बेळगाव : एपीएमसी परिसरातील संडे मार्केटमध्ये सुरू असलेल्या वादाच्या पार्श्वभूमीवर जिल्हा पालकमंत्री सतीश जारकीहोळी यांच्या उपस्थितीत सोमवारी जिल्हाधिकारी कार्यालयात महत्त्वाची बैठक पार पडली. खासगी बाजारपेठेतील व्यापाऱ्यांच्या मागण्या आणि एपीएमसीतील गाळे वाटपाच्या मुद्द्यावर यावेळी सविस्तर चर्चा करण्यात आली.

बैठकीत बोलताना सतीश जारकीहोळी यांनी सांगितले की, जय किसान प्रायव्हेट मार्केटने एपीएमसी परिसरात उपबाजार सुरू करण्याबाबत अधिकृत प्रस्ताव दिल्यास तो सरकारकडे पाठवला जाईल. अन्यथा एपीएमसीमधील उपलब्ध गाळ्यांचे वाटप करण्याची प्रक्रिया राबवावी लागेल, असे त्यांनी स्पष्ट केले.

संडे मार्केटमधील खासगी व्यापाऱ्यांना तीन महिन्यांची मुदतवाढ देण्यात आल्याची माहिती देताना त्यांनी सांगितले की, नियमानुसार गाळ्यांचे वाटप झाल्यानंतर आवश्यक ती कारवाई केली जाईल.

यावेळी खासगी बाजाराचे प्रतिनिधी अब्दुल करीम बागवान यांनी व्यापाऱ्यांच्या अडचणी मांडल्या. खासगी बाजाराचे परवाने रद्द झाल्यापासून अनेक व्यापाऱ्यांवर आर्थिक संकट ओढवले असल्याचे त्यांनी सांगितले. व्यापाऱ्यांच्या उपजीविकेचा प्रश्न निर्माण झाल्याने शासनाने या विषयाकडे गांभीर्याने पाहावे, अशी मागणी त्यांनी केली.

मंत्री सतीश जारकीहोळी यांनी कायद्यानुसार निर्णय घेतला जाईल, असे सांगत व्यापाऱ्यांच्या मागण्यांचा अहवाल सरकारकडे पाठवण्याचे आश्वासन दिले. 

व्यापाऱ्यांनी कायदेशीर चौकटीत खासगी जय किसान बाजार सुरू ठेवण्यास परवानगी द्यावी, अशी मागणी केली. तसेच या बाजारावर अनेक कुटुंबांची उपजीविका अवलंबून असल्याने प्रशासनाने सकारात्मक निर्णय घ्यावा, असेही त्यांनी नमूद केले.

दरम्यान, एपीएमसी परिसरात सुमारे ७० ते ८० दुकाने रिक्त असल्याचे बैठकीत सांगण्यात आले. पावसाळ्यापूर्वी ही दुकाने कार्यान्वित करावीत, अशी मागणी करण्यात आली. शेतकऱ्यांकडून कोणतीही तक्रार नसताना काही एपीएमसी व्यापाऱ्यांनी खासगी व्यापाऱ्यांवर बाजार व्यवस्थेवर अवलंबून राहण्याचा आरोपही केला.

बैठकीला आसिफ सेठ, मोहम्मद रोशन, राहुल शिंदे, भूषण बोरसे यांच्यासह व्यापारी प्रतिनिधी मोहन मन्नोळकर आणि मुज्जम्मिल डोणी उपस्थित होते.

The post ‘संडे मार्केट’ वादावर तोडगा काढण्यासाठी जिल्हाधिकारी कार्यालयात महत्त्वाची बैठक appeared first on News 24 Tass Marathi.

बेळगावमधील खासगी भाजी मार्केट बंद झाल्यानंतर गेल्या आठ महिन्यांपासून तेथील व्यापाऱ्यांना रविवारी भरवण्यात येणाऱ्या शेतकरी बाजारात गाळे देण्यात आले आहेत. यामुळे एपीएमसीच्या हद्दीतच दोन स्वतंत्र बाजारपेठा निर्माण झाल्याने शेतमालाच्या किमतींमध्ये तफावत निर्माण होत असल्याची तक्रार व्यापाऱ्यांनी केली.

एपीएमसीच्या मूळ व्यापाऱ्यांनी आज कार्यालयासमोर निदर्शने करत खासगी व्यापाऱ्यांचे तातडीने मुख्य बाजारात विलीनीकरण करावे, अशी मागणी केली. व्यापारी सदानंद पाटील यांनी सांगितले की, सरकारी एपीएमसीमार्फत खासगी व्यापाऱ्यांना विशेष सुविधा दिल्या जात असून त्यामुळे मूळ व्यापाऱ्यांवर अन्याय होत आहे. शेतकऱ्यांनाही त्यांच्या मालाला योग्य दर मिळत नसल्याचा आरोप त्यांनी केला.

न्यायालयीन प्रक्रिया सुरू असताना खासगी बाजारातील व्यापाऱ्यांना तात्पुरती परवानगी देण्यात आली होती. मात्र खासगी बाजाराची कायदेशीर लढाई संपल्यानंतरही त्यांना सुविधा देणे चुकीचे असल्याचे आंदोलकांचे म्हणणे आहे. व्यापारी सतीश पाटील यांनी, “एपीएमसीमध्ये दुकाने भाड्याने घेऊन व्यवसाय करणाऱ्या व्यापाऱ्यांकडून शुल्क आकारले जाते, मात्र खासगी बाजारातील व्यापाऱ्यांना विनामूल्य सुविधा देणे अन्यायकारक आहे,” अशी प्रतिक्रिया दिली.

दरम्यान, एपीएमसी सचिवांनी सांगितले की, खासगी बाजार बंद झाल्यानंतर जिल्हा प्रशासनाच्या आदेशानुसार त्या व्यापाऱ्यांना रविवारी शेतकरी बाजारात तात्पुरती जागा देण्यात आली होती. आता प्रशासनाच्या सूचनेनुसार त्यांचे मुख्य बाजार परिसरात स्थलांतर करण्याचा प्रयत्न सुरू असून, त्यांच्याकडून वीज व इतर सुविधा शुल्कही आकारले जात आहे.

या आंदोलनात एपीएमसीचे माजी अध्यक्ष, व्यापारी आणि शेतकरी मोठ्या संख्येने सहभागी झाले होते.

The post खासगी बाजारातील व्यापाऱ्यांच्या विलीनीकरणाविरोधात एपीएमसीसमोर आंदोलन appeared first on News 24 Tass Marathi.

बेळगाव / प्रतिनिधी

इराण–इस्राईल युद्धाचे पडसाद आता स्थानिक बाजारपेठांवरही उमटू लागले असून त्याचा थेट परिणाम बेळगाव येथील एपीएमसी भाजी मार्केटवर झाला आहे. इंधन दरवाढ, गॅस सिलिंडरची टंचाई आणि राज्याबाहेरील हॉटेल्स बंद पडल्यामुळे भाजीपाल्याची वाहतूक विस्कळीत झाली असून भाजीपाला व्यापारात मोठी घट झाल्याने व्यापारी आणि शेतकरी आर्थिक अडचणीत सापडले आहेत.

कर्नाटकातील दुसऱ्या क्रमांकाची मोठी बाजारपेठ असलेल्या बेळगाव एपीएमसीमध्ये दररोज गोवा, महाराष्ट्र आणि मंगळूरसह विविध भागांमध्ये मोठ्या प्रमाणात भाजीपाला पाठवला जातो. मात्र युद्धजन्य परिस्थितीमुळे इंधन दर वाढले असून गॅस सिलिंडरच्या कमतरतेमुळे त्या भागातील अनेक हॉटेल्स आणि कॅन्टीन बंद पडली आहेत. परिणामी भाजीपाल्याची मागणी कमी झाली असून वाहतूक साखळी विस्कळीत झाली आहे.

या परिस्थितीचा परिणाम एपीएमसीच्या व्यवहारावरही झाला आहे. साधारणपणे दररोज सुमारे दोन कोटी रुपयांची उलाढाल होणाऱ्या भाजी मार्केटमध्ये आता ती केवळ एक कोटी रुपयांवर आली आहे. म्हणजेच व्यापार जवळपास पन्नास टक्क्यांनी घटल्याचे चित्र आहे. गेल्या तीन ते चार महिन्यांपासून मेहनत घेऊन पिकवलेल्या भाज्यांना योग्य दर मिळत नसल्याने शेतकरी चिंतेत असून विक्री न झालेला भाजीपाला कुजण्याची वेळ येत आहे.

एपीएमसी भाजीपाला घाऊक विक्रेते संघटनेचे संचालक सतीश पाटील यांनी याबाबत चिंता व्यक्त करत सांगितले की, युद्धजन्य परिस्थितीमुळे निर्माण झालेल्या पुरवठा टंचाई आणि इंधन दरवाढीचा सर्वाधिक फटका शेतकरी आणि व्यापाऱ्यांना बसत आहे. सरकारने तातडीने हस्तक्षेप करून वाहतूक व्यवस्था सुरळीत करण्यासाठी पर्यायी उपाययोजना केल्या नाहीत तर भाजीपाला उत्पादकांना मोठ्या आर्थिक संकटाला सामोरे जावे लागू शकते.

The post इराण – इस्राईल युद्धाचा बेळगाव एपीएमसीला फटका appeared first on News 24 Tass Marathi.

जय किसान भाजी मार्केट यांनी दाखल केलेल्या दोन्ही याचिका कर्नाटक उच्च न्यायालयाने फेटाळल्या आहेत. न्यायालयाने आपल्या निर्णयात स्पष्ट केले की या प्रकरणात अर्जदारांनी प्रथम कर्नाटक राज्य प्रशासकीय न्यायाधिकरणाकडे (KAT) जाणे आवश्यक होते.

या निर्णयानंतर जय किसान भाजी मार्केट असोसिएशनकडे आता कर्नाटक राज्य प्रशासकीय न्यायाधिकरण (KAT) समोर दाद मागण्याचा पर्याय उपलब्ध आहे.

या संदर्भात प्रतिक्रिया देताना राजू टोप्पन्नावर म्हणाले, “न्यायालयाच्या निर्णयानंतर व्यापाऱ्यांनी वास्तव स्वीकारावे. आता आंदोलन मागे घेऊन APMC परिसरात शांततेत आणि सहकार्याने व्यवसाय सुरू ठेवावा.” त्यांनी पुढे सांगितले, “जर जय किसान असोसिएशनने KAT कडे दाद मागितली, तरी आम्ही त्यासाठी पूर्णपणे तयार आहोत.”

दरम्यान, उच्च न्यायालयाच्या या निर्णयानंतर जय किसान भाजी मार्केटमधील व्यापाऱ्यांमध्ये संभ्रमाचे वातावरण निर्माण झाले असून, सर्व व्यापाऱ्यांशी चर्चा करूनच पुढील भूमिका निश्चित केली जाईल, अशी माहिती संबंधित व्यापाऱ्यांकडून मिळाली आहे.

The post जय किसान भाजी मार्केटच्या दोन्ही याचिका उच्च न्यायालयाने फेटाळल्या appeared first on News 24 Tass Marathi.

येथील जय किसान या खासगी बाजाराने आपले व्यवहार थांबवल्यामुळे, येथील कृषी उत्पन्न बाजार समितीमध्ये सलग दुसऱ्या दिवशीही शेतकरी मोठ्या संख्येने आपला शेतमाल घेऊन आल्याचे दिसून आले. त्यामुळे बाजारपेठेत शेतकऱ्यांची गर्दी वाढली होती. बेळगावमधील जय किसान या खासगी बाजाराचा परवाना रद्द झाल्याने शेतकरी आपला शेतमाल बुधवारपासून बेळगाव एपीएमसीमध्ये आणत आहेत. आज, गुरुवारीदेखील विविध भागांतून शेतकरी मोठ्या संख्येने आपला माल घेऊन एपीएमसीमध्ये आले होते. यावेळी व्यापाऱ्यांनीही चांगला प्रतिसाद दिला, असे दृश्य बाजारपेठेत दिसत होते.

The post कृषी उत्पन्न बाजार समितीत दुसऱ्या दिवशीही गर्दी appeared first on News 24 Tass Marathi.

बेळगाव / प्रतिनिधी

राज्याच्या पणन खात्याने काही त्रुटींमुळे जय किसान खासगी होलसेल भाजी मार्केटचा व्यापारी परवाना रद्द केल्यानंतर, बेळगाव कृषी उत्पन्न बाजार समितीचे (एपीएमसी) भाजी मार्केट तब्बल तीन वर्षे आठ महिन्यांनंतर पुन्हा पूर्ण क्षमतेने सुरू झाले आहे. बुधवारी पहाटेपासूनच बाजार परिसर खरेदी–विक्रीच्या उलाढालीने गजबजून गेला होता.

३ जानेवारी २०२२ रोजी बंद पडलेले हे मार्केट १७ सप्टेंबर २०२५ रोजी पुन्हा सुरू झाले. मंगळवारी काही किरकोळ विक्रेत्यांनी छोट्या प्रमाणात व्यापार केला होता; मात्र बुधवारी पहाटेपासून जिल्ह्यातील तसेच परगावांतील शेतकऱ्यांनी मोठ्या प्रमाणात भाजीपाला आणि इतर कृषी माल येथे आणला.

भाजीपाला भरलेल्या ट्रक, टेम्पो, ट्रॅक्टर इत्यादी वाहनांचे एपीएमसी प्रशासन व शेतकरी नेत्यांकडून पुष्पहार घालून स्वागत करण्यात आले. एपीएमसी अधिकाऱ्यांनी सांगितले की, “पहिल्याच दिवशी शेतकरी आणि व्यापाऱ्यांकडून मिळालेला उत्स्फूर्त प्रतिसाद समाधानकारक आहे. पूर्वीप्रमाणे बाजार हळूहळू गजबजू लागला असून जवळपास ७५ ते ८० टक्के शेतकरी व्यापारासाठी उपस्थित होते.”

व्यापाऱ्यांनी शेतकऱ्यांचा माल उत्साहाने खरेदी करून योग्य दर देण्यास सुरुवात केली आहे. शेतकरी व व्यापाऱ्यांसाठी पिण्याचे स्वच्छ पाणी, स्वच्छतागृह, दोन कँटीन, शेतकऱ्यांच्या विसाव्यासाठी रयत भवन तसेच प्रशस्त पार्किंग यांसारख्या सुविधा उपलब्ध करून देण्यात आल्या आहेत.

वाहनांची कोंडी टाळण्यासाठी सुयोग्य वाहतूक व पार्किंगची व्यवस्था करण्यात आली आहे. मार्केटमधील गाळे ए, बी, सी, डी अशा चार इमारतींमध्ये विभागले असून यापैकी सुमारे १०० गाळ्यांमध्ये व्यवहार सुरू झाले आहेत, तर अजून जवळपास १५० गाळे रिकामे आहेत.

The post एपीएमसी भाजी मार्केट पुन्हा गजबजले appeared first on News 24 Tass Marathi.