलघटगी, मल्लेश चौगुले, विविध देवस्थानाचे पदाधिकारी लक्ष्मण किल्लेकर, मुर्गेश अंगडी, परिश्रम किल्लेकर, श्रीनाथ पवार, बळवंत, ज्योतिबा धामणेकर, मनोज काकतकर उपस्थित होते.

The post सीमोल्लंघनाच्या पार्श्वभूमीवर हेस्कॉमला महामंडळाच्यावतीने निवेदन appeared first on News 24 Tass Marathi.

मध्यवर्ती सार्वजनिक नवरात्री दसरा महोत्सव महामंडळाच्या वतीने येणाऱ्या २ ऑक्टोबर २०२५ रोजी सीमोल्लंघनाचा कार्यक्रम पूर्वतयारीसाठी बेळगाव शहर मनपा आयुक्त बी. शुभा यांना पूर्व तयारी संदर्भात निवेदन देण्यात आले. शेकडो वर्षाच्या परंपरा असलेला बेळगाव चा दसरा सालाबाद प्रमाणे “सीमोल्लंघन मैदान” (मराठी विद्यानिकेतन मैदान कॅम्प) येथे विजयदशमीचा उत्सव मोठ्या प्रमाणात म्हैसूर नंतर आपल्या बेळगाव शहर येथे संपन्न होतो. गेल्या काही वर्षांपासून दसरा महामंडळाच्या माध्यमातून शिस्तबद्ध व भव्य स्वरूपात दसरा उत्सव नियोजन होत आहे.

यंदाच्या वर्षी सुद्धा हा विजय दशमीचा उत्सव चांगल्यारीतीने नियोजनासाठी महामंडळ प्रयत्नशील आहे. तसेच या संदर्भात बेळगावचे महापौर मंगेश पवार उपमहापौर वाणी जोशी व बेळगाव उत्तरचे आमदार राजू शेठ यांना पत्र देण्यात आले. याप्रसंगी दसरा महामंडळाचे मानद अध्यक्ष रमाकांत कोंडुस्कर, अध्यक्ष प्राचार्य आनंद आपटेकर, स्वागत अध्यक्ष माजी महापौर मालोजीराव अष्टेकर, जनसंपर्क प्रमुख विकास कलघटगी, कार्याध्यक्ष अंकुश केसरकर, मल्लेश चौगुले, बेळगाव विविध देवस्थानचे पदाधिकारी परशुराम किल्लेकर, श्रीनाथ पवार, मृगेंद्र अंगडी, गौतम पाटील, सुनील बोकडे, आनंद पाटील आदी उपस्थित होते.

The post सीमोल्लंघन कार्यक्रमाच्या पूर्व तयारी संदर्भात महापालिका आयुक्तांना निवेदन appeared first on News 24 Tass Marathi.

बेळगाव / प्रतिनिधी

बेळगावात श्री दुर्गामाता दौडच्या तिसऱ्या दिवशी कॅन्टोन्मेंट बोर्ड येथे मुस्लिम बांधवांनी स्वागत केले आणि सौहार्दाचा संदेश दिला.

नवरात्रीच्या तिसऱ्या दिवशी श्री दुर्गामाता दौडची सुरुवात श्री चंद्रघंटादेवीच्या पूजेने करण्यात आली. श्री दुर्गामाता दौड धर्मवीर छत्रपती संभाजी महाराज चौकातून सुरू झाली. पुढे काँग्रेस रोड, ग्लोब टॉकीज रोड, इंडिपेंडेंट रोड, हाय स्ट्रीट, वेस्ट स्ट्रीट, हाईट, कोंडप्पा स्ट्रीट, चर्च स्ट्रीट, मद्रास स्ट्रीट, कुंतीमाता मंदिर, फिश मार्केट, तेलुगू कॉलनी, के.टी. पुजारी श्री दुर्गामाता मंदिर, खानापूर रोड आदी मार्गांवरून दौड कॅन्टोन्मेंट बोर्ड परिसरात आली असता, मुस्लिम बांधवांनी श्री दुर्गामाता दौडचे भव्य स्वागत केले.

याप्रसंगी प्रसारमाध्यमांशी बोलताना एमएलआयआरसीच्या एका अधिकाऱ्याने, कॅन्टोन्मेंट बोर्डचे माजी सदस्य साजिद शेख यांनी श्री दुर्गामाता दौडच्या स्वागतासाठी केलेल्या भव्य तयारीबद्दल आनंद व्यक्त केला. मुस्लिम समुदायाने श्री दुर्गामाता दौडाचे स्वागत केल्याने देशात सौहार्दाचा संदेश गेला आहे. तसेच पहिल्यांदाच श्री दुर्गामाता दौडमध्ये सहभागी झाल्याबद्दल त्यांनी आनंद व्यक्त केला.

साजिद शेख म्हणाले की, दरवर्षीप्रमाणे या वर्षीही मुस्लिम समुदाय, जंगू कुटुंब आणि त्यांच्या सहकाऱ्यांनी कॅंटोन्मेंट बोर्ड परिसरात दुर्गामाता दौडचे स्वागत केले. म्हैसूर इतकाच भव्य दसरा बेळगावात आयोजित केला जातो. दुर्गामाता सर्वांचे कष्ट दूर करो आणि सर्वांना सुख आणि शांती देवो अशी प्रार्थना त्यांनी केली.

खानापूर रोडमार्गे धर्मवीर छत्रपती संभाजी महाराज सर्कल, जत्ती मठ येथे तिसऱ्या दिवशीच्या दौडीची सांगता झाली.

The post कॅन्टोन्मेंट परिसरात मुस्लिम बांधवांकडून दुर्गामाता दौडीचे स्वागत ! appeared first on News 24 Tass Marathi.

बेळगाव / प्रतिनिधी

बेळगाव शहरात विजयादशमीच्या दिवशी निघणाऱ्या पारंपरिक सीमोल्लंघन मिरवणुकीत गर्दीचे योग्य व्यवस्थापन करून शिस्तबद्ध वातावरण निर्माण करण्यासाठी उपाययोजना करण्याचे ठरवण्यात आले. जत्तीमठ येथे पार पडलेल्या मध्यवर्ती सार्वजनिक नवरात्र दसरा महोत्सव महामंडळाच्या बैठकीत या विषयावर सविस्तर चर्चा झाली.

बैठकीत सांगण्यात आले की, ज्योती कॉलेज मैदानावरील सीमोल्लंघन कार्यक्रमाला मोठी गर्दी होत असल्यामुळे पालख्यांचे दर्शन घेणे नागरिकांना कठीण जाते. यावर तोडगा म्हणून यावर्षी प्रत्येक पालखीला स्वतंत्र प्लॅटफॉर्म उपलब्ध करून देण्याचा निर्णय घेण्यात आल्याचे रमाकांत कोंडुसकर यांनी सांगितले.

तसेच शहरातील दुर्गादेवी मंडळांनी आपापल्या समस्या बैठकीत मांडल्या असून, त्या संबंधित अधिकाऱ्यांशी चर्चा करून सोडविण्याचे आश्वासन देण्यात आले.

या बैठकीला मालोजी अष्टेकर, रणजीत चव्हाण-पाटील, आनंद आपटेकर, दत्ता जाधव, अजित कोकणे, परशुराम किणेकर, सुरेश पिसे, मल्लेश चौगुले, प्रमोद बिर्जे, आनंद पुजारी, सुधीर मोरे, दीपक खटावकर, बळवंत शिंदोळकर, सुनील बोकडे, अंकुश केसरकर, किरण हुद्दार यांच्यासह मोठ्या संख्येने नागरिक उपस्थित होते.

The post सीमोल्लंघन मिरवणुकीत शिस्त आणण्यासाठी विशेष नियोजन appeared first on News 24 Tass Marathi.