बेळगाव : बेळगाव तालुक्यातील के.के.कोप्प गावाजवळ सात एकर प्रशस्त जागेवर तिरुपती बालाजी मंदिर उभारण्याचा महत्त्वाकांक्षी प्रकल्प आकार घेत आहे. तिरूमला तिरुपती देवस्थान आणि बेळगाव रेड्डी संघ यांच्या संयुक्त विद्यमाने हा उपक्रम राबवला जात असून, यासाठी जमीन हस्तांतरणाचा कार्यक्रम मंगळवारी सदाशिवनगर येथील रेड्डी भवनमध्ये पार पडला.

यावेळी माध्यमांशी संवाद साधताना तिरूमला तिरुपती देवस्थान प्रशासन मंडळाचे सदस्य एस. नरेश कुमार यांनी सांगितले की, मंदिरासाठी आवश्यक सात एकर जमीन रेड्डी संघाने स्वखर्चाने उपलब्ध करून दिली आहे. सध्या मंदिराचा सविस्तर आराखडा तयार करण्याचे काम सुरू असून, येत्या महिन्यात भूमिपूजन आणि पायाभरणी करण्याचे नियोजन आहे.

सुमारे १०० कोटी रुपयांचा हा प्रकल्प असून त्यापैकी ८० टक्के निधी तिरूमला तिरुपती देवस्थानकडून, १० टक्के रेड्डी संघाकडून आणि उर्वरित १० टक्के निधी स्थानिक भाविक व नागरिकांच्या देणगीतून उभारला जाणार आहे. प्रकल्पाची अंमलबजावणी ट्रस्टमार्फत केली जाणार असून, स्थानिकांना ट्रस्टमध्ये प्रतिनिधित्व देण्याचाही विचार असल्याचे त्यांनी स्पष्ट केले.

बेळगाव हे तीन राज्यांच्या सीमेवर असल्यामुळे या मंदिराला विशेष महत्त्व प्राप्त होणार आहे. तिरुपतीप्रमाणेच येथे नित्यपूजा, विविध धार्मिक कार्यक्रम, अन्नदान सेवा आणि प्रसाद वितरणाची व्यवस्था केली जाणार आहे. तसेच भाविकांसाठी निवास, प्रशस्त पार्किंग आणि इतर मूलभूत सुविधा उपलब्ध करून देण्यात येणार आहेत.

तिरुपतीपर्यंत सुमारे ९०० किलोमीटर प्रवास करण्याऐवजी भाविकांना आता बेळगावातच तिरुपती बालाजीचे दर्शन घेता येणार असल्याने हा प्रकल्प धार्मिक आणि पर्यटनदृष्ट्या महत्त्वाचा ठरणार आहे.

The post बेळगावातच मिळणारं तिरुपती बालाजीचे दर्शन… appeared first on News 24 Tass Marathi.

आंध्रप्रदेश : येथील कुर्नूल भागात गुरुवारी उशिरा रात्री एक भीषण अपघात घडला. हैदराबादवरून बंगळुरूकडे जाणाऱ्या व्होल्वो बसला अचानक आग लागून २० प्रवाशांचा मृत्यू झाल्याची प्राथमिक माहिती समोर आली आहे. या बसमध्ये एकूण ४० प्रवासी होते.

पोलिसांच्या माहितीनुसार, बसला दुचाकीची धडक बसल्यानंतर इंधनटाकीत स्फोट झाला आणि क्षणात आग भडकली. अग्निशामक दल घटनास्थळी दाखल होईपर्यंत बस पूर्णपणे जळून खाक झाली होती. अपघात एवढा भीषण होता की अनेक प्रवाशांना बाहेर पडण्याची संधीच मिळाली नाही.

या अपघातात जखमी झालेल्यांना जवळच्या रुग्णालयात दाखल करण्यात आले आहे. या घटनेमुळे परिसरात हळहळ व्यक्त केली जात आहे.

The post आंध्रप्रदेशात भीषण बस दुर्घटना appeared first on News 24 Tass Marathi.

याप्रसंगी मराठा समाजाचे नेते विनय कदम यांच्या नेतृत्वाखाली पश्चिम बेळगावातील शेकडो कार्यकर्ते पायी चालत आंध्र प्रदेशातील तिरुपती तिरूमला देवस्थान येथे पोहोचले.

यावेळी बेळगाव तालुका मराठा संघटनेचे अध्यक्ष संजय पाटील, श्री वारकरी सेवा प्रतिष्ठानचे अध्यक्ष परशराम तुप्पट, आर.आर. चौगुले यांच्यासह अनेक कार्यकर्त्यांनी सामूहिक दर्शन घेऊन कर्नाटकातील मराठा समाजाला ‘२ए’ प्रवर्गात आरक्षण मिळावे, यासाठी साकडे घातले.

The post कर्नाटकातील मराठा समाजाच्या ‘२ए’ आरक्षणासाठी तिरुपतीला साकडे ! appeared first on News 24 Tass Marathi.

कोल्हापूर / प्रतिनिधी

कर्नाटक राज्याकडून आलमट्टी धरणाची उंची वाढवण्यात येणार आहे.या प्रश्नी १८ जून रोजी नवी दिल्ली येथे केंद्रीय जलशक्ती मंत्री सी.आर.पाटील यांच्यासोबत बैठक होणार आहे.

यामध्ये महाराष्ट्रासह आंध्रप्रदेश, तेलंगणा, कर्नाटक या राज्यांचे मंत्री आणि शासकीय अधिकारी सहभागी होणार आहेत. या बैठकीत धरणाची उंची, महापुराच्या काळात धरणातील पाणीसाठा, आंतरराज्य पाणी करार याबाबत चर्चा होणार आहे,अशी माहिती कोल्हापूरचे पालकमंत्री प्रकाश आबिटकर यांनी दिली आहे. तेथे होणाऱ्या चर्चेनंतर पुढील कार्यवाहीची दिशा निश्चित होणार आहे असे त्यांनी सांगितले आहे.

The post आलमट्टी धरणाची उंची वाढवण्यासंदर्भात १८ जून रोजी दिल्लीत बैठक appeared first on News 24 Tass Marathi.