बागलकोट : जिल्ह्यातील मुधोळ तालुक्यात पंतप्रधान फसल विमा योजनेच्या नावाखाली तब्बल ३० कोटी रुपयांचा मोठा घोटाळा उघडकीस आला असून, या प्रकरणी ११ जणांविरुद्ध गुन्हा दाखल करण्यात आला आहे. बनावट कागदपत्रे आणि फोटो वापरून सरकारची फसवणूक करण्यात आल्याचे तपासात समोर आले आहे.

या प्रकरणाचा उलगडा एका निनावी पत्रामुळे झाला. आपली ओळख गुप्त ठेवत संबंधित व्यक्तीने दिलेल्या माहितीनुसार प्रशासन सतर्क झाले आणि सखोल चौकशीत हा धक्कादायक प्रकार समोर आला. २०२०-२१ पासून शेतकऱ्यांच्या नावाने बनावट फोटो तयार करून, प्रत्यक्षात पीक नसतानाही विमा रक्कम काढण्यात आली. या मार्गाने सुमारे ३०,२८,५१,५८० रुपयांची फसवणूक करण्यात आल्याचे उघड झाले आहे.

या प्रकरणी मुधोळ कृषी विभागाचे सहायक संचालक सिद्धलिंगेश दोडामणी यांनी तक्रार दाखल केली असून, मेटागुड्डा गावातील सात जणांसह युनिव्हर्सल सोमपू विमा कंपनीच्या चार कर्मचाऱ्यांविरुद्ध एफआयआर नोंदवण्यात आला आहे.

दरम्यान, विमा कंपनीचे कर्मचारी यशवंत, राकेश, प्रकाश आणि अनिल यांना अटक करण्यात आली असून, उर्वरित आरोपींचा शोध सुरू आहे. या घोटाळ्यात काही सरकारी अधिकाऱ्यांचाही सहभाग असण्याची शक्यता व्यक्त होत असून, तपास अधिक तीव्र करण्यात आला आहे.

शेतकऱ्यांच्या हक्काच्या योजनेचा गैरवापर करून कोट्यवधींची लूट केल्याने जिल्ह्यात खळबळ उडाली असून, दोषींवर कठोर कारवाई करण्याची मागणी होत आहे.

The post बागलकोटमध्ये पीक विम्याच्या नावाखाली ३० कोटींची फसवणूक appeared first on News 24 Tass Marathi.

बेळगाव / प्रतिनिधी

बेळगाव तालुक्यातील विविध भागांत झालेल्या अवकाळी पावसामुळे रब्बी हंगामातील पिकांचे मोठ्या प्रमाणात नुकसान झाले असून, शेतकरी आर्थिक संकटात सापडले आहेत. तालुक्याच्या उत्तर आणि पूर्व भागातील शेतकऱ्यांना या पावसाचा सर्वाधिक फटका बसला आहे.

या परिसरात रब्बी हंगामात मोठ्या प्रमाणावर ज्वारीची लागवड केली जाते. मात्र अगसगे, हंदिगनूर, चलवेनट्टी, केदनूर, मण्णिकेरी आदी गावांमध्ये बहरात असलेले ज्वारीचे पीक अवकाळी पावसामुळे भुईसपाट झाले आहे. ऐन काढणीच्या तोंडावर पीक कोसळल्याने शेतकऱ्यांचे मोठे नुकसान झाले असून अपेक्षित उत्पादन हातचे गेले आहे.

यंदा खरीप हंगामात समाधानकारक पाऊस झाल्याने ज्वारीचे पीक चांगले उभे राहिले होते. त्यामुळे उत्पादन वाढेल आणि काही आर्थिक दिलासा मिळेल, अशी आशा शेतकऱ्यांनी बाळगली होती. मात्र अनपेक्षित पावसामुळे ही सर्व स्वप्ने उद्ध्वस्त झाली असून, शेतकऱ्यांच्या आशांवर पाणी फेरले आहे.

अवकाळी पावसामुळे झालेल्या नुकसानीचे तातडीने पंचनामे करून सरकारने मदत जाहीर करावी, अशी मागणी बाधित शेतकऱ्यांकडून होत आहे.

The post अवकाळी पावसाचा रब्बी पिकांना फटका appeared first on News 24 Tass Marathi.

नऊ हत्तींच्या कळपाने निलावडे परिसरात अक्षरशः उच्छाद मांडला आहे. हातातोंडाला आलेल्या भात, कस पिकासह केळी व नारळाच्या झाडांचे आणि पाईपलाईनचे अतोनात नुकसान सुरू असून या संकटातून कसे सावरावे, याची चिंता शेतकऱ्यांना लागून आहे. मंगळवारी रात्री आंबोळी येथील विष्णू पाटील, पांडुरंग गवाळकर या शेतकऱ्यांच्या उसाच्या शेतात हत्तींनी रात्रभर मुक्काम केला. या दोन्ही शेतकऱ्यांचा एक टनही ऊस शिल्लक राहिलेला नाही. बांदेकरवाडा येथील शेतकरी नारायण दळवी यांनी मळणी करून वाहतुकीसाठी ट्रॅक्टरची सोय न झाल्याने २० पोती भात शेतातच ठेवले होते. या आयत्या खाद्यावर हत्तींनी रात्रभर ताव मारला. दळवी यांना काहीच पीक शिल्लक राहिले नाही. त्यांच्या नुकसानीची दखल घेऊन तातडीने २० हजारांचा धनादेश सुपूर्द करण्यात आला.

हत्तींचा कळप ज्या शिवारातून जात आहे तेथील पाईपलाईन उध्वस्त करत आहे. केळी आणि नारळाची झाडे तर जमीनदोस्त केली जात असून निलावडे, बांदेकरवाडा, आंबोळी, मुधवडे, कोकणवाडा, कबनाळी, कांजळे आणि मळव या भागातील शेतकरी नुकसानी बरोबरच भीतीच्या सावटाखाली जगत आहे. वनक्षेत्रपाल श्रीकांत पाटील यांच्या नेतृत्वाखाली वनविभागाचे पथक रात्रभर गस्त घालत असून हत्तींचा कळप आवरत नसल्याने सारेच हतबल झाले आहेत. भरपाईचे अर्ज ग्रा. पं. मध्ये उपलब्ध ठेवा हत्तींकडून मोठ्या प्रमाणात पिकांचे नुकसान सुरू आहे. वनखात्याकडून भरपाई मिळवण्यासाठी अर्ज करताना शेतकऱ्यांना हेलपाटे मारावे लागतात. शेतकऱ्यांचे त्रास रोखण्यासाठी निलावडे ग्रामपंचायत कार्यालयात नुकसानभरपाईचे अर्ज उपलब्ध ठेवावेत. वनविभागाने तेथे कर्मचारी नेमून आवश्यक कार्यवाही पूर्ण करावी, अशी मागणी निलावडे ग्रा. पं. सदस्य विनायक मुतगेकर यांनी केली आहे.

The post हत्तींकडून नुकसानीचे सत्र सुरूच appeared first on News 24 Tass Marathi.

बेळगाव / प्रतिनिधी

शेतकरी, कृषी विभाग आणि साखर विभाग यांच्यात योग्य समन्वय असून नवीन प्रकल्प व आधुनिक यंत्रसामग्रीची माहिती शेतकऱ्यांपर्यंत पोहोचत आहे. आमचे सरकार शेतकरी हिताचे असून शेतकऱ्यांचे उत्पन्न वाढवण्यासाठी वचनबद्ध आहे, असे मुख्यमंत्री सिद्धरामय्या यांनी सांगितले.

बेळगाव तालुक्यातील हुदली गावात साखर कारखान्यांच्या सहकार्याने राबविण्यात येणाऱ्या एकात्मिक माती व पाणी व्यवस्थापन, कचरा व्यवस्थापन, पाण्याचा कार्यक्षम वापर आणि संतुलित पोषक तत्त्व व्यवस्थापन प्रकल्पाच्या शुभारंभप्रसंगी ते बोलत होते.

मुख्यमंत्री म्हणाले की, भारत हा कृषीप्रधान देश असून सुमारे ६० टक्के लोकसंख्या शेतीवर अवलंबून आहे. मातीचे आरोग्य आणि पाणी व्यवस्थापनाकडे विशेष लक्ष देणे आवश्यक आहे. रासायनिक खतांच्या अति वापरामुळे जमिनीची सुपीकता घटते, त्यामुळे शाश्वत शेती पद्धती अवलंबणे गरजेचे आहे. शेतीसाठी अनावश्यक पाण्याचा वापर टाळावा, यासाठी सरकार ठिबक सिंचन योजनांना अधिक प्रोत्साहन देत आहे.

यावेळी जिल्हा पालकमंत्री व सार्वजनिक बांधकाम मंत्री सतीश जारकीहोळी म्हणाले की, इतर देशांमध्ये कमी जमीन व पाण्याच्या वापरातून शेतकरी दोन ते तीनपट अधिक उत्पन्न घेत आहेत. आधुनिक तंत्रज्ञानाचा अवलंब केल्यास आपले शेतकरीही जास्त उत्पन्न मिळवू शकतात. शेतकऱ्यांना आवश्यक त्या सर्व सुविधा उपलब्ध करून देण्यासाठी सरकार प्रयत्नशील आहे.

या कार्यक्रमास महिला व बालविकास मंत्री लक्ष्मी हेब्बाळकर, मंत्री चालुवर्यस्वामी, सरकारी मुख्य सचेतक अशोक पट्टण, बुडा अध्यक्ष लक्ष्मणराव चिंगळे, जिल्हाधिकारी मोहम्मद रोशन, जिल्हा पंचायत मुख्य कार्यकारी अधिकारी राहुल शिंदे यांच्यासह अनेक मान्यवर उपस्थित होते.

The post शेतकऱ्यांचे उत्पन्न वाढवण्यासाठी कटिबद्ध appeared first on News 24 Tass Marathi.

बेळगाव / प्रतिनिधी

कृषी आणि फलोत्पादन विभागांतर्गत मागील जवळपास दशकभर सेवा बजावत असलेल्या पीक सर्वेक्षकांनी कोणत्याही सुविधा न मिळाल्यामुळे तसेच जीव धोक्यात घालून काम करूनही योग्य संरक्षण नसल्याने आज जिल्हाधिकारी कार्यालयासमोर निदर्शने केली.

पीक नोंदणी आणि सर्वेक्षणाचे जबाबदारीचे काम करताना अनेक वेळा जंगल परिसर, दुर्गम भागात त्यांना जाणे आवश्यक होते. अशावेळी सर्प, कीटक, तसेच वन्य प्राण्यांचा धोका कायम असतो. त्यामुळे जीवन विमा आणि सुरक्षा साधनांची तातडीने व्यवस्था करण्यात यावी, अशी संघटनेची प्रमुख मागणी आहे.

यासोबतच त्यांना मिळणाऱ्या मानधनावरही आंदोलक संताप व्यक्त करत होते. वर्षानुवर्षे फक्त एक रुपयांची वाढ, हा सरकारचा अतिशय अवमानकारक निर्णय असल्याचे त्यांनी ठणकावले. “एका महिन्याचे काम एका आठवड्यात संपवा असे आदेश दिले जातात आणि त्यासाठी मिळते फक्त १ रुपयाची वाढ? हे शोषण नाही तर काय?” असा सवाल संघटनेच्या अध्यक्षांनी उपस्थित केला.

जिल्ह्यातील १५ तालुक्यांतून मोठ्या संख्येने पीक सर्वेक्षक या आंदोलनात सहभागी झाले होते. सरकारने मागण्यांकडे सकारात्मक दृष्टीकोनाने पाहून त्वरित निर्णय घ्यावा, अन्यथा राज्यभर मोठ्या प्रमाणावर आंदोलन छेडण्याचा इशारा संघटनेने दिला आहे.

The post जीवन विम्यासह मूलभूत सुविधा तात्काळ पुरावा appeared first on News 24 Tass Marathi.

येडूर / वार्ताहर

येडूर येथे शॉर्टसर्किटमुळे लागलेल्या आगीत ब्बल ५० एकरातील ऊस पीक जळून खाक झाले. ही घटना गुरुवारी सकाळी येडूर येथे घडली. यामुळे शेतकरीवर्ग पूर्णपणे हतबल झाला असून शासनाने तातडीने पंचनामे करून नुकसानभरपाई द्यावी, अशा मागणी होत आहे.

सकाळच्या सुमारास लोंबकळणाऱ्या विद्युत तारांमध्ये घर्षण होताना ठिणगी पडल्याने उसाच्या फडास आग लागली.वाऱ्याचा वेग वाढल्याने आग नियंत्रणाबाहेर गेली. ग्रामस्थांनी स्वत:च्या प्रयत्नाने आग विझवण्याचा प्रयत्न केला. परंतु भीषण आगीचा विस्तार प्रचंड असल्याने अग्निशमन तदलाला पाचारण करावे लागले. बंब घटनास्थळी दाखल होईपर्यंत मोठ्या प्रमाणात उसाचे पीक जळून गेले होते. यावेळी आग विझवण्यासाठी चिदानंद कोरे सहकारी साखर कारखाना चिकोडी व सदलगा अग्निशमन दलाची मदत बणाऱ्या विद्युत घेण्यात आली होती. पण आग आटोक्यात आली नाही. त्यामुळे परिसरातील ५० एकर ऊस आगीत जळाला.

सुरेश कागवाडे, महेश कागवाडे, चंद्रशेखर कागवाडे, बाळू कागवाडे, इरगोंडा पाटील, प्रकाश मिरजे, सदाशिव मिरजे, अशोक मिरजे, वसंत शिंदे, मारुती शिंदे, शिवाजी शिंदे, रामा शिंदे, शंकर शिंदे, आण्णाप्पा नोरजे, धोंडिबा सूर्यवंशी, नेमण्णा अम्मणगी, सतीश चव्हाण, राजू चव्हाण, सचिन चव्हाण, बाबू चव्हाण, विठ्ठल खडके, शिवाजी खडके, प्रशांत उमराणे या शेतकऱ्यांचे नुकसान झाले आहे. एक वर्षभर केलेल्या कष्टाचे पीक क्षणात जळून गेले आहे. शासनाने तातडीने मदत करावी, असे अशी मागणी नुकसानग्रस्त शेतकऱ्यांनी केली आहे.

या घटनेनंतर संपूर्ण परिसरात चिंता आणि असुरक्षिततेचे वातावरण निर्माण झाले आहे. शेतकऱ्यांच्या आत्मविश्वासावर मोठा परिणाम झाला असून राज्य सरकारने साहाय्य केले तरच पुढील हंगामाचे पीक घेता येईल, अशी प्रतिक्रिया व्यक्त होत आहे. विद्युत मंडळाने जुन्या आणि जीर्ण वीजतारा तातडीने बदल्याची गरज आहे. शेती भागात तारांची उंची वाढवून सुरक्षितता वाढवणे गरजेचे आहे. आता प्रशासनाने यातून धडा घेऊन संपूर्ण परिसरातील वीज तारा बदलणे नव्हे तर सुरक्षित शेतीसाठी वेगळा आराखडा तयार करणे गरजेचे आहे. नाहीतर अशा घटना पुन्हा घडू शकतात, अशी स्थानिक ग्रामस्थांकडून मागणी होत आहे.

The post शॉर्टसर्किटने ५० एकरातील ऊस जळाला appeared first on News 24 Tass Marathi.

खानापूर तालुक्यातील हलसाल या गावात गेल्या दोन दिवसांपासून आठ हत्तींचा कळप थैमान घालत असून, गावातील शेतकऱ्यांच्या लाखो रुपयांच्या भातपिकांचे मोठे नुकसान झाले आहे. शेतकरी वर्गामध्ये भीतीचे वातावरण निर्माण झाले असून, वन विभागाने तत्काळ हत्तींचा बंदोबस्त करून नुकसानग्रस्त शेतकऱ्यांना नुकसानभरपाई देण्याची मागणी होत आहे. मिळालेल्या माहितीनुसार, हलसाल येथील शेतकरी मारूती मष्णु तांबुळकर यांच्या ‘थोरले शेत (भटाच शेत) ‘ येथे हत्तींच्या कळपाने मोठे नुकसान केले आहे. त्यांच्या सुमारे वीस पोती भातपिकाचे हत्तीने पूर्णपणे चिरडून टाकले असून, हाता-तोंडाशी आलेला घास हिरावला गेला आहे. तसेच शेतकरी लक्ष्मण गंगाराम तांबुळकर यांच्या शेतातील सुमारे १० पोती भातपिकाचे, तर कुमार पंकज पुंडलिक तांबुळकर यांच्या शेतातील सुमारे १० पोती भातपिकाचे नुकसान हत्तींच्या कळपाने केले आहे. या घटनेमुळे गावातील शेतकरी हवालदिल झाले आहेत.

हत्ती आपल्या शेताकडे येत असल्याची माहिती मिळताच गावातील दहा-पंधरा शेतकरी फटाक्यांच्या आवाजाने हत्ती पळवण्यासाठी फटाके घेऊन एकत्र आले होते. मात्र, हत्तीनी चतुराईने शेतकऱ्यांना चकवा देत, ते थांबलेल्या ठिकाणापासून सुमारे ३०० मीटर अंतरावर असलेल्या मारुती तांबुळकर यांच्या शेतात घुसून नुकसान केले. शेतकऱ्यांना याची कल्पनाच झाली नाही आणि काही वेळातच त्यांनी आपले पीक उद्ध्वस्त झाल्याचे पाहिले. स्थानिक शेतकऱ्यांनी वन खात्याच्या अधिकाऱ्यांना तातडीने घटनास्थळी भेट देऊन पंचनामा करण्याची व नुकसानभरपाईची मागणी केली आहे. तसेच, अलीकडेच सुलेगाळी येथे दोन हत्तींच्या मृत्यूच्या प्रकरणी शेतकऱ्यावर कायदेशीर कारवाई करण्यात आली होती, त्याच धर्तीवर आता “शेतकऱ्यांच्या नुकसानीला जबाबदार असलेल्या वन अधिकाऱ्यांवरही कारवाई करावी’ अशी मागणी शेतकरी वर्गातून होत आहे. गावकऱ्यांचा आरोप आहे की, वन विभाग हत्तींच्या हालचालीवर लक्ष ठेवण्यात पूर्णपणे अपयशी ठरला आहे. रात्रीच्या वेळी हत्तींचे कळप गावात घुसतात, शेती उद्ध्वस्त करतात, परंतु कोणतीही प्रभावी उपाययोजना होत नाही.

या घटनेनंतर हलसाल आणि आसपासच्या परिसरात हत्तींचा बंदोबस्त करण्याची मागणी जोर धरत आहे. शेतकरी म्हणत आहेत की, “आम्ही दिवसरात्र शेतीत कष्ट करतो, पण हत्ती एका रात्रीत सर्व नष्ट करून जातात. आम्हाला नुकसानभरपाई मिळाली नाही तर आम्ही आंदोलनाचा मार्ग स्वीकारू.” वन खात्याने तातडीने उपाययोजना करून हलसाल परिसरातील शेतकऱ्यांचे नुकसान भरून काढावे, अशी एकमुखी मागणी करण्यात येत आहे.

The post हलसाल येथे आठ हत्तींच्या कळपाचे थैमान appeared first on News 24 Tass Marathi.

शेतकऱ्यांच्या पीक नुकसानीची त्वरित भरपाई करावी, कर्ज माफ करावे, तसेच ऊस उत्पादक शेतकऱ्यांसाठी एफआरपीऐवजी करातून मिळणारे रू. २०००/- थेट खात्यात जमा करावे, अशा विविध मागण्यांसाठी कर्नाटक राज्य शेतकरी संघटनेने मुख्यमंत्र्यांना निवेदन सादर केले.

कर्नाटक राज्य शेतकरी संघटनेच्या वतीने मोठी रॅली काढण्यात आली, आणि बेळगावमध्ये आगमन झालेले मुख्यमंत्री सिद्धरामय्या यांना निवेदन देण्यात आले.

अतिवृष्टी आणि पूर यामुळे शेतकऱ्यांचे ऊस, सोयाबीनसह इतर अनेक पिकांचे नुकसान झाले आहे, आणि यासाठी त्वरित भरपाई देण्याची मागणी करण्यात आली आहे. येत्या काही दिवसांत साखर कारखाने ऊस गाळप हंगाम सुरू करणार असल्याने, शेतकऱ्यांना एफआरपी देण्याऐवजी करातून मिळणारे रू. २०००/- थेट खात्यात जमा करावे, अशी विनंती करण्यात आली आहे. याशिवाय तलाव भरणे, गाळ काढण्याची योजना, पुरेशा प्रमाणात वीजपुरवठा, शेतकऱ्यांना त्रास देणारे कायदे मागे घेणे आणि सुवर्णसौध येथे सचिव स्तरावरील कार्यालयांचे स्थलांतर यासंबंधी तातडीने कारवाई करण्याची मागणीही केली आहे. कर्नाटक राज्य शेतकरी संघटनेचे राज्य कार्याध्यक्ष राजू पवार यांनी शेतकऱ्यांचे पीक कर्ज माफ करण्याची मागणी देखील केली.

यावेळी प्रकाश नाईक, सत्यप्पा मल्लापुरे, चुनप्पा पुजारी, सुभाष शिरगूर, किशन नंदी, रमेश वाळी, बाबूगौडा पाटील, गंगाधर मेटी, कुमार मरडी यांच्यासह इतर अनेक शेतकरी उपस्थित होते.

The post कर्जमाफी आणि आर्थिक मदतीसाठी शेतकऱ्यांचे मुख्यमंत्र्यांना साकडे ! appeared first on News 24 Tass Marathi.

येथील जय किसान या खासगी बाजाराने आपले व्यवहार थांबवल्यामुळे, येथील कृषी उत्पन्न बाजार समितीमध्ये सलग दुसऱ्या दिवशीही शेतकरी मोठ्या संख्येने आपला शेतमाल घेऊन आल्याचे दिसून आले. त्यामुळे बाजारपेठेत शेतकऱ्यांची गर्दी वाढली होती. बेळगावमधील जय किसान या खासगी बाजाराचा परवाना रद्द झाल्याने शेतकरी आपला शेतमाल बुधवारपासून बेळगाव एपीएमसीमध्ये आणत आहेत. आज, गुरुवारीदेखील विविध भागांतून शेतकरी मोठ्या संख्येने आपला माल घेऊन एपीएमसीमध्ये आले होते. यावेळी व्यापाऱ्यांनीही चांगला प्रतिसाद दिला, असे दृश्य बाजारपेठेत दिसत होते.

The post कृषी उत्पन्न बाजार समितीत दुसऱ्या दिवशीही गर्दी appeared first on News 24 Tass Marathi.

बेळगाव / प्रतिनिधी

गेल्या तीन वर्षांपासून मुतगा प्राथमिक कृषी पत्तीन सोसायटीकडून शेतकऱ्यांना पीक कर्ज देण्यात आलेले नाही. दहा दिवसांत कर्ज वाटप न केल्यास तीव्र आंदोलनाचा इशारा मुतगा येथील शेतकऱ्यांनी दिला आहे. आज शनिवारी श्री रामसेना हिंदुस्थानचे संस्थापक रमाकांत कोंडुसकर यांच्या नेतृत्वाखाली मुतगा येथील शेतकऱ्यांनी जिल्हाधिकारी मोहम्मद रोशन यांना निवेदन सादर केले.

याप्रसंगी बोलताना श्रीरामसेना हिंदुस्थानचे संस्थापक रमाकांत कोंडुसकर म्हणाले, बेळगाव जिल्हा मध्यवर्ती सहकारी बँकेने जिल्ह्यातील शेतकऱ्यांना ४,५०० कोटी रुपयांचे पीक कर्ज दिले आहे. मात्र, मुतगा प्राथमिक कृषी पत्तीन सोसायटीकडून गेल्या तीन वर्षांपासून शेतकऱ्यांना कर्ज वाटप केलेले नाही. ते दोन वर्षांपासून सतत आंदोलन करत आहेत. लोकप्रतिनिधींनी यावर प्रतिक्रिया देत कर्ज देणाऱ्या आणि भ्रष्टाचार करणाऱ्यांवर कारवाई करण्याचे आश्वासन दिले. मात्र, अद्यापपर्यंत कर्ज मिळालेले नाही. जर शेतकऱ्यांना दहा दिवसांत कर्ज दिले नाही तर तीव्र आंदोलन छेडले जाईल, असा इशारा शेतकरी नेते रमाकांत कोंडुसकर यांनी दिला. यावेळी मुतगा गावातील पीडित शेतकरी मोठ्या संख्येने उपस्थित होते.

The post मुतगा प्राथमिक कृषीपत्तीन सोसायटी विरोधात जिल्हाधिकाऱ्यांकडे तक्रार ! appeared first on News 24 Tass Marathi.