कोल्हापूर येथे झालेल्या बैठकीत समितीचे अध्यक्ष प्रकाश मरगाळे यांच्या नेतृत्वाखालील शिष्टमंडळाने पवार साहेबांची भेट घेऊन सीमाप्रश्नी सविस्तर चर्चा केली. यावेळी समितीच्या वतीने सीमाभागातील विविध प्रश्न तसेच सर्वोच्च न्यायालयातील खटल्याच्या सद्यस्थितीची माहिती देण्यात आली.

बैठकीदरम्यान २९ जून रोजी मुंबई येथे मुख्यमंत्र्यांच्या निवासस्थानासमोर आयोजित धरणे आंदोलनाची माहितीही शिष्टमंडळाने पवार साहेबांना दिली. यावर पवार साहेब यांनी मुख्यमंत्री फडणवीस यांच्याशी तत्काळ चर्चा करून उच्चाधिकार समिती आणि तज्ज्ञ समितीची बैठक घेण्यासाठी प्रयत्न करू, असे आश्वासन दिल्याचे समितीच्या पदाधिकाऱ्यांनी सांगितले.

बेळगावसह सीमाभागात कन्नड सक्तीच्या अंमलबजावणीमुळे मराठी भाषिकांमध्ये निर्माण झालेल्या नाराजीबाबतही यावेळी चर्चा झाली. सीमाभागातील मराठी जनतेच्या भावना आणि स्थानिक परिस्थितीची माहिती शिष्टमंडळाने पवार साहेबांना दिली. सीमाप्रश्नावर झालेल्या चर्चेनंतर महाराष्ट्र सरकार सीमावासीयांच्या पाठीशी ठामपणे उभे असून, सर्वोच्च न्यायालयातील खटल्याचा युक्तिवाद प्रभावीपणे मांडण्यासाठी आवश्यक पावले उचलली जातील, अशी भूमिका बैठकीत व्यक्त करण्यात आली.

या भेटी दरम्यान समितीचे अध्यक्ष प्रकाश मरगाळे यांच्यासह सुहास हुद्दार, उमेश पाटील आणि विनोद अंबेवाडीकर उपस्थित होते.

The post ज्येष्ठ नेते शरद पवार यांच्याशी सीमाप्रश्नी मध्यवर्ती महाराष्ट्र एकीकरण समितीच्या शिष्टमंडळाची चर्चा appeared first on News 24 Tass Marathi.

बेळगाव : सीमालढ्यात बलिदान दिलेल्या हुतात्म्यांचे स्मरण करत मराठी भाषिकांच्या न्याय्य हक्कांसाठीचा संघर्ष अधिक तीव्र करण्याचा निर्धार मध्यवर्ती महाराष्ट्र एकीकरण समितीचे अध्यक्ष प्रकाश मरगाळे यांनी व्यक्त केला. सर्वोच्च न्यायालयात सीमाप्रश्नाचा निकाल लागेपर्यंत मराठी भाषिकांवरील अन्याय सहन केला जाणार नाही, तसेच २२ जूनपर्यंत भाषा वापराबाबतच्या कायद्याची अंमलबजावणी न झाल्यास तीव्र आंदोलन छेडण्यात येईल, असा स्पष्ट इशारा त्यांनी दिला.

महाराष्ट्र एकीकरण समिती आणि सीमाभागातील मराठी भाषिकांच्यावतीने १ जून हुतात्मा दिनानिमित्त हिंडलगा येथील हुतात्मा स्मारकावर आयोजित कार्यक्रमात ते बोलत होते. यावेळी कन्नड सक्तीविरोधी आंदोलनात प्राणांचे बलिदान दिलेल्या हुतात्म्यांच्या प्रतिमांना पुष्पहार व पुष्पचक्र अर्पण करून अभिवादन करण्यात आले. “बेळगाव, खानापूर, निपाणी, बिदर-भालकीसह संयुक्त महाराष्ट्र झालाच पाहिजे” तसेच कन्नड सक्तीविरोधी घोषणांनी परिसर दुमदुमून गेला.

आपल्या मनोगतात प्रकाश मरगाळे म्हणाले की, सीमालढ्यातील हुतात्म्यांचे बलिदान मराठी भाषिक कधीही विसरणार नाहीत. त्यांच्या त्यागामुळेच सीमाभागातील मराठी माणूस आजही आपल्या हक्कांसाठी लढत आहे. मराठी भाषिकांच्या न्याय्य मागण्यांसाठी लोकशाही मार्गाने शक्य तितकी आंदोलने करून हा लढा पुढे नेला जाईल. सीमाप्रश्न सर्वोच्च न्यायालयात प्रलंबित असताना मराठी भाषिकांवर कोणत्याही प्रकारचा भाषिक अन्याय होऊ देणार नाही, अशी ठाम भूमिका त्यांनी मांडली.

ते पुढे म्हणाले की, राज्य सरकारने सरकारी कार्यालये आणि खासगी संस्थांमध्ये ६० टक्के कन्नड व ४० टक्के इतर भाषांच्या वापरास परवानगी दिली आहे. मात्र, या निर्णयाची योग्य अंमलबजावणी होताना दिसत नाही. त्यामुळे २२ जूनपर्यंत संबंधित कायद्याची अंमलबजावणी झाली नाही, तर महाराष्ट्र एकीकरण समितीच्या वतीने तीव्र आंदोलन करण्यात येईल. तसेच सीमाप्रश्न निकाली निघेपर्यंत सर्व शासकीय कागदपत्रे कन्नडसोबत मराठीतही उपलब्ध करून देण्याची मागणी त्यांनी केली.

यावेळी माजी आमदार मनोहर किणेकर यांनी सीमाप्रश्नासाठी प्राणांची आहुती देणाऱ्या हुतात्म्यांच्या बलिदानाचे स्मरण केले. सरकारने ६० टक्के कन्नड आणि ४० टक्के इतर भाषांच्या वापरास परवानगी दिली असतानाही बेळगाव महापालिकेकडून १०० टक्के कन्नडचा आग्रह धरला जात असल्याचा आरोप त्यांनी केला. याच्या निषेधार्थ २२ जून रोजी विराट मोर्चा काढण्यात येणार असून मराठी भाषिकांनी मोठ्या संख्येने सहभागी व्हावे, असे आवाहन त्यांनी केले.

खानापूरचे माजी आमदार दिगंबर पाटील यांनी हुतात्म्यांचे बलिदान व्यर्थ जाऊ देऊ नका, एकत्र येऊन आपल्या हक्कांसाठी आणि न्यायासाठी संघर्ष करा, असे आवाहन केले. शिवसेना नेते प्रकाश शिरोळकर यांनीही हुतात्म्यांना आदरांजली वाहत मराठी भाषिकांना न्याय मिळवून देण्यासाठी शिवसेना उद्धव बाळासाहेब ठाकरे पक्ष सीमाभागातील जनतेसोबत ठामपणे उभा असल्याचे सांगितले.

कार्यक्रमाला मध्यवर्ती महाराष्ट्र एकीकरण समितीचे अध्यक्ष प्रकाश मरगाळे, सरचिटणीस मालोजीराव अष्टेकर, बेळगाव तालुका महाराष्ट्र एकीकरण समितीचे कार्याध्यक्ष तथा माजी आमदार मनोहर किणेकर, शहर समितीचे अध्यक्ष रणजीत चव्हाण-पाटील, रमाकांत कोंडुसकर, खानापूरचे माजी आमदार दिगंबर पाटील, माजी महापौर सरिता पाटील, माजी उपमहापौर रेणू किल्लेकर, आर. एम. चौगुले, सरस्वती पाटील, रवी साळुंके, आर. आय. पाटील, प्रकाश शिरोळकर यांच्यासह समितीचे पदाधिकारी, शिवसेना कार्यकर्ते आणि मराठी भाषिक मोठ्या संख्येने उपस्थित होते.

The post मराठी भाषिकांच्या हक्कांसाठी सीमालढा अधिक तीव्र करणार appeared first on News 24 Tass Marathi.

बेळगाव : सीमाभागातील मराठी भाषिकांच्या प्रश्नांबाबत महाराष्ट्र सरकार सकारात्मक असून महाराष्ट्र एकीकरण समितीला मुंबईत आंदोलन करण्याची वेळ येऊ देणार नाही, असे ठाम आश्वासन महाराष्ट्राचे उद्योग व मराठी भाषा मंत्री उदय सामंत यांनी समितीच्या पदाधिकाऱ्यांना दिले. आचारसंहिता संपल्यानंतर मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्यासोबत समितीची बैठक घडवून आणण्यासाठी आपण स्वतः समन्वयक म्हणून काम करणार असल्याचेही त्यांनी स्पष्ट केले.

रविवारी बेळगाव दौऱ्यावर आलेल्या उदय सामंत यांनी महाराष्ट्र एकीकरण समितीच्या पदाधिकाऱ्यांशी सविस्तर चर्चा करून सीमाभागातील मराठी भाषिकांच्या विविध समस्या जाणून घेतल्या. यावेळी समितीच्या शिष्टमंडळाने सर्वोच्च न्यायालयात प्रलंबित असलेल्या बेळगाव सीमाप्रश्नाच्या खटल्याची लवकर सुनावणी व्हावी आणि महाराष्ट्र सरकारने यासाठी अधिक सक्रिय भूमिका घ्यावी, अशी मागणी केली.

यानंतर पत्रकार परिषदेत बोलताना सामंत यांनी सांगितले की, महाराष्ट्रात २३ ते २५ जूनदरम्यान विधान परिषद निवडणुकीची आचारसंहिता लागू असल्याने तातडीने बैठक घेणे शक्य नाही. मात्र आचारसंहिता संपल्यानंतर मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्यासोबत महाराष्ट्र एकीकरण समितीची बैठक आयोजित करण्यासाठी आपण समन्वयक म्हणून काम करणार आहोत. समितीच्या सर्व मागण्या राज्य सरकारपर्यंत पोहोचवून त्यावर सकारात्मक तोडगा काढण्यासाठी प्रयत्न केले जातील, असेही त्यांनी सांगितले.

समितीने २९ जून रोजी मुंबईतील मुख्यमंत्र्यांच्या निवासस्थानासमोर आंदोलन करण्याचा इशारा दिला होता. मात्र सरकारकडून सकारात्मक भूमिका घेण्यात येत असल्याचे आश्वासन मिळाल्यानंतर हे आंदोलन सध्या स्थगित करण्यात आल्याची माहिती सामंत यांनी दिली. मराठी भाषिकांच्या न्याय्य मागण्यांसाठी सरकार कटिबद्ध असून आंदोलनाची वेळ येऊ नये यासाठी प्रयत्न केले जातील, असे त्यांनी नमूद केले.

सीमाप्रश्नाबाबत बोलताना सामंत म्हणाले की, कर्नाटक सरकारवर टीका करणे हा आपल्या दौऱ्याचा उद्देश नसून सीमाभागातील मराठी भाषिकांच्या अडीअडचणी जाणून घेणे आणि त्या योग्य पातळीवर मांडणे हा हेतू आहे. मराठी भाषा मंत्री म्हणून आपण कर्नाटकचे मुख्यमंत्री आणि संबंधित मंत्र्यांची भेट घेऊन मराठी भाषिकांच्या समस्या मांडणार आहोत. तसेच मराठी भाषिकांवर कन्नड भाषेची सक्ती होऊ नये, अशी विनंतीही कर्नाटक सरकारकडे केली जाईल, असे त्यांनी स्पष्ट केले.

यावेळी त्यांनी आपल्या दौऱ्यादरम्यान कर्नाटक सरकारने दिलेल्या सुरक्षा व्यवस्थेबद्दल आभार व्यक्त केले. सीमाभागातील नागरिकांशी सातत्याने संपर्क ठेवला जाईल आणि लवकरच संबंधित मंत्र्यांसह पुन्हा सीमाभागाचा दौरा केला जाईल, असे आश्वासनही त्यांनी दिले.

The post महाराष्ट्र एकीकरण समितीला आंदोलनाची गरज भासू देणार नाही appeared first on News 24 Tass Marathi.

धाराशिव : अखिल भारतीय साहित्य परिषदेतर्फे आयोजित ३२ वे अखिल भारतीय नवोदित मराठी साहित्य संमेलन २०२६ उत्साहपूर्ण वातावरणात पार पडले. साहित्य, संस्कृती आणि मराठी अस्मितेच्या विविध पैलूंना उजाळा देणाऱ्या या संमेलनात सीमाभागातील मराठी भाषिकांच्या प्रश्नांनाही प्रभावीपणे वाचा फोडण्यात आली.

संमेलनाचे अध्यक्ष डॉ. नंदकुमार राऊत यांच्या अध्यक्षतेखाली आणि स्वागताध्यक्ष आमदार कैलासदादा पाटील यांच्या प्रमुख उपस्थितीत झालेल्या कार्यक्रमात मराठी साहित्याच्या विविध प्रवाहांचे दर्शन घडले. यावेळी बोलताना आमदार कैलासदादा पाटील यांनी सीमाभागातील मराठी भाषिकांवरील अन्याय दूर करण्यासाठी सर्वांनी एकत्रितपणे प्रयत्न करण्याची गरज व्यक्त केली. मराठी भाषा, संस्कृती आणि स्वाभिमानाच्या जतनासाठी राजकीय मतभेद बाजूला ठेवून सामूहिक भूमिका घेणे आवश्यक असल्याचे त्यांनी नमूद केले. सीमावासीयांच्या न्याय्य हक्कांसाठी आपण ठामपणे उभे राहू, अशी ग्वाहीही त्यांनी दिली.

संमेलनाच्या समारोप सत्रात आयोजित काव्यमैफलीने विशेष लक्ष वेधून घेतले. अखिल भारतीय साहित्य परिषदेचे राष्ट्रीय संस्थापक अध्यक्ष डॉ. शरद गोरे यांनी आपल्या प्रभावी सूत्रसंचालनातून कार्यक्रमाला वेगळीच रंगत आणली. काव्य हे केवळ अभिव्यक्तीचे माध्यम नसून समाजपरिवर्तनाचे प्रभावी साधन असल्याचे त्यांनी अधोरेखित केले.

या काव्यमैफलीत अखिल भारतीय साहित्य परिषद, कर्नाटक राज्य शाखेच्या वतीने बेळगाव जिल्ह्यातील १२ आणि बिदर जिल्ह्यातील ५ कवी-कवयित्रींनी सहभाग घेतला. त्यांच्या कवितांमधून सीमाभागातील मराठी समाजाच्या भावना, संघर्ष, अस्मिता आणि अपेक्षा यांचे प्रभावी चित्रण करण्यात आले.

कर्नाटक राज्याध्यक्ष तसेच सीमाकवी रवींद्र पाटील यांनी सादर केलेल्या ‘माय’ आणि ‘लढा’ या कवितांना विशेष प्रतिसाद मिळाला. ‘माय’ या कवितेत महाराष्ट्र आणि सीमाभागातील नाते भावनिक स्वरूपात मांडण्यात आले, तर ‘लढा’ या कवितेत न्याय, स्वाभिमान आणि अस्मितेसाठी सुरू असलेल्या संघर्षाचे प्रतिबिंब उमटले. त्यांच्या सादरीकरणाला उपस्थितांकडून उत्स्फूर्त दाद मिळाली.

याशिवाय किरण पाटील, रोशनी हुंद्रे, अपर्णा पाटील, संजीवनी खंडागळे, स्मिता आळतेकर, अशोक सुतार, चंद्रशेखर गायकवाड, पूजा सुतार, मनीषा नाडगौडा आणि स्नेहल बर्डे यांनी विविध सामाजिक, सांस्कृतिक आणि मानवी विषयांवर आधारित कविता सादर केल्या.

सीमाभागातील कवी-कवयित्रींच्या सशक्त अभिव्यक्तीमुळे संमेलनात मराठी अस्मिता, स्वाभिमान आणि न्यायाच्या लढ्याचा ठसा उमटला. साहित्याच्या माध्यमातून समाजातील प्रश्न मांडण्याची आणि जनजागृती घडवून आणण्याची ताकद पुन्हा एकदा अधोरेखित झाल्याची भावना उपस्थितांनी व्यक्त केली.

The post धाराशिवच्या संमेलनात सीमाभागाचा बुलंद हुंकार appeared first on News 24 Tass Marathi.

बेळगाव : महाराष्ट्र एकीकरण युवा समितीची बैठक युवा समिती कार्यालय कावळे संकुल टिळकवाडी बेळगाव येथे अध्यक्ष अंकुश केसरकर यांच्या अध्यक्षतेखाली संपन्न झाली.

बैठकीच्या सुरवातीला मध्यवर्ती समितीचे अध्यक्ष दीपक दळवी, ज्येष्ठ नेते अर्जुन गोरल तसेच इतर समिती कार्यकर्त्यांना श्रद्धांजली वाहण्यात आली. अध्यक्ष अंकुश केसरकर म्हणाले कर्नाटक शासनाने डॉ. गोकाक अहवाल मान्य केल्यानंतर सर्व ठिकाणी कन्नड भाषा सक्ती करण्यास सुरवात केली. त्याला विरोध करण्यासाठी समितीच्या वतीने सत्याग्रहाच्या माध्यमातून आंदोलन करण्याचे जाहीर करण्यात आले. १ जून १९८६ रोजी मा. शरद पवार गनिमी काव्याने कित्तूर राणी चन्नमा चौकात दाखल झाले आणि त्यांनी सत्याग्रह केला. महाराष्ट्राच्या नेत्यांना बेळगाव बंदी असून देखील सत्याग्रह यशस्वी झाल्याने प्रशासनाने शरद पवाराना अटक केली, ही बातमी सर्वदूर सीमाभागात पसरली लोक रस्त्यावर उतरून निदर्शने करू लागली बेळगावात हरताळ पाळला गेला, परिस्थिती स्पोटक बनली, आंदोलकांवर गोळीबार झाला या गोळीबारात नऊ निष्पाप मराठी भाषिकांना हौतात्म्य आले. शिवाय कित्येक कार्यकर्त्यांना अटक करून वेगवेगळ्या तुरुंगात डांबण्यात आले. हुतात्म्यांच्या बलिदानाची आठवण ठेवून सीमाप्रश्नाची सोडवणूक करण्यासाठी सर्वांनी कटिबद्ध रहाणे गरजेचे आहे.

यावर्षी सोमवार दिनांक १ जून रोजी सकाळी ८.३० वाजता हुतात्मा स्मारक हिंडलगा हुतात्म्यांना अभिवादन करण्यात येणार आहे तरी सर्व मराठी भाषिकांनी मोठ्या संख्येने उपस्थित रहावे असे आवाहन केले.

• शैक्षणिक उपक्रम राबविण्याचा निर्णय :

दरवर्षी प्रमाणे युवा समितीच्या वतीने मातृभाषेतून शिक्षण घेणाऱ्या विद्यार्थ्यांना प्रोत्साहन म्हणून शैक्षणिक साहित्याचे वितरण करण्यात येते. यावर्षी उपक्रमाचे हे नववे वर्ष असून यावर्षी ३०० शाळांना ही साहित्य वितरण करण्याचा निर्णय घेण्यात आला.

• दहावीच्या गुणवंतांचा होणार सत्कार :

युवा समितीच्या वतीने येणाऱ्या जुलै महिन्यात मराठी माध्यमातील १० वी मध्ये बेळगाव शहर, बेळगाव तालुका आणि खानापूर विभागातील पहिला दुसरा आणि तिसरा क्रमांक आलेल्या विद्यार्थांचा सत्कार करण्याचा निर्णय घेण्यात आला.

सरचिटणीस श्रीकांत कदम यांनी प्रास्ताविक केले. यावेळी सुरज कुडूचकर, किरण हुद्दार, संतोष कृष्णाचे, अक्षय बांबरकर, सुरज चव्हाण, महांतेश अलगोंडी, अश्वजीत चौधरी, रोहन कुंडेकर, आनंद पाटील, आकाश भेकणे, आशिष कोचेरी, प्रकाश हेब्बाजी आदी उपस्थित होते. चिटणीस प्रतीक पाटील यांनी आभार मानले.

The post कन्नडसक्ती आंदोलनातील हुतात्म्यांना अभिवादन करण्यासाठी मोठ्या संख्येने उपस्थित रहावे appeared first on News 24 Tass Marathi.

बेळगाव : सीमाभागात कन्नड संघटनांकडून जाणीवपूर्वक भाषावाद उकरून काढला जात असून मराठी भाषिकांना डिवचण्याचे प्रकार वाढत आहेत. या विरोधात जिल्हाधिकारी कार्यालयावर भव्य मोर्चा काढण्याचा निर्णय मध्यवर्ती महाराष्ट्र एकीकरण समितीच्या बैठकीत घेण्यात आला. मराठा मंदिर येथे झालेल्या बैठकीत सीमाप्रश्न, मराठी भाषिकांवरील अन्याय आणि पुढील आंदोलनात्मक रणनीतीवर सविस्तर चर्चा करण्यात आली.

बैठकीनंतर प्रसारमाध्यमांशी संवाद साधताना समितीचे अध्यक्ष प्रकाश मरगाळे यांनी विविध ठरावांची माहिती दिली. सीमाप्रश्नाच्या न्यायालयीन प्रक्रियेबरोबरच सीमाभागातील मराठी भाषिकांवरील अन्याय आणि कन्नड संघटनांच्या वाढत्या कुरघोड्यांविरोधात आंदोलन तीव्र करण्याचा निर्धार बैठकीत व्यक्त करण्यात आला.

येत्या १ जून रोजी साजऱ्या होणाऱ्या हुतात्मा दिनाच्या पार्श्वभूमीवर कार्यक्रमाचे नियोजन करण्यात आले. तसेच ३० मेपर्यंत सर्व घटक समित्यांच्या बैठका घेऊन मोर्चाची अंतिम तारीख निश्चित केली जाणार असल्याचे सांगण्यात आले.

सीमाप्रश्न अंतिम टप्प्यात असताना महाराष्ट्र सरकार दाखवत असलेल्या उदासीनतेवरही बैठकीत तीव्र नाराजी व्यक्त करण्यात आली. गेल्या दोन वर्षांत तज्ज्ञ समिती आणि उच्चाधिकार समितीची एकही बैठक झालेली नसल्याचा मुद्दा उपस्थित करण्यात आला. तसेच सीमावासीयांना भेटीसाठी वेळ न दिल्याने येत्या १५ दिवसांत महाराष्ट्राच्या मुख्यमंत्र्यांच्या निवासस्थानासमोर धरणे आंदोलन करण्याचा निर्णय घेण्यात आला.

यावेळी भाषिक अल्पसंख्याक आयोगाच्या अहवालाचाही संदर्भ देण्यात आला. बेळगावमध्ये २० टक्क्यांहून अधिक मराठी भाषिक असल्याने सर्व सरकारी परिपत्रके मराठीत देण्याची शिफारस आयोगाने केल्याचे नमूद करण्यात आले. या अहवालाची अंमलबजावणी करून संसदेमार्फत सीमाभागातील मराठी भाषिकांना न्याय मिळवून देण्यासाठी महाराष्ट्र सरकारवर दबाव वाढवण्याचा निर्णय घेण्यात आला.

कर्नाटक सरकारकडून कन्नड संघटनांना पाठबळ दिले जात असल्याचा आरोप करत प्रथम जिल्हाधिकाऱ्यांना निवेदन दिले जाईल, त्यानंतरही परिस्थितीत बदल झाला नाही तर महाराष्ट्र एकीकरण समिती आपल्या पद्धतीने आंदोलन उभारेल, असा इशारा प्रकाश मरगाळे यांनी दिला.

महापालिकेत सीमाप्रश्नाविरोधी ठराव मांडण्याच्या हालचाली सुरू असताना समितीने अधिक आक्रमक भूमिका घ्यावी, अशी मागणी कार्यकर्त्यांकडून बैठकीत करण्यात आली. यावर प्रतिक्रिया देताना माजी महापौर मालोजीराव अष्टेकर यांनी कोणतेही आंदोलन करण्यापूर्वी कार्यकर्त्यांना विश्वासात घेऊन त्यांच्या मतानुसार पुढील निर्णय घेतला जाईल, असे स्पष्ट केले.

बैठकीला प्रकाश मरगाळे, माजी आमदार मनोहर किणेकर, रणजित चव्हाण-पाटील, मालोजीराव अष्टेकर, गोपाळराव पाटील, अमर येळ्ळूरकर, लक्ष्मण होनगेकर, बी. डी. मोहनगेकर, आर. सी. मोदगेकर, एम. जी. पाटील, एम. बी. गुरव, लक्ष्मण पाटील, अजित पाटील यांच्यासह समितीचे पदाधिकारी व कार्यकर्ते उपस्थित होते.

The post सीमाभागातील भाषावादाविरोधात महाराष्ट्र एकीकरण समिती आक्रमक appeared first on News 24 Tass Marathi.

बेळगाव : महापालिकेच्या सर्वसाधारण सभेत सीमाप्रश्न आणि महाजन अहवालाच्या मुद्द्यावरून सत्ताधारी गट तसेच महाराष्ट्र एकीकरण समितीच्या नगरसेवकांमध्ये जोरदार खडाजंगी झाली. सीमावादाचा विषय न्यायालयात प्रलंबित असताना यासंदर्भात सभागृहात ठराव मांडता येईल का, याबाबत राज्य सरकारचे मत जाणून घेण्याचा निर्णय घेण्यात आला.

बेळगाव सीमावादावर महाजन अहवाल अंतिम मानावा, असा ठराव मंजूर करण्याची मागणी विविध कन्नड संघटनांकडून करण्यात आली होती. या पार्श्वभूमीवर असा ठराव महापालिकेत मांडणे कायदेशीरदृष्ट्या योग्य ठरेल का, याची स्पष्टता मिळवण्यासाठी राज्य सरकारला पत्र पाठवण्याचे निर्देश महापौर प्रीती कामकर यांनी दिले.

महापौर प्रीती कामकर यांच्या अध्यक्षतेखाली झालेल्या सभेत सुरुवातीलाच नामनिर्देशित सदस्य रमेश सोंटक्की यांनी २५ हून अधिक कन्नड संघटनांच्या निवेदनाचा उल्लेख करत महाजन अहवाल अंतिम असल्याचा ठराव मंजूर करण्याची मागणी केली. या मागणीला महाराष्ट्र एकीकरण समितीचे नगरसेवक रवी साळुंखे आणि शिवाजीराव मंडोळकर यांनी जोरदार विरोध केला.

सीमावादाचा मुद्दा सध्या सर्वोच्च न्यायालयात प्रलंबित असल्यामुळे या विषयावर सभागृहात चर्चा करणेही योग्य नसल्याचे त्यांनी स्पष्ट केले. यावर विधी अधिकाऱ्यांनीही न्यायालयीन प्रक्रिया सुरू असल्याने हा विषय सभागृहात मांडता येणार नसल्याचे मत व्यक्त केले.

मात्र, रमेश सोंटक्की यांनी या मताला आक्षेप घेत, प्रकरण अद्याप सुनावणीस आलेले नसल्यामुळे ठराव मांडण्यात अडचण नसल्याचा दावा केला. दरम्यान, महापौर प्रीती कामकर यांनी महानगरपालिका कन्नड भाषेच्या संरक्षणासाठी कटिबद्ध असल्याचे सांगितले. कन्नड संघटनांच्या निवेदनाचा विचार करून राज्य सरकारकडून अभिप्राय मागविण्याचा निर्णय घेण्यात आल्याचे त्यांनी जाहीर केले.

महापौरांनी हा निर्णय सर्वानुमते घेतल्याचे सांगताच रवी साळुंखे आणि शिवाजीराव मंडोळकर यांनी त्यास विरोध दर्शवला. हा निर्णय एकमताने झालेला नसून आम्ही त्याला विरोध करीत आहोत, असे त्यांनी स्पष्ट केले. त्यानंतर या विषयावर थेट मतदान घेण्याची मागणी करण्यात आली. सत्ताधारी पक्षाचे नेते संतोष पडणेकर यांनीही मतदानासाठी तयारी दर्शवल्याने सभागृहातील वातावरण आणखी तापले.

The post बेळगाव महापालिकेत सीमाप्रश्नाच्या मुद्द्यावरून जोरदार खडाजंगी appeared first on News 24 Tass Marathi.

बेळगाव : जनगणना हाऊस लिस्टिंगच्या कामादरम्यान अनेक ठिकाणी प्रभाग सीमांवरून वाद निर्माण झाल्याचे चित्र समोर आले आहे. गुगल मॅप लेआउटच्या आधारे पूर्वी निश्चित करण्यात आलेल्या सीमांबाबत प्रत्यक्ष क्षेत्रात मोठा गोंधळ निर्माण होत असल्याने कामकाजावर परिणाम होत आहे.

काही भागांमध्ये दोन प्रभागांच्या सीमांवरून शिक्षकांमध्ये वादावादीच्या घटना घडत असल्याची माहिती मिळाली आहे. या समस्यांवर स्पष्ट निर्णय घेण्यात महापालिका अद्याप अपयशी ठरल्याचे चित्र आहे. दरम्यान, चार्ज अधिकारी स्वतः थेट हस्तक्षेप न करता बिल कलेक्टरमार्फत सीमावाद सोडवण्याचा प्रयत्न करत असल्याचेही समोर आले आहे.

सीमांबाबत स्पष्टता नसल्यामुळे घरांची नोंदणी करताना शिक्षकांना मोठ्या अडचणींचा सामना करावा लागत आहे. कोणत्या प्रभागात नोंद करायची याबाबत संभ्रम निर्माण झाल्याने अनेक ठिकाणी काम थांबण्याची वेळ येत आहे.

वार्ड अधिकाऱ्यांशी संपर्क साधण्याचा प्रयत्न केला असता फोन न उचलल्याची तक्रार शिक्षकांकडून करण्यात येत आहे. दुसरीकडे प्रशासनाकडून मात्र काम वेळेत पूर्ण करण्याचा दबाव कायम असल्याचे सांगितले जात आहे.

या सर्व गोंधळामुळे जनगणनेच्या हाऊस लिस्टिंग प्रक्रियेवर परिणाम होण्याची शक्यता व्यक्त होत असून प्रशासनाने तातडीने सीमावाद सोडवून स्पष्ट मार्गदर्शक सूचना देण्याची मागणी जोर धरू लागली आहे.

The post गुगल लेआउट सीमांवरून वाद appeared first on News 24 Tass Marathi.

• अ. भा. म. पत्रकार परिषदेच्या ४४ व्या राष्ट्रीय अधिवेशनात राबविली मोहीम

उदगीर (जिल्हा लातूर) : महाराष्ट्र – कर्नाटक सीमाप्रश्नाचा खटला सर्वोच्च न्यायालयात 2004 पासून प्रलंबित आहे. या खटल्याची सुनावणी सलगपणे करून त्वरित निकाल द्यावा अशी विनंती सरन्यायाधीशांना निवेदनाद्वारे करण्यात येणार आहे. यासाठी बेळगाव जिल्हा मराठी पत्रकार संघातर्फे सर्वोच्च न्यायालयाच्या सरन्यायाधीशांना सीमाभाग व महाराष्ट्रातून १ लाख सह्यांचे निवेदन देण्यात येणार आहे. या निवेदनावर महाराष्ट्राचे सार्वजनिक बांधकाम मंत्री शिवेंद्रसिंहराजे भोसले, दैनिक लोकमतचे समूह संपादक राजेंद्र दर्डा, आमदार रोहित पवार, उद्धव ठाकरे शिवसेनेच्या उपनेत्या सुषमा अंधारे, अखिल भारतीय मराठी पत्रकार परिषदेचे मुख्य विश्वस्त एस. एम. देशमुख, विश्वस्त किरण नाईक यांनी तसेच महाराष्ट्राच्या विविध भागातून आलेल्या पत्रकारांनी सह्या करून या मोहिमेस पाठिंबा दिला.

लातूर जिल्ह्यातील उदगीर येथे अखिल भारतीय मराठी पत्रकार परिषदेचे ४४ वे राष्ट्रीय अधिवेशन शनिवारपासून सुरू झाले. या अधिवेशनात बेळगाव जिल्हा मराठी पत्रकार संघातर्फे सह्यांची मोहीम राबविण्यात आली. कोल्हापूर, सांगली, पुणे, मुंबई, नागपूर, बीड, नांदेड, अहिल्यानगर, नाशिक, आदि भागाबरोबरच बिदर, जिल्ह्यातील भालकी, औराद या सीमा भागातील पत्रकार व कार्यकर्त्यांनी उत्स्फूर्तपणे सह्या केल्या. पत्रकार संघाचे अध्यक्ष कृष्णा शहापूरकर, उपाध्यक्ष सुहास हुद्दार, पत्रकार परिषद प्रतिनिधी शेखर पाटील, कार्यकारणी सदस्य शिवराज पाटील यांच्या नेतृत्वाखाली सह्यांची ही मोहीम राबविण्यात येत आहे.

The post सह्यांच्या मोहिमेस महाराष्ट्रातून उत्स्फूर्त प्रतिसाद appeared first on News 24 Tass Marathi.

बेळगांव : सीमा लढ्यातील पहिले हुतात्मा मारुती बेन्नाळकर यांच्या कंग्राळी खुर्द गावातून तीन हजारहून अधिक सह्यांचे पुस्तक शनिवारी बेळगांव जिल्हा मराठी पत्रकार संघाकडे सुपूर्द करण्यात आले. तसेच आंबेवाडी गावातील सह्या घेतलेले पुस्तकही अर्जुन बांबू कातकर, लक्ष्मण शट्टू कातकर, देवाप्पा शहापूरकर, शिवाजी गोविंद लोहार, बाळू तानाजी कातकर यांनी यावेळी दिले. ही पुस्तके पत्रकार संघाचे अध्यक्ष कृष्णा शहापूरकर यांच्याकडे सुपूर्द करण्यात आली.

सर्वोच्च न्यायालयात प्रलंबित असलेल्या सीमाप्रश्नाच्या दाव्याची सुनावणी त्वरित घेऊन सलगपणे करावी व निकाल द्यावा अशी विनंती पत्रकार संघातर्फे सरन्यायाधीशांना करण्यात येणार आहे. याबाबतचे सीमा भागातून एक लाख सह्यांचे निवेदन त्यांना देण्यात येणार आहे. या मोहिमेला सीमा भागातून तसेच महाराष्ट्रातूनही उत्स्फूर्त प्रतिसाद मिळत आहे.

सर्व भागातील कार्यकर्ते सह्या घेण्याचे काम जोमाने करत आहेत याबद्दल पत्रकार संघातर्फे यावेळी कृतज्ञता व्यक्त करण्यात आली. या कार्यक्रमास मध्यवर्ती महाराष्ट्र एकीकरण समितीचे अध्यक्ष प्रकाश मरगाळे, तालुका महाराष्ट्र एकीकरण समितीचे अध्यक्ष माजी आमदार मनोहर किणेकर, ॲड. एम. जी. पाटील, दत्ता उघाडे, महेश जुवेकर, उमेश पाटील, बाबू कोले, पत्रकार संघाचे उपाध्यक्ष सुहास हुद्दार, पत्रकार परिषद प्रतिनिधी शेखर पाटील, अर्जुन सांगावकर, उपस्थित होते.

The post मराठी पत्रकार संघाच्या एक लाख सह्यांच्या मोहिमेला वेग appeared first on News 24 Tass Marathi.