संघात सोहम पाटील, आशुतोष हिरेमठ, अर्णव कुंदप आणि जतिन पडती यांची निवड करण्यात आली आहे. आंतरक्लब स्पर्धा, आंतरजिल्हा सामने आणि विविध लीग स्पर्धांमध्ये केलेल्या सातत्यपूर्ण व उल्लेखनीय कामगिरीच्या जोरावर या चौघांनी विभागीय संघात स्थान मिळवले आहे.

सोहम पाटील याने संपूर्ण हंगामात ५३ बळी घेत गोलंदाजीत आपली वेगळी छाप पाडली. जतिन पडती याने ९७६ धावा करत फलंदाजीत सातत्य राखले. अर्णव कुंदप याने ७७९ धावा आणि २४ बळी घेत अष्टपैलू खेळाडू म्हणून प्रभावी कामगिरी केली, तर आशुतोष हिरेमठ यानेही सातत्यपूर्ण प्रदर्शनाच्या जोरावर निवड समितीचे लक्ष वेधून घेत संघात स्थान मिळवले.

या चारही खेळाडूंच्या निवडीमुळे बेळगावच्या क्रिकेटला नवी ऊर्जा मिळाली असून, राज्यस्तरीय स्पर्धेतही ते दमदार कामगिरी करतील, अशी अपेक्षा क्रीडाप्रेमींनी व्यक्त केली आहे.

The post धारवाड विभागीय अंडर – १९ क्रिकेट संघात बेळगावच्या चार खेळाडूंची निवड appeared first on News 24 Tass Marathi.

मुंबई : भारतीय संघाचा अनुभवी फलंदाज अजिंक्य रहाणे याने आंतरराष्ट्रीय क्रिकेटच्या सर्व प्रकारांतून निवृत्ती जाहीर केली आहे. इंस्टाग्रामवर भावनिक व्हिडिओ आणि पोस्ट शेअर करत त्याने आपल्या आंतरराष्ट्रीय कारकिर्दीला पूर्णविराम दिला. या पोस्टमध्ये त्याने भारतीय क्रिकेट नियामक मंडळ (बीसीसीआय), सहकारी खेळाडू, प्रशिक्षक आणि चाहत्यांचे मनापासून आभार मानले.

रहाणेने आपल्या पोस्टमध्ये, “कॅप २७८ आता निरोप घेत आहे. इतकी वर्षे दिलेल्या प्रेमासाठी आणि पाठिंब्यासाठी मनापासून धन्यवाद. तुमचा मी कायम ऋणी राहीन,” असे लिहित आपल्या भावना व्यक्त केल्या.

भारतासाठी रहाणेने ८५ कसोटी, ९० एकदिवसीय आणि २० टी-२० आंतरराष्ट्रीय सामने खेळले. कसोटी क्रिकेटमध्ये त्याने ५,०७७ धावा करत १२ शतके आणि २६ अर्धशतके झळकावली. त्याची सर्वोच्च खेळी १८८ धावांची राहिली. एकदिवसीय क्रिकेटमध्ये त्याने २,९६२ धावा करत ३ शतके आणि २४ अर्धशतके नोंदवली, तर टी-२० क्रिकेटमध्ये ३७५ धावा केल्या.

रहाणेने भारताकडून अखेरचा आंतरराष्ट्रीय सामना जुलै २०२३ मध्ये वेस्ट इंडिजविरुद्धच्या कसोटी मालिकेत खेळला होता. त्याचा शेवटचा वनडे सामना २०१८ मध्ये, तर टी-२० सामना २०१६ मध्ये झाला होता.

शांत, संयमी आणि विश्वासार्ह फलंदाज म्हणून ओळख निर्माण करणाऱ्या अजिंक्य रहाणेने अनेक संस्मरणीय खेळी करत भारतीय क्रिकेटला महत्त्वपूर्ण योगदान दिले. त्याच्या निवृत्तीमुळे भारतीय क्रिकेटमधील एका यशस्वी आणि प्रेरणादायी पर्वाचा शेवट झाला आहे.

The post अजिंक्य रहाणेची आंतरराष्ट्रीय क्रिकेटमधून निवृत्ती appeared first on News 24 Tass Marathi.

बेळगाव : बेंगळुरू येथील चिन्नास्वामी स्टेडियमवर सुरू असलेल्या महाराणी महिला क्रिकेट स्पर्धेत हुबळी टायगर्स संघाने कल्याणी बेंगळुरू ब्लास्टर्सवर ६ गडी राखून शानदार विजय मिळवला. या सामन्यात बेळगावच्या श्रेया पोटे हिने प्रभावी गोलंदाजी करत तीन महत्त्वाचे बळी घेत संघाच्या विजयात मोलाचा वाटा उचलला.

प्रथम फलंदाजी करताना कल्याणी बेंगळुरू ब्लास्टर्स संघाने निर्धारित २० षटकांत ९ बाद १५८ धावा उभारल्या. हुबळी टायगर्सकडून श्रेया पोटे हिने उत्कृष्ट गोलंदाजी करत ३ षटकांत ३२ धावा देऊन ३ महत्त्वाचे बळी घेत प्रतिस्पर्धी संघाला मोठी धावसंख्या उभारण्यापासून रोखले. तिच्या या दमदार कामगिरीमुळे बेळगावच्या क्रीडा क्षेत्राच्या शिरपेचात आणखी एक मानाचा तुरा रोवला गेला.

१५९ धावांच्या लक्ष्याचा पाठलाग करताना हुबळी टायगर्सच्या फलंदाजांनी संयमी आणि आक्रमक खेळीचे दर्शन घडवत १९.१ षटकांत ४ गड्यांच्या मोबदल्यात विजयी लक्ष्य गाठले आणि स्पर्धेतील आपली विजयी घोडदौड कायम राखली. श्रेयाला कर्नाटक राज्य क्रिकेट संघटनेचे सदस्य व धारवाड विभागीय क्रिकेट समितीचे माजी समन्वयक अविनाश पोतदार यांचे मार्गदर्शन लाभत आहे.

The post श्रेया पोटेच्या दमदार गोलंदाजीने हुबळी टायगर्सचा दणदणीत विजय appeared first on News 24 Tass Marathi.

हुबळी : कर्नाटक राज्य क्रिकेट संघटना (केएससीए)तर्फे प्रथमच आयोजित करण्यात येणाऱ्या १९ वर्षांखालील महिला आंतर-ग्रामीण विभागीय क्रिकेट स्पर्धेसाठी धारवाड विभागीय संघ जाहीर करण्यात आला आहे. या संघाच्या कर्णधारपदी सलामीवीर फलंदाज श्रेया पोटे तर उपकर्णधारपदी झोया इम्तियाज काझी हिची निवड करण्यात आली आहे.

केएससीएचे अध्यक्ष व्यंकटेश प्रसाद यांच्या नेतृत्वाखाली प्रथमच ही स्पर्धा आयोजित करण्यात येत असून, ती २३ जुलै ते १ ऑगस्ट या कालावधीत बंगळुरूत रंगणार आहे. २२ जुलै रोजी महाराणी ट्रॉफी स्पर्धेच्या उद्घाटन सामन्याने या स्पर्धेची सुरुवात होणार असून, ग्रामीण भागातील महिला क्रिकेटपटूंना मोठे व्यासपीठ उपलब्ध करून देण्याच्या दृष्टीने हा महत्त्वाचा उपक्रम मानला जात आहे.

धारवाड विभागाचे निमंत्रित वीरण्णा सवदी यांनी सोमवारी ४१ सदस्यीय संघाची घोषणा केली. अंतिम संघात श्रेया पोटे (कर्णधार), झोया इम्तियाज काझी (उपकर्णधार), आराधना हेब्बीकर, प्रार्थना बी. गौडा (यष्टीरक्षक), अपूर्वा अशोक होसवक्की, सिमरा लोंदेवाले, रिमझिम शुक्ला, अनुषा एस. मेनासिनाके, हर्षिता विक्रम नायक, अन्वी समीर यळ्ळूरकर, वैष्णवी श्रीकांत कांबळे, साक्षी कुबेर मुनवळ्ळी आणि मनुश्री राजेश कुर्थाकोटी यांचा समावेश आहे.

राखीव खेळाडू म्हणून निधी पाटील, त्रिवेणी गर्लगुंजी आणि दिशा पाटील यांची निवड करण्यात आली आहे. संघाचे प्रशिक्षक मल्लिकार्जुन बी., तर व्यवस्थापक म्हणून प्रद्या खिलारे यांच्यावर जबाबदारी सोपविण्यात आली आहे.

श्रेया पोटे हिला कर्नाटक राज्य क्रिकेट संघटनेचे सदस्य व धारवाड विभागीय क्रिकेट समितीचे माजी सन्मान्वयक अविनाश पोतदार यांचे मार्गदर्शन लाभत आहे. तसेच क्रिकेट प्रशिक्षक फिरोज शेख , फिटनेस प्रशिक्षक ओंकार मोटर आणि सतीश मोरे यांचे सहकार्य लाभले आहे.

The post धारवाड विभागीय महिला क्रिकेट संघाच्या कर्णधारपदी ‘श्रेया पोटे’ appeared first on News 24 Tass Marathi.

The post श्रेया पोटे हिची हुबळी टायगर संघात निवड appeared first on News 24 Tass Marathi.

अहमदाबाद : रॉयल चॅलेंजर्स बंगळुरूने आयपीएल २०२६ च्या अंतिम सामन्यात दमदार कामगिरी करत गुजरात टायटन्सवर मात केली आणि सलग दुसऱ्यांदा विजेतेपद पटकावण्याचा मान मिळवला. अहमदाबाद येथील नरेंद्र मोदी स्टेडियमवर झालेल्या या रंगतदार सामन्यात बंगळुरूने १५६ धावांचे लक्ष्य १८ षटकांत पूर्ण करत ट्रॉफीवर पुन्हा एकदा आपले नाव कोरले.

लक्ष्याचा पाठलाग करताना आरसीबीची सुरुवात भक्कम झाली. सलामीवीर विराट कोहली आणि वेंकटेश अय्यर यांनी पहिल्या विकेटसाठी ६२ धावांची भागीदारी उभारून संघाचा पाया मजबूत केला. अय्यरने ३२ धावांचे योगदान दिले, तर विराट कोहलीने नाबाद ७५ धावांची खेळी साकारत संघाला विजयाच्या उंबरठ्यावर नेले. देवदत्त पडिक्कलला मोठी खेळी करता आली नाही. त्यानंतर टीम डेव्हिडने २४ धावा केल्या, तर कृणाल पंड्या एक धावेवर बाद झाला. अखेरीस विराटच्या षटकाराने बंगळुरूच्या विजयावर शिक्कामोर्तब झाले.

यापूर्वी नाणेफेक गमावल्यानंतर प्रथम फलंदाजीस उतरलेल्या गुजरात टायटन्सला अपेक्षित सुरुवात मिळाली नाही. साई सुदर्शन १२ आणि कर्णधार शुबमन गिल १० धावांवर माघारी परतल्याने संघ दबावात आला. निशांत सिंधूने २० धावा केल्या, तर जोस बटलर १९ धावांवर बाद झाला. मधल्या फळीत अर्शद खानने १५, राहुल तेवतिया आणि जेसन होल्डर यांनी प्रत्येकी ७ धावांचे योगदान दिले. अखेर वॉशिंग्टन सुंदरने संयमी अर्धशतक झळकावत नाबाद ५० धावा केल्या. त्याच्या खेळीमुळे गुजरातने २० षटकांत ८ बाद १५५ धावांपर्यंत मजल मारली.

• सलग दोन हंगामांतील ऐतिहासिक यश :

आयपीएलच्या सुरुवातीपासून अनेक वर्षे विजेतेपदाची प्रतीक्षा करणाऱ्या रॉयल चॅलेंजर्स बंगळुरूने गेल्या दोन हंगामांत इतिहास रचला आहे. रजत पाटीदारच्या नेतृत्वाखाली संघाने प्रथम मागील हंगामात पंजाब किंग्सचा पराभव करून पहिले जेतेपद जिंकले होते. त्यानंतर २०२६ च्या अंतिम सामन्यात गुजरात टायटन्सवर विजय मिळवत बंगळुरूने विजेतेपदाचे यशस्वी संरक्षण केले आणि सलग दुसऱ्यांदा आयपीएल चॅम्पियन बनण्याचा पराक्रम केला.

The post आरसीबी सलग दुसऱ्यांदा आयपीएल चॅम्पियन ! appeared first on News 24 Tass Marathi.

बेळगाव : टाटा आयपीएल २०२६ स्पर्धेच्या अंतिम फेरीत रॉयल चॅलेंजर्स बंगळुरू (आरसीबी) संघाने स्थान मिळवल्यानंतर संभाव्य जल्लोषाच्या पार्श्वभूमीवर बेळगाव शहर पोलिसांनी विशेष खबरदारीचे उपाय जाहीर केले आहेत. शहरातील कायदा व सुव्यवस्था कायम राखण्यासाठी पोलीस आयुक्त भूषण बोरसे यांनी नागरिकांसाठी विविध मार्गदर्शक सूचना जारी केल्या आहेत.

पोलिसांनी प्रसिद्ध केलेल्या निवेदनानुसार, ३१ मे रोजी अंतिम सामना संपल्यानंतर कोणत्याही प्रकारच्या सार्वजनिक मिरवणुका, विजय उत्सव किंवा रस्त्यावर होणाऱ्या जल्लोषाला परवानगी दिली जाणार नाही. तसेच सार्वजनिक ठिकाणी सामना दाखविण्यासाठी एलईडी स्क्रीन किंवा वॉल उभारायची असल्यास संबंधित स्थानिक स्वराज्य संस्था अथवा महापालिकेची पूर्वपरवानगी घेणे बंधनकारक राहणार आहे. याशिवाय आधीपासून उभारलेल्या बाह्य एलईडी स्क्रीनवर सामना प्रसारित करण्यासही मनाई करण्यात आली आहे.

फटाके फोडणे, धोकादायक वस्तूंचा वापर करणे, वाहतुकीस अडथळा निर्माण करणे, दुचाकी किंवा वाहनांच्या रॅली काढणे, बेफाम वेगाने वाहन चालविणे, स्टंट करणे, विनाकारण हॉर्न वाजविणे अथवा रस्त्यांवर गर्दी करून गोंधळ घालणे यासारख्या प्रकारांवर कठोर कारवाई केली जाणार असल्याचे पोलिसांनी स्पष्ट केले आहे.

याशिवाय सार्वजनिक ठिकाणी मद्यपान करणे, भांडणे, असभ्य वर्तन करणे किंवा कोणत्याही प्रकारे शांतता भंग करणाऱ्या कृतींवर लक्ष ठेवण्यात येणार आहे. सोशल मीडियावर अफवा, द्वेषपूर्ण संदेश किंवा चिथावणीखोर पोस्ट प्रसारित करणाऱ्यांविरोधातही कायदेशीर कारवाईचा इशारा देण्यात आला आहे. तसेच प्रतिस्पर्धी संघांच्या समर्थकांना उद्देशून वादग्रस्त वक्तव्ये किंवा चिथावणीखोर वर्तन टाळण्याचे आवाहन करण्यात आले आहे.

सामन्यानंतर शहरात मद्यधुंद वाहनचालकांविरोधात विशेष तपासणी मोहीम राबविण्यात येणार असून १५ अल्कोमीटरच्या साहाय्याने वाहनचालकांची तपासणी केली जाईल. तसेच धारदार शस्त्रे बाळगणाऱ्या व्यक्तींवर लक्ष ठेवण्यासाठी विशेष ‘अँटी-स्टॅबिंग स्क्वॉड’ तैनात राहणार आहे. कारवाईदरम्यान पोलिसांकडून बॉडी-वॉर्न कॅमेऱ्यांचाही वापर केला जाणार आहे.

मद्यप्राशन करून वाहन चालवताना आढळल्यास मोटार वाहन कायद्यानुसार पहिल्या गुन्ह्यासाठी १० हजार रुपयांपर्यंत दंड आणि सहा महिन्यांपर्यंत कारावासाची तरतूद आहे. पुन्हा त्याच प्रकारचा गुन्हा केल्यास १५ हजार रुपयांचा दंड, दोन वर्षांपर्यंत कारावास तसेच वाहन परवाना रद्द करण्याची कारवाई होऊ शकते, असेही पोलिसांनी नमूद केले आहे.

शहरातील शांतता, सुरक्षितता आणि कायदा-सुव्यवस्था अबाधित राखण्यासाठी नागरिकांनी नियमांचे पालन करून पोलिसांना सहकार्य करावे, असे आवाहन पोलीस आयुक्त भूषण बोरसे यांनी केले आहे.

The post आयपीएल फायनलनंतर सार्वजनिक जल्लोषावर बंदी appeared first on News 24 Tass Marathi.

अहमदाबाद : येथील नरेंद्र मोदी स्टेडियमवर आज टी – २० वर्ल्ड कपच्या २०२६ च्या अंतिम सामन्यात भारताने न्यूझीलंडचा ९६ धावांनी पराभव करत विश्वचषकावर आपले नाव कोरले. विशेष म्हणजे, टीम इंडियाने सलग दोन टी-२० वर्ल्ड कप जिंकणारा पहिला संघ बनण्याचा मान मिळवला आहे. न्यूझीलंडसमोर २५६ धावांचा डोंगर उभा केल्यानंतर भारतीय गोलंदाजांनीही कमाल दाखवत किवी संघाचा पराभव केला.

जसप्रीत बुमराह आणि अक्षर पटेल यांच्या घातक माऱ्यासमोर न्यूझीलंडचा डाव १५९ धावांवरच आटोपला आणि भारताने ९६ धावांनी दणदणीत विजय मिळवत तिसऱ्यांदा टी-२०विश्वचषक पटकावले. हा केवळ विजय नव्हता, तर भारतीय क्रिकेटच्या इतिहासात सुवर्णाक्षरांनी लिहिला जाणारा अभिमानाचा क्षण होता.

न्यूझीलंडचा कर्णधार मिचेल सँटनरने नाणेफेक जिंकून गोलंदाजीचा निर्णय घेतला. भारतातर्फे सलामीच्या संजू सॅमसनने सलग तिसऱ्या सामन्यात झळकावलेले वेगवान अर्धशतक भारताच्या या डावाचे प्रमुख वैशिष्ट्य ठरले. त्याने ४६ चेंडूत पाच चौकार आणि आठ षटकारांसह ८९ धावांची खेळी उभारली. संजू सॅमसननं अभिषेक शर्मा समवेत पहिल्या विकेटसाठी ९८ धावांची आणि ईशान किशनच्या साथीने दुसऱ्या विकेटसाठी १०५ धावांची भागीदारी केली.

संपूर्ण स्पर्धेत धावांसाठी झगडणाऱ्या अभिषेक शर्माने सावध सुरुवात केली. संजूने मॉट हेन्रीच्या पहिल्याच षटकात खणखणीत षटकार लगावत इरादे स्पष्ट केले. न्यूझीलंडने दुसरे षटक फिरकीपटू ग्लेन फिलीप्सला दिले. या स्पर्धेत भारतीय फलंदाज सातत्याने फिरकीपटूंना बाद होत असल्याचे आकडे सांगत होते. त्यामुळे संजू-अभिशेकने फिलीप्सविरुद्ध धोका पत्करला नाही. स्पर्धेतला केवळ दुसराच सामना खेळणाऱ्या जेकब डफीच्या पहिल्या षटकात अभिषेकने दोन तर संजूने एक चौकार लगावला. या षटकाने दोघांना खेळपट्टीचा अंदाज आला. लॉकी फर्ग्युसनचा वेग या दोघांना अडचणीत आणेल अशी चिन्हे होती. मात्र अत्यंत स्वैर गोलंदाजी करणाऱ्या लॉकीच्या गोलंदाजीवर या जोडीने जोरदार आक्रमण केले. फर्ग्युसनच्या पहिल्याच षटकात या दोघांनी २४ धावा वसूल केल्या. हेन्रीच्या पुढच्या षटकात दोघांनी २१ धावा चोपून काढल्या. पॉवरप्लेचे शेवटचे षटक डफीला देण्याचा सँटनरचा निर्णय पूर्णत: चुकला. या दोघांच्या आक्रणमासमोर डफीची लय हरपली. क्षेत्ररक्षणाचे निर्बंध असणाऱ्या या षटकात संजू-अभिषेक जोडीने २० धावा कुटल्या. पॉवरप्लेच्या ६ षटकात ९२ धावांची सलामी देत या जोडीने जणू विजयाचा पाया रचला. याच षटकात अभिषेकने अवघ्या १८ चेंडूत अर्धशतकाला गवसणी घातली.

पॉवरप्ले संपताच संजू-अभिषेक जोडीचा वेग काहीसा मंदावला. रचीन रवींद्रने अभिषेकला बाद केले. टीम सैफर्टने अतिशय सुरेख झेल टिपला. अभिषेकने २१ चेंडूत ५२ धावांची वादळी खेळी साकारली. इशान किशनने अभिषेकचाच कित्ता गिरवत खेळपट्टीवर दाखल झाल्यापासून चौकार-षटकारांना सुरुवात केली. संजू- इशान जोडीने पॉवरप्ले संपल्यानंतरही चौकार- षटकारांची लयलूट कायम राखत भारतीय संघ मोठी धावसंख्या रचेल याची काळजी घेतली. १० षटकात भारतीय संघाने १२७ धावा पटावर नोंदवल्या. वेस्ट इंडिज आणि इंग्लंडविरुद्धचा झंझावाती फॉर्म कायम राखत संजूने सँटनरच्या चेंडूवर एक धाव घेत अर्धशतक पूर्ण केले. फर्ग्युसनला लक्ष्य करत संजू-ईशान जोडीने २४ धावा लुटल्या. रचीन रवींद्रच्या षटकात संजूने षटकारांची हॅट्रिक केली. या भागीदारीच्या बळावरच भारतीय संघाने टी२० वर्ल्डकप फायनलमध्ये सर्वाधिक धावसंख्येचा विक्रम मागे टाकला.

शतकाकडे वेगवान वाटचाल करणाऱ्या संजूला जेमी नीशामने रोखले. लॉना ऑनच्या डोक्यावर षटकार लगावण्याचा संजूचा प्रयत्न बदली खेळाडू मॅकहोनीच्या हातात जाऊन विसावला. संजूने फायनलसारख्या दडपणाच्या सामन्यात ४६ चेंडूत ५ चौकार आणि ८ षटकारांसह ८९ धावांची तडाखेबंद खेळी साकारली. धावसंख्या वाढवण्याच्या नादात याच षटकात ईशाननेही आपली विकेट गमावली. त्याने २५ चेंडूत ५४ धावांची वेगवान खेळी केली. या जोडीने दुसऱ्या विकेटसाठी ४८ चेंडूत १०५ धावांची अतिवेगवान भागीदारी साकारली. खेळपट्टीवर आल्या आल्या सुपला फटका खेळायचा सूर्यकुमार यादवचा प्रयत्न रवींद्रने सफल होऊ दिला नाही. कर्णधार सूर्याला महत्त्वपूर्ण लढतीत भोपळाही फोडता आला नाही. हार्दिक पंड्या १८ धावा करून तंबूत परतला. शेवटच्या षटकात २४ धावा चोपून काढत भारतीय संघाने २५५ धावांचा डोंगर उभारला.

दक्षिण आफ्रिकेविरुद्ध ३३ चेंडूत शतक झळकावणाऱ्या फिन ॲलनला अक्षर पटेलने बाद करत न्यूझीलंडला पहिला दणका दिला.ॲलनकडून न्यूझीलंडला मोठ्या खेळीची अपेक्षा होती. मात्र तिसऱ्याच षटकात अक्षरने त्याची खेळी संपुष्टात आणली. पुढच्याच षटकात जसप्रीत बुमराहच्या स्लोअरवन चेंडूवर रचीन रवींद्र फसला. अक्षर पटेलच्या फिरकीचे कोडे ग्लेन फिलीप्स सोडवू शकला आणि त्रिफळाचीत झाला. हार्दिक पंड्याचा ऑफस्टंपबाहेरचा चेंडू मारायच्या प्रयत्नाच चेंडू स्टंप्सवर आदळला. अर्धशतक पूर्ण केलेल्या वरुण चक्रवर्तीने बाद केले. जसप्रीत बुमराहने अवघ्या १५ धावा देत न्यूझीलंडच्या चार फलंदाजांना माघारी धाडले.

भारताचा वेगवान गोलंदाज जसप्रीत बुमराह आणि फिरकीपटू अक्षर पटेल यांनी अचूक आणि घातक गोलंदाजी करत किवी फलंदाजांना जखडून ठेवले. नियमित अंतराने विकेट्स घेत भारताने सामन्यावर पकड मजबूत केली. दबावाखाली खेळणाऱ्या न्यूझीलंडच्या फलंदाजांना मोठी भागीदारी करता आली नाही. परिणामी संपूर्ण संघ १५९ धावांवर मर्यादित राहिला आणि भारताने हा सामना ९६ धावांनी जिंकला.

The post भारत ‘विश्वविजेता’…सलग दुसऱ्यांदा जेतेपदावर कोरलं नाव ! appeared first on News 24 Tass Marathi.

मुंबई : वानखेडेच्या ऐतिहासिक मैदानावर टी-२० विश्वचषक २०२६ च्या दुसऱ्या उपांत्य सामन्यात टीम इंडियाने बलाढ्य इंग्लंडचा ७ धावांनी धुव्वा उडवत दिमाखात अंतिम फेरीत प्रवेश केला. संजू सॅमसन, ईशान किशन आणि शिवम दुबे यांच्या वादळी फलंदाजीच्या जोरावर भारताने २५३ धावांचा डोंगर उभा केला होता. त्याला इंग्लंडकडून जेकब बेथेलने शेवटपर्यंत एकाकी झुंज दिली. मात्र इंग्लंडचा संघ २४६ धावांत गारद झाला.

२५४ धावांचा पाठलाग करताना इंग्लंडची सुरुवात पण धक्कादायक झाली. हार्दिक पांड्याने दुसऱ्या षटकाच्या पहिल्याच चेंडूवर भारताला पहिले यश मिळवून देत फिल साल्टला ५ धावांवर बाद केले.त्यानंतर हॅरी ब्रूकही मोठी खेळी करू शकला नाही, तो ७ धावा करून जसप्रीत बुमराहच्या चेंडूवर अक्षर पटेलकडे झेल देत माघारी परतला. जोस बटलर मात्र चांगल्या लयीत दिसत होता, पण त्याची खेळीही फार काळ टिकली नाही. २५ धावांवर असताना फिरकीपटू वरुण चक्रवर्तीने त्याचा त्रिफळा उडवत इंग्लंडला मोठा धक्का दिला. यानंतर टॉम बॅन्टनने (१७) अक्षर पटेलच्या गोलंदाजीवर दोन गगनचुंबी षटकार ठोकत प्रतिकार करण्याचा प्रयत्न केला. मात्र अक्षर पटेलनेच त्याला लगेच बाद करत इंग्लंडला आणखी एक धक्का दिला. जेकब बेथेलने एकाकी झूज दिली. त्याने आधी अवघ्या १९ चेंडूमध्ये आपले अर्धशतक पूर्ण केले. त्यानंतर त्याने ४५ चेंडूत शतक ठोकले, पण तो संघाला विजय मिळून देऊ शकला नाही.

प्रारंभी इंग्लंडचा कर्णधार हॅरी ब्रूकने नाणेफेक जिंकून टीम इंडियाला प्रथम फलंदाजीचे निमंत्रण दिले. मात्र टीम इंडियाची सुरुवात काहीशी निराशाजनक झाली. सलामीवीर अभिषेक शर्मा पुन्हा एकदा अपयशी ठरला. त्याने ७ चेंडूत २ चौकारांच्या मदतीने केवळ ९ धावा केल्या. पण, यानंतर संजू सॅमसन आणि ईशान किशन यांनी डाव सावरत भारतीय संघाला शंभरी पार करून दिली. ईशान किशनने आक्रमक फलंदाजी करत १८ चेंडूत ३९ धावा केल्या.

दुसऱ्या बाजूला संजू सॅमसनने धडाकेबाज अर्धशतक झळकावले. तो ४२ चेंडूत ७ चौकार आणि ७ षटकारांच्या जोरावर ८९ धावा करून बाद झाला. सॅमसन बाद झाल्यानंतर शिवम दुबेने तुफानी फलंदाजी करत २५ चेंडूत ४३ धावा ठोकल्या. मात्र, दुर्दैवाने तो धावबाद झाला. दुसरीकडे सूर्यकुमार यादव पुन्हा एकदा अपयशी ठरला. त्याला ६ चेंडूत ११ धावा करता आल्या. यानंतर तिलक वर्माने अवघ्या ७ चेंडूत ३ षटकारांसह २१ धावांची झंझावाती खेळी केली, तर हार्दिक पांड्याने १२ चेंडूत २७ धावा जलदगतीने धावा जमविल्या. जोरावर भारताने २० षटकांत ७ बाद २५३ धावांचा डोंगर उभारला.

आता रविवारी भारत आणि न्यूझीलंड यांच्यात अहमदाबादमधील नरेंद्र मोदी स्टेडियमवर टी-२० विश्वचषक २०२६ चा अंतिम सामना रंगणार आहे.

The post टीम इंडियाचा दिमाखात अंतिम फेरीत प्रवेश appeared first on News 24 Tass Marathi.

कोलकाता : आयसीसी टी-२० वर्ल्डकप २०२६ स्पर्धेतील सुपर ८ फेरीतील निर्णायक सामन्यात भारताने वेस्ट इंडिजवर ५ विकेट्सने दमदार विजय मिळवत सेमी फायनलमध्ये धडक मारली. कोलकाता येथील ईडन गार्डन मैदानावर झालेल्या या सामन्यात विजयासाठी १९६ धावांचे आव्हान पार करताना संजू सॅमसनने नाबाद ९७ धावांची अप्रतिम खेळी साकारत संघाला विजय मिळवून दिला.

१९६ धावांच्या मोठ्या लक्ष्याचा पाठलाग करताना भारतीय संघाची सुरुवात डळमळीत झाली. अभिषेक शर्मा (१०) आणि ईशान किशन (१०) स्वस्तात माघारी परतले. कर्णधार सूर्यकुमार यादव याच्याकडून मोठ्या खेळीची अपेक्षा होती; मात्र तो १८ धावांवर बाद झाला.

यानंतर तिलक वर्मा आणि संजू सॅमसन यांनी डाव सावरत महत्त्वपूर्ण भागीदारी रचली. तिलक २७ धावांवर बाद झाला. हार्दिक पांड्या याने १७ धावांचे योगदान दिले. मात्र संजू सॅमसन शेवटपर्यंत क्रीजवर ठाम उभा राहिला. त्याने नाबाद ९७ धावांची खेळी करत भारताचा विजय निश्चित केला.

प्रारंभी , नाणेफेक जिंकून भारताने प्रथम गोलंदाजीचा निर्णय घेतला. वेस्ट इंडिजने ४ गडी बाद १९५ धावा केल्या. शे होप (३२) आणि रोस्टन चेसने (४०) यांनी पहिल्या विकेटसाठी ६८ धावांची भागीदारी केली. शिमरन हेटमायरला २७ धावांवर बाद झाला, तर रुथरफोर्डने १४ धावा केल्या. शेवटच्या षटकांत रोमन पॉवेलने (नाबाद ३४) आणि जेसन होल्डरने (नाबाद ३७) यांनी धावा जोडत संघाला १९५ पर्यंत मझल मारून दिली. महत्त्वाच्या सामन्यात दडपणाखाली खेळताना भारताने संयम राखत विजय मिळवला आणि सेमी फायनलच्या दिशेने दमदार पाऊल टाकले.

The post टीम इंडियाची सेमी फायनलमध्ये धडक appeared first on News 24 Tass Marathi.