प्रकरणाचा तपास करणाऱ्या सीआयडी अधिकाऱ्यांनी दाखल केलेल्या अर्जावर सुनावणी घेत न्यायाधीश के. गंगाधर यांनी निलण्णावर यांना १४ दिवसांची न्यायालयीन कोठडी सुनावली. सीआयडी कोठडीची मुदत संपल्यानंतर त्यांना न्यायालयात हजर करण्यात आले होते.

सुनावणीदरम्यान निलण्णावर यांनी छातीत दुखत असल्याची तक्रार करत योग्य वैद्यकीय उपचार मिळावेत, अशी विनंती न्यायालयाकडे केली. यावर न्यायालयाने आरोग्य तपासणी करून आवश्यक उपचार उपलब्ध करून दिले जातील, असे स्पष्ट केले.

“बीम्स रुग्णालय येथे चांगल्या उपचारांची सुविधा उपलब्ध आहे. आवश्यकता भासल्यास केआयएमएस रुग्णालय येथेही उपचार करता येतील. पुढील उपचारांची गरज असल्यास वकिलामार्फत अर्ज दाखल करावा. तुरुंगात आरोग्य समस्या उद्भवल्यास प्रशासनाकडून उपचार केले जातील,” असे न्यायालयाने नमूद केले.

दरम्यान, या प्रकरणाचा तपास अद्याप सुरू असून निलण्णावर यांनी तपास अधिकाऱ्यांना पूर्ण सहकार्य करावे, असे निर्देशही न्यायालयाने दिले आहेत. न्यायालयीन आदेशानंतर शिवानंद निलण्णावर यांना बेळगाव येथील हिंडलगा मध्यवर्ती कारागृह येथे हलविण्यात आले.

The post शिवानंद निलण्णावर यांना १४ दिवसांची न्यायालयीन कोठडी appeared first on News 24 Tass Marathi.

बेळगावच्या दुसऱ्या अतिरिक्त जिल्हा आणि सत्र न्यायालयाचे न्यायाधीश गंगाधर के. एन. यांनी हा आदेश दिला. सुमारे ३५ हजार गुंतवणूकदारांची हजारो कोटी रुपयांची फसवणूक झाल्याचा संशय असलेल्या या प्रकरणात राज्याबाहेर जाऊनही तपास करावा लागणार असल्याचे सांगत सीआयडीने कोठडीची मागणी केली होती.

सुनावणीदरम्यान आरोपीने स्वतःला मधुमेह आणि हृदयविकाराचा त्रास असल्याचे न्यायालयाला सांगितले. त्यानंतर न्यायालयाने आवश्यक वैद्यकीय सुविधा उपलब्ध करून देण्याचे निर्देश दिले.

यावेळी न्यायालयात आरोपी आणि न्यायाधीशांमध्ये काही महत्त्वपूर्ण संवादही झाला. “३५ हजार लोकांपेक्षा मला पैशांची गरज आहे,” असे आरोपीने म्हटल्याचे सांगितले जाते. त्यावर न्यायाधीशांनी सामान्य नागरिकांच्या हिताचे संरक्षण करणे ही सरकारची जबाबदारी असल्याचे स्पष्ट करत कठोर शब्दांत सुनावल्याची माहिती मिळाली.

न्यायालयातून बाहेर येताना आपल्या भावाला पाहून शिवानंद नीलण्णावर भावूक झाल्याचेही उपस्थितांनी सांगितले.

दरम्यान, सीआयडी डीजीपी भीमाशंकर गुळेड़ यांच्या नेतृत्वाखालील पथकाने प्राथमिक तपास पूर्ण केला असून, माळमारुती पोलीस ठाणे यांनी जमा केलेली कागदपत्रे सीआयडीकडे सुपूर्द करण्यात आली आहेत. आरोपीला पुढील चौकशीसाठी बंगळुरू येथे नेण्यात येणार आहे.

आरोपीच्या वतीने त्याचे वकील मंजुनाथ जी. एल. यांनी माध्यमांशी बोलताना, हे प्रकरण तांत्रिक स्वरूपाचे असून आरबीआय नियमांच्या कथित उल्लंघनाशी संबंधित असल्याचा दावा केला. कोणत्याही गुंतवणूकदाराने अधिकृत तक्रार केलेली नसून पोलिसांनी स्वतःहून गुन्हा दाखल केल्याचे त्यांनी सांगितले. तसेच जामिनासाठी अर्ज दाखल करण्यात आल्याची माहितीही त्यांनी दिली.

The post बेळगाव आर्थिक गैरव्यवहार प्रकरणी शिवानंद निलण्णावरला १० दिवसांची सीआयडी कोठडी appeared first on News 24 Tass Marathi.

बेळगाव : व्हॅक्सिन डेपो मैदानावर २०१७ मध्ये विनापरवानगी महामेळावा भरविल्याप्रकरणी टिळकवाडी पोलिसांनी दाखल केलेल्या गुन्ह्यात मध्यवर्ती म. ए. समितीच्या नेत्यांची चौथे जेएमएफसी न्यायालयाने निर्दोष मुक्तता केली आहे. सरकारी पक्षाला आरोप सिद्ध करण्यात अपयश आल्याने न्यायालयाने हा निर्णय दिला.

या प्रकरणात मध्यवर्ती म. ए. समितीचे दिवंगत अध्यक्ष दीपक दळवी, माजी आमदार मनोहर किणेकर, माजी महापौर मालोजी अष्टेकर आणि खजिनदार प्रकाश मरगाळे यांची निर्दोष मुक्तता करण्यात आली.

१३ नोव्हेंबर २०१७ रोजी हलगा येथील सुवर्ण विधानसौध येथे कर्नाटक सरकारचे अधिवेशन सुरू असताना त्याला विरोध म्हणून व्हॅक्सिन डेपो मैदानावर मराठी भाषिक महामेळाव्याचे आयोजन करण्यात आले होते. यासाठी प्रशासनाकडे अर्ज करण्यात आला होता; मात्र परवानगी नाकारण्यात आली होती. त्याचवेळी १२ ते १४ नोव्हेंबरदरम्यान शहरात कलम १४४ लागू करण्यात आले होते.

तरीही १३ नोव्हेंबर रोजी दुपारी १२ ते ३ या वेळेत महामेळावा घेण्यात आल्याने जमावबंदीचे उल्लंघन, रस्त्यावर व्यासपीठ उभारणे, वाहतुकीस अडथळा निर्माण करणे आणि भाषणांमुळे तणाव निर्माण झाल्याचा ठपका ठेवत तत्कालीन पोलीस निरीक्षक मोनेश देशमुख यांनी गुन्हा दाखल केला होता.

या खटल्यात सरकारतर्फे आठ साक्षी नोंदविण्यात आल्या. मात्र पुरावे ठोस नसल्याने आरोप सिद्ध करण्यात अपयश आले. पोलिसांकडून व्हिडिओ शूटिंग, वर्तमानपत्रांचे पुरावे तसेच वापरलेले ध्वनीप्रणाली साहित्य न्यायालयासमोर सादर करण्यात आले नव्हते, ही बाब बचाव पक्षाने अधोरेखित केली.

समितीच्या वतीने ॲड. महेश बिर्जे, ॲड. एम. बी. बोंद्रे, ॲड. बाळासाहेब कागणकर, ॲड. वैभव कुट्रे, ॲड. अश्वजीत चौधरी आणि ॲड. रिचमॅन रिकी यांनी काम पाहिले.

The post महामेळाव्याच्या खटल्यात म. ए. समिती नेते निर्दोष appeared first on News 24 Tass Marathi.

बेळगाव : सर्वोच्च न्यायालयात दीर्घकाळ प्रलंबित असलेले खटले तडजोडीने सोडवण्यासाठी कर्नाटक राज्य विधी सेवा प्राधिकरणाने विशेष पुढाकार घेतला असून ‘समाधान समारोह’ या उपक्रमांतर्गत विशेष लोकअदालतीचे आयोजन करण्यात येत आहे.

या मोहिमेत बेळगाव जिल्ह्यातील सुमारे ४०० प्रकरणे निकाली काढण्याचे उद्दिष्ट ठेवण्यात आले असून पक्षकारांना व्हिडिओ कॉन्फरन्सद्वारे सहभागी होण्याची सुविधा उपलब्ध करून देण्यात आली आहे. न्यायप्रक्रिया जलद आणि सुलभ करण्याच्या उद्देशाने राष्ट्रीय स्तरावर ही लोकअदालतीची मोहीम राबवण्यात येत असल्याची माहिती विधी सेवा प्राधिकरणाचे सचिव संदीप पाटील यांनी दिली.

२१ एप्रिलपासून या उपक्रमाची पूर्वतयारी सुरू झाली असून २१, २२ आणि २३ ऑगस्ट २०२६ या कालावधीत ही प्रक्रिया पार पडणार आहे. सर्वोच्च न्यायालयात प्रलंबित असलेल्या कर्नाटकातील एकूण ४,१२८ प्रकरणांपैकी बेळगाव जिल्ह्यातील ४०० प्रकरणांचा यात समावेश आहे.

तालुका स्तरावर पक्षकार आणि सल्लागार यांच्यात समन्वय साधून तडजोड झाल्यानंतर ही प्रकरणे विधी सेवा प्राधिकरणामार्फत सर्वोच्च न्यायालयात पाठवली जाणार आहेत. या प्रक्रियेसाठी प्रत्यक्ष उपस्थित राहण्याची आवश्यकता नसून व्हिडिओ कॉन्फरन्सद्वारे सहभाग घेता येणार असल्याने वेळ आणि खर्चाची बचत होणार आहे. अधिकाधिक पक्षकारांनी या संधीचा लाभ घ्यावा, असे आवाहन संदीप पाटील यांनी केले आहे.

The post सर्वोच्च न्यायालयातील प्रलंबित खटले निकाली काढण्यासाठी विशेष लोकअदालत appeared first on News 24 Tass Marathi.

बेळगाव : बेळगावमधील गांधीनगर परिसरात राष्ट्रीय महामार्गालगत सुरू असलेल्या ‘जय किसान’ खासगी मार्केटला मोठा कायदेशीर धक्का बसला असून, परवाना रद्द करण्याच्या निर्णयाविरोधात दाखल केलेली याचिका कर्नाटक प्रशासकीय लवादाने फेटाळून लावली आहे. त्यामुळे या प्रकरणात मार्केट प्रशासनाला मोठा धक्का बसल्याचे स्पष्ट झाले आहे.

या संदर्भात झालेल्या पत्रकार परिषदेत वकील नितीन बोलबंदी यांनी सविस्तर माहिती दिली. परवाना रद्द झाल्यानंतर नियमानुसार ३० दिवसांच्या आत उच्च न्यायालयात दाद मागणे आवश्यक होते. मात्र संबंधितांनी ही मुदत उलटल्यानंतर कर्नाटक प्रशासकीय लवादाकडे धाव घेतली. यामुळे तांत्रिक कारणांवर लवादाने याचिका फेटाळून लावली. आता इतर कोणत्याही न्यायालयात गेले तरी हा निर्णय बदलण्याची शक्यता नसल्याचे बोलबंदी यांनी स्पष्ट केले.

यावेळी राजकुमार टोपण्णवर यांनी या प्रकरणात झालेल्या कथित राजकीय हस्तक्षेपावर जोरदार टीका केली. गांधी नगर येथे हे खासगी मार्केट स्थलांतरित करण्यासाठी स्थानिक भाजप आमदारांनी प्रयत्न केल्याचा आरोप त्यांनी केला. तत्कालीन सरकारच्या काळात बेकायदेशीर मार्केटविरोधात वारंवार तक्रारी करूनही कारवाई झाली नव्हती. मात्र सत्तांतरानंतर कृषी बाजार मंत्री व जिल्हा पालकमंत्र्यांकडे पाठपुरावा करून परवाना रद्द करण्यात यश मिळाले, असे त्यांनी सांगितले. हा विजय एपीएमसीतील व्यापाऱ्यांचा असल्याची भावना त्यांनी व्यक्त केली.

टोपण्णवर यांनी पुढे सांगितले की, केंद्र सरकारने शेतकरीविरोधी कायदे मागे घेतल्यानंतरही स्थानिक पातळीवर हे मार्केट सुरू ठेवण्यात आले होते. सरकारी अनुदानातून उभारलेल्या हायटेक बाजार प्रांगणाकडे दुर्लक्ष करून खासगी हितसंबंधांना प्राधान्य दिले जात असल्याचा आरोपही त्यांनी केला.

सामाजिक कार्यकर्ते सुजित मुळगुंद यांनी सध्याच्या परिस्थितीवर प्रकाश टाकताना सांगितले की, हे मार्केट एपीएमसी आवारात हलवण्यात आले असले तरी रविवारी छुप्या पद्धतीने व्यापार सुरू असल्याचे निदर्शनास येत आहे. ही अनधिकृत उलाढाल तातडीने थांबवून सर्व व्यवहार मुख्य प्रांगणातच व्हावेत, अशी मागणी त्यांनी केली. शेतकऱ्यांच्या हितासाठी सुरू असलेला रविवार बाजार अधिकृतपणे चालू ठेवणे गरजेचे असल्याचेही त्यांनी स्पष्ट केले.

The post ‘जय किसान’ खासगी मार्केटला कायदेशीर दणका appeared first on News 24 Tass Marathi.

बेंगळुरू : ‘कांतारा’ चित्रपटातील एका वादग्रस्त विधानप्रकरणी अभिनेते रणवीर सिंह यांनी केलेली विनाअट क्षमायाचना कर्नाटक उच्च न्यायालयाने स्वीकारली आहे. यासोबतच न्यायालयाने त्यांना पुढील चार आठवड्यांत म्हैसूर येथील चामुंडेश्वरी मंदिरात जाऊन दर्शन घेण्याचे निर्देश दिले आहेत.

गोव्यात पार पडलेल्या ५६ व्या आंतरराष्ट्रीय चित्रपट महोत्सवात ‘कांतारा : चॅप्टर १’ संदर्भातील कार्यक्रमात रणवीर सिंह यांनी चित्रपटातील ‘दैवा’ या पात्राची नक्कल करताना वादग्रस्त टिप्पणी केली होती. त्यांनी ‘दैवा’चा उल्लेख ‘स्त्री भूत’ असा केल्याने धार्मिक भावना दुखावल्याचा आरोप करत कर्नाटकात त्यांच्याविरोधात गुन्हा दाखल करण्यात आला होता.

या प्रकरणी दिलासा मिळावा म्हणून रणवीर सिंह यांनी उच्च न्यायालयात याचिका दाखल केली होती. २५ एप्रिल रोजी सादर केलेल्या प्रतिज्ञापत्रात त्यांनी विनाअट माफी मागितली. तक्रारदार प्रशांत मेथा यांनीही न्यायालयासमोर रणवीर सिंह यांनी मनापासून क्षमा मागितल्याचे सांगत प्रकरण निकाली काढण्यास हरकत नसल्याचे स्पष्ट केले.

The post अभिनेता रणवीर सिंह यांची क्षमायाचना कर्नाटक उच्च न्यायालयाने स्वीकारली appeared first on News 24 Tass Marathi.

बेळगाव : नेहरू नगर येथे २०२० मध्ये घडलेल्या शाहबाज हत्या प्रकरणी जिल्हा न्यायालयाने महत्त्वपूर्ण निकाल देत चार आरोपींना जन्मठेपेची शिक्षा सुनावली. हत्या आणि अर्फानवरील जीवघेणा हल्ला सिद्ध झाल्यानंतर न्यायालयाने हा निर्णय दिला.

२५ ऑक्टोबर २०२० रोजी घडलेल्या या प्रकरणाची सुनावणी द्वितीय जिल्हा व सत्र न्यायालयात झाली. खटल्यादरम्यान ३० साक्षीदारांची साक्ष नोंदवण्यात आली असून १२८ हून अधिक पुरावे सादर करण्यात आले. सर्व पुरावे आणि साक्षींचा विचार करून न्यायाधीश गंगाधर के. यांनी आरोपींना दोषी ठरवत जन्मठेपेची शिक्षा सुनावली.

लक्ष्मण फकिरप्पा दड्डी, बसवराज होळेप्पा दड्डी, बसवराज सिद्रायी सिद्दप्पा नायक आणि नवीन सिद्दप्पा दड्डी अशी दोषींनी नावे आहेत. न्यायालयाने चौघांवर एकूण ९ लाख ६० हजार रुपयांचा दंडही ठोठावला आहे. त्यापैकी ८ लाख रुपये मृताच्या पालकांना, तर १ लाख रुपये जखमी अर्फानला देण्याचे आदेश दिले आहेत.

या खटल्यात सरकारी वकील भारती होसमनी यांनी युक्तिवाद केला, तर निकालाच्या तांत्रिक बाबींविषयी सरकारी वकील आर. ए. गडकरी यांनी माहिती दिली.

The post नेहरूनगर येथील शाहबाज हत्या प्रकरणी चौघांना जन्मठेपेची शिक्षा appeared first on News 24 Tass Marathi.

बेंगळूरू : धारवाड येथील भाजप नेते योगेश गौडा यांच्या हत्या प्रकरणात बेंगळूरू येथील लोकप्रतिनिधींच्या विशेष न्यायालयाने आज ऐतिहासिक निकाल देत माजी मंत्री तथा विद्यमान काँग्रेस आमदार विनय कुलकर्णी यांच्यासह एकूण १६ जणांना जन्मठेपेची शिक्षा सुनावली आहे.

या खटल्यातील शेवटच्या आरोपींपैकी पोलीस अधिकारी चन्नकेशव टिंगरीकर याला ७ वर्षांच्या साध्या कारावासाची शिक्षा ठोठावण्यात आली आहे. न्यायाधीश संतोष गजानना भट यांनी प्रदीर्घ सुनावणीनंतर हा निकाल जाहीर केला.

जन्मठेप सुनावण्यात आलेल्या आरोपींमध्ये विक्रम, कीर्ती कुमार, संदीप सवदत्ती, विनायक कटगी, महाबळेश्वर होंगल उर्फ मुडका, संतोष सवदत्ती, एम. दिनेश, एस. अश्वथ, के.एस. सुनील, नझीर अहमद, शनवाज, के. नूथन, सी. हर्षित, चंद्रशेखर इंदिकलबुर्ग आणि इतरांचा समावेश आहे.

न्यायालयाने सर्व आरोपींना भारतीय दंड संहितेच्या कलम ३०२ (खून) अंतर्गत जन्मठेप आणि कलम १२०(ब) (गुन्हेगारी कट) अंतर्गत ७ वर्षांची सक्त कैद अशी शिक्षा सुनावली आहे. दोन्ही शिक्षा एकत्र भोगाव्या लागतील, असे आदेशात स्पष्ट करण्यात आले आहे.

सीबीआयने दाखल केलेल्या आरोपपत्रावर आधारित सुनावणीनंतर न्यायालयाने बुधवारी सर्व आरोपींना दोषी ठरवले होते. आज शिक्षा जाहीर झाल्याने प्रकरणाचा दीर्घ न्यायप्रक्रियेचा अध्याय पूर्ण झाला आहे.

The post योगेश गौडा हत्या प्रकरणी आमदार विनय कुलकर्णी यांच्यासह १६ जणांना जन्मठेप appeared first on News 24 Tass Marathi.

या प्रकरणात कर्नाटकी पोलिसांनी येळ्ळूरमधील नागरिकांवर सात वेगवेगळे गुन्हे दाखल केले होते. मात्र न्यायालयीन प्रक्रियेनंतर सुमारे 250 जणांची निर्दोष मुक्तता झाली. या दीर्घ लढ्यात ॲड. शामसुंदर पत्तार, ॲड. शाम पाटील, ॲड. हेमराज बेंचण्णावर आदी वकिलांनी सातत्याने पाठपुरावा करत प्रभावी बाजू मांडली.

या उल्लेखनीय कार्याबद्दल दुद्दापा बागेवाडी, प्रकाश अष्टेकर, दत्ता उघाडे, राजू पावले, अजित गोरल, भोला पाखरे, सतीश कुगजी यांच्या हस्ते संबंधित वकिलांचा सत्कार करण्यात आला.

दरम्यान, हा न्यायालयीन लढा उभा करण्यासाठी माजी जिल्हा परिषद सदस्य अर्जुनराव गोरल, शिवाजी कदम, उदय जाधव, सतीश कुगजी, शामल जाधव, कमळा पोटे, रमेश धामणेकर आदींनी मोलाचे योगदान दिले. सत्कार समारंभाला रमाकांत कोंडुसकर, प्रमोद पाटील, तानाजी हलगेकर, आनंद कुंडेकर, जोतीबा चौगुले, सुरज गोरल, मधु पाटील यांच्यासह अनेक मान्यवर उपस्थित होते.

The post येळ्ळूर प्रकरणात निर्दोष मुक्ततेनंतर वकिलांचा जाहीर सत्कार appeared first on News 24 Tass Marathi.

बेंगळूर : लोकप्रतिनिधींच्या विशेष न्यायालयाने बुधवारी धारवाडचे माजी जिल्हा पंचायत सदस्य योगेश गौडा यांच्या हत्या प्रकरणात निकाल जाहीर करत आमदार विनय कुलकर्णी यांच्यासह १७ जणांना दोषी ठरवले.

गेल्या १० वर्षांपासून या प्रकरणाचा तपास सुरू होता. लोकप्रतिनिधी न्यायालयाचे न्यायाधीश संतोष गजानन भट यांनी हा महत्त्वपूर्ण निकाल दिला. न्यायालयाने सर्व दोषींना तात्काळ ताब्यात घेण्याचे आदेश सीबीआय पोलिसांना दिले आहेत.

दरम्यान, दोषी आमदार विनय कुलकर्णी यांना बेंगळूरमधील परप्पन अग्रहार कारागृह येथे हलवण्यात येणार असून, गुरुवारी शिक्षेची घोषणा केली जाणार आहे.

१५ जून २०१६ रोजी धारवाड येथील सप्तापूर कॉलनीतील ‘उदय जिम’मध्ये योगेश गौडा वर्तमानपत्र वाचत असताना काही हल्लेखोरांनी त्यांच्यावर हल्ला केला. त्यांच्या डोळ्यात मिठाची पूड टाकून प्राणघातक शस्त्रांनी वार करत त्यांची निर्घृण हत्या करण्यात आली होती. या प्रकरणात विनय कुलकर्णी यांच्यासह चंद्रशेखर इंडी, बसवराज मुथगी, विनायक काटगी, शिवानंद बागवाडी, संदीप सावदत्ती, महंतेश सिरियन्नवर आणि नवीन मुद्दपूर यांच्यासह एकूण १७ जणांचा समावेश आहे.

योगेश गौडा यांच्या नातेवाईकांनी या निकालानंतर समाधान व्यक्त करत “कायद्यापेक्षा कोणीही मोठा नाही” असे सांगितले. तसेच या लढ्यात साथ देणाऱ्या सर्वांचे आभार मानले असून, दोषींना जन्मठेपेची शिक्षा व्हावी अशी मागणी त्यांनी केली आहे.

The post योगेश गौडा हत्या प्रकरणी आमदार विनय कुलकर्णी यांच्यासह १७ जण दोषी appeared first on News 24 Tass Marathi.