बेळगाव : राज्य परिवहन महामंडळाच्या बसमधील प्रवाशांचे लक्ष विचलित करून सोन्याचे दागिने आणि मौल्यवान वस्तू लंपास करणाऱ्या आंतरराज्य चोरट्यांच्या टोळीचा पोलिसांनी पर्दाफाश केला आहे. या प्रकरणी उत्तर प्रदेशातील ११ जणांना अटक करण्यात आली असून त्यांच्याकडून मोठ्या प्रमाणावर सोन्याचे दागिने जप्त करण्यात आले आहेत. जिल्हा पोलीस अधीक्षक के. रामराजन यांनी पत्रकार परिषदेत ही माहिती दिली.

अथणी उपविभागाच्या हद्दीत बसमधील प्रवाशांना मदतीचे आमिष दाखवून किंवा कृत्रिम गर्दी निर्माण करून त्यांच्या बॅगा आणि दागिने चोरणाऱ्या टोळीबाबत पोलिसांना माहिती मिळाली होती. या टोळीचा माग काढण्यासाठी सीसीटीव्ही फुटेज आणि गुप्त माहितीच्या आधारे तपास करण्यात आला. त्यानंतर कागवाड आणि अथणी पोलिसांनी संयुक्त मोहीम राबवून उत्तर प्रदेशातील ११ जणांच्या टोळीला अटक करण्यात यश मिळवले.

तपासादरम्यान या टोळीचा कागवाड परिसरातील चार, चिक्कोडीतील एक आणि अथणीतील एका चोरीच्या घटनेशी संबंध असल्याचे उघड झाले आहे. आरोपी प्रवासादरम्यान महागडे दागिने घातलेल्या किंवा मौल्यवान वस्तू बाळगणाऱ्या प्रवाशांना हेरून त्यांना लक्ष्य करत असल्याची माहिती पोलिसांनी दिली.

अटक करण्यात आलेल्या आरोपींकडून एकूण २२५ ग्रॅम वजनाचे सोन्याचे दागिने जप्त करण्यात आले असून, चोरीला गेलेल्या बहुतांश सोन्याची पोलिसांनी पुनर्प्राप्ती केली आहे. या टोळीच्या अटकेमुळे परिसरातील अशाच प्रकारच्या गुन्ह्यांचा तपास अधिक वेगाने होण्याची शक्यता व्यक्त केली जात आहे.

यावेळी पोलीस अधीक्षक के. रामराजन यांनी सार्वजनिक वाहतुकीतील सुरक्षेवर भर देत, भविष्यात अशा घटना टाळण्यासाठी बसमध्ये सीसीटीव्ही यंत्रणा बसविण्याबाबत विचार सुरू असल्याचे सांगितले. तसेच नागरिकांनी, विशेषतः महिलांनी, बस प्रवास करताना आपल्या बॅगा, दागिने आणि मौल्यवान वस्तूंबाबत अधिक सतर्क राहावे, असे आवाहनही त्यांनी केले.

The post बसमध्ये सोने लुटणाऱ्या आंतरराज्य चोरट्यांच्या टोळीचा पर्दाफाश appeared first on News 24 Tass Marathi.

बेळगाव : जिल्ह्यातील संकेश्वर शहरात घडलेल्या बाबू भुसगोळ हत्या प्रकरणाचा छडा लावण्यात पोलिसांना अवघ्या २४ तासांत यश आले आहे. या प्रकरणी सहा संशयित आरोपींना अटक करण्यात आली असून, न्यायालयाने त्यांना कोठडी सुनावली आहे. बेळगावचे पोलीस अधीक्षक के. रामराजन यांनी पत्रकार परिषदेत ही माहिती दिली.

मिळालेल्या माहितीनुसार, संकेश्वरमधील गोरक्षणमाळ परिसरात पूर्वीपासून असलेले वैमनस्य आणि नगरपालिकेच्या पोटनिवडणुकीच्या पार्श्वभूमीवर निर्माण झालेल्या वादातून बाबू भुसगोळ यांच्यावर हल्ला करण्यात आला होता. तीक्ष्ण हत्यारे आणि दगडांचा वापर करून करण्यात आलेल्या या हल्ल्यात त्यांचा मृत्यू झाला.

या घटनेनंतर मृताच्या पत्नीने संकेश्वर पोलीस ठाण्यात तक्रार दाखल केली होती. त्यानुसार पोलिसांनी तातडीने तपासाची चक्रे फिरवत शुभम बिसूरे, अक्षय मरडी, पवन मरडी, अनिल मरडी, संदीप मरडी आणि अभिषेक अलदाळे या सहा जणांना अटक केली.

पोलीस अधीक्षक के. रामराजन, अप्पर पोलीस अधीक्षक आर. बी. बसरगी आणि गोकाक विभागाचे उपविभागीय पोलीस अधिकारी रवी नाईक यांच्या मार्गदर्शनाखाली संकेश्वर पोलीस ठाण्याचे निरीक्षक गणपती कोंगणोळ्ळी आणि त्यांच्या सहकाऱ्यांनी ही कारवाई यशस्वीपणे पार पाडली.

अटक करण्यात आलेल्या सर्व आरोपींना न्यायालयासमोर हजर करण्यात आले असून त्यांना न्यायालयीन कोठडी सुनावण्यात आली आहे. हत्या प्रकरणाचा अल्पावधीत छडा लावल्याबद्दल पोलीस अधीक्षकांनी तपास पथकाचे विशेष अभिनंदन केले आहे.

The post संकेश्वरमधील हत्या प्रकरणाचा अवघ्या २४ तासांत छडा appeared first on News 24 Tass Marathi.

बेळगाव : जिल्ह्यात विम्याच्या रकमेसाठी निवृत्त सैनिकाची हत्या केल्याचा धक्कादायक प्रकार उघडकीस आला आहे. रुग्णालयात उपचार घेत असलेल्या माजी सैनिकाचा पत्नी आणि तिच्या कथित प्रियकराने विषप्रयोग करून खून केल्याचा आरोप असून, या प्रकरणात पुरावे दडपण्याचा प्रयत्न झाल्याचाही संशय व्यक्त करण्यात आला आहे. या प्रकरणी एकूण नऊ जणांना अटक करण्यात आली आहे.

जिल्हा पोलीस अधीक्षक के. रामराजन यांनी पत्रकार परिषदेत या प्रकरणाची माहिती दिली. त्यानुसार, निवृत्त सैनिक संदीप मंजरगी (वय ४६) हे किरकोळ रस्ता अपघातात जखमी झाल्यानंतर उपचारासाठी रुग्णालयात दाखल होते. पुढील उपचारांसाठी त्यांना घटप्रभा येथील एका रुग्णालयात हलविण्यात आले होते.

तपासादरम्यान, संदीप मंजरगी यांची पत्नी सुमा आणि तिचा कथित प्रियकर पुंडलिक यांनी संगनमत करून त्यांना झोपेच्या गोळ्या देत सलाईनद्वारे विषप्रयोग केल्याचा आरोप पोलिसांनी केला आहे. या घटनेनंतर मृत्यू नैसर्गिक किंवा अपघाती असल्याचे भासविण्याचा प्रयत्न करण्यात आल्याचेही तपासात समोर आले आहे.

पोलीस तपासात शवविच्छेदन आणि रासायनिक विश्लेषणाशी संबंधित कागदपत्रांमध्ये फेरफार करण्याचा प्रयत्न झाल्याचा संशय व्यक्त करण्यात आला आहे. या प्रकरणात काही व्यक्तींनी आर्थिक व्यवहारांच्या माध्यमातून पुरावे दडपण्यास मदत केल्याचा आरोप असून, त्यांच्याविरोधातही कारवाई करण्यात आली आहे.

या प्रकरणी सुमा, पुंडलिक यांच्यासह अप्पासाहेब नाईकवाडी, चन्नप्पा अडविस्वामी मठ, नागराजू, अशोक गुजनाल, बसवराज बसम्मा आणि राहुल जोगी यांना अटक करण्यात आली आहे. अटक करण्यात आलेल्या आरोपींची चौकशी सुरू असून, प्रकरणातील इतर पैलूंचाही तपास सुरू असल्याची माहिती पोलिसांनी दिली.

दरम्यान, विम्याच्या रकमेच्या वाटपावरून आरोपींमध्ये झालेल्या वादातून या गुन्ह्याची माहिती समोर आल्याचे तपासात उघड झाले आहे. या गुन्ह्याचा छडा लावणाऱ्या यमकनमर्डी आणि घटप्रभा पोलीस पथकाच्या कामगिरीचे जिल्हा पोलीस अधीक्षकांनी कौतुक केले.

The post विम्याच्या रकमेसाठी निवृत्त सैनिकाची हत्या appeared first on News 24 Tass Marathi.

बेळगाव : सोशल मीडियावर कोणतीही पोस्ट, व्हिडिओ किंवा संदेश शेअर करण्यापूर्वी नागरिकांनी अधिक सतर्क राहावे, असा इशारा बेळगाव जिल्हा पोलीस अधीक्षक के. रामराजन यांनी दिला आहे. सोशल मीडियावरील गैरप्रकारांवर नियंत्रण ठेवण्यासाठी जिल्हा पोलिसांनी विशेष सायबर सेल सुरू केला असून, तो २४ तास कार्यरत राहणार आहे.

पोलीस अधीक्षक रामराजन यांनी सांगितले की, प्रक्षोभक पोस्ट, अफवा पसरवणारा मजकूर, द्वेषपूर्ण संदेश तसेच ऑनलाइन माध्यमांतून धमकावणारे व्हिडिओ आणि संवाद प्रसारित करणाऱ्या गुन्हेगारी प्रवृत्तीच्या व्यक्तींवर सायबर सेलची विशेष नजर राहणार आहे. सोशल मीडियाचा गैरवापर करून कायदा व सुव्यवस्थेला बाधा आणण्याचा प्रयत्न करणाऱ्यांवर तातडीने आणि कठोर कारवाई केली जाईल.

आधुनिक तांत्रिक साधनसामग्रीच्या मदतीने संशयास्पद स्टेटस, व्हायरल व्हिडिओ आणि आक्षेपार्ह पोस्ट्सचा मागोवा घेणे आता पोलिसांना सहज शक्य झाले आहे. त्यामुळे सोशल मीडियावर बेजबाबदारपणे वावरणाऱ्यांना पोलिसांकडून थेट कारवाईला सामोरे जावे लागू शकते.

केवळ आक्षेपार्ह पोस्ट तयार करणाऱ्यांवरच नव्हे, तर फेक न्यूज किंवा हेट स्पीच असलेला मजकूर पुढे पाठवणाऱ्यांवरही कायदेशीर कारवाई केली जाईल, असे स्पष्ट करताना रामराजन यांनी नागरिकांना जबाबदारीने सोशल मीडियाचा वापर करण्याचे आवाहन केले आहे. तसेच, कोणताही संशयास्पद मजकूर अथवा गैरप्रकार आढळल्यास त्वरित पोलिसांना माहिती द्यावी, असेही त्यांनी सांगितले.

The post बेळगाव जिल्हा पोलिसांच्या नव्या सायबर सेलची स्थापना appeared first on News 24 Tass Marathi.

बेळगाव : कमी कालावधीत पैसे दुप्पट करून देण्याचे किंवा २० ते ३० टक्के अवाजवी परताव्याचे आमिष दाखवणाऱ्या फसवणूक करणाऱ्या टोळ्यांपासून नागरिकांनी सावध राहावे, असा इशारा बेळगावचे पोलीस अधीक्षक के. रामराजन यांनी दिला आहे. नागरिकांनी आपल्या कष्टाची कमाई केवळ अधिकृत आणि विश्वासार्ह वित्तीय संस्थांमध्येच गुंतवावी, असे आवाहन त्यांनी केले.

बेळगाव येथे आयोजित पत्रकार परिषदेत बोलताना के. रामराजन यांनी अनधिकृत खाजगी कंपन्या आणि संशयास्पद गुंतवणूक योजनांपासून दूर राहण्याचा सल्ला दिला. केवळ शासकीय नोंदणीकृत चिटफंड संस्था आणि अधिकृत बँकांनाच ठेवी स्वीकारण्याची कायदेशीर परवानगी असते, याची नागरिकांनी नोंद घ्यावी, असे त्यांनी सांगितले.

कमी कालावधीत मोठा नफा, जादा व्याजदर किंवा पैसे दुप्पट करून देण्याचे आश्वासन देणाऱ्या योजनांमागे फसवणुकीची शक्यता अधिक असते. त्यामुळे अशा आमिषांना बळी पडू नये आणि कोणतीही आर्थिक गुंतवणूक करण्यापूर्वी संबंधित संस्थेची अधिकृतता तपासून घ्यावी, असेही त्यांनी स्पष्ट केले.

कोणताही संशयास्पद आर्थिक व्यवहार, अनधिकृत ठेवी योजना किंवा फसवणुकीचा प्रकार आढळल्यास नागरिकांनी तात्काळ पोलिसांशी संपर्क साधावा. अशा प्रकारे लोकांची दिशाभूल करून फसवणूक करणाऱ्यांविरुद्ध कठोर कायदेशीर कारवाई करण्यात येईल, असा इशाराही पोलीस अधीक्षक के. रामराजन यांनी दिला.

The post पैसे दुप्पट करण्याच्या आमिषांपासून सावध राहा appeared first on News 24 Tass Marathi.

बेळगाव : खानापूर तालुक्यातील कातगाळी गावात बेकायदेशीरपणे गावठी बंदुकांची निर्मिती आणि विक्री करणाऱ्या टोळीचा खानापूर पोलिसांनी पर्दाफाश करत १३ जणांना अटक केली आहे. जिल्हा पोलीस अधीक्षक के. रामराजन यांनी बेळगावमधील पत्रकार परिषदेत ही माहिती दिली. या कारवाईत नऊ गावठी बंदुका, दारूगोळा आणि शस्त्रनिर्मितीसाठी वापरले जाणारे साहित्य जप्त करण्यात आले असून, तालुक्यातील बेकायदेशीर शस्त्रनिर्मितीचे जाळे उघडकीस आले आहे.

या पत्रकार परिषदेत जिल्हा पोलीस अधीक्षक के. रामराजन पुढे म्हणाले, मारुती श्रीकांत सुतार हा संशयित २०२४ पासून स्वतःच्या घरातच गावठी बंदुका तयार करून त्यांची विक्री करत होता. गुप्त माहितीच्या आधारे खानापूर पोलिसांनी कातगाळी येथे धाड टाकून त्याला ताब्यात घेतले. चौकशीत त्याने तयार केलेल्या आणि विकलेल्या बंदुकांचा तपशील समोर आला.

पोलिसांनी मुख्य आरोपीसह बंदुकीचे सुटे भाग, दारूगोळा आणि आर्थिक मदत पुरवणाऱ्या इतर साथीदारांनाही अटक केली आहे. यामध्ये बंदुकीच्या बॅरलचे वेल्डिंग करणाऱ्या एका कारागिराचाही समावेश आहे.

कारवाईदरम्यान ट्रिगर, बंदुकीचे सुटे भाग, शिशाच्या गोळ्या, जिवंत काडतुसे आणि इतर साहित्य असा मोठा साठा जप्त करण्यात आला. अटक करण्यात आलेल्या सर्व १३ आरोपींना न्यायालयासमोर हजर केले असता त्यांना न्यायालयीन कोठडी सुनावण्यात आली असून, या प्रकरणाचा पुढील तपास सुरू आहे.

The post खानापुरात बेकायदेशीर बंदूक निर्मितीच्या रॅकेटचा पर्दाफाश appeared first on News 24 Tass Marathi.

बेळगाव : गोव्याला निघालेल्या सुवर्ण कारागिरांचे अपहरण करून पिस्तूल आणि चाकूचा धाक दाखवत रोख रक्कम व सोने लुटणाऱ्या टोळीचा खानापूर पोलिसांनी पर्दाफाश केला असून या प्रकरणी आठ आरोपींना अटक करण्यात आली आहे. आरोपींकडून वाहने, शस्त्रे, रोकड आणि इतर साहित्यांसह ४०.५० लाख रुपयांचा मुद्देमाल जप्त करण्यात आला आहे.

पोलीस अधीक्षक के. रामराजन यांनी पत्रकार परिषदेत दिलेल्या माहितीनुसार, शहापूर येथे वास्तव्यास असलेले आणि मूळचे पश्चिम बंगालचे एस. के. इबादुल यांनी तक्रार दाखल केली होती. इबादुल हे त्यांचे सहकारी रबीयतल गाझी आणि अली हुसेन मंडल यांच्यासह कारने गोव्याकडे निघाले होते. खानापूर तालुक्यातील उचवडे गावाजवळील बैलूर क्रॉस परिसरात राष्ट्रीय महामार्ग ७४८ वर काही अज्ञातांनी त्यांची कार अडवली. त्यानंतर तिघांना जवळच्या शेतात नेऊन पिस्तूल व चाकूचा धाक दाखवत त्यांच्याकडील रोकड आणि सोन्याचे दागिने लुटण्यात आले.

दरोडेखोरांनी इबादुल यांच्याकडील १ लाख २०० रुपये रोख रक्कम तसेच रबीयतल गाझी यांच्याकडील सुमारे २२५ ग्रॅम सोने घेऊन पलायन केले होते. या घटनेचा तपास सुरू असताना पोलिसांसमोर धक्कादायक माहिती आली. तपासात तक्रारदारासोबत प्रवास करणारे रबीयतल गाझी आणि अली हुसेन मंडल यांनीच दरोड्याचा संपूर्ण कट आखल्याचे निष्पन्न झाले.

पोलिसांच्या माहितीनुसार, दोघांनी शहापूरमधील सादीक तोरगल याच्या मदतीने विवेक चंद्रकांत पाटील याला तीन लाख रुपयांची सुपारी दिली होती. त्यानंतर विवेक पाटीलने आपल्या साथीदारांच्या साहाय्याने हा दरोडा घडवून आणल्याचे तपासात स्पष्ट झाले.

या प्रकरणात रबीयतल रुहुल अमीन गाझी, अली हुसेन कविरुद्दीन मंडल, सादीक अब्दुल रहमान तोरगल, विवेक चंद्रकांत पाटील, प्रशांत महादेव चव्हाण, नितीन राजाराम चव्हाण, दिगंबर नागेश पाटील आणि मयूर राजू घाडी यांना अटक करण्यात आली आहे. हे सर्व आरोपी बेळगाव परिसरातील विविध भागांतील रहिवासी असल्याचे पोलिसांनी सांगितले.

अटक केलेल्या आरोपींकडून पोलिसांनी सुझुकी ब्रेझा, एर्टिगा व अन्य एक कार, १ लाख २०० रुपयांची रोकड, देशी बनावटीचे पिस्तूल, चाकू, आठ मोबाईल फोन, मोटारसायकल तसेच २०५ ग्रॅम वजनाचे बनावट सोन्याचे बिस्कीट असा एकूण ४० लाख ५० हजार २०० रुपयांचा मुद्देमाल जप्त केला आहे. सर्व आरोपींना न्यायालयात हजर करण्यात आले असून पुढील तपास सुरू असल्याचे पोलीस अधीक्षक के. रामराजन यांनी सांगितले.

The post गोव्याला जाणाऱ्या सुवर्ण कारागिरांचे अपहरण करून दरोडा appeared first on News 24 Tass Marathi.

बेळगाव जिल्ह्यात पोलिसांसह अनेक नागरिकांना खोट्या गुन्ह्यांत अडकवून ब्लॅकमेल केल्याचे या महिलेविरोधातील तपासात उघड झाले आहे. एका पोलीस निरीक्षकाला लाचखोरीच्या खोट्या प्रकरणात अडकविण्याचा कट तिने रचल्याचे समोर आले असून, फॉरेन्सिक तपासणीत या प्रकरणातील धक्कादायक बाबी स्पष्ट झाल्या आहेत.

उपअधीक्षक वीरय्या हिरेमठ यांच्या विशेष पथकाने केलेल्या चौकशीत, २०१२ ते २०२५ या कालावधीत रेणमा मुतगा हिने विविध पोलीस ठाण्यांत लग्न, फसवणूक आणि बलात्कारासंदर्भातील पाचहून अधिक खोटे गुन्हे दाखल केल्याची माहिती समोर आली आहे. या माध्यमातून संबंधित व्यक्तींना धमकावून आर्थिक फायदा मिळविण्याचा प्रकार सुरू असल्याचे पोलिसांनी सांगितले.

जिल्हा पोलीस अधीक्षक के. रामराजन यांनी दिलेल्या माहितीनुसार, या गुन्हेगारी प्रकारामागे एका मोठ्या टोळीचा हात असल्याचा संशय आहे. पोलीस कर्मचारी तसेच निष्पाप नागरिकांना लक्ष्य करणाऱ्या या टोळीला कायदेशीर आणि आर्थिक मदत करणाऱ्या सूत्रधारांचाही शोध सुरू आहे.

या प्रकरणातील सर्व संबंधितांविरोधात कठोर कायदेशीर कारवाई करण्यात येणार असल्याचे पोलिसांनी स्पष्ट केले असून, तपास अधिक व्यापक करण्यात आला आहे.

The post बड्या व्यक्तींना ‘हनी ट्रॅप’मध्ये अडकवून खंडणी वसूल करणाऱ्या महिलेला अटक appeared first on News 24 Tass Marathi.

बेळगाव : जिल्ह्यात सुरू असलेल्या अवैध वाळू उत्खनन आणि दगडखाणींना आळा घालण्यासाठी पोलीस विभागाने कडक भूमिका घेतली आहे. अवैध कारवायांविरोधात वेळेत गुन्हे नोंद न करणाऱ्या पोलीस कर्मचाऱ्यांवरही कारवाई केली जाईल, असा स्पष्ट इशारा जिल्हा पोलीस अधीक्षक के. रामराजन यांनी दिला.

बेळगाव येथे आयोजित पत्रकार परिषदेत बोलताना एसपी रामराजन म्हणाले की, जिल्ह्यात कोणत्याही प्रकारचे अवैध वाळू उत्खनन किंवा बेकायदेशीर दगडखाणी चालवण्यास मुळीच परवानगी दिली जाणार नाही. ज्या ठिकाणी अशा प्रकारच्या कारवाया सुरू असल्याची माहिती मिळेल, त्या ठिकाणी पोलीस स्वतः जाऊन तपास करतील. अवैध उत्खनन रोखण्यासाठी विशेष पथकाची स्थापना करण्यात आली असून विविध भागांत तपासणी मोहीम सुरू असल्याचे त्यांनी स्पष्ट केले. काही ठिकाणांबाबत तक्रारी प्राप्त झाल्या असून संबंधितांविरोधात कारवाईची प्रक्रिया सुरू करण्यात आल्याची माहितीही त्यांनी दिली.

अवैध उत्खननातून मिळालेल्या मालमत्तेवर शासनाचा कर भरावा लागेल, जिल्ह्यात कुठेही अवैध उत्खनन सुरू असल्याचे आढळल्यास संबंधित भागातील बीट कॉन्स्टेबल, पोलीस निरीक्षक आणि पोलीस निरीक्षक यांना जबाबदार धरले जाईल. तक्रारींकडे दुर्लक्ष करणाऱ्या अधिकाऱ्यांवर विभागीय कारवाई करण्यात येईल, असेही त्यांनी स्पष्ट केले.

The post अवैध वाळू उत्खननावर पोलिसांची करडी नजर appeared first on News 24 Tass Marathi.

बेळगाव : कित्तूर पोलीस ठाण्याच्या हद्दीतील देवगाव येथे घरासमोर झोपण्याच्या कारणावरून झालेल्या किरकोळ वादाचे पर्यवसान थेट हत्येत झाले.
बुधवारी पहाटे घडलेल्या या घटनेमुळे परिसरात खळबळ उडाली. या प्रकरणी कित्तूर पोलिसांनी तातडीने कारवाई करत आरोपीला काही तासांत अटक केली असल्याची माहिती जिल्हा पोलीस अधीक्षक के.रामराजन यांनी दिली.

बेळगावात येथे झालेल्या पत्रकार परिषदेत जिल्हा पोलीस अधीक्षक के.रामराजन यांनी दिलेल्या माहितीनुसार, ६ मे २०२६ रोजी पहाटे सुमारे २.३० वाजण्याच्या सुमारास ही घटना घडली. महांतेश निंगाप्पा हुच्चन्नावर (वय ५२) हे आरोपी प्रकाश कल्लप्पा कलार यांच्या घरासमोर झोपले होते. “माझ्या घरासमोर का झोपला?” या कारणावरून दोघांमध्ये वाद झाला.

वाद वाढल्यानंतर आरोपी प्रकाश कलार याने महांतेश यांना खाली पाडून दगडाने त्यांच्या डोक्यावर वार केले. त्यानंतर त्यांचा मृतदेह रस्त्यावर ओढत नेल्याची धक्कादायक माहिती पोलिस तपासात समोर आली आहे. या घटनेनंतर मृताचे नातेवाईक राजू पुंडलिक हुच्चन्नावर यांनी कित्तूर पोलीस ठाण्यात तक्रार दाखल केली. पोलिसांनी तातडीने तपास सुरू करून आरोपी प्रकाश कलार याला अटक केली.

या कारवाईत बैलहोंगलचे डीएसपी डॉ. वीरय्या हिरेमठ, सीपीआय शिवानंद गुडेगनट्टी, पीएसआय प्रवीण गंगोळ आणि कित्तूर पोलीस ठाण्याच्या पथकाने महत्त्वाची भूमिका बजावली. जिल्हा पोलीस अधीक्षक के. रामराजन आणि अतिरिक्त पोलीस अधीक्षक आर. बी. बसरगी यांनी पथकाच्या जलद कारवाईचे कौतुक केले आहे.

The post कित्तूर देवगाव येथे क्षुल्लक वादातून एकाची निर्घृण हत्या appeared first on News 24 Tass Marathi.